الأحد، 14 مارس 2010

CSI


علم البحث الجنائى ... على أساس ان البحث الجنائى وفحص و تحليل الأدله وتعقب الأثر علم كامل قائم بذاته , شديد الأهميه وله معامل ومراكز بحثيه ودراسات متخصصه
لأثبات برائه متهم أو تثبيت التهمه عليه

دة على الأقل اللى اخونا الأمريكان والغربيين فرجونا عليه فى مسلسلاتهم وأفلامهم والوثائقيات بتاعتهم
حتى شرطه دبى كشفت جريمه قتل المبحوح وربما محطه تجسس كامله عن طريق تسجيلات الفيديو وتحاليل الدى أن آيه لبعض الجناة المشتركين وفحص الكترونى لجوازات سفر
ولبنان من 2005 وحتى الآن لازالت مسرح لفريق تحقيقات دولى لكشف قتله رئيس وزرائهم
أمال على أى أساس بقى يتم عمل البحث الجنائى عندنا ؟
أللى ما فيه جريمه قتل مسكو المتهم فيها عن طريق التحقيقات السليمه والتحريات وفحص الأدله ... جرايم قتل تعتبر مجازر والأتنين حتى الأن بدون متهم
مذبحتين يفصل بينهم 5 سنين و3 كيلومتر
وفى الأتنين المتهمين اللى ألقت الداخليه القبض عليهم .... بــرائــه
لييييه ؟ هقولكم انا ليه ودة المتبع فى كل جريمه قتل ... تقريبا يعنى
علم البحث الجنائى المصرى يعتمد على الأتى
البيه الظابط قاعد على مكتبه ومادد رجليه يجيله بلاغ من عمدة او أشارة مركز
يقوم ياخد بعضه ويبلغ رؤسائه ويروح يتفرج على مسرح الجريمه
ويبدأ علم البحث الجنائى بأنه يكلف العساكر والأمناء أنهم يلمو قرايب القتيل وجيرانه والعيال الصيع اللى فى البلد واى واد مسكوة مش معاة بطاقه وتبدأ العمليه العلميه الدقيقه والشاقه والمعقدة بأن أعزقوهم العزقه التمام وهاتك يا ضرب ونفخ فـ دين أمهم وأكيد حد منهم هيقر ويعترف , ماهو كل الضرب دة لازم يجيب نتيجه وانطق ياض يا بن القحبه وتشكيله آخرى من أروع الشتائم وبتخفيضات لا تقاوم وهاتو امه واخته ومراته والنتيجه طبعا لكل هذا البحث العلمى الرائع والمنظم والممنهج
هو أن حد هيزهق ويتعب ويضعف ويعترف (بس أهم جزئيه فى هذة العلوم الدقيقه والحساسه أنك تضرب ضرب مايسبش أثر ولا يبان فى الكشف الطبى اللى المتهم هيطلب ان يتعرض عليه فى أول جلسه محاكمه)
وبدل ما الوقت يُنتفع بيه فى سرعه البحث وإيجاد المتهم قبل ما تضعف الدله ويضيع الأثر
يروح كله فى اتجاة آخر خاطئ تماماً لمجرد ان السادة فى الداخليه يخلصو بسرعه ويقولو انهم أنتهو فى وقت قياسى وتنزل صورهم فى الجرايد اللى اصلا مابقاش حد يقرأها ويظهر البيه مدير الأمن فى التليفزيون ويظهرو فى برنامج وراء الأسوار ووكالات الأنباء تنشر أساميهم
وتروح القضيه اللى من غير قضيه لمحكمه الجنايات وأصغر محامى فى أصغر قريه سهل جدا يخليها مصفاة من كتر الأخطاء والثغرات اللى فيها من أول ضعف الأدله لخطأ الأجرائات لأستحاله أثبات الجرم وتعذر أرتكاب المتهم للجريمه فى الوقت المذكور او حسب أعترافاته أو لعدم تطابق الوصف والتمثيل مع تقرير الطب الشرعى
وبعد ما يكون ضاع الوقت والدليل ودم الناس هدر
أيييه بقى هنكفر ؟ كل نفس ذائقه الموت
والمكتوب على الجبين لازم تشوفه العين ولكل آجل كتاب وماحدش بيموت ناقص عمر
ونصيبهم كدة ومقدر ومكتوب ولازم يبقى فيه إيمان بالله
وكأن الإيمان بالله يتعارض مع Crime Scene Investigation

هناك 31 تعليقًا:

همس الاحباب يقول...

