الأحد، 22 فبراير، 2009

النظريه الداجنه

.

شريف بيه صاحب مدونه شريف والصديق الراقى


كاتب بوست بيطرح موضوع شيق

هو جديد ومش جديد

لأنه بيتكلم عن نوعيه علاقه ممكن تتوفر لنوعيه معينه من البشر

لكن تطبيقها صعب جدا

هو بيتكلم عن أن أى اتنين مرتبطين ببعض بعد فترة لما بيدخل بينهم الملل

ممكن وبدل الدخول فى علاقه غير صحيه أو تؤدى الى تورط عاطفى مع فرد
.
غير الشريك ممكن يحيطو أنفسهم بشبكه من الاصدقاء

ودلل على هذا بفكرة أن الراجل ممكن بطبعه يقدر يتواصل مع أكتر من واحدة

ويكون لها مكان بقلبه لا يؤثر على قوة علاقته بالشريك ألاصلى

وشبه الأمر بفكرة الديك يعرف 50 فرخه











وأنه زى ما الراجل يقدر يصادق اكتر من واحدة على أرضيه صداقه فقط


فكمان الواحدة تقدر تصادق أكتر من شخص على نفس الارضيه

لكنه برضه بيقول ان نظريته او فكرته لما تصلح على أرض الواقع

لأنه وجد أن اى ست صعب عليها تتقبل فكرة الصداقه

.

لأن الست بطبيعتها عاطفيه وحتى الصداقه بعد فترة

.

بتقلب معاها بتعلق عاطفى ما بيوصل فى الاخر لغرام

.

ولأنها زى الفريك مبتحبش شريك

يعنى الموضوع كدة قلب لشئ أشبه ما يكون بصراع بين الفراخ والحمام

لكنه نسى شئ فى غايه الأهميه

وهو انه وحتى لو قدرنا نطبق فكرته دى وان الاتنين او طرفى العلاقه

يحيطو أنفسهم بشبكه واسعه من الاصدقاء

فالطبيعى انه يحصل ميل لطرف ما الى طرف أخر

لأن وحتى فى الصداقه صعب معرفه بدايه المشاعر من نهايتها

صعب معرفه متى تتطور العلاقه من مجرد صداقه الى أعجاب

الى تفضيل الى أرتياح الى قرب عاطفى حتى تصل فى النهايه الى حب
.
حتى لو قلب الراجل مختلف ويقدر يتقبل اكتر من طرف او شريك

الأ أنه وفى الاخر هيميل لواحدة معينه
.
ألاحتياج العاطفى بيقول كدة

قوانين البشر بتقول كدة

مش شرط لو حب تانى الحب التانى دة يأثر او يقلل من حبه للشريك الأصلى

لكنها بتصبح شريكه لها فى ما أعتبرته حق مقدس ليها وهو ملكيتها التامه لشريكها

وأذا طبقنا نفس ا لكلام على الست يبقى كدة بنتكلم فى كارثه

لأن لو الست أرتبطت بنوع من الصداقه مع حد غير الشريك الاصلى

وهو بيكون الزوج فى الحاله دى

مع الوقت او بمرورة شعرت بميل عاطفى لطرف تانى

مظنش ان الراجل ممكن يتقبل بسهوله انها والله حبت غيرة لكن دة مأثرش على حبها ليه
.
يا باشمهندس نوعيه العلاقات فى مجتمعاتنا عموما لا تعترف بصداقه متفتحه

على الطراز الغربى

ولأن احنا عموما شعوب عاطفيه بتميل للحب أو تبحث عنه فى أى علاقه

وحتى الراجل اللى عامل دون جوان ولا يقع بالحب فى سهوله

مسيرة يجيى عليه وقت ويتعلق عاطفيا ويحب فعلا

صعب جدا على الست انها تقبل شريك فى راجلها حتى ولو من باب الصداقه

صعب عليها انه يعرف غيرها او يصادق غيرها لأن مع الوقت هى

وبغريزتها الفطريه

عارفه ان الضعف البشرى ورغبه الراجل فى الحب هتخليه يميل لغيرها

زى ما هو بالظبط صعب على أى راجل انه يحس ان الست بتاعته او شريكته
.
او أى كان المسمى بتميل عاطفيا لغيرة ولو حتى من باب الصداقه بس

لأنه برضه غريزيا بيحس أو بيستشعر الضعف الانسانى

واللى هو موجود فينا خلقيا ... أتخلقنا بيه

مينفعش نحط نار جنب بنزين وبعدين نسئل مندهشين هى ولعت ليه

وزمان قالو الباب اللى يجيى منه الريح سدة واستريح

.

