الأحد، 31 يناير 2010

مصر بطل أفريقيا

.
هييييييييييييييييييييه ومصر بطل أفريقيا ... ودة كفايه
.

مش عارفه ليه مفتقدين الحماسه الفظيعه اللى كانت عندنا قبل ماتش الجزائر


ولا فيه اغانى وطنيه فى القنوات ... تقريبا بنحتفظ بيها ضد الأعداء العرب بس


لكن ربنا يستر لأن احنا عندنا عادة غريبه جدا


لما بننتصر قوى ... وبندخل منفوخين قوى ... بنخيب قوى


هزمنا الجزائر فى القاهره وكنا رايحيين السودان تحصيل حاصل وفجأة أحنا اللى طلعنا


وبما أننا خرجنا الجزائر بفضيحه فــ ربنا يستر علينا امام غانا

.
والمصيبه ان الثنائى المرح رايح انجولا ... والعيال دى نحس ووشها شؤم

.
أستر ياللى بتستر

هناك 18 تعليقًا:

البنفسج الحزين يقول...

معاكي حق والله انا برضه خايفه من كده أصل احنا كذا مرة فرحنا قبل الأوان...
وبعدها خدنا علي دماغنا فاكرة كاس العالم للقارات لما فزنا علي ايطاليا ولعبنا حلو جدا مع البرازيل الماتش اللي بعده أمريكا طلعتنا من البطوله... وبرضه في كاس العالم للشباب كسبنا كذا ماتش وفرحنا قوي بروحنا وبعدين خرجنا ...وفي كاس العالم بالغنا جدا في الفرحه بعد ماتش الجزاير في القاهرة واتوكسنا بعدها في السودان وخرجنا بزفه وقطع علاقات ...ربنا يستر المرة دي ...حاطه ايدي علي قلبي احنا خلاص معدش فاضلنا غير كاس الامم الافريقيه نحاول نحافظ عليه بقا ربنا معاهم ...

صفــــــاء يقول...

والنبى بلاش تقولى فـ وشى يسترك
دة انت جبتى التاريخ اللى بسعى جاهدة انى أنساة
ومعلم عليا اوى ماتش كاس العالم للقارات
وجيالى حاله نفسيه من ماتش السودان
ومش عارفه النهاردة ممكن يحصل لى أيه
وخصوصا ان ناكر ونكير دول رايحين الماتش والعيال دى شؤم كيك يعنى
ربنا يستر

سلوى يقول...

ان ماتقفشتي يا صفاء

وان مدونتك دي ماتشمعت بالشمع البرتقالي

صفــــــاء يقول...

كدة يا سلوى ؟
كدة ؟
طب الأستقلال التام أو الموت الذباب
والعمر واحد والرب واحد
وعشانا عليك يا رب

هي وظروفها يقول...

صفاء هانم
.

بعد التحيه

لالالالا مش معاكي في حاجتين

اولا دول مش عيال دول ولاد مولانا اخص عليكي

ثانيا وشهم مش نحس خالص

لأنهم بميت وش ولون وطعم وريحه

بس الثابت والا متغير وبعيد عن الكوووووووره خالص

انهم عرفوا من اين تأكل الكتف

كوره شعب بيحبها تبقي هي السكه الي يبانوا فيها

كانو فين ايام الدويقه
كانو فين ايام غرق العباره
كانو فين لما القطر اتحرق
كانو فين لما قوتنا اتسرق
كانو فين لما شبابنا هاجر في فلوكه يهرب من الفقر والقمع
كانو فين لما اهلنا ماتو في قطر العياط
كانو فين لما السيول دمرت بيوت مش امنه
كانو فين لما احمد عز احتكر الحديد
كانو فين لما المخدرات بتباع ولا اكنها معطر جو
كانو وكانو وكانو فين اقولك ايه ولا ايه

الناس دي احنا اللي بنديها الفرصه
تشتغلنا ونرجع نعيط
صدقيني مش غلطتهم لوحدهم
احنا اللي خدتنا الزيطه ومشينا ورا الهبل والسفاله

مقصدش والله احرق دمك بكلامي

بس هي دي مصر وهي دي قله اصل اللي حاكمنا
واخيرا مبروك لمصر مقدما ياااااااااااه

صفــــــاء يقول...