ههههههههههههه
ههههههههههه
تصدقى تنفعى مكان المفتش كرومبو
عجبنى قوى أعزقوهم العزقه التمام
فطستنى على نفسى من الضحك
مع الاسف ده الواقع المؤلم فى مصر
علشان كده ياما فى الحبس مظاليم
تحياتى

بحر الالوان يقول...

اولا : اتفق معك في كثير من النقاط المثارة في البوست ...... دا غير اني من المعجبين بالمسلسل دا جدا ..... بس ليا بعض الملاحظات العابرة :
1- جرائم المبحوح ...... رفيق الحريري ......اشرف مروان ......جون كيندي تندرج تحت بند الجرائم المخابراتية او الجرائم السياسية .......ومنفذيها بيملكوا اعلي الامكانات والمهارات اللي تمكنهم من محو اثار جريمة ...... او اظهار الجريمة بشكل مغاير للحقيقة التي نفذت بيها ......... وبالرغم من دور شرطة دبي ......... الا انه من الواضح ان الموساد اراد ان تظهر تلك الجريمة كرسالة علنية ...... لان التفيذ كان ممكن يكون في اي مكان اخر بعيد عن اعين الكاميرات .

2- علوم البحث الجنائي مش محصورة فقط في علم الادلة الجنائية او الطب الشرعي ........في علوم تانية كتير بتندرج تحت بند مفهوم علم البحث الجنائي ...... زي علم الاجرام وعلم النفس الجنائي ....... وعلم تقدير الادلة الجنائية ...... وعلوم السياسات الامنية اللي بتحدد الاجراءات المفترضة للحد من الجرائم او التعامل معها بسرعة حال حدوثها .

3- برضه مسرح الجريمة ذاته مختلف من جريمة لاخري .......زي المسلسل كده ...... واكيد الامكانيات المتاحة وطبيعة مسرح الجريمة بتاثر علي قدرة اجهزة البحث في الاحتفاظ بالادلة قبل ضياع معالمها .

4- برضه في نقطة متعلقة بمشروعية الادلة الجنائية ......... بمعني ان الادلة المقدمة لابد ان يتم الحصول عليها بصورة مشروعة من جهات البحث ......... بمعني لا يعتد بالاعتراف تحت اكراه مثلا ...... او التسجيلات الصوتية دون الحصول علي اذن من الجهات المختصة ........ الخ

5- كمان في خلط في البوست ما بين دور رجال الشرطة ودور رجال النيابة العامة ........ فالنيابة العامة هي المشرفة علي توجيه رجال البحث الجنائي ....... ومسئولة ايضا عن اجراءات التحقيق والتفتيش والمعاينة ....الخ ...... وفي النهاية مسئولة عن توجيه الاتهام ..... اما عن طريق الاحالة في حالة توافر الادلة الكافية لذلك ....... او عدم توجيه اتهام لاحد من الاشخاص ..... مع استمرار البحث الي ما شاء الله.

6- اخيرا يجي دور القضاء .......... والقاضي الجنائي لايمكن ان يحكم بالادانة الا بقناعة كاملة لا تقبل الشك بارتكاب المتهمة للجريمة ......... بمعني ان اي قصور في الاجراءات او في الادلة ...... او وجود شبه تدل علي عدم ارتكابه للجريمة فانه يحكم بالبراءة ...... ودي بيسموها في القانون قرينة البراءة ....... اي ان المتهم برئ حتي تثبت ادانته ......... وان الشك يفسر دائما لصالح المتهم ......... زي الكورة كده الشك يفسر لصالح المهاجم .
بس هذا المفهوم ماخوذ من الحديث النبوي الشريف :
قال رسول الله ( ادروءا الحدود عن المسلمين ما استطعتم , فان كان له مخرجا فخلو سبيله ,فان الامام ان يخطئ في العفو خير من ان يخطئ في العقوبة ) رواه الترمذي

اخيرا ........ اتفق معاكي ان لدينا قصور في الامكانيات والادارة والسياسة الامنية بالتاكيد .......... ومعلش طولت عليكي ....... بس انا قولتلك من الاول انا من المعجبين بالمسلسل .....مع انهم بيشتغلونا بس بشكل محترف

والشرطة في خدمة الشعب


تحياتي لك

صفــــــاء يقول...

