الثلاثاء، 22 سبتمبر 2009

صعيد الناس التانيين

أتيعه تـــئـتع الصعيد واللى بيجى منه
.
عشان بتوع التليفزيون يرتاحو مننا ويريحونا

ويرحمونا من المسلسلات

لما نخلص صعيدى صعيدى وصعيديايا صعيديايا

وننقرض مش هيلاقو حد يمثلو عنه

وأيييه وحوصول أيييه

وجاك خابط وعاد

وناس تحزق اوى وهى بتتكلم

ويزعقو وصريخ

ولا كأننا واقفين فوق الجبل

وذئاب الجبل وعرسه التل وسلعوة الهضبه وحااااجه غلب

ولطيف بيه ومندور بيه وماعرف جابو البهوات دول منين

وسرايات وناس راكبه خيل وعصابات ساكنه الجبل

وطالعين الجبل نازلين مالجبل

جبل ايه هو حد فيه حيل فى الحر دة يطلع السلم حتى

ولا بعد السم الهارى اللى بناكله بقى فيه صحه

ولازمن تاخد بتار بوووك يا ولد

طب سؤال يعنى هما بيحزقو اوى ليه

دة حتى الحزق وحش على صحتهم

وممكن يعملو حاجات مش ولا بد يعنى
.
وتلاقى الاخت الفاضله الممثله تقولك لا انت متعرفهمش دول ناس سعايدة
.
يا حلوووة ... سعايدة ازاى يعنى
.
وكل واحد صاحب مسلسل من دول

يقولك انا اصلا جذورى صعيديه وبكتب من واقع خبرة

جذور ايه هو احنا افارقه فى فيلم امريكانى ؟

وخبرته دى وقعت فوقيه وتقريبا كانت تقيله جابت له غيبوبه

خرف فيها وهبل اللى بيهببه دة

عموما هو تقريبا كل الصعايدة جالهم عقد عمل فى الخيطان


وبوابين فى القاهرة

لعل وعسى ربنا يتوب علينا من أبداعات كل مؤلفى ومخرجى

الدراما الواقعيه الصعيديه الهنديه

هناك 41 تعليقًا:

أحــوال الهـوي يقول...

علي الرغم اني ما شفتش مسلسلات السنه دي
لكني متخيل اللي انت بتجوليه و لان اللغوه الصاعيدي بجت زينه و كلش بيتكلمها مع الحزق لغاية ما تخينا ان الحزق من لزوم اللغوة الصاعيديه

و علي الرغم من اني اعرف صعايده متيير ما شفتش اي منهم بيتكلم من قاموس التليفزيون و اشك انها اللغه الهيروغلفيه
القديمه
تجعدي بالعافيه

تحياتي

promise is promise يقول...

حمد لله على السلالالالامه يا قمر

على فكره انا جيت قبل احوال الهوى بس كنت مش عارفه اكتب تعليق ما كنش راضى يفتح معايا


يالا ما علينا

انتى تعرفى بقا ايه المشكله
لما حد يعرف انك صعيديه ويقولك انتى ليه مش بتتكلمى صعيدى

ولا الطلب الغتت الرخم ما تتكلمى صعيدى شويه

خلاص الاعلام راسم صوره فظيعه وكل سنه نقول يا جماعه احنا مش كده ولا احنا قاتلين قتله ولا عندنا غوله ولا ديابه
بس اهوه هما شايفين كده وان دل هذا على شى يدل على انهم مش بيشوفوا


دمتى بكل خير
وكل سنه وانتى طيبه
برضه هقولك مستنيه عصفورى لانى اعشقه جدا

غير معرف يقول...

هههههههههههه

عود احمد

عن اذنك بقا علشان اصلي الولد قال هياخد بتاره ويديني ميسد .... وهو بيرن عليا علشان نطلعوا الجبل سوا

سلام يا خيتي

غير معرف يقول...

بس على فكره .... الصعيد الجواني فيه بعض اللي بيتقال بس موش كله كده ....

