الجمعة، 9 أكتوبر 2009

اللى جاب له يخليله


من بركات أوباما أنه بعد ما أتجوز البيت الابيض

بأقل من 9 شهور بس ربنا كرمه بنوبل

صحيح الراجل محلش القضيه الفلسطينيه ... بس ناوى يحلها


صحيح برضه موقفش اضطهاد العرب والمسلمين فى بلده ... بس ناوى يوقفه

صحيح كمان محسنش الاقتصاد المنهار عندة ... بس ناوى يحسنه

كمان ملوش أى جهود فى حفظ او تحقيق السلام ... بس ناوى يبقى له

وعلى رأى المتحدث بأسم لجنه نوبل أنه منح الأمل لشعوب الارض

أى نعم انا مخدتش منه حاجه ولا منحنى أى أمل ...

.
بس فى نيته انه يمنحنى لما ربنا يقدرة

وهكذا نرى ان لجنه مولانا ابراهيم نوبل بتحاسب وبتمنح العطايا على النوايا

و ان العارف بالله سيدى باراك بن حسين اوباما أحق الناس بيها

.
لأنه نيته صافيه وقلبه أبيض

وينطبق عليه مواصفات اللجنه فى الاختيار وهى مقوله


الأعمال بالنيات ... ولكل أمرئ ما نوى

هناك 28 تعليقًا:

The illusionist يقول...

البوست
ملهوش حل
ههههههههههههههههههه
طب والله بوست دماغ
حلوه نوبل دى
حلوه والله النكت اللى عمال اشوفها دى
بقى ده ادى الامل لشعوب الارض
طب ييجى يدينى اتنين دولار تيب
مش عاوز امل ده
هو صحيح ايه الامل ده

اداه للناس ازاى

The illusionist يقول...

انا على فكره ممكن ادى امل انا كمان
واخد نوبل
بما ان اللى بياخد امل بيدى نوبل يعنى

The illusionist يقول...

كفايه عليا كده بقى
كل سنه وانتى طيبه
ومتساليش على ايه
وسلام

غير معرف يقول...

ههههههههههههههه


انا قلت ان الراجل ده شكله عامل عمل للعالم بالمحبه .... بس احنا يظهر مخطيناش عليه :))

Hesham يقول...

صحيح تعليقى متأخر بس برضه علقت والله انتى بتلخصى موقف امريكا من ايام جورج واشنطن والاعمال بالنيات برضه

غير معرف يقول...

سيدتى

من اجمل ماكتبت وعبرت عن الحقيقة ..

كان هذا رأيى من أول يوم .. أن اوباما هو النسخة الحديثة الرقيقة لكاوبوى تكساس القبيح جورج بوش

أمريكا فعلا دولة مؤسسات .. لايسيرها فرد .. ولا له اهمية أساسا .. هى اجندة محددة .. يسير عليها ساسة أمريكا .. والعالم أيضا

واخيرا فاننا نمسك الهواء بايدينا .. واعواد هى قبض الريح

مصطفى ريان يقول...

العجيب ياصفاء مش فى اللي اديلوه الجايزه العجيب فى اللي عندنا وفاكرين انه ممكن يحل ومش مقتنعين ان الكفر والباطل كله مله واحده
شكلهم لازم يتقرصو علشان يصدقو
هقولك ايه
تحياتى ليكى ودمت بكل الخير

حسن حنفى يقول...

ياسلام لو نظام النوايا ده اتطبق علي مستوي العالم وكل ينوي يروح الشغل والواحد ينوي يذاكر وخلاص :d بدل الهم ده

صفــــاء يقول...

THEillusionist
----------------
مبروك عليك كل التعليقات دى
وكل سنه وانت طيب يا سيدى حتى لو من غير سبب
بس اعتقد ان نظام تدى امل تاخد نوبل دة لا ينطبق علينا احنا
بينطبق بس على جاهبذة الحكام والرؤساء اللى احلامهم اوامر ونيتهم كانها حصلت بالظبط
شرفتنى بالزيارة جدا وسعيدة ان الكلمتين دول عجبوك

صفــــاء يقول...

