الجمعة، 29 أكتوبر، 2010

من وحى العيد


العيـــد ... لا بصراحه كان عيد سعيد ورائع وممتع وجميل وكل حاجه حلوة


وربنا يديمها أعياد ويديمها فرحه وسعادة وراحه قلب

--------------------


انا عايزة اعرف الناس اللى بتقول العيد فرحه دى وخصوصااا العيد الكبير
هل الناس السعيدة اللى بتفرح بالعيد دى
جربت تنضف ورا الدبح ؟ طب جربت تنضف وتغسل الحاجات العجيبه الغريبه المريبه اللى ابويا بيصر كل سنه اننا ننضفها لأنه بيحب ياكلها
وبعدين نطبخ ورا جيش عرمرم من الضيوف اللى كله بياكل ... طب دة عيد وأضحيه لله وأكرام الضيف دبحه وكل حاجه

لكن البنيه الغلبانه اللى هى انا تيجب منين صحه للعذاب الأليم دة

----------------


أثناء سفرنا بالسيارة وأبى جالس بجوارى دار هذا الحوار الأبوي الرائع

أنت عميتي يا بت ؟ نظرك راح خلاص ؟ مابقتيش بتشوفى ؟

ياخسارة الشباب .. بقيتي شيش بيش ؟

مش شايفه الأشارات والمطبات وعلامات الأتجاهات ؟


طب والعربيات اللى جايه فـ وشك دى ؟ والنور اللى بيقلبوة .. ماتفتحى بقى وتاخدى بالك دة طريق مش لعبه

مع أنه والله العظيم هو اللى كان سايق

الأربعاء، 1 سبتمبر، 2010

مقتطفات


لما قولت المفروض نعلن استقلال الصعيد وننفصل بعملتنا وعلمنا ونعمل لنا نشيد قومى ينعزف بالربابه ويرقصو عليه بالعصى ... أشارة من السماء أهى

شيخ العرب همام حاول يستقل قبلى بالصعيد

شكل الصعايدة قرفانين من باقى البلد وعايزين يستقلو من زمااااان



زهرة الخشخاش اتسرقت ... وهنلبسها لشعلان ونرفدة

أنقذ شعلان ... وأشرب أفيون



أخر كلام ... أحنا شعب قذر , والله شعب قذر فعلا

ووساختنا ماسبقناش فيها شعب من شعوب الارض ... حق الريادة فى دى فعلا

كميه الزباله الرهيييبه اللى بنتكعبل بيها فى الشوارع غير طبيعيه

ومش معقول يعنى يكون فيه شعوب أخرى أو قرناء لنا من تحت الأرض بيجو يوسخو شوارعنا النظيفه

كل ست بتاكل نفسها من النضافه والتنفيض والكنس وتروح شايله زبالتها وهووووب من الشباك البلكونه

ونهار ما تكون نضيفه قوى وتتحسد يعنى تركنها قصاد باب شقتها

حدود مملكتها تنتهى قصاد عتبتها ... ووزير المملكه البيه جوزها حدود نظاقته

هى انه يشيل كيس الزباله ويرميه على ناصيه الشارع

حق الله يتقال الزبالين وبتوع البلديه بشوفهم بعيني شغالين من الصبح بدرى جدا .... ولوقت متأخر جدااا فى الليل

ماحدش يقول الزبالين .... دة دلوقتى الزبال بقى سيد الكل ... يا شعب بيتكعبل فى وساخته



أتبرع لبنك الطعام واتبرع لمستشفى سرطان الاطفال واتبرع لتكفل قريه فقيرة واتبرع لمستشفى مجدى يعقوب واتبرع لجمعيه مصر الخير واتبرع لجمعيه رساله وبعد دة كله تدي جيوش الشحاتين اللى فى الشوارع


رجاااااء حار .... اعملو نقابه لكل الجمعيات والمستشفيات والشحاتين وخدو اللى فى جيوب الناس وقسموة على بعض مرة واحدة زى النشالين كدة لما بيلمو الغله ويدوها للزعيم وهو يوزع عليهم



أو بدل كل مستشفيات الأورام اللى بيشحتو من الناس الفقرا عليها عشان يعالجو الناس الأشد فقراً أمنعو أصابتنا بالأمراض المستعصيه دى من الأساس

زمان لما كنا نسمع عن حد مانعرفوش مات يقولك دة والعياذ بالله مات بالمرض الخبيث

دلوقت كلنا نعرف ناس ماتت بأمراض خبيثه

وفى سنه واحدة مات بيه 3 جيران ومرات خالى وبنت خالى وستات اصحاب ماما ورجاله زمايل بابا

ومن 30 سنه احمد رجب كتب وقال

وضعو أثنان أحدهم عاقل والأخر مجنون فى غرفه مملوئه بالماء وبها صنبور مفتوح العاقل أغلق الصنبور والمجنون أستمر فى نزح الماء بجردل إلى يوم الدين

بدل من العلاج من أمراض لا علاج لها .... أرحمونا من أننا نصاب بها أصلاً



الجمعة، 13 أغسطس، 2010

تدوينه


أول رمضان منذ بضع وعشرون سنه

النصف الأول من الثمانينيات . نفس الجو قائظ الحرارة ورائحه الرطوبه الخانقه
أطفال لا يتعدى عمرهم الست والأربع اعوام
هذة هى انا وأخى الصغير نلعب فى الشارع وقد أنتهينا من تمزيق كتبنا المدرسيه لصناعه زينه رمضان
الوقت تعدى منتصف الليل , وامى تنادى بصوت مرتفع علينا كى نصعد لننام
من هذا الذى يصعد للنوم فى مثل هذا الجو بل ويترك كل تلك الأثارة والمرح واللهو فى شوارع كانت شبه فارغه من السيارات رغم امتلائها بالمارة
تنادى على أبن خالى الكبير كى يجلبنا لها , نصرخ ونركض فى كل الأتجاهات
هيهات ... هو طويل القامه واكبر منا بكثير
يقبض علينا ويحملنا اليها ... يتدلى كل واحد منا تحت ذراعه صارخين منتفضين .. حقيقاً لا نرغب لا فى الأستحمام ولا فى النوم بل نريد ان نستمر فى اللعب بضع ساعات آخرى

أقف فى الشباك نصف مستيقظه أنتظر عودة أبى ... فقد ذهب بالسيارة قبل الفجر ولم يعد بعد .
انام مكانى فى انتظار عودته

فى الصباح الباكر توقظنا أمى لنذهب الى بلدة أبى ... لنفطر هناك مع جدى وجدتى وأعمامى

أبى يجهز الخضار والفاكهه التى سنأخذها معنا ويتذكر أنه لم يشترى القاطيف بعد

امى تجهز ما سنأخذة وبعض الغيارات لزوم الشقاوة واللعب فى الطين

قريه صغيرة تقبع فى حضن الجبل الغربى تجاورها قريه البهنسا الأثريه حيث دفن عدد من الصحابه فى معارك الفتح الأسلامى
نصل لنجد جدتى لأبى جالسه على الأرض وأمامها مخروط ثلاثى من أعواد حطب جافه سميكه تنصبهم وتعلق بينهم (قربه) تخض فيها اللبن تصنع منه السمن والباقى يصبح جبن قريش
قابعه فى صمت متشحه بالسواد ذات وجه صموت ملامحه جامدة
تحرك القربه حركه رتيبه أليه فى ذهاب وأياب بمعدل ثابت وفى صبر بالغ
طيله حياتى لم أستطع تمييز ملامح جدتى ولم اعرف ان كانت سعيدة ام حزينه او حتى غاضبه
نادرا ما سمعت صوتها تتحدث
دائما ما كنت أراها اما تخرج الماشيه نهارا او تحلب جاموستها أو تطعم طيورها
لكنها أبدا لم تكن تشارك فى حديث او تسامر جارة

اجلس بجانبها .. احاول مساعدتها , امسك القربه واحاول خض اللبن فتتحرك بعشوائيه وتتخبط جوانبها تنهرنى بصمت ... أقوم واحاول اللعب بعيداً عنها مع بعض بطات صغيرات خرجن من البيضه منذ أيام قليله
أضعهم فى حله الماء فى محاوله لتعويمهن .. تصرخ فى خفوت انى سأقتل البط
يحملنى جدى بعيدا .. يدعونى للعب مع العنزات فهم ملكى
نعم فقد أخرجو مصروفى الذى أدخرة فى حصاله خشبيه صنعها لى النجار واشترو لى به عنزة (عشار)
وقد انجبت أثنين ... هم ملكى أذن ويحق لى اللعب معهم

بعد الأفطار يحل الظلام سريعاً ... فى تلك القرى وقتها لم تكن الكهرباء قد دخلتها بالكامل وما أن يؤذن المغرب حتى يحل ظلام داكن غريب له ملمس قوى وحضور وحتى رائحه مميزة
يخرج بنا عمى ليحضر بعض قناديل الذرة ليقوم جدى بشيها
مين اللى معاك دول يا رضا
دول ولاد اخويا جلال أصلهم جايين يفطرو معانا النهاردة
هاا ولاد البندريه ؟

فقد كانت أمى هى ابنه البندر التى خرج أبى من عبائه أمه واختيارها لأبنه اختها عروسه له ليتزوجها
نحمل اعواد الذرة الجافه نلعب قليله بشعر ناعم ذو لون أشقر يخرج من رؤوسها
لتبديد جو من الصمت وبعد محاوله فاشله لتشغيل التليفزيون حيث لم يكن بث قناته يصل الا مشوشاً رديئاً قام والدى بتشغيل الردايو وقام بتوصيله على بطاريه السيارة لينساب صوت الشيخ سيد النقشبندى مولاى أنى بـ بابك قد مددت يدى

رمضان هذا العام ... أقف فى المطبخ استمع الى صوت النقشبندى وهو يبتهل رائعته العذبه ذاتها
لا أشتم رائحه رمضان فى الجو ولا استمتع بثرثرة امى مع أقاربها
ولا محاولات جدى شى الذرة ... ولا أرى جدتى الصموت ذات الوقار تجلس جلستها المعهودة تقوم على خض الزبد .... فقط أرى ابن أخى يلهو على مشايته فى محاولات فاشله مستمرة منذ شهور فى السير بمفردة
اختى تجلس على مصليه تقرأ بعض الأدعيه ... وأبى يتلو القرآن بصوت جميل ... ليس رائع ولا شديد العذوبه لكنه رائق .. أمى تقول بنبرة متصعبه .. كيلو الفستق بـ 74 جنيه وكيلو اللحمه وصل 60 حتى الطماطم بقى الكيلو بـ 3جنيه ونص
(تدوينتين نشرتهم اول رمضان منذ عامين .. لكن رغبت فى نشرهم مدمجتين سويا هذة المرة)

الجمعة، 14 مايو، 2010

العبور على طلمبه

قطعت المايه ... يومين
خير يا عالم .... الماسورة الأم ضربت وبنصلح فيها وماعلش استحملو شويه
(أولا طبعاً يخرب بيت ماعلش وبيت استحملو)
ثانيا ممكن حد يفهمنى ازاى ناس تقدر تستحمل من غير مايه يومين ؟
الموضوع طول وكان واضح انه فيه مشاكل أكبر وشكله مش هيخلص قريب
الحل كان عبقري بصراحه ... ولأننا منطقه زراعيه