طبعا دة كلام كتير جدا مكنش ينفع احطه فى باب التعليقات

ولأنى شخصيا ومع أعترافى بالصداقه بين البشر ومن الجنسين

ألا انى ضد نظريه الديك والخمسين فرخه او الفرخه والخمسين ديك

لأن احنا كبشر فطريا كل طرف فينا بيميل عاطفيا للأقرب له

وبيتكون رابط عاطفى حتى لو لم نعترف بيه

ممكن نصادق ... أة

لكن كمخلوقات ....... نحن الى الحمام فعلا أقرب

نفضل الشريك الواحد ولا نميل الى غيرة بدافع الملل

او من الافضل ان نكون صرحاء ونعترف بأنه أحتياج عاطفى

وفى هذة الحاله لا يصلح ان نطلق على تلك العلاقه صداقه

ومنا هنا أتحفظ على النظريه الداجنه كمدخل للصداقه






.

هناك 22 تعليقًا:

Sherif يقول...

يبدأ السؤال دائما وينتهى بـ

هل هناك صداقة بين الجنسين أم لا؟

إذا كانت الاجابة لا .. فإن الموضوع برمته لالزوم لمناقشته .. لانه لامعنى له ..

واذا كانت نعم .. فالامر واضح ومحدد .. الصداقة صداقة .. وهى ايضا لون من العواطف الراقية التى تحمل كل شئ الا الخصوصية

بالتالى فهى ليست حكرا على احد بعينه .. وهى ليست شراكة كما تودى ان تسوقين الامور بعاطفة المرأة وهنا لب المشكلة ..

فالصداقة فى تقديرى تقبل الصديق .. وايضا حبيب ذلك الصديق كصديق جديد
أيضا ..

اما ان كل امرأة ورجل هما ليسا الا بنزين ونار فهذا اختزال بسيط للعلاقات وهى التى ربما تكون موجودة فى موروثات شرقية .. تحبسنا دائما فى اطر لالزوم لها ..

هل سمعتى قولا مثل .. ده زى اخويا .. او دى زى اختى .. هذا ينفى تماما ان اى اثنين لابد وان يقعوا فى حب بعض .. فماذا تسمين تلك العلاقة ؟ أيا كان المسمى فذلك ما اعنيه بالضبط .. وهذا ما ادعو اليه .. وهذا النوع من العلاقة موجود حولنا .. ومهما وسعت دائرته فلا غبار عليه .. لانه وان كان راقيا .. فانه لايرتقى الى الخصوصية ..

ارجو ان اكون قد اوضحت وجهة نظرى

صفـــــاء يقول...

.
هذا عن الصداقه فى أطارها المعروف والمناسب لمجتمعاتنا
لكن ان نحيط أنفسنا بالاصدقاء للخروج من حاله ملل نتيجه طول العشرة او ما شابه
فهى حاله من الفرار او الاحتياج العاطفى نغطيها بقناع من الصداقه
ان كانت مجرد صداقه كأى صداقه وفى ظروفها او مناسباتها العاديه فهى صداقه
اما احاطه النفس بالاخرين لدرء الملل او حمايه من السقوط فى عاطفه خارجيه فهى مجرد خداع للذات غير مجدى

لا خلاف او اختلاف فى وجهات النظر التحفظ فقط على الاسباب والنوعيه
.

romansy يقول...

اكيد صعب على المراه انها تقبل شريكه فى حياه زوجها
بس ليه من الاحساس تسمح بكده
دايما تكون متجدده
ترجع زوجها تانى لايام الخطوبه وتحسسه ان كل يوم غير التانى
كده الحياه هتبقى احسن بكتير

حسن حنفى يقول...

اعتفد ان دي بتكون مجرد خطوات تدريجيه وفي الاخر لو الراجل او الرأه اختارت صديق علشان تبعد الملل هتعمل ايه لو هي في يوم اتعلقت بيه ؟!

وهل الراجل نفسه او المرأه حد منهم يقبل بعد الزواج ان الطرف الاخر يقله معلش اصلي هخرج مع صديقي نتمشي شويه ونيجي ؟!

أحــوال الهـوي يقول...