فتاة من الصعيد
----------------
وحياتك يا اختى من يوم ما كان هنا وعاملين له مولد
ولا العمل اللى رماة تحت رجلينا ساب اى أثر

صفــــاء يقول...

Hesham
-------
وهو يعنى أمريكا كان لها اى موقف لينا اصلا ؟
الموقف الوحيد ليها هو مطار القاهرة

بلا هم مخدناش منهم غير وجع البطن
شرفتنى

صفــــاء يقول...

شريف بيه
---------
اهى أمريكا ورؤسائها بقى دول قصه ظريفه جدا
وهى قصه الشراب القديم اللى بنلبسه اربع سنين رغم ريحته الوحشه وتأثيرة الصحى السيئ علينا
وبعد 4 سنين لبس .. او 8 بقى حسب الانتخابات ماما تيجى تقولنا جبت لكم شراب جديد .. ويكون هو هو نفس الشراب المعفن اللى كلته الجزمه بس غسلته ورفته وقلبته واحنا يا عينى نصدق انه جديد ونفضل لابسينه كمااان 4 سنين او 8 برضه حسب النصيب
وهكذا دواليك ... لحد ما جالنا امراض جلديه وجرب ونقص كرامه... والبركه فى رؤساء امريكا

صفــــاء يقول...

مصطفى ريان
------------
يقال والعهدة على الراوى ان الشعوب والحكام العرب وقعو على دماغهم وهما صغيرين والوقعه الوحشه دى بعيد عنك أثرت على ذاكرتهم
وعلى مراكز الهلوسه عندهم لدرجه انهم مش بيفتكرو حاجه .. ولسه متخيلين يا عينى ان امريكا هتديهم حاجه

صفــــاء يقول...

حسن حنفى
----------
طبعا نظام النوايا دة على قلبك زى العسل
تنوى تقوم من النوم وتنوى تروح المدرسه وتنوى تدخل الامتحان وفى الاخر تنوى ان المجموع يبقى كبير ويدخلك كليه النوم فى العسل

r يقول...

هى حاجه تضحك فعلا
لان دلوقتى الجايزه فعلا فقدت قيمتها تماما بالنسبالى بعد ما كنت بقول يعنى يجى منها
قال بالنوايا قال

صفاء
ليكى تاج عندى على فكره من البوست اللى فات

سقراط مصر يقول...

اولا احب اشكرك على تواجدك المتواصل عندي في المدونة
ثانيا انا عايز اشوف كرم الضيافه بتاع المنياوية يوم الاربع عشان انا نقلت عندكم وجيشي بقى هناك في المطار الحربي بتاعكم

ثالثا شكلهم كده جابوهاله من قصيرها وقالولوه لو هاتعمل كل ده عشان تاد نوبل لا يا سيدي نوبل اهي بس سيب كل حاجه زي ما هي .. ولان ده اسهل تفسير وعادة الحاجات دي بيبقى ليها تفسير تاني خالص يصعب على الناس العادية اللى زي فهمه او استنتاجه
فانا مازلت لا اعلم لماذا نوبل لاوباما
لو على الامل ما ينفعش دي مش نتيجه مادية ملموسة .. على فكرة بقى انا اخدت امل لما اوباما نجح بس كان امل في ربنا انه البهوات حكامنا والسلطة وحماس انهم يستغلوا وصول اوباما لكن للاسف هما لجموه قبلنا وظبطوه
والسلام ختام يا صافي

mohamed ghalia يقول...

معاكى حق خدوه بالنية

حاول تفتكرنى يقول...

يستاهل

اللى خلي مناحم بيجين خدها

تحياتي

doctor mohamad يقول...