كان الحل الفورى شغلو الطلمبه
طلمبه المايه الحمرا الجميله اللى شغاله سحب من المياة الجوفيه
اختراع رائع كدة وله أيد أنسيابيه ومحتاجه شويه مجهود عضلى عشان تبدأ فى ضخ المياة
مايه لها طعم خفيف كدة بس أهى مايه بدل ما الحنفيات نشف دمها

وبما إنه تم التوقيع على اتفاقيه دول المنبع , وهيبنو سدود ويقطعو عننا كلنا المايه
يبقى نفهم من كدة ان شعب مصر كله المفروض بقى يدق طلمبه قصاد بيته وعمارته وفيلته ؟

طب الأخوة الفقراء إلى الله اللى عندهم حمامات سباحه .. يتصرفو ازاى ؟
يعملو ايه يعني ... يلبسو المايوهات بتاعتهم بأى مناسبه ؟
كمان محاولاتهم انهم يملو البيسين من الطلمبه , شئ مضنى للغايه
يسقو ملاعب الجولف ازاى ؟؟
ولما النيل ينشف ياترى ممكن ياخدو الأرض مكانه ويقسموها مبانى ؟

حاجه كمان ... بما أننا أفسدنا الأرض والبر والبحر والجو ... والصرف الغير صحى سمم الأرض وأتسرب للمياة الجوفيه يبقى مهما دقو الطلمبه على أى عمق هتجيب مايه وسخه

بس من ناحيه تانيه هنرجع نحيي صناعات قديمه اندثرت
زى صناعه البوابير والطشت وكوز المايه
عشان الواحد ياخد حمام ينسى بقى حكايه الدوش دى
هيبقى شئ له طقوس خاصه رائعه

وتعمر الوابور وتحط فوقه بستله المايه وبعدين تبرديها أختى المشاهدة فى الطشت وتستعملى الكوز للشطف جيدا
.
ووقت الغسيل هيبقى مهرجان واحتفالات وممكن يبقى شئ جماعى يشارك فيه بعض الأقارب والجيران ودة هيقوى الروابط الأجتماعيه
تجارة الجرادل وجراكن المايه هتبقى سوق سودا

كمان الطلمبه هتدخل فى الرموز الأنتخابيه لما لها من أهميه عند المصريين
وهنكتشف ان المصرى القديم حفر الطلمبه على جدران المعابد تقديرا لأهميتها فى حياة المواطن وتقديساً لمكانتها بل وعبدها فى بعض الأحيان ... وأن الدكتور زاهى حواس عثر على تماثيل من الحجر الجيري لطلمبات مايه بأحجام مختلفه فى مقابر بالبر الغربى وطلمبه من البرونز بجانب مقابر العمال بناة الأهرام

وفى أول انتخابات رئاسيه جايه هيوعدنا الرئيس بأنه لن يتوانى عن توفير الطلمبات الأقتصاديه لمحدودى الدخل وأنه هيكون هناك طلمبه مياة لكل 5000 مواطن
ولن يسمح بأن يتم الجور على المياة الجوفيه للفقراء ولا هيخلى الأغنياء يعملو بيبي فيها
وإنه بالأنتهاء من مشكله توفير كوبين ماء فى اليوم لكل مواطن مصرى لن نتوانى عن العبور إلى المستقبل بعد ما وفرنا جميع الرفاهيات والكماليات لكل فرد فى شعب مصر المريض

الاثنين، 10 مايو، 2010

فى شارعنا فتنه طائفيه

فى شارعنا جات جارة جديدة هى وزوجها والعائله
المدام شغاله لا مؤاخذة والزوج سحّار ( بتاع أعمال وأحجبه وخلافه )
الست الله يكرمها زى ما كرم ماتاهارى شغاله الله ينور ... شبهت المنتئه بالأضافه إلى انها مرابيه
يعنى كملت من كله ... ست كمُل .... عائله تشرف أى منتئه تسكن فيها
السيدة المسيحيه لها شريك مسلم (قرنى بيه ) ... يعنى بيورد زباين سوا للربا أو دعارة
قوادة ومرابى ... أجدع ناس
والمنطقه كلها ساكته وهاديه ومتقبله الوضع الجديد وبيكتفو بالدعاء على الست وعمارتها اللى بنتها فى الشارع حاجه كدة شبه القلعه
وإذ فجأة قامت القيامه والخناقه اشتغلت ... خلاف مهنى بين الشركا والست والأبناء البارين بأمهم المساعدين لها فى المهنه مسكو الراجل طحنوة ضرب وفى الأخر جه البوكس لم الكل

لحد دلوقت والموضوع مجرد أختلاف على كيفيه أدارة الأعمال

بعدها مباشرة الأخوة المسلمين لمو شباب المجاهدين وجم عملو أنتفاضه طوب وحجارة على بيت "الست" أنتقاما لأخوهم فى دين الله المسلم اللى أنضرب من مسيحيين

"الست" طلبت الشرطه باعتو تانى البوكس على ما وصل كان الفوج الأول من الشباب الغيور على دين الأسلام أختفى بين البيوت وكانت هى كمان جات لها امدادات من الأخوة المسيحين
وعليه ... ولحد دلوقت حاله من الكر والفر بين دول ودول ولعبه العسكر والحراميه
على ما توصل الشرطه يختفى الكل وفى النهايه قامت الشرطه مشكورة بوضع حراسه على بيت "الست"
وأعتقد ان الحراسه دى عشان تقدر تمارس مهام عملها بدون شوشرة وأزعاج
الشرطه فى خدمه الشعب

مش مهم أنها شبهه لمنطقه بعائلاتها , وملتها بأشكال ونوعيات من البشر ما انزل الله بها من سلطان
مش مهم أنه قواد معاها
مش مهم ان اللى بياخد منهم بالربا ومش بيقدر يكمل دفع الفلوس بياخدو هما الأتنين مراته رهن ويبعتوها لرجاله عشان تسدد ديون جوزها
المهم المهم إن كرامه المسلمين لا تهان بضربهم من مسيحي
الخلاف لا ديني ولا طائفى ولا دخل للمسلمين ولا للمسيحين بيه لكن وقت ما الغباء بيعمى الكل ... كله بيلطش فى بعضه بحماقه وخلاص

وفى النهايه هى قوادة وهو مرابى

الجمعة، 7 مايو، 2010

والقمح ملقى على الطرقات

مر الأن حوالى الشهر على جنى محصول القمح
ولازال ملقى على الأرض ... فلا بنك التنميه وافق على الشراء , ولا بنك القريه , ولا شركات مطاحن مصر
بعد شهور فى الزراعه والرعايه والحصاد .. لا يجد المزارع من يشترى قمحه
فليس هناك مستورد ســ يستفيد من أذون الأستيراد ولا عمولات ولا فرق أسعار
فــ لماذا يتم شراء القمح المصرى
وزير الماليه وفى جلسه الموازنه فى مجلس الشعب قال أنه تم أقرار ميزانيه شراء القمح من المزارعين بزيادة 600 جنيه للطن عن الأسعار العالميه
لكن حتى الأن ليس هناك أى جهه لا وافقت على الشراء ولا دفعت مليم

نستورد كل أنواع زبالات الغرب والشرق بأسعار فلكيه بما تحويه من أمراض وأوبئه وكناسه الأرض
ويتم طحن وعجن وخبز نوعيه غريبه من الخبز ذات طعم مثير للأشمئزاز ورائحه متعفنه وساعات أمام الأفران للحصول على بعض منه

لكن القمح المصرى ... قمح النيل ... ملقى على الطرقات
تأكله البهائم ... يلقى إلى الدواجن ... تتخاطفه العصافير

توقفنا عن زراعه القطن , على مدى مئات الكيلومترات سفر على الطرق الزراعيه لم أرى عود قطن واحد
لأنه يكلف أكثر من الأسعار العالميه وماعاد عندنا مصانع تقوم بغزله أو نسجه كما أن الدوله توقفت تماماً عن شرائه ويظل ملقى فى المحالج تحت الأمطار وعرضه للرياح والأتربه حتى يتحول لونه للأسود

أنكمشنا فى زراعه الأرز لأنه يستهلك الكثير من المياة ويكلف أكثر من كلفه أستيرادة
حتى الثوم والذى تبلغ تكلفه فدانه زراعه وتخديم أكثر من 6 ألاف جنيه أصبح مغامرة خطرة للغايه ففى سنه يبلغ سعر طنه 20 ألف جنيه وسنه يهبط إلى ألف جنيه ... فمن فقد عقله كى يعرض نفسه لهكذا مكسب فى علم الغيب أو خسائر فادحه ... ولا نعرف أصلا من هو المسئول عن التلاعب فى سعرة بهذة الطريقه

أصبحت الأرض تستخدم لزراعه البرسيم ... فهو الوحيد ذى السعر المستقر ولايحتاج للدوله كى تقوم بشرائه أو أستهلاكه ... فالمواشى تقوم باللازم , ومع هذا أيضاً فأرتفاع أسعار لحومها غير منطقى

بأى شئ سـ نعبر إلى المستقبل ونحن لا دوله صناعيه ولا زراعيه ولا سياحيه ولا تجاريه
لكنا وبجدارة دوله موظفين ... وللأسف لا نستطيع أكل المواظفين ولا شربهم ولا تصديرهم للخارج



توقفنا عن زراعه القطن وسنتوقف عن زراعه الأرز وبعد خسائر هذا العام أعتقد أننا سنتوقف عن زراعه القمح
لا نكتفى بالجور الفاحش على الأراضى الزراعيه ... ولكنا أيضاً سنتوقف عن زراعتها أللهم إلا
من البرسيم والبصل والكسبرة والثوم ثم نتجه للصحارى لزراعه الطماطم والفول والفراوله يليهم المنتوج المعجزة الذى يحتاج لخبرات عالميه فى زراعته ( الكنتالـــــوب )