ابو همس
أخويا الصعيدي اللى لازم يعرف معنى العزقه التمام
أصل دة سيم يا معلم

شرفتنى والله بالزيارة دى

صفــــــاء يقول...

بحر الألوان
با برنس رجال البحث الجنائى والمباحث العامه والنيابه العامه والشرطه الدوليه ومحكمه لاهاى كمان يجو لحد عندنا ويفشلو تماماً فى أنهم يعملو قضيه محترمه تصمد فى محكمه الجنايات جلسه واحدة
دة حتى القضيه الأخيرة بتاعه الست راضيه وأولادها مادخلتش المحكمه من أصله وقاضى المعارضات صرفه من سراى النيابه
انا اعرف ان الشرطه بتتحفظ على موقع الجريمه وبعدين البحث الجنائى يحرز ويحلل وينيل والنيابه العامه تدى اوامر القبض والتحفظ وهى اصلا اللى بتعمل القضيه
هنا فى البوست اللى هو زى ما انت شايفه ماهواش نقد علمى لتكوين قضيه جنائيه وتحويلها لمحكمه الجنايات متكامله الأركان ... دة مجرد رؤيه سطحيه او عامه للوضع ونتيجته النهائيه وبصرف لنظر عن ظروف كل قضيه واختلاف مسرح جريمه عن الأخر إلا أنه فى النهايه برضه
انت فى مصر مافيش عندك علم البحث الجنائى اللى هو علم سليم وممنهج وقوى وراسخ ويقدر يعمل قضيه ماتروحش محكمه الجنايات وتاخد برائه من أول جلسه أو حتى تقع من قبل ما تقوم أصلا
فى بلدك فى استخــفـــــاف
وانا كمان بحب المسلسل جدا ورغم كل الاشتغالات إلا أنه معمول بحبكه رائعه بس بحب csi فيجاس ومش بحب ميامى لأن الراجل رخم ولا نيويورك عشان دمهم تقيل :)))

بحر الالوان يقول...

انت بتزعقيلي ليه:) ...... احنا الروح القسم بقي .... ونشوف البحث الجنائي علي الطبيعة .

ما انا قولتلك متفق معاكي ..... بس الحماسة خدتني .

اما بالنسبة للمسلسل ..... فشواطئ ميامي تتحب الصراحة خصوصا في الحر دا..... ولاس فيجاس مش انا اللي هاتكلم عنها ...... ناس طيبين جدا.


سلاااااااااااااام

صفــــــاء يقول...

مين يا بيه اللى زعق ؟
لا دة انا صوتى عالى بس مش اكتر
ماهو انا كمان لما الحماس بتاخدنى صوتى بيعلى لكن مش بزعق لك والله
بلاش القسم ... بلاش فرج
لا حقيقي اما قولت عن الخلط كان خلط مقصود ... لأن كل صله قضايا القتل عندنا بالشرطه والمباحث والنيابه هو فعلا هاتو اهله وطلعو عينهم من الضرب يقوم حد يعترف ونخلص من القضيه
ودة طبعا علم فى منتهى الدقه والحساسيه وبيوصلهم للجانى بطريقه أسرع من انتظار نتيجه البحث والتحرى

اما المسلسلات بقى فبجد زهقت من كتر التهجيس اللى بيعملوة علينا فى كم خرافى من المسلسلات

Sherif يقول...

محو آثار الجريمة ياسيدتى أحيانا ممكن باضافة فصل أخير

بعد جمع الأدلة الدامغة والآثار القاطعة والحاسمة جنائيا وقانونيا وخلافه .. تضيع هذه الادلة وتختفى بقدرة قادر من أرشيف المحكمة ومراكز وحدات الأدلة الجنائية وكذلك الملفات والوثائق الدالة عليها .. وهنا فقط .. كل مايمكن هو اعادة فتح التحقيق فى قضية .. بعد ان يكون مات من مات .. وضاع ما ضاع ..

