السبت، 14 فبراير 2009

فرق تعلّ






انا واحدة ولا ليها فى الكورة

ولا بحبها أصلا

ولا بشجع أى فريق مصرى على الاطلاق

غصب عليا ابويا اقعد اتفرج على ماتش الزمالك والاتحاد السكندرى معاة عشان ميقعدش يتفرج لوحدة وفى نفس الوقت يعمل عليا محلل رياضى خطير

هى ربع ساعه ومطقتش

حاجه تخلى الحجر ينطق

هى الناس دى مش بينصرف عليها فلوس ؟

مش بيقبضو على قلبهم قد كدة ؟

مش بيطفحو بيها !!! أمال مش بيعملو بيها لييييه

ولازمته ايه طيب نادى وفريق أدارى وفريق طبى ومدرب أجنبى ومدرب وطنى ومدرب بين البنين ودولارات يكبوها فى جيوب الخواجات

دة حتى خسارة فيهم أجرة الاضواء الكاشفه بتاعه ألاستاد

أشوف فيك يوم يا مرتضى يا منصور انت وكل اللى مسكو النادى دة من عشرين سنه لحد دلوقتى

دعوة وليه ساعه مغربيه

حرام نادى زى دة بتاريخ وأمكانيات ملهاش حساب بس فالحين دايرين فى المحاكم يرفعو قضايا على بعض ومجلس اداراة ....... طب بيديرو أيه

هو بقى فيه نادى أصلا

لما هما مش نافعين .... ما يسرحوهم يلمو الدودة وأهو أكسب ويبقى ليهم لازمه

او حتى يوزعوهم يلمو أيجارات المحلات على سور نادى الزمالك

واهو على الاقل يجيبو دخل بدل القرف اللى بيهببوة دة

.

هناك 27 تعليقًا:

سلوى يقول...

يلموا الدوده
هههههههههه

تفتكري هيعرفوا ؟

:))

ولا هيبقوا محتاجين مدرب أجنبي
ههههههههه

صفــــاء يقول...

.
وحياتك يا سلوى وحياة طنط كيمت
وشرف القطه
يا اختى ما هيعرفو يلموها

لا هما ولا المدرب الاكتع اللى هيجيبوة
.

سلوى يقول...

الله
طيب وهنعمل إيه في تصفيات لم الدوده؟؟

تفتكري نجيب ناس من بره ؟؟

صفــــاء يقول...

.
فى هذة التصفيات الخطيرة
ولاحظى أنها خطيرة لأنها بتشتمل على مرحله شديدة الدقه وهى أننا نلحق نلم الدودة قبل ما تبهدل الزرع
صدقينى مش هتقدر تأمنى للقطن بتاعك فى أيد مرتضى منصور والله يا أختى هيشارك الدودة فى أكل القطن وبعدين يقاسمك فى تمن الباقى
.

سلوى يقول...

يعني لو الدوده ما أكلتش القطن

مرتضى هياكله .. الله ده يبقى كده متفق مع الدوده

وكده القطن متاكل .. متاكل

يبقى إحنا كده محتاجين نربي صف تاني من الدود

ونعلمه إزاي ياكل اللي عايز ياكله

تخيلي كده
والدوده بتاكلهم .. ماهو يوضه سره بقى...
نياهاهاها

صفــــاء يقول...

.
فكرة ممتازة ... هى دى دماء الشباب اللى احنا بننادى بيها
والافكار المتميزة
وبما أن احنا فشلنا نربى جيل جديد من اللعيبه القادرين على انهم يحققو أى حاجه
نربى جيل جديد من الدود ونكشكشه على قطن الشعوب والدول المجاورة واهو نبقى حققنا مركز متقدم فى ألاذى
.

سلوى يقول...

قصدك هنحقق مركز متقدم في الأز
( نسبه للست دوده الأز )

بس في مشكله
ألا وهي
هنأكل الدود إيه ؟؟

إذا كانوا اللعيبه عايشين في أعلى مستوى ومش عارفين يعملوا حاجه
لأ وأخرتها هيطمعوا في القطن وياكلوه


أقولك
أهو نأكله من أكل الشعب
علشان يبقى دود ابن بلد كده
عيش بمسامير
وكده نضمن إن الدوده تبقى متينه وأعصابها صلبه

ونشربها ميه ملوثه
علشان تبقى أتربت ع الغالي
:))

سلوى يقول...

صفاااااااء

إوعي تكون الدونه مش بتاعتك
صاحبها يجي يقفشنا
ههههههههه

صفــــاء يقول...

.
غلط يا ماما
أنصحك وحفاظا على صحه الدودة اللى هتحقق كل البطولات دى أنك متأكليهاش من القرف اللى احنا بنتسممه وبعدين هى دى أخرة اللى يعمل حاجه كويسه فى البلد دى ؟
تاكليها عيش مسمم من اللى انت بتفطرى بيه؟
مفيش رحمه ؟ مفيش وفاء ؟
مفيش خوف على صحه الدود البطل ؟
.

