الجمعة، 22 مايو 2009

هيستا لافيستا

ناويت بالصلاة على النبى كدة

أنحرف

وأوعى حد يفكر الافكار الخايبه بتاعه الانحراف بتاع زمان

ولبانه وحسنه على خدها الشمال

ومن فضلك ولعلى والكلام الاهبل دة

دة حتى الانحراف دة بقى عبيط جدا وميجبش حتى حق باكو اللبان

فوقو والنبى معايا كدة شويه وبلاش الافلام العربى اللى لحست عقولكم دى

أنا عاوزة انحرف أنحراف من اللى هو حلو كدة ويجيب همه

ماهو مش معقول كمان أبقى واحدة عندى 31 سنه

وقاعدة فــ بتنا كدة زى قزازه زيت القليه
وكمان وحشه فــ حقى أنى مستغلش شويه مواهب طبيعيه أديهالى ربنا

وعليه ناويت أقصر الجيبه بتاع 30 سم ونرفع كعب الجزمه 10 كمان

وكام ساعه أقضيهم فى أى مركز تجميل

والحمد لله مش هنزرع ولا ننفخ ولا نحقن
هو بس شويه تظبيط للشعر ونفتح لونه وحبه ألوان للوش

وعلى أى بنك ...
والمسؤلين ورجال الاعمال عندنا بسم الله ما شاء الله

متخلفين عقليا وبيريلو على أى جوز جزمه معدى

وقرض على كام حفله نعمل علاقات اجتماعيه كويسه

وناخد تعاقد مع هيئه سلع تموينيه

نورد قمح مستورد أو فول مـــ الصين
او حتى عجينه طعميه

بعدها بشويه كمان ربك يفتح علينا وألهف حته أرض من بتوع الدوله على الطريق الصحراوى


ودى ممكن بالعقد بتاعها ناخد قرض كمان لبناء مدينه سكنيه لحل أزمه السكان فى جزر القمر

نكبر شويه كمان وعلاقاتنا الاجتماعيه تزيد وتتوسع أقوم أنضم للجنه السياسات

وأبقى أمين المرأة تحت القبه المباركه
ونستورد حديد من تركيا وبلغاريا

ومحدش يقولى مش عارف مين يدبحك زى مين


لا يا قلبى مش احنا

دول بيتلمو على النسوان السكه واللى من أيد لأيد وبتوع الفيديو كليب

عشان الوجاهه الأجتماعيه والمنظرة

وبما انى انا كمان ست يعنى فــ ميلزمنيش الصنف دة


ولو العمليه بشبشت أوى يبقى ضمنا توكيل خط بحرى

وكام مركب خربانه وتغرقو بقى والا تولعو

هو انا مغسل وضامن جنه ؟

هى بس طالبه شويه ضمير نعسان وقلب تقيل
وبدل القعدة فى البيت نولول زى الولايا كدة نبقى سيدات أعمال

ومساهمين فى الاقتصاد ولو حاجه حصلت او هيقبضو عليا

يبقى نفك على أوروبا

وكل اللى بيطلع أوروبا بينجو بأذن الله


حكم الأوربيات يمحون السيئات

ومش بيتمسك ويتعدم غير الهبل اللى بيرجعو والعالم المتخلف اللى واثق من نفسه

ومن اللى حواليه وانهم مش هيسيبوة يقع ويغرق

فى المواضيع دى لا تثق غير فى البلد اللى مفيش بينا وبينها اتفاقيه تسليم مجرمين
وبرة بقى أعملى شركه سياحه

والعيشه فى فرنسا والسهر فى الليدو والعشا فى مكسيم بلاش الريتز


كمان بلاش لندن دى شؤم على العرب











وعروض أزياء كريستيان ديور ودولتشى اند جابانا وأيلى صعب




وبارفانات شانيل وكارولينا هيريرا


ويخت فى الكوت ديزور


وتتفرج على البولشوى


وتعوم فى بحيرة البجع

يالا يا جماعه كل اللى عندة أفكار يتقدم بيها من فضلكم لمشروع البدايه


مش عاوزة الكلام الفاضى بتاع نغنى ونرقص ونفتح ملهى ليلى والعبط دة


شغلو مخكم بليييييز

يالا ... أستعنا على الانحراف بالشيطان









هناك 31 تعليقًا:

د. ياسر عمر عبد الفتاح يقول...