وليد
حراااام
ماشى يا سيدى انا غلطانه
حقك وحقهم عليا
اسيادنا وولادة اسيادنا ولاد مولانا والى مصر المعظم
ومستعدة ابوس راسهم هما الاتنين بس ميروحوش الماتش دة
حرقو القطر وغرقو العبارة ووقعو الطيارة وغلو رغيف العيش وباعو الغاز وقطعو الميه وصدرو الكهربا وسرقو الضبعه
انا مسمحاهم
صحيح قلبى وربى غضبانين عليهم بس ومالو
يسرقو كمان اللى فاضل قناة السويس والسد العالى
بس وحياة راس ابوهم الغالى يسيبو الماتش دة
احنا شعب طيب وعبيط وسيبنا كل حاجه عشان يسبو لنا الماتش دة
كفااايه علينا قدمهم العسل فى السودان
وحلال الكاس على غانا مقدما
حسبى الله ونعم الوكيل

خواطر شابة يقول...

هههه ضحكتيني والله ياصفاء انا خايفة عليك من اللي سلوى قالته
تعرفي انا سأقول لك شيئا الان كنت اتفرج على الاستديو التحليلي للجزيرة قبل بداية المباراة انتقلوا الى لواندا ليستطلعوا اراء الجمهور المصري فماذا قالو احنا اللي نستاهل نوصل كأس العالم احنا اللي حنكسب الكأس مش الجزائر حتى المعلق في الاستديو استغرب وقال لحازم امام هي الجزائر طرف في مقابلة اليوم والكبيرة بقى كانت ان الكل يهتف ويقول 123 باي باي الجيري طب دول حيكون موقفهم ايه لو مصر لا قدر الله خسرت الكاس والجزيرة متشافة على كل المستوى العربي ليه منفرحش من غير منجرح في حد ليه الجمهور المصري مصر يستعدي الناس ليه ميكونش كبير حتى في فرحته
تعرفي انا بس باشكيلك منهم باعتبارك مصرية فبفضفض معاك انما انا نفسي مصر تكسب لان هذا المنتخب يستحق
اسفة على الاطالة

صفــــــاء يقول...

بصى يا ست البنات
احنا بنتشحن شحن تااام
والناس الوعى وحسن الاختيار عندها ضعيف
لدرجه ان الجزائر اصبحت عدو لنا يمكن اكتر من اسرائيل
وحتى بعد هزيمه السودان الوضع كان سخيف جدا
http://safagalal.blogspot.com/2009/11/blog-post_25.html

أكيد بنتمنى الفوز بس دة ماتش كورة
واكيد نحب ان الجزائر تظهر باحسن مظهر فى كاس العالم
الفرحه الرياضيه مطلوبه لكن السخافه ملهاش لزمه
اللى حازز فى نفسى ومحزنى اوى أنه صدقينى غانا هتفوز لأن والله العيال دى وشها شؤم ويقطع الخميرة من البيت
دول فقرو مصر كلها ... هيغلبو فى ماتش ؟
طولى براحتك يا قمر المدونه مدونتنا ونتكلم براحتنا

فتاه من الصعيد يقول...

الناس خدت بتارها خلاص بعد ماتش الجزاير

كلهم قلبوا صعايده ... ههههههههه

مااعتقدش ان الماتش ده مهم

تحياتي

صفــــــاء يقول...

هههههههه ومحدش تارة سخن غير الصعايدة

بس وحياتك انت وغلاوة محافظ المنيا الجديد عندى العيال دى نحـــــس

sal يقول...

