الاثنين، 22 ديسمبر 2008

صفاء وتوقعات النجوم لعام 2009


بما انى من خبراء الفلك والتنجيم وقرائه الكف والطالع وأبين زين أبين


كان يجب ان أدلى بدلوى انا كمان فى موضوع التوقعات الفلكيه دة

وأقول أرائى الرهيبه فى الابراج

ومن توقعاتى لهذا العام

**************

أنتشار الفساد وأزديادة فى الفترة من اواسط مايو حتى نهايات أغسطس

سقوط اكبر عدد من السيارات فى ترعه الابراهيميه نتيجه اخطاء سواقين طبعا

ذبح عدد من المغنيات والراقصات

بمناسبه اوكازيون الذبح العالمى فى الفترة بين اول مارس واخر أبريل

مع دخول برج الثور فى مدار السرطان فداس عليه وقطع له فردة من رجليه

مما سيؤثر على مواليد تلك الفترة

أبتدأ من أخر اكتوبر وحتى نهايه العام ستغرق مصر تماما فى مياة الامطار

وستؤثر السيول على كل القرى التى تقع فى مجراها وتدمرها تماما

سيدخل عدد كبير من رجال الاعمال السجن بتهم متنوعه

ومن توقعاتى الغير عاديه

سيتم نهب منظم للبنوك فى صورة قروض والهرب بها

كما سيتم سرقه مقدرات الدوله تماما تحت مسمى الخصخصه

أحب أبشر مواليد برج التيس انهم هيكونو محظوظين جدا السنه دى

ولو حد فيهم أبوة رئيس يبقى هيورث دوله

فـــ مبروك عليه




توقعات الابراج لعام 2009
**********************


برج الحمل
----------

لن تحمل أى شئ لأن محدش حيلته حاجه يحملها لك


برج الثور
--------
لا تتعافى على الاخرين مش عشان ربنا مديك شويه صحه يعنى

.

برج الجوزاء
------------
هتفضل احول وشايف كل حاجه أتنين

.

برج السرطان
-------------

يعنى عدمت بيك الابراج ملقتش غير الاسم المقرف دة تتولد فيه ؟

.

برج الاسد
---------
احنا مبنخفش غير من اللى خالقنا لا مؤاخذة

.

برج العذراء
----------

أيه دة هما لسه موجودين

.

برج الميزان
----------

مدام محدش لاقى ياكل يبقى هنوزن أيه يا حسرة

.

برج العقرب
----------

يا ساتر يا رب ... هى ناقصه أذى ؟

.

برج القوس
----------

أبقى نشن بعيد الحكايه مش ناقصه عمى

.

برج الجدى
---------
متزعلش اوى كدة دلوقتى كلنا بقينا معيز

.

برج الدلو
---------

محتاجينك يا معلم فى الدور العاشر ... المايه مش واصله



برج الحوت
----------

للأسف مبقاش عندنا حاجه تسرقها فقرنا والحمد لله



وكل برج وانتو لسه عاقلين

والسنه الجايه لن تختلف كثيرا عن كل اللى فاتو
.


هناك 43 تعليقًا:

غير معرف يقول...

عسل .. وشربات ..

أحلى برج .. العذراء

انت برجك ايه؟

فشكووول يقول...

يا بنت الايه يا صفاء .. انت جبت السكر دا كله منين .. هوا انتى بتروحى عند عمك فشكول كتير ولا ايه .. شوفى يا ستى اضيفى الى توقعات العام القادم .. انا برج الجدى وحيدبحونى على العيد الكبير اللى جاى وجايبين لى كسب وتبن وكمان فول وعمالين يسمنونى على آخرهم عشان ابقى استاهل الدبح فى العيد الكبير اللى جاى اللى فاضل له سنه .. يعنى على العيد يا يموت الجدى ..يا يموت اللى بيسمنى وواكل الدنيا كلها فى بطنه .. يا انى اموت .. تحياتى يا عثل .. مش عارف ياخويا البت دى جايبه السكاكير منين

وحي القلم يقول...

ماشي يا استاذة
الخقيقية التوقعات بتاعتك أحسن من اللي بييجوا في التلفزيزن ابقي اطلع مكانهم انت احسن
بس ليا عتاب دا انا برج الجوزاء وخلتيني أحول

Kiara يقول...

