الأحد، 7 فبراير، 2010

إلــى معرض الكتاب شدينا الرحال


شدينا الرحال إلى رحلتى السنويه الأكثر أهميه
معرض الكتاب
يوم الجمعه المرور كان ابن حلال وصلنا بسرعه انا واختى وهناك قابلنا ميرا ومصطفى ريان لفينا تقريبا المعرض كله ... بحثاً عن صالات فيها حفلات توقيع لناس أصحابهم هتتعمل تانى يوم السبت ... وشويه صالات تانيه وشوفنا اسعار كتب ترعب يعنى
والبت ميرا الله يكرم اصلها يعنى عملت أعلى واجب ومايه وعصير وحاجات حلوة وشيكولاتات بت عسل قوى يعنى
روحنا سور الازبكيه لقينا هيصه بقى وكتب الكتاب بجنيه ... أشترينا حمل كتب زى شروة البطاطا كدة ... الظريف جدا أنها كتب احسن مليون مرة من الجديدة وبتاعه دور النشر
وطبعات كويسه جدا وبحاله ممتازة وأدب عالمى مترجم وروايات رائعه وكتاب بنسمع أسمائهم فى البرامج الثقافيه بس
فى حين ان دور النشر كلها تقريبا كتبها عن الطهى ونصائح ليله الخرجه وانت والأبراج وكتب دينيه من جنسيات مختلفه ... المحترمه والموثوق بها فيهم قليل جدا
ودور النشر ذات الكتب القيمه .. تعدى من قصادها وتجرى لأن اسعارها بتلسع من بعيييد
خرجنا بعدها لوسط البلد وانتقاما من ميرا لأنها لففتنى المعرض كلها نزلتها رمسيس ومشيتها لحد ميدان التحرير ... قال بفسحها
تانى يوم السبت وهو كان اليوم المشهود بقى لأنه كان حفلات توقيع كتب مصطفى ريان صديقى واخويا والمبدع الشاب وحفلات توقيع تانيه لأحمد الصباغ وسحر غريب
اول ما دخلنا كان فيه شريف باشا عمدة كفر البلوجرز كلاته وكل سنه وهو طيب بمناسبه عيده الستين وعقبال كل عيد وهو بكل خير وصحه ومنور الدنيا بوجودة
قابلنا أسماء رمضان الصحفيه الرااائعه واللى اول مرة اشوفها وفعلا كان أكتر شئ فرحت بيه وسعدت له جدااا لأنها أنسانه قمه فى الذوق والرقه والرقى
شوفت واحدة مفروسه رغم أنى اول مرة اتعرف عليها , سلمت على أحمد سو , وداليا قوس قزح , حضرنا
عند الصباغ وسحر وبعدها روحنا لمصطفى واتصورنا كمان معاه
(الصورة ومش عايزة تريقه ... راعو يعنى انها واحدة مسافرة وبتلف فى المعرض بقى لها يومين ... هتبقى ايه غير كدة)
حد هيقولى مالك حاضنه قزازة المايه كدة ليه زى المحرومين هقول له دى عقدة من المايه يعرفها اللى سمع حكايتى معاها قبل كدة
بعدها لــ علاء الأسوانى وبلال فضل لأن شريف كان مهتم جدا يشترى كتبهم وعليها توقيعاتهم
بعدها كان الوقت بالليل ... وكنت سلمت النمر ورفعت الرايه البيضا من التعب والأرهاق وجمعت حصيله لا ب
أس بها من الكتب سلمت على الناس العسل اللى كانت موجودة ومشيت وانا فى أشد حالات السعادة البالغه البالغه يعنى
من الناس اللى زعلت بجد أنى ماشوفتهومش كانت دكتور بسنت واللى كنت بتمنى حقيقي أنى أشوفها وأقضى يوم معاها .
كتاب مصطفى ريان مذكرات رئيس سابق من الكتب اللى فعلا كويسه ومكتوبه بحرفيه وموهبه ظاهرة من مصطفى فى كثير من مواضيعه ... رأيي يا درش أنت عارفه الكتاب فعلا متميز وان شاء الله ينقلك نقله نوعيه ويكون بدايه لمجموعه من الكتب تعبر عن موهبه حلوة جدا جواك
وإن شاء الله المعرض القادم يكون لك برضه حفله توقيع وكتاب جديد وألف مبروك يا صديقى العزيز

هناك 24 تعليقًا:

sal يقول...