موضوع جميل و شيق و لكي نستطيع الرد عليه اعيد صياغة بعض الافكار بشكل علمي بعيد عن نظرية الديك و انفلوانزا الطيور الرجل بالطبيعة الهرمونيه و الجنسية اكثر ميلا للتعدد و هذا شئ مسلم به و الدليل تحليل التعدد للرجل في الزواج دون المراة
طبيعة المراة السويه انها تميل لشخص واحد في الحب و الزواج و من تشذ عن القاعدة تعتبر نقيض للطبيعه الانثويه رغم انها موصومه بالعاطفيه و الرقة و الحنيه و كانها بتلك الصفات عرضة لتعدد العلاقات و هذا مفهوم خاطئ
النقطة الاخري علاقة الصداقة بين الرجل و المراة لا بد من و جود بعض القيود و الحدود لا تتعدي حاجز الزمالة وفي اطار العمل او الدراسه و اعتقد انها علاقة كامله لا تحتاج الي اختلاطها بالامور الشخصيه و الا سلكت طرق اخري بغير قصد و لا نيه
و مسألة الصدقات الكثيرة التي يعتقد البعض انها تكسر الملل و تدب بالنشاط في العلاقات انا معك انها تجلب الكثير من المشاكل التي تقلب الملل الي فرقة و نفور
و الحل في اعتقادي هو تغيير النمط الروتيني للحياة الزوجيه من ان الي اخر فسحة فيها الزوجين فقط بعيدا عن الاولاد عشاء خارج المنزل و الامثله كثيرة
طولت
تحياتي

صفـــــاء يقول...

.
رومانسى
*******

هو زى ما تقول كدة بعد فترة طويله الناس بتزهق حتى من التغيير وبتبقى أتعودت على بعضها زيادة عن اللازم
لكن جميل طبعا اننا نحاول ندخل بعض التغييرات على حياتنا ونجددها بأستمرار

شرفتنى
.

صفـــــاء يقول...

.
حسن حنفى
*********

شوف يا بنى ... مش انت لسه ثانويه عامه وصغير اهو ؟
بس بسم الله ما شاء الله على عقلك
.

صفـــــاء يقول...

.
احوال الهوى
**********

صدقا لا أعتراض عندى على الصداقه بمفهومها العادى والموجود بكثرة
ونعم هناك صداقه بين جنسين وهناك حب اخوى بل واخوة وصداقه تفوق حد الدم
لا أعتراض لدى على كل هذا
لكن تحفظى كان على نقطه معينه
هل نتيجه ملل من العلاقه الدائمه نتجه الى احاطه أنفسنا بالأصدقاء كى لا نقع فى فخ علاقه خاطئه ؟
الصداقه موجودة نعم , معترف بها نعم
لكنها لا يجب ان تكون نوعا من الهروب او غطاء ما او حمايه
بالأضافه الى أننا وبحق شعوب عاطفيه نميل دوما ناحيه التخصيص والاحتكار فى العلاقه مما يدفعنا فى المعتاد الى الاتجاة بها الى منحى أخر يورطنا
وطوّل ولا يهمك المدونه دى بتاعتى والمصحف مش سلفاها
.

مصطفي ريان يقول...

بصي انارأيي لما يحصل ملل
ممكن نقضي عليه بتغيير الجو نطلع اسكندرية يومين او حتى مراتي تروح عنداهلها يومين وانا اروح عندامي
- وانعم بذكريات العزوبية اللذيذة - لكن حوار نقضي عليه بالصداقة دة لاء مش مقتنع بيه قوي اوحتى لو كدة يكون في حدود زي مثلا نخرج مع بعض - صاحبي ومراته وانا ومراتي- ونروح نتعشي في مكان او نعزمهم عندنا او نروح عندهم
لكن لازم يبقي في حدود مش سايبة
لان الواقع بيقول ان كل من الطرفين شديد الغيرة على الاخر
لو انا خاطب واحدة ولاقيت ان ابن خالتها واخد عليها شوية زيادة اكيد هحزرها توقفه عند حده وهي لو لاقت بنت خالتي هزاها معايا مفتوح شوية اكيد مش هتسكت
دة رأيي
ولك ولشريف كل التحية

L.G. يقول...

لا مفيش صداقة بين الرجل والمرأة فيه قرابة معرفة زمالة ماشي الصداقة صعب

وبعدبن مفيش حد أخو حد الا اللي من لحمه ودمه يعني لو راجل وست أصدقاء تخرج معاه وتسيب جوزها في البيت زي ما بتخرج مع صاحبتها :(
وبعدين فين الراجل ده في مصر ؟؟ ده الرجالة بتغير من خيالها وحتى من ممثلين السينما على الاقل الستات مبتغيرش من الممثلات بجد والله
ده أحيانا الراجل بيغير من صديقة مراته لأنها بترتاح تتكلم معاها

