الجمعة، 21 نوفمبر، 2008

مفاهيم خاطئه

.
مشهد خارجى ...او داخلى مش مهم

راجل او اتنين او تلاته كل واحد منهم ينظر الى فتاة شابه يانعه

ويلقى بكلمه ثم يعيد النظر الى من بجانبه ويقول له

( شايف الحريم؟ مش الغفر اللى عندنا )

او تلاقى واحد قاعد مع امه وبيقولها مكنتش كدة خالص قبل الجواز يا ماما

كانت واحدة تانيه . أنسانه رقيقه نسمه

مش عارفه ايه جرى

او قاعد مع امها هى وابوها : لالا يا عمى او يا طنط دى مكنتش كدة خالص

اتغيرت اوى بتتنرفز على اى سبب وبتزعق دى مبقتش هى خالص

ولكن ما هى التى كانت والتى يقصدها هو

هى المدام او حرمه او الوليه المتلقحه فى البيت حسب صيغه الزوج المحب

الذى ما عاد يجد فى زوجته اى شئ جميل

وأصبحت بالنسبه له مجرد حبل يخنقه او واحدة عايش معاها

قبل الزاوج كما يقول كانت جميله مشرقه مهتمه بنفسها

بتحط برفان رقيقه ورومانسيه

بعد الزواج اجدها منكوشه ومشغوله او نائمه او منهمكه فى أشياء ثانويه

لا تهتم بى على الاطلاق

وكأن الزوجه متزوجه من رجل اخر يستمتع بكل الخدمات التى تقدمها

الزوج يتصل هاتفيا ازيك يا حبيبتى اخبارك انت بتعملى ايه ؟

بطبخ ... بتطبخى؟؟

فيه واحد يكلم مراته على التليفون ويقولها بتعملى ايه تقوله بطبخ؟؟

طيب أقوله بعمل ايه؟؟ أقراء ديوان من الشعر؟

ما لازم اطبخ... البيوت محتاجه الطبيخ والتنضيف والغسيل والترتيب

ليس بالرومانسيه وحدها تفتح البيوت

كمان لو جه من برة ملقاش غدا .. أبقى افتله شويه رومانسيه على الشوربه؟

لو جه ملقاش غيار نظيف .. اغنيله أغنيه عاطفيه يقوم ينسى ؟

لو جه ينام لقى الاوضه مش مترتبه ...

أبقى أبص فى عينيه وأسبله يقوم ينام على المرتبه من غير ملايه؟؟

كلام منطقى بس يا اخونا عشان نبقى ناس عاقله بتتكلم كلام عاقل

الصورة النمطيه التى قتلها التليفزيون نقلا عن الفتاة المتأنقه

وبعد ان تتزوج تتحول الى خالتى ام سحلول هى صورة قتلت عرضا وسخفا ايضا

وبعدين معلش يعنى مش البنت بتتغير والراجل بيفضل حليوة ومعجبانى

دة ما يجيى على شكله وهو لسه صاحى من النوم

شعر واقف زى الموهوك عيون مدغششه دقن مزرعه ولا محصول الفجل

ما علينا . نرجع للموضوع عشان منتوهش

ليس هناك ما يمنع على الاطلاق ان اكون امرأة مهتمه بنفسى وبمظهرى

بثقافتى واحتفاظى بشخصيتى

وفى نفس الوقت سيدة منزل مهتمه بنظافته وترتيبه وقائمه على خدمه من فيه

وليس معنى أن أقول أنى اطبخ أو انظف انى قاتله للرومانسيه ولا افهم فى المشاعر

كما انه ليس معنى انى مهتمه بمظهرى وأدرم أظافرى اننى فاشله كمراءه

ولا استطيع طهو بيضه مسلوقه ........لكن التوازن مطلوب

كما انه مطلوب من الرجل ان لا يكون متحيز

فليس معنى انه تزوج من الفتاة التى كان يرغبها

ان يفقد اهتمامه بها وتتحول الى تربيزة سفرة

وأن كل نساء الارض جميله ومهندمه ألاها

فهى هى نفس الفتاة التى احبها وتزوجها

ولكن بدل من الساعات المعدودة التى كان يقضيها معها

وهى فى شدة اناقتها لأجله تحول الى رفيق دائم لها

ومن الجنون ان يتوقع دوام هذا الشكل 24 ساعه فى اليوم

نحن ايضا يصيبنا النعاس وننام ونغسل شعرنا وبيطلع لنا حبوب

أستحاله يعنى هعيش فى كتالوج طول العمر

عشان احيى الصورة التى احبها فى مخيّلته

ومن العته ان يظن أنها هذة الصورة فى الكتالوج ...

