الأربعاء، 17 فبراير 2010

أكتشاف مذهل

الناس العلماء الله يسترهم ويعمر بيتهم حلو اللغز اللى ماكانش بينيمني لا ليل ولا نهار وريحو عقلى اللى كان قرب يشت من كتر التفكير فى يا ترى يا هل ترى توت عنخ أمون مات ازاى مات ازاى مات ازاى
حئيئي حئيئي كنت هتجنن أخر حاجه واعرف يا ترى هو مات فى رحله سفارى والا وهو بيعمل دايفنج
ولأن الفاضى يعمل قاضي واللى معاه مال يحنى ديل جحشه

فالأخوة الأفاضل العلماء قضو عمرهم فى البحث والتحرى عشان يكتشفو فى الآخر ان الأخ الفاضل برضه جلاله ملك مصر المعظم توت عنخ أمون مات بالملاريا ... واحد الله يرحمه من أكتر من 3000 سنه ولسه العالم شايل همه مات ازاى ... طبعا عشان هو سايب وراه شئ وشويات وكان غنى زيهم وورثو منه كام زلعه دهب
والملك رمسيس الله يرحمه هو راخر مات لأن كان طالع له دمال تحت ضرسه دة كمان اكتشفناه بعد رحله بحث وتحرى طوووويله
لكن لما بنى أدم ... بشر فى وسطنا دلوقت فى عصرنا المنيل دة يندبحو وهما نايمين ... لما 11 كائن بشرى يندبحو ويتمثل بجثثهم مش مهم يعرفو ماتو ازاى

ولحد دلوقت مجزرة بنى مزار محدش حلها .... أصلهم كانو صعايدة فقرا ولاد كلب يولعو
ولحد دلوقت بنقفل علينا الأبواب بسلاسل حديد وأقفال عشان منندبحش واحنا نايمين
وعشان هشام طلعت مصطفى هو هشام طلعت مصطفى فدة عشان خاطر عيونه يتغير القانون والا حتى تتلغى عقوبه الأعدام من القانون كله ويتحاكم بقانون جديد ونفصل له على مقاسه
ماهو توت عنخ مصطفى او هشام طلعت امون عالم أغنيا زى بعض وملوك
لو ماتو نفضل نحلل ماتو ازاى ولو قتلو ماعلش نظبط لهم قانون
ويطلع لنا زاهى حواس كولومبس يقول لنا كيف مات الفتى الذهبى ... او الملك الذهبى
طب يا عم الحاج الناس الطيني اللى زينا لما يموتو أو بمعنى أصح لما ينقتلو مدبوحين وغرقانين ومحروقين مش مهم حد يعرف ماتو ازاى او ليه ؟
وعليه قررت الأتى
********************
لما أموت هبقى أسيب للدوله سلسلتين وغويشه وحلق أو هحطهم فى زلعه واعمل لهم خريطه وأبعتها المتحف البريطانى

هناك 19 تعليقًا:

سلوى يقول...

اهو انت دايما كده
متسرعه ومش عارفه اللي هيحصل

يا بنتي افهمي

ان شاء الله بعد 3000 سنه الناس هتحقق في الموضوع
وكل واحد هياخد حقه

وهيتعرف مين مات وازاي مات
الله يعني يا صفاء
مش كل شئ بأوان
الصبر يا بنتي كلها كام سنه

اما هشام
والست آمال عثمان عماله تفكر وتغير

فده حكايته معقده فعلا
ما علينا
كل واحد على اد فلوسه بقى

صفــــــاء يقول...

3000 سنه 3000 شهر
اهو برضه الواحد يعمل حسابه
وعشان يموت وهو مطمن ان حقه هيوصله
يبقى يسيب تمنه
وانا هسيب للدوله زى ما قولت بالظبط واهو كل واحد على قد دمه
السلستين والغويشه والحلق وكردان ستى الله يرحمها

وهشام باشا الست امال فكرت وخططت وعيرت فعلا وهتفجر المادة 3 من القانون اللى حوكم على اساسها على اعتبار انها لا تتضمن عقوبه للمحرض
بس هو اكيييد أداها اكتر من كردان امه وخلخال سته

ENG./ELSAYED,PMP يقول...

