الجمعة، 16 أبريل 2010



حامل .... يبقى هتولدى قيصري , اصل الجنين مقلوب والحبل السرى اتلف على رقبته وشرب مايه وضغط دمه بينزل ودقات قلبه بتقل والحوض ضيق ولازم نفتح بطن وإن مالحقناش الجنين هيموت وبختك منيل وسنتك سودة ومصيرك جهنم وبئس المصير والدكتور يصور سواد الدنيا والآخرة للحامل وجوزها واهلها والمجتمع والناس
ودة طبعا عشان يقلب الزبون فى كام الف جنيه وشق وافتح زى البطيخه وهو لسه هيستنى لما تقعد تولد طبيعى 20 والا 30 ساعه طلق وفى الآخر يقبض قليل ... هو يعملها جراحه وينصب حواليها مولد وآجزر يا معلم
ناهيك طبعا عن أنهم تقريبا بطلو يعلموهم فى الكليه ازاى يولدّو الستات طبيعي وآخر خبرة الطب عندة أنه يشق ويطلع العيل ويخيط

طب ما على كدة الواحدة لما تيجي تولد تبقى تروح عند جزار وترزى على الأقل غرزة التقفيل هتبقى أنضف
فى كل 100 حاله وضع ... مين سمع عن واحدة ولدت طبيعي .... يا ترى لسه فيه مواطنه مصريه مجهوله لسه بتولد طبيعي زى زمان ؟



وقعت وانكسرت ايد او رجل ... يبقى لاااازم شريحه ومسامير
اصل العضم انكسر ماعرفش فين ومنين وكسر مضاعف وكسر لولبى وهيقطع العصب وفيه شظايا وهيعمل غرغرينا والحاله خطيرة ولازم تجيب الشريحه من الشركه المعينه دى والمسامير تبقى من نفس الشركه اللى تقريبا الدكاترة بقو سماسرة لها
هو راخر زى زميله دكتور النسا اللى فوق مش هيقول دة كسر بسيط ويجبس ويسيب العضم يلم لواحدة
لزما وحتما ينصب المولد اللى نصبه التانى وتبقى جراحه ودكتور تخدير ورسم فتح اوضه عمليات وكله بتمنه والعادى بسعر والجراحى متطوق
ياترى فيه حد لسه بينكسر كسر عادى من بتوع زمان اللى مش محتاج شريحه ولا مسامير وحتى واحد مجبراتى ممكن يعالجه ؟

قلب مراة وزير الصحه تعب ... سفرها تتعالج على نفقه الدوله فى لندن
مرارتك التهبت ... مصر كلها بـالـ 80 مليون اللى فيها بدكاترتها وبنقيب أطبائها بمستشفياتها بتمورجينها مافيهاش نفر لوجه الله هيعرف يعالجك ... اطلع على المانيا , روح مستشفى هايدلبرج
فيها احسن ناس تشيل المرارة من غير ما تفقعها فى الكبدة وتخليها تمرر وماتقدرش تاكلها بعد كدة


يا ترى لسه مصر فيها علاج ؟ وناس بتعيا بـ أمراض ممكن تتعالج فى مصر زى زمان ؟


هناك 36 تعليقًا:

همس الاحباب يقول...

هههههههههههه
طبعا فيه عضة الكلب
وفقعة المرارة للغلابة
والبوست بتاعك فقع مرارتى مع انى شلتها من ايام ثانوى
مع الاسف البوست مؤلم بكل ما فيه وده اصبح الحال فى كل المجالات وشتى مناحى الحياة
ولا حول ولا قوة الا بالله
تحياتى

فتاه من الصعيد يقول...

اللي يتعب بندفنه خلاص ... بلا طب بلا دوا :)

هو الضمير قل ... بس برضو احنا اتغيرنا ... صحتنا بقيت اقل ومابنستحملش

تحياتي

صفــــــاء يقول...

أبو همس
********
عضه الكلب ملهاش غير مصل مستورد موجود فى مستشفى واحد بس على مستوى الجمهوريه
يابختك انت شيلت مرارتك
انا بقى بتنقح عليا دايما التهاب مزمن ... بس ابويا مايقدرش يسفرنى المانيا

منور يا برنس

صفــــــاء يقول...

فتاة من الصعيد
****************
انا برضه قولت نطبق نظريه نيتشه
لا مكان فى المجتمع للمرضى والعجائز أو ذوى العاهات
يالا يا أوختشى شغلى الفرن عشان نخلص منهم ... احنا لسه هندفن

خواطر شابة يقول...

