الاثنين، 9 مارس 2009

تااااااااج



سلوى صاحبتى ... حبيبتى
عاوزة تورطنى فى تاج
وبصراحه دى مش اول ورطه حد يحب يحطنى فيها
أتعملت فيا كتير قبل كدة بس كل مرة كنت بهرب
المرة دى سلوى مصممه تزنقنى
وتقولى قال ايه تاج الطفوله
طفوله ايه يا سلوى اللى انت عاوزانى اتكلم فيها دى
دة على اساس ان اللى انا كنت فيه دة كان طفوله ؟
مصّرة يعنى ؟ طفولتى !!! هيييييه دنيا
ألا هى الطفوله دى طيب من كام لكام يعنى ؟
ما علينا كنت طفله جميله والله وامورة وكانت امى بتبذل محاولات جبارة
عشان تخلينى بنوته وفيونكات والحاجات دى
لكنى كنت أرفض بأباء أنى أعمل فيونكات وأقعد فى البيت ألعب بعروسه
وعليه فمقر أقامتى الرسمى كان الشارع وحتى بعد منتصف الليل بساعات
يعنى اطلع بيتنا على 3 الفجر كدة اغطى امى وابويا اللى نامو مكانهم
وهما مستانينى أرجع ..... أأجر عجله وأفك واللى يلاقينى بقى
اة ... وانا صغيرة وقبل ما نكتشف التحرش والحاجات دى كانت امى تقولى
أوعى تخلى حد يقربلك أو يلمسك او حتى يطبطب عليكى خاااالص
مهما كان الحد دة وعليه فأى شخص كان يحاول يتقرب للطفله الحلوة
ذات خصلات الشعر المتهدله حول وجهها اللى بتلعب فى الشارع دى
ولو بحسن نيه من باب حب الطفوله كان بيستمع لوصله من
الصريخ والردح والشرشحه ويتفضح فضيحه أكبر من فضيحه أيران كونترا
وجرسه تفوق جرسه شاوشيسكو أثناء سحله فى ميادين رومانيا
ويبقى مادة أعلاميه نادرة لسكان الشارع لمتابعه احداثها بشغف
كنت الطفله الوحيدة اللى بتتفرج على نشرات الاخبار فى سن 5 سنين
وبتتابع الجرايد بانتظام فى 6 و عليه كنت طفله شبه مصابه بالأكتئاب ولها فكر وأيدولوجيا .
يعنى كنت بكرهه التعليم جدااا وشايفه انه نظام فاشل فى مصر
وعليه مش بحب اذاكر و أرفض انى اخد مناهج غبيه وبكدة فشلت فى التعليم
كنت بكرهة جدا كمان ان حد يعاملنى المعامله الهبله اللى بيعاملو بيها الاطفال
من نوعيه يا أمورة وشطورة وانت كتكوته والحاجات المتخلفه دى ...
يعنى مش من حق حد انه يعامل الطفل على انه حيوان مدلل او كائن متخلف
لمجرد انه صغيرواللى كان بيحاول يعمل الحاجات دى معايا
ويحط ايدة على وشى وخدى والكلام دة كنت بعضه
وطبعا غنى عن القول انى كنت عيله فى قمه الشقاوة
وأطلع فوق الشجر وأجر شكل بلد وأخانق طوب الأرض
وخدت علق بكل ما يخطر فى بال من أول شبشب امى والحزام بتاع ابويا
لحد شماعه الهدوم ومضرب السجاد وحتى عصايه الغليه
وبرضه كنت مدللة للغايه وحتى الان فأنا دلوعه أبوها
بأختصار طفله متشردة عصبيه مكتئبه شقيه فلسفيه
وعلى الله تكونى أستريحتى يا سلوى وعجبتك الفضايح دى
أما بقى نهدى التاج دة لمين ... فأنا ميهونش عليا الاحراج دة أعمله فى حد
ولا الفضايح دى ... مش هعمل اهداء واللى نفسه يحرج نفسه يتفضله
.

هناك 21 تعليقًا:

سلوى يقول...

عسل يا بنتي والله
وأيوه طبعا استريحت :))

إيه الجمال ده
وأنا فاكرة لما قلت المولد عملت إنجاز
ههههههههه

إنت يا قلبي مش كنتي طفله مشرده
إنت كنت طفله مميزه

سمكه واحده يقول...