الكلام ده مش مظبوط ( وش بسكسوكة ومولع بايب )

توت عنخ امون ... وعلى فكرة ده مش اسمه الثلاثى ... ده اسم الدلع ... ماهو مفيش ملك اسمه توت يا جماعة ... وإلا العيال ف الشارع كانوا يبقوا عاملينه مسخرة

عايز اقول ان توفيق مات ف حادثة موتسكل ... دبرتها ليه مراته توتة

لانها لقت ع الموبايل بتاعه مكالمات بالساعات مع توتة تانية

الخيانة يا صفاء

لعن الله الخيانة

وبعدين همه مكنوش فاضين زى ما انتى متخيلة

همه بس بيحاولوا يقفلوا المحضر

لان دى فلوس ناس

خواطر شابة يقول...

هههههههه
شر البلية ما يضحك والله لكن اللي أعلن عنه زاهي حواس واللي بيقوم بيه العلماء ده علم ومجهود سنين يشكروا عليه الحاجات التانية المنيلة بستين نيلة مش ذنبهم ايه ذنبهم في ان الامن ميقومش بدوره وان التحقيقات متجبش نتيجة مش ذنبهم يقول تعالى "ولاتزر وازرة وزر أخرى"

صفــــــاء يقول...

الباشمهندس ابو منعم
*********************
أسمح لى اقوم انا بدور د/ واتسون
بس يا شيرلوك هولمز يا عزيزي توته ماكانتش على علاقه بالواد بتاع الموتسيكل
والأبحاث التاريخيه قالت انها كانت ماشيه مع واحد بتاع معرض تأجير سيارات وهو اللى كانت بتجيب من عندة كل العربيات اللى بتطلع فى التشريفه قصاد الملك ... وسمسرتها محفوظه
وعليه فـهى كانت مستفيدة من الملك وهو عايش اكتر مما وهو ميت بالدماميل وصريع كاوتشات الموتسيكلات
كمان توفيق الله يرحمه كان على علاقات متعددة ومعقدة بالعديد من اجهزة المجمعات الاستهلاكيه وبيستورد لهم فراخ مضروبه ولحم ديناصورات
وممن الخيانه تكون من اى جمعيه منهم
غلط المحضر يتقفل بسرعه كدة ... التأنى مطلوب
عشان تقدر نوصل للحقيقه

--------------------

خواطر شابه
************
حبيبي معاك فى الجهد والعرق والأبحاث لما نتوصل لحقيقه مهمه عن الفراعنه
او نكتشف مكان مقبرة ثريه مجهوله او خرائط تدل على معبد ما
لكن وحياة رحمه اخناتون الغالى مافى اى فايدة ولا لازمه ولا قيمه لأكتشاف
أن الملك تويتي مات بالكوليرا او الملاريا
بالظبط زى ما الكتكوت تويتى اكله القط بتاع الجدة أو أى قط غريب

استراحة محمد يقول...

لو الدنيا كملت خمس تلاف سنة كمان وانا طبعا مش متوقع ان احنا نوصل 2050 لكن هنفترض ان الدنيا هتفضل خمس تلاف سنة كمان
هتلاقى فى عالم بيعمل ابحاث عشان يتوصل للخلل العقلى اللى حصل للناس فى الالفية التانية لدرجة ان سموا فيلم بنات وموتسكلات

فتاه من الصعيد يقول...

حقد طبقي على فكره

وكمان غل منك يا صفاء ع الراجل اللي اسمه توت ده

ده غلبان ومريض يا عين امه نفرتيتي :)

عموما لو حطيتي حتتين دهب في زلعه بعد عمر طويل جداااااااااا ... ابقي بلغيني فين هتخبيهم

تحياتي

sal يقول...