يعني مثلا الجبل اللي بيطلعوه ده الجبل الغربي اللي في اسيوط بس هو بقا رمز في كل مسلسلات صفاء عامر .... مع ان قنا موش فيها جبل ولا نيله ولا حد بيطلعه

كمان المنيا مفيهاش كده.... بس ماتنسيش عزت بيه حنفي .... وخط الصعيد اللي مات من سنتين ده

اللغه هي اللي مسخره .... انا كل ما اكلم حد يقوللي موش بتتكلمي صعيدي ليه :)

صفــــاء يقول...

احوال الهوى
-------------
والله عملت خير انك مشوفتش
لأن كل اللى عدى جنب تليفزيون وكان بيعرض مسلسل صاعيدى
خدله طوبتين ودبشه فى دماغه من كتر الخناق والضرب والزعيق اللى فى المسلسل الواكعى
وممكن تكون اللغه فعلا هيروغليفيه نظرا لأصلنا الفرعونى الفزيع
وحاسب احسن العافيه تجعد هى عليناتبططنا

صفــــاء يقول...

الوعد الحق
------------
فعلا عندك حق
ما تتكلمى صعيدى شويه
وكان الواحد قدامهم بهلوان فى السيرك ما تتنطط لنا شويه
فرجنا

وتحسى بأنفصال تام كأنك بتتكلمى عن دوله تانيه
او قارة مجهوله شافوها اول مرة فى التلفزيونات

حاجه فعلا مستفزة

وحاضر والله يا قمر مقدرش اتأخر عليكى بس اكتب شئ مناسب يستحق أنه يقرأ

كل سنه وانت طيبه يا قمر

صفــــاء يقول...

فتاة من الصعيد
----------------
طب من فضلك وانت راجعه من الجبل هاتى لى معاكى علبه كانز دايت عشان الرجيم

هو الجبل والصحرا فعلا بيحاصرو النيل من الناحيتين منكرناش
الجبل الغربى على شط النيل بدأ من القاهرة على خط النيل والصحراء الشرقيه لحد ليبيا
بس دى مجرد تضاريس جغرافيه
مهياش حدود لدوله تانيه مجهوله يسافر أليها المؤلف من دول ويرجع بكل غريب عن واقع جمهوريه القاهرة ونواحيها

عموما بقى كويس انى قفشتك هنا عشان اقولك انى مش عاجبنى انك تقفلى مدونتك
ها بس

mostafa rayan يقول...

مقال ساخر ساحر من الدرجه الاولى
طبعا عندك حق في كل كلامك
الصعايده مش دول خالص
على رأيك دول من الصعيد الهندي
بس سيبك من كل ده انت ياعم صعيدي مودرن وزي القمر كمان وانا اول حد يشهد بكده وطبعا ليك حق تقول كل ده واكتر منه كمان
كل سنه وانت طيبه يا قمري وربنا
يحققلك لك الخير

amr imam يقول...

والله عندك حق دى حاجة نيلة والحياة عندهم جميلة يقتلة دة ويقطعوا دة
زى مايكون عايشين فى بلاد الوا الوا
جدتهم ارف
المهم انا الصلا جاى ادعوا حضرتك لتشريفى انا بتكلم فى موضوع مهم عن الادمان وتجربتى الشخصية معاة
ونفسى اكبر عدد من الناس يقدر يستفيد
حتى ولو بالعظة
مع فائق احترامى

أبــــو ضـــيــاء يقول...

آه والله عندك حق , اصلهم ما شافوش الصعيد

ادم المصرى يقول...

كل عام وانتى بخير صفاء

ومرسى جدا على سؤالك

اس مقدرتش اقرأ بوستك المره الجيه هقرأه ان شاء الله

غير معرف يقول...

