الاثنين، 11 يناير، 2010

كرة النار


واحد أغتصب واحدة
شاب أو راجل أغتصب طفله
أى اجراء أو تصرف أو رد فعل طبيعي أيه ؟
هى طفله صغيرة وهو رجل عمرة 29 سنه معروف أسمه وعنوانه
فى أى بلد .. أمام أى قانون .. تحت أى حكم عرفى حتى , وبكل الأديان والملل والنحل
ما هى الأجرائات المتبعه ؟
نقول مثلا القاء القبض عليه ومحاكمته ؟
لكن ولأننا بنفكر من أى جزء من جسدنا عدا عقلنا طبعا
ولأن التعامل مع مشاكلنا بيكون بطريقه أرميها بعيد يمكن تخلص
أو كرة النار شوطها لحد ما تطفى لوحدها او لو مطفيتش تولع فى بيت الجيران ... لكن مش بيتنا
ولأن الطفله مسلمه والرجل مسيحي
فالقيادة الحكيمه والحكم الرشيد أستدعى لملمه الموضوع , وبلاش نكبر القصه أحسن النار تزيد
وبلاش نعملها فتنه طائفيه والأفضل أننا نكفى عــ الخبر ماجور , ونخلص الحكايه لحد كدة
والنتيجه ايه ؟
أطلاق النار فى الشوارع وقتل الناس فى ليليه عيد ... لأن ركن المشكله ودحرجتها بعيد مش حل
كانت النتيجه الطبيعيه ان كل واحد ياخد حقه بأيدة

أولا بقى الصعيد هو ناس زى اى ناس ... حكايه شطرى الأمه والأخوة الأقباط وشركائنا فى الوطن دى نغمه وأسلوب غريب جدا عننا لأن احنا ناس عايشين حياتنا ... عااااادى
مش بنفكر ان هذا شقيقى المواطن المسيحى وأنه شريكى فى الوطن ... مش بنفكر اصلا .
دة واحد او واحدة جيران او زملاء او شركا او اصحاب عمل .... ناس ... احنا ناس .
لما بنتفرج على البرامج ونسمع التصريحات بنستغرب جدا
لأن الكلام كله بيصب فى النهايه إلى أنه يرسخ فكرة ان دة مش جارك او زميلك ...
لا .. دة المواطن القبطى الذى يتمتع بحق المواطنه وشطر الأمه الآخر وأهل الذمه
هروله المسؤلين لزيارة الأنبا كيرلس والمنافقه والمداهنه تقول ببنط عريض
أن هذة البلد تأوى شعبين ... أنكم شعبين
شعب مسيحى وشعب مسلم ويجب عليهم التعايش ( ليس العيش ) لكن التعايش
كأنها هدنه أو مهادنه طويله الأجل يجب على أحدكم تحمل الآخر

منذ اعوام طويله وحين انتشرت الجماعات المتخلفه وسيطر العنف على مناطق كثيرة من محافظتنا وكان تبادل اطلاق النار أو حظر التجول طقس عادى ومعتاد وحتى حين تقع مشاكل تسمى ( طائفيه ) فأن الحل الأمنى الأمثل فى التعامل ( غفلقها على الكل ) ومعنى الغفلقه هى حاجه زى طينها على دماغهم
حظر تجول (على الجميع ) القاء القبض العشوائى (للجميع) التشدد فى التعامل والقسوة فى تطبيق الأجرائات (على الجميع) حبس الجميع فى بيوتهم بالأيام دون حتى الخروج للأسواق او السماح بشراء رغيف العيش
هنا ... لا فرق بين مسلم ومسيحي ... فسياسه التأديب تطبق على الجميع
عشان لما يتقرصو يعقلو وياخدو بالهم بعد كدة من أى تصرف