صفاء
والله انت وكل اللى كتبوا تعليقات
اكثر من رائعين
""""
شكرا انك نبهتينا على حكاية الزلعة
واللى فيها....

الاحتياط واجب
""""
ياترى بعد الف سنه حييجى ناس وتسأل

هو الخشب البلوط اللى بيصنعوا منه كراسى الحكام والملوك والامراء فى بلاد العربان كليتها بيعيش كام سنه
الحامض النووى حيقول
يووووه هو الخشب فيه حامض نووووى

"""""""""
تحياتى وتقديرى

حنان سعيد يقول...

على فكره يا صفاء انت غريبه اوووي
دلوقتي انت مش لسه بتقولي بعد 3000 سنه عرفو يا حرام توت مات ازاي
وهو ايه يادوب توت
تخيلي بقى هيخدو وقت قد ايه عشان يعرفو الناس الي اكبر من التوت قد ايه
طبعا انت متجنيه عليهم
والظلم وحش خلي بالك
وماشي انا معاكي في انك تسيبي حتتين الدهب دول بس ماتنيس بردو تختار اسم كويس وتلحقي تغيري اسمه يعني خليكي عنبه..لمونه
حاجه تتاكل وتكون صغيره كده عشان مايخدوش معاكي وقت
:)

أحــوال الهـوي يقول...

هناك نظريات حول وفاة المغفور له توت و اليوم حسم الامر و قبضوا علي حفيدة الناموسة اللي سببت العدوة و اعترفت تفصيليا بالحادث علشان يعرف كل من تسول له نفسه بارتكاب جريمة في حق الكبار انه القصاص لابد منه حتي من احفاده

و بالنسبة لجريمة بني مزار فالدولة عملت البلد مزار يجي الناس يتفرجوا ع الاهالي اللي قافلين علي نفسهم بالسلاسل و الا تحبي نغير اسم البلد لبني سلاسل ؟؟
بطلوا نفسنه بقي طلعت ان شاء الله هيطلعت من السجن لانه كان بيدافع عن الفحولة المصريه اللي اتبهدلت برفض بنت تميم

تحياتي

حلم بيعافر يقول...

اعوووووذ بالله
بطلوا قر ع الرجل بقى
ده مات وشبع موت
ههههههههه على فكرة انا تاريخ وممكن يبحثوا اسباب موتى بعد مااموت

بسنت يقول...

ههههه
والله هم يضحك وهم يبكى

مش قادره اقول حاجه لانى خلاص اتخنقت من حكومتنا الغير نظيفه بالمره والى كله فيها وسطه وحسوبيه

انا يأست يا بنتى خلاص
والدهبات هبيعهم وارتاح

عايش... ولكن !!!! يقول...

اغوز بالله عليكى
حتى فى دى قر وحسد
دا الراجل مات وشبع موت حرام عليكى
هو ايه شبع موت دى؟؟؟؟
هو حتى فى الموت شبع ... مش عارف بصراحه لو تعرفى عرفينى

صفــــــاء يقول...

أستراحه محمد
***************
ممكن فعلا بعد الفترة دى نكون قدرنا نتوصل للحقيقه العلميه وراء تسميه الفيلم بهذة التسميه
يالا .... ربنا يقدرنا ونقدر نتوصل للسبب العلمي

منور يا محمد

---------------------

فتاة من الصعيد
****************
حقد طبقى بلاستيك والا ميلامين ؟
أصلى مش بحب اكل حقدى فى اطباق رخيصه

ياستى افهمى ... الدهب دة مش ليكي
دة عشان المحققين اللى هيحققو فى اسباب وفاتى بعد 4000 سنه من دلوقت
اقولك انت على مكان الزلعه لييييه

واحشتينى والله

صفــــــاء يقول...