بعد القطن والقمح ... ماذا تبقى

الجمعة، 30 أبريل، 2010

شـــئ مـخـتـلـــف



ربما كانت محاوله للشرح

قد أنجح ... او يجانبنى الصواب

لكنها فى كل الأحوال محاوله ما

هو قريب جدا منى ... لم أنكر يوماً

كأنه أنعكاس صورتى فى مرآة الدنيا

هو أنا فى هيئه مغايرة

حين عرفته أول الأمر

كان مثلى ... وحيداً

يعانى من قسوة الحياة

لكنه خلافاً لى لم يعبر عن ذلك مثل ما عبرت

عبّر بصورة مختلفه مغايرة

وارى وحدته وهشاشه قلبه خلف أقنعه

كل قناع تزيله عنه تجد خلفه آخر لكنه أقل صلابه

حتى تصل إلى جوهر رقيق هش ... ربما أكثر ضعفاً منى

حاول كلانا أن يجد فى الآخر سندة لكنا فشلنا

لأننا ومن شدة تشابهنا كنا كــ قطبين متنافرين

وجهين لــ عمله

نعم يضمهما قالب واحد

لكن كلاً منا ينظر إلى الحياة من ناحيه مضادة

فــ لم يولد بيننا أى مسمى عاطفى

لكنا تضامينا كــ يتيمين طردتهما الحياة

حاول كلينا أن يكون للآخر ما أفتقدة من رفقاء

أخ روح ... وصديق

يعطف عليه ... يربت على ظهره

أو حتى يستمع إلى بكائه

لكن ولأننا كنا متحفزين

أصبحنا أقرب طبعاً لــ كائنين متوحشين

يجب أن نهاجم كى ننجو ... ونقاتل لنحافظ على بقائنا

حتى لو هاجمنا بعضنا وقاتل أحدنا الآخر فى لحظات عنف

وبمنتهى الشراسه

قبل أن يظهر هذا الطفل الضعيف الكائن بداخلنا

روحنا الأنسانيه التى لم تُقتل بعد

لتهب إلى رفيقه ... تخفف عنه ما تسبب به من جراح

فــ فى النهايه نحن أقرب إلى بعضنا من كل البشر

ونفهمنا دون لغه ... او حتى حروف

يحق لكلينا أن يطمئن على الآخر

يهب لنجدته ... يمنحه راحه الأستماع

بصرف النظر عن قصور النظرة


أو اختلاف الأراء


ليست كل العلاقات حب ... وليس كل أثنين عاشقين




الجمعة، 16 أبريل، 2010



حامل .... يبقى هتولدى قيصري , اصل الجنين مقلوب والحبل السرى اتلف على رقبته وشرب مايه وضغط دمه بينزل ودقات قلبه بتقل والحوض ضيق ولازم نفتح بطن وإن مالحقناش الجنين هيموت وبختك منيل وسنتك سودة ومصيرك جهنم وبئس المصير والدكتور يصور سواد الدنيا والآخرة للحامل وجوزها واهلها والمجتمع والناس
ودة طبعا عشان يقلب الزبون فى كام الف جنيه وشق وافتح زى البطيخه وهو لسه هيستنى لما تقعد تولد طبيعى 20 والا 30 ساعه طلق وفى الآخر يقبض قليل ... هو يعملها جراحه وينصب حواليها مولد وآجزر يا معلم
ناهيك طبعا عن أنهم تقريبا بطلو يعلموهم فى الكليه ازاى يولدّو الستات طبيعي وآخر خبرة الطب عندة أنه يشق ويطلع العيل ويخيط

طب ما على كدة الواحدة لما تيجي تولد تبقى تروح عند جزار وترزى على الأقل غرزة التقفيل هتبقى أنضف
فى كل 100 حاله وضع ... مين سمع عن واحدة ولدت طبيعي .... يا ترى لسه فيه مواطنه مصريه مجهوله لسه بتولد طبيعي زى زمان ؟



وقعت وانكسرت ايد او رجل ... يبقى لاااازم شريحه ومسامير
اصل العضم انكسر ماعرفش فين ومنين وكسر مضاعف وكسر لولبى وهيقطع العصب وفيه شظايا وهيعمل غرغرينا والحاله خطيرة ولازم تجيب الشريحه من الشركه المعينه دى والمسامير تبقى من نفس الشركه اللى تقريبا الدكاترة بقو سماسرة لها
هو راخر زى زميله دكتور النسا اللى فوق مش هيقول دة كسر بسيط ويجبس ويسيب العضم يلم لواحدة
لزما وحتما ينصب المولد اللى نصبه التانى وتبقى جراحه ودكتور تخدير ورسم فتح اوضه عمليات وكله بتمنه والعادى بسعر والجراحى متطوق
ياترى فيه حد لسه بينكسر كسر عادى من بتوع زمان اللى مش محتاج شريحه ولا مسامير وحتى واحد مجبراتى ممكن يعالجه ؟

قلب مراة وزير الصحه تعب ... سفرها تتعالج على نفقه الدوله فى لندن
مرارتك التهبت ... مصر كلها بـالـ 80 مليون اللى فيها بدكاترتها وبنقيب أطبائها بمستشفياتها بتمورجينها مافيهاش نفر لوجه الله هيعرف يعالجك ... اطلع على المانيا , روح مستشفى هايدلبرج
فيها احسن ناس تشيل المرارة من غير ما تفقعها فى الكبدة وتخليها تمرر وماتقدرش تاكلها بعد كدة


يا ترى لسه مصر فيها علاج ؟ وناس بتعيا بـ أمراض ممكن تتعالج فى مصر زى زمان ؟


الثلاثاء، 13 أبريل، 2010

.
وصلنى على الميل الخاص رساله ظريفه جدا من جوجل جروب بيقول انه وصله الإيميل الخاص بيا فى طلب الأشتراك فى مجموعه جنسيه أو كما قال (أكبر جروب جنسى فى الوطن العربى )
(استلمنا طلبا لانضمام هذا البريد الإلكتروني إلى المجموعة حمل اقوي افلام .... والنقط بقى انتم وخيالكم
الحمدلله بقى عندنا حاجه كبيرة بتضم العرب أهو ... ما علينا

المهم ... وقبل منه وصلنى ميل تانى بيقول انى برضه طلبت الأشتراك فى موقع زواج , أو برضه "أكبر موقع زواج فى العالم الأسلامى" .... طبعا قال يعنى اللى بيعمل كدة بالميل بتاعى قصاد انه يحرجنى بقى وينكد عليا ويجيب لى أكتئاب وهدور الف حوالين نفسى وازاى دة يحصل وأسمى يجيي فى شئ زى كدة ,
بس المشكله إن الإيميل بتاعى خاص فعلا
يعنى مش مشتركه فى منتديات او جروبات أو اى مجموعات بريديه ولا يعرفه على الأطلاق غير الأشخاص المتواجدين عليه , وبما أنهم كلهم من أقرب الأصدقاء
وبما إن اللى كانو موجودين عليه كــ مجرد معارف وتم حذفهم هما برضه مدونين ... ولا يزيد عددهم عن 4 أفراد ... أعتقد كدة إن دائرة البحث ضااااقت قوى
ولو إنى مش ببحث أصلاً وحقيقي مش مهم عندى التصرفات دى وبالفعل لا تمثل أى شئ
لأنها حقيقاً تصرفات هبله قوى

وبما إنى متزوجه من 11 سنه فـ أكيد مش هتجيني صدمه عصبيه من كلمه جنسى
وبما إن كان ليا زوج مدمن مواقع إباحيه فــ بالتأكييييد مش مجموعه جوجل جروب هى اللى هتمثل مأساة ولا هتجيب لى كوابيس فى الليل
يعنى من الآخر كدة ... اللى عايز يعمل حركه وسخه يعملها بمعلمه
من فضلكم بلاش هبل وعبط ولعب عيال
أرجووووكم خلقى ضيق ومرارتى أضيق .... اللى عايز يضايقنى رجاء حااااار يعمل شئ يضايق فعلا
مش موقع زواج او مجموعه جنسيه هى اللى هتجيب لى إنهيار عصبى ولا تعقدنى ولا تضايقنى ولا حتى تستحق إن اتعب نفسى واقعد اكتب الكلمتين دول
ويا أصحاب الحركه العبيطه من فضلكم
إما تعرفو تضايقو صح ... أو تروحو تشتغلو فى حضانه أطفال

الخميس، 8 أبريل، 2010


الو ... النت فصل من عندى , وقبله كام يوم مش مظبوط والروتر بيفصل كتير . ممكن اعرف السبب ؟
أسفين يا مدام دة النت قطع من البلد كلها
ليه خير ... بقى يتباع فى المخابز دلوقت ؟
لا بس السويتش اتحرق
يعنى هيفصل قد أيه
مش أكتر ما نغير السويتش حوالى شهر شهر ونص
ليييه انتو هتغيرو محولات السد العالى ؟
أصل دة السويتش كله اتحرق بكل الخطوط اللى عليه
هو كل كام شهر تطلعو لى بحكايه شكل . مرة هنغير التعاقد ومرة ولعتو ؟
ماعلش يا مدام ظروف بقى وهو يعنى احنا اللى حرقناة
قفلت وانا بشيعه بمجموعه من الدعوات واللعنات ان انشالله يولع هو والشركه وشبكه الأتصال المصريه كلها
بعد كام يوم ... أيوة يا افندم الأنترنت اشتغل , أتضح ان السويتش مش كله اتحرق دى كانت شويه اعطال وشغلناة تانى وبنعتذر عن العطل

طيب شكرا جدا وانا كمان بعتذر , كنت قولت لحضرتك شالله تولع ... ياريت من فضلك ماتولعش ... ميرسيه
وعليه أديني رجعت على قلبكم حتى أشعار آخر

السبت، 27 مارس، 2010

الليله الكبيرة

حاجات قليله خالص اللى بتخليني اقعد قدام التليفزيون
كاس العالم ودورة الألعاب الأوليمبيه , عبد الحليم حافظ ومسرحيتي سيدتى الجميله وحواء الساعه 12 ... ومؤتمر القمه العربيه
والأخيرة دى بالذات بفضى لها يوم من أوله عشان اتفرج على وصول السادة الملوك والأمراء والرؤساء وأصحاب السمو والفخامه والمعالى
ولحد ما يهزئو بعض أو ربنا يكرمنى والاقى حاجه اتفرج عليها وهما بيضربو بعض بطقاطيق السجاير وقزايز الميه
ودائما وأبدا وأحب الفقرات ليا فيها ... فقرة القذافى
فــ طبعا السنه دى الأهتمام مضاعف والمتعه أكبر بوجودة رئيس للجمه (على رأيي رئيس اليمن) صاحب كلمات الجمه والديمجراطيه والسجافه


أحلى فقرة كانت السنه دى هى الملاهى , وهى ركوب اصحاب الفخامه والمعالى للسيارات الكهربائيه قبل بدء جلسه الأفتتاح , وطبعا لأنهم ناس أكل عليهم الدهر وشرب وتجشأ كمان
فــ مافيهومش حيل يمشو الخطوتين من باب المكان لحد قاعه المؤتمرات
فـ كانو راكنين لهم على جنب كام توك توك بس مركات فخمه يعنى
وانت داخل من باب قصر المؤتمرات على أيدك الشمال تلاقى الموقف بتاعهم والسواق بيقول واحد قاعه مؤتمرات واحد قاعه مؤتمرات ... نفر جلسه قمه
وعليه يشحنو السادة الملوك الكُهنه (بضم الكاف) ويلفو بيهم شويه يفرجوهم على الطرقات والعيال المصورين بيج
رو وراهم والفقرة دى كان ممكن تكمل وتبقى أحلى لو كان نصب لهم كام مرجيحه وشويه زحاليق ومدفع
وكان السادة اصحاب الجلاله والفخامه أثبتو قوتهم لشعوبهم وشجاعتهم وجرائتهم فى زق التارة واضرب ميه بمبه
زى الموالد كدة .. ويبقى اللقب الرسمى لـ رئيس الدورة 22 لأجتماع القمه
هو السيد رئيس مراجيح مولد النبى


تانى فقرة : هى فقرة الألقاء الكوميدى
********
وهى الفقرة اللى بيجرب فيها السادة الأميين الملوك والسادة الجهله رؤساء الدول مهاراتهم فى تمزيق وتشويه اللغه العربيه وكب مايه نار عليها

