الاثنين، 10 مايو 2010

فى شارعنا فتنه طائفيه

فى شارعنا جات جارة جديدة هى وزوجها والعائله
المدام شغاله لا مؤاخذة والزوج سحّار ( بتاع أعمال وأحجبه وخلافه )
الست الله يكرمها زى ما كرم ماتاهارى شغاله الله ينور ... شبهت المنتئه بالأضافه إلى انها مرابيه
يعنى كملت من كله ... ست كمُل .... عائله تشرف أى منتئه تسكن فيها
السيدة المسيحيه لها شريك مسلم (قرنى بيه ) ... يعنى بيورد زباين سوا للربا أو دعارة
قوادة ومرابى ... أجدع ناس
والمنطقه كلها ساكته وهاديه ومتقبله الوضع الجديد وبيكتفو بالدعاء على الست وعمارتها اللى بنتها فى الشارع حاجه كدة شبه القلعه
وإذ فجأة قامت القيامه والخناقه اشتغلت ... خلاف مهنى بين الشركا والست والأبناء البارين بأمهم المساعدين لها فى المهنه مسكو الراجل طحنوة ضرب وفى الأخر جه البوكس لم الكل

لحد دلوقت والموضوع مجرد أختلاف على كيفيه أدارة الأعمال

بعدها مباشرة الأخوة المسلمين لمو شباب المجاهدين وجم عملو أنتفاضه طوب وحجارة على بيت "الست" أنتقاما لأخوهم فى دين الله المسلم اللى أنضرب من مسيحيين

"الست" طلبت الشرطه باعتو تانى البوكس على ما وصل كان الفوج الأول من الشباب الغيور على دين الأسلام أختفى بين البيوت وكانت هى كمان جات لها امدادات من الأخوة المسيحين
وعليه ... ولحد دلوقت حاله من الكر والفر بين دول ودول ولعبه العسكر والحراميه
على ما توصل الشرطه يختفى الكل وفى النهايه قامت الشرطه مشكورة بوضع حراسه على بيت "الست"
وأعتقد ان الحراسه دى عشان تقدر تمارس مهام عملها بدون شوشرة وأزعاج
الشرطه فى خدمه الشعب

مش مهم أنها شبهه لمنطقه بعائلاتها , وملتها بأشكال ونوعيات من البشر ما انزل الله بها من سلطان
مش مهم أنه قواد معاها
مش مهم ان اللى بياخد منهم بالربا ومش بيقدر يكمل دفع الفلوس بياخدو هما الأتنين مراته رهن ويبعتوها لرجاله عشان تسدد ديون جوزها
المهم المهم إن كرامه المسلمين لا تهان بضربهم من مسيحي
الخلاف لا ديني ولا طائفى ولا دخل للمسلمين ولا للمسيحين بيه لكن وقت ما الغباء بيعمى الكل ... كله بيلطش فى بعضه بحماقه وخلاص

وفى النهايه هى قوادة وهو مرابى

هناك 16 تعليقًا:

أنا - الريس يقول...

يا حظكوووووووو .. ماشي لعبه معاكو ...
في ضرب نار .. يا خسارة كنت نفسي اتفرج ..

للاسف الغير هنا ما هي الا مجرد تعصب قبلي وكان الاولي للشارع كله انهم يطردهم ويبلغ عنهم ويوقفهم عند حدهم واكيد حد في الشارع ليه قريب في النقطة او المركز ..

ربنا يهديهم ويهدينا ويهدي المسلمين اجميعين والضالين ..

وياريت المتعصيبين يرووا الحق قبل التحرك ..

الله يكون في عونكم

خواطر شابة يقول...

العصبية والطائفية احيانا تحرك الناس دون تفكير بفهم خاطئ لأنصر اخاك ظالما او مظلوما فيما معناها الصحيح كما قال رسول الله صلى الله عليه وسلم هو أن نصره وهو ظالم يكون بنصحه وبردعه عن الظلم

sal يقول...

صفاء

العته والعبط والهبل والتوهان
معشش فى عقول الطرفين
شباب المجاهدين عايزين يقيموا حد الرجم
وطالبان المسيحية عايزين يرموا اللى عنده خطيئة بحجر
يعنى الحجر اساسى لدى الطرفين
اما الحجر الحقيقى الذى تناسوه
هو الحجر القابع داخل جماجمهم
طرف نسى ان الله محبة
وطرف نسى ان اكرمكم عند الله اتقاكم

وجعلناكم شعوبا وقبائل لتعارفوا


ثقافة الاقصاء هى السائدة

واأســــفاه

صفــــاء يقول...

الريس
*******
أيه دة ... هو انت كمان بتحب تتفرج على الخناقات ؟
هنعزمك عندنا خميس وجمعه عروض ماتينيه

وبالنوسبه للشرطه الهمامه "الست" أخوها عميد شرطه يعنى حمايه

ومافيش تعصب ديني قد ما فيه فراغ عقلى

منور يا ريس

صفــــاء يقول...

