الاثنين، 29 ديسمبر، 2008

الرصاص المتدفق

.
.
دعنا من البكاء والعويل
.
والدعاء كما الأرامل والثكالى أمام شاشات التلفاز
.
ولا داعى أيضا للعنتريات ولغه الخطابه المستهجنه
.
لنقم بقرائه الواقع على أرض المعركه
.
.
أهداف أسرائيل المعلنه
***************
*
1_ ألقضاء على حركه حماس
*
2_هدم بنيتها التحتيه
*
3_وقف أطلاق الصواريخ
*
4_تفكيك سيطرتها على القطاع
*
5_هدم مركزيتها وأشاعه الفوضى والرعب
*
6_الضغط عن طريق التجويع لخلق نوع من الفتنه الداخليه
*
.
لو نظرنا ألان الى ما يحدث على الواقع
.
وضح ومنذ زمن تمام الوضوح انه لا يوجد حركه مقاومه
من بضع مقاومين او أرهابيين
بداخل القطاع ... بل يوجد أبناء منطقه بأكملها يقاومون
.
وقد علمو جزاء مقاومتهم وارتضو أن يدفعو الثمن
.
أى انهم ليسو مجرد بضع أشخاص يأوون مقاتلين أذا ضغطت عليهم سيقومون
بطردهم كما حدث فى أفغانستان ومناطق القبائل بباكستان
بل هم أهليهم وأبنائهم وأبائهم وحتى نسائهم
.
هدم بنيتهم التحتيه لم يتم بدليل أستمرار عمليات الانقاذ بقدر أمكانيات معدومه
ولكن مجرد تسيير سيارات الاسعاف وعربات الاطفاء فى حد ذاته نجاح
ساحق فى ظل أمكانيات ليس لها وجود
.
وقف أطلاق الصواريخ أثبت فشله الذريع فما زالت صورايخ القسام والقدس تنطلق
وتتساقط على المغتصبات الفلسطينيه
صحيح أنها غير ذات تأثير فاعل فى ضررها ولكنا نتحدث عن أهداف الحمله
لا عن فاعليه ألاسلحه المستخدمه من الجانب المقاوم
.
هدم المركزيه وأشاعه الفوضى أيضا لم يتم ولم يحدث ألانقلاب الداخلى على حماس
لنفس السببين المشار أليهم سابقا من أستمرار عمليات الانقاذ الكسيحه
وكون المقاتلين هم أبناء القطاع لا دخلاء أو مليشيا خاصه
.
وعذرا لو تحدثت بنوع من البرجماتيه والخالى من العواطف
.
لكن لو تغاضينا عن وقوع عدد فادح من القتلى فما الذى أستجد ؟
قد رأينا أضعافهم على مدى السنين ورأينا مثلهم فى حروب متكررة على لبنان
رأينا أضعافا مضاعفه فى العراق
ولم نتحرك ولم نساعد . ولم يفيد بكائنا ولا عويلنا
.
فلو تخلينا عن المنطق العاطفى الذى يستجدى الاخرين
علهم ينظرون لنا بعين عطف
نحن بدونها أشرف وأكرم لأنها لا تفيد بشيئ
ونظرنا بتجرد فماذا نرى ؟
.
نرى أسرائيل الدوله التى هزمتنا جميعا فى 6 أيام كما تتباهى
قد جردت جنودها وأحتياطييها ووقفت على أبواب غزة عاجزة
تهدد باجتياح برى لا قيمه له
.
(التهديد لا ألاجتياح )
.
فهى عاجزة عن وقف القصف الجوى ما لم يحقق أهدافه
وهو ما لم يحدث فقد تم أمتصاص الصدمه والتعامل معها
عاجزة عن التقدم بريا لأنها لا تملك الجندى المقاتل القادر على القتال والنزال
وكل ما تعتمد عليه حاليا هم العرب كى ينقذوها كما كل مرة
عن طريق ندائتهم وأستجدائاتهم كى توقف عدوانها الغاشم .الخ الخ الخ .......
فتتعامل معنا من موقع المتعالى المنتصر فى حين أنها تعلم خسارتها
منذ حرب لبنان وكل ما تملكه ألان هو أيلامنا ووجيعتنا
بأبناء جنسنا وهم قتلى غارقين فى دمائهم
فكما قال رب العزّة ولا يخيب قوله
.
.
لا يُقَاتِلُونَكُمْ جَمِيعاً إِلا فِي قُرىً مُحَصَّنَةٍ أَوْ مِنْ وَرَاءِ جُدُرٍ"
.....................................................
صدق الله العظيم
--------------
.
قوله حق
******
.
.
من قال ان العرب ماتو وما عادت لهم قومه او قيمه
وحق الله نحن مازلنا أحياء ونفعل كل ما تطاله أيادينا من عون
شاحنات على البوابات تحمل دماء قادمه من السعوديه
وغذاء قادمه من قطر وغطاء اتيه من ليبيا
وأطباء من مصر ومساعدات من الجمعيات الشرعيه بها
نحن لسنا كفار ولسنا متخاذلين بل كل على قدر طاعته يفعل
دعنا من حكومات فمن يتحدث عنها أصلا
.
بل اتكلم عن انسان حتى ألان يغيث ويساعد
.
وأخر يقاوم ويضرب
.

