الثلاثاء، 9 فبراير، 2010

تخاريف أنفلونزا


وسط أرتفاع درجه الحرارة والدخول لمرحله الهلوسه
والبدء فى رؤيه أوهام بصريه وسمعيه وحاجات سودة منقطه أصفر طايرة جنب عينى
ودماغى قربت تسيح ودخولها نقطه الأنصهار الحرجه العليا
.
بين النوم واليقظه , رأيت فيما يشبه الأحلام ... أنبوبه بوتاجاز جايه تتهادى عليا من بعيد
وأننا ولعنا البوتاجاز ورجعنا تانى نشغل السخان
.
حاولنا نرجع للأصاله ونشغل الوابور ... ملقناش جاز
فيه خطه لمنع الجاز تمهيداً لأرتفاع سعرة ... لتر الجاز بقى بـ 2 جنيه ومخلوط مايه
نولع الوابور يهب فــ وشك
.
حتى علبه الكبريت الباكستانى اللى بنستوردة ونحطه فى علب كارتون من أنتاج شركه النيل لأعواد الثقاب
كل اما أولع عود يفرقع ويطير ... حتى عود الكبريت مش عايش عيشه أهله ومتوهم أنه قنابل عنقوديه

هو الأكل اللى بيطبخوة فى قناة فتافيت دة بياكلوة ؟
فيه ناس فيها قلب تاكل الأكل دة ... دة على أساس ان الناس لسه فيها صحه ومعدتها بتقدر تهضم ؟

مع أن انا اللى عيانه بس امى راحت عملت كوبايه ليمون سخن وسقتها لأختى ... ولما البت فضلت تصرخ انها مافيهاش حاجه ومش هى اللى عيانه ولاعايزة تشرب ليمون ... أتهمتها أنها مش عايزة تسمع كلام امها اللى عارفه مصلحتها أكتر منها
وكانت داخله على عقوق الوالدين لولا أن البت خدتها من قصيرها وشربت الليمون

هناك 21 تعليقًا:

سلوى يقول...

خير ان شاء الله
مش تقلقي خالص
الوابور بيكون نصره خصوصا لو جه بين اليقظه والمنام

أما الجاز بقى فمش عارفه
ممكن يكون خير بس على حسب
هل كان مخلوط بميه ولا لأ

وبعدين كله كوم وان اختك تشرب الليمون السخن كوم تاني والكبريت كمان مش صناعه صيني
كده خيانه للصين بجد وتقصير منهم


سلامتك صفوء كل ده تهييس ثم ايه اللي دخل فتافيت والأكل في الموضوع
يالا ليس على الأنفلونزا حرج

بجد سلامتك والله
وقلت لك قومي ارتاحي مش بتسمعي الكلام
قومى الله يهديكى

sal يقول...

ربنا يعديها على خير ان شاء الله
بس لى ملاحظة لو سمحتى
ارجوا ان تكتبى كام بوست وانت فى الحالة عشان البوست دمه خفيف
والحلم دا كله خير
بس اعملى كمادات
ههههه
اتمنى لك الصحة والعافية

ENG./ELSAYED,PMP يقول...

شوفى ... على الحالة اللى انتى فيها دى ... أتنبألك بأنك ... هتصحى الصبح ... تلاقى الهرم ف الغردقة ... ونهر النيل ... تحت السرير

البنفسج الحزين يقول...

ههههههه
أولا ألف سلامه عليكي ...
بس حلوة قوي الليمون السخن اللي مامتك شربته لأختك وهي شربته عشان متدخلش في عقوق الوالدين ...
وبعدين الأنابيب في المنام(في الوقت ده من السنه حيث هي أصلا شاحه) دنيا ...أو تقدري تقولي خير هتتكسي ...

فتاه من الصعيد يقول...

هههههههههههههههههههههههه

الف سلامه يا جميل

بس مين عيان ... انتي ولا ماما ولا انبوبه البوتجاز ولا اللمون السخن ؟

تحياتي

خواطر شابة يقول...

سلامتك من الانفلونزا ربنا يشفيك
بس تصدقي دمك خفيف وانت عيانة انا اضم صوتي لصوت sal وأطالبك من هذا المنبر ان تكتبي كام بوست وانت في الحالة دي أكيد حيكونوا تحفة واحنا والله محتاجين ننسى الهم شوية
ربنا يعجل بشفائك حبيبتي

Sherif يقول...