ههههههه ده ايه التشرد ده
واتريكي وقعتيني حته وقعه اي لحد دلوقت ضهري وجعني منها منك الله يامفرتيه شكلك شقي طبعا
انا كنت بحب اقعد ما الناس العوجيز واسمع حكاوي زمان ولهم ريحه مميزه وهدوء جميل هيييه زومااان
انتي بتقولي يخليلي اللي بيحبوني
واللي لسه ه هحبوهم
قصدك ايه يا صفصف ولا غلطه مطبعيه؟
(وش لئيم)
اضيفك ازاي اصلي حماره في الفيش بوك؟
اعمل ايه؟عندي بس معرفش فيه حاجه

life يقول...

بسم الله ما شاء الله الاخت أزاى سكتو عليها
وما اخدوهاش فى الاحداث
وعملولها أعادة تأهيل
بس بصراحة اظنك يا صفاء لسه ما
أتعديتى سن الطفولة
لأن لسه فيكى نفس الصفات
لسه مشاغبة بس كل اللى أختلف أنك
مبقتيش بنت الشوارع
بس الاكتئاب زى ماهو والعناد زى ماهو
عناد طفولى
لسه فيكى براءة بس براءة شرسة
بس ألذ صديقة

حبى ليكى يامشاغبة

حسن حنفى يقول...

هههههههههه

عارف الواحد مع انه عمل كتير في الطفوله

بس نفسه ترجع بيه تاني ويعمل كل الحاجات دي من اول وجديد

علي الاقل بيعملها ببرائه ده بجانب ان مش عليها ضريبه يعني كل واحد بارحته من غير عقاب

ههههههههههه

:d

dodo يقول...

بجد والله طفوله حلوه هو اه تشريد بس والله زكريات حلو اوى ونفس الواحد يرجع تانى طفل ويطلع الكبت اللى جواه بالشقاوه واعتقد الطفوله اللى تطلع شخصيه زيك اكيد تبقى طفوله جميله وربنا معاكى تحياتى

غير معرف يقول...

ايه دةيعني انا جاي وفاكر انك لسة مستمتعة وبحوار الجرايد والاعلام ألاقيكي فاضحة نفسك كدة
بس حوار عصايةالغليةدي صعب قوي صراحة
بس عارفةاحلى ما في التاج دةانك ماهدتوش لحد
وطبعا لوكنتي اهدتيه اكيدماكنتيش هتمررلهولي لأننا صحاب والصاحب اكيد ما بيزنقش صاحبه
تعيشي وتفتكري
وسلاموز بقي

غير معرف يقول...

هذه هى الطفولة ..

فهل تغيرت كثيرا ؟ أرى أن ملامحك صغيرة لازالت معك وانت كبيرة.. لازلت فى قمة شقاوتك .. ومشاغبتك .. وخفة دمك أيضا

saragebaly يقول...

هههههههههههه

يا خبر ياصفاء

ايه كل دة؟؟

انتي وصلتي لعصاية الغلية كمان

ههههههههههههه

بس احلى حاجة في الطفولة الشقااااوة والشغب

بتبقى متعة

أنا حر يقول...

بيتهيألي تاج جه في وقته لان كنا محتاجين نقرب من الطفلة اللي بتكتب في المدونة من زمان
:)
تحياتي

واحد من الناس يقول...

ايوه كده اظهرى على حقيقتك.. ايتها الطفله المتشرده.. وانا باقول حاسس انى شفتك قبل كده فين فين؟؟ اتاريكى زميله ...

يلا اهى ايام وراحت لحالها خلاص ولا يمكن ترجع لم يتبق منها الا الذكريات...

تحياتى

فارس عبدالفتاح يقول...

الفاضلة / صفاء


تحية فائقة

والله وهذا ليس من المداهنات أو المماحكات وأنا لا أحباها وأريد أن أكون بعيد عنها كل البعد من أول ما قرأت تعليقك على كلامي في مدونة الأخ فشكول وشرحتك لكلامي بطريقة أنا لو أرد أن اشرح بها كلامي لان استطيع أن اشرحه بهذه الطريق

وهذا جعلني أفكر كثيراً فيك ولا اقصد شيء مسيء لا سمح الله ولكن طريقة الفهم لكلامي التي يوجد بها وعي حقيقي لما تقرئين جعلتني أفكر كثير ما هذه الفتاة وعفواً أن كنتي سيدة فانا لا اعرف


المهم

من تكون وجلست فترة ليست بقصيرة اقرأ التعليق الخاص بك ثم أعيد القراءة مرة ثانية أجد أنني استطيع أن استبين أن هذا العقل الموجود أمامي ليس عقل عادي كمثل باقي الفتيات الموجودات في المدونات التي أكثرهن مع الأسف الشديد يتكلمان في أمور تافهة ولا يقرأن جيداً وإذا قرأت جيداً لا تستوعب وإذا استوعبت فقدت القدرة على التعبير

فكان تعليقك ينم على انتباه وإدراك ووعي وشخصية تستطيع أن تواجه وان تصارح وان تفهم منها وتفهم منك فشرحك لفترة طفولتك شيء يؤكد ما كنت قد استنبطه من تعليقك

وادعوا لك من كل قلبي خالص من أي أغراض أو شواغل أن يوفقك في دنياك وان يرزقك بابن الناس اللي يعرف قيمتك

تقبلي كل التحية والاحترام والتقدير من أخ اصغر أو اكبر

صفــــاء يقول...