الاثنين، 22 ديسمبر، 2008

صفاء وتوقعات النجوم لعام 2009


بما انى من خبراء الفلك والتنجيم وقرائه الكف والطالع وأبين زين أبين


كان يجب ان أدلى بدلوى انا كمان فى موضوع التوقعات الفلكيه دة

وأقول أرائى الرهيبه فى الابراج

ومن توقعاتى لهذا العام

**************

أنتشار الفساد وأزديادة فى الفترة من اواسط مايو حتى نهايات أغسطس

سقوط اكبر عدد من السيارات فى ترعه الابراهيميه نتيجه اخطاء سواقين طبعا

ذبح عدد من المغنيات والراقصات

بمناسبه اوكازيون الذبح العالمى فى الفترة بين اول مارس واخر أبريل

مع دخول برج الثور فى مدار السرطان فداس عليه وقطع له فردة من رجليه

مما سيؤثر على مواليد تلك الفترة

أبتدأ من أخر اكتوبر وحتى نهايه العام ستغرق مصر تماما فى مياة الامطار

وستؤثر السيول على كل القرى التى تقع فى مجراها وتدمرها تماما

سيدخل عدد كبير من رجال الاعمال السجن بتهم متنوعه

ومن توقعاتى الغير عاديه

سيتم نهب منظم للبنوك فى صورة قروض والهرب بها

كما سيتم سرقه مقدرات الدوله تماما تحت مسمى الخصخصه

أحب أبشر مواليد برج التيس انهم هيكونو محظوظين جدا السنه دى

ولو حد فيهم أبوة رئيس يبقى هيورث دوله

فـــ مبروك عليه




توقعات الابراج لعام 2009
**********************


برج الحمل
----------

لن تحمل أى شئ لأن محدش حيلته حاجه يحملها لك


برج الثور
--------
لا تتعافى على الاخرين مش عشان ربنا مديك شويه صحه يعنى

.

برج الجوزاء
------------
هتفضل احول وشايف كل حاجه أتنين

.

برج السرطان
-------------

يعنى عدمت بيك الابراج ملقتش غير الاسم المقرف دة تتولد فيه ؟

.

برج الاسد
---------
احنا مبنخفش غير من اللى خالقنا لا مؤاخذة

.

برج العذراء
----------

أيه دة هما لسه موجودين

.

برج الميزان
----------

مدام محدش لاقى ياكل يبقى هنوزن أيه يا حسرة

.

برج العقرب
----------

يا ساتر يا رب ... هى ناقصه أذى ؟

.

برج القوس
----------

أبقى نشن بعيد الحكايه مش ناقصه عمى

.

برج الجدى
---------
متزعلش اوى كدة دلوقتى كلنا بقينا معيز

.

برج الدلو
---------

محتاجينك يا معلم فى الدور العاشر ... المايه مش واصله



برج الحوت
----------

للأسف مبقاش عندنا حاجه تسرقها فقرنا والحمد لله



وكل برج وانتو لسه عاقلين

والسنه الجايه لن تختلف كثيرا عن كل اللى فاتو
.