أحداث طائفيه ... أحداث عنف طائفى


هو حاله احتقان بين اصحاب ديانتين او طائفتين مختلفتين يسودها مناوشات مستمرة وكراهيه متبادله وعدم تقبل للأخر بل رفضه تماماً تتطور الى تخزين أسلحه وتكوين ميليشات وعمليات قتل ممنهجه و قدر عالى من التنظيم يرأسه شخصيات مؤثرة وذات ثقل وتحريض مباشر ومستمر
هذا هو مفهومى البسيط والمتواضع للمصطلح المرعب الرنان الذى يتشدقون به وكأنه لبانه ومجرد كلمات
لكن ان عيل مسيحى يصاحب بت مسلمه او واد مسلم يغوى بت مسيحيه او حاله حب وجواز او شويه عيال صيع بيعانو من الفراغ يقومو على بعض وشويه ضرب وتكسير كام كرسى تتحول بقدرة قادر الى أحداث طائفيه على أيدى وسائل الأعلام المصريه والعالميه وتصويرنا على أن الصعيد المصرى على حافه الأنفجار ويوشك على الأنقسام وان اى اتنين صعايدة واحد مسلم والتانى مسيحي هيقابلو بعض هيقطعو بعض دى تفاهه وهيافه وسخافه وعبط وتحويل أنتباة عن حاجات كتير أكبر وأهم
فعلا أى مشكله بين أى مسلم ومسيحى بتكون عاديه جدا كــ معاكسه بنت او خلاف على علاقه ما او حتى جرس كنيسه بيكونو شويه شباب أصغر وأهيف من ان حد اصلا ياخد باله منهم

سؤال مهم
هل الشرف والثأر له يستدعى حصد الأرواح بالألى فى الشارع وعشوائياً لمجرد الأنتقام لأن المغتصب مسيحي ؟
هو المفروض ان بنات المسلمين يغتصبوهم بس الشباب المسلم ؟
فى الحاله دى يبقى عمل حلال بل وفرض عين على شباب المجاهدين ؟
على أساس ان جحا اولى بلحم تورة ؟

هناك 23 تعليقًا:

خواطر شابة يقول...

معك حق طريقة المعالجة المتبعة تزيد الطين بلة لأنها لاتعالج المشاكل من جذورها بل تطبق مبدأ الموائمة والطبطبة على الجانبين وهذا لايعالج المشكلة بل يجعلها ككرة الثلج التي تتدحرج وتكبر رويدا رويدا الى ان تصبح اقوى من ان يتمكن احد من ايقافها

ENG./ELSAYED,PMP يقول...

اولاً :عدم تحمل المسئولية ... كرة النار ...الطريقة المصرية فى حل المشكلات ... صرح مصدر مسئول لم يفصح عن اسمه... ياختى كميلة ... اصله مبينكشفش على رجالة

هيه دى مصر يا عبلة

وافتحى الفايل ده هيعجبك جدا
بس للأسف تم تحويله من الطريقة المصرية لحل المشكلات الى طريقة الشركات فى حل المشكلات

http://www.arabswata.org/up/view.php?file=a1d16185e4

ثانياً : ايه علاقتك بالجنس الاخر ؟
زى علاقتى بحضرتك بالظبط

هيه دى الطريقة اللى بنتعامل بيها مع بعض

نفس طريقة

هل انت انسان على خلق ؟

نعم اعتفد انى انسان على خلق

يبقى منتش على خلق


نفس طريقة

متخلنيش ازعلك

قال يعنى الكلمة دى متزعلش

او

انا مش بهينك صدقنى

قال كده مهنوش

او

صدقنى انت ممكن تبقى انسان كويس


والكلمة جواها انه زى الزفت اساسا

الاخوة المسيحيين وشطرى الامة وساندوتش مؤمن

حاجة تجن بصراحة

الكلمة نفسها ... كأن الاخر - انا لست اتحدث بلسان المسلم الان بل بلسان المصرى - من دولة اسرائيل الشقيقة


ثالثاً : غفلقها ع الكل

فى احدى دول امريكا الجنوبية
دولة فنزويلا عرفاها طبعا
كان هوجو شفيز الرئيس المؤمن القائد الملهم العبقرية الفذة وصاحب الضربة الجوية ابان الحرب الفنزويلية ما جارتها المعادية يلقى خطابه على الشعب الفنزويلى الشقيقى

بينما اخذ يهتف احدهم

عاش هوجو موحد الاديان

عاش هوجو موحد الاديان

عاش هوجو موحد الاديان

وبستدعائه بعد الخطاب ... لان الابعد حمار ومفهمش الكلام

يعنى ايه موحد الاديان

قاله

ما هو ساعدتك كفرتنا كلنا


رابعا : التطور الطبيعى للفتن الطائفية والعنف الطائفى ( والعاطفى )

حرب اهلية ثم انفصال الجنوب عن الشمال ثم قوات حفظ سلام ثم دولتين وتتوالى عملية التفكيك حتى يكون لكل عائلة مصرية علم فى الامم المتحدة انا ناوى اخللى علم عائلة عبد المنعم موف كروهات

خامساً :تحويل انتباه عن حاجات اكبر واهم

ابداً السور والغاز والكلام الفارغ ده

ده التعاون المصرى الاسرائلى المشترك فى كافة المجالات



ملحوظة :

معلش سؤال يعنى

السطرين الاخرنين دول
جمل استفهامية
ولا
خبرية
اصل هتفرق معايا كتير
انا خايف اكون مقصر بصراحة

فتاه من الصعيد يقول...