خواطر شابه
************
ماهو يبقى احنا كدة محتاجين شعب كامل بيمتلك العقليه دى

مش ناس ماشيه وراء تعصب غبى جدا حتى فى الغلط والظلم وسوء الأخلاق

mostafa rayan يقول...

هذا هو الذي يمكن ان نطلق عليه شر البلية ما يضحك .. ولا عزاء لاصحاب العقل في هذا الزمن
______________
وحشنى يا جميل وعايز اطمن على اخبارك عامل ايه في الحر الرخم دة ؟

صفــــاء يقول...

sal
*****
المشكله ان الأتنين اصلا يستاهلو الحرق
يعنى حتى عشان تتعصب لحد لازم يكون على الأقل فيه طرف معاه الحق

لكن ضرب وتعدى وتكسير ممتلكات وحرق
عشان اتنين فى الأصل شركا فى الوساخه

عندك حق ... ثقافه الأقصاء وكراهيه الآخر بدون حتى وجود عنصر الحق

صفــــاء يقول...

مصطفى
******
باكل جيلاتى يا درش
شغاله على الأيس كريم لما قربت ابقى شبه طائر البطريق

Che يقول...

بوستك يمكن اول بوست اعلق عليه من اكتر من شهر عند اى حد ... المهم انا قعدت اضحك و انتى بتوصفى الموقف
افتكرت حاجه دايما بتحصل لما الناس تشوف تعبان ... دايما بيفضلو يدوسوا على ديله و بيسيبوا راسه ، مع ان راسه هيا اللى بتعض الناس مش ديله :)

صفــــاء يقول...

يا كبير دة شرف لينا

وبعدين الموقف كان غريب جدا بالفعل
وناس من أديان مختلفه متحزبه لبعضها عشان فى الأصل قضيه قذرة

الجنازة حارة والميت كلب

استراحة محمد يقول...

احم احم
هو احنا كده دايما اللى يساعد الناس نقول عليه وحش
الست بتقف جمب الشباب وبتساعدهم فى التخلص من اثقالهم .. ده عمل وطنى

صفــــاء يقول...

أشطه يا معلم
تصدق مجاش فى بالى خالص الناحيه الترفيهيه وتخفيف العبء عن كاهل شباب الوطن

فتــافيت (رحاب الخضري) يقول...

العالم ديه لمامة.. سواء من دول ولا من دول
قواد ومرابية.. ايكش يولعوا هم الجوووز

المهم بقى اصلا واللي انا جاية عشانه

انا ماحذفتش اي تعليق ليكي والله خالص
اذا كنت بسيب التعليقات اللي مش بحبها هاحذف تعليق ليكي انتي؟؟؟؟؟
انا التعليق الوحيد اللي وصلني هو.. شكرا على حذف تعليقي
.....
يعني بزمتك بزمتك بزمنك.. انا اقدر اعملها برضو؟؟؟؟؟

الله يقعط عم بلوجر وعمايله

اوعي تزعلي مني في حاجة انا والله ما عملتها

وعايزة اعرف قولتي ايه في التعليق المفقود

صفــــاء يقول...

بيني وبينك خدت على خاطرى قوى وقولت انى ماقولتش حاجه غلط او عيب عشان تتحذف
بس عموما ملحوقه وربنا ينتقم منه بلوج اسبوت عمل معايا شويه حركات ملهاش لازمه برضه فى التعليقات وحذفها كلها قبل كدة

استنى بقى على ما افتكر قولت ايه واروح اكتبهم عندك تانى

تسلمى يا قمر على أهتمامك وربنا يخليكي ليا

الجواز و سنينه يقول...

اللى يضحك فى الموضوع نكته اننا زعلنا اوى على قواد
و الاخوه المسيحيين زعلوا اوى على واحده لمواخذه
المهم المسلم ما يتضربش من المسييحى و لا المسييحى يتضرب من المسلم
لو الناس دى بتفكر صح كان الاتنين مسلمين و مسيحيين مسكوا الست و الراجل بهدلوهم و مشوهم من المكان
و لا احنا حافظين مش فاهمين
يعنى حافظين فتنه و مش فاهمينها

يالهوى على الدماغ البايظه
و عجبى

صفــــاء يقول...

لالالا لو سمحتى هى لامواخذة لكن هو مرابى
هههههههه شوفتى الهيافه ؟

وبعدين دى الست بتدى بالربا كمان ومداينه ربع البلد
والناس دلوقت تيجي فى الحاجه المفيدة وكله يبقى فى حاله وملناش دعوة وبلاش نتدخل فى اللى مايخصناش

لكن فى السفاهه كله يجري يناصر بعضه

وصحيح .... عجبى