وبعدين الغرب المتفتح بتاع الصداقات
خدي عندك مسلسلاتهم وكلامهم عن نفسيهم
ذا بولد وديسبرت هاوس وايفز وغيرهم
كل الرجالة مشت مع كل الستات لدرجة والله نسيت مين جوز مين فيهم
ولا نستطيع أن ننحي الجانب الديني
عندهم الخيانة زلة وتعدي
عندنا من الكبائر

آه حاجة مهمة نسيت أقولها في مدونة أستاذ شريف
الراجل اللي ميقدرش يتحكم في تصرفاته ولا مليون مراقب جماعة حيلمه
الرقيب ربنا موجود علطول الانسان يخاف ربنا حيمشي عدل راجل أو ست ولو محتاجين الحب ولو أزواجهم مطهقينهم وزوجاتهم وحشين يطلقوا ويتجوزوا ناس تانية وللراجل يتجوز تاني
والست تخلعه ونخلص
ومن الممكن منتجوزش وخلاص
عذرا للإطالة في أول تعليق عندك
تحياتي :)

أحــوال الهـوي يقول...

مازلت متحفظا علي معني الصداقة بين الجنسين و اعتبر انها لا بد ان تكون في حدود الزمالة بدون ان تمس شئون شخصية من كلا الطرفين
واذا كنت تقصدين المعارف الاسريه اعتقد ان الاختيار ايضا في اضيق الحدود لمن يستحقون ان يدخلوا

ده راي لا يفسد للحوار قضيه

تحياتي

صفـــــاء يقول...

مصطفى ريان
**********

انت تتحدث عن الملل الوقتى فى العلاقه والذى يزول باحداث تغيير ما أو سفره قصيرة
وهذا طبعا لا مانع عليه ولا اعتراض بل وهذا ما يجب فعله غى أى علاقه سويه كى لا يتسع الشرخ بين الزوجين
بس النقطه الخلاف بينى وبين شريف بيه هى نوعيه الصداقه دى
يعنى الصداقه فى أطار مجموعه من الاصدقاء والزملاء هى فعلا من أرقى المشاعر البشريه
لكن لا يجب ان نجعلها مجرد غطاء او حمايه لنا من الوقوع فى حب طرف أخر او التورط فى علاقه ما

وبعدين يا مصطفى هو مين فينا اللى صعيدى
دة انت طلعت صعيدى اكتر منى ...

شكرا ليك رأيك فى الموضوع
وزى ما انت عارف أى خلاف بينى وبين صديق بيكون مجرد خلاف رأى وانا مستغناش عنكم
لك كل التقدير والمودة

صفـــــاء يقول...

L.G.
****

طبعا شرفتينى جدا جدا جدا
وتعليقك فى منتهى الرقى والذوق زيك بالظبط
ودة رأيك فى نوعيه العلاقات اللى ممكن تؤدى الى نتائج غير محمود عواقبها
وزى ما انت قولتى برضه ان الغرب عندهم العلاقات متفتحه ومتشعبه جدا ومشاكل العلاقه والنسب وحتى القضايا اللى بيثيروها فى المسلسلات بتاعتهم واضحه جدا
بس طبعا والأكيد ان مش هو دة اللى بيدعو ليه الباشمهندس شريف لأن احنا كلنا مسلمين وحتى أقباطنا شديدى الالتزام يعنى احنا عموما مجتمعات محترمه
بس الخلاف الفكرى عن انه بينادى بصداقه متفتحه ذات أطر اكثر مرونه ودى نقطه الخلاف لأن شايفه أن حتى لو راعينا الحيطه والحذر برضه هيظل هناك شبهه الخطأ او الوقوع فيه لأن ثقافتنا وطبعنا غير مؤهلين للنوعيه دى
معاكى فيه قرابه وزماله وحتى صداقه متحفظه
وان الرقيب على البنى أدم هو نفسه قبل المحيطين بيه
وكلامك ليس أطاله بل هو فى أطار مناقشه وكلنا بنقول رأينا فيها ورأيك شديد الاحترام وحضرتك مشكورة عليه

صفـــــاء يقول...

.
احوال الهوى
**********

يا دكتور ولا أى رأى يفسد لدى للحوار قضيه وكل الاراء مقبوله ومعترف بها وكل يحاول أثبات او ترجيح وجهه نظرة ودة أسمه حوار وليس أجبار وفرض رأى

وبكدة هنبقى 3 مختلفين فى وجهات نظر حول موضوع معين

فأنا مختلفه مع الباشمهندس شريف فى سبب الصداقه بين الجنسين وانت مختلف معى فى تعريف الصداقه ومفهومها بين الجنسين وفى النهايه كل رأى يحترم مادمنا كلنا عبرنا عنه بأسلوب متحضر وراقى

mostafa rayan يقول...