سلوى
*****

بذمتك ايه الجمال فى عيله متشردة وعنيدة ومجادله ومكتئبه

انت بس حبانى عشان كدة شايفانى متميزة فى حين ان التميز دة صفه مميزة ليكى


==================


سمكه واحدة
*********

سمسمه حبيبتى انا ميهونش عليا اوقعك ابدااا وانت لو كنت صاحبتى وقتها كنا طفشنا الشارع كله وخليناة يصوم ويصلى
اما بقى حكايه قصدى دى فهى مش غلطه مطبعيه ولا حاااجه وبلاش الوش اللئيم دة
انت عارفه قصدى كوويس ... ايوة هما اللى لسه هيحبوكى
حبيبى الجميل انا بعت لك اتنين ايميل ليا وانت اختارى اللى يناسبك فيهم وضيفينى عليه
سمسمه اللى زى العسل اموووووة

صفــــاء يقول...

life
****

الله يكرمك يا مرمر احداث وأعادة تأهيل
أى نعم انا كنت طفله متشردة بس مكنتش سوااابق
وبعدين سن الطفوله غير مرحله الطفوله ... الطفوله هى كل شئ برئ ونقى ويمتاز بصدق
ليه نتركه ونتجه لكل تعقيد فى الدنيا نقدر نستغنى عنه وبعدين ايه يا بت بنت شوارع دى
أخرسىىى انا طول عمرى من عيله أرستقراطيه ... انا بس بتقمص شخصيات عامه الناس اللى زيك
مرمر حبيبى الجميل طول ما عندى اصحاب زيكم هنا ربنا يبعد الاكتئاب
وطول ما الدنيا رايقه وصافيه ما فى عند
والشراسه بقى دة طبع قطط ... ميسبنيش
المشاغبه هى انى اجى هنا كل فترة واجر شكلكم
حبى ومودتى وسعادتى بك

صفــــاء يقول...

حسن حنفى
*********
هو مش كل حاجه عملناها فى الطفوله عدت من غير عقاب بس لأننا كنا أطفال كنا بننسى دايما اى عقاب ونفتكر دايما مرح اللحظه
نورتنى يا ابو على

======================

dodo
*****
الطفوله اللى منفتكرش منها غير كل شئ جميل وله مذاق ويسيب ذكرى حلوووة هى أكيد طفوله مميزة
كمان طفولتنا نقدر نستعيدها فى كل ضحكه حلوة صافيه تخرج من قلبنا
شرفتينى جدا يا قمر

صفــــاء يقول...

مصطفى ريان
***********
حوار الصحافه والاعلام انت عارف انى واحدة متواضعه ومش بحب أتباهى بانجازاتى
حوار عصايه الغليه وما أدراك ما عصايه الغليه كانت بتبقى عصايه وصايه كدة تستحمل المايه المغليه والرابسو وشيل الهدوم السخنه وشوف انت بقى بنتكلم فى حجم ازاى
انى أهديه لحد دة شئ انا مرضاش اعمله بصراحه يصعب عليا اوى الضايح دى وربنا يسامح سلوى بقى

=================

سارة جبالى
**********
هى عصايه الغليه وبس ... وحياتك انت ومنفضه السجاد كمان
بس ولا أى علقه كانت تقدر تخلينى اقعد فى البيت او اعيط وأستغنى عن اللعب
متعه الطفوله هى أجمل ما يتبقى لنا دائما
نورتينى يا قمر

صفــــاء يقول...

شريف
*****

لم أتغير رغم الضغوط ولم أكبر رغم الالحاح
ملامحى لازلت كما كانت من 20 سنه وشقاوتى لا أتنازل عنها مقابل اى شئ
والشغب تخصصى
وخفه الدم دى انت وذوقك بقى

==================

انا حر
******
بس كان واجب صعب اوى وخصوصا ان أحرجت نفسى أحرجتها يعنى
بس كله يهون وسلوى متزعلش انى معملتش الواجب بتاعها
شرفتنى جدا

صفــــاء يقول...