وإبهار المتفرجين بمهاراتهم الشديدة فى عدم القدرة على تكوين جمله كامله من 4 كلمات دون تقطيع وفصل وتهته وتفتفه وحزق وتراجع من أول السطر عشان يفتكر الجمله من الأول بعد ما ضاع مضمونها وفقدت معناها نتيجه عدم القدرة على القراءه الرشيدة للسادة ملوك وأمراء ورؤساء الدول الــــعــــربــــيـــــه
.
الفقرة التالته هى مسرحيه الأطفال
********
وهى الفقرة اللى فيها الرؤساء والملوك يزعلو من بعض ويخاصمو بعض ويحلفو ما يقعدو مع بعض فى قمه تانى خااالث ويقوم واحد فيهم يجري يقوم واحد رئيس او ملك تانى برضه يجرى وراه يشدة من ديل عبايته الملوكيه ويحلف عليه براس الجمل بتاعه لـ هو قاعد

هذا ولازالت فقرات حفلنا الساهر مستمرة

كما وأقترح ان تقام القمه القادمه فى درب شكمبه ويكون رئيس القمه هو
حضرة الأراجوز

الأحد، 14 مارس، 2010

CSI


علم البحث الجنائى ... على أساس ان البحث الجنائى وفحص و تحليل الأدله وتعقب الأثر علم كامل قائم بذاته , شديد الأهميه وله معامل ومراكز بحثيه ودراسات متخصصه
لأثبات برائه متهم أو تثبيت التهمه عليه

دة على الأقل اللى اخونا الأمريكان والغربيين فرجونا عليه فى مسلسلاتهم وأفلامهم والوثائقيات بتاعتهم
حتى شرطه دبى كشفت جريمه قتل المبحوح وربما محطه تجسس كامله عن طريق تسجيلات الفيديو وتحاليل الدى أن آيه لبعض الجناة المشتركين وفحص الكترونى لجوازات سفر
ولبنان من 2005 وحتى الآن لازالت مسرح لفريق تحقيقات دولى لكشف قتله رئيس وزرائهم
أمال على أى أساس بقى يتم عمل البحث الجنائى عندنا ؟
أللى ما فيه جريمه قتل مسكو المتهم فيها عن طريق التحقيقات السليمه والتحريات وفحص الأدله ... جرايم قتل تعتبر مجازر والأتنين حتى الأن بدون متهم
مذبحتين يفصل بينهم 5 سنين و3 كيلومتر
وفى الأتنين المتهمين اللى ألقت الداخليه القبض عليهم .... بــرائــه
لييييه ؟ هقولكم انا ليه ودة المتبع فى كل جريمه قتل ... تقريبا يعنى
علم البحث الجنائى المصرى يعتمد على الأتى
البيه الظابط قاعد على مكتبه ومادد رجليه يجيله بلاغ من عمدة او أشارة مركز
يقوم ياخد بعضه ويبلغ رؤسائه ويروح يتفرج على مسرح الجريمه
ويبدأ علم البحث الجنائى بأنه يكلف العساكر والأمناء أنهم يلمو قرايب القتيل وجيرانه والعيال الصيع اللى فى البلد واى واد مسكوة مش معاة بطاقه وتبدأ العمليه العلميه الدقيقه والشاقه والمعقدة بأن أعزقوهم العزقه التمام وهاتك يا ضرب ونفخ فـ دين أمهم وأكيد حد منهم هيقر ويعترف , ماهو كل الضرب دة لازم يجيب نتيجه وانطق ياض يا بن القحبه وتشكيله آخرى من أروع الشتائم وبتخفيضات لا تقاوم وهاتو امه واخته ومراته والنتيجه طبعا لكل هذا البحث العلمى الرائع والمنظم والممنهج
هو أن حد هيزهق ويتعب ويضعف ويعترف (بس أهم جزئيه فى هذة العلوم الدقيقه والحساسه أنك تضرب ضرب مايسبش أثر ولا يبان فى الكشف الطبى اللى المتهم هيطلب ان يتعرض عليه فى أول جلسه محاكمه)
وبدل ما الوقت يُنتفع بيه فى سرعه البحث وإيجاد المتهم قبل ما تضعف الدله ويضيع الأثر
يروح كله فى اتجاة آخر خاطئ تماماً لمجرد ان السادة فى الداخليه يخلصو بسرعه ويقولو انهم أنتهو فى وقت قياسى وتنزل صورهم فى الجرايد اللى اصلا مابقاش حد يقرأها ويظهر البيه مدير الأمن فى التليفزيون ويظهرو فى برنامج وراء الأسوار ووكالات الأنباء تنشر أساميهم
وتروح القضيه اللى من غير قضيه لمحكمه الجنايات وأصغر محامى فى أصغر قريه سهل جدا يخليها مصفاة من كتر الأخطاء والثغرات اللى فيها من أول ضعف الأدله لخطأ الأجرائات لأستحاله أثبات الجرم وتعذر أرتكاب المتهم للجريمه فى الوقت المذكور او حسب أعترافاته أو لعدم تطابق الوصف والتمثيل مع تقرير الطب الشرعى
وبعد ما يكون ضاع الوقت والدليل ودم الناس هدر
أيييه بقى هنكفر ؟ كل نفس ذائقه الموت
والمكتوب على الجبين لازم تشوفه العين ولكل آجل كتاب وماحدش بيموت ناقص عمر
ونصيبهم كدة ومقدر ومكتوب ولازم يبقى فيه إيمان بالله
وكأن الإيمان بالله يتعارض مع Crime Scene Investigation

الاثنين، 8 مارس، 2010

مجلس عزاء

توفيت الى رحمه الله تعالى كل التعليقات على كل تدويناتى على يد البلوج اسبوت
أو قوى شريرة .... الله أعلم
وبعد عامين من التدوين ومئات التعليقات
لم يبقى منها شئ على كلأ من المدونتين
كل تعليقات اصدقائى وأشقائى تم حذفها تماماً
وترك لى بدلاً منها أصفار

للفقيدة الرحمه .... ولى الصبر والسلوان
والعزاء على المدونات ولا عزاء للغير معرف

ويالهوتيييييييييييييييييييييي

الجمعة، 5 مارس، 2010

الغابه المظلمه

فى منتصف رحله العمر التى كتبت علينا

وجدت نفسى فى غابه مظلمه

تهت فيها وأُمحى الدرب أمامى

غابه لا يطالها الوصف

مخيفه كــ الأدغال

موحشه كــ برّيه مقفرة

ذكرها يثير المخاوف الكامنه

لا أظن الموت يفوقها مرارة

لا أستطيع أن أروى كيف أوغلت فيها

فــبـ أعبائى كنت مثقلاً

وبالنوم كنت غارقاً

عندما بدأت أنحرف عن الطريق الصحيح

فى نهايه ذلك الوادى الضلّيل

الذى ملأت متاهاته قلبى خوفاً

وجدت نفسى أمام هضبه صغيرة

أليها رفعت بصرى

فــ رأيت عباءة من أشعه الصباح

تنسدل على كتفيها من الكوكب المشرق

الذى يهدى عابرى السبيل فى كل سبيل

فــ انجلى عنى الخوف الذى ملأ بحيرة القلب بكل ألامه

طوال الليله المرعبه

ومثلما يصل السابح فى بحار المخاطر إلى شاطئ السلامه مبهور الأنفاس

فــ يرنو إلى الموج المريعه ويتأمل

كذلك فعلت بعد أن نجت نفسى من ملاحقه الموت

فــ حدقت إلى الأسفل

فى ممر لم ينج منها أحد

قليلاً أرحت نفسى من عناء التعب

ثم نهضت وتلمست طريقاً مقفراً صاعداً

أثبت فى الدرب دائما قدمى السفلى
دانتى

الخميس، 25 فبراير، 2010

سلوكيات مشرّفه

المكان : القومسيون الطبى
حيث يجرى الكشف على سائقى السيارات الأجرة لمنحهم رخصه مهنيه
الشخص : فنى تحاليل
يقوم بالفحص لتحديد نسبه السكر إن وجد وأكتشاف أى تواجد لمواد مخدرة

الثمن : 2 جنيه تدفعهم له ويخرج لك شهادة بخلو عينه البول من السكر
2 جنيه وتستخرج شهادة أنك سليم معافى صحيا ... ومن غير فحص
2 جنيه يمد أيدة الموظف وياخدهم من كل سائق
مقابل منحه صك السلامه الصحيه
2 جنيه تمن أرواح ناس هتركب معاه أو تركب فى عربيه يرميها النصيب تحت عجلاته إن جات له غيبوبه سكر ... أو سايق وهو مسطول
2 جنيه من 150 سائق يتم عرضهم يومياً على كشف القومسيون
2 جنيه والموظف فنى التحاليل يمتلك علامه صلاة وذقن طويله
لم يمنعه أتباع سنته وأداء فروضه من أنه يمد أيدة لــ 2 جنيه
ويا بلاش

الأربعاء، 17 فبراير، 2010

أكتشاف مذهل

الناس العلماء الله يسترهم ويعمر بيتهم حلو اللغز اللى ماكانش بينيمني لا ليل ولا نهار وريحو عقلى اللى كان قرب يشت من كتر التفكير فى يا ترى يا هل ترى توت عنخ أمون مات ازاى مات ازاى مات ازاى
حئيئي حئيئي كنت هتجنن أخر حاجه واعرف يا ترى هو مات فى رحله سفارى والا وهو بيعمل دايفنج
ولأن الفاضى يعمل قاضي واللى معاه مال يحنى ديل جحشه

فالأخوة الأفاضل العلماء قضو عمرهم فى البحث والتحرى عشان يكتشفو فى الآخر ان الأخ الفاضل برضه جلاله ملك مصر المعظم توت عنخ أمون مات بالملاريا ... واحد الله يرحمه من أكتر من 3000 سنه ولسه العالم شايل همه مات ازاى ... طبعا عشان هو سايب وراه شئ وشويات وكان غنى زيهم وورثو منه كام زلعه دهب
والملك رمسيس الله يرحمه هو راخر مات لأن كان طالع له دمال تحت ضرسه دة كمان اكتشفناه بعد رحله بحث وتحرى طوووويله
لكن لما بنى أدم ... بشر فى وسطنا دلوقت فى عصرنا المنيل دة يندبحو وهما نايمين ... لما 11 كائن بشرى يندبحو ويتمثل بجثثهم مش مهم يعرفو ماتو ازاى

ولحد دلوقت مجزرة بنى مزار محدش حلها .... أصلهم كانو صعايدة فقرا ولاد كلب يولعو
ولحد دلوقت بنقفل علينا الأبواب بسلاسل حديد وأقفال عشان منندبحش واحنا نايمين
وعشان هشام طلعت مصطفى هو هشام طلعت مصطفى فدة عشان خاطر عيونه يتغير القانون والا حتى تتلغى عقوبه الأعدام من القانون كله ويتحاكم بقانون جديد ونفصل له على مقاسه
ماهو توت عنخ مصطفى او هشام طلعت امون عالم أغنيا زى بعض وملوك
لو ماتو نفضل نحلل ماتو ازاى ولو قتلو ماعلش نظبط لهم قانون
ويطلع لنا زاهى حواس كولومبس يقول لنا كيف مات الفتى الذهبى ... او الملك الذهبى
طب يا عم الحاج الناس الطيني اللى زينا لما يموتو أو بمعنى أصح لما ينقتلو مدبوحين وغرقانين ومحروقين مش مهم حد يعرف ماتو ازاى او ليه ؟
وعليه قررت الأتى
********************
لما أموت هبقى أسيب للدوله سلسلتين وغويشه وحلق أو هحطهم فى زلعه واعمل لهم خريطه وأبعتها المتحف البريطانى