ربنا يوفقك

بسنت يقول...

السلام عليكم يا صفاء
صحيح والله اللقا نصيب

انا المفروض كنت ارجع من القاهره بكره الاتنين بس حصلت ظروف فى الشغل ورجعت النهارده وشفت ردك

وتصدقى انى كنت فعلا فى الميعاد اللى خليت صحبتى بعتتهولك فى نفس الاماكن
لولا ان بوابه 6 كانت مغلقه ودخلت من بوابه 4 ( انا اديتها كمان الباس ورد بتاعتى علشان تكتبلك الرساله وانا بالفعل فى مصر- لو ما عرفت تكتب رساله من عندها لان الرسايل ما رديت تفتح معايا قبل السفر على الفيس بوك )

ورحت يا ستى فى دار الشروق
وحضرت حفله توقيع الاعلامى الجميل خيرى رمضان بالدار المصريه اللبنانيه
الغريب جدا انى اشتريت كتابين مصطفى ريان ومحمد الغزالى لما عرفت انهم هيوقعوا فى نفس اليوم الى هو السبت بعد ساعه من وجودى بالدار- فرجعتلهم ووقعولى كتبى- يعنى انتى غالبا رحتى بعدى بحاجه بسيطه - دار اكتب -- بس خيرها فى غيرها ان شاء الله

ان شاء الله تكون كانت رحله موفقه ليكى
لانى استمتعت بها جدا لولا انى لم استطع رؤيتك ورؤيه صديق مدون أخر

دمتى بكل الخير

mostafa rayan يقول...

يارب اكن اول تعليق بقي

mostafa rayan يقول...

تعليق تانى
ايه ماحدش يكلم مدونتى صديقتى العزيزة يعنى البيت بيتى واخد كامل راحتى

----------
بس ايه يا جماعه هو انا اللي متصور جنب القمر ده ؟ ده لازم بقي الناس تحسدنى علشان حوزت على الفرصه الهايله دي
بجد يا صفاء انا فرحان قوي باليومين دول اللي كنا فيهم فى المعرض سوا ومعانا ميراوالاستاذ شريف
وطبعا انا مش محتاج اقول انك كنت نوراه الحفله وقمرها وقد ايه حضورك فرحنى قوي وحضوركمان حد زي الاستاذ شريف فرحنى قوي قووي
وطبعا بردو مش محتاج اقول انك من اكتر الناس اللي بتشجعنى على الكتابه وكان التشجيع ده حتى من قبل ماافكر انشر كتاب وكان كل نشاطي منحصر فقط في المدونه كنت دايما بتتدخلى تسألينى ع الشغل الجديد وكنت من اكتر الناس اللي ساعتدتى وشجعتنى اثناء وبعد نشر الكتاب
ولسه لحد دلوقتى بتشجعينى وبتقفى جنبى
وطبعا مهما اقول عنك ميهكفى بس انت اكيد عارفه .. لك كل المحبه والود يا صديقتى واختى العزيزة

mostafa rayan يقول...

تعليق تالت براحتى بقي
بس يا صفاء انت كنت بتفسحي ميرا انا كان ذنبي ايه بقي في الفسحه دي ؟
يلا ميرا بردو بنتنا ولازم نفرجها على معالم القاهره العامرة
هنتظر رأيك عن اعترافات الرئيس السابق
ولك ولميرا ولاستاذ شريف كل المحبه والود يا احبتى واصدقائي الغالين جدا

خواطر شابة يقول...

جميل سردك كأننا كنا معك كتابات بلال فضل تعجبني كنت قرأت له كتاب قلمين
دمت في رعاية الله

حنان سعيد يقول...

اده تعرفي اني مضايقه اوووي :(
انا كنت في المعرض يوم السبت
واكيد كنت هبقى مبسوطه خالص لو شفتك :)
وشوفت كمان المدونين الي بحهم جداا
كل سنه وانتي طيبه
وعقبال كل سنه كده ان شاء الله
بس اشوفك المرات الجايه طبعا :)

فتاه من الصعيد يقول...

