الأربعاء، 1 سبتمبر، 2010

مقتطفات


لما قولت المفروض نعلن استقلال الصعيد وننفصل بعملتنا وعلمنا ونعمل لنا نشيد قومى ينعزف بالربابه ويرقصو عليه بالعصى ... أشارة من السماء أهى

شيخ العرب همام حاول يستقل قبلى بالصعيد

شكل الصعايدة قرفانين من باقى البلد وعايزين يستقلو من زمااااان



زهرة الخشخاش اتسرقت ... وهنلبسها لشعلان ونرفدة

أنقذ شعلان ... وأشرب أفيون



أخر كلام ... أحنا شعب قذر , والله شعب قذر فعلا

ووساختنا ماسبقناش فيها شعب من شعوب الارض ... حق الريادة فى دى فعلا

كميه الزباله الرهيييبه اللى بنتكعبل بيها فى الشوارع غير طبيعيه

ومش معقول يعنى يكون فيه شعوب أخرى أو قرناء لنا من تحت الأرض بيجو يوسخو شوارعنا النظيفه

كل ست بتاكل نفسها من النضافه والتنفيض والكنس وتروح شايله زبالتها وهووووب من الشباك البلكونه

ونهار ما تكون نضيفه قوى وتتحسد يعنى تركنها قصاد باب شقتها

حدود مملكتها تنتهى قصاد عتبتها ... ووزير المملكه البيه جوزها حدود نظاقته

هى انه يشيل كيس الزباله ويرميه على ناصيه الشارع

حق الله يتقال الزبالين وبتوع البلديه بشوفهم بعيني شغالين من الصبح بدرى جدا .... ولوقت متأخر جدااا فى الليل

ماحدش يقول الزبالين .... دة دلوقتى الزبال بقى سيد الكل ... يا شعب بيتكعبل فى وساخته



أتبرع لبنك الطعام واتبرع لمستشفى سرطان الاطفال واتبرع لتكفل قريه فقيرة واتبرع لمستشفى مجدى يعقوب واتبرع لجمعيه مصر الخير واتبرع لجمعيه رساله وبعد دة كله تدي جيوش الشحاتين اللى فى الشوارع


رجاااااء حار .... اعملو نقابه لكل الجمعيات والمستشفيات والشحاتين وخدو اللى فى جيوب الناس وقسموة على بعض مرة واحدة زى النشالين كدة لما بيلمو الغله ويدوها للزعيم وهو يوزع عليهم



أو بدل كل مستشفيات الأورام اللى بيشحتو من الناس الفقرا عليها عشان يعالجو الناس الأشد فقراً أمنعو أصابتنا بالأمراض المستعصيه دى من الأساس

زمان لما كنا نسمع عن حد مانعرفوش مات يقولك دة والعياذ بالله مات بالمرض الخبيث

دلوقت كلنا نعرف ناس ماتت بأمراض خبيثه

وفى سنه واحدة مات بيه 3 جيران ومرات خالى وبنت خالى وستات اصحاب ماما ورجاله زمايل بابا

ومن 30 سنه احمد رجب كتب وقال

وضعو أثنان أحدهم عاقل والأخر مجنون فى غرفه مملوئه بالماء وبها صنبور مفتوح العاقل أغلق الصنبور والمجنون أستمر فى نزح الماء بجردل إلى يوم الدين

بدل من العلاج من أمراض لا علاج لها .... أرحمونا من أننا نصاب بها أصلاً



هناك 16 تعليقًا:

ميرا ( وومن ) يقول...

يا شخبطاتك يا صفاء

عارفة احنا فعلا شعب مش نضيف خالص ونفسي اعرف كمية الزبالة اللي في شارع دي بيجبوها منين

موضوع التبرعات ده انتي جبتي فيه من الاخر علشان الواحد مش عارف هايتبرع لإية ولا لإية والشحاتين كل يوم بتذيد

تسلم دماغك وشخابيطك يا قمر

sal يقول...

أنقذ شعلان ... وأشرب أفيون
*****************
اعملو نقابه لكل الجمعيات والمستشفيات والشحاتين
*********
بدل من العلاج من أمراض لا علاج لها .... أرحمونا من أننا نصاب بها أصلاً
************************

افكار هايلة يا صفاء ربنا يسمع منك

بس بلاش فكرة الانفصال الجنوبى كفاية جنوب السودان
هههه

تحياتى
وكل سنه وانت بالف خير

أحــوال الهـوي يقول...