برج الميزان
----------
مدام محدش لاقى ياكل يبقى هنوزن أيه يا حسر

والله انتي عثل

بوست ساخر بس في الجووووون

صفــــاء يقول...

.
شريف باشا
********


والله يا عمدة انت اللى عسل

وانا يا افندم برج بيزا المايل
.

صفــــاء يقول...

.
الحكيم فشكول
**********

جبنا السكر من اقرب مصانع سكر حدانا فى الحوامديه ونجع حمادى

وطبعا الفشكله لا يضاهيك فيها مفشكل تانى وعليه فأنت فشكلت الدنيا خالص ببرج الجدى يا عمنا

وان كان على السكاكير فدى سيادتك بنلاقيها على الشجر جنب الحدايه اللى مبتحدفش كتاكيت

منور يا عمنا وهابى نيو يير
.

صفــــاء يقول...

.
مصعب صلاح
*******


طبعا طبعا انا احسن من كل اللى بينجمو وحتى اعرف انجم اجدع منهم

وان كان على برج الجوزاء
فانا كمان جوزاء وبشوف كل حاجه اتنين
.

صفــــاء يقول...

.
مولان
*****


هلا يا عثلايه

دة بوست بيشرح اهم رؤاي الفلكيه للسنه الجديدة

هابى نيو يير
.

mr_raafat يقول...

العزيزة صفاء
أضحكتينا في زمن الهوان والذل
صدق المنجمون ولو صدفوا
بارك الله فيك
والله عبرت عنهم في صورة وأسلوب سخرية جميل

سمكه واحده يقول...

لا بقي هنشن وهنشن صح كمان
حتي بصي كمان
بيووووووو
لما تعوز تنشن لازم تصيب
اي

بجد تحفه
تسلم ايدك ياقمر
جديده وتحفه
لو اعرف بس الجميل بياكل ايه وبيشرب ايه عشان يجيب الكلام الجميل ده والتفكير الرهيب ده منين يا جدعان
بس متخفيش مش هحول وانا بنشن ادعيلي بس انشن صح

r يقول...

هههه
جميله اوى يا صفاء
وما فيش صحه خالص على فكره
ظالمه برج الثور انتى خالص
دمتى بخير

Unknown يقول...

ماشى يا ستى
على فكرة انا ما كنتش عارف برجى اية صدقى اولا تصدقى
لكنى حسبتها
طلعت البرج الى عندو صحة وبيتعافى على الناس
اللة يسامحك
صحة اية بس
انا كدة تاكدت ان الابراج دى اى كلام
بشهادة خبيرة الارصاد السيدة صفاء

صفــــاء يقول...

.
أستاذ رأفت
**********


يعنى ضحكت ؟
وهو المطلوب أثباته
حققنا الغرض يا افندم كدة

انا بس كنت بتريق والله على الهبل اللى بيملو بيه القنوات على راس السنه دة
قال يعنى السنه هيتخلف راسها عن ديلها
هابى نيو يير
.

صفــــاء يقول...

.
سمكه واحدة
***********

البت سمكه اللى زى العسل واللى سابت كل الدنيا وجايه تنشن هنا عندى انا
عشان صعبان عليها انى بشوف بعنيا الاتنين قالت كفايه عليها عين واحدة والا حتى دة بزخ ملوش لازمه خالص وهنشن على الاتنين واريح العورة من غسل الصابون
يا بت وهو بعد منك فيه قمرات والا عسلات ؟
وبعدين الجميل صعيدى يا وزة يعنى بياكل مش والعياذ بالله وطبيا المش لا يشجع على اى أبتكارات
يعنى والحمد لله معنديش سر مهنه
سمسمه سمسمه
هابى نيو يير
.

صفــــاء يقول...

.
بسنت
*****


انت اللى اجمل يا جميله الاسم وأكيد طبعا مش هتكونى اقل جمالا منه
وربنا يديك الصحه يا اختى بس بلاش تتعافى بيها علينا
وبعدين هو انا يعنى هعرف منين بقى

كل راس سنه وانت بخير
.

صفــــاء يقول...