ههههههههههه

ولا انا كمان عاجبني قفلها .... لا بهزر عاجبني :))

المهم انا اقصد الجبل الغربي يا بنتي مش الشرقي .... انت ماروحتيش اسيوط ولا ايه .... في هناك جبل لو ان ماشيه تحطي ايدك عليه :)

ده جنب البيوت عادي .... وكان الخط بتاع زمان بيستخبى فيه ..... وبرضه الخارجين على القانون زمااااان .... بس خلاص راحت ايام الجبل ..... وده كان مخصص لاسيوط بس كمان موش كل الصعيد علشان كان قريب من الناس والقرى ..... فالراجل يطلع الجبل ياخد ويك ايند وتانه نازل عادي جدا

أحــوال الهـوي يقول...

رجعت اشوف تعليقك علي تعليقي لقيت تجمع و مظاهرات صعيديه و اوصاف لجبل الخط و اصول التار و مبادئ القتل الحلال

انا خارج دلوقت علي طراطيف صوابعي احسن حد يكون لابد في التعليقات و يطخني عيارين

سلام صعيدي شحط محط

تحياتي

سلوى يقول...

والله نجوى كانت موصياني اسألك
هو اللي بيحصل في المسلسلات ده بجد
وبيحصل عندكوا

هخليها تقرأ البوست بقى
هههههه

صفــــاء يقول...

مصطفى ريان
-----------
وهو انا ليا غيرك يا باشا يدافع عنى ؟
ومين يشهد للعروسه
وعشان كدة اول ما نستقل بالصعيد هنعينك سفير لينا فى القاهرة الكبرى
والا حتى وزير خارجيه
مدام بتوع التليفزيون شايفين اننا كائنات من وراء الجبل
كل سنه وانت طيب يا فنان وربنا يكرمك ويسعدك

صفــــاء يقول...

عمرو امام
-----------

هههههه مين هما اللى جاتهم ألقرف ؟
احنا والا بتوع المسلسلات ؟
احنا يا سيدى ناس مسالمه ولا نأكل لحوم البشر ومش بنقطع حد عشان مفيش حد يسن لنا السكاكين الخاصه بالتقطيع
ان شاء الله ارد الزيارة واشوف الموضوع اللى حضرتك بتتكلم عنه

صفــــاء يقول...

ابو ضياء
---------
دول مشافوش حتى لحد اخر الشارع اللى هما ساكنين فيه

صفــــاء يقول...

ادم المصرى
------------
تشرفنى بالزيارة فى اى وقت وكفايه انك تقّدر وتيجى تعيد

كل سنه وانت طيب يا صديقى

صفــــاء يقول...

فتاة من الصعيد
---------------
اة يا قمر مختلفناش فى ان الجبل الشرقى ممتد من القاهرة عند حلوان كدة ومستمر على ضفاف النيل لحد طول سلاسل جبال البحر الاحمر واى نعم فى اسيوط وكمان عندنا فى المنيا وخصوصا بعد ما عملو المنيا الجديدة الكافتريات تبقى قاعدة فيها تحت الجبل مباشرةو مغاررات وحاجه اخر فل بس برضه أخرنا فى الجبل محاجر عشان الرمل والحجارة والرخام الى بيبنو منها مكاتبهم ويقعدو يتساخفو علينا منها
وماشى موضوع المدونه يا قمرة بس على الاقل خلى شئ فى اول الصفحه افتحى فيه التعليقات عشان لو حد حب يقولك حاجه ميمشيش يبحث فى مدونتك عن خرم ابرة يشوفك منه ... ايوة انت موجودة وربنا يديم وجودك يا قمر بس خلى زى صندوق بوسته صغير نبعت لك منه ولو ينفع يا ريت تضيفينى على الفيس بوك عندك باسم صفاء جلال بالعربى
ولك جزيل الشكر

صفــــاء يقول...