فكرتيني بالذي مضى يا صفاء ايام حظر الزفت التجول

شوفي هو غياب سياده القانون واللجوء للاحكام العرفيه هو اللي بوظ البلد

فاكره فيلم الرهينه ..

لا موش احمد عز :D.... لما الولد المسيحي قاله هما بيكرهونا ليه ؟

قاله مين مصطفى ... قاله لا موش مصطفى ... المسلمين :)

ساعات بننسى ان المسيحي ده صاحبي وزميلي وجاري

تحياتي

Sherif يقول...

سياسة التجاهل .. والزمن كفيل بحلها.. هو الاسلوب المتبع .. علاوة على سوء تقدير الامور الذى نعيشه والنتيجة ذلك التخبط

نعم سيدتى هناك فتنة قائمة ومظاهرها واضحة للعيان .. ولو ان المصريين لديهم شئ هام حقيقى يلتفون حوله وينجزون ويفخرون وان حتى حرب ..طبعا غير المعارك الكروية التى يحشد لها كل الجهود ماصار هذا حالنا .. لنا فترة طويلة لم يسجل لنا التاريج انجاز واحد يذكر .. لا بناء .. ولاصناعة ولاكساء ولا دواء .. واذا اهلا بالتحرش والكلام الخائب ..

micheal يقول...

طريقة المعالجة الأمنية لن تنفع إطلاقا
لابد من تعديل الخطاب الديني في الجوامع والكنائس
حاجات كتير أوي لازم تتغير جوة كل واحد فينا
النظام هو المستفيد من اللي بيحصل بمنطق سيبوهم يأكلوا في بعض أحسن
تحياتي يا صفاء

صفــــــاء يقول...

خواطر شابه
***********
لا أبالغ ان قلت لك أنه لا يوجد ما يعالج
بمعنى أنه لو اتخذت مثلا مدينتى وهى تعتبر من أكبر مراكز المحافظه وقراها تعدت الـ100 قريه
أقول لك بكل ثقه لا يوجد ما يدّعونه من تمزق طائفى وفتنه طائفيه وخلافه
والكل يسعى لعمله وتربيه أولادة ... عكس كل ما يتم الترويج له
كرة النار هم يلقونها علينا لتأكل كل ما فى طريقها ولكن ليس نحن من أشعلناها
تحياتى لك

صفــــــاء يقول...

الباشمهندس السيد
******************
الفايل تحفه ... أجمل شئ شوفته من فترة وأصدق ما رأيت ... وصف حال بحذافيرة

وحضرتك فعلا بتتكلم عن نفس الشئ اللى بحاول اقوله
أنك لما تقول المسيحى دة مواطن
دة على أساس انه مش مواطن ومستنيك توطنه ؟
أو لما تقول شركاء فى الوطن .. أنهى وطن ؟ ومين اداك الحق فى الوطن تمليك تشرك دة وتدى دة وتمنح وتمنع
بالظبط زى ما قلت ( متخلنيش ازعلك وانا مش بهينك صدقنى وانت ممكن تبقى انسان كويس أو انت كويس بس ممكن تبقى احسن من كدة )
الغفلقه هى كلمه صعيديه بحته نحتفظ ببرائه أختراعها وحق أستخدامها
ونتيجه الغفلقه انك بتعاقب الكل بتذل الكل بتكفر الكل وبتهين الكل
ويحيا هوجو موحد الأديان
موضوع الأنفصال هو أبعد ما يكون عن الشعب المصرى ككل ولن تجد مواطن واحد بس يقولك ان دة ينفع او ممكن أو حتى يجوز
لأن ببساطه أحنا مش عشائريين زى الأردن مثلا والخليج ولا طائفيين زى العراق أو لبنان
احنا أفراد ومفككين كمان ولا أنتماء لنا لأى طائفه أو عشيرة أو حتى دين أللهم دين لقمه العيش بعد ما نؤدى الصلاة
كمان مصر المحروسه تقوم على تركيز السلطات والثروات ... يعنى لو أنفصلنا مثلا أحنا مش زى جنوب السودان .. لا فيه بترول ولا يورانيوم وآخر ما نحتكم عليه بجانب الأرض الزراعيه هى زعازيع القصب
وشويه مايه النيل النضيفه
(علم عائله عبد المنعم لو بقى موف كاروة هيخلى فيه الطمع فى العيله على أساس ان اللون نواعم حبتين
أخشوشن وخليه بنى مقلم )
السؤال بقى : هو زى ما تقول أختراع جديد أخترعته حاجه كدة استفاهميه على خبريه على أستنكاريه
يعنى الحرقه وضرب النار وقتل الناس فى الشوارع دى على شرف بنت مسلمه أغتصبها مسيحى .. طب ما احنا المسلمات بيتحرشو بينا المسلمين ليل ونهار وعلى غيار الريق والأغتصاب على ما قسم بقى وكل واحدة وحظها ... ماشوفناش الحمقه دى والأخد بالتار ولا لقينا واحد ينصفنا بالعكس 80% يقولك البنت هى السبب
المقصد بقى بعد كل الرغى دة أن القانون لا يجزء والشرف لا يجزء