الأحد، 14 فبراير، 2010

نضافه

بدء مشروع الصرف الصحى حدانا من ربع قرن
كسرو الشوارع وفتحوها بالطول وبالعرض , بيوت قديمه اتهدت ووقعت بسبب عمق الحفر والتأثير على الأساسات وارتفاع مستوى المياة
لكن منظر ومعاناه المجارى الضاربه والشوارع الغرقانه خلتنا نستحمل , كنا طمعانين أن المشروع لما يخلص هنرتاح من كل دة
ومن السنه اللى فاتت بس فعلا انتهى المشروع وبدء عمله والناس ركبت التوصيلات وقولنا هى دى النضافه فعلا وإلا فلا وبعد أقل من نصف سنه

صحينا الصبح ... لقينا الصرف الصحى ضرب
بدءت العلب الرئيسيه فى الشوارع تضرب واحدة ورا التانيه وشارع ورا شارع
مستوى المياة ارتفع لدرجه انها ردت جوة البيوت نفسها من جوة
محطات السحب والتصريف نفسها بعد كدة توقفت
الناس الوحيدة اللى نجت من المصيبه المقرفه دى ... كانت الناس اللى ماوصلتش ولا اشتركت فى الصرف من أصله ...... واحنا منهم D:
كله صرخ كله اشتكى .... البلد كلها مافيهاش غير مهندس واحد وأربع عمال مختصين فى الموضوع دة
جه الدور على شارعنا وصلو وبدؤ الشغل
يفاجئو إن علب او حلل الصرف الرئيسيه فى كل شارع مسدودة تماماً بالأتى
خرق قديمه _ فوط صحيه _ حفاضات أطفال _ أكياس نايلون _ وأكياس زباله صغيرة قشر لب وفول وخلافه
والأخيرة دى بالتحديد المهندس كان هيتجنن ويعرف ازاى وصلت لعلب صرف مغلقه
أى نعم الحكومه كانت ولازالت بتعايرنا بالبنيه التحتيه وخصوصاااا الصرف الصحى
لكن احنا ... كــ شعب ... كــ ناس
مالنا ؟ ... أيه مشكلتنا ؟
ننضف بيوتنا ونرمى الزباله فى الشارع , نمسح شققنا ونكب المايه من البلكونه ... وعلى دماغ الناس عادى يعنى مش بتفرق
يعنى هل تخيلو ان الصرف الصحى دة مشروع شيطانى عجيب فيه مفرمه مثلا هتفرم كل زبالتهم وتريحهم من انهم يتعبو ويحطوها فى اكياس وييجو على نفسهم ويطلعوها قصاد الباب أو يدوسو ويضغطو على نفسهم اكتر وينزلو بيها الشارع أو يتعبو قوى ويرهقو نفسهم جدا ويحطوها فى أو على الأقل جنب صناديق الزباله ؟
أو يدفعو لعامل النظافه 3 جنيه فى الشهر قيمه الأشتراك والراجل يوميا والله بيجيي يشيلها
نقول أن النظافه من الإيمان وتظهر دراسه تقول إن 70% من الشعب مش بيغسل أيدة بعد الحمام
ولا قبل ما يعملو الأكل
نتوضى ونصلى 5 مرات لكن نبصق على الأرصفه
احنا شعب شكاى وبكاى
لا فعلا احنا ناس بنحب نشتكى ونبكى ونولول ... ودة بالنسبه لنا أسهل من اننا نحاول نغير
كل الدوله بتشتكى ان الزباله او "القمامه" دفنت الشوارع
كام فرد بقى حاول هو ينضف او كام شارع لم الزباله وحطها على عربيه أجروها بـ 5 جنيه وراحو رموها فى المقل
ب العمومى مثلا
حتى اللى بيكنس قصاد بيته بيلم الكناسه ويحطها جنب بيت جارة .... ههههههههه أو فى نص الشارع اللى قدامه ... قال يعنى نص الشارع التانى مش تبعه ومش هيجي منه ذباب وصراصير , يمكن المسافه تبقى بعيدة عليها او يجوز مش معاها تأشيرة توصلها للنصف الأخر من الشارع
وعلى أضعف الإيمان ... يحرقها
دة على أساس ان حرق الزباله نضافه

الثلاثاء، 9 فبراير، 2010

تخاريف أنفلونزا


وسط أرتفاع درجه الحرارة والدخول لمرحله الهلوسه
والبدء فى رؤيه أوهام بصريه وسمعيه وحاجات سودة منقطه أصفر طايرة جنب عينى
ودماغى قربت تسيح ودخولها نقطه الأنصهار الحرجه العليا
.
بين النوم واليقظه , رأيت فيما يشبه الأحلام ... أنبوبه بوتاجاز جايه تتهادى عليا من بعيد
وأننا ولعنا البوتاجاز ورجعنا تانى نشغل السخان
.
حاولنا نرجع للأصاله ونشغل الوابور ... ملقناش جاز
فيه خطه لمنع الجاز تمهيداً لأرتفاع سعرة ... لتر الجاز بقى بـ 2 جنيه ومخلوط مايه
نولع الوابور يهب فــ وشك
.
حتى علبه الكبريت الباكستانى اللى بنستوردة ونحطه فى علب كارتون من أنتاج شركه النيل لأعواد الثقاب
كل اما أولع عود يفرقع ويطير ... حتى عود الكبريت مش عايش عيشه أهله ومتوهم أنه قنابل عنقوديه

هو الأكل اللى بيطبخوة فى قناة فتافيت دة بياكلوة ؟
فيه ناس فيها قلب تاكل الأكل دة ... دة على أساس ان الناس لسه فيها صحه ومعدتها بتقدر تهضم ؟

مع أن انا اللى عيانه بس امى راحت عملت كوبايه ليمون سخن وسقتها لأختى ... ولما البت فضلت تصرخ انها مافيهاش حاجه ومش هى اللى عيانه ولاعايزة تشرب ليمون ... أتهمتها أنها مش عايزة تسمع كلام امها اللى عارفه مصلحتها أكتر منها
وكانت داخله على عقوق الوالدين لولا أن البت خدتها من قصيرها وشربت الليمون

الأحد، 7 فبراير، 2010

إلــى معرض الكتاب شدينا الرحال


شدينا الرحال إلى رحلتى السنويه الأكثر أهميه
معرض الكتاب
يوم الجمعه المرور كان ابن حلال وصلنا بسرعه انا واختى وهناك قابلنا ميرا ومصطفى ريان لفينا تقريبا المعرض كله ... بحثاً عن صالات فيها حفلات توقيع لناس أصحابهم هتتعمل تانى يوم السبت ... وشويه صالات تانيه وشوفنا اسعار كتب ترعب يعنى
والبت ميرا الله يكرم اصلها يعنى عملت أعلى واجب ومايه وعصير وحاجات حلوة وشيكولاتات بت عسل قوى يعنى
روحنا سور الازبكيه لقينا هيصه بقى وكتب الكتاب بجنيه ... أشترينا حمل كتب زى شروة البطاطا كدة ... الظريف جدا أنها كتب احسن مليون مرة من الجديدة وبتاعه دور النشر
وطبعات كويسه جدا وبحاله ممتازة وأدب عالمى مترجم وروايات رائعه وكتاب بنسمع أسمائهم فى البرامج الثقافيه بس
فى حين ان دور النشر كلها تقريبا كتبها عن الطهى ونصائح ليله الخرجه وانت والأبراج وكتب دينيه من جنسيات مختلفه ... المحترمه والموثوق بها فيهم قليل جدا
ودور النشر ذات الكتب القيمه .. تعدى من قصادها وتجرى لأن اسعارها بتلسع من بعيييد
خرجنا بعدها لوسط البلد وانتقاما من ميرا لأنها لففتنى المعرض كلها نزلتها رمسيس ومشيتها لحد ميدان التحرير ... قال بفسحها
تانى يوم السبت وهو كان اليوم المشهود بقى لأنه كان حفلات توقيع كتب مصطفى ريان صديقى واخويا والمبدع الشاب وحفلات توقيع تانيه لأحمد الصباغ وسحر غريب
اول ما دخلنا كان فيه شريف باشا عمدة كفر البلوجرز كلاته وكل سنه وهو طيب بمناسبه عيده الستين وعقبال كل عيد وهو بكل خير وصحه ومنور الدنيا بوجودة
قابلنا أسماء رمضان الصحفيه الرااائعه واللى اول مرة اشوفها وفعلا كان أكتر شئ فرحت بيه وسعدت له جدااا لأنها أنسانه قمه فى الذوق والرقه والرقى
شوفت واحدة مفروسه رغم أنى اول مرة اتعرف عليها , سلمت على أحمد سو , وداليا قوس قزح , حضرنا
عند الصباغ وسحر وبعدها روحنا لمصطفى واتصورنا كمان معاه
(الصورة ومش عايزة تريقه ... راعو يعنى انها واحدة مسافرة وبتلف فى المعرض بقى لها يومين ... هتبقى ايه غير كدة)
حد هيقولى مالك حاضنه قزازة المايه كدة ليه زى المحرومين هقول له دى عقدة من المايه يعرفها اللى سمع حكايتى معاها قبل كدة
بعدها لــ علاء الأسوانى وبلال فضل لأن شريف كان مهتم جدا يشترى كتبهم وعليها توقيعاتهم
بعدها كان الوقت بالليل ... وكنت سلمت النمر ورفعت الرايه البيضا من التعب والأرهاق وجمعت حصيله لا ب
أس بها من الكتب سلمت على الناس العسل اللى كانت موجودة ومشيت وانا فى أشد حالات السعادة البالغه البالغه يعنى
من الناس اللى زعلت بجد أنى ماشوفتهومش كانت دكتور بسنت واللى كنت بتمنى حقيقي أنى أشوفها وأقضى يوم معاها .
كتاب مصطفى ريان مذكرات رئيس سابق من الكتب اللى فعلا كويسه ومكتوبه بحرفيه وموهبه ظاهرة من مصطفى فى كثير من مواضيعه ... رأيي يا درش أنت عارفه الكتاب فعلا متميز وان شاء الله ينقلك نقله نوعيه ويكون بدايه لمجموعه من الكتب تعبر عن موهبه حلوة جدا جواك
وإن شاء الله المعرض القادم يكون لك برضه حفله توقيع وكتاب جديد وألف مبروك يا صديقى العزيز

الثلاثاء، 2 فبراير، 2010

مصلحه


خرجت لشويه مشاوير خلصت بدرى قولت اعدى على ماما فى الشغل ولو خلصت نروح سوا
دخلت لقيتها لسه بتقفل المكتب
...
ايه يا حاجه مروحه ؟
لا هروح اخلص ورق من المبنى التانى ... استنى هنا وانا 10 دقايق وراجعه ... مش هتأخر
اقعدى على مكتبى واقرا جرنال او مجله لحد ما اجى