.
احمد بدر الدين
************


وبعدين بقىىىى هو انا يعنى مغسل وضامن جنه؟
اهو دة بقى اللى طلع معايا وان كان عجبكو
وبعدين خليك محضر خير يا ابو حميد
وبلاش تبقى قطاع أرزاق
وحياتك يا اخويا ولا ليك عليا حلفان انى القنوات الفضائيه بتضرب بعضيها عليا كدة
عشان اروح انجم عندهم واخد على الراس خمسين جنيه
بس انا اللى عندى اصل وقولت اهل بلدى أولى
وشهادة السيدة صفاء فى الارصاد الجويه حاصله عليها من جامعه السيدة زينب للشؤن الفلكيه وكل راس وانت طيب
.

صوت من مصر يقول...

مش لاقين ميه فى الدور العاشر طيب هاجى بسرعه جدا بس انا اه بيملوا با الميه بس خلوه بالكم انا الوحيد الى بطفى النار

قلوب بتغنى يقول...

انا متأكده انك قاصده حكاية بيتعافى على الناس دى
انتى دايما الى بتقولى للابوكى انت مخلفلنا بلطجى
ماشى ابقى خالى بالك وانتى نازله السلالم وانا موجوده فى البيت ولا ابقى عدى من جنب السفره وانا معديه
حاااااااااضر

حسن حنفى يقول...

ههههههههههههه

ربنا يعينا علي السنه الجديده

Ahmed Hishmat يقول...

خلي بالك من عينك
أنا برج ايه ؟؟
لو عرفتي
يبقى تنفعي تفتحي عيادة
وأنا أول مريض
..............
عندي أسئلة
مهم قوي ليا
إنك تجاوبي عليها
........
happy new year safaa

صفــــاء يقول...

.
صوت من مصر
**********

يعنى قصدك نعمر ساقيه ونخرب طاحونه
نوصل المايه فوق ونسيب البلد تولع

ماشى يا عم المناضل

خليها تولع
.

صفــــاء يقول...

.
قلوب بتغنى
*********

انت يا بت ات مش لاقيه حد ترمى بلاكى عليه غيرى؟
هو انت اييييه ؟ محدش عاد قادر عليكى؟

طب ودين النبى ان جيتى جنبى لأصوت وألم عليكى الناس
ها بس
.

صفــــاء يقول...

.
حسن حنفى
********

ويعينا كلنا يا ضنايا

.

صفــــاء يقول...

.
احمد حشمت
********

انت برج الحوت يا سيدى

واى أسئله اتصل بيا على 0900

وابقى تعالى بعد 10 سنين خد الاجابه
.

كلمه يقول...

ههههههههههه
سكر والله
كل سنه وانتى بخير

أنا حر يقول...

حلوة قوي التوقعات دي انا كمان توقعتها كده والله بس بالنسبة لموضوع الابراج ده جديد عليا بصراحة
:)
تحياتي

فارس القمر يقول...

بما انى لااؤمن بالابراج
الا ان الابراج اللى انتى كاتباها دى حاجه تانيه خالص ودمها حفيف قوى

والبوست حلو كمان

حلو برج العذراء

هما لسى موجودين اهو مستحملين الدنيا وقرفها

تحياتى

سندريلا يقول...

بجد افادك الله فى التوقعات هنحاول ناخد بها ههههههههههههههه

صفــــاء يقول...

.
كلمه
****


ربنا يسكر ايامك يا برنسيسه

وهابى نيو يير

.

صفــــاء يقول...

.
انا حر
******

ما هو من كتر ما التوقعات هى هى بقينا كلنا خبرا فى قرائه الطالع

أما بقى الابراج فدى احدث قرائاتى للنجوم من واقع خبرتى النجميه
.

صفــــاء يقول...

.
فارس القمر
*********


طبعا يسعدنى جدا ان توقعاتى الفلكيه تعجبك كدة

والاكيد الاكيد انها طبعاااا صح

بالنسبه للأبراج بقى فدى كنت بردانه وانا بألفها فطلعت كدة
.

صفــــاء يقول...

.
سندريلا
******

برافو عليكى انك هتاخدى بيها وفيه توقع خاص ليكى انت بالتحديد
لما تروحى الحفله هتقابلى واحد امير هناك
ابقى سيبيله فردتين الجزمه بتوعك
حكم محدش لاقى اليومين دول
.

أحــوال الهـوي يقول...

سامحيني اذا تجاوزت حدودي و قولت
ايه الجمال و الظرف ده عسل و شربات

انا اسف بس مافيش رد علي البوست ده الا كده

تحياتي

صفــــاء يقول...