احوال الهوى
------------
أهم مبادئ القتل الحلال انك بعد ما تمسك الراجل من دول واول ما تحط السكينه على رقبته تقول حلال الله .. الله اكبر وتقطع من عند الوريد الودّاجى كدة عشان متعذبش الراجل كتير او ممكن لو هتضربه بيها فى وسط ناس عشان لم يتيسر دبحه انك تضربه بيها بين ضلوعه عند الرئه عشان ميلحقش حتى يصرخ لكن لو سلاح ألى بقى يبقى افجر براحتك يا برنس محدش هيقف فى وشك

اى خدمه ... وتانى مرة وانت جاى هنا متنساش معاك الواقى من الرصاص والخوذة ومراسل حربى

صفــــاء يقول...

سلوى
-----
قولى لنجوى ان اصل اهل الصعيد يعود الى قبائل اكلى لحوم البشر
وانهم بعد ما بيخلصو على المرحوم بيسلكو اسنانهم بالعضم اللى باقى منه
وقولى لها كمان تبطل تتفرج على المسلسلات الصعيدى وتتجه للمكسيكى الــ400 حلقه بدل منه على الاقل فيه واقعيه شويه عن كدة

سهيل ولى الدين علام يقول...

اجمل مقال قرأته فى المدونات عموما فى الفتره الاخيره..وفشر الكاتب الساخر
جلال عامر..وارى التخصص فى هذا النوع من الكتابه..وىلا ننزل من الجبل..

حسن حنفى يقول...

اعتقد ان العيب مش من التلفزيون بس لان المفروض الناس اللي بتتفرج دي يكون عندها وعي ومش بتتفرج وخلاص ومش بتصدق اللي بتتفرج عليه وخلاص

كل سنه وحضرتك طيبه

mohamed ghalia يقول...

ياه يا صفاء دا انتى شايله منهم جوى
هههههههههههههههههههههه

همس الاحباب يقول...

امممممممم
يعنى عندك حق فعلا اللغة شاذة شوية
بس برضو الاعمال الدرامية نالت اعجاب الناس لان الصعيد ثرى بقصصه وحكاياته
تحياتى

doctor mohamad يقول...

شوفى يا ستى .. إحنا ف ناحية و إعلامنا ف ناحية تانية خااالص .. عارفه ليه؟ لإن ده مش إعلامنا .. ده إعلامنا .. لا صعايدتهم هم صعايدتنا ال عايشين ف واقعنا ولا فلاحينهم فلاحينا .. ماعادش فيه فلاحين سذج أوى كدا وسذاجتهم تصدم بالشكل ده.. و لا المسلسلات دى بتاعتنا أصلا .. الفلل ال ماليه مسلسلاتهم .. الشعب عمره ما شم ريحتها .. و الهوانم و البهوات و البيزنس ده كله مش هى دى مصر بتاعتنا .. دى مصر بتاعتهم .. بإختصار إعتبرى نفسك بتتفرجى ع تلفزيون دولة صديقة .. بيحاولو يتكلمو لغتنا و يحركوا بقهم زينا .. دولة صديقة .. دولتهم.. كل سنة و إنتى و إخواننا ف الصعيد بتاعنا بخير.. بتاعنا مش بتاعهم.

اقصوصه يقول...

كل عام وانتم بخير

إيناس حليم يقول...

ههههههههههههههههههههه
والله عندك حق يا صفاء اصلا كل الناس في التلفزيون وغير التلفزيون فاكرين الصعيد دي جبل وعِمة وكلب بيهَوهو وخلاص :)

كل سنة وانتي طيبة يا قمر.. معلش سامحيني جت متاخرة شوية

غير معرف يقول...

هههههههههههههههههههههههههههههه
يخرب عقلك يا صفاء انا مت من الضحك بجد فظييييييييييييع
وعشان تبقي عارفة ليه الصعيدي مبيتطورش في المسلسلات
الممثلين اللي بيعملوا صعايدة مش بيقلدوا الصعايدة الموجودين تحت في الخريطة دول
لا دول بيقلدوا الصعايدة اللي شافوهم في المسلسلات اللي قبل كده
ومسيلي ع الحزق
امجد

Beram ElMasry يقول...