ملحوظة: اتحدث عن جريمة فى غير بر مصر المحروسة

صفــــــاء يقول...

يا جنرال ضياع او سرقه أو فقد الأدله دة بيحصل بعد ما يكون فيه أدله من الأساس
تقدر تقولى أيه الدليل وفين سلاح الجريمه وتحليلات الدى أن آيه وتمثيل الجريمه وفين القضيه أصلا اللى دخلت المحكمه ؟
ولو عملت أحصائيه فى بر مصر هتلاقى ان معظم جرايم القتل اللى دخلت المحاكم السنه اللى فاتت بس تم نقضها وألغاء احكامها وبعضها لم يدخل الى المحاكمه من الأساس وهنا يثور سؤال عن كفائه القضاء المصرى فى حد ذاته حين تلغى أحكامه بهذة الكثرة والكثافه

فتاه من الصعيد يقول...

ايه المقارنه الظالمه دي

بتقارني رجال المباحث بالصعيد عموما والمنيا خصوصا ببتوع سي اس اي

المسلسل لطيف يا جميل .... بس موش لدرجه انك تسرحي بخيالك كده وتطالبي بالمحاكاه والمساواه :))

تحياتي

صفــــــاء يقول...

لا يا قلبى ما عاذ الله أنى أتخيل كدة
وينقطع لسان المحافظ قبل ما اطلب بالمحاكاة والمساواة
انا بس كل اللى قولته انه فى كل الدنيا البحث الجنائى علم
عندنا احنا .... عافيه

منور يا قمر

سقراط مصر يقول...

حلوة قوي بتاعة المفتش كرومبو دي

عندك حق
فكرتوني بقضية سفاح بني مزار الى سرق اعضاء بشريه وعمليات وحوارات وفي الاخر مختل عقليا
وانا مع بحر الالوان ان النيابه المفروض كان يبقى فيها عقل في توجية الاتهام وتراعي يعني

موضوع شيق وجميل

خواطر شابة يقول...

انا سأحكي لك نكتة وسأقول بلد عربي دون تحديد لانه صراحة كلنا في الهم شرق.
يقول لك عثر على نيزك وحار علماء امريكيون في تحديد عمره فسلموه لبلد عربي لاجراء دراسة عليه فجاءهم الجواب ان عمره 3000 الاف سنة وبعد دراسة وجدوا ان الجواب صحيح فسألوا البلد العربي كيف توصلتم للحل فاجابوهم لقد أقر الحجر بذلك
دمت بكل الود

قديسك مولاتى يقول...

صحيح ياصفاء بمناسبة الجرايم والشغل الجامد ده . انا عندى فردة شراب ضايعه منى ووحياة ابوكى تكلمى لى الساده المسئوليين بتوع الكشف الجنائى عشان يدوروا معايا على فردة الشراب بتاعتى . ياصفاء ممكن اسالك سؤال ؟؟
ليه تاعبه نفسك وحارقه اعصابك فى كلام صدقينى كل اللى قرأؤه عارفينوه وعايشينوا ، إشحال انتى من المنيا وعندك تجربة بنى مذار والمذبحه ..إيه اللى حصل فى الاخر واحد مجنون القيت عليه التهمه لكن عدالتنا الموقره اضهرت برائته بسبب عدم تطابق فردة البلغه بتاعته مع موقع الجريمه ... ده كلام ناس عاقلين . لالالا ده بالذمه كلام ناس مجانين . ياصفاء إحنا شعب هانكلمه شويه عن الميجالومينيا وشويه عن البرانويا وفى الاخر هانقوله " وهذا مما لايدع مجال للشك بان الغول موجود" وهايصدقنا بجد لانه مش عارف واللى مش عارف ماعندوش استعداد يوجع دماغه بالفهم فابالتالى بيصدق . ياصفاء احلى حاجه فى المره الجايه تكتبى لنا عن اخر وصفات المسقعه والارز باللبن . باظت ياصفاء وطرطشت وماحدش عارف يلمها !!! وبجد وحشتنى مدونتك اللى دايما بتصيب حاجات كتيييير غلط فى حياتنا لكن انا بصراحه خايف عليكى من السكر والضغط وتمن العلاج اللى ممكن تستلفيه منى .. ربنا يحميكى ودومت مبدعه ناقده .

