مقتطفات

33

2011-06-04T11:54:00.010+02:00

أعشق هذه الحياة بشكل غير مسبوق . امتلك ناحيتها شهوة غير محدودة

تلك هي الحقيقة بلا إنكار ولا مواربة وبدون حتى تجميلها

أعشق الحياة بكل ما فيها بسوءاتها ولن أقول سوءها قبل فضائلها

بل بآلامها ومشاقها ومصاعبها قبل هنأها ورضاها وراحة بالها

أن بحثتم لن تجدو متحملاً وعاشقاً لها مثلى

لن أقول أنها قست على وحملتني ما لم تحمله لبشر ...

بل سأكتفي بان أقول أنى نلت نصيبي منها كما ناله غيري

أعشق اللهو والصخب .. أن اضحك بصوت مرتفع أن أمزح واسخر من كل شئ

فإن لم أجد فـ لأسخر من نفسي

صاخبة ضاجة مزعجة ساخرة ... تلك هي إنا

أصمت أنزوي أنطوى على نفسي لا أتحمل الصخب ولا الضجيج

بل أبحث عن أكثر البقع سكونا وصمتاً

هادئة منعزلة خجولة تسبح فى عالم خاص بها ... تلك هي انا أيضا

لماذا أتحدث الآن ؟ ... ولم لا ؟

أصمت وقت ان يحلو لي وأملأ الدنيا ضجيجا وصخبا وقت ان يحلو لي

حقا لا أعرف ... لكنى نظرت اليوم الى الرقم .. الرقم هو 33 ووجدته كبيراً مهيباً

نظرت فى الاتجاه الأخر ووجدتني

وجدت مخلوقة بين طور الاكتمال الى امرأة وبين نزق الطفولة وعبث الصبية ولهو الشباب

نظرت ولم أجد رابط يربطني ... فما هو هذا الرقم وما هي تلك المخلوقة

وهل يجب على أن احتمل عبء مثل هذا الرقم الثقيل ؟

أم أتغاضى عنة كأني لم أراه اليوم وأكمل عبثي وهدوئي وضجيجي وانطوائي وسخريتي وخجلي

هذا الرقم المتشابه طرفية هل يجب ان يحكمني ويملكني ؟ ان أدعى الهدوء والرزانة والحكمة

فببلوغي لهذا الرقم المتشابه أصبحت امرأة جديدة ؟

كم من مرة عاهدت نفسي ان أغير من نفسي ومن طريقة تعاملي مع الآخرين

وان أغلق أبواب شخصيتي فلا تصبح بكل هذا الوضوح والانفتاح

لكنى أبدا لم أوفى بعهدي تجاهي .. ولا حاولت

أن أضع حاجز بيني وبين تلك الشهوة المفروطة الى الدنيا .. ولم افعل

انتشى سعادة حين يصفعني الهواء على وجهي فى الأماكن الطلق

حين يلطم الماء قدمي على شواطئ البحر

أو يتقاطر على وجهي لما تفيض السماء وتضحك فتنساب ضحكاتها قطرات ماء

أزيح غطاء شعري أنزع حذائي وأعدو تحتها ملطخة بالطين غارقة بالمطر

أن أربى الحمائم والعصافير وألهو مع القطط اعتنى بالكلاب أصطاد الأسماك

أنفر من البشر أو اختلط بهم أصاخبهم وأشاكسهم .. بمعنى أدق ( أجر شكلهم)

لا أتحمل مجاملة الناس وتبادل الحوار معهم أكثر من لحظات وسماع شكواهم وتفاخرهم

ولا أستطيع تحمل التكلف والابتسام لفترة أطول من وميض البرق

لا تفارق البسمة وجهي ولا اكف عن أطلاق أعلى الضحكات وأشدها رنين كقصف الرعد

لا أطيق الاعتياد والتنميط والتعود ولا أبقى فى مكان واحد مدة قدر أصابع اليد الواحدة

أشعر بالضيق والاختناق وتضيق علىّ الأرض بما رحبت

أصبر وأرضا واحتمل ما لا يطاق

وأعشق زوجي

نهايته .. لا اعتقد أنى سأتغير ولا أرغب فى التغيير ولا اعرف أن أتغير

ولا أن أتعامل مع أنا أخرى

ولا أن أكف عن نزقي وجنوني وتهوري وصخبي وهدوئي وأستكانتى وضعفي

وحبي وتحملي للحياة

سواء تشابه الرقم 11 أو 22 أو 33 أو حتى 66

لتتشابه كل الأرقام فما خصني بها ؟

أو لتختلف فلا أبالى

وكفاني أنى اعتصر الحياة فاخذ رحيق مدادها وتعتصرني فتصفى قطرات عرقي وشوائب روحي

من وحى العيد

2010-10-29T10:43:00.005+02:00

العيـــد ... لا بصراحه كان عيد سعيد ورائع وممتع وجميل وكل حاجه حلوة

وربنا يديمها أعياد ويديمها فرحه وسعادة وراحه قلب

--------------------

انا عايزة اعرف الناس اللى بتقول العيد فرحه دى وخصوصااا العيد الكبير

هل الناس السعيدة اللى بتفرح بالعيد دى

جربت تنضف ورا الدبح ؟ طب جربت تنضف وتغسل الحاجات العجيبه الغريبه المريبه اللى ابويا بيصر كل سنه اننا ننضفها لأنه بيحب ياكلها

وبعدين نطبخ ورا جيش عرمرم من الضيوف اللى كله بياكل ... طب دة عيد وأضحيه لله وأكرام الضيف دبحه وكل حاجه

لكن البنيه الغلبانه اللى هى انا تيجب منين صحه للعذاب الأليم دة

----------------

أثناء سفرنا بالسيارة وأبى جالس بجوارى دار هذا الحوار الأبوي الرائع

أنت عميتي يا بت ؟ نظرك راح خلاص ؟ مابقتيش بتشوفى ؟

ياخسارة الشباب .. بقيتي شيش بيش ؟

مش شايفه الأشارات والمطبات وعلامات الأتجاهات ؟

طب والعربيات اللى جايه فـ وشك دى ؟ والنور اللى بيقلبوة .. ماتفتحى بقى وتاخدى بالك دة طريق مش لعبه

مع أنه والله العظيم هو اللى كان سايق

مقتطفات

2010-09-01T21:00:00.008+02:00

لما قولت المفروض نعلن استقلال الصعيد وننفصل بعملتنا وعلمنا ونعمل لنا نشيد قومى ينعزف بالربابه ويرقصو عليه بالعصى ... أشارة من السماء أهى

شيخ العرب همام حاول يستقل قبلى بالصعيد

شكل الصعايدة قرفانين من باقى البلد وعايزين يستقلو من زمااااان

زهرة الخشخاش اتسرقت ... وهنلبسها لشعلان ونرفدة

أنقذ شعلان ... وأشرب أفيون

أخر كلام ... أحنا شعب قذر , والله شعب قذر فعلا

ووساختنا ماسبقناش فيها شعب من شعوب الارض ... حق الريادة فى دى فعلا

كميه الزباله الرهيييبه اللى بنتكعبل بيها فى الشوارع غير طبيعيه

ومش معقول يعنى يكون فيه شعوب أخرى أو قرناء لنا من تحت الأرض بيجو يوسخو شوارعنا النظيفه

كل ست بتاكل نفسها من النضافه والتنفيض والكنس وتروح شايله زبالتها وهووووب من الشباك البلكونه

ونهار ما تكون نضيفه قوى وتتحسد يعنى تركنها قصاد باب شقتها

حدود مملكتها تنتهى قصاد عتبتها ... ووزير المملكه البيه جوزها حدود نظاقته

هى انه يشيل كيس الزباله ويرميه على ناصيه الشارع

حق الله يتقال الزبالين وبتوع البلديه بشوفهم بعيني شغالين من الصبح بدرى جدا .... ولوقت متأخر جدااا فى الليل

ماحدش يقول الزبالين .... دة دلوقتى الزبال بقى سيد الكل ... يا شعب بيتكعبل فى وساخته

أتبرع لبنك الطعام واتبرع لمستشفى سرطان الاطفال واتبرع لتكفل قريه فقيرة واتبرع لمستشفى مجدى يعقوب واتبرع لجمعيه مصر الخير واتبرع لجمعيه رساله وبعد دة كله تدي جيوش الشحاتين اللى فى الشوارع

رجاااااء حار .... اعملو نقابه لكل الجمعيات والمستشفيات والشحاتين وخدو اللى فى جيوب الناس وقسموة على بعض مرة واحدة زى النشالين كدة لما بيلمو الغله ويدوها للزعيم وهو يوزع عليهم

أو بدل كل مستشفيات الأورام اللى بيشحتو من الناس الفقرا عليها عشان يعالجو الناس الأشد فقراً أمنعو أصابتنا بالأمراض المستعصيه دى من الأساس

زمان لما كنا نسمع عن حد مانعرفوش مات يقولك دة والعياذ بالله مات بالمرض الخبيث

دلوقت كلنا نعرف ناس ماتت بأمراض خبيثه

وفى سنه واحدة مات بيه 3 جيران ومرات خالى وبنت خالى وستات اصحاب ماما ورجاله زمايل بابا

ومن 30 سنه احمد رجب كتب وقال

وضعو أثنان أحدهم عاقل والأخر مجنون فى غرفه مملوئه بالماء وبها صنبور مفتوح العاقل أغلق الصنبور والمجنون أستمر فى نزح الماء بجردل إلى يوم الدين

بدل من العلاج من أمراض لا علاج لها .... أرحمونا من أننا نصاب بها أصلاً

تدوينه

2010-08-13T15:04:00.013+02:00

أول رمضان منذ بضع وعشرون سنه

النصف الأول من الثمانينيات . نفس الجو قائظ الحرارة ورائحه الرطوبه الخانقه
أطفال لا يتعدى عمرهم الست والأربع اعوام
هذة هى انا وأخى الصغير نلعب فى الشارع وقد أنتهينا من تمزيق كتبنا المدرسيه لصناعه زينه رمضان
الوقت تعدى منتصف الليل , وامى تنادى بصوت مرتفع علينا كى نصعد لننام

من هذا الذى يصعد للنوم فى مثل هذا الجو بل ويترك كل تلك الأثارة والمرح واللهو فى شوارع كانت شبه فارغه من السيارات رغم امتلائها بالمارة

تنادى على أبن خالى الكبير كى يجلبنا لها , نصرخ ونركض فى كل الأتجاهات
هيهات ... هو طويل القامه واكبر منا بكثير
يقبض علينا ويحملنا اليها ... يتدلى كل واحد منا تحت ذراعه صارخين منتفضين .. حقيقاً لا نرغب لا فى الأستحمام ولا فى النوم بل نريد ان نستمر فى اللعب بضع ساعات آخرى

أقف فى الشباك نصف مستيقظه أنتظر عودة أبى ... فقد ذهب بالسيارة قبل الفجر ولم يعد بعد .
انام مكانى فى انتظار عودته

فى الصباح الباكر توقظنا أمى لنذهب الى بلدة أبى ... لنفطر هناك مع جدى وجدتى وأعمامى

أبى يجهز الخضار والفاكهه التى سنأخذها معنا ويتذكر أنه لم يشترى القاطيف بعد
امى تجهز ما سنأخذة وبعض الغيارات لزوم الشقاوة واللعب فى الطين

قريه صغيرة تقبع فى حضن الجبل الغربى تجاورها قريه البهنسا الأثريه حيث دفن عدد من الصحابه فى معارك الفتح الأسلامى
نصل لنجد جدتى لأبى جالسه على الأرض وأمامها مخروط ثلاثى من أعواد حطب جافه سميكه تنصبهم وتعلق بينهم (قربه) تخض فيها اللبن تصنع منه السمن والباقى يصبح جبن قريش
قابعه فى صمت متشحه بالسواد ذات وجه صموت ملامحه جامدة

تحرك القربه حركه رتيبه أليه فى ذهاب وأياب بمعدل ثابت وفى صبر بالغ
طيله حياتى لم أستطع تمييز ملامح جدتى ولم اعرف ان كانت سعيدة ام حزينه او حتى غاضبه
نادرا ما سمعت صوتها تتحدث
دائما ما كنت أراها اما تخرج الماشيه نهارا او تحلب جاموستها أو تطعم طيورها
لكنها أبدا لم تكن تشارك فى حديث او تسامر جارة

اجلس بجانبها .. احاول مساعدتها , امسك القربه واحاول خض اللبن فتتحرك بعشوائيه وتتخبط جوانبها تنهرنى بصمت ... أقوم واحاول اللعب بعيداً عنها مع بعض بطات صغيرات خرجن من البيضه منذ أيام قليله
أضعهم فى حله الماء فى محاوله لتعويمهن .. تصرخ فى خفوت انى سأقتل البط
يحملنى جدى بعيدا .. يدعونى للعب مع العنزات فهم ملكى
نعم فقد أخرجو مصروفى الذى أدخرة فى حصاله خشبيه صنعها لى النجار واشترو لى به عنزة (عشار)
وقد انجبت أثنين ... هم ملكى أذن ويحق لى اللعب معهم

بعد الأفطار يحل الظلام سريعاً ... فى تلك القرى وقتها لم تكن الكهرباء قد دخلتها بالكامل وما أن يؤذن المغرب حتى يحل ظلام داكن غريب له ملمس قوى وحضور وحتى رائحه مميزة
يخرج بنا عمى ليحضر بعض قناديل الذرة ليقوم جدى بشيها
مين اللى معاك دول يا رضا
دول ولاد اخويا جلال أصلهم جايين يفطرو معانا النهاردة
هاا ولاد البندريه ؟
فقد كانت أمى هى ابنه البندر التى خرج أبى من عبائه أمه واختيارها لأبنه اختها عروسه له ليتزوجها
نحمل اعواد الذرة الجافه نلعب قليله بشعر ناعم ذو لون أشقر يخرج من رؤوسها
لتبديد جو من الصمت وبعد محاوله فاشله لتشغيل التليفزيون حيث لم يكن بث قناته يصل الا مشوشاً رديئاً قام والدى بتشغيل الردايو وقام بتوصيله على بطاريه السيارة لينساب صوت الشيخ سيد النقشبندى مولاى أنى بـ بابك قد مددت يدى

رمضان هذا العام ... أقف فى المطبخ استمع الى صوت النقشبندى وهو يبتهل رائعته العذبه ذاتها
لا أشتم رائحه رمضان فى الجو ولا استمتع بثرثرة امى مع أقاربها
ولا محاولات جدى شى الذرة ... ولا أرى جدتى الصموت ذات الوقار تجلس جلستها المعهودة تقوم على خض الزبد .... فقط أرى ابن أخى يلهو على مشايته فى محاولات فاشله مستمرة منذ شهور فى السير بمفردة
اختى تجلس على مصليه تقرأ بعض الأدعيه ... وأبى يتلو القرآن بصوت جميل ... ليس رائع ولا شديد العذوبه لكنه رائق .. أمى تقول بنبرة متصعبه .. كيلو الفستق بـ 74 جنيه وكيلو اللحمه وصل 60 حتى الطماطم بقى الكيلو بـ 3جنيه ونص
(تدوينتين نشرتهم اول رمضان منذ عامين .. لكن رغبت فى نشرهم مدمجتين سويا هذة المرة)

العبور على طلمبه

2010-05-14T20:35:00.005+03:00

قطعت المايه ... يومين
خير يا عالم .... الماسورة الأم ضربت وبنصلح فيها وماعلش استحملو شويه
(أولا طبعاً يخرب بيت ماعلش وبيت استحملو)
ثانيا ممكن حد يفهمنى ازاى ناس تقدر تستحمل من غير مايه يومين ؟
الموضوع طول وكان واضح انه فيه مشاكل أكبر وشكله مش هيخلص قريب
الحل كان عبقري بصراحه ... ولأننا منطقه زراعيه
كان الحل الفورى شغلو الطلمبه
طلمبه المايه الحمرا الجميله اللى شغاله سحب من المياة الجوفيه
اختراع رائع كدة وله أيد أنسيابيه ومحتاجه شويه مجهود عضلى عشان تبدأ فى ضخ المياة
مايه لها طعم خفيف كدة بس أهى مايه بدل ما الحنفيات نشف دمها

وبما إنه تم التوقيع على اتفاقيه دول المنبع , وهيبنو سدود ويقطعو عننا كلنا المايه
يبقى نفهم من كدة ان شعب مصر كله المفروض بقى يدق طلمبه قصاد بيته وعمارته وفيلته ؟

طب الأخوة الفقراء إلى الله اللى عندهم حمامات سباحه .. يتصرفو ازاى ؟
يعملو ايه يعني ... يلبسو المايوهات بتاعتهم بأى مناسبه ؟
كمان محاولاتهم انهم يملو البيسين من الطلمبه , شئ مضنى للغايه
يسقو ملاعب الجولف ازاى ؟؟
ولما النيل ينشف ياترى ممكن ياخدو الأرض مكانه ويقسموها مبانى ؟

حاجه كمان ... بما أننا أفسدنا الأرض والبر والبحر والجو ... والصرف الغير صحى سمم الأرض وأتسرب للمياة الجوفيه يبقى مهما دقو الطلمبه على أى عمق هتجيب مايه وسخه

بس من ناحيه تانيه هنرجع نحيي صناعات قديمه اندثرت
زى صناعه البوابير والطشت وكوز المايه
عشان الواحد ياخد حمام ينسى بقى حكايه الدوش دى
هيبقى شئ له طقوس خاصه رائعه
وتعمر الوابور وتحط فوقه بستله المايه وبعدين تبرديها أختى المشاهدة فى الطشت وتستعملى الكوز للشطف جيدا
.

ووقت الغسيل هيبقى مهرجان واحتفالات وممكن يبقى شئ جماعى يشارك فيه بعض الأقارب والجيران ودة هيقوى الروابط الأجتماعيه
تجارة الجرادل وجراكن المايه هتبقى سوق سودا

كمان الطلمبه هتدخل فى الرموز الأنتخابيه لما لها من أهميه عند المصريين
وهنكتشف ان المصرى القديم حفر الطلمبه على جدران المعابد تقديرا لأهميتها فى حياة المواطن وتقديساً لمكانتها بل وعبدها فى بعض الأحيان ... وأن الدكتور زاهى حواس عثر على تماثيل من الحجر الجيري لطلمبات مايه بأحجام مختلفه فى مقابر بالبر الغربى وطلمبه من البرونز بجانب مقابر العمال بناة الأهرام

وفى أول انتخابات رئاسيه جايه هيوعدنا الرئيس بأنه لن يتوانى عن توفير الطلمبات الأقتصاديه لمحدودى الدخل وأنه هيكون هناك طلمبه مياة لكل 5000 مواطن
ولن يسمح بأن يتم الجور على المياة الجوفيه للفقراء ولا هيخلى الأغنياء يعملو بيبي فيها
وإنه بالأنتهاء من مشكله توفير كوبين ماء فى اليوم لكل مواطن مصرى لن نتوانى عن العبور إلى المستقبل بعد ما وفرنا جميع الرفاهيات والكماليات لكل فرد فى شعب مصر المريض

فى شارعنا فتنه طائفيه

2010-05-10T19:24:00.003+03:00

فى شارعنا جات جارة جديدة هى وزوجها والعائله
المدام شغاله لا مؤاخذة والزوج سحّار ( بتاع أعمال وأحجبه وخلافه )
الست الله يكرمها زى ما كرم ماتاهارى شغاله الله ينور ... شبهت المنتئه بالأضافه إلى انها مرابيه
يعنى كملت من كله ... ست كمُل .... عائله تشرف أى منتئه تسكن فيها
السيدة المسيحيه لها شريك مسلم (قرنى بيه ) ... يعنى بيورد زباين سوا للربا أو دعارة
قوادة ومرابى ... أجدع ناس
والمنطقه كلها ساكته وهاديه ومتقبله الوضع الجديد وبيكتفو بالدعاء على الست وعمارتها اللى بنتها فى الشارع حاجه كدة شبه القلعه
وإذ فجأة قامت القيامه والخناقه اشتغلت ... خلاف مهنى بين الشركا والست والأبناء البارين بأمهم المساعدين لها فى المهنه مسكو الراجل طحنوة ضرب وفى الأخر جه البوكس لم الكل

لحد دلوقت والموضوع مجرد أختلاف على كيفيه أدارة الأعمال

بعدها مباشرة الأخوة المسلمين لمو شباب المجاهدين وجم عملو أنتفاضه طوب وحجارة على بيت "الست" أنتقاما لأخوهم فى دين الله المسلم اللى أنضرب من مسيحيين

"الست" طلبت الشرطه باعتو تانى البوكس على ما وصل كان الفوج الأول من الشباب الغيور على دين الأسلام أختفى بين البيوت وكانت هى كمان جات لها امدادات من الأخوة المسيحين
وعليه ... ولحد دلوقت حاله من الكر والفر بين دول ودول ولعبه العسكر والحراميه
على ما توصل الشرطه يختفى الكل وفى النهايه قامت الشرطه مشكورة بوضع حراسه على بيت "الست"
وأعتقد ان الحراسه دى عشان تقدر تمارس مهام عملها بدون شوشرة وأزعاج
الشرطه فى خدمه الشعب

مش مهم أنها شبهه لمنطقه بعائلاتها , وملتها بأشكال ونوعيات من البشر ما انزل الله بها من سلطان
مش مهم أنه قواد معاها
مش مهم ان اللى بياخد منهم بالربا ومش بيقدر يكمل دفع الفلوس بياخدو هما الأتنين مراته رهن ويبعتوها لرجاله عشان تسدد ديون جوزها
المهم المهم إن كرامه المسلمين لا تهان بضربهم من مسيحي
الخلاف لا ديني ولا طائفى ولا دخل للمسلمين ولا للمسيحين بيه لكن وقت ما الغباء بيعمى الكل ... كله بيلطش فى بعضه بحماقه وخلاص