قعدت وشديت الكرسى فى الشمس ومستمتعه بالجريدة وجانى فنجان قهوة كمان وإذ فجأة
سلام عليكم
وعليكم السلام
لو سمحتى يا مدام مطلوب أمضائك والختم على الطلب دة
طيب استنى 10 دقايق برة حضرتك
الراجل راح لف حوالين المكتب وجاى بيميل
أصل هقولك
طيب ارجع مكانك وانا هفهم اللى انت عايز تقوله
لا هوريكي الطلب بس
طب ارجع مكانك مناخيرك قربت تدخل جوة ودنى ... فيه ايه يا عم الحاج شويه وهتطلع على كتافى
الراجل رجع مكانه وهو امال يبرطم
عايز الحق الخزنه قبل ما تقفل
طيب اتفضل اقعد بس برضه 10 دقايق
ليه يعنى هو انت بتعملى ايه ... مانت بتقرى الجرايد ... مش هو دة الشغل اللى بتقبضى عليه مرتب
لا يا سيدى دة مش مكتبى ... الموظفه اللى هنا راحت المبنى التانى وجايه حالا .. من فضلك اقعد استناها
ولما هو مش مكتبك قاعدة عليه ليه
(وقعتك سودة )
معلش غلطه .. دقايق بس
ما تمضى انت وخلاص
يا سيدى انا لو مضيت على ورقك هيعملوة قرطاس ويلبسوة لك فى دماغك لأن ببساطه أمضتى ملهاش قيمه
وقف دقيقتين وبص فــ ساعته وصوته على
خلصونى الخزنه هتقفل ولو مادفعتش هتحبس .... عايزة فلوس ؟ قولى
تاخدى فلوس وتخلصى ورقى
حلو حلو حلو قعدت على مكتب حكومه 5 دقايق ولبست قضيه رشوة أو بمعنى أصح لبستها لأمى
لا مش باخد فلوس ... استهدى بالله واصبر
خلاص اى حد يمضى ويختم مش الختم قصادك اهو ... خلااااص أختمى
آآآآة بقى هى حكايه ختم
بصراحه عايزة اسكته ومش عايزة اى موظف يجيي على صوته لأن موظفين الحكومه تخصص خوازيق وخوابير واخاف اى حد يجيي يقاول الراجل ويلطع الختم اللى فـ عهدة أمى وتبقى الوليه دخلت السجن على حسى فى قضيه رشوه او اختلاس
لا والله ونعم العيال ... افرحى بخلفتك يا امه
طيب هات الطلب (امسكه وامال ابص فيه قال بفهم ) بس افهم ايه دى أمضائات بالأزرق والأحمر وأختام بالأسود والكحلى وقسايم دفع فوشيا ولبنى وصفرا
دى ولا زينه رمضان
بتعملى اييييه
الله مش براجع على الورق ؟ وبعدين انت مستعجل ليه لسه فاضل ساعه على المواعيد
الراجل دخل على نبرة استعطاف ويا مدام لسه فيه اجرائات تانيه والنبى من فضلك امضى
وبعدين ما يروح يشوف البلد اللى خلت الورقه لازم لها أمضائات 120 موظف على الأقل ولـ30 لطعه ختم لما الطلب بقى عامل زى الوان الطيف وأقرب شبهاً بحلاوة المولد
يا سيدى انت عايز امضه مدير عام ... ما تبص كويس دة شكل مدير والا نيله
وبعدين بصراحه انا مش موظفه هنا اصلا

امال قاعده هنا ليه
(عايزة اخلص منه)
دة مكتب ماما وهى جايه
ماما ؟ ليييه هى بقت حضانه وبيجيبو عيالهم معاهم
(الله يحرقك يا شيخ ) أسيب له المكتب واجرى دة والا ايه
يعنى يامى ماكنتيش قادرة تقفلى وتقولى لى غورى يا بت روحى وكنتى قفلتى مكتبك وريحيتنى من المصيبه دة
انتو شويه موظفين كذا وكذا وكيت وانا هروح اشتكيكي وهبعت فيكي شكاوى لقناة المحور
(ليه قناة المحور ... ما تخليها الجزيرة احسن .. هو انا قصفت بيتكم بالصواريخ يا حاج ؟)
انا هبلغ عنك للوزير الحمار اللى انت تبعه

عايزة اقوله ان الوزارة اللى انا تبعها هى الوزارة الوحيدة فى مصر اللى ملهاش وزير بس مش وقت استظراف دلوقت ومناقشه القضايا السياسيه والوضع العام فى مصر
المهم انى خلصت منه حتى لو كان رايح يشتكى
شويه وامى دخلت ....
منورة المكتب يا قطه
بأبتسامه صفراااا
تعيشى يا ماما .. طب انا همشى دلوقت أصلى افتكرت حاجه اجيبها
ألا قوليلي يا ماما ... هو انت فاضل لك قد أيه على المعاش

الأحد، 31 يناير، 2010

مصر بطل أفريقيا

.
هييييييييييييييييييييه ومصر بطل أفريقيا ... ودة كفايه
.

مش عارفه ليه مفتقدين الحماسه الفظيعه اللى كانت عندنا قبل ماتش الجزائر


ولا فيه اغانى وطنيه فى القنوات ... تقريبا بنحتفظ بيها ضد الأعداء العرب بس


لكن ربنا يستر لأن احنا عندنا عادة غريبه جدا


لما بننتصر قوى ... وبندخل منفوخين قوى ... بنخيب قوى


هزمنا الجزائر فى القاهره وكنا رايحيين السودان تحصيل حاصل وفجأة أحنا اللى طلعنا


وبما أننا خرجنا الجزائر بفضيحه فــ ربنا يستر علينا امام غانا

.
والمصيبه ان الثنائى المرح رايح انجولا ... والعيال دى نحس ووشها شؤم

.
أستر ياللى بتستر

الجمعة، 29 يناير، 2010

لقائات مدونين ... أم قعدات نمامين

كنا نبحث عن فضاء واسع نتشاركه
نتشارك الأفكار والحديث ... نتبادل الزيارات والتعليقات .. تنشأ الصداقات
مع الوقت لم نكتفى بكوننا شخصيات الكترونيه نختفى خلف أسماء مستعارة
كونا علاقات حقيقيه وصداقات فعليه ... مع من نرتاح له .. لشخصه .. لفكرة .. لعقله .. لأسلوبه .. لطباعه
سعدنا بمعرفه من نتوافق معهم بدرجه كبيرة واختار البعض اللقاء الرسمى لنتوج تلك الصداقه برؤيه حقيقيه للأشخاص ... كان الظن أن من أنشأ مدونه الكترونيه هو شخص على قدر من الوعى والمعرفه والرغبه فى معرفه الاخر ومشاطرته الأفكار وتبادل الأراء والنقاشات المحترمه
كان الظن أنه حين نجلس سويا سنكون أشخاص مختلفين ... عن أى قعدة مصطبه
لم يكن الظن أنهم سيكونون مجرد أشخاص يحكمو على بعضهم حسب تقولات غير مؤكدة
لم يكن الظن أنهم بعض أشخاص نمامين ماسكين سيرة نهاشين أعراض
تلقيت بعض أقتراحات من أصدقاء بالأبتعاد عن شخص معين لأنه غير جدير بالمعرفه وأنه يتلاعب بالبنات وأنه وأنه وأنه ... العديد من الصفات غايه فى السوء .... وهم لا يعرفونه أصلا
حسناً ... هذا الشخص المعين هو من أقرب أصدقائى ورغم شدة اختلافنا فى الأراء وشدة خلافتنا وتناقضنا التام فى الطباع لكنه صديقى ... وانا أدرى به منهم
هذا الشخص لم يخطئ بحق أحد منهم ولم يجرحهم
من كانت منكم قد تعرضت لأى أذى أو خداع من هذا الشخص ولديها ما يؤكد كلامها لترينى أياة ... من ينصب نفسه حامى حمى الفضيله وله الحق بمحاكمه الأخرين وأصدار القرارات والأتهامات بحقهم ... يروح يرشح نفسه
فى الانتخابات ... إن لم يكن لديهم بالفعل ما يدعم ويؤكد أقوالهم ... كان الأفضل لهم أن يضعو ألسنتهم بداخل أفواههم ويخرسو بدل ما يتقيئو على الناس ما لا يملكون عليه أى دليل ويوزعون اهانات وتجريحات مجانيه عليه وعلى الأخرين
كمااان مرة لمن لا يعقل او يفقه او يفهم , هذا الشخص صديق مقرب جدا ... بل أقرب أصدقائى وبمثابه اخ فعلى لى
وشخص محترم ومهذب وعلى خلق .... وأنضف مليون مرة من كتير من اللى ذكروة بالسوء
وإن كان هو لهذة الدرجه سيئ وترو انه انكشف فأنتم أسوء منه لكنكم لم تنكشفو بعد
كل واحد بقى يحترم نفسه ويلم لسانه والدنيا دوّل .. يوم تمسكو فيه سير الناس وبكرة ان شاء الله يوم تنفضحو انتو فيه وتلاقو برضه اللى يمسك سيرتكم
وإن فشلتم جميعا تكونو ناس محترمين يبقى لا داعى للأدعاء واقلبوها مصطبه وامسكو السير زى نسوان الحوارى

الخميس، 28 يناير، 2010

لماذا النقاب ؟


نقاب _ إسدال _ ملحفه
أسماء لنوعيه من الزى يرتديها عدد كبير من النساء
ولا اعتراض لدى حول ما ترتديه أى امرأة ففى الأول والأخر هذة فعلا حريه شخصيه وحسب رؤيه كل امرأة ووجه نظرها فى الأحتشام


لكنى اتكلم عن النقاب كــ زى
رداء أسود معدوم الملامح قاتم وكئيب

وقفه صغيرة قبل أن يقال لى لنحترم حريه من ترتديه المنتقبات كما نحترم حريه السافرات
انا لا أتطرق إلى هذة الناحيه
بمعنى ان لا يقال لى أنظرى الى ملابس الفتيات فى الشارع والكاسيات العاريات والحجاب الذى لا يغطى شئ
سفور السافرات او تبرج المتبرجات أو أى كانت نوعيه الزى فى ما يخالف شريعه الله ليس هو محور حديثى

كلامى عن الفرق بين الأحتشام والمبالغه فى الأختفاء

أعود من تلقاء نفسى إلى جملتى (رداء أسود معدوم الملامح قاتم وكئيب)

بالنسبه للون : فهو بالفعل أسود والأسود هو لون أسود أى أشد الألوان قتامه
من حيث كأبه اللون ( مفيش أسود فرايحي إلا السواريهات) لون قاتم معتم غامق ... أسود
معدوم الملامح : أرجو أن لا يتطرق الحديث مباشرة الى أقصى الطرف الأخر وهو المقارنه باللبس الضيق والقصير والذى يشف ما تحته وما يرسم جسد المرأة
هذة ردة فعل أتوماتيكيه فى التطرف ... كلامى عن الوسط