الشحاته الحديثه
ان الدوله تشيل ايدها من البلاوي اللي هي السبب فيها من التلوث و المواد المشعه اللي بيستوردوها مع القمح اللبن و نهاية بالنفايات الملوثه اللي بيدفنوها في بلادنا الي مصانع الكيماويات الموجوده بتلوث البيئه بين البيتوت لابراج المحمول

عوامل و اسباب كتيرة ملخصها الفساد
و زياده في الفساد يسرقوا الفلوس مرتين
يهربوا بفلوس البلد و ياخدوا اللي باقي من جيوبنا

انا معاكي في كل اللي كتبتيه
ولولا الملامه كنت قلت كلام عيب
اللهم اني صايم

Timo.. يقول...

عارفة يا صفاء..
كمية البوستات اللي قريتهالك مرة واحدة النهاردة خلتني مش عارف اعلق على ايه ولا ايه..
بس عجبني موضوع المقتطفات خاصة وانك احيانا في البوست الواحد تجمعي مجموعة حاجات مرة واحدة.

وفعلا زي ما قولتي فيه ناس ممكن تحاول (تعالج) مشكلة..
وناس تحاول (تمنع) نفس المشكلة من انها تحصل اصلا.

كل سنة وانت طيبة :)

Beram ElMasry يقول...

تقبل الله منكم صيامكم وقيامكم وجزاكم عنه خيرا وضاعف العطية وعيد سعيد لكم وجميع الاهل

بحر الالوان يقول...

بعيدا عن النزعة الانفصالية في البوست ...والخشخاش ... والتبرعات ... والمرضي ... اقدر اقول

كل عام وانتم بخير بمناسبة عيد الفطر المبارك

hasona يقول...

كل عام وأنتم من عواده
وكل سنة وانت بخير
وأسعدكم الله في عيد الفطر

فتاه من الصعيد يقول...

كل سنه وانتي طيبه يا صفاء:)

معلش لو كنت موش قدرت أتابعك في رمضان :)

عيد سعيد عليكي وعلى كل الاسره ... وماتغبيش كتير تاني بقا :)

بسنت يقول...

كل سنه وانتى طيبه يا صافى
وان شاء الله يكون عيد سعيد عليكى

النظافه سلوك من الممكن ان نعود اى حد عليه كنت اعتقده زمان طبع وعاده
المشكله اننا لا نتحمل المسئوليه خارج نطاق انفسنا لاننا كطبع مصرى اصيل اتكاليين بس فى نفس الوقت بنخاف جدا فلو فى قانون بغرامه مثلا تأكدى ان النضافه هتغلب بس اللى يوجد القانون اصلا
بالنسبه للتبرعات هى طريقه يا صفاء لانى اكتشفت حقيقى فى ناس مش عارفه تودى زكاتها وصدقاتها لمين ودا شوفته بنفسى يعنى سؤال انتى كنتى هتعرفى حاجه عن الاماكن دى كساكنه فى الصعيد اذا ماكنشى فى اعلام
انا ان كان عن نفسى اول مره اعرف بمركز د: مجدى يعقوب بأسوان

وبالنسبه لشعلان اعتقد الاولى طبعا فاروق حسنى بس واضح ان الراجل دا واااصل زياده
وهيشلها شعلان فعلا وهو مسئول اكيد بردوا وانا لا استبعد سرقه حاجات تانيه لم يعلنوا عنها لان الفساد خلاص بقى هو الاساس
رمضان خلص والشياطين هتظهر اكتر
ربنايسترها علينا
دمتى بكل الخير

صفــــاء يقول...

ميرا
******
والله والله يا اختى إن احنا فعلا شعب مستوى نضافته منحط جدااا
وكميه الزباله دى أكيد مش أمى اللى بتكبها على راس الشوارع من فوق
ربنا يكرم كل ست بيت نضيفه وكل راجل بيت مابيعرفش يعلم ولادة يعنى ايه نضافه وماترموش زبالتكم فى الشوارع يا غجر

---------------------

sal
*****
مش هيسمع يا صديقي
مش هيسمع
لأنه لا يغير ما بقوم حتى يغيرو ما بأنفسهم
وما بأنفسنا مش هيتيغر ابدا
يتغير ليه ؟ ماحنا مرتاحين كدة

كل سنه وانت بكل خير

------------------

أحوال الهوى
*************
لا قول قول ... والا اقولك .. هقول انا
إننا نفخر بزيادة عدد مستشفيات السرطان والأورام ونتبااااهى ان بقى عندنا مستشفى كبير فى كل مدينه كبيرة
يالهوى ... يالهوى
يالهوى بجد
هى بقت كدة ؟
للدرجه دى بقينا هبل وعبط ومتخلفين ؟
احييييه ... بنتباهى أننا بمجهودنا عاملين اكبر مستشفيات سرطان وأطفال فى الشرق الأوسط ؟
يامصيبتى السودة المنيله بنيله
أحنا الأحسن من كدة أننا نتباهى بأنه عندنا أكبر عدد مرضى بالسرطان فى العالم مثلا
وان ماحدش سبقنا وحقق الأنجاز الوسخ دة غيرنا
ونتباهى بأكبر عدد من الأوبئه والأمراض اللى انقرضت فى العالم كله
يالهوى دة احنا لحد دلوقت فيه عندنا ناس بتصاب بالجدرى

صفــــاء يقول...