صفــــــاء يقول...

فارس عبد الفتاح
حضرتك متخلف وقليل ذوق وأخلاق سيادتك معدومه وشايف ان حضرتك من الطبقه المثقفه مع ان حضرتك من 7 طبقات تحت الأرض دة غير ان حضرتك رجعى ومتحجر وعايش فى أغلفه كتب أصحابها نفسهم بطلو يقروها
وبين أفكار عمل عليها الدهر بيبي كاكا
بالأضافه لأن سيادتك متوهم أن مستواك الفكرى أرقى من الأخرين مع أنه لا يعدو أن يكون مساوى للمستوى الفكرى ( كــ الحمار يحمل أسفاراً ) وحضرتك حامل للأسفار دى وبترددها كما الببغاء ومتخيل أنها تمنحك مفتاح المعرفه واختام أحتكار العلم وسر الكون الأعظم
طبعا غير ان حضرتك اعمى البصر والبصيرة لأنى قلت لسيادتك قبل كدة ان وجود حضرتك غير مرحب به عندى ولا تعليقاتك مرغوب فيها ... إلا لما تتعلم الذوق فى مخاطبه الآخر واحترام كلامه ورأيه , لكن يبدو أن فهم حضرتك بطئ وقدرتك على التعلم معدومه
وفى الحاله دى انا ممكن أعلمك الأدب لو انت عاجز عن تعلمه بمفردك
تعليقات حضرتك تحذف والله العظيم بدون حتى قرائتها لأنك لازلت عالق فى نفس حفرة الزفت اللى مش عارف تطلع وتنضف نفسك منها
إتهامات سيادتك لى دائماً بقصر النظر وضعف المنطق والتسطيح وسخريه سيادتك من انى معرفتى مجرد معلومات عامه غير مدعمه بدليل معرفى , رأى حضرتك دة ممكن تطبعه على ورق تواليت وتحطه فى حمام حضرتك
للمرة الآخيرة يا ريت تحرمنى من وجودك وتعليقاتك وأرائك إلا لما تعرف تعرض وجهه نظرك بطريقه محترمه ( دة لو كنت تملك ما يكفى من الأحترام) للمرة الأخيرة إما ان تطرح ما تود قوله وتدعمه بما تشاء بدون تسفيه أو سخريه أو تعالى أو قله ادب
أو حضرتك تقدر تروح فى ستين داهيه
ولك كل الأحترام والتقدير

صفــــــاء يقول...

فتاة من الصعيد
****************
اسكتى دى كانت ايام ما يعلم بيها إلا ربنا ... كنا بنروح المدرسه واحنا ماشيه جنبنا فى الشارع مدرعه او نصف مجنزرة
غياب سيادة القانون فى بلد ماشيه على نظام كفار قريش
أن سرق فيهم الشريف تركوة وإن سرق فقيرهم طبقو عليه الحد

موضوع بيكرهونا ليه ان كان القائل مسلم أو مسيحي
دة جنان ... لأن قليل جدا لما اسمع حد بيقول كدة ... طبيعي ان حد يكون كاره للأخر او لدينه .. أحنا بشر وطبيعى نتلف
اللى حرام انهم عممو دة على الكل .. اللى حرام أنهم يشيعو الأمر على أننا على وشك حرب طائفيه

صفــــــاء يقول...