وفى النهايه هى قوادة وهو مرابى

والقمح ملقى على الطرقات

2010-05-07T12:58:00.013+03:00

مر الأن حوالى الشهر على جنى محصول القمح
ولازال ملقى على الأرض ... فلا بنك التنميه وافق على الشراء , ولا بنك القريه , ولا شركات مطاحن مصر
بعد شهور فى الزراعه والرعايه والحصاد .. لا يجد المزارع من يشترى قمحه
فليس هناك مستورد ســ يستفيد من أذون الأستيراد ولا عمولات ولا فرق أسعار
فــ لماذا يتم شراء القمح المصرى
وزير الماليه وفى جلسه الموازنه فى مجلس الشعب قال أنه تم أقرار ميزانيه شراء القمح من المزارعين بزيادة 600 جنيه للطن عن الأسعار العالميه
لكن حتى الأن ليس هناك أى جهه لا وافقت على الشراء ولا دفعت مليم

نستورد كل أنواع زبالات الغرب والشرق بأسعار فلكيه بما تحويه من أمراض وأوبئه وكناسه الأرض

ويتم طحن وعجن وخبز نوعيه غريبه من الخبز ذات طعم مثير للأشمئزاز ورائحه متعفنه وساعات أمام الأفران للحصول على بعض منه

لكن القمح المصرى ... قمح النيل ... ملقى على الطرقات
تأكله البهائم ... يلقى إلى الدواجن ... تتخاطفه العصافير

توقفنا عن زراعه القطن , على مدى مئات الكيلومترات سفر على الطرق الزراعيه لم أرى عود قطن واحد
لأنه يكلف أكثر من الأسعار العالميه وماعاد عندنا مصانع تقوم بغزله أو نسجه كما أن الدوله توقفت تماماً عن شرائه ويظل ملقى فى المحالج تحت الأمطار وعرضه للرياح والأتربه حتى يتحول لونه للأسود

أنكمشنا فى زراعه الأرز لأنه يستهلك الكثير من المياة ويكلف أكثر من كلفه أستيرادة
حتى الثوم والذى تبلغ تكلفه فدانه زراعه وتخديم أكثر من 6 ألاف جنيه أصبح مغامرة خطرة للغايه ففى سنه يبلغ سعر طنه 20 ألف جنيه وسنه يهبط إلى ألف جنيه ... فمن فقد عقله كى يعرض نفسه لهكذا مكسب فى علم الغيب أو خسائر فادحه ... ولا نعرف أصلا من هو المسئول عن التلاعب فى سعرة بهذة الطريقه

أصبحت الأرض تستخدم لزراعه البرسيم ... فهو الوحيد ذى السعر المستقر ولايحتاج للدوله كى تقوم بشرائه أو أستهلاكه ... فالمواشى تقوم باللازم , ومع هذا أيضاً فأرتفاع أسعار لحومها غير منطقى

بأى شئ سـ نعبر إلى المستقبل ونحن لا دوله صناعيه ولا زراعيه ولا سياحيه ولا تجاريه
لكنا وبجدارة دوله موظفين ... وللأسف لا نستطيع أكل المواظفين ولا شربهم ولا تصديرهم للخارج

توقفنا عن زراعه القطن وسنتوقف عن زراعه الأرز وبعد خسائر هذا العام أعتقد أننا سنتوقف عن زراعه القمح
لا نكتفى بالجور الفاحش على الأراضى الزراعيه ... ولكنا أيضاً سنتوقف عن زراعتها أللهم إلا من البرسيم والبصل والكسبرة والثوم ثم نتجه للصحارى لزراعه الطماطم والفول والفراوله يليهم المنتوج المعجزة الذى يحتاج لخبرات عالميه فى زراعته ( الكنتالـــــوب )

بعد القطن والقمح ... ماذا تبقى

شـــئ مـخـتـلـــف

2010-04-30T17:13:00.005+03:00

ربما كانت محاوله للشرح

قد أنجح ... او يجانبنى الصواب

لكنها فى كل الأحوال محاوله ما

هو قريب جدا منى ... لم أنكر يوماً

كأنه أنعكاس صورتى فى مرآة الدنيا

هو أنا فى هيئه مغايرة

حين عرفته أول الأمر

كان مثلى ... وحيداً

يعانى من قسوة الحياة

لكنه خلافاً لى لم يعبر عن ذلك مثل ما عبرت

عبّر بصورة مختلفه مغايرة

وارى وحدته وهشاشه قلبه خلف أقنعه

كل قناع تزيله عنه تجد خلفه آخر لكنه أقل صلابه

حتى تصل إلى جوهر رقيق هش ... ربما أكثر ضعفاً منى

حاول كلانا أن يجد فى الآخر سندة لكنا فشلنا

لأننا ومن شدة تشابهنا كنا كــ قطبين متنافرين

وجهين لــ عمله

نعم يضمهما قالب واحد

لكن كلاً منا ينظر إلى الحياة من ناحيه مضادة

فــ لم يولد بيننا أى مسمى عاطفى

لكنا تضامينا كــ يتيمين طردتهما الحياة

حاول كلينا أن يكون للآخر ما أفتقدة من رفقاء

أخ روح ... وصديق

يعطف عليه ... يربت على ظهره

أو حتى يستمع إلى بكائه

لكن ولأننا كنا متحفزين

أصبحنا أقرب طبعاً لــ كائنين متوحشين

يجب أن نهاجم كى ننجو ... ونقاتل لنحافظ على بقائنا

حتى لو هاجمنا بعضنا وقاتل أحدنا الآخر فى لحظات عنف

وبمنتهى الشراسه

قبل أن يظهر هذا الطفل الضعيف الكائن بداخلنا

روحنا الأنسانيه التى لم تُقتل بعد

لتهب إلى رفيقه ... تخفف عنه ما تسبب به من جراح

فــ فى النهايه نحن أقرب إلى بعضنا من كل البشر

ونفهمنا دون لغه ... او حتى حروف

يحق لكلينا أن يطمئن على الآخر

يهب لنجدته ... يمنحه راحه الأستماع

بصرف النظر عن قصور النظرة

أو اختلاف الأراء

ليست كل العلاقات حب ... وليس كل أثنين عاشقين

2010-04-16T12:59:00.005+02:00

حامل .... يبقى هتولدى قيصري , اصل الجنين مقلوب والحبل السرى اتلف على رقبته وشرب مايه وضغط دمه بينزل ودقات قلبه بتقل والحوض ضيق ولازم نفتح بطن وإن مالحقناش الجنين هيموت وبختك منيل وسنتك سودة ومصيرك جهنم وبئس المصير والدكتور يصور سواد الدنيا والآخرة للحامل وجوزها واهلها والمجتمع والناس
ودة طبعا عشان يقلب الزبون فى كام الف جنيه وشق وافتح زى البطيخه وهو لسه هيستنى لما تقعد تولد طبيعى 20 والا 30 ساعه طلق وفى الآخر يقبض قليل ... هو يعملها جراحه وينصب حواليها مولد وآجزر يا معلم
ناهيك طبعا عن أنهم تقريبا بطلو يعلموهم فى الكليه ازاى يولدّو الستات طبيعي وآخر خبرة الطب عندة أنه يشق ويطلع العيل ويخيط
طب ما على كدة الواحدة لما تيجي تولد تبقى تروح عند جزار وترزى على الأقل غرزة التقفيل هتبقى أنضف
فى كل 100 حاله وضع ... مين سمع عن واحدة ولدت طبيعي .... يا ترى لسه فيه مواطنه مصريه مجهوله لسه بتولد طبيعي زى زمان ؟

وقعت وانكسرت ايد او رجل ... يبقى لاااازم شريحه ومسامير
اصل العضم انكسر ماعرفش فين ومنين وكسر مضاعف وكسر لولبى وهيقطع العصب وفيه شظايا وهيعمل غرغرينا والحاله خطيرة ولازم تجيب الشريحه من الشركه المعينه دى والمسامير تبقى من نفس الشركه اللى تقريبا الدكاترة بقو سماسرة لها
هو راخر زى زميله دكتور النسا اللى فوق مش هيقول دة كسر بسيط ويجبس ويسيب العضم يلم لواحدة
لزما وحتما ينصب المولد اللى نصبه التانى وتبقى جراحه ودكتور تخدير ورسم فتح اوضه عمليات وكله بتمنه والعادى بسعر والجراحى متطوق
ياترى فيه حد لسه بينكسر كسر عادى من بتوع زمان اللى مش محتاج شريحه ولا مسامير وحتى واحد مجبراتى ممكن يعالجه ؟

قلب مراة وزير الصحه تعب ... سفرها تتعالج على نفقه الدوله فى لندن
مرارتك التهبت ... مصر كلها بـالـ 80 مليون اللى فيها بدكاترتها وبنقيب أطبائها بمستشفياتها بتمورجينها مافيهاش نفر لوجه الله هيعرف يعالجك ... اطلع على المانيا , روح مستشفى هايدلبرج
فيها احسن ناس تشيل المرارة من غير ما تفقعها فى الكبدة وتخليها تمرر وماتقدرش تاكلها بعد كدة

يا ترى لسه مصر فيها علاج ؟ وناس بتعيا بـ أمراض ممكن تتعالج فى مصر زى زمان ؟

2010-04-13T12:27:00.004+02:00

وصلنى على الميل الخاص رساله ظريفه جدا من جوجل جروب بيقول انه وصله الإيميل الخاص بيا فى طلب الأشتراك فى مجموعه جنسيه أو كما قال (أكبر جروب جنسى فى الوطن العربى )

(استلمنا طلبا لانضمام هذا البريد الإلكتروني إلى المجموعة حمل اقوي افلام .... والنقط بقى انتم وخيالكم

الحمدلله بقى عندنا حاجه كبيرة بتضم العرب أهو ... ما علينا

المهم ... وقبل منه وصلنى ميل تانى بيقول انى برضه طلبت الأشتراك فى موقع زواج , أو برضه "أكبر موقع زواج فى العالم الأسلامى" .... طبعا قال يعنى اللى بيعمل كدة بالميل بتاعى قصاد انه يحرجنى بقى وينكد عليا ويجيب لى أكتئاب وهدور الف حوالين نفسى وازاى دة يحصل وأسمى يجيي فى شئ زى كدة ,
بس المشكله إن الإيميل بتاعى خاص فعلا
يعنى مش مشتركه فى منتديات او جروبات أو اى مجموعات بريديه ولا يعرفه على الأطلاق غير الأشخاص المتواجدين عليه , وبما أنهم كلهم من أقرب الأصدقاء
وبما إن اللى كانو موجودين عليه كــ مجرد معارف وتم حذفهم هما برضه مدونين ... ولا يزيد عددهم عن 4 أفراد ... أعتقد كدة إن دائرة البحث ضااااقت قوى
ولو إنى مش ببحث أصلاً وحقيقي مش مهم عندى التصرفات دى وبالفعل لا تمثل أى شئ
لأنها حقيقاً تصرفات هبله قوى

وبما إنى متزوجه من 11 سنه فـ أكيد مش هتجيني صدمه عصبيه من كلمه جنسى
وبما إن كان ليا زوج مدمن مواقع إباحيه فــ بالتأكييييد مش مجموعه جوجل جروب هى اللى هتمثل مأساة ولا هتجيب لى كوابيس فى الليل
يعنى من الآخر كدة ... اللى عايز يعمل حركه وسخه يعملها بمعلمه
من فضلكم بلاش هبل وعبط ولعب عيال
أرجووووكم خلقى ضيق ومرارتى أضيق .... اللى عايز يضايقنى رجاء حااااار يعمل شئ يضايق فعلا
مش موقع زواج او مجموعه جنسيه هى اللى هتجيب لى إنهيار عصبى ولا تعقدنى ولا تضايقنى ولا حتى تستحق إن اتعب نفسى واقعد اكتب الكلمتين دول
ويا أصحاب الحركه العبيطه من فضلكم
إما تعرفو تضايقو صح ... أو تروحو تشتغلو فى حضانه أطفال

2010-04-08T21:17:00.005+02:00

الو ... النت فصل من عندى , وقبله كام يوم مش مظبوط والروتر بيفصل كتير . ممكن اعرف السبب ؟

أسفين يا مدام دة النت قطع من البلد كلها

ليه خير ... بقى يتباع فى المخابز دلوقت ؟

لا بس السويتش اتحرق

يعنى هيفصل قد أيه

مش أكتر ما نغير السويتش حوالى شهر شهر ونص

ليييه انتو هتغيرو محولات السد العالى ؟

أصل دة السويتش كله اتحرق بكل الخطوط اللى عليه

هو كل كام شهر تطلعو لى بحكايه شكل . مرة هنغير التعاقد ومرة ولعتو ؟

ماعلش يا مدام ظروف بقى وهو يعنى احنا اللى حرقناة

قفلت وانا بشيعه بمجموعه من الدعوات واللعنات ان انشالله يولع هو والشركه وشبكه الأتصال المصريه كلها

بعد كام يوم ... أيوة يا افندم الأنترنت اشتغل , أتضح ان السويتش مش كله اتحرق دى كانت شويه اعطال وشغلناة تانى وبنعتذر عن العطل

طيب شكرا جدا وانا كمان بعتذر , كنت قولت لحضرتك شالله تولع ... ياريت من فضلك ماتولعش ... ميرسيه

وعليه أديني رجعت على قلبكم حتى أشعار آخر

الليله الكبيرة

2010-03-27T16:04:00.019+02:00

حاجات قليله خالص اللى بتخليني اقعد قدام التليفزيون
كاس العالم ودورة الألعاب الأوليمبيه , عبد الحليم حافظ ومسرحيتي سيدتى الجميله وحواء الساعه 12 ... ومؤتمر القمه العربيه

والأخيرة دى بالذات بفضى لها يوم من أوله عشان اتفرج على وصول السادة الملوك والأمراء والرؤساء وأصحاب السمو والفخامه والمعالى
ولحد ما يهزئو بعض أو ربنا يكرمنى والاقى حاجه اتفرج عليها وهما بيضربو بعض بطقاطيق السجاير وقزايز الميه
ودائما وأبدا وأحب الفقرات ليا فيها ... فقرة القذافى
فــ طبعا السنه دى الأهتمام مضاعف والمتعه أكبر بوجودة رئيس للجمه (على رأيي رئيس اليمن) صاحب كلمات الجمه والديمجراطيه والسجافه

أحلى فقرة كانت السنه دى هى الملاهى , وهى ركوب اصحاب الفخامه والمعالى للسيارات الكهربائيه قبل بدء جلسه الأفتتاح , وطبعا لأنهم ناس أكل عليهم الدهر وشرب وتجشأ كمان
فــ مافيهومش حيل يمشو الخطوتين من باب المكان لحد قاعه المؤتمرات
فـ كانو راكنين لهم على جنب كام توك توك بس مركات فخمه يعنى
وانت داخل من باب قصر المؤتمرات على أيدك الشمال تلاقى الموقف بتاعهم والسواق بيقول واحد قاعه مؤتمرات واحد قاعه مؤتمرات ... نفر جلسه قمه
وعليه يشحنو السادة الملوك الكُهنه (بضم الكاف) ويلفو بيهم شويه يفرجوهم على الطرقات والعيال المصورين بيجرو وراهم والفقرة دى كان ممكن تكمل وتبقى أحلى لو كان نصب لهم كام مرجيحه وشويه زحاليق ومدفع

وكان السادة اصحاب الجلاله والفخامه أثبتو قوتهم لشعوبهم وشجاعتهم وجرائتهم فى زق التارة واضرب ميه بمبه
زى الموالد كدة .. ويبقى اللقب الرسمى لـ رئيس الدورة 22 لأجتماع القمه
هو السيد رئيس مراجيح مولد النبى

تانى فقرة : هى فقرة الألقاء الكوميدى

********
وهى الفقرة اللى بيجرب فيها السادة الأميين الملوك والسادة الجهله رؤساء الدول مهاراتهم فى تمزيق وتشويه اللغه العربيه وكب مايه نار عليها
وإبهار المتفرجين بمهاراتهم الشديدة فى عدم القدرة على تكوين جمله كامله من 4 كلمات دون تقطيع وفصل وتهته وتفتفه وحزق وتراجع من أول السطر عشان يفتكر الجمله من الأول بعد ما ضاع مضمونها وفقدت معناها نتيجه عدم القدرة على القراءه الرشيدة للسادة ملوك وأمراء ورؤساء الدول الــــعــــربــــيـــــه

الفقرة التالته هى مسرحيه الأطفال

********

وهى الفقرة اللى فيها الرؤساء والملوك يزعلو من بعض ويخاصمو بعض ويحلفو ما يقعدو مع بعض فى قمه تانى خااالث ويقوم واحد فيهم يجري يقوم واحد رئيس او ملك تانى برضه يجرى وراه يشدة من ديل عبايته الملوكيه ويحلف عليه براس الجمل بتاعه لـ هو قاعد

هذا ولازالت فقرات حفلنا الساهر مستمرة

كما وأقترح ان تقام القمه القادمه فى درب شكمبه ويكون رئيس القمه هو

حضرة الأراجوز

CSI

2010-03-14T17:38:00.004+02:00

علم البحث الجنائى ... على أساس ان البحث الجنائى وفحص و تحليل الأدله وتعقب الأثر علم كامل قائم بذاته , شديد الأهميه وله معامل ومراكز بحثيه ودراسات متخصصه
لأثبات برائه متهم أو تثبيت التهمه عليه
دة على الأقل اللى اخونا الأمريكان والغربيين فرجونا عليه فى مسلسلاتهم وأفلامهم والوثائقيات بتاعتهم
حتى شرطه دبى كشفت جريمه قتل المبحوح وربما محطه تجسس كامله عن طريق تسجيلات الفيديو وتحاليل الدى أن آيه لبعض الجناة المشتركين وفحص الكترونى لجوازات سفر
ولبنان من 2005 وحتى الآن لازالت مسرح لفريق تحقيقات دولى لكشف قتله رئيس وزرائهم
أمال على أى أساس بقى يتم عمل البحث الجنائى عندنا ؟
أللى ما فيه جريمه قتل مسكو المتهم فيها عن طريق التحقيقات السليمه والتحريات وفحص الأدله ... جرايم قتل تعتبر مجازر والأتنين حتى الأن بدون متهم
مذبحتين يفصل بينهم 5 سنين و3 كيلومتر
وفى الأتنين المتهمين اللى ألقت الداخليه القبض عليهم .... بــرائــه
لييييه ؟ هقولكم انا ليه ودة المتبع فى كل جريمه قتل ... تقريبا يعنى
علم البحث الجنائى المصرى يعتمد على الأتى
البيه الظابط قاعد على مكتبه ومادد رجليه يجيله بلاغ من عمدة او أشارة مركز
يقوم ياخد بعضه ويبلغ رؤسائه ويروح يتفرج على مسرح الجريمه
ويبدأ علم البحث الجنائى بأنه يكلف العساكر والأمناء أنهم يلمو قرايب القتيل وجيرانه والعيال الصيع اللى فى البلد واى واد مسكوة مش معاة بطاقه وتبدأ العمليه العلميه الدقيقه والشاقه والمعقدة بأن أعزقوهم العزقه التمام وهاتك يا ضرب ونفخ فـ دين أمهم وأكيد حد منهم هيقر ويعترف , ماهو كل الضرب دة لازم يجيب نتيجه وانطق ياض يا بن القحبه وتشكيله آخرى من أروع الشتائم وبتخفيضات لا تقاوم وهاتو امه واخته ومراته والنتيجه طبعا لكل هذا البحث العلمى الرائع والمنظم والممنهج
هو أن حد هيزهق ويتعب ويضعف ويعترف (بس أهم جزئيه فى هذة العلوم الدقيقه والحساسه أنك تضرب ضرب مايسبش أثر ولا يبان فى الكشف الطبى اللى المتهم هيطلب ان يتعرض عليه فى أول جلسه محاكمه)
وبدل ما الوقت يُنتفع بيه فى سرعه البحث وإيجاد المتهم قبل ما تضعف الدله ويضيع الأثر
يروح كله فى اتجاة آخر خاطئ تماماً لمجرد ان السادة فى الداخليه يخلصو بسرعه ويقولو انهم أنتهو فى وقت قياسى وتنزل صورهم فى الجرايد اللى اصلا مابقاش حد يقرأها ويظهر البيه مدير الأمن فى التليفزيون ويظهرو فى برنامج وراء الأسوار ووكالات الأنباء تنشر أساميهم
وتروح القضيه اللى من غير قضيه لمحكمه الجنايات وأصغر محامى فى أصغر قريه سهل جدا يخليها مصفاة من كتر الأخطاء والثغرات اللى فيها من أول ضعف الأدله لخطأ الأجرائات لأستحاله أثبات الجرم وتعذر أرتكاب المتهم للجريمه فى الوقت المذكور او حسب أعترافاته أو لعدم تطابق الوصف والتمثيل مع تقرير الطب الشرعى
وبعد ما يكون ضاع الوقت والدليل ودم الناس هدر
أيييه بقى هنكفر ؟ كل نفس ذائقه الموت
والمكتوب على الجبين لازم تشوفه العين ولكل آجل كتاب وماحدش بيموت ناقص عمر
ونصيبهم كدة ومقدر ومكتوب ولازم يبقى فيه إيمان بالله
وكأن الإيمان بالله يتعارض مع Crime Scene Investigation

مجلس عزاء

2010-03-08T16:28:00.004+02:00

توفيت الى رحمه الله تعالى كل التعليقات على كل تدويناتى على يد البلوج اسبوت
أو قوى شريرة .... الله أعلم
وبعد عامين من التدوين ومئات التعليقات
لم يبقى منها شئ على كلأ من المدونتين
كل تعليقات اصدقائى وأشقائى تم حذفها تماماً
وترك لى بدلاً منها أصفار

