الأحد، 14 ديسمبر 2008

الطريق السريع الى ألاخرة

.
النهاردة وقبل ذكرى مرور عامين
على دبح 10 أشخاص وهم نيام
ولسه محدش عارف مين دبحهم ونكل بيهم
ومثل بجثثهم
والذكرة الخامسه لأحتراق قطار بركابه الفقراء
لم يمر العام بدون مجزرة جديدة
أتوبيس مستقر دلوقتى حالا بركابه فى ترعه الابراهيميه
50 قتيل
50 روح
50 نفس بشريه
غرقت واتعجنت تحت كتل الحديد والزجاج
بنات وشباب راجعين جامعاتهم
ستات ورجاله رايحين أشغالهم
أصوات عربيات الاسعاف رايحه جايه قدام عينى
أصواتها بتجننى
لي ؟؟
لأن أيه الفايدة ؟
اللى هيطلع من المجزرة دى ... لو طلع يعنى
أما فضل مرمى على الاسفلت كام ساعه على ما تيجى عربيه الاسعاف تشيله
وترمى فى المستشفى العام
مفيش أى شئ
لا شئ على الاطلاق فى المستشفيات
فى كل الدنيا
فى كل العالم اللى خلقه ربنا
اى حادثه بيكون فيها المصابين بالعشرات
او حتى بالمئات
والقتلي واحد او أتنين او تلاته
لكن 50 قتيل فى ثوانى ؟؟
بس ثوانى
ومصابين 10
الفرق بينا وبين كل الدنيا ان فى باقى العالم المصابين أضعاف القتلى
لكن احنا القتلى 5 أضعاف المصابين
بنت الجيران ... محدش عارف فى انهى مستشفى
مستشفى بنى مزار او مستشفى مغاغه
دة الخبر جابه واحد جار كان معدى على الطريق لقى دى مرميه على الاسفلت
عايشه ؟؟ ... ميته ؟؟
محدش عارف
جابوها هنا ودوها هناك محدش قال
الدنيا مقلوبه على الاسفلت دة صحيح
وكل كبراء البلد وصلو عشان المعاينه والمحاسبه والمسائله
والنتيجه؟؟ انا هقولكو النتيجه
النتيجه ان دة خطأ سواق الاتوبيس اللى معرفش يتفادى المقابل ووووو
هراء كامل هيخرج من أفواهم
لكن محدش هيسئل مين اللى ادى سواق زى دة الرخصه
وسمح له يسوق اتوبيس
محدش هيحاسب على طلع برضه الرخصه لسواقين ميكروباص
الطريقه الوحيدة اللى بيسوقو بيها
هى تعلم القيادة على الطريق السريع للأخرة
ومحدش أكيد هيحاسب اللى بيسيبو نفس السواقين دول يبيعو يشترو فينا
فى أى ظرف كعيد او خلافه
لما يحطو الناس فوق بعض زى المواشى
ولما يطوقونا بالأجرة الطاق اتنين وتلاته
مدام بيقاسمو معاهم
فى الاخر هيطلع الغلطان السواق اللى مات أصلا
فلا داعى للحساب
.
الحساب يوم الحساب
لكن بكرة؟
بكرة البلد هيطلع منها 50 جنازة
.
شكرا لمصر
.
.

هناك 4 تعليقات:

mr_raafat يقول...

عزيزتي / صفاء
والله قلبي ينفطر حزنا وغما علي هؤلاء الضحايا ولم يكن لهم ذنب سوي أنهم كانوا من ركاب أتوبيس الموت هذا ولو كان هذا في أي بلد آخر لقامت الدنيا ولم تقعد ولكن للأسف الإنسان عندنا ليس له لزمة تقبل الله المتوفين شهداء وطافت روحهم بين حواصل الطير في الجنة إن شاء الله .
تقبلي عزاءي وأسأل الله العلي القدير أن يلهم أهلهم الصبر والسلوان وأن يجازي الفاعلين الأصليين " اللهم انتقم منهم يارب العالمين ".

life يقول...

50قتيل لاحول ولا قوة ألا بالله العلى العظيم
أن لله وان اليه راجعون


وبرغم ذلك ياصديقتى رغم تأثرى ودموع قلبى عليهم
أنا مثل كل الاخرين سأحزن بعض الوقت الذى قد
لا يتجاوز الدقائق
لأن المصاب ليس فى بيتى
لأن الذين تبعثرو على الطريق ليس فيهم امى أو اختى
لأ أحد يتحرك ياصديقتى ولا أحد يفعل شىء طالما الأمر لا يمسهم شخصيا

لن يتوجع أحد المسئولين فليس له أبناً فيهم

لن يبكى دماً سوى من فقدو فلذات اكبادهم وأقرب الناس أليهم

لن يعرف الألم سوى الذى خيم الحزن على بيوتهم

أسأل الله الصبر لأهاليهم

ويبدو فعلاً ياصديقتى أن الحساب يوم الحساب فقط

mostafa rayan يقول...

عندك حق
شكرا يا مصر
دمت بخير يا صديقتي العزيزة

الصديق يقول...

لا املك شيء وليس بيدي شيء افعله سوى ان اقول.. انا لله وانا اليه راجعون..الله يرحمهم جميعا وعسى ان تكون مظلوميتهم لانهم ابرياء تكون شفاعتهم لدخولهم الجنة وعلى الاقل تحجب عنهم كثير من الذنوب والله يلهم عوائل الضحايا الصبر والسلوان ..مع تحياتي وسلامي لكي يا وردة