والزوج الذى يشتكى من اهمال زوجته

هو نفسه الذى سيشكوها لو عاد فوجدها وقد عادت من الكوافير وأرتدت الحرير

ولكن لم يجد هو ما يأكله

فلا داعى للتجنى وفرض رؤيات مسبقه على الزواج .

ممكن ان نحتفظ بفكرة فكاهيه او كلام دارج أعتدنا عليه لزوم الهزار

لكن نبقى فاكرين دايما انه مجرد تهريج مش نصدقه ونبتدى نسقطه على حياتنا

وتظهر بقى الجمل بتاعه ربنا يسامح اللى اتجوز قبلى ومقاليش

وملعون أبو اللى أتجوز قبلى ومنصحنيش واللى أتجوز بعدى وماأستشرنيش
.
بدون ان يشعر بوقعها على نفس الزوجه اللى هى مش شيطان يعنى

معلش برضه كله مستحمل وعايش عشان الدنيا تمشى

ويا عزيزى الرجل أنت لست اخر راجل باق على وجه ألارض

ويا عزيزتى البنت مش انت أول وأخر نوعك
.

هناك 22 تعليقًا:

تـأمــلات يقول...

هههههههههههه

إيه ده يا بنتي :)

بجد موضوع حلو

هو التوازن كويس في كل شئ

والإعتدال يضلح أشياء كثيره

وقبل أن نرى عيوب الآخرين يجب أن نرى عيوبنا أولا

سمراء يقول...

الحوار هو الحل
كل واد يعبر عن احتياجاته بوضوح وفي الوقت المناسب وكل واحد يعمل مجهود علشان يسعد الثاني وكل واحد يحترم قدرة الاخر في الوقت اللي بيطلب منه حاجة
من الآخر لو عايزين يتلاقوا هيتلاقوا

سمراء

mostafa rayan يقول...

طبعا انا معاكي في كلامك دة
بس المشكلة اتن الست فعلا بتنسى نفسها كتير والرجل بطبعه ينظر ويقارن لمكا يلاقي واحدة في شغل لسة خاردة من الكتالوج واللي في البيت عايشةدورام سحلول اكيد هيقارن
هو لازم يقدر وهي بردو لازم تهتم بنفسها مش بس علشان جوزها كمان علشان نفسها
علشان العصفور ما يطرش يا كناري
تحيات يلك ودمت بكل الخير

صفاء ممكن تشيلي تأكيد الكلمة

صفاء يقول...

تأملات


يا بطه تلاقى كل واحد بيشكى شكوى غريبه وغير منطقيه

وحتى لو الزوجه ملاك بجناحين تلاقى برضه جوزها بيتكلم عنها وحش من وراها
ممكن ميكونش قاصد كدة بس بيبقى عاوز بس يتريق ويهرج بين اصحابه
وميعرفش او ميحسش قد ايه بيجرحها
.

صفاء يقول...

.
سمراء


الحوار قوة لا يستهان بها

والاسلوب بيختلف بين راقى او أقل رقي

بس اتباع الاسلوب نفسه بيحسن نوعيه الحياة بطريقه ممتازة

وفى النهايه التغير لازم يكون بالتوافق مش بالاهانه او الشكوى
.

صفاء يقول...

.
مصطفى


يعنى يا مصطفى حق الله يتقال

اى نعم فيه ستات بيبقو مهملين بطريقه بشعه ... لكن فيه ستات كمان بتعمل توزان وتوافق

يبقى حرام ان الهجوم يبقى عمال على بطال
وبعدين عصفور ايييه اللى يطير دة؟
هو دخول القفص زى الخروج منه؟
الجوز اللى يطير نطير رقبته
.

سمكه وحده يقول...