للفقيدة الرحمه .... ولى الصبر والسلوان
والعزاء على المدونات ولا عزاء للغير معرف

ويالهوتيييييييييييييييييييييي

الغابه المظلمه

2010-03-05T15:32:00.003+02:00

فى منتصف رحله العمر التى كتبت علينا

وجدت نفسى فى غابه مظلمه

تهت فيها وأُمحى الدرب أمامى

غابه لا يطالها الوصف

مخيفه كــ الأدغال

موحشه كــ برّيه مقفرة

ذكرها يثير المخاوف الكامنه

لا أظن الموت يفوقها مرارة

لا أستطيع أن أروى كيف أوغلت فيها

فــبـ أعبائى كنت مثقلاً

وبالنوم كنت غارقاً

عندما بدأت أنحرف عن الطريق الصحيح

فى نهايه ذلك الوادى الضلّيل

الذى ملأت متاهاته قلبى خوفاً

وجدت نفسى أمام هضبه صغيرة

أليها رفعت بصرى

فــ رأيت عباءة من أشعه الصباح

تنسدل على كتفيها من الكوكب المشرق

الذى يهدى عابرى السبيل فى كل سبيل

فــ انجلى عنى الخوف الذى ملأ بحيرة القلب بكل ألامه

طوال الليله المرعبه

ومثلما يصل السابح فى بحار المخاطر إلى شاطئ السلامه مبهور الأنفاس

فــ يرنو إلى الموج المريعه ويتأمل

كذلك فعلت بعد أن نجت نفسى من ملاحقه الموت

فــ حدقت إلى الأسفل

فى ممر لم ينج منها أحد

قليلاً أرحت نفسى من عناء التعب

ثم نهضت وتلمست طريقاً مقفراً صاعداً

أثبت فى الدرب دائما قدمى السفلى

دانتى

سلوكيات مشرّفه

2010-02-25T13:55:00.005+02:00

المكان : القومسيون الطبى
حيث يجرى الكشف على سائقى السيارات الأجرة لمنحهم رخصه مهنيه
الشخص : فنى تحاليل
يقوم بالفحص لتحديد نسبه السكر إن وجد وأكتشاف أى تواجد لمواد مخدرة
الثمن : 2 جنيه تدفعهم له ويخرج لك شهادة بخلو عينه البول من السكر
2 جنيه وتستخرج شهادة أنك سليم معافى صحيا ... ومن غير فحص
2 جنيه يمد أيدة الموظف وياخدهم من كل سائق

مقابل منحه صك السلامه الصحيه
2 جنيه تمن أرواح ناس هتركب معاه أو تركب فى عربيه يرميها النصيب تحت عجلاته إن جات له غيبوبه سكر ... أو سايق وهو مسطول
2 جنيه من 150 سائق يتم عرضهم يومياً على كشف القومسيون
2 جنيه والموظف فنى التحاليل يمتلك علامه صلاة وذقن طويله
لم يمنعه أتباع سنته وأداء فروضه من أنه يمد أيدة لــ 2 جنيه
ويا بلاش

أكتشاف مذهل

2010-02-17T15:51:00.010+02:00

الناس العلماء الله يسترهم ويعمر بيتهم حلو اللغز اللى ماكانش بينيمني لا ليل ولا نهار وريحو عقلى اللى كان قرب يشت من كتر التفكير فى يا ترى يا هل ترى توت عنخ أمون مات ازاى مات ازاى مات ازاى
حئيئي حئيئي كنت هتجنن أخر حاجه واعرف يا ترى هو مات فى رحله سفارى والا وهو بيعمل دايفنج
ولأن الفاضى يعمل قاضي واللى معاه مال يحنى ديل جحشه
فالأخوة الأفاضل العلماء قضو عمرهم فى البحث والتحرى عشان يكتشفو فى الآخر ان الأخ الفاضل برضه جلاله ملك مصر المعظم توت عنخ أمون مات بالملاريا ... واحد الله يرحمه من أكتر من 3000 سنه ولسه العالم شايل همه مات ازاى ... طبعا عشان هو سايب وراه شئ وشويات وكان غنى زيهم وورثو منه كام زلعه دهب
والملك رمسيس الله يرحمه هو راخر مات لأن كان طالع له دمال تحت ضرسه دة كمان اكتشفناه بعد رحله بحث وتحرى طوووويله
لكن لما بنى أدم ... بشر فى وسطنا دلوقت فى عصرنا المنيل دة يندبحو وهما نايمين ... لما 11 كائن بشرى يندبحو ويتمثل بجثثهم مش مهم يعرفو ماتو ازاى
ولحد دلوقت مجزرة بنى مزار محدش حلها .... أصلهم كانو صعايدة فقرا ولاد كلب يولعو
ولحد دلوقت بنقفل علينا الأبواب بسلاسل حديد وأقفال عشان منندبحش واحنا نايمين
وعشان هشام طلعت مصطفى هو هشام طلعت مصطفى فدة عشان خاطر عيونه يتغير القانون والا حتى تتلغى عقوبه الأعدام من القانون كله ويتحاكم بقانون جديد ونفصل له على مقاسه
ماهو توت عنخ مصطفى او هشام طلعت امون عالم أغنيا زى بعض وملوك
لو ماتو نفضل نحلل ماتو ازاى ولو قتلو ماعلش نظبط لهم قانون
ويطلع لنا زاهى حواس كولومبس يقول لنا كيف مات الفتى الذهبى ... او الملك الذهبى
طب يا عم الحاج الناس الطيني اللى زينا لما يموتو أو بمعنى أصح لما ينقتلو مدبوحين وغرقانين ومحروقين مش مهم حد يعرف ماتو ازاى او ليه ؟

وعليه قررت الأتى

********************
لما أموت هبقى أسيب للدوله سلسلتين وغويشه وحلق أو هحطهم فى زلعه واعمل لهم خريطه وأبعتها المتحف البريطانى

نضافه

2010-02-14T11:49:00.004+02:00

بدء مشروع الصرف الصحى حدانا من ربع قرن
كسرو الشوارع وفتحوها بالطول وبالعرض , بيوت قديمه اتهدت ووقعت بسبب عمق الحفر والتأثير على الأساسات وارتفاع مستوى المياة
لكن منظر ومعاناه المجارى الضاربه والشوارع الغرقانه خلتنا نستحمل , كنا طمعانين أن المشروع لما يخلص هنرتاح من كل دة
ومن السنه اللى فاتت بس فعلا انتهى المشروع وبدء عمله والناس ركبت التوصيلات وقولنا هى دى النضافه فعلا وإلا فلا وبعد أقل من نصف سنه
صحينا الصبح ... لقينا الصرف الصحى ضرب
بدءت العلب الرئيسيه فى الشوارع تضرب واحدة ورا التانيه وشارع ورا شارع
مستوى المياة ارتفع لدرجه انها ردت جوة البيوت نفسها من جوة
محطات السحب والتصريف نفسها بعد كدة توقفت
الناس الوحيدة اللى نجت من المصيبه المقرفه دى ... كانت الناس اللى ماوصلتش ولا اشتركت فى الصرف من أصله ...... واحنا منهم D:
كله صرخ كله اشتكى .... البلد كلها مافيهاش غير مهندس واحد وأربع عمال مختصين فى الموضوع دة
جه الدور على شارعنا وصلو وبدؤ الشغل
يفاجئو إن علب او حلل الصرف الرئيسيه فى كل شارع مسدودة تماماً بالأتى
خرق قديمه _ فوط صحيه _ حفاضات أطفال _ أكياس نايلون _ وأكياس زباله صغيرة قشر لب وفول وخلافه
والأخيرة دى بالتحديد المهندس كان هيتجنن ويعرف ازاى وصلت لعلب صرف مغلقه
أى نعم الحكومه كانت ولازالت بتعايرنا بالبنيه التحتيه وخصوصاااا الصرف الصحى
لكن احنا ... كــ شعب ... كــ ناس
مالنا ؟ ... أيه مشكلتنا ؟
ننضف بيوتنا ونرمى الزباله فى الشارع , نمسح شققنا ونكب المايه من البلكونه ... وعلى دماغ الناس عادى يعنى مش بتفرق
يعنى هل تخيلو ان الصرف الصحى دة مشروع شيطانى عجيب فيه مفرمه مثلا هتفرم كل زبالتهم وتريحهم من انهم يتعبو ويحطوها فى اكياس وييجو على نفسهم ويطلعوها قصاد الباب أو يدوسو ويضغطو على نفسهم اكتر وينزلو بيها الشارع أو يتعبو قوى ويرهقو نفسهم جدا ويحطوها فى أو على الأقل جنب صناديق الزباله ؟
أو يدفعو لعامل النظافه 3 جنيه فى الشهر قيمه الأشتراك والراجل يوميا والله بيجيي يشيلها
نقول أن النظافه من الإيمان وتظهر دراسه تقول إن 70% من الشعب مش بيغسل أيدة بعد الحمام
ولا قبل ما يعملو الأكل
نتوضى ونصلى 5 مرات لكن نبصق على الأرصفه
احنا شعب شكاى وبكاى
لا فعلا احنا ناس بنحب نشتكى ونبكى ونولول ... ودة بالنسبه لنا أسهل من اننا نحاول نغير
كل الدوله بتشتكى ان الزباله او "القمامه" دفنت الشوارع
كام فرد بقى حاول هو ينضف او كام شارع لم الزباله وحطها على عربيه أجروها بـ 5 جنيه وراحو رموها فى المقلب العمومى مثلا
حتى اللى بيكنس قصاد بيته بيلم الكناسه ويحطها جنب بيت جارة .... ههههههههه أو فى نص الشارع اللى قدامه ... قال يعنى نص الشارع التانى مش تبعه ومش هيجي منه ذباب وصراصير , يمكن المسافه تبقى بعيدة عليها او يجوز مش معاها تأشيرة توصلها للنصف الأخر من الشارع
وعلى أضعف الإيمان ... يحرقها
دة على أساس ان حرق الزباله نضافه

تخاريف أنفلونزا

2010-02-09T23:03:00.007+02:00

وسط أرتفاع درجه الحرارة والدخول لمرحله الهلوسه
والبدء فى رؤيه أوهام بصريه وسمعيه وحاجات سودة منقطه أصفر طايرة جنب عينى

ودماغى قربت تسيح ودخولها نقطه الأنصهار الحرجه العليا
.

بين النوم واليقظه , رأيت فيما يشبه الأحلام ... أنبوبه بوتاجاز جايه تتهادى عليا من بعيد
وأننا ولعنا البوتاجاز ورجعنا تانى نشغل السخان

حاولنا نرجع للأصاله ونشغل الوابور ... ملقناش جاز

فيه خطه لمنع الجاز تمهيداً لأرتفاع سعرة ... لتر الجاز بقى بـ 2 جنيه ومخلوط مايه

نولع الوابور يهب فــ وشك

.
حتى علبه الكبريت الباكستانى اللى بنستوردة ونحطه فى علب كارتون من أنتاج شركه النيل لأعواد الثقاب
كل اما أولع عود يفرقع ويطير ... حتى عود الكبريت مش عايش عيشه أهله ومتوهم أنه قنابل عنقوديه

هو الأكل اللى بيطبخوة فى قناة فتافيت دة بياكلوة ؟
فيه ناس فيها قلب تاكل الأكل دة ... دة على أساس ان الناس لسه فيها صحه ومعدتها بتقدر تهضم ؟

مع أن انا اللى عيانه بس امى راحت عملت كوبايه ليمون سخن وسقتها لأختى ... ولما البت فضلت تصرخ انها مافيهاش حاجه ومش هى اللى عيانه ولاعايزة تشرب ليمون ... أتهمتها أنها مش عايزة تسمع كلام امها اللى عارفه مصلحتها أكتر منها
وكانت داخله على عقوق الوالدين لولا أن البت خدتها من قصيرها وشربت الليمون

إلــى معرض الكتاب شدينا الرحال

2010-02-07T18:38:00.010+02:00

شدينا الرحال إلى رحلتى السنويه الأكثر أهميه
معرض الكتاب
يوم الجمعه المرور كان ابن حلال وصلنا بسرعه انا واختى وهناك قابلنا ميرا ومصطفى ريان لفينا تقريبا المعرض كله ... بحثاً عن صالات فيها حفلات توقيع لناس أصحابهم هتتعمل تانى يوم السبت ... وشويه صالات تانيه وشوفنا اسعار كتب ترعب يعنى

والبت ميرا الله يكرم اصلها يعنى عملت أعلى واجب ومايه وعصير وحاجات حلوة وشيكولاتات بت عسل قوى يعنى
روحنا سور الازبكيه لقينا هيصه بقى وكتب الكتاب بجنيه ... أشترينا حمل كتب زى شروة البطاطا كدة ... الظريف جدا أنها كتب احسن مليون مرة من الجديدة وبتاعه دور النشر
وطبعات كويسه جدا وبحاله ممتازة وأدب عالمى مترجم وروايات رائعه وكتاب بنسمع أسمائهم فى البرامج الثقافيه بس
فى حين ان دور النشر كلها تقريبا كتبها عن الطهى ونصائح ليله الخرجه وانت والأبراج وكتب دينيه من جنسيات مختلفه ... المحترمه والموثوق بها فيهم قليل جدا
ودور النشر ذات الكتب القيمه .. تعدى من قصادها وتجرى لأن اسعارها بتلسع من بعيييد
خرجنا بعدها لوسط البلد وانتقاما من ميرا لأنها لففتنى المعرض كلها نزلتها رمسيس ومشيتها لحد ميدان التحرير ... قال بفسحها
تانى يوم السبت وهو كان اليوم المشهود بقى لأنه كان حفلات توقيع كتب مصطفى ريان صديقى واخويا والمبدع الشاب وحفلات توقيع تانيه لأحمد الصباغ وسحر غريب
اول ما دخلنا كان فيه شريف باشا عمدة كفر البلوجرز كلاته وكل سنه وهو طيب بمناسبه عيده الستين وعقبال كل عيد وهو بكل خير وصحه ومنور الدنيا بوجودة
قابلنا أسماء رمضان الصحفيه الرااائعه واللى اول مرة اشوفها وفعلا كان أكتر شئ فرحت بيه وسعدت له جدااا لأنها أنسانه قمه فى الذوق والرقه والرقى
شوفت واحدة مفروسه رغم أنى اول مرة اتعرف عليها , سلمت على أحمد سو , وداليا قوس قزح , حضرنا عند الصباغ وسحر وبعدها روحنا لمصطفى واتصورنا كمان معاه
(الصورة ومش عايزة تريقه ... راعو يعنى انها واحدة مسافرة وبتلف فى المعرض بقى لها يومين ... هتبقى ايه غير كدة)

حد هيقولى مالك حاضنه قزازة المايه كدة ليه زى المحرومين هقول له دى عقدة من المايه يعرفها اللى سمع حكايتى معاها قبل كدة
بعدها لــ علاء الأسوانى وبلال فضل لأن شريف كان مهتم جدا يشترى كتبهم وعليها توقيعاتهم
بعدها كان الوقت بالليل ... وكنت سلمت النمر ورفعت الرايه البيضا من التعب والأرهاق وجمعت حصيله لا بأس بها من الكتب سلمت على الناس العسل اللى كانت موجودة ومشيت وانا فى أشد حالات السعادة البالغه البالغه يعنى
من الناس اللى زعلت بجد أنى ماشوفتهومش كانت دكتور بسنت واللى كنت بتمنى حقيقي أنى أشوفها وأقضى يوم معاها .
كتاب مصطفى ريان مذكرات رئيس سابق من الكتب اللى فعلا كويسه ومكتوبه بحرفيه وموهبه ظاهرة من مصطفى فى كثير من مواضيعه ... رأيي يا درش أنت عارفه الكتاب فعلا متميز وان شاء الله ينقلك نقله نوعيه ويكون بدايه لمجموعه من الكتب تعبر عن موهبه حلوة جدا جواك
وإن شاء الله المعرض القادم يكون لك برضه حفله توقيع وكتاب جديد وألف مبروك يا صديقى العزيز

مصلحه

2010-02-02T14:44:00.008+02:00

خرجت لشويه مشاوير خلصت بدرى قولت اعدى على ماما فى الشغل ولو خلصت نروح سوا
دخلت لقيتها لسه بتقفل المكتب ... ايه يا حاجه مروحه ؟
لا هروح اخلص ورق من المبنى التانى ... استنى هنا وانا 10 دقايق وراجعه ... مش هتأخر
اقعدى على مكتبى واقرا جرنال او مجله لحد ما اجى
قعدت وشديت الكرسى فى الشمس ومستمتعه بالجريدة وجانى فنجان قهوة كمان وإذ فجأة
سلام عليكم
وعليكم السلام
لو سمحتى يا مدام مطلوب أمضائك والختم على الطلب دة
طيب استنى 10 دقايق برة حضرتك
الراجل راح لف حوالين المكتب وجاى بيميل
أصل هقولك
طيب ارجع مكانك وانا هفهم اللى انت عايز تقوله
لا هوريكي الطلب بس
طب ارجع مكانك مناخيرك قربت تدخل جوة ودنى ... فيه ايه يا عم الحاج شويه وهتطلع على كتافى
الراجل رجع مكانه وهو امال يبرطم
عايز الحق الخزنه قبل ما تقفل
طيب اتفضل اقعد بس برضه 10 دقايق
ليه يعنى هو انت بتعملى ايه ... مانت بتقرى الجرايد ... مش هو دة الشغل اللى بتقبضى عليه مرتب
لا يا سيدى دة مش مكتبى ... الموظفه اللى هنا راحت المبنى التانى وجايه حالا .. من فضلك اقعد استناها
ولما هو مش مكتبك قاعدة عليه ليه
(وقعتك سودة ) معلش غلطه .. دقايق بس
ما تمضى انت وخلاص
يا سيدى انا لو مضيت على ورقك هيعملوة قرطاس ويلبسوة لك فى دماغك لأن ببساطه أمضتى ملهاش قيمه
وقف دقيقتين وبص فــ ساعته وصوته على
خلصونى الخزنه هتقفل ولو مادفعتش هتحبس .... عايزة فلوس ؟ قولى
تاخدى فلوس وتخلصى ورقى
حلو حلو حلو قعدت على مكتب حكومه 5 دقايق ولبست قضيه رشوة أو بمعنى أصح لبستها لأمى
لا مش باخد فلوس ... استهدى بالله واصبر
خلاص اى حد يمضى ويختم مش الختم قصادك اهو ... خلااااص أختمى
آآآآة بقى هى حكايه ختم
بصراحه عايزة اسكته ومش عايزة اى موظف يجيي على صوته لأن موظفين الحكومه تخصص خوازيق وخوابير واخاف اى حد يجيي يقاول الراجل ويلطع الختم اللى فـ عهدة أمى وتبقى الوليه دخلت السجن على حسى فى قضيه رشوه او اختلاس
لا والله ونعم العيال ... افرحى بخلفتك يا امه
طيب هات الطلب (امسكه وامال ابص فيه قال بفهم ) بس افهم ايه دى أمضائات بالأزرق والأحمر وأختام بالأسود والكحلى وقسايم دفع فوشيا ولبنى وصفرا
دى ولا زينه رمضان
بتعملى اييييه
الله مش براجع على الورق ؟ وبعدين انت مستعجل ليه لسه فاضل ساعه على المواعيد
الراجل دخل على نبرة استعطاف ويا مدام لسه فيه اجرائات تانيه والنبى من فضلك امضى

وبعدين ما يروح يشوف البلد اللى خلت الورقه لازم لها أمضائات 120 موظف على الأقل ولـ30 لطعه ختم لما الطلب بقى عامل زى الوان الطيف وأقرب شبهاً بحلاوة المولد
يا سيدى انت عايز امضه مدير عام ... ما تبص كويس دة شكل مدير والا نيله
وبعدين بصراحه انا مش موظفه هنا اصلا
امال قاعده هنا ليه
(عايزة اخلص منه) دة مكتب ماما وهى جايه
ماما ؟ ليييه هى بقت حضانه وبيجيبو عيالهم معاهم
(الله يحرقك يا شيخ ) أسيب له المكتب واجرى دة والا ايه
يعنى يامى ماكنتيش قادرة تقفلى وتقولى لى غورى يا بت روحى وكنتى قفلتى مكتبك وريحيتنى من المصيبه دة
انتو شويه موظفين كذا وكذا وكيت وانا هروح اشتكيكي وهبعت فيكي شكاوى لقناة المحور
(ليه قناة المحور ... ما تخليها الجزيرة احسن .. هو انا قصفت بيتكم بالصواريخ يا حاج ؟)
انا هبلغ عنك للوزير الحمار اللى انت تبعه
عايزة اقوله ان الوزارة اللى انا تبعها هى الوزارة الوحيدة فى مصر اللى ملهاش وزير بس مش وقت استظراف دلوقت ومناقشه القضايا السياسيه والوضع العام فى مصر
المهم انى خلصت منه حتى لو كان رايح يشتكى
شويه وامى دخلت .... منورة المكتب يا قطه
بأبتسامه صفراااا تعيشى يا ماما .. طب انا همشى دلوقت أصلى افتكرت حاجه اجيبها
ألا قوليلي يا ماما ... هو انت فاضل لك قد أيه على المعاش

مصر بطل أفريقيا

2010-01-31T12:36:00.007+02:00

.
هييييييييييييييييييييه ومصر بطل أفريقيا ... ودة كفايه
.

