السبت، 3 أكتوبر 2009

صرخه أحتجاج



بدأت المدارس

مش مهم

والتوجيهات والتعليمات والقرارات

برضه مش مهم

انفلونزا الطيور والخنازير والجدرى

مش مشكلتى ومليش دعوة بيهم

اللى يهمنى المدارس هتشتغل 3 ايام فى الاسبوع

العيال ولاد الجيران راحو المدرسه ورجعو

قالو لهم تعالو ثلاثاء وأربع وخميس

أستشاريين أصلهم

أعضاء منتدبين

لكن انا ....

اخر دفعه خدت سادسه أبتدائى ولغوها بعدى

واتطبق عليا اليوم الدراسى الكامل

وبقيت اروح بيتنا الساعه 3 العصر

الف حوالين نفسى زى السكرانين

وفى الثانوى تدريب صيفى فى شهر يوليو او اغسطس

الخلاصه انى اتنصب عليا

وعاوزة حقى

ليا حق عند الحكومه وعاوزاااة

عاوزة الفرق

عايزة أجرى عن مدتى الدراسيه الكامله

اللى قضيتها زى اى متهم حسن السير والسلوك
.
لكن برضه قضى مدته كلها
.
عاوزة تعويض
.

هناك 27 تعليقًا:

غير معرف يقول...

هههههههههههههههه

ايون احنا اتنصب علينا بجد .... العيال صايعين نص الاسبوع ... وانا اخدت اليوم الكامل ده

بس مكانش فيه تدريب الصراحه .... ومخدتش سادسه دي اللي تاعبه كل الناس :D
تفتكري كده هيخصموا من التعويض بتاعي :)

انا اضم صوتي لصوتك .... يلا نروح نصوت سوا عند وزاره التفاهه والتعقيم

تحياتي

أحــوال الهـوي يقول...

احتجاج علي ايه الموضوع ان احنا كان مخنا تخين ما بنفهمش الا باليوم الكامل و ماشاء الله الجيل ده متنور و بيفهم من قبل المدرس اللي اصلا مش موجود ما يتكلم

يعني بنصف اسبوع و بنص مدرس العيال بكرة هيبقوا صناع الحضارة في مستقبلنا المزدهر

و ابقوا قابلوني لو عدوا من انفلوانزا الخنزير برضه هيبقوا خنازير

تحياتي

أحــوال الهـوي يقول...

تحيا اتحاد الصعايده

غير معرف يقول...

سيدتى

اقف معك فى الصف محتجا

المشكلة انها سنة طويلة فرضت .. والغيت دون ان يعرف احد لماذا ؟ ولا حتى حوسب أحد

ثم عادت دون سبب ايضا .. فلا احد حوسب

وكلهم احياء يرزقون ..

بس تعويض عن ايه ولا ايه ولا ايه

الحمدلله على كده

صفــــاء يقول...

فتاة من الصعيد
----------------
وانت بقى ياختى جايه تطالبى باى حق
لا أخدتى سادسه أبتدائى
ولا اى تدريبات صيفيه
جايه تقفى هنا ليه ؟
اجرى اقفى تحت الشجرة اللى هناك دى

تعويض ايه اللى انت جايه تطالبى بيه دة اصلا ؟
والا هى الاعمال بالنيات ؟
والا يكونش مقابل الانضمام ؟

سبينى غارقه فى حزنى وأساى على عمرى الذى ضاع فى التعليم وكان ممكن أستثمرة أفضل من كدة فى صنعه ان شالله بليه الميكانيكى

Hesham يقول...

طيب ياصفاء متعملى وقفة احتجاجية اهى برضه بتنفع الأيام دى

صفــــاء يقول...

أحوال الهوى
------------
اتحاد ايه بقى ما انا طردتها
دى جايه تقف وتاخد تعويض اونطه أصلا

وبعدين بجمله الرفض بقى
أعترض على التبرير دة
مش عااااجبنى
نص اسبوع نص مدرس نص لسان دى مش مشكلتى
ولا حتى المستقبل المذبهل
عاوزة تعوووووويض

صفــــاء يقول...