الاثنين، 15 ديسمبر، 2008

مهارات مطلوبه


.
(علمو أبنائكم السباحه والرمايه وركوب الخيل )

ويشاء السميع العليم اننا نحتاج للمهارات دى أكتر من أى شئ تانى حاليا

فأذا كنت مثلا متضطر أضطرار قاهر لركوب المواصلات

فيجب ان يكون لديك معرفه كامله بالسباحه

لأنه ثق عزيزى المواطن مصرى انك هتحتاجها وانت راكب السيارة

لأن السيارة مسيرها تسقط بيك فى أى مجرى مائى

ساعتها بقى لو مش بتعرف تعوم تعمل ايه؟

وبعد غرق ومقتل 32 شاب وفتاة من بلدنا لوحدها نتيجه حادث سيارة

وهما لو كانو مسلمين ملتزمين وبيعرفو يعومو مكانوش ماتو كدة

وكانو على الاقل أنقذو نفسهم










نيجى بقى للرمايه
************

بعد الحادثه دى ويليها مباشرة حادث رجم بوش رميا بالنعال

احنا لازم نجيد الرمايه عشان نتدرب على صيد واقتناص

أى مسؤل يقف يخرف قدامنا بالكلمتين الفاضيين

والوسخين اللى بينقطو من بقهم دول

ومنتظر الزيدى أثبت وبالبرهان المبين حاجتنا الرهيبه لهذة الرياضه

على الاقل لو كان أحسن التصويب عن كدة كان طلع بوش من البيت الابيض

وشه وارم او مخلوع عينه وأهو يبقى أخد تذكار من العرب

زى ملاين التذكارات والهدايا اللى سايبها لينا

داهيه تكحمه مطرح ما هو رايح






.


فاضل ركوب الخيل
*************

واحد هيقولى يا كابتن لطيف ولازمتها ايه ركوب الخيل دلوقتى

أقوله ما هو يا عزيزى المواطن الخايب

اللى معندوش مهارة ركوب الخيل والناقه

كدة مش هتضطر تركب مواصله وهتعتمد على مواصلاتك ذاتيه الدفع

والتى تعمل بالبرسيم وذات مخلفات عضويه لا تضر بالبيئه

واللى لو عملت بيك حادثه كبيرك تكسر رجلك

بس تفضل محتفظ برقبتك

صحيح المشوار هيطول بس توصل بعد سنه

احسن ما توصل فى ثوانى للأخرة

وفى التأنى السلامه وكل تأخيرة و فيها خيرة

ومن قدم شئ بيداة ألتقاة ... وكله بثوابه

دى المهارات الاساسيه

بالأضافه طبعا للمهارات الفرعيه اللى لازم نكون على درايه بيها

زى القفز العالى : ودة لو كنت راكب أى مواصله بتهوى النط من فوق الكبارى

وصيد السمك : لو ساكن فى منطقه مجاريها طافحه

القفز بالزانه : لو بيركبو قدام بيتكم مواسير صرف صحى

والقفز بالبراشوت : لو مراتك من هواة قفل الباب عليك بالمفتاح

والوثب العالى : ودى مهارة غير مطلوبه بشدة

ألا لو هتشتغل حرامى غسيل

خرفت كتير انا عارفه بس من الغلب

32 جنازة طالعه من بلد واحدة ... كل شارع فيه غريق او أتنين

نعرف على الاقل 6 او 7 منهم ومحدش قادر ينطق بحاجه

لأنه مفيش اى كلام ينفع يتقال

وأى حد عندة جوز مش عاوزهم بس يكون مقاس كبير

وتكون قديمه ويا ريت تكون ريحتهم وحشه

اوى يعنى . الرجاء أرسالهم مسجلين بعلم الوصول

لــ منتظر الزيدى طبعا

.