بجد والله يا احلي صفاء الموضوع ده محير ناس كتير ومش هستهبل عليكي واقولك مش عايزه اجوز ومعرفش ايه اي واحد او وحده بيحلم انه يكون ليه بيت جميل واسره لذيذه وحياه حلوه تكون مملكتها بس ولله ومش بهبل كل اللي بشوفه ادامي من ناس حوليا وقريبه مني يكرهك في الفكره نفسها او زي ما وصفتي الحاله ليه مبيبقاش في اهتمام بعد كده كمان ليه ديما الست هي المسؤله وليه زي ما بتقولي هو كمان بيتنيل ومش بيهتم بنفسه

تصدقي بالله اكتر حاجه بكرها في حياتي اني اشوف حد قايم من النوم لسه ههههه اه والله
بجد سعات الواحد بيقول يعيش حياته مبسوط كده وديما مفيش هم ولا مشاكل بس بردو سعات بتلاقي هم ومشاكل بردو
محدش مرتاح
وهي ديره مغلقه
لان الواحد نفسه في حاجه بس مش هتبقي موجوده او زي ما تقولي عايز المدينه الفاضله
بقلك ايه ده موضوع يطول شرحه
استني لما نتقابل علي القهوه بقي افضفضلك
تحياتي ياقمر
سمكه

د/ رامي شهاب الدين يقول...

من الآخر يعنى لابد من وجود شئ من التوازن

شئ جميل إن الزوجة تكون بتهتم بمظرها وثقافتها وكدة ..وأكيد طبعا لزوجها

وفى نفس الوقت لازم تقوم بمهام بيتها كزوجة وربة أسرة مسئولة

ماينفعشى شئ يطغى على الآخر ..وطبعا لازم يكون بينهم حب ومودة وتفاهم وتراحم عشان المركب تمشى

دمتى بكل الخير .. تحياتى

صفاء يقول...

سمكه واحدة


يا حبيبه قلبى ومين فينا مش عاوزة تتجوز؟
دى خلقه ربنا
ربنا خلقنا عشان نتجوز ونخلف ويكون لينا بيت
وألاستقرار حلم كل بنت وست وشاب وراجل
حلمنا كلنا
بس المشكله يا سمسمه ان الناس مش بتبقى داخله على مودة ورحمه واستقرار
بتبقى داخله متحفزة لبعضها وكل واحد عامل حسابه ان التانى مينتصرش عليه
عشان كدة بتبقى الحياة صعبه فعلا
تيجى منين الراحه واليسر بين اتنين كل واحد فيها بيتصيد الاخطاء للتانى
او بيسخر منه حتى لو مش قدام الشريك بيكون من وراة
والكلام ممكن يوصل
بصى هو كلام شرحه يطول فعلا
بس المدونه مدونتنا ونتكلم فيها على راحتنا
فكرينى لما نتقابل فى القهوة مش نقطع فروة الرجاله
عشان منبقاش وحشيين يا اختى

سلامى وتحياتى و محبتى لسمكه الجميله
.

صفاء يقول...

.
د / رامى


والله يا دكتور هو دة اللى بقوله

التوااااااازن
وكمان شويه تقدير وعرفان
ومتبقاش الشكوى عمال على بطال
والله احنا بنخدم بعنينا عشان هى حته الكلمه الحلوة دى

ولما الست بتلاقيها هى كمان بتدى اكتر ما بتاخد

وطبعا اهم شئ هو الاهتمام
الاهمال فى الجواز بالذات بيولد الكراهيه
.

مولان يقول...

التوازن حلو

يعني مش هبقي كده علطول وكده علطول احاول اوازن عشان صاحب بالين كداب وهو دايما عاوزاها 100 في واحد

موضوع حلو اوي ياكناريتي

صفاء يقول...

مولان


انت الاحلى يا قمر

التوازن مطلوب
بس هو فييين التوازن

كل واحد بيبقى له رأى متشبث بيه
وعاوز يفرضه على التانى والتانى ينفذ بس
.

احلام اليقظة يقول...

ازيك يا صفاء
وحشتينى كتييير

ربنا يسعدك

قلوب بتغنى يقول...

صفاء
اذا اردت ان تتزوج عائشة فعليك ان تكون محمد
بلاش محمد الى انتى عارفاه

صفاء يقول...

