هيستا لافيستا

ناويت بالصلاة على النبى كدة

أنحرف

وأوعى حد يفكر الافكار الخايبه بتاعه الانحراف بتاع زمان

ولبانه وحسنه على خدها الشمال

ومن فضلك ولعلى والكلام الاهبل دة

دة حتى الانحراف دة بقى عبيط جدا وميجبش حتى حق باكو اللبان

فوقو والنبى معايا كدة شويه وبلاش الافلام العربى اللى لحست عقولكم دى

أنا عاوزة انحرف أنحراف من اللى هو حلو كدة ويجيب همه

ماهو مش معقول كمان أبقى واحدة عندى 31 سنه

وقاعدة فــ بتنا كدة زى قزازه زيت القليه

وكمان وحشه فــ حقى أنى مستغلش شويه مواهب طبيعيه أديهالى ربنا

وعليه ناويت أقصر الجيبه بتاع 30 سم ونرفع كعب الجزمه 10 كمان

وكام ساعه أقضيهم فى أى مركز تجميل

والحمد لله مش هنزرع ولا ننفخ ولا نحقن

هو بس شويه تظبيط للشعر ونفتح لونه وحبه ألوان للوش

وعلى أى بنك ...

والمسؤلين ورجال الاعمال عندنا بسم الله ما شاء الله

متخلفين عقليا وبيريلو على أى جوز جزمه معدى

وقرض على كام حفله نعمل علاقات اجتماعيه كويسه

وناخد تعاقد مع هيئه سلع تموينيه

نورد قمح مستورد أو فول مـــ الصين

او حتى عجينه طعميه

بعدها بشويه كمان ربك يفتح علينا وألهف حته أرض من بتوع الدوله على الطريق الصحراوى

ودى ممكن بالعقد بتاعها ناخد قرض كمان لبناء مدينه سكنيه لحل أزمه السكان فى جزر القمر

نكبر شويه كمان وعلاقاتنا الاجتماعيه تزيد وتتوسع أقوم أنضم للجنه السياسات

وأبقى أمين المرأة تحت القبه المباركه

ونستورد حديد من تركيا وبلغاريا

ومحدش يقولى مش عارف مين يدبحك زى مين

لا يا قلبى مش احنا

دول بيتلمو على النسوان السكه واللى من أيد لأيد وبتوع الفيديو كليب

عشان الوجاهه الأجتماعيه والمنظرة

وبما انى انا كمان ست يعنى فــ ميلزمنيش الصنف دة

ولو العمليه بشبشت أوى يبقى ضمنا توكيل خط بحرى

وكام مركب خربانه وتغرقو بقى والا تولعو

هو انا مغسل وضامن جنه ؟

هى بس طالبه شويه ضمير نعسان وقلب تقيل

وبدل القعدة فى البيت نولول زى الولايا كدة نبقى سيدات أعمال

ومساهمين فى الاقتصاد ولو حاجه حصلت او هيقبضو عليا

يبقى نفك على أوروبا

وكل اللى بيطلع أوروبا بينجو بأذن الله

حكم الأوربيات يمحون السيئات

ومش بيتمسك ويتعدم غير الهبل اللى بيرجعو والعالم المتخلف اللى واثق من نفسه

ومن اللى حواليه وانهم مش هيسيبوة يقع ويغرق

فى المواضيع دى لا تثق غير فى البلد اللى مفيش بينا وبينها اتفاقيه تسليم مجرمين

وبرة بقى أعملى شركه سياحه

والعيشه فى فرنسا والسهر فى الليدو والعشا فى مكسيم بلاش الريتز

كمان بلاش لندن دى شؤم على العرب

وعروض أزياء كريستيان ديور ودولتشى اند جابانا وأيلى صعب

وبارفانات شانيل وكارولينا هيريرا

ويخت فى الكوت ديزور

وتتفرج على البولشوى

وتعوم فى بحيرة البجع

يالا يا جماعه كل اللى عندة أفكار يتقدم بيها من فضلكم لمشروع البدايه

مش عاوزة الكلام الفاضى بتاع نغنى ونرقص ونفتح ملهى ليلى والعبط دة

شغلو مخكم بليييييز

يالا ... أستعنا على الانحراف بالشيطان

قطن النيل ... وقمحه أيضاً

ملايين افدنه الأرض الزراعيه

مساحات شاسعه على أقصى مدى البصر


لا يبلغ لها نهايه ولا يحيط بها .

لون أخضر ذى درجات متدرجه


يحيط بها أشجار سرو وصفصاف



يتناثربها النخيل الطارح لمختلف الوان البلح والتمور

صورة قديمه لأرضنا الزراعيه حتى عقدين من الزمن

لدينا طريق سريع زراعى يربط بين محافظاتنا والعاصمه

ما كنت تراة من نافذة السيارة هو ثلاثه أشرطه


شريط السكه الحديديه


ترعه الابراهيميه


والطريق السريع

الثلاثه متوازيين شبه متلاصقين


يحف بهما على الجانبين صورة تشبه .....

لا تشبه أى شئ

زراعات طالعه وأشجار طارحه ونخل باسق


وعلى حافه الابراهيميه قطع صغيرة من أراضى طرح الماء

على جانبى الطريق مئات الأشجار ترمى بظلالها فوق الطريق

مشهد له تملك معه الأ الأنبهار .