مش عارفه ليه مفتقدين الحماسه الفظيعه اللى كانت عندنا قبل ماتش الجزائر

ولا فيه اغانى وطنيه فى القنوات ... تقريبا بنحتفظ بيها ضد الأعداء العرب بس

لكن ربنا يستر لأن احنا عندنا عادة غريبه جدا

لما بننتصر قوى ... وبندخل منفوخين قوى ... بنخيب قوى

هزمنا الجزائر فى القاهره وكنا رايحيين السودان تحصيل حاصل وفجأة أحنا اللى طلعنا

وبما أننا خرجنا الجزائر بفضيحه فــ ربنا يستر علينا امام غانا

.
والمصيبه ان الثنائى المرح رايح انجولا ... والعيال دى نحس ووشها شؤم

.
أستر ياللى بتستر

لقائات مدونين ... أم قعدات نمامين

2010-01-29T22:08:00.012+02:00

كنا نبحث عن فضاء واسع نتشاركه
نتشارك الأفكار والحديث ... نتبادل الزيارات والتعليقات .. تنشأ الصداقات

مع الوقت لم نكتفى بكوننا شخصيات الكترونيه نختفى خلف أسماء مستعارة
كونا علاقات حقيقيه وصداقات فعليه ... مع من نرتاح له .. لشخصه .. لفكرة .. لعقله .. لأسلوبه .. لطباعه
سعدنا بمعرفه من نتوافق معهم بدرجه كبيرة واختار البعض اللقاء الرسمى لنتوج تلك الصداقه برؤيه حقيقيه للأشخاص ... كان الظن أن من أنشأ مدونه الكترونيه هو شخص على قدر من الوعى والمعرفه والرغبه فى معرفه الاخر ومشاطرته الأفكار وتبادل الأراء والنقاشات المحترمه
كان الظن أنه حين نجلس سويا سنكون أشخاص مختلفين ... عن أى قعدة مصطبه
لم يكن الظن أنهم سيكونون مجرد أشخاص يحكمو على بعضهم حسب تقولات غير مؤكدة
لم يكن الظن أنهم بعض أشخاص نمامين ماسكين سيرة نهاشين أعراض
تلقيت بعض أقتراحات من أصدقاء بالأبتعاد عن شخص معين لأنه غير جدير بالمعرفه وأنه يتلاعب بالبنات وأنه وأنه وأنه ... العديد من الصفات غايه فى السوء .... وهم لا يعرفونه أصلا
حسناً ... هذا الشخص المعين هو من أقرب أصدقائى ورغم شدة اختلافنا فى الأراء وشدة خلافتنا وتناقضنا التام فى الطباع لكنه صديقى ... وانا أدرى به منهم
هذا الشخص لم يخطئ بحق أحد منهم ولم يجرحهم
من كانت منكم قد تعرضت لأى أذى أو خداع من هذا الشخص ولديها ما يؤكد كلامها لترينى أياة ... من ينصب نفسه حامى حمى الفضيله وله الحق بمحاكمه الأخرين وأصدار القرارات والأتهامات بحقهم ... يروح يرشح نفسه فى الانتخابات ... إن لم يكن لديهم بالفعل ما يدعم ويؤكد أقوالهم ... كان الأفضل لهم أن يضعو ألسنتهم بداخل أفواههم ويخرسو بدل ما يتقيئو على الناس ما لا يملكون عليه أى دليل ويوزعون اهانات وتجريحات مجانيه عليه وعلى الأخرين
كمااان مرة لمن لا يعقل او يفقه او يفهم , هذا الشخص صديق مقرب جدا ... بل أقرب أصدقائى وبمثابه اخ فعلى لى
وشخص محترم ومهذب وعلى خلق .... وأنضف مليون مرة من كتير من اللى ذكروة بالسوء
وإن كان هو لهذة الدرجه سيئ وترو انه انكشف فأنتم أسوء منه لكنكم لم تنكشفو بعد
كل واحد بقى يحترم نفسه ويلم لسانه والدنيا دوّل .. يوم تمسكو فيه سير الناس وبكرة ان شاء الله يوم تنفضحو انتو فيه وتلاقو برضه اللى يمسك سيرتكم
وإن فشلتم جميعا تكونو ناس محترمين يبقى لا داعى للأدعاء واقلبوها مصطبه وامسكو السير زى نسوان الحوارى

لماذا النقاب ؟

2010-01-28T20:50:00.000+02:00

نقاب _ إسدال _ ملحفه
أسماء لنوعيه من الزى يرتديها عدد كبير من النساء
ولا اعتراض لدى حول ما ترتديه أى امرأة ففى الأول والأخر هذة فعلا حريه شخصيه وحسب رؤيه كل امرأة ووجه نظرها فى الأحتشام

لكنى اتكلم عن النقاب كــ زى
رداء أسود معدوم الملامح قاتم وكئيب

وقفه صغيرة قبل أن يقال لى لنحترم حريه من ترتديه المنتقبات كما نحترم حريه السافرات
انا لا أتطرق إلى هذة الناحيه
بمعنى ان لا يقال لى أنظرى الى ملابس الفتيات فى الشارع والكاسيات العاريات والحجاب الذى لا يغطى شئ
سفور السافرات او تبرج المتبرجات أو أى كانت نوعيه الزى فى ما يخالف شريعه الله ليس هو محور حديثى

كلامى عن الفرق بين الأحتشام والمبالغه فى الأختفاء

أعود من تلقاء نفسى إلى جملتى (رداء أسود معدوم الملامح قاتم وكئيب)

بالنسبه للون : فهو بالفعل أسود والأسود هو لون أسود أى أشد الألوان قتامه
من حيث كأبه اللون ( مفيش أسود فرايحي إلا السواريهات) لون قاتم معتم غامق ... أسود
معدوم الملامح : أرجو أن لا يتطرق الحديث مباشرة الى أقصى الطرف الأخر وهو المقارنه باللبس الضيق والقصير والذى يشف ما تحته وما يرسم جسد المرأة
هذة ردة فعل أتوماتيكيه فى التطرف ... كلامى عن الوسط

نوعيه الملابس المحترمه المحتشمه التى لا تخدش حياء رجل أو امرأة ولا تثير الغرائز

إذاً علام يدل النقاب ؟ ... هل هو شدة تدين ؟
ما الذى يجعل امرأة ترتدى كل هذا السواد وتختفى وراء كل تلك الكميه من القماش
فى ديانات قديمه وعصور أنبياء أخرين (منزّلين كلهم برساله إللهيه ويدعون لعبادة الله والألتزام بتعاليمه) لم يوجد فيها دعاوى بإخفاء المرأة بهذا الشكل
وفى المسيحيه المتدينه حيث ألتزام اقصى التعاليم تشددا واليهوديه ترتدى الراهبات رداء طويل فضفاض وتغطى رأسها وأحيانا رقبتها حتى صدرها ... لكنها لا تسدل ستار بينها وبين الناس

فى مجتمعات معينه يرغب الرجل فى أخفاء المرأة وتلوينها بالسواد لأنه يظنها فتنه وخطيئه ورفيقه للشيطان ... لا يرغب فى أن تنافسه او تناطحه أو تثبت أنها كائن مثلها مثله فيكفَنها فى السواد ويحرم خروجها ودخولها وتعليمها وعملها بل ويبيعها ويشتريها

فإن كانت المرأة نفسها مقتنعه بزيها وملابسها هذة وترى أن تعاليم دينها تأمرها بألا يظهر منها أى جزء ... فبناء على أى شئ كان أقتناعها هذا ... ماهى الأحكام والتشريعات

خلق الله البشر تجمعات ... جماعات من البشر تختلط وتتكلم وتتعارف وتتعاون
فمن الذى حرم الأختلاط فى العمل والمدارس

ربما يكون مرحب به فى وسائل المواصلات بسبب التلاحم والتلاصق الجسدى بسبب العدد المهول من البشر لكن ليس فى كل الدنيا الناس ملتصقه والأماكن مختنقه , فما الذى يجعل التعامل والكلام وتبادل الأراء محرمه مدام لم يحرمها الله وما الضير فى رؤيه الوجوة ؟

لماذا السواد فى وجود كل تلك الألوان بتشكيلاتها وتصميماتها
سيقال الألوان والملابس الجميله للزوج وأمام محارم ... بل تلك فى خصوصيه العلاقه الزوجيه وأسرار البيوت , لقمصان النوم والغرف المغلقه
لكن الملابس واختلاف الوانها واشكالها ما كراهتها مدامت فى حدود الأحترام والستر
ما حرمتها وكراهتها

سؤال بمنتهى البرائه وتفتح الذهن لمن كان عندة أجابه منطقيه
لماذا ترتدى المرأة السواد وتتشح به ... ما هى حرمانيه ان تحادث الأخرين جميعا نساءً كانو أو رجال ... ما الحرام فى أن يرى الأنسان وجه من يخاطبه ... ما سبب أن تعتزل المرأة الدنيا فين حين خلقها الله لتتعارف عليها وترى الناس ويرونها

انا لا أحلل حرام أو أحرم حلال ... ولا حتى أحلل حلال وأحرم حرام
فهذا شأنى أرعاة والدين له رب يحميه

فقط أتسائل : لماذا تختفى المرأة وراء ستار أسود

كوارث طبيعيه

2010-01-21T00:10:00.005+02:00

أيها الأخوة الكرام
سافرت إلى قاهرة المعزّ
ومش زى الصعيدي اللى نزل مصر ... ماسافرتش عشان اشترى العتبه الخضرا طبعا
لأن دى اسماعيل يس سبقنى واشتراها من زمان ... وإن كنت حاطه عينى على شويه ميادين تانيه بس لقطه
نزلت زيارة وفسحه ولقاء بعض الأصدقاء والأهم طبعا عرض الكمبيوتر بتاعى على كبار أخصائيي علاج الأجهزة فى البلد
وصلت الجمعه عند اختى وحاسه طبعا ان تراب الأسفلت كله لزق فيا
شغلى لى يا اختى السخان عشان اخد دوش
الموتور باظ والمايه مش بتوصل غير بعد نص الليل
يعنى ايه ؟ أصلى انا والمايه الفجر حاضر لو عايزة اقابلها ؟
لالا مش للدرجه ... أدخلى نامى وعلى 7 الصبح كدة تقومى تاخدى الدوش
أمرنا لله
الصبح قبل ما أنزل ... عن اذنك هدخل بقى اخد الحمام
معلش يا صفاء بس المايه ضعفت والسخان مش هيسخنها
يعنى أيه ؟ مش ليا نصيب أقابل المايه النهاردة ؟
لا بس انزلى خلصى مشاويرك وأوعدك أما ترجعى تكون كل حاجه بقت تمام
أنزل ايه بس وانا حاسه انى متربه من مشوار امبارح
لالالا خالص انت بس بيتهيألك
نزلت وخلصت مشاويرى بل وأتغديت سمك فى مطعم الفاتورة بتاعته خلت السمك اتحجر فى معدتى قبل ما أحس أنه رجع على قيد الحياة تانى
وراجعه بقى على المغرب ولازم لازم أخد الدوش دة
والله المايه لسه مجاتش بس استنيها شويه على بعد العشا تكون رجعت
لييييه ؟ هى خرجت تتفسح والا حاجه ؟
أستنى لبعد العشا ان المايه تيجى ... أبدااا
أنتو يا بنتى لما تحبو تشربو أو لو أتجننتو وحبيتو تغسلو الهدوم بتعملو ايه
ترد بهدوء .. ولا حاجه بشغل الغساله 3 بعد نص الليل
طب مافيش شويه مايه مخزناهم نسخنهم على البوتاجاز
كل المايه اللى مخزناها غسلت بيها المواعين ومسحت بالباقى
انت هبله يا بت ؟ تحمى المواعين والبلاط وانا مش لاقيه ؟
ماهو انا كنت عامله حسابى على ما ترجعى تكون المايه طلعت
لا حول ولا قوة إلا بالله
وبائت كل محاولات أنتظار المياة بالفشل , لحد تانى يوم الأحد وجنابها لسه ماجاتش
واضطريت أنزل وأقضى شويه مشاوير وبعد المغرب قابلت أصدقائى ميرا ومصطفى ريان وقعدنا على قهوة فى وسط البلد وسلمت على مينا على السريع كدة لأنه كان مشغول ورجعت وكل اللى فى دماغى انى أفتح الدوش تنزل منه مايه سخنه
وتفتكرو لقيت ؟ أبدااااااااا لما كنت هتجنن ... معقول يعنى
طب انا بقى لازم اخد الحمام دة ولو حكم الأمر أخد مايه من التلاجه واسخنها على البوتاجاز وهى بقى تسهر جنب الحنفيه طول الليل لحد ما المايه ترجع من سهرتها
أصل هقولك ... الأنبوبه فضيت ... بس اوعدك الصبح هنغيرها وكمان تكون المايه جات
وقعتكو سودة معايا ... يا بنتى تعبانه ومرهقه ومش هقدر اسهر طول الليل مستنيه المايه المنحرفه بتاعتكم دى اللى مش بتدخل البيوت غير وش الصبح
والنتيجه انى نمت على كنبه الأنتريه مكانى وانا قاعدة مستنيه جنابها زى أى عيله يتيمه مستنيه بابا نويل
واصحى الصبح ... معلش هى جات بس انت ملحقتهاش
طب لما تيجى سلميلى عليها
لا يا اختى حلال عليكى القعدة فى شارع الصومال دة ( السودان سابقا) وانا هروح عند خالى فى الهرم (قال يعنى الوضع هناك أحسن )
بس هقول له أيه ؟ ... ازيك يا خالى , أزيك يا مراة خالى , الحمام فاضى ؟ عندكو مايه ؟
وعلى أيه كل الغلب دة ... بنااااقص
دة انا أروح بيتنا ويلعن أبو اللى يطلع من بيتهم
صحيح ... من خرج من دارة أتقل مقدارة
وأركب العربيه وإذ فجأه الأقى المايه .... بس مش فى الحنفيه ولا الدوش لااااااا دى السما بذات نفسها فتحت المخرات على دماغى طول 200 كيلو أخدتهم فى 6 ساعات لأن الطريق غرقان والعربيات بتتزحلق
دخلت بيتنا على قبل العشا ووالمصحف قاعدة فى العربيه بحلم ببخار المياه المتصاعد من المياة المتساقطه من الدش على دماغى
وأول ما عملته أنى جريت على الحمام ... والأقى أيييييه ؟
صــــــــــح ... المايه مقطوعه
يا عااالم ... يا هووو .... مصر كلها غرقانه والناس بتموت من الميه وانا بقالى 3 أيام بدور عليها ومش عارفه أقابلها زيها زى الوزرا وكبار المسؤلين
وانا مصممه لازم اخد الحمام دة ودونه الموت .... وفجأه أضائت الفكرة فى عقلى زى أرشميدس بتاع قوانين الطفو
ابن المحظوظه اللى كان فى بيتهم مايه وعارف يستحمى
هولع الـــوابــــور ... قولتها ولا كأنى جهاد ماسكه العلم وبصرخ وا آسلاماه
تطلع لى اختى التانيه (على فكرة قربت اكره العيال اخواتى دول)
الجاز خلص , أنت مستعجله ليه ؟ .... أستنى شويه دلوقت المايه تيجي
أيه الهدوء والبرود اللى الناس دى فيه ؟
على الساعه 8 كانت اعصابى فلتت وصوتى على ... ودخلو عليا لقونى ماسكه الدوش من زمارة رقبته وبعصر فيها يمكن تنزل مايه
بس الحمد لله ربنا كبير وكرمه واسع ... حضرت المياة وشوفتها بعينى ... آة والله
واشتغل السخان بل وغسلنا كمااان بعد كدة
واعدى قصاد التلفزيون الاقى خبر الأمطار والسيول والمحافظات اللى غرقت وكل اللى جه فى بالى وقتها ... أنى عرفت المايه كانت غايبه ومشغوله عنى ليه

كرة النار

2010-01-11T20:57:00.004+02:00

واحد أغتصب واحدة
شاب أو راجل أغتصب طفله
أى اجراء أو تصرف أو رد فعل طبيعي أيه ؟
هى طفله صغيرة وهو رجل عمرة 29 سنه معروف أسمه وعنوانه
فى أى بلد .. أمام أى قانون .. تحت أى حكم عرفى حتى , وبكل الأديان والملل والنحل
ما هى الأجرائات المتبعه ؟
نقول مثلا القاء القبض عليه ومحاكمته ؟
لكن ولأننا بنفكر من أى جزء من جسدنا عدا عقلنا طبعا
ولأن التعامل مع مشاكلنا بيكون بطريقه أرميها بعيد يمكن تخلص
أو كرة النار شوطها لحد ما تطفى لوحدها او لو مطفيتش تولع فى بيت الجيران ... لكن مش بيتنا
ولأن الطفله مسلمه والرجل مسيحي
فالقيادة الحكيمه والحكم الرشيد أستدعى لملمه الموضوع , وبلاش نكبر القصه أحسن النار تزيد
وبلاش نعملها فتنه طائفيه والأفضل أننا نكفى عــ الخبر ماجور , ونخلص الحكايه لحد كدة
والنتيجه ايه ؟
أطلاق النار فى الشوارع وقتل الناس فى ليليه عيد ... لأن ركن المشكله ودحرجتها بعيد مش حل
كانت النتيجه الطبيعيه ان كل واحد ياخد حقه بأيدة

أولا بقى الصعيد هو ناس زى اى ناس ... حكايه شطرى الأمه والأخوة الأقباط وشركائنا فى الوطن دى نغمه وأسلوب غريب جدا عننا لأن احنا ناس عايشين حياتنا ... عااااادى
مش بنفكر ان هذا شقيقى المواطن المسيحى وأنه شريكى فى الوطن ... مش بنفكر اصلا .
دة واحد او واحدة جيران او زملاء او شركا او اصحاب عمل .... ناس ... احنا ناس .
لما بنتفرج على البرامج ونسمع التصريحات بنستغرب جدا
لأن الكلام كله بيصب فى النهايه إلى أنه يرسخ فكرة ان دة مش جارك او زميلك ...
لا .. دة المواطن القبطى الذى يتمتع بحق المواطنه وشطر الأمه الآخر وأهل الذمه
هروله المسؤلين لزيارة الأنبا كيرلس والمنافقه والمداهنه تقول ببنط عريض
أن هذة البلد تأوى شعبين ... أنكم شعبين
شعب مسيحى وشعب مسلم ويجب عليهم التعايش ( ليس العيش ) لكن التعايش
كأنها هدنه أو مهادنه طويله الأجل يجب على أحدكم تحمل الآخر

منذ اعوام طويله وحين انتشرت الجماعات المتخلفه وسيطر العنف على مناطق كثيرة من محافظتنا وكان تبادل اطلاق النار أو حظر التجول طقس عادى ومعتاد وحتى حين تقع مشاكل تسمى ( طائفيه ) فأن الحل الأمنى الأمثل فى التعامل ( غفلقها على الكل ) ومعنى الغفلقه هى حاجه زى طينها على دماغهم
حظر تجول (على الجميع ) القاء القبض العشوائى (للجميع) التشدد فى التعامل والقسوة فى تطبيق الأجرائات (على الجميع) حبس الجميع فى بيوتهم بالأيام دون حتى الخروج للأسواق او السماح بشراء رغيف العيش
هنا ... لا فرق بين مسلم ومسيحي ... فسياسه التأديب تطبق على الجميع
عشان لما يتقرصو يعقلو وياخدو بالهم بعد كدة من أى تصرف

أحداث طائفيه ... أحداث عنف طائفى

هو حاله احتقان بين اصحاب ديانتين او طائفتين مختلفتين يسودها مناوشات مستمرة وكراهيه متبادله وعدم تقبل للأخر بل رفضه تماماً تتطور الى تخزين أسلحه وتكوين ميليشات وعمليات قتل ممنهجه و قدر عالى من التنظيم يرأسه شخصيات مؤثرة وذات ثقل وتحريض مباشر ومستمر
هذا هو مفهومى البسيط والمتواضع للمصطلح المرعب الرنان الذى يتشدقون به وكأنه لبانه ومجرد كلمات
لكن ان عيل مسيحى يصاحب بت مسلمه او واد مسلم يغوى بت مسيحيه او حاله حب وجواز او شويه عيال صيع بيعانو من الفراغ يقومو على بعض وشويه ضرب وتكسير كام كرسى تتحول بقدرة قادر الى أحداث طائفيه على أيدى وسائل الأعلام المصريه والعالميه وتصويرنا على أن الصعيد المصرى على حافه الأنفجار ويوشك على الأنقسام وان اى اتنين صعايدة واحد مسلم والتانى مسيحي هيقابلو بعض هيقطعو بعض دى تفاهه وهيافه وسخافه وعبط وتحويل أنتباة عن حاجات كتير أكبر وأهم
فعلا أى مشكله بين أى مسلم ومسيحى بتكون عاديه جدا كــ معاكسه بنت او خلاف على علاقه ما او حتى جرس كنيسه بيكونو شويه شباب أصغر وأهيف من ان حد اصلا ياخد باله منهم

سؤال مهم

هل الشرف والثأر له يستدعى حصد الأرواح بالألى فى الشارع وعشوائياً لمجرد الأنتقام لأن المغتصب مسيحي ؟
هو المفروض ان بنات المسلمين يغتصبوهم بس الشباب المسلم ؟
فى الحاله دى يبقى عمل حلال بل وفرض عين على شباب المجاهدين ؟
على أساس ان جحا اولى بلحم تورة ؟

2010-01-09T21:06:00.018+02:00

سؤال سخيف ألقته علىّ ... صفاء أيه الشعر الأبيض اللى مالى شعرك دة
لم أستسغ سؤالها ... ولم أرد عليه أيضاً

بل نظرت الى المرآة .. إلى عدة أعوام مضت وبضع احداث مؤلمه متلاحقه .

أثناء تصفيفي لشعرى أمعنت النظر بتلك الخصل البيضاء التى انتشرت بين ثنايا شعرى ... ليست شعرات بيضاء متهالكه كـ الموجودة فى الشعر الأشيب
بل خصل بيضاء فضيه شديدة اللمعان والحيويه ايضاً ... تنتهى أطرافها التى لم تفقد لونها تماماً بلون أحمر وبرتقالى نارى ... بينما عمرى لم يتجاوز الخامسه والعشرين بعد .