ايه العثل دي .... اموره يا صفاء :)

حمد الله ع السلامه .... ومبروك الكتب

تحياتي

أحــوال الهـوي يقول...

المعلومه المفرحه ان معرض الكتاب رغم انه فاتني فسور الازبكيه موجود طول السنه
يعني المعرض الدائم للغلابه اللي زي
مبروك لمصطفي ريان
و العمده حبيب الملايين

و مبروك ليكي ازازة الميه
و الاسماء الرائعه اللي انتي قابلتيها ناس محترمين و شخصيات هايلة

كل سنه و انتي طيبة
و تلاحظي انا ما اتريقتش
تحياتي

Sherif يقول...

الصور جميلة ورائعة والحمدلله عرفنا نجامل مصطفى لانه يستاهل كل خير

يوم جميل وان كان قصير لكننا استطعنا ان نلتقى بمعظم من نحبهم

قزازة المية فعلا اعطت للصورة بعدا آخر وخصوصا ان البوست اللى قبل اللى قبله كانت المية مقطوعة ..!!!

فهمت ان هذه المرة عملتى حسابك

كل سنة وانت طيبة

صفــــــاء يقول...

sal
****
ويوفقك يا رب

صفــــــاء يقول...

بسنت
******
وعليكم السلام يا دكتور
بأمانه ربنا فى قمه الزعل أنى ماشوفتكيش
لأنى والله الساعه 2 ونص بالدقيقه كنت عند بوابه 4 و5 اللى عند صلاح سالم لكن قدر الله وما شاء فعل
ويمكن يدخر لنا لقاء آخر عن قريب وفى مناسبه تكون أحلى إن شاء الله
أستمتعت جدا جدا جدا باليومين اللى قضيتهم فى المعرض
وخصوصا أنهم كانو مع أصحابى وأعزّ وأحب الناس لقلبى
لا تتخيلى بجد مدى فرحتى واحنا بنلف على الصالات ودور العرض ولما نتعب قوى تبقى فرشه أكل وعصير والله كانو يومين رائعين
بإذن الله منتظرة لقاء آخر يكرمنى ربنا ونتقابل

صفــــــاء يقول...

مصطفى ريان
************
مدونتك وبيتك ومطرحك ولو تلزمك اتفضلها والله ما تغلى عليك
انت يا مصطفى من أحسن الناس وأقرب وأوفى وأخلص الأصدقاء واللى ماعرفكش ولا صاحبك خسر كتير
وربنا عالم ان غلاوتك من غلاوة محمد اخويا
أكيد كان لازم أجيلك وافرح لك واشاركك فى نجاحك اللى انت تستحقه
والله يا واد يا درش انت ربنا شايل لك عندة حاجات حلوة كتير إن شاء الله تكون كلها من نصيبك وابقى انا صديقه للروائى والأديب واحضر حفلاتك ولقائاتك بس الاول احضر فرحك
فعلا كان يومك حلو قوى وكنت عريس ومنور زى البدر والسعادة اللى على وشك لوحدها تسعد أى قلب
ميرا بقى كنت بفسحها وانت كمان امال يعنى أجى ولا اتعبكم معايا ؟
دى تيجيى يعنى ؟
الف مبروك يا مصطفى ومن نجاح إلى آخر بإذن الله

صفــــــاء يقول...

خواطر شابه
*************
ان شاء الله إن شاء الله تزورى مصر وتحضرى معانا المعرض وتستمتعى بأجوائه الرائعه وتقابلى كمان كل كتابك المفضلين ونحتفل بيكي معانا

صفــــــاء يقول...

حنان سعيد
***********
لا فى دى يبقى انا اللى متضايقه
كان المفروض انزل بوست انى رايحه المعرض وياريت كل اصحابنا المدونين اللى هيكونو موجودين اليوم دة لو ظروفهم سمحت نتقابل مع بعض هناك
لكن حصل خير وإن شاء الله نتقابل على خير وتلفى معانا لحد ما رجليكي توجعك
وهكون اكتر من سعيدة بلقائك

صفــــــاء يقول...

فتاة من الصعيد
****************
عثل انت والنبى عثل
رافعه معنوياتى دايما ... مين يشهد للعروسه
بس متحاوليش .. كنت مرهقه جدا ودة افضل شكل قدرت اتوصل له هههههه
الله يسلمك يا قمرة

صفــــــاء يقول...