الأحد، 14 ديسمبر، 2008

الطريق السريع الى ألاخرة

.
النهاردة وقبل ذكرى مرور عامين
على دبح 10 أشخاص وهم نيام
ولسه محدش عارف مين دبحهم ونكل بيهم
ومثل بجثثهم
والذكرة الخامسه لأحتراق قطار بركابه الفقراء
لم يمر العام بدون مجزرة جديدة
أتوبيس مستقر دلوقتى حالا بركابه فى ترعه الابراهيميه
50 قتيل
50 روح
50 نفس بشريه
غرقت واتعجنت تحت كتل الحديد والزجاج
بنات وشباب راجعين جامعاتهم
ستات ورجاله رايحين أشغالهم
أصوات عربيات الاسعاف رايحه جايه قدام عينى
أصواتها بتجننى
لي ؟؟
لأن أيه الفايدة ؟
اللى هيطلع من المجزرة دى ... لو طلع يعنى
أما فضل مرمى على الاسفلت كام ساعه على ما تيجى عربيه الاسعاف تشيله
وترمى فى المستشفى العام
مفيش أى شئ
لا شئ على الاطلاق فى المستشفيات
فى كل الدنيا
فى كل العالم اللى خلقه ربنا
اى حادثه بيكون فيها المصابين بالعشرات
او حتى بالمئات
والقتلي واحد او أتنين او تلاته
لكن 50 قتيل فى ثوانى ؟؟
بس ثوانى
ومصابين 10
الفرق بينا وبين كل الدنيا ان فى باقى العالم المصابين أضعاف القتلى
لكن احنا القتلى 5 أضعاف المصابين
بنت الجيران ... محدش عارف فى انهى مستشفى
مستشفى بنى مزار او مستشفى مغاغه
دة الخبر جابه واحد جار كان معدى على الطريق لقى دى مرميه على الاسفلت
عايشه ؟؟ ... ميته ؟؟
محدش عارف
جابوها هنا ودوها هناك محدش قال
الدنيا مقلوبه على الاسفلت دة صحيح
وكل كبراء البلد وصلو عشان المعاينه والمحاسبه والمسائله
والنتيجه؟؟ انا هقولكو النتيجه
النتيجه ان دة خطأ سواق الاتوبيس اللى معرفش يتفادى المقابل ووووو
هراء كامل هيخرج من أفواهم
لكن محدش هيسئل مين اللى ادى سواق زى دة الرخصه
وسمح له يسوق اتوبيس
محدش هيحاسب على طلع برضه الرخصه لسواقين ميكروباص
الطريقه الوحيدة اللى بيسوقو بيها
هى تعلم القيادة على الطريق السريع للأخرة
ومحدش أكيد هيحاسب اللى بيسيبو نفس السواقين دول يبيعو يشترو فينا
فى أى ظرف كعيد او خلافه
لما يحطو الناس فوق بعض زى المواشى
ولما يطوقونا بالأجرة الطاق اتنين وتلاته
مدام بيقاسمو معاهم
فى الاخر هيطلع الغلطان السواق اللى مات أصلا
فلا داعى للحساب
.
الحساب يوم الحساب
لكن بكرة؟
بكرة البلد هيطلع منها 50 جنازة
.
شكرا لمصر
.
.

الثلاثاء، 9 ديسمبر، 2008

حيوانات

.