العزيزة الغالية صفاء
بارك الله لي فيك وبارك لك في نفسك وأهلك وحفظ عليك نعمه وأفاض عليك من خيره وأرضاك وحقق لك جميع أحلامك وأنار بالفرح أيامك مع خالص تحياتي والسلام ولا سلام مع قتلة الأنبياء والأطفال بني إسرائيل .

صفــــاء يقول...

سهيل ولى الدين
----------------
ربنا يخليك الف شكر على ذوق حضرتك
هو مفيش تخصص ولا حاجه هى زى ما تقول كدة شويه لخبطه على مقتطفات

ننزل من الجبل دى بقى محتاجه للزلاجات بتاعتنا عشان ننزل زحلقه

صفــــاء يقول...

حسن حنفى
---------
اعتقد ان العيب فى الصعايدة نفسهم
لو سابو البلد دى وراحو الفلبين ساعتها ممكن يكونليهم سفارة تدافع عنهم ضد اتضهاد التلفيزيون المصرى

صفــــاء يقول...

محمد غاليه
------------
وحياتك يا صديقى ابدا
دة هما اللى شايلين مننا على الاخر

صفــــاء يقول...

همس الاحباب
------------
طبعا يا كبير الاعمال نالت الاعجاب لأنهم كانو فاكرينها ملاحم اغريقيه من بتاعه هوميروس
واعتقد انهم كنو مستنين فى اخر الحلقه يشوفو حصان طروادة

صفــــاء يقول...

دكتور محمد
------------
فاكر طبق طبقنا طبق فى طبق طبقكم ؟
اهو حاجه زى كدة
يعنى بلدنا دى مش بلدنا وصعايدتنا دول مش هما صعايدتهم
بس دول عايشين فى عالم موازى فيه كل حاجه تشبه لنا نوعا ما
أمممممم والله فكرة

طب فى هذة الحاله هل يمكن ان احنا نعلن الحرب على الدوله اللى هى مش صديقه دى لأنها اهانت رعايا الدوله بتاعتنا ؟
والنبى الحقنى بالرد احسن انا صعيديه ومخى لحد هنا وقف

صفــــاء يقول...

اقصوصه
--------
وانت بكل خير

صفــــاء يقول...

إيناس حليم
-----------
طيب انا راضيه ذمتك
احنا جبل وعمه وكلب بيهوهو ؟
طب وحياة غلاوتك من يوم ما عرفنا اختراع الحواوشى ومفيش ولا كلب شوفناة فى اى شارع بقالنا كتيرررر

كل سنه وانت بألف خير يا حبيبه قلبى

صفــــاء يقول...

امجد باشا مجاهد
----------------
انت باشا
وهو فيه زيك انت
يا لذيذ يا رااااايق

بس يا امجد بلاش حكايه تحت فى الخريطه دول احسن انت عارف ان احنا صعايدة وتحت عندنا كلمه قبيحه مش بنستخدمها
قول الملقين فى أخر الخريطه
أهى أليق برضه

صفــــاء يقول...

بيرم المصرى
-------------
حفظك الله وجزاك على قدر دعواتك الصالحه ومحبتك للأخرين
ولك كل الدعوات من القلب بأن يديم الله عليك نعمه وموهبتك المتميزة

doctor mohamad يقول...

نعلن الحرب؟؟ إنتى لسه ما أعلنتيش الحرب؟ .. طبعا إعلنى ف التو والحال .. بس ع دولتهم مش على دولتنا . و ع رأى أحمد مطر "لكل فصل دولة ، لكنها تدول".

صفــــاء يقول...

دكتور محمد
-----------
بقى يا دكتور بدل ما تهدى النفوس داخل تولعها حريقه ؟
طب انا بقول اوعى يا جدع وسع يا جدع هحاااارب
تقوم انت تمسك فيه وتقولى استهدى بالله وصلى على النبى والطيب احسن واتفاهمى معاهم بالمعروف
مش بالا قوااام روحى حاربى
دة انت بتحبنى اوووىىى