صفا : "عجب عجب عجب عجب .. بقر تمشى ولها ذنب" _بفتح النون_ .. بيت لشاعر مصرى ساخر قديم .. بيت طريف .. حيث أورد شئ عادى جدا _ إن البقر له ديل و بيمشى _ أورده بعدما قدم له ب "عجب" .. و من هنا جاءت المفارقة التى تولد الطرافة و الكوميديا .. غير أن الكوميديا ف عصرنا الحالى تتولد بشئ آخر .. لإن العجب بقى عادى .. و لو أن نفس الشاعر وجد ف عصرنا لأحسبه يقول : "عادى وعادى وعادى و ياما .. منحوا سلام نوبل لأوباما"

صفــــاء يقول...

بسنت
------
تحسى أنها أتمسخت
او حتى مسّخت
اللى كنت اعرفه عنها أنها جائزة تقديريه وليست جائزة تشجيعيه

او بقى يبقو يدوها للعيال فى الحضانه عشان تذاكر ومتسرقش ساندوتشات بعضها

شكرا ليك يا دكتور ولتقديرك لي

صفــــاء يقول...

سقراط مصر
-----------
اولا دى مش محتاجه شكر وكل المدونين بيكونو اصدقاء وبيتبادلو الزيارات وبيعلقو وبتحسهم بقو زى أهل

ثانياً بقى انت تنور المنيا كلها شارع شارع ومطار مطار .. رغم انى لا أمتلك اى معلومات عن المطار الحربى دة

ثالثاً يا باشا كلامك كويس جدا وممتاز وعاقل والله فى بلد مجانين
ولو على كدة يبقى انت تقول انك ناوى تدخل الجيش وتدافع عن بلدك يقوم الجيش احتراماً منه لنواياك الطيبه ومنحك له الامل فى دفاعك عن مصر مستقبلا يقوم يديك اعفا
الاهم بقى يا دفعه انى مكنتش منتظرة من اوباما لا امل ولا احلام ولا فردوس حتى
لأن دى ناس طول عمرها ملبسانا السطانيه ومأكلانا المهلبيه .. أغرف لك طبق ؟
ربنا يكرمك ويوفقك وتقضى جيشك على خير يا بنى وتخرج منه سليم وأيتها خدمه انا وكل صعايدة المنيا من عنينا الجوز

صفــــاء يقول...

محمد غاليه
-----------
مع انهم المفروض كانو ياخدوة تحرى

صفــــاء يقول...

حاول تفتكرنى
--------------
حلال عليه زى ما هى كانت حلال على اللى قبله فعلا
وحار ونار فى جتته المليون زرار اللى هيقبضهم

صفــــاء يقول...

دكتور محمد
-----------
فكرتنى بمثل لبنانى بيقلك العنزة سود عيونها طوال قرونها شو أسمها

لكن فى الحاله دى القرون دى لبسناها احنا .. ومتفهمنيش غلط
خلى نيتك بيضا زى نيه اوباما يمكن ربنا يجازيك على قد قلبك الطيب ونيتك الكويسه وتاخدلك نوبل انت كمان
وابقى افتكرنى منها ولو بجوز دولارات

مستنيه ساقع الفرح وكارت الدعوة

البروفيسير يقول...

ههههههههههههههه
والله عندك حق
تحياتى
احمد

micheal يقول...

أوباما ونوبل
هههههههههههه
طب على كده أنا عاوز جايزة نوبل في الصبر ع الإنترفيوهات اللي عملتها
تحياتي

صفــــاء يقول...

البروفيسير
-----------
شكرا يا احمد
وميرسى على الزيارة الجميله دى
شرفتنى

صفــــاء يقول...

مايكل
------
يابنى انت عاوز جايزة ايوب الصابر
تستحق جايزة تكون حاجه عظيمه كدة
مش نوبل والكلام الفاضى بتاع اهل الارض دة