شريف
*****
إسمح لى يا افندم أختلف مع حضرتك فى نقطه
(نعم هناك فتنه قائمه ومظاهرها واضحه للعيان )
أكاد أقول عن ثقه قد تصل حد اليقين
أننا لا نعانى من أى فتن أو كراهيه جماعيه وليس من الوارد بل من المستبعد والمستحيل أن تجرى عندنا أى فتن او عنف طائفى
لأنه وفى حاله لو حدثت مشكله ما او صدام بيكون المسؤل هو أشخاص صغار السن سرعان ما يختفون وتخفت أصواتهم أمام شعب كامل يسعى للعيش وكسب رزقه ومواجهه مصاعب الحياة
مشروع قومى
آخر مرة سمعت الكلمه دى كانو بيقولوها على توشكى قبل ما يكفو على خيبتهم ماجور

صفــــــاء يقول...

مايكل
******
طريقه المعالجه الأمنيه فاشله بكل المقاييس
لأنها تظن أن الناس متربصين ببعضهم وأن النار تحت الرماد
تفترض أن الناس هم مجموعه من الحيوانات اللى يجب السيطرة عليها إما بالمحايله أو بالحديد والنار
عمرنا ما هناكل بعض ... لأنه ببساطه لا يوجد بين الناس اى تاريخ من العنف او الكراهيه تستدعى ذلك
تحياتى لك

بحر الالوان يقول...

اعتقد انها ليست بالكره علي الاطلاق ....وانما هي جبل الجليد الذي يظهر لنا اقل كثيرا مما يخفي .... اما النار حينما تشتعل فانها ينطبق عليها مقولة :

ان معظم النار من مستصغر الشرر....فلابد ان يتم نزع فتيل الازمة من جذوره ....والا اصبح الوضع معرضا للانفجار دائما في اي وقت .

تحياتي لك

ENG./ELSAYED,PMP يقول...

انتى مختفية فين بقالك حوالى 36 ساعة
وبعدين ليه اخده الخط التراجيدى مع مطلع العام الجديد - ربنا يطلعنا منه على خير - انا معرفتى بالمدونة بدأت بموضوع الرجالة الهبل اللى هيتهبلوا على النساء السليكونيات من المحيط الى الخليج

ليه بس يا صفاء شغالة تراجدى

وأوووعى تقوليلى الاكشن مليش فيه

صفــــــاء يقول...

بحر الالوان
************
جبل الجليد هو الذى يظهر اقل مما يخفى
وهو ما لاينطبق على هذة الحاله ... لأن ما يظهر أكبر بكثير من حقيقته نفسها

شرفتنى يا مصطفى

صفــــــاء يقول...

الباشمهندس سيد
****************
مختفيه لظروف والله يا باشمهنس لكن برجع بسرعه أهو

وللأجابه عن السؤال

انا جوزائيه

فتاه من الصعيد يقول...

انا اجي لحدك يا جميل لو وحشاكي :)

انتي اللي وحشاني

هنزل بوست قريب ان شاء الله

تحياتي

إيناس حليم يقول...

والله يا صفاء كل كلمة قلتيها صح 100%
لما كنت في اسيوط كنت بشوف الكلام ده كتير جدا، مشاكل تافهة زي ما بتقولي بتتحول لموضوع وحكاية وفتنة طائفية مع انها بتبقى في الأصل ملهاش علاقة خالص بالدين
بس هنعمل ايه اذا كنا شعب حافظ مش فاهم
تحياتي على صراحتك وتلقائيتك ومخك المتفتح جدا يا صافي

مصطفى ريان يقول...

والله العظيم كلام صح ومايتقالش إلا من دماغ واعيه ومتكلفه واخر تمام
انا موافق على كل اجزائه
وبحيكي عليه كمان
لك دوما كل محبتى وودي يا صديقتى الجميله

قديسك مولاتى يقول...