انها ازمة الضمير عزيزتي ليس فقط في مجال الطب بل في كل المجالات

صفــــــاء يقول...

يبقى نستأصل ضميرهم بعمليه جراحيه ونريحهم منه

sal يقول...

الفساد منظومة ثقافية وفكرية وليس حدثاً أو ظاهرة طارئة

أن الفساد هو " أحد الأعراض التي ترمز إلى وقوع خطأ في إدارة الدولة" بمعنى أن المؤسسات التي وجدت خصيصا لإدارة العلاقات المتداخلة بين المواطن والدولة، أضحت تستعمل عوض ذلك كوسيلة للإثراء الشخصي وإهداء المنافع إلى المفسدين.

فالفساد بداية هو فساد سياسى
ينعكس على كافة مناشط الحياة

تحياتى

صفــــــاء يقول...

أعتقدت ان الطب هو فن علاج المريض

لكن اللى بيحصل انه بقى فيه خلط رهيب بين الطب والجراحه والتجارة وتجسيم اخطار وهميه عشان اى شئ يبقى جراحه والعيان يدفع والدكتور يقبض والفساد شريك لكل شخص فى البلد بالشكل دة

Haytham Alsayes يقول...

السلام عليكم

دة لو فعلا كدة تبقي كارثة انا فعلا باسأل نفسي من زمان السؤال دة هو ليه الستات مبيولدوش طبيعي

ينهار ابيض هما فعلا بيكسلول يولدوهم طبيعي فيشقها ويلا زي ماتيجي حمرا قرعا

تحياتي علي المدوتة الجميلة

صفــــــاء يقول...

لا هو مش كسل ... هو أولا عدم خبرة

ثانيا هيولدها طبيعي هياخد كام يعنى ؟
لكن عمليه وجراحه وشق وفتح ودكتور تخدير وهيقبض ودكتور البنج هيقبض والممرضه هتقبض وكله هيرزق ... زى بياعين الفلايات

شكرا على أعجابك بالمدونه
ونورتيني

البنفسج الحزين يقول...

بجد بتعجبتني ملاحظاتك علي الأحداث والأشياء ...واضح ان عندك ميول نقديه ...أصل انا كده برضه عندي نفس الميول ....
بالنسبه بقا لموضوع الدكاترة فالطب الايام دي (وفي ظل طغيان الماده والفلوس علي كل شئ في حياتنا )أصبح زيه زي أي مجال وأي شغل مجرد سبوبه وباب رزق ...زمااااااااااااان في أفلام الأبيض واسود كنا بنسمع البطل في الفيلم يقولك انا اضطريت أضحي بالجنين علشان نحافظ علي حياة الأم...
دلوقتي الجمله اتعدلت بقت اضطريت
أفتح بطن أم الجنبن وافلس أبو الجنين علشان الدكتور يعيش ...
تحياتي يا بلدياتي

صفــــــاء يقول...

ميول نقديه نييههااا شريرة جدا انا

ههههههه لا مش كدة بالظبط (وش خبيث) هو زى ماتقولى النقطه البيضا مش بتظهر قوى لكن البقعه السودة بتسد عين الشمس

فى ظل طغيان المادة تشق وتقطع فى لحم الناس بلا مبرر ولا سبب لمجرد ان دة هيخليه يقبض قرشين زيادة ؟
ما يلغوها طيب حكايه الطب رساله وملائكه الرحمه ويخلوهم عساكر مرور احسن ... يقبضو من اللى طالع واللى نازل ... اضطرينا نضحى بالأم والأب والجنين عشان الدكتور يشترى شاليه فى بورتو غالى

مصطفى ريان يقول...

اللي مش معاه فلوس يتعالج بيها في البلد دي يبقي احسن يروح يموت ..يموت بكرامته بدل ما يتبهدل عند الدكاترة
ربنا يحفظنا ولا يحوجنا لهم

مصعب صلاح يقول...

السلام عليكم
ايه تدوينات الطب دي
ربنا يلطف

د/ رامي شهاب الدين يقول...

