الجمعة، 13 أغسطس، 2010

تدوينه


أول رمضان منذ بضع وعشرون سنه

النصف الأول من الثمانينيات . نفس الجو قائظ الحرارة ورائحه الرطوبه الخانقه
أطفال لا يتعدى عمرهم الست والأربع اعوام
هذة هى انا وأخى الصغير نلعب فى الشارع وقد أنتهينا من تمزيق كتبنا المدرسيه لصناعه زينه رمضان
الوقت تعدى منتصف الليل , وامى تنادى بصوت مرتفع علينا كى نصعد لننام
من هذا الذى يصعد للنوم فى مثل هذا الجو بل ويترك كل تلك الأثارة والمرح واللهو فى شوارع كانت شبه فارغه من السيارات رغم امتلائها بالمارة
تنادى على أبن خالى الكبير كى يجلبنا لها , نصرخ ونركض فى كل الأتجاهات
هيهات ... هو طويل القامه واكبر منا بكثير
يقبض علينا ويحملنا اليها ... يتدلى كل واحد منا تحت ذراعه صارخين منتفضين .. حقيقاً لا نرغب لا فى الأستحمام ولا فى النوم بل نريد ان نستمر فى اللعب بضع ساعات آخرى

أقف فى الشباك نصف مستيقظه أنتظر عودة أبى ... فقد ذهب بالسيارة قبل الفجر ولم يعد بعد .
انام مكانى فى انتظار عودته

فى الصباح الباكر توقظنا أمى لنذهب الى بلدة أبى ... لنفطر هناك مع جدى وجدتى وأعمامى

أبى يجهز الخضار والفاكهه التى سنأخذها معنا ويتذكر أنه لم يشترى القاطيف بعد

امى تجهز ما سنأخذة وبعض الغيارات لزوم الشقاوة واللعب فى الطين

قريه صغيرة تقبع فى حضن الجبل الغربى تجاورها قريه البهنسا الأثريه حيث دفن عدد من الصحابه فى معارك الفتح الأسلامى
نصل لنجد جدتى لأبى جالسه على الأرض وأمامها مخروط ثلاثى من أعواد حطب جافه سميكه تنصبهم وتعلق بينهم (قربه) تخض فيها اللبن تصنع منه السمن والباقى يصبح جبن قريش
قابعه فى صمت متشحه بالسواد ذات وجه صموت ملامحه جامدة
تحرك القربه حركه رتيبه أليه فى ذهاب وأياب بمعدل ثابت وفى صبر بالغ
طيله حياتى لم أستطع تمييز ملامح جدتى ولم اعرف ان كانت سعيدة ام حزينه او حتى غاضبه
نادرا ما سمعت صوتها تتحدث
دائما ما كنت أراها اما تخرج الماشيه نهارا او تحلب جاموستها أو تطعم طيورها
لكنها أبدا لم تكن تشارك فى حديث او تسامر جارة

اجلس بجانبها .. احاول مساعدتها , امسك القربه واحاول خض اللبن فتتحرك بعشوائيه وتتخبط جوانبها تنهرنى بصمت ... أقوم واحاول اللعب بعيداً عنها مع بعض بطات صغيرات خرجن من البيضه منذ أيام قليله
أضعهم فى حله الماء فى محاوله لتعويمهن .. تصرخ فى خفوت انى سأقتل البط
يحملنى جدى بعيدا .. يدعونى للعب مع العنزات فهم ملكى
نعم فقد أخرجو مصروفى الذى أدخرة فى حصاله خشبيه صنعها لى النجار واشترو لى به عنزة (عشار)
وقد انجبت أثنين ... هم ملكى أذن ويحق لى اللعب معهم

بعد الأفطار يحل الظلام سريعاً ... فى تلك القرى وقتها لم تكن الكهرباء قد دخلتها بالكامل وما أن يؤذن المغرب حتى يحل ظلام داكن غريب له ملمس قوى وحضور وحتى رائحه مميزة
يخرج بنا عمى ليحضر بعض قناديل الذرة ليقوم جدى بشيها
مين اللى معاك دول يا رضا
دول ولاد اخويا جلال أصلهم جايين يفطرو معانا النهاردة
هاا ولاد البندريه ؟

فقد كانت أمى هى ابنه البندر التى خرج أبى من عبائه أمه واختيارها لأبنه اختها عروسه له ليتزوجها
نحمل اعواد الذرة الجافه نلعب قليله بشعر ناعم ذو لون أشقر يخرج من رؤوسها
لتبديد جو من الصمت وبعد محاوله فاشله لتشغيل التليفزيون حيث لم يكن بث قناته يصل الا مشوشاً رديئاً قام والدى بتشغيل الردايو وقام بتوصيله على بطاريه السيارة لينساب صوت الشيخ سيد النقشبندى مولاى أنى بـ بابك قد مددت يدى