قبل الكلام يكون السلام . السلام عليكم ورحمه اللة . وحشتنا مدونتك والله ياصفاء . وبشكرك على اهتمامك بالسؤال عنى . مشكلة الاقباط والمسلمين ياصفاء هى مشكله صناعة التاريخ ، والتاريخ المصرى الحقيقى بيبدا من الصعيد . يمكن تكونى قراتى رواية عزازيل للاستاذ يوسف زيدان ، وتكونى عرفتى كم الخلاف اللى احدثته الروايه مع الاقباط لانها بتتحدث عن مذكرات كنسيه فى مصر والاسكندريه من 1500 عام . ومع انى مش شايف اى سبب يستدعى كل المشاكل اللى احدثها الاقباط الا انى شايف فى النهاية ان الاعتراض حق لهم بشرط عدم بلوغه حد المهانه ...عزازيل هو الشيطان باللغه السرياليه القبطيه لكن باللغه العربيه مش هايكون معناها الشيطان لكن معناه هايكون الحكومه المصريه اللى عمرها ماقدرت تواجه اى مشكله سواء قوميه او سياسيه او حتى إقتصاديه،وكل مصيبة تحصل تلاقى حكومتنا الموقره انشطرت لنصفين . نص هايقولك دى زوبعه فى فنجان ،والنص التانى قاعد يقرا الفنجان يمكن سيدى المحوج يقولهم على الحل . مصر باظت ياصفاء والسوس اكلها . مصر مش مشكلة اقباط او مسلمين .. مصر مشكلة شعب نفسه فى وطن ،مصر ضاعت من جوانا وهانعيش ندور عليها عشان مانعرفش مكان غيرها نعيش فيه . إيمانا بمصريتنا مالوش علاقه بديانتنا، ومالوش علاقة بمسلمين او اقباط .كل اللى احنا هانحتاجه هى مجرد وقفه .. مش من الحكومه لان دى امرها منتهى ،لكن وقفه مع نفسنا . ياريت كل واحد يسال نفسه شويه " ليه سمحنا بكل ده عشان يحصل ؟!!!" ..
تشرفت بزيارة مدونتك الممتعه ودومت مبدعة حقيقيه وارجو تشريفك بزيارة مدونتنا...

قديسك مولاتى يقول...

كان المفروض انى كتبت تعليق كبير على موضوعك المثير لكن مااعرفش مش لاقيه ليه . المهم . هااحب اختصر لانى مش من هواه اعادة الكلام. مشكله الاقباط مش مشكلة دين ياصفاء لكن مشكلة تاريخ كنسى اتولد فى مصر هاتقريه فى قصة الحضاره لديورانت وتقرأئيه فى عزازيل للاستاذ يوسف زيدان والتى اثارت زوبعه لدى الاقباط دون اى سبب يذكر .. عزازيل التى تحدث عنها يوسف زيدان هو الشطان ولكن باللغه الاراميه السرياليه القديمه ، ولكن عزازيل التى نتحدث عنها هى الحكومه المصريه ، والتى تعودت على مواجهة ازماتها بطريقتين . الاولى : الجزم بان المشكله هى عباره عن زوبعة فى فنجان ، والاخرى : قراءة الفنجان عل سيدى المحوج يوجد لهم الحل . مصر ضاعت من جوانا ياصفاء وبقينا شعب نفسه فى وطن ، ومش لاقى كلام تانى اقوله ..
حقيقى انا استمتعت بموضوعك المثير والمبدع . واتمنى تشريفك لمدونتى بعد العوده .

صفــــــاء يقول...

إيناس حليم
************
كلامك دة طبيعي
لأن كل أنسان محترم وعاقل بيدور على الأهم من الجرى وراء التوافه وخناق العيال او الشباب اللى لغى عقله وسيطرت عليه العصبيه أو الأنفعال الدينى او حتى مشى ورا واحد فاضى قال يضيع وقت فى اللعب على وتر الأديان
اهلا بك يا قمر ووالله بكون سعيدة جدااا لما بلاقى أسمك منور عندى

صفــــــاء يقول...

مصطفى ريان
************
تعيش يا درش دة المتوقع من شخص متسامح ومحب لكل البشر زيك
وإن شاء الله لك بوست مخصوص فى نقاش جاد وصريح وموضوعى عن كتابك الذى أقرأه الأن

صفــــــاء يقول...

قديسك مولاتى
************
مجدددددى
أزيك وأخبارك وأحوالك ... انا عرفت والله بوفاة والدك بس انت كنت مختفى ومقدرتش أعزيك
كنت بسئل عليك كمان أصحابك بس انت لما بتختفى محدش بيعرف يلاقيك يا عم
بالنسبه لتعليقك وأعادة الكلام ... أنا أسفه بس أضطريت اعمل اشراف على التعليقات لأنى أتبليت بواحد حقير وقليل أدب وقليل ذوق بيصر يبعت لى تعليقات رغم انى طلبت منه يحرمنى من تشريفه ليا بزياراته الغير مرغوب فيها
فــ ماعلش بقى لأضطرارك لأعادة كتابه التعليق مرة تانيه
وأكييييد لازم اجى أزورك واعرف كل أخبارك
بعد كلامك وتعليقك صدقنى مش لاقيه اى شئ أعقب بيه
وهكتفى بكل كلمه صح وحقيقيه انت قلتها
سعيدة جدا برجوعك