أستيقظت على صرخات أمى فى السابعه صباحا تقريبا
أول ما أنتبه وعيىّ وأستيقظ عقلى عليه صرخاتها المتتاليه " جوزى مات "
وقبل ان نصحو انا وشقيقاتى وجدنا انفسنا نركض من باب البيت الى الشارع يصلنا صوت عمى باكيا منتحباً بأن " أخويا مات " لنجد أبى ملقى على الأرض رأسه ورقبته حتى كتفاة مختفيه تماماً أسفل السيارة ,

لا حركه لا صوت , ولا حتى تأوه
فيما كان يرفعها على الكوريك راقداً أسفلها إنكسر الكوريك فجأة وسقطت فوقه السيارة

لتحتجزة بين الجنط وفراغ العجله وعمى بجوارة يحاول سحبه بلا جدوى فــ السيارة نصف نقل تزن تقريبا طنين عليها حمولتها كامله بما يوازى طنين أخرين لكنه يحاول حتى تمزقت عضلاته وكاد ظهره أن ينكسر
أُطلق صرخات متلاحقه لمنظر أبى فى جلباب سمنى فاتح لا يستوعب عقلى لما هو غير ملطخ بالدماء ... ولماذا الأرض حوله لا يسوء ترابها أى بقع دم
أنظر إلى شقيقتى الصغيرتين ... اجد اكبرهم تجلس على الأرض أمام أبى لا تنطق بينما الأصغر منكمشه بجوار حائط عاجزة عن الحركه
إلى أبى ... لا زال ملقى بلا حراك
عمى وأمى يحاولان بيأس أن يرفعا السيارة وسط بكائهم الذى فهمت منه أنه اول ما سقطت السيارة فوق "أبى" أستغاث بعمى قائلاً " الحقنى يا اخويا ... غيتنى " قبل أن يصمت تماماً
كل هذا فى ثوان أو دقائق لم ينقطع خلالهم صراخى بأسمه لحظه واحدة ... صرخات هيستيريا متلاحقه لمشهد مرعب ... بينما السيارة تواصل هبوطها ببطء وهدوء لتنغرس فى الأرض ساحقه أبى تحتها ... لم اكن أصرخ حزناً كما انه لم يكن عويل ... ولم أذرف قطرة دمع واحدة
تيقنت أنها قتلته ... لكنى أصرخ ليأتى من يرفع السيارة ويسحب ابى من تحتها
لو لم يتجمع عدد كافى ليحاول فهى سوف تفصل رأسه عن جسدة حتماً
أى اتصال بالنجدة او المطافى او أى جهه قادرة على رفعها هو مجرد وقت ضائع
فــ اللعينه لا تنتظر وتواصل السقوط

عشرات الرجال كانو شبه عاجزين عن هذا لأنه كما يقال "ساعه القدر يعمى البصر" ... السيارة لم تكن فى شارع واسع بل فى مخزن جانبى تبيت به واتساعه لا يتجاوز عرض السيارة ونصف متر من كل جانب , لا يستوعب العدد الكافى القادر على رفعها ... ولا نعرف سبب واحد دعى ابى كى يقوم بأجراء أى أصلاحات بها فى هذا الوقت المبكر وهذا المكان الضيق ولا كيف سمح له العقل والمنطق برفعها والرقود تحتها بينما عليها كل تلك الأحمال

تجمع كل رجل وشاب قادر على تقديم المساعدة لكنى كنت عاجزة عن التوقف عن مواصله الصراخ خصوصا بعد ان تجمعت النسوة ورأيت فى وجوههم تعبيرات غريبه بينما يتصعّبن ويمصمصن شفاهن قائلات " يا عينى جلال مات " أمام شقيقاتى اللاتى أحتلت ملامحهن كل الرعب والصدمه وحاله خرس تام زادت منه تلك الكلمات
ما هذة البلاهه والقسوة والغباء منهن ... واستعدت اخريات للمشاركه بالصراخ على سبيل المجامله وواجب العزاء

أختى التى كانت تجلس أمام أبى صامته باكيه قامت فجأة لتقول " بطلى صراخ ... بابا عايش "
ربع ساعه كامله قبل ان يتمكنو من رفع السيارة وسحبه من تحتها ... حى ...

فى معجزة إللهيه لم يصدقها كل من رأها او سمع بها

كُسرت عظام الترقوة ومعظم ضلوعه ... لكنه خرج من تحتها فى الوقت المناسب قبل ان تسحقه بأسفلها

حملوة الى داخل المنزل بين تيقن وشك بأنه مجرد وقت قبل أن يلفظ أنفاسه ووسط ترقب جاراتنا ليقوموا بالمطلوب من ندب وولوله ما أستدعانى وشقيقتى الى طردهم ... فيكفينا ما يجرى بدون أى محاوله أضافيه لتدمير أعصابنا ونفسيتنا وأخراجنا من ديننا كذلك

قبل أن يفتح أبى عيناة ... وينطق , لنلتقط أنفاسنا ونسمح لأنفسنا بالبكاء
وأمام أصرار امى اتصلنا بالأسعاف التى حضرت بعد دقيقتين بالضبط لتحمل أبى الى المستشفى العام الخالى من أى أى أى شئ ولم تجرى له حتى كشف بالأشعه بل ولم يجدو بها طبيب
لكنها كانت السابعه ونصف صباحاً ولا يوجد مكان نلجأ له سواها

وقفت امام السيارة ... أرمقها فى كراهيه وبغض , كرهتها حقاً واشتطت منها غضباً ... ربما لـ أفرغ ذلك الانفعال الرهيب ... حتى أننى ضربتها "بالشبشب"

حين عاد أبى إلى المنزل كان الخبر أنتشر فى البلدة كلها ,

لكنه الخبر الأول .. قبل التصحيح
وقبل ان ينتصف النهار وصلت نصف المدينه مقدمه واجب العزاء لأبى

الذى استقبلهم شخصياً "ليتقبّله "

عدد تذكارى ... وباقه ورد

2010-01-03T17:57:00.018+02:00

عامين مرا على بدء التدوين
فى يناير يكون قد مر عامان على انشاء مدونتىّ الأثنتين
لكن مقتطفات بدأت ادون بها فى يناير أما الأخرى فبدأت فى مارس
لا أذكر تاريخ البدأ بدقه نظراً لحذفهما من قبل
لكنه كان شهر يناير

ولهما الفضل فى تعرفى على أرق وأرقى الناس
على أصدقاء كانو بمثابه أخوات وأخوة
ولهم الفضل فى تعلم الكثير وتحمل مواقف ما كانت لتمر بسهوله لولاهم

مروة : أول صديقاتى .. بل أول شقيقاتى من المدوٍنات
بساطتها وشدة تلقائيتها وعفويتها تخفيان روحاً شديدة الحساسيه لماحه بدرجه لا تصدق فى ما خص كل أنواع المشاعر الأنسانيه

سلوى : تمثل مع مروة الثنائى الأقرب إلى قلبى والشقيقه الأخرى لى
روح نقيه حتى تظنها لا تنتمى الى عالمنا هذا من شدة تفائلها وثقتها البالغه بالله حتى فى مواقف تصعب على الكثيرين وتزعزع ثقتهم , أجد سلوى مؤمنه وصابرة ومحتسبه ... لم أرها مرة واحدة غاضبه او كارها لأى شخص مهما كانت درجه إيذائه لها

مصطفى ريان : صاحب أول تعليق , أول أخ حصلت عليه هنا
قلب شديد الطيبه وبرائه تكاد تكون حكر على الأطفال بكل نقائهم وشفافيتهم وأخى الصغير

أمجد : إنعكاس عقلى وتفكيرى وأرائى فى المرأة ... هو أمجد
أخف روح ودم وأكثر من قابلت مرونه وأنفتاح فى التفكير وتقبل للأخر ومرحاً وسعادة حتى فى أحلك المواقف وسخريه وثقافه وحين الحاجه أجد عندة العون والمساندة , هو ومصطفى دائمى السؤال عنى ولا تفوتهم اى مناسبه حتى يكونا السباقين بالأتصال والتهنئه ... وهو أصغر أخواتى

نورالدين : الصديق دائم النقار وكأننا مولودين فوق راس بعض
هجومى صدامى يرهقنى بالجدال , والوحيد القادر على أخراجى عن اعصابى ويضعنى فى مواجهات انا فى غنى عنها ... لكن خلف كل هذا قلب طيب ومشاعر رقيقه مرهفه تجعله من الأصدقاء القريبين مهما هاجمنا بعضنا او أشتدت خلافاتنا ... مجرد بضع كلمات وعتاب بسيط و تعود صداقتنا لسابق عهدها

شريف : دة باشا ... باشا بكل ما تحمله الكلمه من معنى
رقه ورقى ... شياكه وأناقه بالغتين فى التعامل حتى تظنه أحد البشوات رغم شدة شدة بساطته وتواضعه وخجله البالغ وأدبه الجم ... يكفى أنه حين تعرض للسرقه نعت سارقه ( السيد لص )
ورغم تفاوت الأعمار والمقامات والقيمه إلا أنى افخر بأن أدعى أنه صديقى ولشدة بساطته يقبل
عقليه مرنه متحضرة راقيه وقلب واسع رحب مفتوح على مصراعيه لكل من يدق بابه , يعشق التعرف على الناس ومنحهم بعض من روحه ويستحق عن جدارة لقب عمدة المدونين
ويعتبر أقرب الأشخاص لى على الأطلاق

هؤلاء هم حصاد 2008

فى 2009 كان لى شرف التعرف على أخرين وشرف صداقتهم أيضاً

د / عصام : احوال الهوى هو خير وصف له .
إنسان محترم جدا رقيق مساند ذو أحساس قوى جدا وخفه ظل غير طبيعيه
شديد الحساسيه فلا تعرف أهى ميزة أم عيب لكنه شهم وابن بلد وصاحب صاحبه رغم مكانته
ولا يتأخر فى السؤال رغم مشاغله ولا أنسى له هو وشريف وسلوى مساندتى والوقوف بجانبى حين خضعت والدتى لأحدى العمليات الجراحيه واتصالهم الدائم للسؤال والأطمئنان عليها وعيادتها

داليا : قوس قزح , مجموعه من المشاعر الرقيقه العطوف وقلب يسعى دائما لفعل أقصى طاعته فى طريق الخير وسيدة فاضله سعدت برؤيتها والجلوس معاها لبعض الوقت

خالد : همس الأحباب , لم نرى بعض سوى لوقت قليل فى أحدى لقائات المدونين إلا أننى شعرت أننا أبناء عم وهو من الأشخاص شديدى البساطه والتلقائيه

حاول تفتكرنى : رغم أنى لا أعرف حتى أسمه لكنى شديدة السعادة بصداقته والتعرف عليه فهو عقليه متميزة ونفس شفافه

سمكه واحدة : سمسمه الرائعه خفيفه الدم المتصالحه مع النفس ورغم كل سخريتها وتهريجها شديدة الاحترام والأخلاق

ميرا : امرءاة بعقل رجل
لكنى أراها فتاة بعقل واعى متفتح وأفق رحب ونفس طيبه , قلبها لا يحمل ضغينه بل أظن أنها لا تعرفها أصلا تتمتع ببساطه و تلقائيه غير مفتعله وأشعر بالسعادة لصداقتها والتعرف عليها رغم انها تمت فى ظروف صعبه بعض الشئ ... ومعها عبير إنجل : مفاعل صغير للمشاكل والمصائب المصغرة كارثه جميله تمشى على قدمين ... لكن قلبها أبيض

كل أصدقائى شديدى الجمال والرقه الذين شرفونى بتعليقاتهم وصداقتهم

الثنائى المنياوى بسنت وفتاة من الصعيد : اصحاب عقل منظم وثقافه واسلوب يميزهم ورقه بالغه ويحملان هموم وطنهم الصغير والكبير
عم صلاح" فشكول" و صديقى المغربىين المختفيين اسافو ونبراس العتمه , استاذ هشام , بحر الألوان , اللؤلؤة , وليد "عارفه مش عارف ليه" وحسن ارابيسك , هانى زينهم , الراقى والمحترم دكتور محمد
الفتاتين الرقيقتين والرائعتين "زهور الأمل والوعد الحق " إيناس حليم وصدور كتابها وإن شاء الله يلاقى كل نجاح ... دكتور نورا , ليساندرا , مدينه من النساء , أحلام اليقظه , المهندس راجى , حنا السكران , صبرنى يا رب , حلم بيعافر , خواطر شابه , البنفسج الحزين , فتافيت , سقراط , مايكل , إياد وشاعرنا القوى احمد الصعيدى , جارى من بنى سويف دكتور ياسر عبدالفتاح , المتفائل دمث الأخلاق محمد غاليه والرقيقه كيارا, مرهف الحس ادم المصرى الشابين المهذبين حسن حنفى ومصعب صلاح , حياة بلا عنوان وشاعر الزمن الرائع بيرم المصرى , الجنرال ماكس و سحساوى والمختفى من شهور مجدى عبدو بصراحه ناس كتير جدا جدا بحترمهم بشدة وبحبهم اوى شرفونى وأسعدونى
مش عارفه افتكر مين والا مين لكنهم بالتأكيد أكثر وأسفه لكل من سقط من ذاكرتى سهواً لكنه يحظى بنفس المحبه والأحترام
طولت انا عارفه بس دة عدد تذكارى يا جماعه حاجه مش بتتكرر غير كل سنتين مرة
لأنى بصراحه مفييش خلق اكتب الكلمتين دول تانى كل سنه
كل سنه وانتم طيبين
كل سنه وانتم أصدقاء

رجاله بلدنا ... برضه

2009-12-28T18:00:00.004+02:00

سؤال شديد الألحاح
هو ليه المصرى بقى عبيط وبرياله
المصرى بتاع احنا اللى زرعنا البطيخ عـ الأسفلت وخرمنا التعريفه ورشينا الهوا دوكو وعبينا الشمس فـ قزايز
أذ فجأة كدة قلب عبيط وكل هلف فيهم يجيى قصاد اى فستان حرمه ويريل ويبحتر مئات ملايين الدولارات ؟
وكل دكر فيهم عندة شركات ومصانع وألاف العمال يستعبد اللى خلفوهم ويقصص من حقوقهم وإشى تأمينات وإشى ضمان اجتماعى وإشى خدمات صحيه ويبقى هاين عليه يقطع أجورهم خالص بحجه سداد ديون مصر وبمنتهى الأريحيه كدة يتلم له على مرة لبنانيه او سعوديه متفرقش حاجه والله عن المصريه او أى عالمه فـ فرح ويبك لها كااام ميه مليون

مرة بحجه انها تحت رعايته معرفش يعنى ايه تحت رعايته تقولش كفاله يتيم يا خى
ومرة قال أميرة سعوديه
(بقى نسوان السعوديه فقرو وخلص بترول رجالتهم وجايين يشمشمو فى المصرى ؟)
واللى تبقى فى بلدهم جربوعه ومطروده تيجى هنا تاخد لها كاام دور فى فندق على النيل وتعمل أميرة على باقى المصريين وتطلق كلابها علينا وقال أيه أسرة مالكه
مالكه منين وهما مش لاقيين يأكلو نسوانهم ومسرحينهم على المصريين

لا وبيعايرونا اننا شغالين فـ بلادهم وانهم بيأكلونا ... دة الكام ملطوش اللى بيجو من برة بنخسر قدهم ألف مرة بالشكل دة من رجال أعمالنا الأفاضل عاشقى الحريم اللونه اللى بتفرش تحت النسوان مليارات الناس اللى طفحت الكوته عشان تلمهم بالمليم
وفى الأول وفى الأخر هى أيه ؟ مرة ... حرمه زيها زى اى واحدة فى الشارع
ايه اللى يزيد عشان الملايين دى تندلق تحت كعب جزمهم ؟

ومبقاش فاضل غير نغير الأعلان ويبقى المصرى هيفضل أهبل البنوك قدامه يهبش منها ويدى للنسوان اللى وراة

أختم عام 2009 بــ

2009-12-24T15:59:00.004+02:00

بسم الله الرحمن الرحيم

يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ
وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِّنَ الأَمْرِ لَعَنِتُّمْ وَلَكِنَّ اللَّهَ حَبَّبَ إِلَيْكُمُ الإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ أُوْلَئِكَ هُمُ الرَّاشِدُونَ
فَضْلا مِّنَ اللَّهِ وَنِعْمَةً وَاللَّهُ عَلِيمٌ حَكِيمٌ
وَإِن طَائِفَتَانِ مِنَ الْمُؤْمِنِينَ اقْتَتَلُوا فَأَصْلِحُوا بَيْنَهُمَا فَإِن بَغَتْ إِحْدَاهُمَا عَلَى الأُخْرَى فَقَاتِلُوا الَّتِي تَبْغِي حَتَّى تَفِيءَ إِلَى أَمْرِ اللَّهِ فَإِن فَاءَتْ فَأَصْلِحُوا بَيْنَهُمَا بِالْعَدْلِ وَأَقْسِطُوا إِنَّ اللَّهَ يُحِبُّ الْمُقْسِطِينَ
إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ وَاتَّقُوا اللَّهَ لَعَلَّكُمْ تُرْحَمُونَ
يَا أَيُّهَا الَّذِينَ آمَنُوا لا يَسْخَرْ قَوْمٌ مِّن قَوْمٍ عَسَى أَن يَكُونُوا خَيْرًا مِّنْهُمْ وَلا نِسَاء مِّن نِّسَاء عَسَى أَن يَكُنَّ خَيْرًا مِّنْهُنَّ وَلا تَلْمِزُوا أَنفُسَكُمْ وَلا تَنَابَزُوا بِالأَلْقَابِ بِئْسَ الاِسْمُ الْفُسُوقُ بَعْدَ الإِيمَانِ وَمَن لَّمْ يَتُبْ فَأُولَئِكَ هُمُ الظَّالِمُونَ
يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وَلا تَجَسَّسُوا وَلا يَغْتَب بَّعْضُكُم بَعْضًا أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌ
يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ
صدق الله العظيم

ولا أحسبنى أكبر من أن أقع فى الخطأ .. فكلنا أبن أدم وكلنا خطاء
وأختم
(( وإذا قيل له اتق الله أخذته العزة بالإثم فحسبه جهنم ولبئس المهاد ))
وقانا الله شر الأخذ بالعزّة فى الإثم

عالم ضيق .... على أتساعه

2009-12-21T17:02:00.009+02:00

حمادة بيحب غادة وغادة بتحب شادى وشادى بيموت فى رانيا ورانيا عينيها

منى وانا بحبك انت وانت ملكيش فـ حاجه

قصه ملكوش فيها انا عارفه ... خلاص سيبكو منها دلوقت هنرجع لها بعدين
اللى حصل يا سادة يا كرام

(برضه شغاله فى الحواديت ... معلش استحملونى شويه)
كنت قاعدة لا بيا ولا عليا وصلنى أيميل غريب لا يحمل غير جمله واحدة
صفاء من فضلك .. من فضلك تقرى القصه دى
القصه دى انا بعتاها ليكى مخصوص
ومعاها رابط أضغط على الرابط ألاقى ملف مرفوع على الــ4شير
حاجه يعنى أخر أثارة وتشويق ومش ناقص غير الأكشن
أفتح الملف الاقى قصه ظريفه بتحكى عن واحدة حبت واحد وهو حبها
أو محبهاش ... ما علينا .... مش قصتى
حبها أو أستغلها أو مارس نوع من السيطرة أو كان له سطوة ما عليها
وسابو بعض ... أو هو سابها بعد فترة تعدت السنه والنص من الحب

برضه مفهمتش دخلى انا أيه

آآآآة هما لما كانو بيحبو بعض اتفك معاها بكلمتين

وفى ساعه صفا وهما قاعدين تحت ظلال الماسنجر ورياح الأنترنت تهب عليهم
كلمها على بنات يعرفهم وبيزور مدوناتهم ومنهم أصدقاء
وإن كان حب يعمل قصادها دون جوان وكازنوفا وان له معجبات وبنات هيموووتوعليه
وذكرنى من ضمن ما ذكر بل وزاد عليه أنى من المغرمات الولهانات وانى بطاردة وبرمى نفسى عليه والراجل من كرم أصله بيصدنى
(مقالش الصراحه بيصدنى ليه ...زهد فيا والا تدين ولا قاوم مطاردتى له من شدة حبه لها )
المهم يعنى اتضح أنها لم تكتفى بالرساله العجيبه ليا انا بس بل ولكل بنت صدف وأن دخلت مدونته يوماً ما او كان يعرفها او كلمها عنها او قابلها فى لقاء مدونين أو ذكر لها كاذباً أو صادقاً أنه على علاقه بيها أو سابها عشانها والبنت الحقيقه بذلت مجهود جبار عشان تلاقينا واحدة واحدة
مرفق بالرساله أيميل لها
ولقيت نفسى فى وسط لقاء مدونات بنات غير مخطط له ولأن الموضوع دخل فى مس بالسمعه والكرامه الشخصيه بل والشرف بقى

فــ وسط كل التخبط دة كل واحدة مننا لقت نفسها بتبرر وتدافع عن أسمها وسمعتها
بل ووصل الغضب للزج بنا فى وسط المعمعه دى وأنفلات الأعصاب للى تغلط واللى تشتم واللى انصدمت فى الشخص اللى كانت بتحترمه واللى سكتت تماما بلا تعليق ولا كأنها وصلها شئ وللأسف انا كنت من الناس اللى فى شدة الانفعال ولسانى فلت على أخرة بقى لأن سيرتى جات فى موضوع انا فعلا ملييش دخل بيه وأشخاص لا يهمونى ولا تهمنى أخبارهم
بعد ما رجع الهدوء وتراجع التوتر والأنفعال لقيت غريب ما يمكن أن يفعله ويقوله الأنسان لحظه أن يمسه مصاب أو مكروة أو يجد نفسه موضع اتهام

والأغرب ما تفعله فتاة أو امرأة خذلها الحبيب
هى وبمنتهى برائه الأطفال جرحت بنات وستات لا يعرفونها ولم يؤذوها بترديدها كلامه لها وبعض ملاحظاته عنهن ... وحجتها أنها لا ترغب فى أن نستمر فى معرفه هذا الشخص لأنه يقول عنا كلام خاطئ ويردد افترائات
حين نسئلها ولما قلتى الأن ... ان كان يردد هذا الكلام عنا منذ عام ونصف ؟
ترد .. لأنها استفاقت الأن وترغب فى تخليص ضميرها
ضميرها أرتاح على حساب أهانتنا كلنا بكلام لما بدا لنا سائنا
وأحيانا نقول على الأقل شكرا لها فقد نبهتنا لشخص كنا نظنه أهل للثقه
فـ أتضح أنه أبعد ما يكون عنها
هى على كل حال عملت عملتها زى ما بيقولو واختفت
أنتقمت أو خدت بتارها منه أو حتى فشلت غلها