رمضان هذا العام ... أقف فى المطبخ استمع الى صوت النقشبندى وهو يبتهل رائعته العذبه ذاتها
لا أشتم رائحه رمضان فى الجو ولا استمتع بثرثرة امى مع أقاربها
ولا محاولات جدى شى الذرة ... ولا أرى جدتى الصموت ذات الوقار تجلس جلستها المعهودة تقوم على خض الزبد .... فقط أرى ابن أخى يلهو على مشايته فى محاولات فاشله مستمرة منذ شهور فى السير بمفردة
اختى تجلس على مصليه تقرأ بعض الأدعيه ... وأبى يتلو القرآن بصوت جميل ... ليس رائع ولا شديد العذوبه لكنه رائق .. أمى تقول بنبرة متصعبه .. كيلو الفستق بـ 74 جنيه وكيلو اللحمه وصل 60 حتى الطماطم بقى الكيلو بـ 3جنيه ونص
(تدوينتين نشرتهم اول رمضان منذ عامين .. لكن رغبت فى نشرهم مدمجتين سويا هذة المرة)

هناك 25 تعليقًا:

أحــوال الهـوي يقول...

من ابدع ما قرات عن رمضان
انسيابيه اخذتني من الحاضر الي غياهب الماضي اري و اشم و المس الامس بكل عفويته و براءته

هكذا فعلت اقصوصتك الجميلة بي

سرد متسلسل بتناغم بديع
و فجاة سقط الواقع في طريقي وايقظ في ان واحد كل ما ألفته و تمنيته قد اصبح سراب و انقشع
و اليوم بكل وحدته و خوائه كان هو من يصرعني


سلمت يداكي و عودا حميدا

رمضان كريم

تحياتي

صفــــاء يقول...

دكتور ... وكالعادة تعليق بديع منك ومجامله ولا أروع
أشكرك عليها بشدة
لكنها مجرد ثرثرة صيام وفضفضه

أشكرك على الزيارة والتعليق ورقه المجامله

كل سنه وانت طيب

د.آيه يقول...

ههههههههه
جميلة أوى يا صفاء
تدرين عندما يبدأ تعليقا ما بنثل هذه الضحكة !! يدل على ماذا ؟؟؟
يدل على حالة السعادة و الانسجام التى أوصل بها الكاتب القراء ..
لاء بجد حلوة
الظاهر انك كنتى شقية كمان و أنتى صغيرة
و الصور حلوة .. لو القرية بتاعت بباكي دي عايزة أروح مرة عندكم

mohamed ghalia يقول...

فكرتينى بأيام زمتن مع انى معشتش الأيام دى هههههههه
بس بحب أسمعها
كل سنة وانتى طيبة ياصفاء

صفــــاء يقول...

د/آيه

تدرين ماذا يعنى انك ضحكتى ؟
انى سعيدة جدا انى كتبت شئ عجبك

شكرا لك كمان مرة يا قمر وربنا لا يحرمنا من زيارتك
كانت بلدة أبى منذ حوالى 30 عاماً الأن هى أى شئ الا تلك القريه الجميله البسيطه كثيفه الزراعات
أصبحت مجرد ارض جرداء تم تجريفها لزرع مبانى

تنورى وربنا وتزيدى الصعيد نور

صفــــاء يقول...

محمد غاليه

وكل سنه وانت طيب يا كاتبنا الجميل

هى مش قديمه قوى يعنى ... لكنها بالنسبه لى ذكريات جميله

بحر الالوان يقول...

ذكريات جميلة ... فالاجواء الرمضانية قديما كانت تنطق بالسعادة والعفوية .

كل سنة وانت طيبة .... ورمضان كريم

Hesham يقول...

اولا كل سنه وانتى طيبه وان شاء الله رمضان بعد عشرين سنه تانيين تفضلى تكتبى كتابات جميله برضه

حلمى البعيد يقول...

ازيك يا صفصف يا قمر
كل سنه وانتى طيبه يا حبيبتى
ايه الغياب ده كله بتوحشينى

كلام جميل جدااا ومميز اوى عن كلام كتير قرأته عن رمضان والايام الجميله دى

تسلمى يا حبيبتى

فتاه من الصعيد يقول...

كويس ان رمضان رجعك للتدوين يا جميل :)

وحشااااااني موووووووووووت

رمضان كريم عليكي يا رب

sal يقول...

رائعة والله
حمد الله ع السلامة
وكل رمضان وانت بالف خير
ما زال الامل قائما ان نشتم رائحة رمضان
فى الجو ...بس ساعات ما نبقاش واخدين بالنا وواخدنا الحنين للماضى الجميل

رمضان كريم
تحياتى

فتافيت يقول...