الف لا بأس .. ربنا يزيح عنك كل شر

اما عن أثر الليمون فى هذه الايام فلو كان الأمر بيدى لزرعت مركب كيميائى فى كل السحب يجعل السماء تمطر ليمونا وياحبذا لو كان محلى بالسكر .. ليمونادة يعنى

سلامتك

أحــوال الهـوي يقول...

تخاريف ليمون

الاول حاجه سوده بتطير من الشرق للغرب
و بعدين وابور مهبب و بوتاجاز مسرب و كبريت معنقد
و الحرب العالميه التالته قامت لان سعادتك لحتضنتي فيروس الانفلوانزا
ناقص تفرضي حضر التجول و تطلقي صفارات الاتذار

نامي يا صفاء شويه و الدنيا تبقي حلوة

و بلاش تشربي الميه اللي في الجاز

الف سلامة ليكي و ان شا الله بتوع برنامج فتافيت

تحياتي

mostafa rayan يقول...

صفاء طب انت كان ايه موقفك وانت شايفاها بتشرب الليمون للسليمه وسايبه العيانه ؟
هههههههههههه
سلامتك من كل شر يا جميل

حاول تفتكرنى يقول...

لو عايزة الاصالة بجد ، يبقي مش وابور الجاز ، فالوابور ترف وكماليات فى هذا الزمن ، ايه رأيك نرجع للكانون ، يعني قالبين طوب وحبة حطب ومشيها

اقولك
اشربي ليمون


الف سلامة

استراحة محمد يقول...

لو صفاء كملت البوست هتكتب كده
قلتله وسع شوية اتخنقت .. قالى اعملك ايه كوكب الارض صغير .. ماما ما سكتتش طبعا وعصرت ليمون عالشربة عشان الليمون مفيد جدا للشوربة .. اختى شافت المنظر صرخت .. الانبوبة بتولع .. الجيران سمعوا وما حدش اتحرك .. حفد ان احنا عندنا انبوبة من اساسه.. احنا فى زمن المسخ رة

hasona يقول...

السلام عليكم

هو عطاء واحد فقط
تختار بين انفلونزا الطيور ولا أنبوبة الغاز الطبيعي
والواضح ان مفيش حاجة أصبحت طبيعية
وكل شئ عامل انقلاب

والأهم ان الخوف من عقوق الوالدين يجعلنا نطيعهم طاعة عمياء

صفــــــاء يقول...

سلوى
*****
ربنا يخليكي ليا يا قمر
ولا انحرم من سؤالك عليا
وفعلا الصين مقصرة جدا من هذة الناحيه
ازاى تسيب سلعه تجاريه هامه زى اعواد الكبريت بدون ما تتدخل فيها
الله يسلمك يا قلبى

-------------------

sal
*****
شكرا لسؤالك عنى
بس انا لو كنت كملت كتابه بالحاله دى كنت دخلت على اللاتيني
لأنى وفعلا كنت تقريبا بخرف من السخونه هههههه
ولازلنا نقاوم الأنفلونزا ببساله
الله يسلمك

--------------------

باشمهندس سيد
*************
وحياتك كنت قربت اوصل للمرحله دى وماكنش فاضل غير 100 كيلو عن سفاجه وبعدها الهرم يبتدى يبان من بعيييد

صفــــــاء يقول...

البنفسج الحزين
****************
تخيلي بقى ان دة فعلا اللى حصل
وبابا كان هيفطس من الضحك وهو شايف امى اماله تحايل اختى عشان تشرب الليمون عشان تخف بسرعه
وفى الآخر بقى البت فضلت بر الوالدين عن محاوله أقناعها انها السليمه مش العيانه
والأنابيب ازمه وتنحل إن شاء الله ... بس الصبر ... 10 سنين كمان

---------------------

فتاة من الصعيد
****************
العيان انا والمستعجله عشان الشغل امى واللى شربت الليمون اختى
والأنبوبه فى الحلم نصرة بإذن الله
الله يسلمك يا قمر

---------------------

خواطر شابه
***********
يا حبيبي لو كنت كلمت كتابه بالحاله دى كنت بقيت فى المعتقل رسمى
لأنى وانا عيانه النزعه السياسيه عندى بتعلى قوى ... تقريبا بيتهيئ لى ان الدوله هى المسؤله عن عيايا
وتستحق المهاجمه بس الحمد لله السخونه بتروح والواحد بيرجع لعقله بسرعه
الله يسلمك وشكرا على امنياتك الطيبه

صفــــــاء يقول...