يرجع مرجوعنا لأول سطر وللعنوان
وهو أن مجتمع المدونين على أتساعه ضيق جدا وكلنا تقريبا يعرف أحدانا الأخر أو يربط بينهم معرفه عن طريق أطراف أخرى كــ ما الدوائر المتداخله هو مجتمع مثله مثل الواقع تماماُ
فيه الجيد والسيئ والطيب والشرير وبين البينين وفيه القيل والقال والمحبه والعداوة والصداقه والتناحر والكذب
هو مجرد صورة معكوسه ... ولم نفلح حتى فى أن نظهر به بمظهر جيد مثل أى صورة ملتقطه نرغب دائما فى خروجها على أجمل أحوالنا وأوضاعنا

دستـــــــــــور

2009-12-15T17:52:00.006+02:00

انت معمول لك عمل
مكتوب على جلد سمكه وكل ما السمكه تتحرك فى المايه
العمل يغلى فــ دماغك
طب والسمكه دى نيليه والا بحريه ؟
اصل احنا محافظه على النيل فأعتقد انها أكيد سمكه بلطى نيلى
مش معقول تكون بورى أو قشر بياض

العمل اللى معمول لك واحدة بتكرهك رشته على باب بيتكم
يخليه يشوفك قرد
(انا قرد يا ولاد الكلاب ؟ حاااضر)

شكلك متغير خالص وعنيكى زايغه
ومبدوله كأنك مش انت
لا يا خالتى والله انا
لا مش انت ... شوفى حد يقرا لك قرآن
طب مينفعش أقرئة انا لنفسى ؟ واهو برضه اكسب ثواب فيا
لا ... لازم حد يكون فاهم وطيب وربنا بيقبل منه
يعنى انا غبيه وشريرة وربنا مش طايقنى مثلاً ؟
اهو الجدال اللى انت فيه دة بسبب العمل السفلى
الله يا خالتى ... وليه ميكونش علوى
تبص لأمى وتقولها شوفى شيخ يقرا لبنتك ويشوف ايه نوع العمل اللى معمول لها

بنتك حلوة وأكيد حد من اللى اللهم ما احفظنا غاويها
ومش هيسيب حد يقرب لها
ليه يا طنط ؟ هى عدمت العفاريت الحريمى ومفضلش غيرى ؟
ممكن يكون بيحبك ... او حد مسلطه عليكى يئذيكى
انت مش بتشوفى قطط سودة باصه عليكى والا كلب او اى حاجه
او تكون بتراقبك
وليه يا طنط كل دة ... ما يطلع هو نفسه واهو بالمرة نتبادل الافكار اوحتى يسلينى او نحكى شويه
اللهم ما احفظنا ... انت اتجننتى ؟ ايه اللى انت بتقوليه دة .
وبرضه تبص لأمى : سامعه كلامها ؟
مفيش حد عاقل يقول كدة روحى وديها لحد بيفهم يفك لها العمل والا يعرف مين عايز يئذيها

بعض من كلام الاهل والجيران وابص انا بقى الاقى كل شويه حد متطوع

(خال_ خاله_ عم_ جارة)
داخل عليا بواحد بيقولى انه الشيخ مين وانه وانه وانه

طيب اتكلو على الله بدل ما افتح دماغ حد يبقى دة برهان دامغ على أصابتى

بالعين او العمل أو الأسياد وان سكت مش هيبطلو الشغلانه دى

وماله ... اهو برضه حاجه اتفرج عليها بدل الملل
هاااا يا مولانا اتفضل
لا انا بعالج بالقرآن
اة برضه وماله
انت لما بتسمعى القرآن بتتوترى والا اعصابك بتتعب ؟
لا
لا ازاى .. اكيد بيحصل لك أعراض
لا يعنى لا ... مش بيحصلى حاجه
طيب لما بتيجى تصلى مفيش حاجه بتمنعك او بتدوخى ؟
اة بدوخ
طيب يبقى فيه اعراض اهو
لا دى مش اعراض ... دة هبوط
ضغطى واطى ولما بسجد بيجينى شويه دوار ... عااااادى
ابتسامه العالم الخبير ببواطن الأمور فى مواجه طفله غريرة تعجز عن رؤيه المخفى
طيب اقعدى جنبى هنا
آن آن آآآآ مش بحب اقعد جنب حد انا
حاضر يا مولانا
يحط ايدة على راسى والتانيه على جبينى ويفضل يقرا ويتمتم
ربع ساعه ... حاسه بحاجه ؟
(بتلامه) : حاجه ايه ؟
دوخه خنقه حاسه انك حرانه أو بتعرقى
(وانا بطرقع اللبانه ) لا
يحط ايدة تانى و يبدأ فى القرايه
المرة دى ايدة على رقبتى من ورا ووشى قلقت قوى انا كدة
يسئل انت بتخافى فى الضلمه او بتحسى ان حاجه هتطلع لك ؟
(دة أيه بيت الرعب دة ) لا مبخفش
ابتسامه خطيرة بقى المرة دى
ازاى ... عادى ان حد يخاف من الضلمه او يتخض لو النور قطع عليه
طيب يا مولانا هو ايه اللى المفروض يبقى عادى يعنى ولا يدل على انى ملبوسه ؟
انى اخاف والا مخفش
يا بنتى دى حاجات مينفعش فيها هزار وقرائن للناس
لسه هيحط ايدة تانى ويبدأ قرايه وانا بجد بقى اتوترت
دى مش حكايه عفاريت بقى .. هو المفروض اسيبه لحد ما يوصل لفين بالظبط ؟
وان اعترضت يبقى آآآة دة فيه حاجه فعلا وهى مش طايقه تسمع القرآن
اقوم اقف : يا سيدنا لا بكره سماع القرآن ولا بخاف من العتمه ولا انى اقعد لوحدى
ولا بشوف حاجات ولا بسمع حد بيكلمنى

طيب فى النهايه يا عم التشخيص أيه
دى مش خالصه ... واللى عليها شداد قوى

(يعنى دة مش واحد بقى دى بقت فرقه صاعقه جيالى من معسكر تحت الأرض)

واكتر من شيخ وأكتر من تشخيص من أول الأعمال والأسحار لحد الأسياد والقرناء

والحـــــــــــــــــــــــــــل

واحدة تطوعت وقالت هو الزار ... مفيش غير الزار

البقاء لله

2009-12-07T17:26:00.004+02:00

توفيت الى رحمه الله تعالى

والدة صديقتى سلوى حسين
.

مدونتى ( طوق الحريه ... وتأملات قلب )

أرجو صالح دعواتكم لها بالرحمه ولعائلتها بالصبر

نظرة على

2009-12-05T22:17:00.008+02:00

.
المشهد السياسى فى مصر

.
بلاها ناديه ..................... خد سوسو
.

معايدات

2009-11-30T17:03:00.004+02:00

من الرسائل اللى بتوصلنى فى الاعياد ورمضان

بعض الرسائل الجميله اللى عجبتنى
.
قولت اعمل زى السادة المسئولين
.
وأنشر بعض البرقيات والمعايدات

----------
العيد جاى عليكو قلت الحق أهنيكو قبل ما العرض يخلص وتقشفر عليا وعليكو .

----------

واحدة بتقول لجوزها أذبح خروفين بمناسبه مرور 25 سنه على جوازنا

قالها أيه ذنب الخروفين فى غلطه إرتكبها حمار .

-----------

يحكى أن جماعه من السلف الصالح بينما هم جالسون

إذ دخل عليهم رجل شديد بياض الوجه والثياب

وسأل : أتدرون من البخيل ؟

قالو الذى لديه مالاً ولا ينفق منه المزيد .... قال لا

قالو الذى يلبس ثوباً واحداً ولديه الجديد

قال : لا ......... قالو فمن ؟
.
قال هو الذى أدرك رمضان ولم يرسل لإخوانه رسائل بالتهانى ولديه رصيد

ثم أجهش بالبكاء وبكى كل الحاضرون فى الكوفى شوب .

-----------------

رمضان على الأبواب : فإلى كل من أسأت أليه فى يوم ما

إلى كل من أخطأت أو قصرت بحقه أو أذيته

بقصد أو دون قصد ...

أقولك لكم ..... إنتو اسه شوفتو حاجه

الجاى ألعن وأيامكم سودة معايا

---------------

بمناسبه عيد الأم أهنئك بشهر رمضان , جعله الله زواجاً مباركاً وأعادة

الله إلى وطنه سالماً , وإنا لله وإن إليه راجعون

(سكران صاحب واجب)

التضحيه الكبرى

2009-11-25T15:35:00.012+02:00

أرفض مصطلح مصر فوق الجميع

نعم انا مصريه
ونعم أحب بلدى
لكنى أرفض ان أساق الى شعارات نازيه
لم يقلها سوا النازيين
من كانو يرون أنهم أفضل البشر
وانقى الدماء

لا نحن أفضل البشر ولا دمائنا أنقى من دماء غيرنا
وبالتأكيد نحن ليس بيهود حتى نردد مثلا مقوله شعب الله المختار
لن نقول نحن أبناء الله وأحبابه

نرى بلدنا أفضل وأجمل وأحن مكان على وجه الأرض
كذلك غيرنا يرى بلادة نفس الشئ

ما يحدث من تجييش وتجميع خلف هدف فارغ كأننا قطيع من خراف
ودعاوى للألتفاف حول قادتنا وشعارات ومقالات ولقائات

وجمل مبتذله واقوال لا يعلمون معناها

.
والحجه كرامه مصر
كرامه أبناء مصر
.
الدوله أخرجت البلطجيه ومسجلى الخطر من السجون كى تطارد بهم نفس أبناء مصر فى الأنتخابات
ولم تتهم نفسها بأنتهاك كرامه أبناء مصر
فعلت مثله الجزائر حين أخرجت بلطجيتها ومشاغبيها كى يطاردونا ويعتدو علينا فى شوارع الخرطوم

لا كل من طارد الفتيات وانتهك اعراضهن فى الانتخابات هم كل شعب مصر
ولا كل من طارد المصريين واعتدى عليهم فى الخرطوم هم كل شعب الجزائر
نظام الحكم فى مصر = نظام الحكم فى الجزائر

فأن يأخذنا الغرور الكاذب والغطرسه الفارغه والتعالى القميئ
نعاير الباقيين بأنهم من هم ؟... بانهم همج ... بأنهم بربر
نتهم شعب كامل بأنهم عصابه وانهم بلطجيه وانهم مرتزقه
شعب لم يخطئ فى حقنا او يهنا بعكس بعض أخوتنا الاعزاء الغاليين فى الخليج العربى المبارك
شعب كامل كل خلافنا معه كروى
نعم الكرة رياضه ونعم نحبها ونتمنى فيها الفوز .... وفقط
هذا هو كل ما تعنيه
.
أن نتخذها ذريعه لتجميعنا وقيادتنا كما الماشيه
ونردد كــ الببغائات شعارات وهميه ومقولات فارغه سخيفه

ثم نتهجم على شعب كامل نعايرة بالتحرير ... وكل ما فعلناة معهم هو مساندة ودعم .
شعب الجزائر قاوم المحتل 130 عاما فقد خلالهم مئات ألاف الشهداء ... ليس فى هذا جدال وليس محل خلاف
ساندناهم ووقفنا بجوراهم فقط ... لم يجلسو هم فى بيوتهم وذهبنا نحن لتحريرهم مثلا كما فعلنا بالكويت
قتل أبنائنا بالكويت ...ولازلنا نهان فى بلادهم ونعامل بنظام الكفيل ونجلد كما الحيوانات فى دول جارات لها
لم نعايرهم بالتحرير ولم يشكرونا عليه او يحفظو جميلنا
وحتى فى أعادة الأعمار لم يستعينوا بشركاتنا بل بالاجانب
فالخواجات عندهم أنقى و أغلى

نعم أرفض ما حدث للمصريين فى الخرطوم ... لكن فى حدودة
بعض البلطجيه اعتدو على السادة الفنانين والممثلين وأعضاء الحزب الوطنى الذين سافرو مجانا على نفقه الدوله
فهم أولاً وآخيراً أبناء وطنى

لكنى أيضاً لا أصدق الأنفعالات الكاذبه لمسؤلينا الأجلاء والصرخات الحنجوريه يالا ضيعه هيبه مصر
واللى يهين المصريين هنعمل فيه ونسوى
.
احفظوا كرامتنا انتم اولاً .... رجاء عاملونا كما البشر

كى نصدق فيما بعد بكائكم على كرامتنا

كنت مستعدة ان أصدق وان أسير ورائكم لو هناك ذرة صدق بمشاعركم
لو أنكم حقاً تعنون ما تقولون
لو أنكم ستتخذون موقفاً جاداً تجاة كل من اهان مصرى وهدر كرامته واستعبدة
لكن الهدف معلوم ... والغرض مرفوض

أرفض ان اكرة الجزائر بلدأ وشعباً وارفض ان أنكر تاريخهم ونضالهم
أرفض ان أستهين بهم وأهينهم

أرفض أن انكمش على ذاتى وأتقوقع واشكو أضطهاد الآخرين
أن أقنع نفسى بأن الآخر يكرهنى ويحقد علىّ

ثم أنظر بأستعلاء ودونيه للأخر وتتوالد لدى أوهام عظمه كما فعل النازيين

وادّعو أن المانيا فوق الجميع

وكما يفعل اليهود ...

.
يرويدون أن يقنعونى بالظلم والاضطهاد والغبن
دى مجموعه من الأمراض النفسيه والمجتمعيه .... يجيشو شعب كامل ويمرضوة بكل نقيصه نفسيه لتحقيق مصلحه ذاتيه بالحكم والتملك والأستبداد

لرغبتهم بالاحتفال بالعيد بالتضحيه بشعب كامل وبعقله

وأحياء نزعات عنصريه أو بالأحرى زرعها بنا

نعم مصر فوق رؤسنا .... لكنها ليست فوق الجميع

اسفه بشدة للأطاله

كل عيد وكلنا طيبين وبخير وعقلاء
.

رجاله بلدنا

2009-11-19T19:07:00.005+02:00

الشاشات منورة بصور المشجعين المصريين

الباكين المنتحبين المكسرين فى السودان

وكل راجل وراجل بسم الله ما شاء الله شحط

واقفين بمنتهى البرائه والاستسلام يقولو الجزائريين ضربونا

الجزائريين هيموتونا

احنا اتهزمنا بيضربونا ليه بقى

مش هما كسبو يبقى بيضربونا ليه

دول كانو معاهم سنج ومطاوى

دول ضربونا بالطوب

الستات اللى معانا انضربت

كل شحط وشحط فيهم وفوشه شنب

والحريم اللى معاهم انضربو

لا والصويت اللى فى التليفونات والحقونا معانا مصابين وجرحى

ومفيش دوا أصلهم تحت القصف فى غزة والا بغداد

يبقى معلش والنبى من فضلكم يعنى محدش يتحرش بواحدة فى الشارع

محدش يعاكس حتى واحدة

أرحمونا من نشيد رجاله وطول عمر ولادك

لما معرفوش حتى يحمو البنات والستات اللى كانو معاهم

وطالعين كلهم ينافسو بعض فى الشحتفه

وبكدة نبقى احنا الشعب اللى مش عارف ياخد حقه لا برة ولا جوة

كدة نبقى احنا شعب فــلــه يا روحى

حلم المونديال وأسباب تقدم الأمم

2009-11-16T16:38:00.012+02:00

هل نستكثر على انفسنا الفرحه ؟

فزنا فى مبارة واحتفلنا

هل هذا كثير للغايه ؟ أو مبالغ فيه ؟

قبل ان ترتفع صيحات الفوز

أرتفعت صرخات التحذير والعويل والندب على الشعب الاحمق الذى يتناسى مشاكله
وينساق وراء فوز و انتصارات وهميه وفرحه وقتيه

كيف نهلل لهدف او اثنان فى كرة القدم ونحن نعانى والمياة لا تصل لألاف القرى
والصرف الصحى منهار والطعام ملوث وأبنائنا غرقى وقتلى ومحترقين والانفلونزا
تحصد ضحاياها

كيف ننساق وراء مؤامرة الدوله لتمرير التوريث فى مرمى الشعب مختفيه فى اعطاف غوغائيه شعب وكيف نفوز على

الجزائر فى مباراة وننسى الاف المصريين المحتجزين هناك مهددين بالذبح والقتل

.
وكأننا يجب ان نحيا مأساة أغريقيه ونعلق بين جبلين ويمزق طائر الرخ أكبادنا كل يوم ونغرق فى طوفان الدموع

والحسرة على أحوالنا وتطوف مواكب اللطم شوارع مصر

متذكرين مأساويه أحوالنا وحياتنا وأياك أياك ان ننسى او نفرح بشئ ما او نحتفل

فى الايام الماضيه سمعت وقرات ألف مرة جمله يا امه ضحكت من جهلها الأمم

وكأن كل الأمم سعيدة راضيه فرحه بما أتاها تسبح فوق امواج الرخاء ونحن نمتص الاعواد الجافه

كل الناس تموت أبائهم واخواتهم وأبنائهم ثم يفرحون ويحتفلون بزواج ونجاح وميلاد

لا يحيون بجانب القبور

فلم بحق الله وجب علينا نحن ان نحيا فى تلك القبور

كرة القدم .... مثلها مثل اى شئ أخر فى حياتنا من نجاح وفرحه ومعاناة وألم وسعادة وزواج وطلاق

ليست بالتأكيد حرب ولكنها أيضاً ليست السخافه المطلقه

رياضه ... تسليه ... شئ ممتع مشاهدته والفرحه للفوز بها او الحزن للخسارة وفقط

لم نحمل كل شئ بما لا يحتمل ولا يطيق

هم مجرد شباب أفضلهم أبن فلاح ... مثل معظم أبائنا

ليسو من طبقه حاكمه او رجال اعمال او وافدين من الخارج

الموضوع كله شعب فرح بأنجاز أو نجاح أو تفوق بعض أبنائه

وحتى لو نتمسح بالفرحه ... لو نصنع سعادة وهميه

ما العيب ؟

نعم ولنأمل بالوصول لكأس العالم بل والحلم بالفوز به أيضاً

ما المانع

فــ ان وصلنا الحمد لله على تحقيق ما يسعدنا

وأن لم ... خلاص محصلش حاجه

البرازيل ربما كانت الدوله الوحيدة فى التاريخ التى أعلنت أفلاسها لتعلن فقرها وتطالب بأسقاط
ديونها

ومع ذلك فازو واحتفلو ولم تتضحك على فقرها وجهلها الأمم ولم تلغى احتفالاتها وتطفى أنوارها لأنهم فقراء وجوعى

نحن لا نحيا مجاعه ولا جفاف والأحوال عندنا بالتأكيد أفضل من نصف دول العالم على الاقل

لاااااا أقول اننا الأفضل فى الكون

لكننا لسنا الأسوء ايضاً لمجرد أننا هتفنا وفرحنا لبعض أبناء هذا البلد حاولو أدخال الفرحه لقلوب باقى أهلهم

العلم والتقدم والتكنولوجيا والبحث العلمى واقتحام الفضاء ليست مهمتهم ولا هم مسئولين عنه وليس بالبكاء والعويل
يتحقق النجاح

كما أن احتفالنا بالفوز فى مبارة لن يؤثر على فرصنا فى أحرازة

دليل السائح المتسول

2009-11-10T12:35:00.007+02:00

أعفن انواع السياح هما اللى بييجو عندنا

خمس أثار الدنيا وفنادق ثابته وعايمه وطايرة

وقرى سياحيه وشواطئ ومتاحف

ومقابر مالها اول من أخر

ومعارض أثار متجوله فى كل الدنيا

لا وفوق البيعه وزير سياحه

ومع ذلك أعفن انواع السياح هما اللى بينزلو مصر

فرنسا واسبانيا وايطاليا عدد السواح اللى بيدخلوهم
.
مساوى واحيانا أكتر من عدد سكانهم وناس دفيعه يعنى وبتصرف

احنا ماوصلو حتى لــ 2 مليون سائح عمى
.
والموسم السياحى وألحق يا جدع الموسم بدأ
.
ان كانو عرب فــ بيتساخفو ويقلو أدبهم ويحقرو المصريين

وان كانو اجانب فــبيكونو من أقل الطبقات

اللى هما بيختاور شركات سياحه كحيانه وأماكن على قدهم

يعنى زى ما أحنا المصريين الغلابه كدة نروح نصيف فى اسكندريه وجمصه

بيرمو علينا أغلب وأفقر سكان أوروبا وأسيا وأفريقيا

واللى بيفضلو بعد كدة كمااان عشان الاسيوين يشتغلو باعه متجولين

فى شوارع مصر الغنيه والافارقه خدامات ومربيات

عند شعب مصر اللى مش عارف ينضف بيته ولا يربى اولادة

فى المترو اتنين سواح ما اعرف اتحدفو علينا من أنهى داهيه

الست بتسئل فى محطه الجيزة ممكن توصل الاهرام ازاى

والوقت قد أيه ... قولنا حوالى كدة 20 دقيقه

راحت الست الجعانه قالت by walk ؟

وواك ايه يا ست السايحه .. بالتاكسى

اخرجى من محطه المترو خدى تاكسى او حتى سيرفيس

راحت كررت السؤال وهو انها لو هتمشى لحد الاهرام الوقت قد ايه

عاوزة تمشى من الجيزة لحد ما تطلع هضبه الهرم

وأوعى حد يقولى لا دول بيحبو المشى والمشى رياضه

شواطئ سيناء محرم دخولها على المصريين لأنها مردومه سياح اسرائيليين

ودول بقى اعفن وأوسخ وأنتن نوع سياح فى الكون كله

فنادق مش بيسكونو ... بينصبو خيم

أكل مش بيشترو ... جايبين معاهم معلبات وطفاح من بيوتهم

مايه حتى ما يشترو بيجيبو قزايزهم معاهم

والله العظيم حتى المواصلات ما بيركبوها بيعدو الحدود مشى لحد أيلات

يبقى حد لوجه الله الكريم يفهمنى

أيه الفايدة اللى بترجع علينا من تواجد العالم المعفن دول عندنا

ومعاملتنا معامله حقيرة عشانهم

وتفتشينا واهانتنا لا و يخلو الكلاب تشمشم فينا احسن نكون داخلين نسرق والا نفجر جنابهم

وفوق دة كله كماااان سفاراتهم تحذرهم من السفر الى مصر

خوفا من التحرش وان معدلات التحرش فى مصر هى الاعلى فى العالم
.