نوعيه الملابس المحترمه المحتشمه التى لا تخدش حياء رجل أو امرأة ولا تثير الغرائز

إذاً علام يدل النقاب ؟ ... هل هو شدة تدين ؟
ما الذى يجعل امرأة ترتدى كل هذا السواد وتختفى وراء كل تلك الكميه من القماش
فى ديانات قديمه وعصور أنبياء أخرين (منزّلين كلهم برساله إللهيه ويدعون لعبادة الله والألتزام بتعاليمه) لم يوجد فيها دعاوى بإخفاء المرأة بهذا الشكل
وفى المسيحيه المتدينه حيث ألتزام اقصى التعاليم تشددا واليهوديه ترتدى الراهبات رداء طويل فضفاض وتغطى رأسها وأحيانا رقبتها حتى صدرها ... لكنها لا تسدل ستار بينها وبين الناس

فى مجتمعات معينه يرغب الرجل فى أخفاء المرأة وتلوينها بالسواد لأنه يظنها فتنه وخطيئه ورفيقه للشيطان ... لا يرغب فى أن تنافسه او تناطحه أو تثبت أنها كائن مثلها مثله فيكفَنها فى السواد ويحرم خروجها ودخولها وتعليمها وعملها بل ويبيعها ويشتريها

فإن كانت المرأة نفسها مقتنعه بزيها وملابسها هذة وترى أن تعاليم دينها تأمرها بألا يظهر منها أى جزء ... فبناء على أى شئ كان أقتناعها هذا ... ماهى الأحكام والتشريعات

خلق الله البشر تجمعات ... جماعات من البشر تختلط وتتكلم وتتعارف وتتعاون
فمن الذى حرم الأختلاط فى العمل والمدارس

ربما يكون مرحب به فى وسائل المواصلات بسبب التلاحم والتلاصق الجسدى بسبب العدد المهول من البشر لكن ليس فى كل الدنيا الناس ملتصقه والأماكن مختنقه , فما الذى يجعل التعامل والكلام وتبادل الأراء محرمه مدام لم يحرمها الله وما الضير فى رؤيه الوجوة ؟

لماذا السواد فى وجود كل تلك الألوان بتشكيلاتها وتصميماتها
سيقال الألوان والملابس الجميله للزوج وأمام محارم ... بل تلك فى خصوصيه العلاقه الزوجيه وأسرار البيوت , لقمصان النوم والغرف المغلقه
لكن الملابس واختلاف الوانها واشكالها ما كراهتها مدامت فى حدود الأحترام والستر
ما حرمتها وكراهتها

سؤال بمنتهى البرائه وتفتح الذهن لمن كان عندة أجابه منطقيه
لماذا ترتدى المرأة السواد وتتشح به ... ما هى حرمانيه ان تحادث الأخرين جميعا نساءً كانو أو رجال ... ما الحرام فى أن يرى الأنسان وجه من يخاطبه ... ما سبب أن تعتزل المرأة الدنيا فين حين خلقها الله لتتعارف عليها وترى الناس ويرونها

انا لا أحلل حرام أو أحرم حلال ... ولا حتى أحلل حلال وأحرم حرام
فهذا شأنى أرعاة والدين له رب يحميه

فقط أتسائل : لماذا تختفى المرأة وراء ستار أسود

الخميس، 21 يناير، 2010

كوارث طبيعيه

أيها الأخوة الكرام
سافرت إلى قاهرة المعزّ
ومش زى الصعيدي اللى نزل مصر ... ماسافرتش عشان اشترى العتبه الخضرا طبعا
لأن دى اسماعيل يس سبقنى واشتراها من زمان ... وإن كنت حاطه عينى على شويه ميادين تانيه بس لقطه
نزلت زيارة وفسحه ولقاء بعض الأصدقاء والأهم طبعا عرض الكمبيوتر بتاعى على كبار أخصائيي علاج الأجهزة فى البلد
وصلت الجمعه عند اختى وحاسه طبعا ان تراب الأسفلت كله لزق فيا

شغلى لى يا اختى السخان عشان اخد دوش
الموتور باظ والمايه مش بتوصل غير بعد نص الليل

يعنى ايه ؟ أصلى انا والمايه الفجر حاضر لو عايزة اقابلها ؟
لالا مش للدرجه ... أدخلى نامى وعلى 7 الصبح كدة تقومى تاخدى الدوش
أمرنا لله
الصبح قبل ما أنزل ... عن اذنك هدخل بقى اخد الحمام
معلش يا صفاء بس المايه ضعفت والسخان مش هيسخنها
يعنى أيه ؟ مش ليا نصيب أقابل المايه النهاردة ؟
لا بس انزلى خلصى مشاويرك وأوعدك أما ترجعى تكون كل حاجه بقت تمام
أنزل ايه بس وانا حاسه انى متربه من مشوار امبارح
لالالا خالص انت بس بيتهيألك
نزلت وخلصت مشاويرى بل وأتغديت سمك فى مطعم الفاتورة بتاعته خلت السمك اتحجر فى معدتى قبل ما أحس أنه رجع على قيد الحياة تانى
وراجعه بقى على المغرب ولازم لازم أخد الدوش دة

والله المايه لسه مجاتش بس استنيها شويه على بعد العشا تكون رجعت
لييييه ؟ هى خرجت تتفسح والا حاجه ؟
أستنى لبعد العشا ان المايه تيجى ... أبدااا
أنتو يا بنتى لما تحبو تشربو أو لو أتجننتو وحبيتو تغسلو الهدوم بتعملو ايه
ترد بهدوء .. ولا حاجه بشغل الغساله 3 بعد نص الليل
طب مافيش شويه مايه مخزناهم نسخنهم على البوتاجاز
كل المايه اللى مخزناها غسلت بيها المواعين ومسحت بالباقى
انت هبله يا بت ؟ تحمى المواعين والبلاط وانا مش لاقيه ؟
ماهو انا كنت عامله حسابى على ما ترجعى تكون المايه طلعت
لا حول ولا قوة إلا بالله
وبائت كل محاولات أنتظار المياة بالفشل , لحد تانى يوم الأحد وجنابها لسه ماجاتش
واضطريت أنزل وأقضى شويه مشاوير وبعد المغرب قابلت أصدقائى ميرا ومصطفى ريان وقعدنا على قهوة فى وسط البلد وسلمت على مينا على السريع كدة لأنه كان مشغول ورجعت وكل اللى فى دماغى انى أفتح الدوش تنزل منه مايه سخنه
وتفتكرو لقيت ؟ أبدااااااااا لما كنت هتجنن ... معقول يعنى
طب انا بقى لازم اخد الحمام دة ولو حكم الأمر أخد مايه من التلاجه واسخنها على البوتاجاز وهى بقى تسهر جنب الحنفيه طول الليل لحد ما المايه ترجع من سهرتها
أصل هقولك ... الأنبوبه فضيت ... بس اوعدك الصبح هنغيرها وكمان تكون المايه جات
وقعتكو سودة معايا ... يا بنتى تعبانه ومرهقه ومش هقدر اسهر طول الليل مستنيه المايه المنحرفه بتاعتكم دى اللى مش بتدخل البيوت غير وش الصبح
والنتيجه انى نمت على كنبه الأنتريه مكانى وانا قاعدة مستنيه جنابها زى أى عيله يتيمه مستنيه بابا نويل
واصحى الصبح ...
معلش هى جات بس انت ملحقتهاش

طب لما تيجى سلميلى عليها
لا يا اختى حلال عليكى القعدة فى شارع الصومال دة ( السودان سابقا) وانا هروح عند خالى فى الهرم
(قال يعنى الوضع هناك أحسن )
بس هقول له أيه ؟ ... ازيك يا خالى , أزيك يا مراة خالى , الحمام فاضى ؟ عندكو مايه ؟
وعلى أيه كل الغلب دة ... بنااااقص
دة انا أروح بيتنا ويلعن أبو اللى يطلع من بيتهم

صحيح ... من خرج من دارة أتقل مقدارة

وأركب العربيه وإذ فجأه الأقى المايه .... بس مش فى الحنفيه ولا الدوش لااااااا دى السما بذات نفسها فتحت المخرات على دماغى طول 200 كيلو أخدتهم فى 6 ساعات لأن الطريق غرقان والعربيات بتتزحلق
دخلت بيتنا على قبل العشا ووالمصحف قاعدة فى العربيه بحلم ببخار المياه المتصاعد من المياة المتساقطه من الدش على دماغى
وأول ما عملته أنى جريت على الحمام ... والأقى أيييييه ؟
صــــــــــح ... المايه مقطوعه
يا عااالم ... يا هووو .... مصر كلها غرقانه والناس بتموت من الميه وانا بقالى 3 أيام بدور عليها ومش عارفه أقابلها زيها زى الوزرا وكبار المسؤلين
وانا مصممه لازم اخد الحمام دة ودونه الموت .... وفجأه أضائت الفكرة فى عقلى زى أرشميدس بتاع قوانين الطفو

ابن المحظوظه اللى كان فى بيتهم مايه وعارف يستحمى
هولع الـــوابــــور ... قولتها ولا كأنى جهاد ماسكه العلم وبصرخ وا آسلاماه

تطلع لى اختى التانيه (على فكرة قربت اكره العيال اخواتى دول)
الجاز خلص , أنت مستعجله ليه ؟ .... أستنى شويه دلوقت المايه تيجي
أيه الهدوء والبرود اللى الناس دى فيه ؟
على الساعه 8 كانت اعصابى فلتت وصوتى على ... ودخلو عليا لقونى ماسكه الدوش من زمارة رقبته وبعصر فيها يمكن تنزل مايه
بس الحمد لله ربنا كبير وكرمه واسع ... حضرت المياة وشوفتها بعينى ... آة والله
واشتغل السخان بل وغسلنا كمااان بعد كدة
واعدى قصاد التلفزيون الاقى خبر الأمطار والسيول والمحافظات اللى غرقت وكل اللى جه فى بالى وقتها ... أنى عرفت المايه كانت غايبه ومشغوله عنى ليه

الاثنين، 11 يناير، 2010

كرة النار


واحد أغتصب واحدة
شاب أو راجل أغتصب طفله
أى اجراء أو تصرف أو رد فعل طبيعي أيه ؟
هى طفله صغيرة وهو رجل عمرة 29 سنه معروف أسمه وعنوانه
فى أى بلد .. أمام أى قانون .. تحت أى حكم عرفى حتى , وبكل الأديان والملل والنحل
ما هى الأجرائات المتبعه ؟
نقول مثلا القاء القبض عليه ومحاكمته ؟
لكن ولأننا بنفكر من أى جزء من جسدنا عدا عقلنا طبعا
ولأن التعامل مع مشاكلنا بيكون بطريقه أرميها بعيد يمكن تخلص
أو كرة النار شوطها لحد ما تطفى لوحدها او لو مطفيتش تولع فى بيت الجيران ... لكن مش بيتنا
ولأن الطفله مسلمه والرجل مسيحي
فالقيادة الحكيمه والحكم الرشيد أستدعى لملمه الموضوع , وبلاش نكبر القصه أحسن النار تزيد
وبلاش نعملها فتنه طائفيه والأفضل أننا نكفى عــ الخبر ماجور , ونخلص الحكايه لحد كدة
والنتيجه ايه ؟
أطلاق النار فى الشوارع وقتل الناس فى ليليه عيد ... لأن ركن المشكله ودحرجتها بعيد مش حل
كانت النتيجه الطبيعيه ان كل واحد ياخد حقه بأيدة