Timo
*****
تسلم ربنا يخليك
شكرا على زيارتك والوقت اللى أنفقته فى قرائه مقتطفاتى
ولأن هى مقتطفات فـ مش بتتكلم عن موضوع واحد دة اى حاجه وكل حاجه بتيجي فى دماغى بقى بشخبطها

شكرا على التعليق ... وكل سنه وانت بكل خير

---------------

بيرم المصرى
************
تقبل منا ومنك يا أستاذنا الفاضل
وكل عام وانت بكل خير وسعادة وصحه

---------------

بحر الألوان
************
ياعزيزى دى مش نزعه انفصاليه
دة أستقلال تام او الموت من الزكام
أحسن الحاله مابقتش تسر خااالص

كل سنه وانت طيب وتقبل الله

صفــــاء يقول...

hasona
*******
وينعاد عليك بخير يا رب

--------------

فتاة من الصعيد
****************
وانت طيبه يا أحلى دكتورة فى شمال الصعيد

انت معاك كارت متابعه وقت ما تحبى وكل اما تقدرى ... سماح
مش هنتخانق المرة دى ... ولا خالص بصراحه لأنى مقصرة مع الكل
كل سنه وانت طيبه وكل عيد عليكي أسعد من اللى قبله

-----------------

بسنت
******
ولأحلى صيدلانيه فى شمال الصعيد وجنوبه كمان

وانت طيبه وبكل خير يا رب
النظافه سلوك استحاله هنتعود عليه غير يمكن بعد 50 سنه من دلوقت لما الشعب كله يمشى ...يموت يعنى ويجيي شعب تانى نضيف مكون من أبنائهم اللى لسه ماتعلموش القذارة ولا الأهمال
غير إننا شعب فاكر انه فالح وفهلوى واكتر ما بيخاف من الغرامه بيحب أكتر يعمل ناصح ويضحك على الحكومه ويكب برضه زبالته من ورا ضهرها

فيه فرق بين تعريفنا بكيف نؤدى زكاتنا وأين نضع صداقاتنا
وبين الأبتزاز العاطفى الصرييييح اللى بيحصل دة
ومش ناقص غير كل مسؤل أو شيخ يشيل عيل مريض ويدور يشحت بيه
تصدقى بالله ... شوفت لحد دلوقت شئ مش فهماه ابدااااا
على قناة موجه كوميدي .. هذا البرنامج برعايه مستشفى 500500 لعلاج الأورام
بصى .. أكتر من كدة مش هقول حرف , والا استنى هقول
يعنى ايه مستشفى طالب تبرعات لعلاح مرضى يرعى برنامج ويدفع تكلفه أنتاجه عشان يشحت مننا حق علاج المرضى دول ؟

فاروق حسن دة واصل من فوق ومن تحت يا قلبى وكفايه كدة

شكرا على التعليق الرائع والنقاش الجميل

Beram ElMasry يقول...

الاخت العزيزة صفاء
صدقت ولكن علينا علي الاقل ان نشكو ونعترض علي امل انم ياتي يوم الفرج
كل عام وانت وجميع الاهل في كل سرور

قرات مقتطفاتك
وهي ذكية وبالمناسبة ولكن سماسرة الزبالة هم الذين يقومون ببعثر الزبالة لجمع ما يلزمهم من مخلفات

تحياتي والسلام ولاسلام مع بني اسرائيل

غير معرف يقول...

ثقافة الهزيمة.. أسكندرية ...ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى www.ouregypt.us

momken يقول...

اتفق معاك جدا فى ان ثقافتنا عن التعامل مع الشواره منقوصه

وكميه القمامه بالفعل اكبر من عدد البشر فى الشوارع

اما النسبه للتسول
فانها نتيجه دنائه مقتدر

فلو ان المقتدرين تخلصوا من كميات السواد فى صدورهم ا بقى بيننا فقير


البوست رائع


تحياتى

sal يقول...

كل عام وانت بخير