يستوقفنى دائما وصف احدهم للأخر بكلمه حيوان


ويستفزنى انفعال الاخر وردودة العنيفه

لما كل هذا الغضب وكأنها اهانه بالغه


مع أن الكلمه تصف شكل اخر من أشكال الحياة

او تحمل معناها

و لو تمعنا فى الكلمه سنجد أنها الحياة كما خلقها الله

بكل برائتها ونقائها واحاسيسها الاولى

انها مرتبه ما عدنا نرقى أليها فى تعاملاتنا

فالحيوان يتعامل بغرائزة البدائيه فيما نحن خنقناها


والحديث عن غرائزنا لا شهواتنا








لازل الحيوان يشعر بالخوف من شخص
.
أو ألالفه له

يستشعر الخطر ويشتم رائحه الخوف

لازال الحيوان واضح صريح

اما الانسان فقد فقد حواسه كى يدعى الحضارة

كى يرتدى قناع المدنيه

أستبدلها بالخداع والغدر والانتقام والتخفى وراء الادعائات

وكأن المدنيه والحضارة والرقى تتعارض مع غرائز الانسان ومشاعرة الأساسيه







أستبدلنا حديث الجسد والحواس

بالعقل والحكمه والمنطق والخبرة

ومع انه لا أستغناء عن كل تلك الفضائل

ألا انها ما كانت أبدا تتعارض مع هاتى الحواس

وكم من مرة أخطأ الأنسان وتخلت عنه فضائله لم تسعفه او خانته خبرته



ألا انه أبدا لم تخدعه حواسه وغرائزة

ففى مواقف معينه قد يستدعى المنطق

وتقتضى الحكمه بفعل شئ معين او القبول بشئ ما

وفى حين تصرخ غريزتنا بأن فى ذلك خطأ أو لربما خطر

نرى أننا نبالغ فى الامور او اننا دراميين زيادة عن اللزوم

أو لا داعى لكل هذا التوتر

ونفاجأ بأن ما فعلناة هو خطأ جسيم له ضرر بالغ

نبدأ التساؤل


كيف نخطئ فى هكذا أمر

لقد اعددنا له العدة جيدا

وأجهدنا عقلنا فى التدبير له

ثم أن الحكمه تستدعى فعله


ثم نرجع لنقول

بس سبحان الله الموضوع دة مكنتش مستريح له من الاول

أو كان عندى أحساس داخلى انه غلط عمله

أذا أخطأ العقل والمنطق والحكمه والخبرة

وصدق الحدس والشعور والغريزة والاحساس

نتهم الحيوان بكل نقيصه ننفيها عن أنسانيتنا


ولم يوجد حيوان يقتل بدافع القتل

او ليستولى على ممتلكات حيوان غيرة

ولن نجد حيوان اخترع سلاحا ليقتل خصمه

بل يقتله وجهه لوجه وفى التو


على الاقل لم يخطط وينقاد الى شهوة الانتقام

حين نتبع غريزتنا يزداد أحساسنا رهافه

وتشحذ حواسنا ونستشعر الاخر

فأشعر بالارتياح لشخص ما من قبل

.
ان اتحدث معه

ألا أن شعورا بالألفه يجعلنى أرتاح له

.
قبل ان أعرفه

أو أنفر من شخص رغم كل رقيه وتهذيبه

أن يتوتر جسدى لدى أستشعارة الخوف مع انه لم يحدث أى شئ

ألا أنه بالتأكيد سيحدث . فأحساسى الغريزى لم يكذب يوما


عندما أتعامل مع البشر لا أتعامل بمنطق ... أى منطق

بل أتصرف بوقع أحساسى بهم . بما أستشعرة منهم

بلغه اجسادهم وعيونهم ورائحه طباعهم

.
يكون تعاملى الى الطبيعه أقرب .

حين تجاهلت حواسى الطبيعيه وهى توالى صيحاتها مستشعرة القلق من امر ما

واتبعت نصائح الاخرين وحكمه سنينهم


وخبرة عقولهم الناضجه

انهمرت على رأسى المصائب كوابل النار

حين نعمل عقولنا لا يجب أبدا أن نلغى غرائزنا


فعقولنا تتعب ويرهقها ألامر

تتوقف عن العمل فى حال الذعر او الغضب

لكن حواسنا تبقى وقد تسبق عقولنا فى التصرف



نسب الاخر بكلمه حيوان

نظنها سبه وهى مكرمه لم يرقى أليها يوما

فمن منا حمل وفاء الكلب وصبر الجمل

رفعه الصقر ورقه الحمام


أنفه ألاسد وكبرياء الخيل


أو حتى تحمل الحمار

حتى القطه التى نتهمها بالغدر أذا اعتادت شخص لم تخمشه يوما

ولا يثير عصيانها ألا القسوة

نتهم الذئب بالخيانه والثعلب بالخديعه والثعبان بالغدر

حسنا فأذا كانت هذة هى صفات تلك الكائنات فعذرها انها هى ذاتها


فما عذرنا نحن كى نفعل ما هو ألعن منها

.