أولا بقى الصعيد هو ناس زى اى ناس ... حكايه شطرى الأمه والأخوة الأقباط وشركائنا فى الوطن دى نغمه وأسلوب غريب جدا عننا لأن احنا ناس عايشين حياتنا ... عااااادى
مش بنفكر ان هذا شقيقى المواطن المسيحى وأنه شريكى فى الوطن ... مش بنفكر اصلا .
دة واحد او واحدة جيران او زملاء او شركا او اصحاب عمل .... ناس ... احنا ناس .
لما بنتفرج على البرامج ونسمع التصريحات بنستغرب جدا
لأن الكلام كله بيصب فى النهايه إلى أنه يرسخ فكرة ان دة مش جارك او زميلك ...
لا .. دة المواطن القبطى الذى يتمتع بحق المواطنه وشطر الأمه الآخر وأهل الذمه
هروله المسؤلين لزيارة الأنبا كيرلس والمنافقه والمداهنه تقول ببنط عريض
أن هذة البلد تأوى شعبين ... أنكم شعبين
شعب مسيحى وشعب مسلم ويجب عليهم التعايش ( ليس العيش ) لكن التعايش
كأنها هدنه أو مهادنه طويله الأجل يجب على أحدكم تحمل الآخر

منذ اعوام طويله وحين انتشرت الجماعات المتخلفه وسيطر العنف على مناطق كثيرة من محافظتنا وكان تبادل اطلاق النار أو حظر التجول طقس عادى ومعتاد وحتى حين تقع مشاكل تسمى ( طائفيه ) فأن الحل الأمنى الأمثل فى التعامل ( غفلقها على الكل ) ومعنى الغفلقه هى حاجه زى طينها على دماغهم
حظر تجول (على الجميع ) القاء القبض العشوائى (للجميع) التشدد فى التعامل والقسوة فى تطبيق الأجرائات (على الجميع) حبس الجميع فى بيوتهم بالأيام دون حتى الخروج للأسواق او السماح بشراء رغيف العيش
هنا ... لا فرق بين مسلم ومسيحي ... فسياسه التأديب تطبق على الجميع
عشان لما يتقرصو يعقلو وياخدو بالهم بعد كدة من أى تصرف


أحداث طائفيه ... أحداث عنف طائفى


هو حاله احتقان بين اصحاب ديانتين او طائفتين مختلفتين يسودها مناوشات مستمرة وكراهيه متبادله وعدم تقبل للأخر بل رفضه تماماً تتطور الى تخزين أسلحه وتكوين ميليشات وعمليات قتل ممنهجه و قدر عالى من التنظيم يرأسه شخصيات مؤثرة وذات ثقل وتحريض مباشر ومستمر
هذا هو مفهومى البسيط والمتواضع للمصطلح المرعب الرنان الذى يتشدقون به وكأنه لبانه ومجرد كلمات
لكن ان عيل مسيحى يصاحب بت مسلمه او واد مسلم يغوى بت مسيحيه او حاله حب وجواز او شويه عيال صيع بيعانو من الفراغ يقومو على بعض وشويه ضرب وتكسير كام كرسى تتحول بقدرة قادر الى أحداث طائفيه على أيدى وسائل الأعلام المصريه والعالميه وتصويرنا على أن الصعيد المصرى على حافه الأنفجار ويوشك على الأنقسام وان اى اتنين صعايدة واحد مسلم والتانى مسيحي هيقابلو بعض هيقطعو بعض دى تفاهه وهيافه وسخافه وعبط وتحويل أنتباة عن حاجات كتير أكبر وأهم
فعلا أى مشكله بين أى مسلم ومسيحى بتكون عاديه جدا كــ معاكسه بنت او خلاف على علاقه ما او حتى جرس كنيسه بيكونو شويه شباب أصغر وأهيف من ان حد اصلا ياخد باله منهم

سؤال مهم
هل الشرف والثأر له يستدعى حصد الأرواح بالألى فى الشارع وعشوائياً لمجرد الأنتقام لأن المغتصب مسيحي ؟
هو المفروض ان بنات المسلمين يغتصبوهم بس الشباب المسلم ؟
فى الحاله دى يبقى عمل حلال بل وفرض عين على شباب المجاهدين ؟
على أساس ان جحا اولى بلحم تورة ؟

السبت، 9 يناير، 2010

.
سؤال سخيف ألقته علىّ ... صفاء أيه الشعر الأبيض اللى مالى شعرك دة
لم أستسغ سؤالها ... ولم أرد عليه أيضاً

بل نظرت الى المرآة .. إلى عدة أعوام مضت وبضع احداث مؤلمه متلاحقه .
أثناء تصفيفي لشعرى أمعنت النظر بتلك الخصل البيضاء التى انتشرت بين ثنايا شعرى ... ليست شعرات بيضاء متهالكه كـ الموجودة فى الشعر الأشيب
بل خصل بيضاء فضيه شديدة اللمعان والحيويه ايضاً ... تنتهى أطرافها التى لم تفقد لونها تماماً بلون أحمر وبرتقالى نارى ... بينما عمرى لم يتجاوز الخامسه والعشرين بعد .

أستيقظت على صرخات أمى فى السابعه صباحا تقريبا
أول ما أنتبه وعيىّ وأستيقظ عقلى عليه صرخاتها المتتاليه " جوزى مات "
وقبل ان نصحو انا وشقيقاتى وجدنا انفسنا نركض من باب البيت الى الشارع يصلنا صوت عمى باكيا منتحباً بأن " أخويا مات " لنجد أبى ملقى على الأرض رأسه ورقبته حتى كتفاة مختفيه تماماً أسفل السيارة ,
لا حركه لا صوت , ولا حتى تأوه
فيما كان يرفعها على الكوريك راقداً أسفلها إنكسر الكوريك فجأة وسقطت فوقه السيارة
لتحتجزة بين الجنط وفراغ العجله وعمى بجوارة يحاول سحبه بلا جدوى فــ السيارة نصف نقل تزن تقريبا طنين عليها حمولتها كامله بما يوازى طنين أخرين لكنه يحاول حتى تمزقت عضلاته وكاد ظهره أن ينكسر
أُطلق صرخات متلاحقه لمنظر أبى فى جلباب سمنى فاتح لا يستوعب عقلى لما هو غير ملطخ بالدماء ... ولماذا الأرض حوله لا يسوء ترابها أى بقع دم
أنظر إلى شقيقتى الصغيرتين ... اجد اكبرهم تجلس على الأرض أمام أبى لا تنطق بينما الأصغر منكمشه بجوار حائط عاجزة عن الحركه
إلى أبى ... لا زال ملقى بلا حراك
عمى وأمى يحاولان بيأس أن يرفعا السيارة وسط بكائهم الذى فهمت منه أنه اول ما سقطت السيارة فوق "أبى" أستغاث بعمى قائلاً " الحقنى يا اخويا ... غيتنى " قبل أن يصمت تماماً
كل هذا فى ثوان أو دقائق لم ينقطع خلالهم صراخى بأسمه لحظه واحدة ... صرخات هيستيريا متلاحقه لمشهد مرعب ... بينما السيارة تواصل هبوطها ببطء وهدوء لتنغرس فى الأرض ساحقه أبى تحتها ... لم اكن أصرخ حزناً كما انه لم يكن عويل ... ولم أذرف قطرة دمع واحدة
تيقنت أنها قتلته ... لكنى أصرخ ليأتى من يرفع السيارة ويسحب ابى من تحتها
لو لم يتجمع عدد كافى ليحاول فهى سوف تفصل رأسه عن جسدة حتماً
أى اتصال بالنجدة او المطافى او أى جهه قادرة على رفعها هو مجرد وقت ضائع
فــ اللعينه لا تنتظر وتواصل السقوط

عشرات الرجال كانو شبه عاجزين عن هذا لأنه كما يقال "ساعه القدر يعمى البصر" ... السيارة لم تكن فى شارع واسع بل فى مخزن جانبى تبيت به واتساعه لا يتجاوز عرض السيارة ونصف متر من كل جانب , لا يستوعب العدد الكافى القادر على رفعها ... ولا نعرف سبب واحد دعى ابى كى يقوم بأجراء أى أصلاحات بها فى هذا الوقت المبكر وهذا المكان الضيق ولا كيف سمح له العقل والمنطق برفعها والرقود تحتها بينما عليها كل تلك الأحمال

تجمع كل رجل وشاب قادر على تقديم المساعدة لكنى كنت عاجزة عن التوقف عن مواصله الصراخ خصوصا بعد ان تجمعت النسوة ورأيت فى وجوههم تعبيرات غريبه بينما يتصعّبن ويمصمصن شفاهن قائلات " يا عينى جلال مات " أمام شقيقاتى اللاتى أحتلت ملامحهن كل الرعب والصدمه وحاله خرس تام زادت منه تلك الكلمات
ما هذة البلاهه والقسوة والغباء منهن ... واستعدت اخريات للمشاركه بالصراخ على سبيل المجامله وواجب العزاء

أختى التى كانت تجلس أمام أبى صامته باكيه قامت فجأة لتقول " بطلى صراخ ... بابا عايش "
ربع ساعه كامله قبل ان يتمكنو من رفع السيارة وسحبه من تحتها ... حى ...
فى معجزة إللهيه لم يصدقها كل من رأها او سمع بها
كُسرت عظام الترقوة ومعظم ضلوعه ... لكنه خرج من تحتها فى الوقت المناسب قبل ان تسحقه بأسفلها

حملوة الى داخل المنزل بين تيقن وشك بأنه مجرد وقت قبل أن يلفظ أنفاسه ووسط ترقب جاراتنا ليقوموا بالمطلوب من ندب وولوله ما أستدعانى وشقيقتى الى طردهم ... فيكفينا ما يجرى بدون أى محاوله أضافيه لتدمير أعصابنا ونفسيتنا وأخراجنا من ديننا كذلك

قبل أن يفتح أبى عيناة ... وينطق , لنلتقط أنفاسنا ونسمح لأنفسنا بالبكاء
وأمام أصرار امى اتصلنا بالأسعاف التى حضرت بعد دقيقتين بالضبط لتحمل أبى الى المستشفى العام الخالى من أى أى أى شئ ولم تجرى له حتى كشف بالأشعه بل ولم يجدو بها طبيب
لكنها كانت السابعه ونصف صباحاً ولا يوجد مكان نلجأ له سواها

وقفت امام السيارة ... أرمقها فى كراهيه وبغض , كرهتها حقاً واشتطت منها غضباً ...
ربما لـ أفرغ ذلك الانفعال الرهيب ... حتى أننى ضربتها "بالشبشب"

حين عاد أبى إلى المنزل كان الخبر أنتشر فى البلدة كلها ,
لكنه الخبر الأول .. قبل التصحيح
وقبل ان ينتصف النهار وصلت نصف المدينه مقدمه واجب العزاء لأبى

الذى استقبلهم شخصياً "ليتقبّله "