سلوى يقول...

غلط يا لولو

لأن الشعب بياكل من الحاجات دي
ونجح في أكبر إنجازاته

ألا وهي

إنه واقف أسد( الله أكبر ولا كلمه ولا حركه) أدام الحكومه وعمايلها معاه

لكن اللعيبه الفافي
مش عارفين يحققوا أي شئ ولا بيستحملوا شئ

كمان ماتنسيش
إن الدوده هتاكل اللي عايز ياكلها
وإنت عارفه بقى مين اللي عايز ياكلها:)
علشان كده لازم نربيها ع النفس الحلوة
يعني تاكل أي شئ

شكل صاحب المدونه هيجي يضربنا
نياهاهاهاها
ضحكه شريره

حسن حنفى يقول...

الحمد لله اني مقاطع اشوف اي مباريات في الدوري المصري :d

والله انا شايف انهم لو جابوا الناس اللي بتلعب في الشوارع هيقدوا احسن علي الاقل هيخافوا علي مصدر رزق ليهم

mostafa rayan يقول...

صديقتي العزيزة
اتفق معك في كل كلامك ألا حاجةواحدةانهم لما يلموالدوة دة هيبقي اكسب
لأنهم مش هيعرفو وكمان الكرةاكسبلهم
فين هيلاقو( ميغةزي دي ) ملاين وشهرة واكل وشرب فخم ومافيش شغل
طيب يروحو يلمو دودة ليه ؟

جميلة كعادتك
يا صديقتي الغالية

بس انت ماقولتلناش والدك عمل ايه بعد الخسارة؟

صفــــاء يقول...

سلوى


وعهد الله وعهد الله المدونه دى بتاعتى واللى يقول غير كدة هفتح كرشه
.

صفــــاء يقول...

.
حسن حنفى


ولا شوارع ولا نيله هما الاحسن يلغو الكورة خالص ويسرحو اللعيبه بعربيات كرشه ولحمه راس
.

صفــــاء يقول...

.
مصطفى يا عزيزى


انا مقولتش ان لم الدودة افيد لهم انا قولت ان لمها افيد لينا وأرخص ويريحنا من مصاريفهم والميغه والفته اللى هما عايمين فيها على حسابنا

المصيبه بقى يا درش ان ابويا مش زملكاوى ولا ولا بيشجع اى فريق اصلا هو بس بيحب يتفرج
.

مصطفي احمد يقول...

ههههههههههه

طب انتي كده وانتي مش بتشجعي الكوره

امال اللي بيشجعها يعمل ايه ربنا يكون في عون اللي بيشجع الزمالك بقي

الحمد لله مش بشجع حد

غير معرف يقول...

جيبتى سيرة الكورة .. وزى مانت شايفة الاقبال شديد جدا ..

البوست الجاى عن بنت ليلى غفران ..
واللى بعده عن البوشى .. وهكذا تفتحين مجلة تضاهى أعظم المجلات فى وطننا العربى ..

ومع حبى لنادى الزمالك .. أرى أن حاله كحال البلد .. لايفرق كثيرا .. كل ما فيها عشوائى .. لهذا ومنذ سنوات أنا لااشاهد الا كل ما هو اجنبى ..

لأنه اذا كان ماعندنا هو كرة قدم .. فما اسم اللعبة الجميلة التى يلعبونها فى اوروبا واميركا اللاتينية ؟

أحــوال الهـوي يقول...

انت زملكاويه

بصرة

بس الموضوع ده ما عدش يقلقني بحكم السن و المناعه
وانت لسه صغيرة ناقص لك موسمين و تكتسبي مناعة ازليه

تحياتي

صفــــاء يقول...

.
مصطفى احمد


وهو انت عاوز تقولى ان فيه حد لسه بيشجع الزمالك لحد دلوقتى؟

ولا انا والله بشجع حد بس الظروف حكمت

تحياتى
.

صفــــاء يقول...

.
شريف بيه


لا بنت ليلى غفران راحت عليها خلاص الموضه دلوقتى سفاح المعادى
البوشى بقى دة اسكت هو اللى طالع من عينى ... بيقولك ادى واحدة 300 ألف جنيه عشان تتطلق من جوزها ويتجوزها هو ... كان فين ابن الفقريه دة من سنه

وبعدين انت مش عاجبك دورى الحكشه بتاعنا وبتقارن بينه وبين البوندزليجا الالمانى والمتادور الاسبانى والكونكاكاف اللاتينى ؟
لالالا عيب بجد .... امال فين الوطنيه ...
.

صفــــاء يقول...