.
احوال الهوى
**********

أهلاااا بقالنا سنين مشوفناكش هنا

ولا تجاوز ولا أسف ولا شئ دة العادى بتاعى انى اكون عسل وشربات

بس كان نفسى اخدم والله وأشوفلك الخريطه الفلكيه بتاعتك واتنبألك كدة بكام توقع السنه دى
الا انت برج ايه ؟
.

سلوى يقول...

يخرب عقلك تحفه والله

عثل عثل يعني

والحمد لله برج العذراء موجودين يا ستى

بس لو عايزاهم يهاجروا
مفيش مشاكل السنه الجايه يتبخروا

ودي توقعات 2010 :))

صفــــاء يقول...

.
سلوى الجميله
***********

وجنب العثل فيه عدس وعندنا رز مدعم
وسكر من ابو 3 جنيه الكيلو

وفيه سيادتك جبنه دمياطى جديدة اوى لسه اول أستعمال والبيت اللى جنبنا لسه مبلطين بيها اول امبارح وشغاله حلو اوى
بالنسبه للأبراج
لييه بس هيبخرو برج العذراء
دة مكنش فاضل منهم غير كام بنت
خليهم اهم يخزو العين والسلام
.

سلوى يقول...

كل ده موجود
ومدعم كمان

هي دي مقتطفات ولا مكتب التموين ؟؟ :))

تقولي لي أنا رديت على تعليقك وتجري

ماشي
لما أشوفك

يا بنتي أنا مكنتش فاهمه زي مانت فاهمه :))

حد فاهم حاجه :))
يالا ألحق أجيب سكر ورز قبل الزحمه :))

أحــوال الهـوي يقول...

الاسد

بس اسم مش فعل
حاولت اقراء في علم الابراج و مميزات و صفات كل برج و فشلت استوعب الموضوع رغم استحساني لبعض المواصفات التي تنطبق علي او اتمناها ان تنطبق علي

ممكن تشوفي لي الخريطة بتاعتي و الاجر عند الله

تحياتي

صفــــاء يقول...

.
احوال الهوى
**********

بص يا سيدى
بصيت فى البنورة المسحورة اللى كنت جيباها بالتقسيط من العتبه
وقالت لى ان مواليد برج الاسد خير اللهم اجعله خير
قدامهم سكه سفر
(شوفت النصب ؟ عشان عارفه انك بتسافر كتير )
وفى الفترة من نص يوليو تقريبا ولحد اخر اغسطس ممكن يروحو يصيفو
(يا سلام يا بت يا صفاء على التنبؤات العظيمه)
والعربيه اللاند كروزر اللى وعدو بيها لسه موصلتش لحد دلوقتى مع العلم انى فضلت منتظرة قدام الباب بتاع 3 جمع لما البرد كلنى ومستلمتش حاجه
والاجر عند الله دى لما نكون بنقرى البخت فى دار أيتام يا بيه
.

أحــوال الهـوي يقول...

صفـــــــاء
اللهم اجعله خير
شفت لك منام و انا صاحي قل ايه العربيه اللي بعتها طلع لها جناحين و طارت لفوق... لفووووووووووووق
و سبقتك علي الجنة

و بعدها صحيت من النوم و قلت لنفسي الحمد لله صفاء دخلت الجنه و انا فلت من موضوع العربيه
و هنيه لك يا فاعل الخير

تحياتي

سندريلا يقول...

وادهماو ليه يا صفاء خلى كل واحد معاه حاجته وانا هعرفه من غير ما يخدهم هما بقى اللى بيخدوا الزمن ده زمااااااااااااااااان كانوا بيدوا سندريلا الجزمه بتاعتها مش بياخدوها عجيب الدنيا بتغير ههههههههههههههههههههههههههه
تحياتى/ سندريلا

Soooo يقول...

بجد بجد
الف شكر للواد مصطفى انه عرفني بمدونتك الحلوة دي

اسلوبك ساخر وراقي جدا وربنا يوفقك


ملحوظه
هو احنا كده يارجالة برج الاسد .. مابنخافش من حد .. الا لو اتجوزنا




سلامووووووووووز

صفــــاء يقول...

soooo
******
ربنا يخليك كلك ذوق ويخلى مصطفى هو كمان صديق جميل

شكرا لكلامك الحلو دة
وبعدين مش رجاله برج الاسد بس
هما كل الرجاله بيعاملو مع ستاتهم بمنطق من خاف سلم
شرفتنى جدا