حين أمل البشر وأخشى التعامل معهم

ألجأ الى من لا يمكنه أذيتى بأى فعل

فعلى الاقل أكن على تمام ألثقه أنها لن تفعل بى ما لا أتوقعه منها



أكن معها على سجيتى

قد أوقنت انه ما ان تطعمها وتحسن معاملتها

تظل أسيرة فضلك معها

بعكس الكثير من البشر



الأربعاء، 26 نوفمبر، 2008

نهايه المنحه المبـــــاركه


.
أيها الاخوة المواطنون
.
أخدتهااااااااا
فاكرين ال icdl
فاكرين المنحه المباركه وبقاياها؟
ودى مش هيفتكرها
الا من سار معى على الدرب من سنه بحالها
من اول يناير 2008 واحنا الان داخلين على 2009
لدورة مش بتاخد اكتر من شهريييين
ولمن لا يعرفها الدوله مشكورة قررت أنها تتعطف وتتكرم
وتديننا منحه عاملاها اليونسكو للحصول على
الرخصه الدوليه لقيادة الحاسب ألالى
لدول العالم التالت اللى لسه يا دوب بياخدو الدورات دى
وبعد شحططه وغلب ووجع قلب وطلوع روح
وحظ عاثر معاند أنتهيت من الامتحانات . ونسيت الموضوع خالص
ويئست منه وخصوصا انه مرت أشهر وتغيرت فصول
وناس عاشت وناس ماتت . هيييييه دنيااا
ألا اننى فوجئت ويا لفرحتى بمكالمه تليفونيه بتقولى انه أخرة صبرى خير
وربنا عوض عليّا . وشهادتى وصلت . تقريبا هى كانت جايه ماشيه
ماشيه بقى والا راكبه على قفا الحكومه مش مهم
المهم انى أخدتهاااا . وابويا وامى فرحو بيها اوى بقى
وكدة بنتهم بقت فالحه فى حاجه بدل الفشل اللى هى مشهورة بيه
يعيني الراجل مش مصدق ان اسمى مكتوب فى شهادة بالانجليزى
فرحان بيها اوى . ورايح يبروزها
ايه دخلكو بكل الموضوع دة؟
ولا حاجه . انا بس حبيت أفرح أصحابى اللى كانو معايا فى هذة الرحله المباركه من البدايه
واعلن من موقعى هذا ان البلد دى مفيش فيها فايدة
.

الجمعة، 21 نوفمبر، 2008

مفاهيم خاطئه

.
مشهد خارجى ...او داخلى مش مهم

راجل او اتنين او تلاته كل واحد منهم ينظر الى فتاة شابه يانعه

ويلقى بكلمه ثم يعيد النظر الى من بجانبه ويقول له

( شايف الحريم؟ مش الغفر اللى عندنا )