مبروووووووك
الراجل البحيرى "جدو"
هداف الدورة
الراجل الصعيدى احمد حسن
احسن لاعب فى الدورة
خلينا نفرح يومين يا صفاء
وبعدين... فاصل ...ونواصل

بسنت يقول...

ههههههههههه
معلش يا صفاء طلع اخيرا وشهم حلو- يمكن علشان ما جبوهمش خالص فى اى قناه--
وفزنا الحمد لله
الواحد فرحان بجد يا رب دايما النصر لمصر
--------------------
مش عارفه تعليقى على النقاب طلع مشفر ليه
على العموم انا كنت قلت- حسب ما افتكر يعنى - انى لا معاه ولا ضده
هو فى رأى فضيله للى بتخاف ان يكون شكلها فعلا فتنه وملفت للنظر جدا
يعنى حريه شخصيه وكل واحد ح فى نفسه
بس عنى شخصيا افضل اتعامل مع اللى بشوف وشه بالرغم انى نادرا ما ابص بتركيز فى الوش بس مهما حصل فيه مرآه بردوا لنوايا - يعنى بالرغم انها بتتعامل بشكل كبير فى مجالات كتيره لانى لى اصحاب واقارب مرتدينه وهم شخصيات ممتازه فعلا - بس لا يعملوا- لانه بيكون عائق شديد فى العمل فى مصر يمكن ينفع مثلا فى السعوديه لوجود انفصال بين النوعين - لكن المشكله انه انتشر كموضه يعنى كل من هب ودب لابساه بصرف النظر عن الجوهر تقليد كمان خاصه لعائدين من الخليج يعنى مش قادره افهم ايه الغرض منه اذا كان الفعل عكس معناه
بس مش معنى كدا انى ارفضه لوجود فئه اساءت اليه كل واحده حره فى نفسها انا بس عايزه اشوف نساء محترمات محتشمات فى البيت والشغل والمواصلات او اى مكان اتواجد فيه لا غير
--------------------
لو هتروحى المعرض فعلا ابعتيلى على الايميل رساله بالميعاد

ودمتى بخير

mostafa rayan يقول...

مساء الفل عليكي ياقمرى
انا بكتبلك التعليق بعد فوز مصر
الف مبروك ليناكلنا
لك كل التحيه والود يا صديقتى العزيزه

SAYED SAAD يقول...

الف مبرووووووووووك لمصر والمصريين
كوني بخير

صفــــــاء يقول...

sal
*****
الف الف مبروك
واجدع ما فى المنتخب القومى
انه ابن الناس دى اللى هى احنا
ونواااصل بعد الفاصل

صفــــــاء يقول...

بسنت
*******
لا هو وشهم مش حلو ولا حاجه
دة هو من كرم ربنا ان البطوله كانت فى دوله تانيه والمصورين بتوعها مايعرفوش البركه بتوعنا فماحدش جاب الكاميرا عليهم
وبالتاااالى بركتهم مقدرتش تحل
وعموووما الف الف مبروك فرحنا لنا ليله

النقاب بقى معاكى انه حريه شخصيه ان الواحد يظهر او يختفى
الكلام كان عن ليه شخص او ما دوافعه وأسباب اقتناعه بهذا النوع من الزى

كمان فى التعامل برتاح لرؤيه وجه محادثى دة حقيقيه ولا أنكرها يعنى ولا تعيبنى وفى النهايه دة رأيي وكل حد حر في تصرفاته

أن شاء الله رايحه المعرض بس احدد المعاد بالظبط وابعت لك بيه وبإذن الله فى ظرف الاسبوع دة

صفــــــاء يقول...

مصطفـــــى
************
الله يباااارك فيك
مسائك فل ومسائك ورد ومسائك كل حاجه حلوة

صفــــــاء يقول...

سيد سعد
********
الله يبارك فيك شكرا
زيارة أسعدتنى جدا