واحد من الناس
**************
لو كنت بتأجر عجل وبتطلع فوق شجر التوت وبتعمل عصابه فى الشارع تتخانق مع الشوراع اللى حواليك يبقى انت اكيد اكيد اكيد كنت زميل
راحت وتبقى منها اجمل الذكريات
حمد الله على سلامتك
نورتنى

================

فارس عبد الفتاح
****************
أن تقرأ ... كلمه لها معنى يتفوق على جريان عينيك بين السطور وخطف المعانى والخروج بملخص ما
ان تقرأ ... كلمه ذات ألف معنى

وفى موضوعك انت وعم صلاح لم أقل ألأ ما فهمه عقلى وأستخلصته من الكلمات

ثم أنه لا داعى للاعتذار او الرسميات فى الحديث فنحن ناس ذوى عقل وثقافه ويستطيع كل منا معرفه القصد من الحديث وتبادل المناقشات والحوار والافكار وحتى الاختلاف دون أفساد معرفه او صداقه تتكون على صفحات المدونات حيث يكن لكل منا رأى ما او وجهه نظر نستطيع عرضها او النقاش فيها وبيننا كل أحترام متبادل
أمال البوست المحرج دة فكان واجب وأجبارى انى اجاوب عليه عشان خاطر واحدة من أعز أصدقائى وان كنت فعلا لم أتحرج او أخجل من أى مما فيه
هههه يعنى كنت عيله شيطانه وليا الفخر

دعواتك أقدرها واحترمها وصداقتك تشرفنى وادعو لك بمثل ما دعوت وأتمنى لك كل الخير
ولك خالص الشكر وجزيل الاحترام

قديسك مولاتى يقول...

سلام مربع ...
من البدايه مش عايز اى سؤال عن غيابى الفتره دى ... بس لو حبيتى تعرفى ممكن تراجعى سجلات مستشفى العباسية الشهر اللى فات وانتى تعرفى
تانى حاجه انى اتفاجات بالعالمية اللى انتى وصلتيلها .. طب بقولك ايه بجد انا اشتريت تشيرت جديد بمناسبة خروجى من المنتجع السياحى اللى كنت فيه وياريت اخد توقيعك على التيشرت ، عشان الشهرة وكده يعنى .
بجد مبروك ويارب فى تقدم كده على طول ، مع انى لى عتاب .. مش نسال على العبد لله ، ماكنش عيش ومدونات اللى بينا
على العموم كل مبروك الخبر الجميل ده ، وبمناسبة الطفولة الجميلة والهادية اللى انتى كنتى عايشاها . عاجبنى قوى وصفك للاحداث ولى عندك نصيحة بجد ، انتى مشروع اديبه نابغه فى القصة القصيره .
ياريت تستغلى الموهبة دى ، لان حرام بجد تسيبى الموهبه اللى ربنا انعم بيها عليكى ،وهى فن السرد . فى ناس كتير جواها حاجات كتير ومابتعرفش تعبر عنها ،وانتى بتقدرى .ياريت تهتمى بالموضوع ده . والف مبروك مره تانيه

صفــــاء يقول...

قديسك مولاتى
***********
مجدى اهلااااااااااا
وعهد الله كنت فسيرتك بسئل عنك البت شيماء اختى بقولها فينه مش باين
وبما ان أخر بوست ليك كان بيحمل مؤشرات فصدقنى وجودك فى العباسيه لا يحمل لى أى مفاجئه ... دة غير ان دة المقر الرسمى المستقبلى لينا
بس والله سئلت عنك وكنت بدخل اسيب سلام او تهنئه ولما طولت قولت الاخوة المسؤلين عن المنتجع هيحجزوك شويه
شكرا يا مجدى وانت دايما سباق بالخير وبالسؤال وان كان على العالميه فيشرفنى بتواضع انى أمضى على التيشرت
وموضوع الاديبه دى فدة بس من ذوقك وكرم أخلاقك
شرفتنى جداااا يا فيلسوف وشديدة السعادة بعودتك

غير معرف يقول...

شقاوتك الزايدة وانتى صغيرة هى اللى خلتك مميزة
وخلت عقلك متفتح وكبير ودايما بيفكر اكبر من سنة

بس اكيد انتى احسن كتير من الى عاش طفولة انطوائية او اللى معاشهاش خالص

تحياتى

صفــــاء يقول...

nona
*****
أشكرك على التعليق الرقيق دة

واكيد ان الطفل , أى طفل عاش طفوله وحيويه وأنطلاق
هو اكثر تميز بكتير من طفل أتحبس أو أنعزل
شكرا على الزيارة الجميله وأتمنى الدوام
.