كل سنة وانتي طيبة يا صفاء
رمضان كريم يا قمر
جميلة اوي التدوينة بجد
كلنا مش حاسين برمضان على فكرة

همس الاحباب يقول...

رمضان كريم
كل سنة وانتى طيبة
رائعة جدا تلك التدوينة
من بين سطورها احس باننى ما زلت فى قريتى وعبق التاريخ وليالى رمضان الجميلة فى ذاكرتى
اختلف الحال كثيرا وتبدلت الشقاوة باشياء اخرى
واصبحت المدينة بكل انوارها وزينتها كابوس واشتاقت الانفس الى ليالى رمضان القمرية
تحياتى

مصعب صلاح يقول...

كل عام وانتم جميعا بخير
رمضـــــــــــان كريـــم

سلوى يقول...

كل سنه وانت طيبه وبخير وصحه وسعاده

رمضان بقى غير :)

Beram ElMasry يقول...

أجمل التهانى بحلول شهر رمضان المبارك أعاده الله عليكم باليمن والخير والبركة وكل عام وأنتم بخير

صفــــاء يقول...

بحر الالوان
***********
صديقي العزيز ... اهى حاجه هفت عليا وطقت فى دماغى واول كل رمضان دايمااا بيكون فيه مقارنات وذكريات
شكراً لسؤالك عنى ولا حرمنا الله تواجدك

وكل سنه وانت بكل خير ورضا من الله

----------------

Hesham
*******

كوووول سنه وانت بكل خير يا رب
وإن شاء الله رمضان الجاى يكون صدر الكتاب ونستمتع بيه

صفــــاء يقول...

حلمى البعيد
*************
حبيبي ... قمرى يا ناس
وانت طيبه وبكل خير ياااارب وبكل صحه وسلام وبكل فرح
الغيبه لا يد لى فيها صدكيني صدكيني
إن شاء الله بظبط شويه حاجات كدة وبعدهم هتلاقيني مرابطه هنا طووول الوقت

------------------

فتاة من الصعيد
****************
مروة الجميله صديقتي الصعيديه وجارتى المنورة
والله يا اوختشى مش بأيدي ربنا يسهل إن شاء الله والدنيا تتظبط واقدر ابقى موجودة طول الوقت

كل سنه وانت بكل خير وربنا يتقبل منك

صفــــاء يقول...

sal
*****
والله انت اللى رائع
الله يسلمك وكل رمضان وانت متواجد ومنورنى دايما يا رب

على فكرة دايما رمضان عندى مميز ودايما له رائحه وعبق ومذاق
لكن اهى حاجه ألحت على دماغى بمناسبه الجوع والعطش باين
سميها تخاريف صيام

-------------------

فتافيت
********
الجميله العسله والله

كل سنه وانت بكل صحه وخير يا قلبى
وربنا مايحرمنيش من تواجدك وسؤالك عنى
سميها تدوينه سميها حنين سميها حتى قرصه جوع هههههه مش هناقشك

كل سنه وانت طيبه وربنا يسعد قلبك بكل خير إن شاء الله

صفــــاء يقول...

همس الأحباب
************
خالد باشا ابو همس
الله اكرم وكل سنه وانت بكل خير وكل رمضان وانت منور
تخيل انى فعلا كل أول رمضان بشم روائح قديمه من بلد ابويا ومن شارعنا
ومن الأرض والطين
ماتعرفش مالى فلاحه قوى كدة ليه ههههههه

منورنى يا خالد ولا حرمنا الله تواجدك وسؤالك عنى

-------------------

مصعب صلاح
*********
وانت طيب وبكل خير يا رب

صفــــاء يقول...

سلوى
******
رمضان دائما وأبداً لا يكون رمضان من غير ماتقولى لى كل سنه وانت طيبه يا قلبى
اول ما اسمعها اعرف انه كل سنه واحنا طيبين

------------------

بيرم المصرى
************
وكل سنه وانت طيب يا شاعرنا الرائع وكل سنه وانت منور الدنيا بأشعارك وازجالك البديعه

محمود(باحث عن حب) يقول...

السلام عليكم
اولا كل عام انتى بخير
ثانيا انا زعلان قوى مختفيه خالص ومش ظاهره خالص
لعله خير
واذا بى افاجأ بمدونه اخرى لا اعرفها

لا تتغيبى
وعودى الى الاسر مع عصفورك
كل سنه وانتى طيبه الرطوبه خانقه وعاليه جدا
ربنا يعنا
بارك الله لكى

دموع القمر يقول...

كل سنة وانت طيبة
سردك حلو ياصافى
جميل لما يكون عند الواحد ذكريات حلوة
تحياتى

اقصوصه يقول...

رمضان كريم

وكل عام وانتم بخير

علاء المصرى كل يوم يقول...

أسجل مرورى كل عام وأنتم بخير