شريف بيه
---------
جرى ايه يا عمدة هو انت معايا والا معاهم ؟
انت عاوز تمنعنى اناضل لنيل حقوقى كامله فى تعويضى عن ضياع نصف عمرى فى التعليم اللى مظهرش له فايدة أصلا ولغوة كله بعد كدة ؟

لااااا كله الا حقى
انا قتيله الموضوع دة
أما يدونى شهادة تانيه زيادة عن اللى معايا او يدونى باقى حقى فلوس

صفــــاء يقول...

Hesham
-------
امال انا بعمل أييييه ؟
انت مش شايفنى فى الصورة واقفه شايله يافطه وبحتج اهو ؟

Beram ElMasry يقول...

أبنتي العزيزة الغالية صفاء
صدقتي في وصفك وأعلمي أن الأمة لم يصيبها العقم بعد ولابد من وجود أقوياء لم يأذن القدر بظهورهم بعد وإن غدا لناظره قريب مع خالص تحياتي والسلام ولا سلام مع قتلة الأنبياء والأطفال بني إسرائيل .

مصطفى ريان يقول...

هههههههههههههههههه
والنبي يا صفاء يا ختى شوفي لى انا كمان حقى انا كمان كنت اخر دفعه من اللي طبقو عليهم نظام التحسين ولما كنت بروح المدرسه - اوقات لما كانت بتتطلب معايا مرواح يعنى .. اصلى كنت بدي لنفسي اجازه يومين فى الاسبوع غير الخميس اللي كنت طبيعى بديه اجازه لنفسي مش كفايه كنت بروح السبت اللي بقى اجازه رسمي شوفى بقى ليا كام سبت عند الحكومه- كنت بمشي الساعه 9 بعد الحصه التانيه طبعا مش ثانويه عامه ولازم اروح اذاكر فى السينما ولا استعد لدرس الفلسفه بتاع 8 بليل ..واحيانا كنت بقعد لحد الرابعه ...لالالالا ده انا كنت ساعات بقعد للسابعه شوفى بقى ليا كام عند الحكوهه غير العبأ النفسي هنحسن مش هنحسن
اقولك نعمل جروب على الفيس بوك ونطالب بحقنا ونطلع على الجزيره والحره نتكلم فى الحوار ده
ويبقى شعارالحمله ......
مش عارف فكري فيه انت بقى وقوليلى
سلالالالالالالالالالالالالالالممممممممممممممممممممووووووووووووووووووووزززززززززززززززززز
وصباحك فففففففففللللللللللللللللل

غير معرف يقول...

سيدتى الفاضلة

مين القمر اللى شايلة البوست فى الصورة اللى مكتوب عليه stop ؟

أرجو توضيح ذلك .. حتى ندرس أحقية التعويض من عدمه

ادم المصرى يقول...

ايمين نيمين على احتجاجات ومظاهرات وقرارات

واصدارات ولا شيئ نافع ولا سلالم نفعه

ولا الصوت العالى نافع

وحسبى الله ونعم الوكيل

شفـقــة و إحســــان يقول...

أنا عن نفسي مسامح في اللي فات
المهم اللي إنا فيه دلوقتي واللي جاي

مش ممكن أخرج من الجواز بنص المدة حسن سير وسلوك ؟؟
أو ممكن أكمل بس أعيش في هم الجواز ونكده تلات ايام بس في الاسبوع ؟؟
وباقي الاسبوع أرجع لعيشة الحرية !!

والله يا بختكم يا تلامذة

إحســان التلموذ

حسن حنفى يقول...

انا بقي الحمد لله دخلت المدرسه بدري سنه وكمان ده خلي سادسه تطبق علي الدفعه اللي بعدي اللي المفروض كنت ابقي فيها وده خلاني اخش الكليه بدري عن اللي قدي سنتين :p

بس كنت بروح المدرسه من 7 الصبح للساعه 4 العصر :((

إيناس حليم يقول...

ههههههههههههههههههههههه
والله انتي عسل يا صافي
انا شقت الصورة والعنوان قلت خير اللهم اجعله خير ده الموضوع كبير باين :)

معلش يا كوكو متزعليس انتي اشطر منهم كلهم، وكمان انتي خلصتي خلاص وارتحتي من الهم ده :))

doctor mohamad يقول...