لمجرد ان اللى اتحرش هو بياع فى محل والا واحد بتاع جمال
.
وهى نفسها اصلا تلاقيها متسواش كلب ياكلها

على أيه دة كله ؟

سياح مش نوعيه ممتازة يعنى بالعكس ومصاريفهم بتكون فى الحد الادنى

ولا ينطمع فيهم ولو نفضتهم مش هينزلو غير شيكات سياحيه بأقل القليل
.

والغنى فيهم مش بيجى هنا

دة احنا اللى نخاف من العالم الجعان دة

نصر ... رغماً عن الجميع

2009-10-17T19:27:00.010+02:00

لو أنكر أحدهم الهولوكوست لتمت مطاردته فى أقطار الارض

لو عاب احدهم فى شخص من أفراد المقاومه الفرنسيه

او حتى نطق أسمه بطريقه غير مهذبه

طرد من فرنسا فوراً

كل دول العالم تقدس أبطالها وتمجد معاركها وأنتصارتها ولو ضئيله

حزب الله يباهى ويفاخر بمقاومته ومنعه دخول الاسرائيلى كيلو متر واحد من أراضيه

ونحن ... من فقدنا الألاف من أبناء وطننا

أستشهدو وخُضّبت الارض بدماهم

ماتو دفاعا عن وطن وطرداً لمحتل

قاتلو وسقطو كى لا تصبح سيناء أرض ميعاد لغيرنا

ولا تصبح قناة السويس حدود اً لعدو

حتى لا تصبح القاهرة أحدى العواصم العربيه الساقطه

يتم السخريه منهم ومنا فى عقر دارنا

ان لم يكن من عربى كاره وجاهل

جلّ انتصاراته الصيد بـ الصقور

فهى من انجليزى حاقد

(ديفيد أوين وزير خارجيه انجلترا الأسبق )

يتمتع بقدر من الحقارة والبرود والبغض

كى يقف على أرضنا يسفّه من شهدائنا

ويحقّر من قدر نصر أعزّنا

لـ يقول اننا هزمنا فى اكتوبر أسوء هزيمه

وأن جيشنا انكسر

وأن الاسرائيلى دمر قواتنا

وهل هذا الانتصار الاسرائيلى الساحق علينا هو سبب خروجه ؟

لأنه سحق جيشنا فقد اكتفى بهذا وأنسحب ؟

هل لأنه يعشق المصريين ولا يتحمل غضبهم وحزنهم تنازل عن انتصاراته

وترك الأرض التى يراها مقدسه لأن سواد عيوننا لديه أغلى ؟

وما رد الفعل المتخذ ؟

مجرد دفاع من الصحافيين حاضرى الندوة

وبعض مقالات فى الصحف

أين الرد الرسمى من دوله حقّر أعظم وأشرف أنجازاتها وتضحياتها

كيف لم يحاسب

ولم يطرد شر طردة من الأرض التىى سبّها وأهان أشرف أبنائها

كيف لم يتم وضع أسمه فى قائمه سوداء لغير المرغوب فى وجودهم

من قام بدعوته أصلا وتنظيم تلك الندوة له

وهل كان جاهلا حقاً بما سوف يسكبه فمه من قذارات علينا

أفهم ان الاشخاص يختلفون سياسياً

ويمتلك كل منهم وجه نظر مختلفه عن الاخر

وقد حتى تكرة شخص ولا ترى له انجاز

ربما كان الأستاذ هيكل كارهاً للرئيس السادات او محباً له

ربما يكون راضياً عن تصرفاته وحكمه او رافضاً لهما

لكن لا يصل الأمر برفض انجاز دوله بكاملها ضحت بأولادها

بدماهم وبعض أجسادهم

ليستضيف من يعرف مسبقاً ما سيقول ومدى سفاهته

مشاعرنا الشخصيه لا يجب أبداً ان تكون داعياً لأهانتنا وطن

حتى لو رفضناة ... وكرهنا أوضاعه

يجب على الأقل ان نحترم ما قدمه لنا

ونقدر من فقدو حياتهم كى نحيا نحن

ولا كرامه لحكام دوله لم يدافعو عن شرف أهلها

اللى جاب له يخليله

2009-10-09T18:41:00.009+02:00

من بركات أوباما أنه بعد ما أتجوز البيت الابيض

بأقل من 9 شهور بس ربنا كرمه بنوبل

صحيح الراجل محلش القضيه الفلسطينيه ... بس ناوى يحلها

صحيح برضه موقفش اضطهاد العرب والمسلمين فى بلده ... بس ناوى يوقفه

صحيح كمان محسنش الاقتصاد المنهار عندة ... بس ناوى يحسنه

كمان ملوش أى جهود فى حفظ او تحقيق السلام ... بس ناوى يبقى له

وعلى رأى المتحدث بأسم لجنه نوبل أنه منح الأمل لشعوب الارض

أى نعم انا مخدتش منه حاجه ولا منحنى أى أمل ...
.
بس فى نيته انه يمنحنى لما ربنا يقدرة

وهكذا نرى ان لجنه مولانا ابراهيم نوبل بتحاسب وبتمنح العطايا على النوايا

و ان العارف بالله سيدى باراك بن حسين اوباما أحق الناس بيها
.
لأنه نيته صافيه وقلبه أبيض

وينطبق عليه مواصفات اللجنه فى الاختيار وهى مقوله

الأعمال بالنيات ... ولكل أمرئ ما نوى

صرخه أحتجاج

2009-10-03T19:14:00.006+02:00

بدأت المدارس

مش مهم

والتوجيهات والتعليمات والقرارات

برضه مش مهم

انفلونزا الطيور والخنازير والجدرى

مش مشكلتى ومليش دعوة بيهم

اللى يهمنى المدارس هتشتغل 3 ايام فى الاسبوع

العيال ولاد الجيران راحو المدرسه ورجعو

قالو لهم تعالو ثلاثاء وأربع وخميس

أستشاريين أصلهم

أعضاء منتدبين

لكن انا ....

اخر دفعه خدت سادسه أبتدائى ولغوها بعدى

واتطبق عليا اليوم الدراسى الكامل

وبقيت اروح بيتنا الساعه 3 العصر

الف حوالين نفسى زى السكرانين

وفى الثانوى تدريب صيفى فى شهر يوليو او اغسطس

الخلاصه انى اتنصب عليا

وعاوزة حقى

ليا حق عند الحكومه وعاوزاااة

عاوزة الفرق

عايزة أجرى عن مدتى الدراسيه الكامله

اللى قضيتها زى اى متهم حسن السير والسلوك
.
لكن برضه قضى مدته كلها
.
عاوزة تعويض
.

صعيد الناس التانيين

2009-09-22T20:42:00.009+02:00

أتيعه تـــئـتع الصعيد واللى بيجى منه

عشان بتوع التليفزيون يرتاحو مننا ويريحونا

ويرحمونا من المسلسلات

لما نخلص صعيدى صعيدى وصعيديايا صعيديايا
وننقرض مش هيلاقو حد يمثلو عنه

وأيييه وحوصول أيييه

وجاك خابط وعاد

وناس تحزق اوى وهى بتتكلم

ويزعقو وصريخ

ولا كأننا واقفين فوق الجبل

وذئاب الجبل وعرسه التل وسلعوة الهضبه وحااااجه غلب
ولطيف بيه ومندور بيه وماعرف جابو البهوات دول منين

وسرايات وناس راكبه خيل وعصابات ساكنه الجبل

وطالعين الجبل نازلين مالجبل

جبل ايه هو حد فيه حيل فى الحر دة يطلع السلم حتى

ولا بعد السم الهارى اللى بناكله بقى فيه صحه

ولازمن تاخد بتار بوووك يا ولد

طب سؤال يعنى هما بيحزقو اوى ليه
دة حتى الحزق وحش على صحتهم

وممكن يعملو حاجات مش ولا بد يعنى
.
وتلاقى الاخت الفاضله الممثله تقولك لا انت متعرفهمش دول ناس سعايدة
.
يا حلوووة ... سعايدة ازاى يعنى
.
وكل واحد صاحب مسلسل من دول

يقولك انا اصلا جذورى صعيديه وبكتب من واقع خبرة

جذور ايه هو احنا افارقه فى فيلم امريكانى ؟

وخبرته دى وقعت فوقيه وتقريبا كانت تقيله جابت له غيبوبه

خرف فيها وهبل اللى بيهببه دة

عموما هو تقريبا كل الصعايدة جالهم عقد عمل فى الخيطان

وبوابين فى القاهرة

لعل وعسى ربنا يتوب علينا من أبداعات كل مؤلفى ومخرجى

الدراما الواقعيه الصعيديه الهنديه

2009-08-11T19:27:00.005+03:00

متغيبه لبعض الوقت . سأفتقدكم جميعا

قطط

2009-08-08T16:15:00.006+03:00

تربيه القطط عندى مزاج

كل أنواع القطط

بلدى مهجن رومى سيامى

أى حاجه بأربع رجلين وديل وبتنونو

بس مشكلتى معاها حاجتين

أولها ... أن القطط عنيدة جدااا

وتانيها انها بتنقى أنضف مكان فى البيت وتولد فيه

أخر قطه ربيتها كانت سيامى لونها بيجمع بين البيج ودرجات البنى

عنيها بنفسجى جميييله

تيجى فى الصيف كدة وانا اماله انضف وامسح البلاط عشان الحر

وهى بمنتهى الألاطه تمشى على طراطيف أيديها فى المايه

وتنط فوق الكنبه او الكرسى تستنى لحد ما أخلص

وتروح جنابها وبعد ما أنشف خااالص

تنزل تنام على البلاط وهو لسه ساقع من المسيح

تنام ساعه اتنين ... تفضل تتقلب وتتمطع

وتقوم وبمنتهى الكبرياء تدخل ورايا المطبخ تنونو

سيادتها جاعت ... معاد أكلها جه

صاحبه السعادة مش عاوزة تاكل من الأكل اللى فى الطبق من الصبح

ولا حتى تشرب من طبق المايه لأنه مركون من بدرى ومايته بقت فاترة

كمان عايزة تستحمى عشان تطلع فوق السطح تلحق فى الشمس تنشف نفسها

طيب يا توتى انا بطبخ دلوقت ... هخلص وبعدين أحميكى

دة انا بقولها

أبويا برة بتكلمى مين يا صفاء

دى القطه يا بابا

ربنا يعوض عليا عوض الصابرين فى البت الكبيرة

مسافرين المصيف ومش هقدر اخدها معايا ... ولا أقدر أسيبها هنا

والنبى يا عمو خد بالك من قطتى وانا مسافرة

اكلها فى الفريز كل يوم تطلع لها كيس

ووالنبى تغسل الطبق بتاعها وتغير لها المايه كل يوم

متسيبهاش تطلع فى الشارع أحسن متعرفش ترجع

هى مين يا بنت اخويا اللى اكلها فى الفريز

القطه يا عمى

أة يا بنتى وماله

وطبعاً كان لازم تعمل بأصلها معاة وتخرج برة ومتعرفش ترجع

وعمى الراجل أمام المسجد يخرج يدور على القطه بتاعتى

فى الشوارع وينادى عليها بالأسم

اللى حضرتها مش هتعرف ترجع لوحدها

بالليل متنمش فى أى مكان

القطط متحبش الأهمال ولا ترميها فى أى حته

ولا تنشغل عنها بحاجه

لازم تنام مكان ما بنام انا

مزاجها كدة

فى الشتا كان اجمل وقت تستخبى جنبى فيه

تقر طول الليل

أحلى صوت ممكن يتسمع فى البرد

تقعد جنب رجلى تغسل وشها وأيديها

واوقات صوابع رجلى

طبعاً قطه بالمواصفات دى كانت كمان ليها شخصيه

اة والله شخصيه

جالها أكتئاب

رفضت تاكل أو تشرب ومعرفتش اعمل لها أيه

الطبيعى كان أنى اخدها أوديها للدكتور البيطرى

هنا فى الصعيد

الدكتور دخلت بيها عليه قالى مالها دى

قولت له عيانه ... مش راضيه تاكل

الراجل بص فى الأرض شويه كدة وقالى

بصى يا مدام

لو عندك معزة عيانه ممكن اعالجها

فرخه بتعطس .. او حتى جاموسه بتولد

لكن القطط

مخدنهاش فى الكليه

ورغم كل التناكه والقنعرة اللى كانت فيها

لكن سبحان الله بيحط فى قلب الحيوان تجاة صاحبه محبه من نوع غريب

مكان ما أمشى تمشى ومكان ما أقعد تقعد

ولو غايبه أو مسافرة تقعد برضه فى نفس المكان بتاعى

ولاء غير طبيعى ومحبه غير عاديه تربط بين الحيوان ومن يرعاة

بعدها حتى مقدرتش أربى قطه غيرها ..

كنت بربط فى رقبتها جرس بفيونكه

هههههه وكان بابا كل ما يشوفها ماشيه بترن

يقول مش فاقع مرارتى ولا غايظنى فى البيت غير القطه دى

وسبحان الله ... المشاعر متبادله

كانت تشوفه داخل تمشى من المكان خالص

الفطرة والغريزة عند الحيوان بتكون أقوى من الأنسان جدا

فى القطط وفى الكلاب وهما أقرب المخلوقات الى بنى ادم والى معاشرتهم

حين تربيهم أو تعطف عليهم

مشاعر صريحه قويه

لا ينافق أو يرائى

محبه خالصه صافيه

وبالتأكيد لا يؤذى صاحبه مهما كان السبب

مجرد حوار

2009-08-01T16:46:00.004+03:00

هل نحن شعب من الضحايا ؟

هل الحكام جزارين والشعوب نعاج ؟

هل هذا هو ما خلقنا عليه ؟

حين كتبت التدوينه السابقه كنت أنتقد سيل من الحكام

لم يراعو فى بلدهم ذمه ولم يعرفو كيف يحافظو حتى على الحد الأدنى من سبل العيش الشريف بها

فى حين أننا كــ شعب لم نفعل شئ

لو أردنا لـ فعلنا

لكننا أكثر شعوب العالم تذمراً ورفضاً للأوضاع كلامياً

حتى تشعر معنا وكأنا نتكلم فقط لمتعه تحريك اللسان داخل فمنا

أو كى نتخلص من همومنا كـ الولايا ثم نتصعب على حالنا المايل ونمصمص شفايفنا وندعو الله بالتغيير

=========================

ثقافه الاختلاف
***********

ما المانع ان نختلف ...

حين كتبت لى فتاة من الصعيد

اختلف معاك يا صفاءالثوره كانت عظيمه وعملت كتير ..... وعبد الناصر كان حلمه كبير

هذا رأيها ... هى ترى الخير فيما حدث

ولى رأيى ... نعم كل شئ يبدأ بحلم جميل وأمل رائع لكنه لا يستمر على مجرد الأمل

يجب علينا فى لحظه ما ان نستيقظ وننفذ

ثم نشرك الاخرين معنا فى التنفيذ ... يستحيل تنفيذ او بناء شئ حين ترى أنك أقدر من غيرك

ويسهل تحقيقه حين ترى انك مجرد فرد مثلك مثل غيرك ... مجرد يد أخرى

أختلفنا أو اتفقنا لا يمنع ان كلينا قال رأيه

وحين كتب اسافو فقال

هايل يا صفاءعرض هايل للاوضاع و تحليل و لا اجدعها محلل سياسي و اجتماعي التحليل اهو بس فين الحل يا صفاء

هو طالبنى ان يكون لدى حل عملى كما قلت نظرياً

لكن كيف يكون التغيير فى مجتمع لا يغير الا بلسانه فقط فى مجالسه امام القنوات الاخباريه

وأين هى مؤسسات أنشئها المجتمع المدنى كى تعلم شعب نسى ما هى الديمقراطيه او كيف يمارسها

اين ما يساعد على التغيير ويقدر عليه حتى أنضم له وأحاول

هو قال رأيه وأنا طرحت ما لدى

أتفقنا او أختلفنا لا يمنع ان كلينا قال رأيه

حنان سعيد كتبت

عارفه ارجع واقول احنا الي شعب غلط مشين جنب الحيط ولو قدرنا ندفن نفسنا فيه هندفن....بس الي اقدر اقوله بردو ان اكيد الثوره ماكنش ده هدفها احنا بنفسنا الي بوظنا اهدفنا وشوهنا صورتها بكتمان ثورتنا احنا على اوضعنا

اختلفنا فى التعريف لكنا اتفقنا على الأهم وهو أننا شعب شديد السلبيه

وبسلبيتنا اضعنا أى حق لنا

الاستاذ مصطفى محمود كتب

ابتداءا اخالفك الراي في تحفظك حول هذا المثل الفرنسي وذلك لان الاجداد دائما مخطئون بحكم اختلاف الزمان والمكان ولهذا كان قول سيدنا علي بن ابي طالب (ربّوا اولادكم على غير ما درجتم عليه لأنهم مخلوقون الى زمان غير زمانكم ) ...... ولذلك فان اعتقاد الاجيال اللاحقة بخطأ الاجداد امر طبيعي بل وصحي حتي لا نصاب بداء الجمود .
ملحوظة : اختلاف المصريين حول ثورة يوليو , اختلاف قد يصل الي حد التناقض ...... واذا اردت ان تنظري للصورة بشكل اوضح وبعيدا عن التقعير ودهاليز الفلسفة والتأريخ, فعليك بقراءة كتاب اسرار حرب اليمن - للكاتب وجيه ابو ذكري - فهو كتاب صغير وممتع وعاطفي وموحي بشكل كبير.

أختلفنا كثيراً ... لكنا أتفقنا على أن كلينا قال ما لديه بكل الاحترام للأخر

الباحث التربوى معتز شاهين كتب

إلى /صفاء أنا معاكي في كل اللي قلتيه عن ثورة يوليو ونتائجهاولكن لا ننكر ان من الضباط الأحرار من كان محبا ومخلصا لبلده وكان يريد الخير له في ليلة 23 يوليوويكن شاء عبد الناصر شيء أخر

ليكن الرد ومن منا كارة لبلدة رافضاً لها ... حتى من يرون بأم اعينهم خرابها الان يقسمون أنهم يحبونها ويعملون على ما فيه امنها و رفعه شأنها

نظرتنا العاطفيه لقائد او زعيم حكمنا أحببناة فرأيناة منزه عن كل عيب وكامل عن كل نقيصه
وحتى الان ... هناك من يرمون بكل شائنه على المحيطين وليس الحاكم
فهو طيب حنون يحب بلدة لكنه فقط لا يعلم ما حل بها

مهندس الحسينى لزومى كتب

الشخصية المصرية في حاجة الي تغيير فهي اساس كل ما نعاني من مصائب وويلات عبر التاريخ ويحضرني ويعجبني كلام العالم الرحل جمال حمدان عن الشخصية المصرية حين يقول "" إن ما تحتاجه مصر أساسا إنما هو ثورة نفسية، بمعني ثورة علي نفسها أولا ، وعلي نفسيتها ثانيا ،أي تغيير جذري في العقلية والمثل وأيديولوجية الحياة قبل أي تغيير حقيقي في حياتها وكيانها ومصيرها ...ثورة في الشخصية المصرية وعلي الشخصية المصرية ...ذلك هو الشرط المسبق لتغيير شخصية مصر وكيان مصر ومستقبل مصر"

وهنا نعود من حيث بدأنا

وهو أن المصرى الجالس القرفصاء فى المتحف منذ ألاف السنين

لازال جالساً منتظراً ان يهبط عليه التغيير من السماء

لأتأكد من شئ واحد

الشعوب تستحق حكامها

أنقلاب ..... لــ تحت

2009-07-22T15:05:00.012+03:00

أخر كلام .. هو أنقلاب

معروف تاريخياً الثورات تقوم بها الشعوب تحت ضغط الحاجه

او أتباعاً لبمدأ أو أيدولوجيا معينه

الجيوش = أنقلابات

لكن نظراً لحبنا الشديد لتجميل الواقع

(ليس عملياً طبعاً ) لكن بالخيال فقط

فالهزائم ليست هزائم بل نكبات ونكسات واهتزازات

( ومش ناقص غير تبقى شخلعات )

وبالتالى لأن أنقلاب كلمه أبيحه باين

فدّلعناها ثورة

أهم مبادئها
--------------

1: القضاء على الملكيه

( فقضينا على ملكيه الملك فاروق وأقمنا باقى الملكيات الحاكمه حتى الان )

2 : القضاء على الاقطاع

( قضينا على الارض الزراعيه تماماً )

3: القضاء على الاستعمار

( وتبديله بالوصايه والتبعيه)

4: أقامه حياة ديمقراطيه سليمه

( وحتى الان لا زلنا نبحث عن الحياة وبعدين الديمقراطيه لما يحلها ربنا ولا زلنا فى أنتظار سليمه)

5: إقامه جيش وطنى قوى

( هزم فى اليمن وفى 67 وفشل فى الحفاظ على الوحدة مع سوريا ويادوب ربنا سترها عليه فى 73 ودلوقت بيزرع طماطم و فراوله فى الجبل )

6:إقامه عداله أجتماعيه

(تتجلى فى أوضح معانيها فى وسائل المواصلات ونوعيه العيش اللى بناكله وأنواع التعليم اللى بنحصل عليه وووووو

ولأنه جيش ... ولأنه لا يمتلك غير عقيدة عسكريه

ولأنه غير مؤهل سياسياً ودى أصلاً مش شغلته

فقام بتجريب كل ما استطاع التوصل اليه من أفكار

أمم يا بنى الاراضى الزراعيه

راااااحت

أمم يا حبيبى أملاك الناس

فحرمنا أصحابها من أدارتها وهربت أى رؤس أموال خاصه خارج البلد بالأضافه لفشل الدوله عن أدارة القطاع العام وبيعه بالخسارة والسرقه والعمولات والفساد ومش فاضل منه غير مجمع اللأمومنيوم

قضينا على الاستعمار الأنجليزى والتدخل الاجنبى

وكف المستعمر عن سرقه مواردنا .... وأصبحنا نسرقها بجهودنا الذاتيه

وما هى الا اعوام قلائل حتى أستبدلناه بالتدخل الروسى أستتبعه الامريكى والان نحن مجرد سماسرة وصبيان قعدة