صفاء
اقولك الصراحة اصل انا صعيدي متنكر في زي قاهري اوحلواني حسب التقسيم الجديد
هههههههه

وبعدين يا قمر اللي يعرف حد جميل قوي
زيك مايفكرش ابدا انه يستغن عنه
ربنا مايحرمني منك ابدا يا صديقتي الغالية

!!! عارفة ... مش عارف ليه يقول...

قرأت الموضوع عند شريف

ولم أعلق لإعتقادي أنه الصراع الأزلي

بين الجنسين وأن الجدل هناك سيكون عقيم

ولن يؤدي إلى نتائج

لكن وجهة نظرك هنا أعجبتني

وأتفق معك في نظرية "الحمام"


خالص تحياتي
وليد

صفـــــاء يقول...

.
مصطفى
*****

طبيعى ان اللى يكتب كل الحاجات الحلوة دى واللى فى مخيّلته كل الافكار الجديدة والمبتكرة دى يبقى حلوانى

شكرا يا مصطفى ليك بجد وربنا يخليك ويديم الود بينا
.

صفـــــاء يقول...

.
عارفه ... مش عارف ليه
*********************

المحترم والراقى وليد
هى أى شئ يخص علاقه المراة والرجل يعتبر صراع قديم جديد
بس احنا أختلفنا حول نقطه ما وكل واحد حب يوضح وجهه نظرة
أما بالنسبه " نظريه الحمام "
فدة فعلا رأى وفطرة خلقنا عليها
أن كل شخص بيحتاج لشريك محدد تمتاز علاقته بيه بالخصوصيه والحميميه
بعيد عن أى نوع اخر من العلاقات الأنسانيه الأخرى والجميله أيضا كالصداقه

شرفتنى جدا شرفى رأيك وليد
.

assafo anaroze يقول...

صفاء
انا اللي مؤمن به ان الصداقة الحقيقية موجودة بين الست و الراجل و مفيش مشكلة تكون هناك علاقات صداقة مختلطة بالرغم من ان مجتمعاتنا محافظة شيئا ما و ما تقبل النوع ده من العلاقات بس التغيير بيجي مننا احنا وبعدين شوي شوي يكون التغيير اوسع
بس فكرة البشمهندس رجعية و متخلفة ايه يعني ان الراجل زي الديك و يقدر يمنح عواطفه للعديد من النساء احنا يبقى موجودين في سوق و بنبيع عواطف زي العيش و البطاطا ايه ده
او ان الست تحب اكثر من راجل و تمنح عواطفها
المنطقي و السليم اننا عندنا قلب واحد و عواطف تتوجه لشخص واحد و اوحد هو الشريك اللي بنحبوه ونلتزم معاه اخلاقيا
الالتزام الاخلاقي مع الشريك هو الاساس في نجاح اي علاقة حب و بالتالي لازم ان الاخلاص و التفاني في حب شريكنا يكون ديدنا في الحياة
مودتي

صفـــــاء يقول...

اسافو
******

حكمك بالرجعيه والتخلف انا اسفه بس مش مقبول ... احنا مش بنتخانق احنا مجرد بنتناقش
وانا معاك فعلا فى امكانيه الصداقه وحاجتنا اليها ومكانتها فى حياتنا
والبشمهندس شريف اتكلم عن مفهوم الصداقه صحيح لكن احنا اختلفنا على بعض المبررات وهو صديق عزيز وفاضل كما انت بالظبط كما وانه شديد الثقافه والرقى
وربما أدعوك لقرائه البوست الخاص به ساعتها ستتمكن من فهم كامل الموضوع وان نقاشنا مجرد خلاف فى الاراء لا يستدعى اى خلاف بيننا

صديقى الدائم التواجد
لا حرمنى الله من زياراتك الجميله ونقاشاتك المميزة

assafo anaroze يقول...

فاء
فهمتني غلط
ان مش قلت ان البشمهندس متخلف و رجعي لا ان فلت ان "الفكرة رجعية و متخلفة" هناك فرق
اما انا فبحترم اي كان مهما كانت توجهاته و افكاره واثنيته او عرقه
تقبلي مروري
صديقتي صفاء و اتمنى انك تشرفينا في المدونة
غبت عنا كثير

صفـــــاء يقول...

.
اسافو
******
مدام فهمت غلط يبقى انا بعتذر

وانت فعلا صديق راقى ويسعدنى النقاش معاك سواء اتفقنا او اختلفنا

دائم تنير المكان بزيارتك