مع كامل إحترامى لحضرتك ووجهة نظرك ، إلا إنى بسجل إعتراضى على كل ماكتب وبعتبره كلام لايمت للواقع بصلة .. ولا يعبر إلا عن قلة قليلة جدا ، ولو حضرتك حبيتى تتكلمى عنهم كان يجب التنويه إن الكلام ده يعبر عن الإستثناء وليس القاعدة ، ولكن كلام حضرتك حمل معنى واحد إن ده هو السائد فقط لاغير

فى البداية .. بحكم إنى طبيب إمتياز حاليا ، ودرست النسا والولادة فى سنة البكالوريوس ، أقدر أقول لحضرتك إنك مخطئة تماما فى إللى قلتيه بخصوص هذا الصدد لأن كل إللى علمونا إتفقوا على إن الولادة القيصرية لا ينبغى اللجوء إليها إلا فى حالات معينة يتعذر فيها الولادة الطبيعية ، وده بالتنبعية يدحض مقولتك إللى حضرتك قلتى فيها : ناهيك طبعا عن أنهم تقريبا بطلو يعلموهم فى الكليه ازاى يولدّو الستات طبيعي وآخر خبرة الطب عندة أنه يشق ويطلع العيل ويخيط

الأمثلة إللى حضرتك أوردتيها بعد كدة كدكتور العظام أو الجراحين وخلافه فيها ظلم لقاعدة عريضة من الأطباء الشرفاء إللى أحيانا بيتنازلوا عن أجرهم لما يلاقوا حالة المريض المادية ماتسمحشى بتمن الكشف

وأخيرا وليس آخرا .. لى فقط تعديل بسيط على جملة ليكى فى أحد التعليقات .. حضرتك بتقولى : أعتقدت ان الطب هو فن علاج المريض

والصواب هو أن الطب فن الوقاية من الأمراض قبل مايكون فن العلاج

ماهى الهندسة مش فن الإصلاح والترميم بس .. بل إنها فن البناء والتشييد قبل ماتكون فن الإصلاح والترميم

دمتى بكل ود .. تحياتى

هي وظروفها يقول...

صفاء

انا مولود طبيعي فيها ايد دي

وكمان علي ايد دايه

بخصوص الولاده الطبيعي لسه مرات صاحبي والله والده طبيعي وجابت ادم

وبيقولي ادوها حقنه بالف جنيه ولدت وبعد نص ساعه كانت واقفه جمبه
قلتله بالصلاه علي النبي ليه هي كانت حامل في زتونه ولا ايه

وبخصوص الغالي او مراره فده ابونا واخونا وبصراحه كان نفسي يعمل الماراه عند الدايه اللي جابتني الدنيا وكنا خلصنا
يلا ليه عمر

Che يقول...

بالنسبه للدكاتره فانا عايز اقولك حاجه بسيطه نتيجه لاختلاطى بالوسط ده لمده طويله لظروف الشغل
بالنسبه لبتوع النسا و التوليد فبتبقى العمليه مجرد استسهال و زى ما قلتى هتفضل تولد يوم ولا يوم و نص و يبعتو يجيبوه بليل
بالنسبه لبتوع العظام ففعلا الموضوع سبوبه و بياخد خصم اكبر على انى منتجات ... و عندك الصيادله اللى اغلبهم عباره عن بقالين افرنجى و كل اللى بيدور عليه المكسب و نسبه الخصم .. و .. و ... و ...

فى الغالب اللى هيعيا فى البلد دى يبقى يموت على طول اوفرله

حلمى البعيد يقول...

السلام عليكم
ازيك يا صفاء وحشانى يا حبيبتى
بالنسبه للولا ده الطبيعي فهى الحمد لله إتلغت واللى لسه بيولدوا بيها خلاص بقي الامهات خدوا علي الراحه بيقولوا احنا لسه هنقعد نصوت

أجزر يا عمونا وخلص

والعلاج فل وأحب أطمنك ماشاء الله واحد بيتعالج وعشره بيرتاحوا

مصر بخير

أحــوال الهـوي يقول...

في اوروبا و لبلاد المتقدمه الستات بتحب تولد قيصري ال ايه بتحافظ علي شكل العضو بدون ترهلات و لا تغيير لون

و حكاية المرارة عايزك تقولي مين اللي عند الست والدته شجاعه يلعب في سيادة الرئيس
انا كنت حاضر مرة مع 3 استشاريين ايام موضوع العمود الفقري بتاع معاليه و كلهم اجمعوا علي التشخيص و العلاج بس و لا واحد عنده الجرائه ياخد المخاطرة
يابيه الناس عايزة تعيش
لو جنابه حس بوجع بعد العمليه شوفي ايه اللي ممكن يحصل للدكتور و اللي خلفوه

يبقي نبعد عن الريس و غني له

تحياتي

eslam يقول...