ما من شئ مشابه له الأ قول القرأن في تلك الأرض

{وَنَادَى فِرْعَوْنُ فِي قَوْمِهِ قَالَ يَا قَوْمِ أَلَيْسَ لِي مُلْكُ مِصْرَ وَهَذِهِ الْأَنْهَارُ تَجْرِي مِن تَحْتِي أَفَلَا تُبْصِرُونَ}

أو
وَإِذْ قُلْتُمْ يَا مُوسَى لَنْ نَصْبِرَ عَلَى طَعَامٍ وَاحِدٍ فَادْعُ لَنَا رَبَّكَ يُخْرِجْ لَنَا مِمَّا تُنْبِتُ الْأَرْضُ مِنْ بَقْلِهَا وَقِثَّائِهَا وَفُومِهَا وَعَدَسِهَا وَبَصَلِهَا قَالَ أَتَسْتَبْدِلُونَ الَّذِي هُوَ أَدْنَى بِالَّذِي هُوَ خَيْرٌ اهْبِطُوا مِصْرًا فَإِنَّ لَكُمْ مَا سَأَلْتُمْ

الأن


ما عاد من تلك الأرض شئ





دقت بدلا منها أعمدة خرسانيه

وجدر صماء

أبنيه لا تحمل أى شكل


تأوى الاف البشر الذين لم يطيقو العيش فى شقق فوق بعضها

وفضلو ان يقتلو الارض المزروعه وينثرو فيها بنايات ذات شكل قمئ


لا تحتوى حتى على أى لمسه جميله


أرض كانت تنتج أفخر أنواع القطن


القطن المصرى الأن ما عاد له حتى سوق


أرض المحلج تمتد على مساحه ألاف الأمتار مفروشه بالقطن المحلوج

والمعبأ فى بالات مخزنه من أشهر فوقها اكوام التراب وفضلات الطيور

لا يجد من يشتريه لأنه حسب تكلفه زراعته وجنيه


يعتبر من أغلى الاقطان فى العالم

ولا رغبه لأحد بشرائه وما عاد هناك مصانع لغزله ونسجه


وحتى لو تم تصنيعه فمع كل تلك التكلفه سيؤدى فى النهايه الى منتج باهظ الثمن


كل الدول تدعم محاصيلها لتشجع على تسويقها الا نحن

نفضل ونستسهل الاستيراد وتوفير الثمن غير عالمين بما ننتجه من كارثه

نفضل ترك قطننا ليأكله التراب

الأدهى والأمر هو القمح

مازال ملقى على أعوادة لأن الدوله بعد ان وعدت بشرائه حسب أسعار مناسبه

عادت وتراجعت وترغب فى تخفيض السعر


ففضل الزارعون تركه ملقى على الارض تتخاطفه العصافير

وتعلف به المواشى على بيعه بالخسارة


لــ دوله يفضل بعض رجالها أستيراد القمح لضمان العموله

بلد ضاعت أرضها الزراعيه ذات التربه السوداء الخصبه

وأتجهت لزراعه وتخضير الرمل الأصفر الجاف


فقدت أرض تنتج محاصيل القطن والقمح والعدس والفول

الى رى الرمل لتزرع كنتالوب


بلد ما عاد بها مزارعين أو فلاحين فتلك الكلمات عيب


فأستوردت خبراء أسرائليين ليعلمونا زراعه الكنتالوب


وفى الكنتالوب 7 فوائد

ومن الممكن عمله عصير

وأضافته الى الوجه للتخفيف من التجاعيد

بلغنا من سفاهتنا أننا لم نستطيع الحفاظ على أرضنا الزراعيه

لكننا أتجهنا لأستيراد خبراء فى تنسيق الحدائق

وتنظيم حفلات لتنسيق الزهور على الطريق اليابانيه

وتميز تلك الطريقه عن باقى الطرق

أضعنا الأرض مورد رزقنا

ونتجه الأن الى الزراعه فى شرفات ونوافذ منازلنا

ومشروعات عملاقه لتخضير أسطح المنازل بالنباتات العطريه

مكافحه الأرهاب

حمله طبيه وعسكريه تمت اليوم على سطوح بيتنا

مكونه من أطباء بيطريين وعساكر أمن مركزى

شعبه مكافحه كتاكيت

قامت بمحاصرة عشه الفراخ بتاعه امى

والقبض على كل فرخه وديك

وكتكوت ودكر بط

يقومون بالأخلال بالأمن العام

وزعزعه أستقرار مصر والسلم الأهلى بها

أو يهددون الأمن القومى عن طريق نشر الأوبه

من فوق سطح بيتنا لسطوح الجيران

وبعد التحقيق معاهم فرخه فرخه ووزة وزة

وعنزة حامل كانت مندسه فى الوسط

ثبت خلوهم من الأمراض المعديه والفيروسات الوبائيه الوافدة

وقام البيه الظابط صاحب الحمله بتحرير محضر يؤكد خلو بيتنا

من أى طائر مطلوب القبض عليه

وتم رفعهم من قوائم منع السفر وترقب الوصول

وأثبت أن فراخنا أو فراخ امى يعنى مطابقه لكل المواصفات القياسيه

وهذة شهادة منهم بذلك

بس الحاجه الغريبه بقى هى طريقتهم العنيفه فى الطرق على ابواب البيوت

أو حتى أقتحامها وكأن الفراخ عامله مؤتمر للمافيا جوة

وعاوزين يقبضو عليها متلبسه

والأغرب هو رفض الأهالى فتح باب بيتهم وأنكارهم انهم عندهم طيور

وكأنهم مجموعه من الخواجات ميعرفوش الحاجات دى

مع أننا صعايدة وفلاحين

اما الشئ اللى مقدرتش أفهمه فعلا

ليه الامن كان مسلح بالعصى المكهربه

وهل دى كانت لينا أو للفراخ اللعينه التابعه للتنظيمات الأرهابيه المسلحه ؟

.