.
احوال الهوى


لا . بصرة لا ......
لالالالالا .... حرام عليك انا مش زملكاويه ولو هبقى هبطل كورة خالص
انا أصلا واحدة صاحبه مرض والمرارة بتنقح عليا ... يعنى معنديش حاجه يفقعها الزمالك

حلال عليك انت 4 مواسم كمان وتعلق دبورة و3 نجوم وتاخد عقيد .
.

!!! عارفة ... مش عارف ليه يقول...

صفاء في حاجة عايز اقولك عليها
في مثلث في مصر معروف أصوله وقواعده


البطولات ... الاهلي

الكرة الحلوة ... الإسماعيلي

المشاكل والبلطجة ... الزمالك


والحمد لله

لولم أكن أهلاوياً
لوددت أن اكون أهلاوياً

وإلي كل أهلاوي

أرفع رأسك فأنت أهلاوي

واللهم احفظنا من الزمالك وأمراضه المزمنة

الشر برة وبعيد بعيد بعيدددددد :)

صفــــاء يقول...

.
عارفه ... مش عارف ليه
*********************


أيه يا أخى العنجهيه دى ؟

هو أكمن يعنى ربنا فتح عليكم بشويه اجوان وبطولات تذلو خلق الله الزملكاويه الغلابه ؟

عيب يعنى أرحمو عزيز قوم ذل

ووصلت كمان لأحمد عرابى

ألا صحيح يا وليد هو متعرفش احمد عرابى كان بيشجع ايه ؟
.

سمكه واحده يقول...

هو والله لولا انها رياضه وبتصرف الشباب عن التفكير في اي حاجه غلط وحلوه جدا الرياضه جميله وفي دينا ونشاط وكده انا مبحبهاش
او مش بتفرق معايا
حتي كنت فاكره وانا صغيره كل ما يجي ماتش واللي في البيت مهتمين وخالي عندنا ولا انا عند جدتي وبابا وكلهم قاعدين ابصلهم كده ومش لاقيه حاجه اعملها
اروح نطه قاعده علي رجل حد فيهم واقعد بقي اقول
بابا بابا هو ايه ده يقولي ثواني بس عشان بتفرج
واده من وشه واقوله بصلي طيب واقعد راخم عليه ومش اهنيه علي الماتش ويشخط فيا اقوم اجري من علي رجله وافكر شويه واجري انط علي رجل حد تاني واقعد اقول خالو خالو
يعني ايه فاول طب مين بيلعب مع مين
ولحد ما كبرت كنت سعات وهما كلهم متجمعين اروح فاصله نور البيت وهما جوه واقول معلش الكهربه فصصلت وماس كهربي وحجات من دي وارجع اوصلها تاني نوع من الغتاته
يوه بس بقي انا اكلمت كتير
اجري انام بقي

صفــــاء يقول...

.
سمكه واحدة
*********


هههههه يخرب عقلك
والله العظيم ما قولتى غير اللى انا برضه بعمله بالظبط
انا اولا مش بحب مباريات الدورى العام والكاس والحاجات دى
ولما ابويا كان بيقعد يتفرج عليها زمان ويطول هو واخوالى قدام التلفزيون وانا مش عارفه اتفرج على حاجه وحياة ربنا هو اللى انت بتعمليه بالظبط انا بعمله
لا وزيادة فى الرخامه بقى أقلب التلفزيون واجرى او اسرق الريموت او اعمل اى حاجه رخمه
بت يا سمسمه انت بجد مشكله بس تعرفى بقى

فينا حاجات كتير زى بعض دة طبعا غير ان انت حبيبتى
.

الفقيرة إلى الله أم البنات يقول...

انا النهارده بسأل جوزى لانه زملكاوى اصيل وأنا كمان بس أنا بطلت القرف ده
سألته صحيح هينزل درجة تانيه قال إحتمال قلت يارب
علشان نرتاح منه سنتكامله منسمعش عنهم
وقال ايه واحد جايبين بيدفعوا له 950 الف جنيه.؟.ايوة مش قرش
وطبعاالاعبين بياخدوا فلوسهم إشمعنى الباشا والناس بتاخد فلوس ومش بتلعب
وسلامى الكبير قوى للخيبه القويه ..وللفانله البيضا اللى اصبحت سودا من خيبتهم

صفــــاء يقول...

.
أم البنات
*********


طب تصدقى انت بقى انى ولا زملكاويه ولا بشجع اى فريق ومش بحب اتفرج على الكورة اصلا ومع ذلك صعبان عليا الحال اللى وصل له نادى زى دة
وبعدين دة كدة فعلا هينزل دورى المظاليم وهتبقى شئ وحش جدا ومسئ
هى صحيح مجرد كورة ورياضه بس حرام
يعملو حتى بالكام مليون اللى بيلهفوهم

شرفتينى جدا
.