فكرة القيصرى دى بتفكرنى بيا وانا صغير
كنت مقتنع تماما ان العيل بيطلع من من سرة البطن .. هيطلع منين يعنى
انا عندى نظرة من زمان
بالنسبة للى بينكسر ويركب شريحة .. ممكن كمان يستقبل مكالمات هق هق هق
بالنسبة للمرارة سمعتى الحكاية بتاعة كوكاكولا زيرو .. يعنى الريس يعيى وشيخ الازهر هو اللى يموت
تحياتى دائما لقلمك الرشيق بجد

فتافيت يقول...

والله ما عارفة ارد
هاقول ايه بس هههههههههههههههههههههههههههههههههه
ده حتى طباخ السم بيدوقه.. وهم خايفين يدوقوه هههههههه سوسة هما

فقعتي مرارتي :)))

وسمعت كلامك ومتاخرتش .. :)

assafo anaroze يقول...

سلام يا اجدع صفاء
ازيك يا بنتي و لا زمان
زي ما انت بتغلسي على كل حتى الاطباء ملاكي الرحمة حرام عليك حتدخلي جهنم
صفاء ده الحال من بعضو كلو بيلهف من كل عاوزين يتغني و لو بالنصب على الناس و من دلوقتي اللي بينصب اللي بنرجوا منه الرحمة على المريض
مودتي

صفــــــاء يقول...

مصعب صلاح
**********
وعليكم السلام ... بجرب مهاراتى الطبيه يا مصعب

صفــــــاء يقول...

مصطفى ريان
***********
فى البلد دى لو عيت خدها من قصيرها وروح اشترى تربه فى أجدع قرافه
حفظك الله من كل سوء

صفــــــاء يقول...

د/رامى شهاب الدين
*******************
لا شك لدى ولو لحظه أنك من أكثر الناس تهذيبا وأحترام ولك الشكر على هذا .. حفظك الله وكملك بعقلك
صدقنى يا دكتور كلامى يمت للواقع بالكثير من الصلات
جمله (انهم تقريبا بطلو يعلموهم الولادة الطبيعيه فى كليه الطب) دى سخريه مجازيه ... أكيد بيعلموهم لكن اللى بيحصل الوقت ان تقريبااا كل الستات بتولد قيصريه والبركه فى الدكتور ... ومن أكتر من 50 واحدة فى العيله والشارع واصدقاء كلهم أللهم إلا استثنائات بسيطه الدكاترة نصيحتهم رقم 1 هى الولادة جراحيا رغم ان معظم الحالات دى ممكن تولد طبيعيى ... طبعا انا مش دكتورة ولا بفتى فى الطب ولا فيما لا اعلم ... لكن ما اعلم هو ان الدكاترة بطلو يولدو طبيعي حتى لو الحاله لا تحتاج جراحه (على الأقل فى بلدنا)
الأطباء الشرفاء موجودين ... ومثال على ما تقول هو طبيب أمراض نفسيه و عصبيه مسيحي فى بلدنا بيقوم بالأتفاق مع الجمعيه الشرعيه بمعالجه 10حالات مرضيه شهريا مجانا
لكن يا دكتور ومع كامل احترامى لك إلا أن الأهمال والتسيب فى الدكاترة فاق الحد ودة كلام معروف جدا فى مصر إن كان على مستوى الطباء او المستشفيات ... قد تقبل الخطأ والأهمال من كثير من الأشخاص لكن من دكتور ... شئ مؤلم جدا
وغلطه الشاطر بألف
بالنسبه لجمله أعتقدت إن الطب هو فن علاج المريض فدة اعتقاد شخصى ومش رأي علمى يضاف إليه اعتقاد آخر مش عارفه إن كان صح والا غلط وهو إن آخر شئ المفروض يلجأ إليه الطبيب هى الجراحه ... ودة مش الواقع لأن أسهل كلمه بقت جراحه

أشكر لك ذوقك فى طرح وجهه نظرك وتحياتى لك دائمه

صفــــــاء يقول...

هى وظروفها
************
وانا والله مولودة طبيعي بس على إيد دكتور لكن باقى اخواتى جابتهم خالتك الحاجه فاطمه

ومرات صاحبك دى هنديها جائزتين تقديريتين أولهم جائزة الست اللى تجرأت وولدت طبيعي وثانيهم جائزه الأنجاز المشرف أنها بسم الله ماشاء الله قامت بعد نص ساعه

المرارة ... صدقنى كان نفسى اعملها انا له بمقورة البتينجان

صفــــــاء يقول...

che
*****
زمان فعلا كان دكتور النسا عرضه دااائمه أنه يستدعى فى نص الليل للقيام بعمليه ولادة طبيعيه
دلوقت بيحددو معاد الولادة على حسب جدولهم وجدول غرفه العمليات

أما دكاترة العظام فلنا معاهم حكاوى لا تنتهى من قصص الشريحه والمسامير لكل ولأبسط أصابه

وانا برضه بقول اللى يموت يخرج بكرامته

منور يا وليد

صفــــــاء يقول...