Che يقول...

خدى تعليق جد شويه و فعلا القصه دى حصلت عشان بس تعرفى مدى تقدم البحث الجنائى فى بلدنا الحبيب
استاذ جامعى فى كليه العلوم و مش فارقه فى انى كليه علوم راح يقابل احد مساعدى وزير الداخليه عشان يدخل منهج جديد فى البحث الجنائى فى مصر
المنهج ده اسمه علم الحشرات الجنائى و ده موجود فى امريكا من اكتر من 50 سنه يعنى مش موضه جديده ولا بدعه لا سمح الله و كل بدعه ضلاله و كل ضلاله فى النار
المهم اللوا قاله انت عايزنا نسرح ظباط المباحث و نشغل الصراصير و النمل مكانهم ... طبعا مش عايز اقولك على احساس الاستاذ ساعتها و بعدها اصلا
و ابقى خلى اى حد يسلملى على CSI

صفــــــاء يقول...

سقراط مصر
***********
ماهو يا فيلسوف انا بتكلم عن قضيه بنى مزار دى بس مش واحدة بقى
لا يا فيلسوف دول اتنين
والتانيه حالها حصل حال الأولانيه والمتهم مجهول
والتأشيرة سرعه البحث والتحرى للقبض على الجانى
تاااانى

طمنا على اخبار الجيش معاك يا دفعه

صفــــــاء يقول...

خواطر شابه
*************
انا سأحكى لك انا كمان نكته
عندنا لقو تمثال أثرى بس ماعرفوش لمين من ملوك مصر فسلمو لجهاز المخابرات تانى يوم الصبح اعلنو ان التمثال للملك رمسيس التانى ولما القيادة سئلتهم عرفتو ازاى ؟
التمثال اعترف بنفسه يا افندم
نهارك ابيض يا جميل

صفــــــاء يقول...

قديسك مولاتى
*************
مجدى الصديق المفكر
سؤالى ماكنش عشان تعليق يا مذيع
كنت بسئل عشان أطمن عليك لأنك فعلا زى واحد من اخواتى ويكفى انك صديق لأختى عشان تبقى أخ
ويحق لنا السؤال والأطمئنان عليك
بالنوسبه لفردة شرابك الضايعه دور عليها تحت الكنبه اللى بتقعد عليها اول ما تدخل او تحت آآآآخر السرير من جوة وصدقنى هتلاقيها ودة يعود لخبرتى انا الجنائيه فى إيجاد فرد الشرابات الضايعه
ويا سيدى مش واجعه دماغى ولا حرقه دمى ولا رافعه ضغطى ولا حاجه صدقنى الدنيا محتاجه تعمل قد اللى بتعمله دة عشر مرات عشان تسيب معايا أثر
وإن كان نفسك فى طبق رز بلبن .... أنت تأشر بس وانا أوصله سخن لحد الوادى الجديد
وابقى دايما أسئل

صفــــــاء يقول...

Che
****
اللى حضرتك ذكرته دة عالم ...
فى بلد عوالم
كل فروع العلم لها قيمه ومنفعه لكن أما اصحابها بييأسو ويهربو على برة عند ناس تقدرهم
أو بيتكسفو ويتحرجو من التريقه والمسخرة اللى بتتعمل عليهم من ناس اقل منهم علم ومعرفه بكتيرررر
او نظام تكسير المجاديف ومش هينفع قولت لك مش هينننفع صدقنى انا مش هتقدر
سلامك هيوصل أول ما أشوفها

شرفتنى جدا زيارتك وأتمنى تكرارها
نورت

أحــوال الهـوي يقول...

الضرب غير مكلف زي البحث الجنائي
و الشتيمه ما بتلزقش
و هتك العرض ما لوش طول
المهم ان المحضر يتقفل علشان و جع الدماغ
... See more
بس ما تنسيش ان نسبة الحطا تقريبا واحده في البحث الجنائي الممنهج و المفبرك

و المسلسلات الامريكاني ما تكلش معانا

صفــــــاء يقول...

دكتور
تصدق انت جبت المفيد
ولسسسه هنحقق وندقق ونفحص طب وعلى ايه الغلب دة والمصاريف
هو آخرة ساعتين ضرب ويقر على اللى قتل جون كينيدي نفسه

والغرض مش المسلسل لكن القافيه حكمت بس

sal يقول...