.
أحلام اليقظه


وحشانى يا احلام وقلقانه عليكى والله

كتابتك فى الفترة الاخيرة مقلقه بجد

طمنينى عليكى
.

صفاء يقول...

.
قلوب بتغنى


شيماء

أخرررر مررررة أشوفك فى مدونتى
انا يا بت انت مش غيرت الرابط؟
متجيش هنا تانى
بدل ما اخليهم يفجروكى
.

MAKSOFA يقول...

ويعني هما يعيني بيفضلوا زي ماهما بعد الجواز ماهم بيتنلوا ويبقوا عايزين اللي يدخلهم يستحموا ويغيروا هدومهم والا يحلقوا دقنهم والا يتكلموا كلمه عدله بلا نيله

أحــوال الهـوي يقول...

الزواج
زوج وزوجة توم وجيري طبعا الفار الصغير هو المفتري و العبيط الي بياحد علي قفاه هو القط
ما علينا
مهما اشتكي كل من الاخر فهما لن يستغنوا عن بعض ابدا
و النيو لوك المدام بالبصل بالتقليه بزفارة السمك و هو الباشا بفانله مقطعه و القرعه اللميع البيه متعاص شحم من العربيه
تغييير ... و كل واحد يلعن في الزواج هي تدعي عليه لو حملت و تبقي مش طايقه ريحته و نفسها تغز عليها لما تشوفه و هو يقول لها فشولتي و بقيتي حته واحده
بس تغيب هي عنه يتخانق مع وش دبانه
وهو لو اتاخر تستناه ببوز شبرين لانه و احشها بس عمرها ما تقول الا انت جاي الفندق نوم واكل
يا ويله لو مسك جرنال والا اتفرج علي ماتش
وهي لو انشغلت في المطبخ يبقي حاسس بالوحدة و ياريت يقول لها و حشتيني

مهما حصل مش راح يستغنوا عن بعض

المقارنه مع فتيات الكتالوج يلجا لها بعض الرجال للتفاخر امام اصحابه لكن في قلبه زوجته اللي لو يوم تعبت يبكي زي الاطفال

ال جواز ....ياريت حد ناصحني

تحياتي

اقصوصه يقول...

والله معاك حق

سلوكيات فعلا سطحيه

خاطئه وترفع الضغط

لو الانسان حاول يخلي نفسه

مكان الطرف الثاني

عشان يحس باحساسه

ساعتها ممكن يقدر موقفه اكيد

تدوينه جميله

سررت بالمرور من هنا:)

صفـــــــاء يقول...

.
مكسوفه


ايوة يا اختى وحلاقه الدقن بتبقى بموال
وعشان ياخد دوش ويغير هدومه ادى موال تانى

والأفتر شايف الشيك اللى كان بيحطه يتقلب بقدرة قادر لكلونيا 5 خمسات

أسكتى اسكتى سبينى معبيه وساكته
.

صفـــــــاء يقول...

.
احوال الهوى


أمى أفتكر لها العافيه دخلت تعمل عمليه وكانت جامدة شويه كلنا قاعدين معاها وبنتكلم وكالعادة قفشت هى وابويا فى بعض وكالعادة برضه قلبت خناقه من غير اى سبب برضه كالعادة وتتطايرت الكلمات المؤلمه برضه برضه كالعادة عادىىى خالص أخدين على كدة بس ركك على ما جه الدكتور وجهزوها للعمليات واول ما قفلو الباب ........
مش هقولك بقى ابويا ايه حصله
الخلاف بين الازواج وخصوصا مع طول مدة العشرة بيبقى زى فلكلور
والمحبه اللى بتبقى جوة قلوبهم لبعض لا يكفى لوصفها ألف مدونه

شرفتنى هنا كمان بتعليق رائع كما العادة

صفـــــــاء يقول...

.
أقصوصه


والله انت اللى جميله

كمان عندك حق . لو الزوجين او الطرفين يخلو التعامل بينهم بأسلوب راقى

صدقينى حتى خلافهم بيكون مميز وأستحاله مثلا يقلب بخناقه جامدة او اهانه طرف للتانى
بيسعدنى مرور شخص رقيق زيك
.