حلمى البعيد
**************
وعليكم السلام
أيمييي حبيبي ... منور يا قمر بتغيب عننا فين
شوفى انا معاكى فعلا فى إن الستات بقو هما كمان بيستسهلو الولادة القيصري نظرا لخزعبلات فى دماغهم عن الولادة الطبيعيه مع انى ليا 12 خال وخاله وجدتى لم تزر طبيب فى حياتها إلا لتركيب طقم اسنان بعد ما وصلت 80 سنه

منور يا قمر

صفــــــاء يقول...

أحوال الهوى
*************
فى اوروبا والبلاد المتقدمه الست بتفضل أنها تولد طبيعي وحتى أحيانا بدون استحدام مخدر وتدريبات الولادة الطبيعيه بتكون شديدة الأهميه فى عمليه الوضع زى تدريبات لاماز وخلافه ... احنا بس اللى خيبتنا بقت تقيله حتى فى الخلف محصلناش القطط

مرارة جنابه ... كلهم تحت أيد الدكتور سواء وزيه زي غيرة ... وهو متبنج هيفرق أيه عن عم عباس الكمسرى ؟
هو بس استهتار بالدكتور المصرى ربما لعقدة الخواجه ... او لأنهم أدرى بحال البلد وعارفين انهم ماخلوش فيها راجل يقدر يعالجه

وكفايه عليه شيرين تغنى له

صفــــــاء يقول...

eslam
********
فكرتنى ببت صاحبه اختى فضلت لحد الثانوى فاكرة ان العيال بيرجعوهم فى الحوض ... زى ما امها قالت لها

طيب بالنسبه للشريحه هيستقبل مكالمات بس والا هيشتغل فايبريشن ؟

كوكاكولا زيرو إنك تفضل طول العمر تدعى على الرئيس يقوم يعيش لحد ما يبقى عندة 90 سنه .. شوفت الغيظ ؟

نورتنى يا برنس

صفــــــاء يقول...

فتافيت
********
يا حبيبي كفايه شرف زيارتك وكفايه خفه دمك وكفايه ضحكتك الحلوة دى اللى سبقاكى دايما

دكاترتهم اللى هما بيخرجوهم ويدربوهم بيكتفو بأنهم يجربوهم علينا احنا بس ... لكن وقت الجد .. الخواجه يكسب

ربنا يخليك يا جميل وتفضل منور على طول

صفــــــاء يقول...

اسافو
*******
صديقى العزيز صاحب الأختفائات طويله المدة
منور يا عزيزى ... كيفك وازاى المغرب على حسك

غلاسه رخامه اللى يطلع منك كله كويس
ويمكن مهياش رغبه فى الغنا قد ماهى رغبه فى العيشه المستورة
كيلو اللحمه وصل 70 جنيه

شرفتنى ونورتنى يا صديقي

Che يقول...

والله مش قصدى اكون بايخ ولا حاجه ، بس انا اسمى عمرو مش وليد :)
ولا وليد دى عشان كنا بنتكلم على دكاتره النسا و الولاده و كده ؟ :)

صفــــــاء يقول...

لا يا برنس انا اللى أسفه
خلطت فى الأسامى وليد الدوغرى (هى وظروفها)اللى قبلك على طول فى التعليقات ....عندى دى

عاشت الأسامى يا عمرو باشا

Sharm يقول...

و الدتي - ربنا يشفيها - مش بتخلي الحوامل يولدوا الا طبيعي و قيصري في ابعد الحدود و دايما كانت تقولي اللي الدكاترة بيعملوه ده بزنس و بيريحوا دماغهم لان الوقت اللي هيودلوا فيه طبيعي هيودلدوا فيه 3 حالات قيصري !

و كل الستات ممكن تولد طبيعي لان طبعا الالم هيتفاوت و حالة الطفل كمان

صفــــــاء يقول...

sharm
*******
أهى الست الوادة ربنا يعافيها ويعفى عنها ست عاقله جدا وربنا

المشكله فى الخوف الوهمى والكلام اللى مالوش اساس من الواقع

سعيدة بالزيارة والتعليق

شرفتنى