أحوال الهوى
*************
يا دكتور والله العظيم كانت امنيه انك تكون موجود معانا اليوم دة
لأنى قابلت كل أصحابى وأقربهم لقلبى ماعدا سلوى
يعنى القعدة كانت نقصاكو انتم الاتنين
ان شاء الله السنه الجايه تحضر وتعمل زى باقى الشعب وتيجي معانا السور ونشترى شروة كتب زى شروة الشمام كدة بس أرخص طبعا
ونجيب كام كتاب من ابو فلوس كتير دول لأنه مجبر اخاك لا بطل
نتيجه احتكار بعد دور النشر لكتب معينه ومهمه
قزازة المايه كل اللى يشوفنى يلقينى حضناها ولا اللى هربانه من الجفاف
كل سنه وانت بكل خير
وتشكر على عدم التريقه ... دة العشم منك برضه

صفــــــاء يقول...

شريف
******
جناب حضرة صاحب العيد وعمدة كل كل المدونين
فعلا مصطفى يستحق كل خير
وكان من اجمل الايام بجد
قزازة المايه دى هى الحاجه الوحيدة اللى خلتنى انزل الصورة التانيه مع البوست
لأنى فوجئت بيها وماكنتش اعرف انى اتصورتها اصلا غير لما مصطفى بعتهالى وكنت عايزة امسك فـ رقبته
دة منظر يرضى ربنا تنشرة ... بس لقيتنى قافشه فيها قوى وانا نفسى استغربت شكلى
ربنا يخليك دايما ونتشرف بتواجدنا معاك وتواجدك بينا

بحر الالوان يقول...

والله المعرض محظوظ ان كان فيه كل الناس الحلوة دي ....... بس انا معاكي ان سور الازبكية جامد وياريت ما يبقاش للكتب بس .... لو كل سلعة لها سور كده الحياة هاتبقي تمام .

حمد الله علي السلامة

شفـقــة و إحســــان يقول...

يا سلام على النشــاط يا حنان
ناس شدت الرحال من المنيا
لفت المعرض بقالها يومين
وحضرت حفلات توقيع
وإشترت كتب
وإزازة ميه
وإتصورت كمااااان
يا محظوظة
يا بختك

ناس تانية ممكن تتمشى من بيتها لأرض المعارض
ولا راحت ولا جت ولا عملت حاجة
- تنهيده -

إحسان السماوي

صفــــــاء يقول...

بحر الألوان
************
تعيش يا معتز وإن شاء الله السنه الجايه يكون لك كتاب فيه بيجمع مجموعتك القصصيه المتميزة
تخيل فكرة سور إزبكيه لكل شئ فى حياتنا فكرة جامدة جدا ... بس هتقسم الناس أكتر ما هى متقسمه

صفــــــاء يقول...

شفقه وإحسان
*************
أعوذ بالله
حرام عليكم دة انا رجعت من هناك تعبانه ومضحضحه وعندى صداع
فيه ايه بس , مش كدة
دة السماوى جنبك ملاك
دة انا واحدة صعيديه غلبانه بجرى على كتب وكمبيوتر ونت
هلاقيها منين والا منين

نورتنى يا عم الحاقد

حاول تفتكرنى يقول...

كنت ازور المعرض كل ايام انعقاده منذ كنت فى الصف الاول الثانوي وحتى تركت مصر ، تقريبا 17 سنة

يوميا بعد لمدرسة ، أو بعد الكلية ، أو بعد العمل فى كل مراحل حياتي

لو سالني احدكم اى أقصي خسارة لمن يعمل خارج مصر ، ساقول لكم أنه لا يحضر معرض الكتاب ، خاصة أن كان له هناك تاريخ طويل

تمتعوا به فأنتم تستحقون هذه المتعة

تحياتي

صفــــــاء يقول...

حاول تفتكرنى
*************
تخيل أنه طقس ثابت عندى بقى له حوالى 12 سنه
بس كنت بروحه انا وامى او اختى
أول مرة السنه دى أروح مع أصحابى
وعموما ربنا ما يقطع لك عادة وإن شاء الله السنه الجايه تحضر معانا

سلامى لك