شريف
******
هو دة ... سحب من الليمون الساخن وانهار من عسل مصفى
وأبار حلبه ساخنه
ودرجتين حرارة كمااان وأوصل لجنه الخلد
الله يسلمك يا عمدة ولا أنحرم من سؤالك عنى

---------------------

أحوال الهوى
*************
هع هع هع هع
أهو دة تعليق خلانى ضحكت لحد ما شنقت وكحيت ودى اعراض الضحك عندى وانا عيانه
وبعدين انا ماحضنتش فايروس الأنفلونزا عيب ... دة هو اللى جه حضنى وانا كنت فـ حالى
حظر التجول بعمله فى الصاله قصاد أوضتى و2 متر من كل جانب فى محيطها
وصفارات الأنذار بتدوى قصاد اى حد يحاول حتى يقولى سلامتك لأنى ببقى مكسرة ومش طايقه حاجه
حاضر يا دكتور ... هنام ... تفتكر فيه أمل ؟
الله يسلمك الف شكر على السؤال

----------------------

مصطفى ريان
************
يا درش الوقت كان صبح وامى أتاخرت عن معاد الشغل وقلقانه على بنتها العيانه فعملت الليمون ودخلت أى اوضه وصحت أى واحدة من بناتها تسقيها الليمون وخلاص بقى ... هى الست هتقطع نفسها
وفضلت اضحك لماااا زهقت
الله يسلمك يا درش

صفــــــاء يقول...

حاول تفتكرنى
***************
انت بتقول فيها ؟ البيت اللى جنبنا لقيناهم فوق السطح وعاملين كانون وبيحرقو كتب المدرسه بتاعه العيال (على أساس انها ملهاش لازمه يعنى والعيال كدة كدة مش فالحه فى التعليم) وبيطبخو عليها عشان يعملو الغدا بعد الأنبوبه ما وصلت 30 جنيه وبرضه مافيش
الله يسلمك شكرا على سؤالك

-----------------------

أستراحه محمد
**************
وقتها يا محمد كنت قربت فعلا اوصل للحد دة ولو زادت السخونه شويه كمان كنت هتلاقيني بقول ان المجرة دى مالها ضاقت كدة ليه ومابقتش حامله البنى أدم وشويه الكواكب اللى معاه
اسكت بجد على الأنبوبه ... 30 جنيه ومش موجودة
شكرا يا محمد على سؤال وماتغبش تانى

--------------------

أستاذ محمد
************
هى مش أنفلونزا طيور ولا خنازير
بس دور معتبر ... وفى وسط الهلوسه كان أمل حياتى ألاقى أنبوبه بعد ما بقى الجيران بيقضو سهرتهم بيها فى المستودع طول الليل ولحد الفجر مستنينها توصل
تخيل جملتك الأخيرة دى صحيحه بشكل غريب لدرجه انى وقفت قصادها كتير
شكرا لسؤالك وحمد الله على السلامه

فتاه من الصعيد يقول...

انا جايه اسال ايه اخبار البرد ؟

يا رب تكوني بالف خير يا صفاء :)

تحياتي

صفــــــاء يقول...

الحمدلله يا قمر النهاردة كدة اقدر اقولك ياااادوب خلى عندة دم وسابنى لحالى
الف شكر على سؤالك عنى
وربنا يديم الخير

ENG./ELSAYED,PMP يقول...

حمدلله ع السلامة

بحر الالوان يقول...

الف لا بأس عليك .... وتقومي بالسلامة ان شاء الله .

تمنياتي بالشفاء

حصان المرجيحة يقول...

هو لسة في ناس بتحلم
انا اظن انها كلها كوابيس ههههههههه
متفائل صح ؟
تقبلي مروري