صفاء: كنت لسه بأنصحك بإعلان الحرب فورا ف التعليق ع التدوينة ال فاتت .. أجى ألاقيكى أعلنتيها فعلا مطالبة بالفرق؟؟و بأجرك؟ و بالتعويض؟ .. يعنى مش أنا بس ال عندى الحقد الطبقى ده ؟_ابتسامة_ .. المشكلة إن الأهالى امتعضت و أظهرت احتجاجها ع قرار ال3 أيام ده .. وكإن مدارسنا بتعلم بجد .. والله قربت أصدق إن مدارسنا فيها تعليم! .. يكونش فيها تعليم!! ولا يكونو بيتكلمو عن تعليم الدولة الصديقة >غمزة لها معنى وابتسامة<

صفــــاء يقول...

بيرم المصرى
------------
أشكرك سيدى الكريم على الزيارة وعلى الرد

صفــــاء يقول...

مصطفى ريان
------------
اقف فى الطابور يا بابا
نفهم انك بتطالب بتعويض عن نظام التحسين والضرر النفسى اللى أوقعه عليك
وبتطالب بتعويض عن كل أيام السبت اللى روحتها
وبتطالب بتمن تذاكر السينما اللى كانت بتستضيفك للمذاكرة والتحصيل
وكمان تعويض عن وقت سيادتك اللى ضاع فى المذاكرة والدروس والتحضير لها
وبتطالب بجروب على الفيس بوك يشرح كل معاناتك دى وينادى بحقوقك
وشعار ... وفى الحاله دى الافضل ان الشعار يكون حبايه قرع
يا عالم يا بجححححه ياللى مش بتتكسف
يالا يابنى من هنا بدل ما الم عليك خلق البلوجز
دة انتو عالم بجحه فعلا

صفــــاء يقول...

شريف
------
كدة برضه يا حاج ؟
تربط الحقوق بمستوى الجمال ؟
يعنى الوحشه فى البلد دى تروح تولع فى نفسها ؟

صفــــاء يقول...

ادم المصرى
-----------
لا يا برنس ولا تقوم وتنام على احتجاجات ومظاهرات ولا حاجه
والحاجه الوحيدة اللى تخلينى اقعد على السلالم هى انى اكون بمسحها
والحكايه مش محتاجه حسبنه انت لو قريتها كنت لقيتها هايفه جدا

صفــــاء يقول...

شفقه هانم واحسان بك
---------------------
دةانت يا ولداة همك اكبر من همى خالص
ومشكلتك حوسه وملهاش حل
ومين فى اللى قبلك قدر يخلص من جوازة بعد نص المدة حسن سير وسلوك
ومين يا عينى قدر يخفض الجرعه لـ 3 ايام بس
أرضى بنصيبك اللى لازم يصيبك واستخبى احسن الهانم جايه

صفــــاء يقول...

حسن حنفى
---------
ولما انت الحمد لله دخلت المدرسه بدرى
والحمد لله كمان فلت من سنه سادسه
ودخلت الكليه بدرى سنتين
امال يابنى عاوز ايه ؟ تغيظنى وخلاص ؟

صفــــاء يقول...

إيناس حليم
-----------
والنبى انت اللى عسل وقمرة كمان
بس لا بقى مش معلش
ولا محصلش خير
ولا ياختى محدش هيضحك عليا انا مش حلوة ومش شاطرة وعاوزة حقىىىىى

صفــــاء يقول...

دكتور محمد
-----------
يا دكتور دة مش حئد والعياذ بالله
بس يعنى حرام لما العيال المفعوصه يتعاملو معامله تفوق رؤساء البنوك ويروحو المدارس 3 ايام بس
وبعدين انا مش عاوزاهم يروحو يتعلمو لا سمح الله
انا عاوزاهم يروحو يتعذبو زى ما كنت بتعذب ويذوقو المرار زى ما انا ذقته عشان بس مفيش حد يبقى احسن من حد
ومش هحاااارب ... ما تشوف حد غيرى تزقه الليمان

وحي القلم يقول...

السلام عليكم
وحياتك كلنا اتنصب علينا ولينا حق عند الحكومة
أنا اول واحد خد سادسة ابتدائي بعد ما رجعوها
وعادي
هي دي مصر يا عبلة
سوري مصر يا استاذة صفاء

صفــــاء يقول...

مصعب صلاح
---------
اة يعنى افهم من كلامك دة ان أستعوض ربنا على أساس انى مش أول ولا أخر منصوب عليها وانسى الموضوع على كدة ؟
أمممم ... أفكر