او تلاقى واحد قاعد مع امه وبيقولها مكنتش كدة خالص قبل الجواز يا ماما

كانت واحدة تانيه . أنسانه رقيقه نسمه

مش عارفه ايه جرى

او قاعد مع امها هى وابوها : لالا يا عمى او يا طنط دى مكنتش كدة خالص

اتغيرت اوى بتتنرفز على اى سبب وبتزعق دى مبقتش هى خالص

ولكن ما هى التى كانت والتى يقصدها هو

هى المدام او حرمه او الوليه المتلقحه فى البيت حسب صيغه الزوج المحب

الذى ما عاد يجد فى زوجته اى شئ جميل

وأصبحت بالنسبه له مجرد حبل يخنقه او واحدة عايش معاها

قبل الزاوج كما يقول كانت جميله مشرقه مهتمه بنفسها

بتحط برفان رقيقه ورومانسيه

بعد الزواج اجدها منكوشه ومشغوله او نائمه او منهمكه فى أشياء ثانويه

لا تهتم بى على الاطلاق

وكأن الزوجه متزوجه من رجل اخر يستمتع بكل الخدمات التى تقدمها

الزوج يتصل هاتفيا ازيك يا حبيبتى اخبارك انت بتعملى ايه ؟

بطبخ ... بتطبخى؟؟

فيه واحد يكلم مراته على التليفون ويقولها بتعملى ايه تقوله بطبخ؟؟

طيب أقوله بعمل ايه؟؟ أقراء ديوان من الشعر؟

ما لازم اطبخ... البيوت محتاجه الطبيخ والتنضيف والغسيل والترتيب

ليس بالرومانسيه وحدها تفتح البيوت

كمان لو جه من برة ملقاش غدا .. أبقى افتله شويه رومانسيه على الشوربه؟

لو جه ملقاش غيار نظيف .. اغنيله أغنيه عاطفيه يقوم ينسى ؟

لو جه ينام لقى الاوضه مش مترتبه ...

أبقى أبص فى عينيه وأسبله يقوم ينام على المرتبه من غير ملايه؟؟

كلام منطقى بس يا اخونا عشان نبقى ناس عاقله بتتكلم كلام عاقل

الصورة النمطيه التى قتلها التليفزيون نقلا عن الفتاة المتأنقه

وبعد ان تتزوج تتحول الى خالتى ام سحلول هى صورة قتلت عرضا وسخفا ايضا

وبعدين معلش يعنى مش البنت بتتغير والراجل بيفضل حليوة ومعجبانى

دة ما يجيى على شكله وهو لسه صاحى من النوم

شعر واقف زى الموهوك عيون مدغششه دقن مزرعه ولا محصول الفجل

ما علينا . نرجع للموضوع عشان منتوهش

ليس هناك ما يمنع على الاطلاق ان اكون امرأة مهتمه بنفسى وبمظهرى

بثقافتى واحتفاظى بشخصيتى

وفى نفس الوقت سيدة منزل مهتمه بنظافته وترتيبه وقائمه على خدمه من فيه

وليس معنى أن أقول أنى اطبخ أو انظف انى قاتله للرومانسيه ولا افهم فى المشاعر

كما انه ليس معنى انى مهتمه بمظهرى وأدرم أظافرى اننى فاشله كمراءه

ولا استطيع طهو بيضه مسلوقه ........لكن التوازن مطلوب

كما انه مطلوب من الرجل ان لا يكون متحيز

فليس معنى انه تزوج من الفتاة التى كان يرغبها

ان يفقد اهتمامه بها وتتحول الى تربيزة سفرة

وأن كل نساء الارض جميله ومهندمه ألاها

فهى هى نفس الفتاة التى احبها وتزوجها

ولكن بدل من الساعات المعدودة التى كان يقضيها معها

وهى فى شدة اناقتها لأجله تحول الى رفيق دائم لها

ومن الجنون ان يتوقع دوام هذا الشكل 24 ساعه فى اليوم

نحن ايضا يصيبنا النعاس وننام ونغسل شعرنا وبيطلع لنا حبوب

أستحاله يعنى هعيش فى كتالوج طول العمر

عشان احيى الصورة التى احبها فى مخيّلته

ومن العته ان يظن أنها هذة الصورة فى الكتالوج ...

والزوج الذى يشتكى من اهمال زوجته

هو نفسه الذى سيشكوها لو عاد فوجدها وقد عادت من الكوافير وأرتدت الحرير

ولكن لم يجد هو ما يأكله

فلا داعى للتجنى وفرض رؤيات مسبقه على الزواج .

ممكن ان نحتفظ بفكرة فكاهيه او كلام دارج أعتدنا عليه لزوم الهزار

لكن نبقى فاكرين دايما انه مجرد تهريج مش نصدقه ونبتدى نسقطه على حياتنا

وتظهر بقى الجمل بتاعه ربنا يسامح اللى اتجوز قبلى ومقاليش

وملعون أبو اللى أتجوز قبلى ومنصحنيش واللى أتجوز بعدى وماأستشرنيش
.
بدون ان يشعر بوقعها على نفس الزوجه اللى هى مش شيطان يعنى

معلش برضه كله مستحمل وعايش عشان الدنيا تمشى

ويا عزيزى الرجل أنت لست اخر راجل باق على وجه ألارض

ويا عزيزتى البنت مش انت أول وأخر نوعك
.