sal
*****
ربنا يكرمك دة من ذوقك
هما اللى عندى اصلا ناس عسل عسل والله
وكلهم بلا أستثناء ذوق ورقه وخفه دم
وحضرتك طبعا منهم بس والنبى عايزة أسم أكلمك بيه لأنى مش عارفه حتى الحروف دى أختصار لأيه
كماااان مرة ... الزلعه مش ليكم ... محدش يطمع فيها
الحمض النووى لكراسى الحكام العرب أثبتت الأبحاث انه بيحتوى على نوع غامض من اللاصق الذى يتفاعل مع كرموسومات متشابه له لا تتوافر الا فى اجساد الحكام ... ومع الوقت بيبقو الاتنين واحد

----------------------

حنان سعيد
************
لا طمنتينى الله يطمنك
يبقى باقى جرايم ووفيات مصر هتنحل على 6000 سنه بالكتير خالص ونرتاح من القلق ووجع القلب
انت بنت حلال وطيبه وبتحبى تنورى الناس على فكرة فى ما يجهلونه
ربنا يخليكي للتراث العلمي الحضارى
هحااااول أخفف شويه من ظلمى وتجنيا
وبالنسبه للنصيحه هخلى أسمى سنيه خوخه ... يمكن وقتها أبقى مهمه وخفيفه فى الهضم

صفــــــاء يقول...

أحوال الهوى
************
وياترى الناموسه اللعينه دى هتحاسب وتحاكم ازاى؟
ضربا بالمنشه والا رشاً بالفيلت ؟
ومتخافش باقى الناموس والحشرات فعلا خدت عبرة وعظه ومش بتقرب لجنابهم خالص
ومكتفيه بمص دمنا احنا ... قال يعنى ناقصين
احنا بقى فى بنى مزار هنخلى الأسم هو هو بس التطوير فى أنها هتبقى مزار لكل السياح ييجو يتفرجو على أخر مواطن فينا فاضل على قيد الحياة
ومش بعيد نعملها محميه طبيعيه
هشام تقريبا قتلها عشان مابيعرفش ... وخاف من الفضيحه

----------------------

حلم بيعافر
************
أصلى واحدة حقودة ... تقول فيا أيه
القلوب السودة اللى زيي مش ممكن تنضف إلا بقطنه مدام نظيفه
حاضررر يا تاريخ ... سيب لى وراك قد 100 الف جنيه وأوعدك هقتلك بحثاً ودراسه ... وكله بتمنه

صفــــــاء يقول...

بسنت
******
لاااا يا دكتور ... أعترض
دى حكومه نظيفه جدااااا
بدليل انها عملت تطهير ورش للمنطقه اللى انقرص فيها الملك توت وردمت المستنقع اللى كانت عايشه فيه الناموسه
وسيبى الكردان اللى فـ صدرك يا سحر
ماحدش عارف الزمن فيه أيه يا أوختشى

--------------------

عايش... ولكن
***************
قر على ايه ... على مرمطه الراجل وتشريحه بعد 3500 سنه
وهاتو الموميا شيلو الموميا حلل حامض نووى ارقعه كام رسم أشاعه
واعتقد أنه شبعان موت على أساس انه استحلى الموته ومش راضى يقوم

بحر الالوان يقول...

مش لازم يعرفوا اصل وفصل الراجل .... وامه مين وابوه كان فين ..... احنا في بلد مركزية وكل شئ لازم يبقي خاضع للقانون ...... وكتر خيره زاهي حواس .... جاب لنا قرار الراجل .

اما اللي بيموتوا في العبارات والمجازر .....الخ ...... دول بالنسبة للدولة حاجة كده .... خير اللهم اجعله خير ..... اسمها ساقط قيد .

تحياتي

صفــــــاء يقول...

بحر الألوان
***********
وبعد ما عرفنا قرارة
وأصل وفصل اللى جابو أمه وأبوة
دة أفادنا بأيه
أوقات بحس ان فيه أنواع من المعرفه ملهاش قيمه
أهى معرفه والسلام ...