قامت مجانيه التعليم

وضاع التعليم كله

وبضمائر بعض المدرسين وطرق التعليم ونوعيه المناهج أصبحنا نملك أغلى تعليم مجانى على وجهه الارض

بالاضافه لأنه تعليم بدائى ولا يواكب أى تقدم علمى وبالتأكيد لا يقود أليه

نعمل بقى ديمقراطيه

بس لو عملناها دلوقت الاحزاب اللى كانت قبل الثورة ممكن تفوز فيها ودول اتباع الملك وذيول الاستعمار

طب نستنى شويه يكونو دول ماتو ونكون كونا زعامات وخبرات سياسيه

بعد شويه هاا يا معلم مش هنعمل الديمقراطيه ؟

أصل الناس لسه مأخدتش علينا ومتعرفناش كويس ويمكن ينتخبو غيرنا ومنقدرش نكمل برنامجنا التقدمى الوحدوى

شويه كمان ايوة يا قائد مش نعمل الديمقراطيه بقى ؟

الشعب جاهل سياسياً ولا يعرف مصلحته والمفروض نأهله سياسياً قبل ما يحمل مثل تلك المسؤليه

فتحول الشعب من شعب شديد الثقافه والوعى السياسى والحراك من أجل التحرر من قبل الثورة نفسها بعشرات السنين

تحت حكم السياسات الرشيدة لشعب ينتخب بالرموز الانتخابيه رمز الحله وطشت الغسيل

زى المعوقين زهنياً

حكمتنا كل شعوب الارض وانتهت بأسرة محمد على فلم نتقدم خطوة ولم يراع لنا مصلحه

حكمنا أبناء الشعب فلن نتقدم خطوة ولم يراع لنا مصلحه

حكم عبد الناصر 16 عاماً ويزيد فلم يقدم لكل مصر سوى تأميم القناة وبناء السد

وحكم السادات 11 عاماً لم يقدم سوى نصر وأسترداد جزء من الارض سلم بعدة باقى الارض كلها

وحكم مبارك ما يزيد عن الـ.... مبقتش اعرف بالظبط هما كام

فلم يقدم لمصر سوى بعض كبارى فوق الارض

لكنه دفن الشعب كله تحت الارض

يسيبهم بقى من حكايه اعياد الثورة دى

( لكن يخلو الاجازة والنبى )

وبلاها ثورة مجيدة وثورة تفيدة

وحتى الان لازلنا عرضه لباقى التجارب الميتافيزيقيا الحكميه

وفيما يبدو سنظل عرضه لها الى ما شاء الله

سيظل الحكام يجربو عساهم ينجحو

لكن على المرء أن يسعى وليس عليه أدراك النجاح

نص كلمه

2009-07-15T14:45:00.005+03:00

هذا بعض مما كتبه أحمد رجب

فى باب نص كلمه من 25 سنه فاتت

ويبدو ان البلد لا يمر عليها زمن ولا يحدث بها أى تغيرات

وما قيل من ربع قرن

ينطبق حرفياً عليها الأن

لسنا موهوبين فى التسويق او فى التجارة عموما , ولذلك نحن لا نخطط للأنتاج كما ينبغى . فأنت تجد مثلا سلعاً كثيرة مطلوبه للتصدير ولكن انتاجنا منها قليل جدا . بينما نرى وفرة عظيمه وهائله فى انتاج سلع أخرى غير قابله للتصدير مثل المواليد والقرارات الوزاريه
----------------------------------------------
نحن لا نريد ان نظلم التلفزيون فنكتفى بما يشكو منه الناس من ملل وكأبه . بل يجب ان نقول ما للتلفزيون وما عليه . وقد سمعت من مصدر ثقه ان خبيراً أجنبياً درس برامج التلفزيون عندنا وأنتهى الى انها برامج مثاليه تحمل كل المواصفات الناجحه للبرامج التى تبث للمتخلفين عقلياً
----------------------------------------------
قال الحكيم الاسبرطى : لو كان الوزير الاسبرطى لا يتكلم دائما الا حقاً . ولو كان الوزير الاسبراطى يعرف بعض ما يتكلم عنه لخلت أعمدة الصحف من الكلام
----------------------------------------------
من الواضح ان الكم الهائل من الاحاديث والمواعظ والفتاوى والندوات الدينيه التى تذاع عبر قنوات التلفزيون والاذاعه لا تترك صدى ملموسا فى سلوكياتنا رغم الاقبال الشديد عليها . مع ان الاستماع الى ربعها فقط يكفى ليجعل أخلاقنا عال العال . ما هو السبب ؟ هل تغيرت وظيفه الأذن عندنا فأصبحت الأذن تستخدم فى تعليق الحلقان عند النساء وتعليق النظارات عند الرجل ؟ هل هو تقصير من وزارة الصحه أنها لم تبدأ بعد الحمله القوميه لمكافحه طرش الأذن المصريه ؟؟
----------------------------------------------
الامل مهم جدا فنحن نستمع بالساعات الى علماء الدين عبر الاذاع والتلفزيون . وأملنا قوى فى أن تتغير سلوكياتنا يوماً ونعمل ولو بربع ما يقولون . ونحن نغنى 24 ساعه بحب مصر . وأملنا قوى فى أن نعمل لمصر 60 دقيقه بدلا من 27 . ونحن نؤدى الصلاة ونقتطع من وقت العمل أضعاف ما يستلزمه أداء فرض الله . وأملنا قوى فى أن يعوضنا الله عن وقت العمل الضائع . ونحن نعمل قليلا ونطلب من الله كثيراً . وأملنا قوى فى أن يستجيب الله لمطلبنا المتواضع وهو أن يكون واحد زائد واحد يساوى تسعين . وسبحان القادر على تغير علم الحساب
---------------------------------------------
مجانيه التعليم فى بلادنا تجربه فريدة لا وجود لها فى أى دوله رأسماليه أو أشتراكيه . وقد قام خبراء التعليم من مختلف دول العالم بدراسه مجانيه التعليم عندنا حتى يتجنبو تطبيقها فى بلادهم
---------------------------------------------
تطوير التعليم لن يتحقق إلا بوفرة فى المال تتصاعد مع تعدادنا المتزايد . والدوله مهما فعلت لن تستطيع الانفاق على التعليم كما ينبغى . وهذا ينعكس بوضوح على الخريجين . لكن من حسن الحظ أن الشباب فى بلدنا يتخرج من الجامعه صغير السن بحيث يستطيع أن يبدأ التعليم من جديد فى أى بلد أخر
---------------------------------------------
اذا كنا فى كل مناسبه نفرز هذا الكم الهائل من الأغانى الوطنيه . فمعنى ذلك أننا فى حاله حب محمومه لمصر يدفعنا الى هذا الهذيان . هنيئاً لنا بحب مصر . وهنيئا لمصر بهلوستنا
---------------------------------------------
القواطع الحديديه فى أسفلت 6 أكتوبر أصبحت تشكل مصدراً لهلاك السيارة وألام الراكب . فالقواطع الحديديه تهبد السيارة فوق الارض والسيارة تهبد الراكب فوق المقعد حتى أن البعض يرى أن أفضل مشروع أستثمارى مربح هو فتح ورشه سيارات عند طرف الكوبرى وعيادة عند الطرف الأخر لعلاج البواسير
---------------------------------------------
لا يكفى لكى نحقق نهضه أن نقلع عن هلوسه بحبك يا مصر فى الصبح وفى العصر . بل ينبغى أيضاً أن نكف عن التفاخر بأننا أحفاد أعظم عائلات التاريخ : الفراعنه . فلسنا كأحفاد للفراعنه إلا مجرد أولاد ذوات لا نريد ان نعمل أو ننتج ونحيا على أمجاد الأسرة القديمه . وعيب جدا أن يكون موتانا أكثر نفعا من الاحياء . فأن رمسيس يطوف أمريكا وأوروبا يجلب لنا الدولارات . ومتحف الاسرة فى ميدان التحرير مورد أخر والأقصر مورد ثالث . وطلوع القرافه على خوفو وخفرع ومنقرع مورد رابع . بينما نحن أولاد الذوات نأكل بالدين ونشرب بالدين وحتى المجارى بالدين . ولاد ذوات فسدانين
----------------------------------------------
المصل المضاد لداء الكلب لا يتوافر إلا فى مستشفى الكلب . ومستشفى الكلب يحدد مواعيدة للمصابين بعضه الكلب حتى الساعه الواحدة ظهراً فقط . واذا لم يكن هناك أجراء رسمى سريع لتصحيح هذا الوضع المدهش فإننا نتوجه الى كلاب السكك _ وكلنا ثقه فى وعيها _ بأن تمتنع عن عض الناس بعد الواحدة ظهراً .
---------------------------------------------
اذا كانت الحكومه تريد حقأ رفع المعاناة عنا . فلماذا _ بحق السماء _ تذيع علينا جلسات مجلس الشعب ؟
---------------------------------------------
القاعدة أننا نصرف على الحكومه والحكومه تصرف علينا . وهناك تعاون أكيد فى أن يدعم كل منا الأخر .فالحكومه مثلا تدعم الرغيف الذى ينبغى أن نشتريه بضعف ثمنه . ونحن ندعم الحكومه فنتحمل فرق ركوبها المرسيدس بدلا عما ينبغى أن يركبوة وهو الموتوسيكل
.

صديقى مصطفى

2009-07-06T14:48:00.004+03:00

الصديق العزيز والمقرب جدااا
والأخ الغالى مصطفى ريان
وصدور كتابه
مذكرات رئيس سابق
ونجاحه فى الخروج به بصورة مشرفه
ولقائاته الرائعه فى أكثر من قناة فضائيه
وحوار صحفى
صديقى العزيز وأخى الأصغر
من نجاح الى نجاح
ومن تقدم الى تقدم
انت تستحق كل توفيق من الله
فأنت شخصيه رقيقه حساسه سريعه التأثر بالأخرين
لكنك مثابر فى طموحك تسعى بكل طاقاتك
فى سبيل تحقيق حلمك
كما وانك اخ كريم تقف بجوار الأصدقاء
سعيدة كل السعادة بتقدمك بخطى واثقه فى طريق النجاح
وأتمنى من الله أن أراك فى خير مكانه

المرأة ... والمعقول

2009-07-05T15:19:00.013+03:00

وجدت انى فعلا لم أشر للموضوع الأصلى محل النقاش

وهو البوست المقصود للمهندس شريف

مدونه لست الا بعض الاوراق
http://cherry0000.blogspot.com/

ردا على بوست كتبه صديق وأثناء قرائته شغلنى بعض نقاطه

ووجدت ان المناسب اكثر أن أرد رد مطول نوعاً ما

وهو مجرد تعليق على بعض مقتطفات منه

أذا أفترضنا ان الرجال انواع معينه ...

أى تستطيع ان تضع رجل ما تحت عنوان سابق التجهيز أو بند ما

فهذا طيب حنون كريم

هذا وقح سليط لكنه واعى

هذا حقير لا يجيد أحترام الاخرين

هذا مثابر عنيد طموح

هذا مهذب ومراعى

هذا متدين وفحاله

و و و

أى انه يمكنك أعداد عدة قوائم ثم تصنف تبعها

وتجد عقل الرجل دائما يسير فى اتجاة واحد

وان أنشغل بأمر أستغرقه

اذا جئت للمرأة

تقطع القوائم دى وترميها جنب أى حيطه

لأن كل أمرأة بمفردها نوع

فأنت لن تجد واحدة فقط تستطيع ان تصفها وأنت مرتاح البال وتضعها تحت عنوان محدد

فالمرأة الحنون الرقيقه التى تربت على كتف أبنها وتحميه من غضب أبوة

هى نفسها المرأة التى تجدها بعد المغرب قاعدة مع جارتها ماسكه سيرة واحدة تانى ..

بل تمزقها ... فالمرأة هى الأشد ضراوة على بنى جنسها من ألف رجل

وهى هى ذاتها التى تحتضن زوجها وتقف بجوارة فى شدائدة

بل تقاتل لأجله بما لا يفعله أى شخص من أقرب أقربائه

أو قد تقتله أن أحست فقدة

فما لا يكون لها ... لا يكون لغيرها

وهى نفسها التى تبكى بحرقه وتلعن سلسفيل أهله لأنه تأخر عن موعدها بضع دقائق

أو وضع قدمه على تربيزة الانتريه او القى عقب سيجارة على الارض

أو الأدهى والأمر انه وضع الكوب فوق الطاوله دون طبق صغير يحمى الزجاج من أثار المشروب

كل هذا لا يؤثر على حبها له ذرة واحدة

بالأضافه الى ان عقلها يعمل فى اتجاهات متعددة

ولا يعيق عملها تفكيرها فى سواة ولا يؤثر على أدائها لو قامت بأكثر من شئ

ألا فى ما يخص مشاعرها

متضاربه متناقضه تشرق وتغرب فى أقاصى الأرض

ان غضبت على من تحب تغرقه فى طوفان من الشكوى والأتهامات والهجوم

فأنت تهملنى ولا تهتم بمشاعرى وتفضل أخرين علىّ

دائما مشغول أين وقتى

لم لا تحدثنى

ما عدت تحبنى .. شغلت عنى بغيرى

فأذا قال لها وبمنتهى الهدوء انا أسف ذهبت كل عواصف الغضب

أو لو قال لها لكنك تعملين انى أحبك انت

فكأنما كان كل ما سبق هو تراكم سحب سوداء أنزاحت فجأة من السماء وما عاد لها أثر

أن جئنا للأنسان عموما

تجد المراة أكثر ميلا للتعلم ... لو شجعتها بكلمات قليله

ترضيها الكلمات

ليس لقله عقل منها ... مش عشان هى هبله كلمه تجيبها وكلمه توديها

بل لأنها تزداد ثقه بنفسها وفخرا بنتيجه عملها

تسعد دائما أن ما فعلته ناجح ويثنى عليه اخرون

الرجل مرؤس فاشل

لكن المرأة مرؤسه ناجحه

لا تخجل من التعلم .. ولا تدعى المعرفه

لكن الرجل ... يخجل حتى من قوله لا أعلم

أو لم أفهم تلك الجزئيه

ما يقال عن أن المرأة حنونه وأذا عمل قلبها توقف عقلها

كلام غير صحيح

هى نعم حنون ... بل شديدة الحنان

على أبيها .. حبيبها .. رجلها .. طفلها

وأمامهم نعم قد يتوقف عقلها

لكن ليس عن ضعف لهذا العقل

بل عن خالص محبه ورغبه فى الأرضاء

توقفه بكامل أرادتها

قد يجد الرجل أن تضارب وتناقض مشاعر النساء نوعاً من اللامعقول

يشبه الرسوم السيراليه والمسرح العبثى

فما تحبه اليوم كرهته غدا وما توافق عليه أمس ترفضه اليوم

وما يعجبها هذا الأسبوع ثق انها ستهمله الأسبوع القادم

هذا ليس نوع من الجنان أو اللامعقوليه

بل هى دنيا

الدنيا خليط من المتناقضات والتغييرات

أذا أستيقظت ووجدت الجو صحواً وسمعت تغريد الطيور

وأرتديت ملابس خفيفه تناسب هذا الجو ثم نزلت

وبعد قليل أنقلب الجو ما عاد صحوا وسفيت التراب وقد تمطر

هل تتهم الدنيا بالجنون ؟

هتقول ايه ؟ .... السما أتجننت ؟

الدنيا دى عبثيه وغير معقوله ؟

ما تفعله النساء هو للطبيعه أقرب

تعمل عقولنا وقلوبنا ومشاعرنا وأحاسيسنا وغرائزنا

نتأثر بسهوله ونتفاعل بشدة

نفرح لأبسط الأسباب ونحزن بلا سبب

نضحك ونبكى فى ذات الوقت لأننا سعداء

نخاف بدون ان يكون هناك من داع

لكن ثق أنه بعد قليل سيحدث شئ ما

فغريزة المرأة ليست محل شك

نقلق على من نحب

بشــــــــــدة

فـ حين تحب المرأة يكون الرجل هو طفلها

ونعم كل الرجال يعشقون ان يكونو أطفال لنسائهم

أن يلقى عليها كل حموله وهمومه

فى أقسى الظروف ينحيها جانباً كى يمسك زمام الأمور

فالوقت وقت جد ورجال لا وقت عواطف ونساء

لكنه من بعيد وبين كل وقت وأخر

ينظر الى عينيها كى يرى موافقتها ومساندتها

لــيرى هل ما يفعله خطأ أم صواب

فى وصف رجل

2009-06-17T12:08:00.009+03:00

مغرم بالعلاقات الأنسانيه

هوايه لديك هى التعرف على البشر وأقامه علاقات مختلفه معهم

لكن شرطك الوحيدة هى ان تكون انت محور لتلك العلاقه

تعشق الشعور المتجدد بالحب

لذا تمتلك علاقات بالفعل متداخله ومتشعبه

علاقاتك النسائيه شديدة التعدد

وبعد فترة تنتهى تلك العلاقه بصورة راقيه وأفتراق جميل

لكن بعد أن تكون قد أشبعت رغبه أشعال نار الهوى فى قلبك

وعشت أحاسيس عاطفه متأججه

لا تقبل بحب عادى فخيالك جامح وقلبك ملتهب

على أن يكون كل هذا الحب بعيدا عن عالمك الحقيقى

تحافظ عليه بشدة ولا تقبل بأى فعل يسبب رد فعل عليه

تحتفظ به عش نهائى واخير لك

وجدتك شديد الأهتمام بكل ما يخص البشر أنسانياً

والنساء عاطفيا ... ولا ترى فى هذا ما يضر

مدام كما قلت لا يؤثر على توازن عالمك الأصلى

ترى أن كل علاقه تقيمها لا تكون خطأ

لأنها لم تتجاوز خطوط حمراء سبق ووضعتها منذ زمن

تراها فرصه جديدة لمعرفه معلومه مختلفه عن امرأة مختلفه

ولا تدع أى منهن تؤثر على غيرها من قبلها أو من بعدها

فكما قلت اللون الجديد فى اللوحه لا يخفى القديم ولا يلغيه

هكذا تجد لوحتك متعددة الألوان بصورة مذهله

نظرا لأختلاف الأعمار والجنسيات بل والأديان

تحب الجميع وتحاول أعلامهن بهذا وتعميق هذا الفهم

فهو كما يراة قلبك صادق وحقيقى غير مفتعل

وتحاول أيضا الحفاظ على كرامتهن ورفعها الى الأعلى

حتى تجد أنه حين يحل ميعاد أنسحابك

لأنك لن تستطيع التقدم فى العلاقه الى ما هو أكثر من ذلك

يظللن هن يحتفظن لك بقلوبهن بما هو اكثر من ذكرى عابرة او جرح

وهو التيقن من صدق حبك وروعته واحتفاظه برقّيه

كــ زجاجه برفان غاليه الثمن

حين تنتهى قصه الحب من قلبك ويهدئ أوارة

يظل لك كل عرفان وتقدير

لأنك على الأقل لم تتلاعب بقلوبهن

لا أنكر بالطبع أنك بهذا تتعامل مع النساء بأسلوب بديع

لا يتناقض مع سمو العلاقات الأنسانيه

ولا ينحدر الى الغدر أو تذوق شهدهن وألقائهن

محاولاتك دؤب فى السعى لعلاقه متفردة فى جمالها

متميزة فى مفرداتها

معاملتك للنساء او السعى لمن تعجبك منهن لا تخلو من جرئه بالغه

تسير كتف بكتف مع أناقه لا أبتذال فيها

توضح من البدء طريقتك ولا تدّعى ما لن تقدمه

فتتميز بذلك أمام نفسك بصراحه تامه

لكنها أمام الطرف الأخر غير واضحه المعالم والتفاصيل

من هنا يحدث اللبس فى الفهم أو سوء الفهم

فهى ... تظن أنه بنوعيه العلاقه قد أمتلكتك كليا وحصرتك بها

ولا تتفهم كيف تحبها أذا كنت تحب غيرها

أو كيف تحب غيرها ان كنت قد اعلنت حبك لها

فهى ترى الحب من جانب واحد

هو جانب الأنانيه والأمتلاك وتقاسم الحياة

وتستغرب انت لنوعيه الحب الغريب الذى تقدمه لك

فكيف تحبك ان كانت تريد خنقك ومحاصرتك

وكيف تريد حبسك فى حين انها تعرفت عليك أساسا

عن طريق تلك العلاقات المتفتحه التى تؤمن أنت بها

وترى الحب بــ أشكال وقوالب مختلفه تماما

عما يراة الأخرون

لذا قلت لك مرارا أنك صريح لكنك غير واضح

صريح فى رغبتك من البدأ وحدود علاقتك ومدى ما تستطيع تقديمه

غير واضح فى توضيح مفهوم الحب لديك

وأبهامك لبعض أو معظم تفاصيل دقيقه بك فى تعمد واضح

الحب كما تراة انت

يختلف عن الحب كما تراة النساء

لذا كان هناك هذا التاريخ الطويل من التقاربات والتباعدات

والحب والصداقه ...

والمعرفه التى تتجاوز حدود الصداقه ولا تصل لحدود الحب

بما يشمله فى مفهوم المرأة من خصوصيه وأرتباط

ورغم مرور كل تلك السنين

لم تتوقف لحظه واحدة عن الحب بمختلف أنواعه

ولم تتوقف لحظه واحدة عن كونك ملك لمرأة واحدة

كنت لها كــ طائر لا ترغب هى فى فقدة عن طريق حبسه

فــ منحته حريته فى أن يطير مدام فى النهايه يحط على عشها هى

وكنت أنت طائر لا يتوقف عن أشباع رغبته فى معرفه البشر

لهذا أحتفظت هى بك كل تلك السنوات الطوال

وحفظت انت لها مكان لم تشاركها غيرها به

وحظوة ومكانه عظيمه وامتنان جارف بقلبك

لأنه حين حاولت كل النساء حبسك

أطلقتك هى فى سمائها

فــ كافئتها بأن كنت دائما

لها وحدها