كما ذكرت هناك بون شاسع بين العلم
والعافية

تحياتى

قلوب بتغنى يقول...

اهلا اهلا يابرنس اليالى يا غالى
من هنا ورايح هقرفك فعيشتك
خالتى الواد مصحينى من النوم الساعة 1 باليل يقولى قولى لاختك مبقناش فقرا وجبنا نت

momken يقول...

طبعا مو علم البحث الجائى والشرطه مدارش وكل مدرسه تختلف عن الاخرى

لكن عندنا اعظمهم وافضلهم علشان كدده ضابط الشرطه عندنا محترم وحبوب جداً

والسيد رئيس المباحث شخص له قيمه عظيمه

بس مش عارف ليه اغلبهم بيتعالجوا نفسياً بعد خوجهم على المعاش
وعشين فى الميه من نزلاء المصحات ضباط سابقين؟؟؟



بوست رائع ومفيد جداً

تحياتى

صفــــــاء يقول...

sal
****
اة اللى عندهم علم واللى عندنا بونيه

منور

صفــــــاء يقول...

قلوب بتغنى
*************
شوشو ... حبيب قلبى
منورة يا برنسيسه
انتو احسن ناس فى القارة يا قلبى

صفــــــاء يقول...

momken
********
لو العلم مدارس فـدة برة
هنا العلم اصلاحيه
سجن .. تأديب وتهذيب وأصلاح
يقوم المواطن يطلع من قسم الشرطه صايم مصلى باصم بالعشرة

شرفتنى جدا وان شالله دايما

mostafa rayan يقول...

صفاء يا حبيبتى انت عارفه انه على مذهب الحزب المباركي النظيفي العادلى الحاكم بيعترضو طبعا بيعترضو ولا انت عندك راي تانى ولا ايه ؟
كل تحياتى ليكي يا صديقتى العزيزة

بسنت يقول...

هههههه
وهنيالك يا فاعل الخير

متهيألى يا صفاء ان العلم وصل ولكن المشكله فى العقليات اللى بتتعلم
يعنى العلم الجنائى بيدرس بالتأكيد
وغالبا كمان بيجى خبرا من الخارج
لكن ماحدش بيفكر
يعنى الواحد لما بيشوف المسلسلات الاجنبيه
دى بيتعقد اساسا من الذكاء
فهمتى يا صفاء المشكله هنا هى الذكاء

بجانب مافيش احسن من الراحه
مش تعب ياعينى وجاب كام واسطه علشان يدخل شرطه
ودفع كام الف يا عينى علشان يقولوه يا باشا

يالا خلى البلد تشرب
بس طبعا لكل قاعده استثناء
دول ساعات بسمع عنهم او اقرالهم حكايات ظريفه خاصه بتوع المخابرات زى رجل المستحيل كده
هههههه

دمتى بخير يا صفاء

صفــــــاء يقول...

مصطفى ريان
***********
هلا يا باشا وطبعا طبعا كل اللى يتقال صح واحنا خدامين الحكومه والشعب فى خدمه الشرطه وعلى راسى يا باشا على راسى

صفــــــاء يقول...

بسنت
*******
دكتور ... أخبارك والله ليكي وحشه

مش عارفه بجد والله يا دكتور العيب فى الذكاء فعلا والا ايه
يعنى معقول مافيش عندنا العقول اللى تستوعب
يعنى 80 مليون غبى ؟ والا عيب التعليم اصلا اللى بيخرج شخصيات غير قادرة على استيعاب العلوم الحديثه او غير قادرة على الأبتكار
اصل كمان تقريبا ممنوع الأبتكار فى العمليه التعليميه المصريه على ان تظل العمليه فى النمليه لحد ما ياكلها الفار
رجل المستحيل يااااة فكرتيني ... دة تاريخ الطفوله المصريه فى عقد الثمانينيات

فتاه من الصعيد يقول...

ههههههههه

يخرب بيت عقلك يا صفاء .... يابنتي ده القذافي شو :)

وحشاني مووووووووووووووووووت

شكرا على سؤالك عني يا قمر

تحياتي