ده الإنحراف طلع جميل أوي
لا مليش دعوة أنا عاوز أنحرف

بالنسبة ليا بقي ؟؟
أأقصر برضه البنطلون؟
طيب وكام سم ؟؟

ساعدينا
أخوكي وعاوز ينحرف
مفيهاش حاجة يعني لما توجهيني
أنا عندي إستعداد للإنحراف بس مش لاقي توجيه

صفــــاء يقول...

د. ياسر
********
أسفه يا دكتور بس مظنش الوصفه دى تنفع معاك
انت لو قصرت البنطلون سورى يعنى هيفتكروك مجنون
بس انت ممكن تتبع نفس الخطوات من غير ما أى حاجه منك تبان لأن على ما أعتقد يعنى ان رجليك وحشه ومش هتجيب فلوس دى ممكن توديك السجن
وان شاء الله أوجهك من عيونى حاضر بس هنتستنى شويه مقترحات من أى حد أهى تنفع برضه
والمهم النيه والأرادة
وبعد كدة كله سهل

سلوى يقول...

دعوة للإنحراف وزقاق المدق
إيه زقاق المد دي .. دي حاجات قديمه

المهم
الإنحراف للجميع :))


دا انت بقيت مليارديره في ثواني
بالنسبه للأفكار

أقترح تعملي كورس تعليمي توجيهي تفهيمي تنظيمي

أديكي شفتي الدكتور ياسر كان هيودي نفسه السجن ويقصر البنطلون ويقولوا عليه إرهابي

إنتي ينوبك ثواب تعملي كورس

خلي الشباب يعيش بقى يومين

صفــــاء يقول...

سلوى
*****
بالنسبه للأنحراف هو سهل جدا
بس احنا اللى شويه متخلفين وماسكين فى الكلام الفاضى بتاع الضمير والحرام
بصى يا قلبى
انت أتبعى الخطوات اللى انا قولت عليها دى فى الاول
وبعد ما ربنا يكرمك وتسرقى اللى تقدرى عليه
أبقى حجى بقى وتوبى وبالمرة زكى بقرشين من مال الحرام اللى لهفتيه وانت هربانه

بالنسبه للكورس

احمم احمم هبقى احاول أعمل دورات تدريبيه لتثقيف وتوعيه الشباب
احسن دول دابو من الفقر يا حبه قلبى
وكله بثوابه

سلوى يقول...

يادي المصيبه

لاااااااااااااااااااااا

لا يا لولو مش هعرف
أقولك
مممممممممممممم

انت اشتغلي في الكورسات عادي وأنا هحضر عادي

ولما الناس تنحرف وتحط خطط السرقه وتسرق البلد
أروح أنا أبتزهم .. النص بالنص
وإلا أبلغ عنهم
كده من غير مااعمل حاجه

وبعد ما يخضعوا لتهديدي
أبلغ عنهم برضه :))
أمال إيه ياما

دي مصر هي أمى :))


أروح أنا أبت

غير معرف يقول...

هتقصرى الجيبه تلاتين سنتى بس.....كده تبقا شانيل.....نصيحه بقا قصريها ستين سم يدوووب ع الانحراف
وبعدين انتى الاسهل تأجرى كام واحد من المطاريد وتحطى ايدك على حته ارض وبعدين تبعيها وتشترى واحده تانيه بورق رسمى وتاخدى عليها قرض بضعف تمنها وساعتها التظبيط هينفعك مع مدير البنك ....وتكملى دايره الانحراف
يلا دمتى بخير....عايزين تمن الاستشاره

صفــــاء يقول...

ٍسلوى
*****
هى دى يا ماما الروح الخايبه والتردد والانهزاميه وفقد المباردة وعدم القدرة على أتخاذ القرار
تفضلى قاعدة تشوفى الناس من حواليكى أماله تسرق وتنهب وتغتنى وانت قاعدة بس مستنيه لما يغتنو وتبتزيهم
يعنى مجرد كائن طفيلى
وانا محبش الروح دى
صاحبتى يعنى لازم تملكى زمام المبادرة
وبما انى ناويت أنحرف يبقى لازم تبدأى الطريق معايا مش تقعدى جنب الحيطه مستنيه اما تغتنى من غير مجهود وسرقه
وطبعا طبعا مصر هى أمك ومراة ابوكى وجوز خالتك بس أفترضى يعنى ان كل دول ماتو وانتو ورثتيهم يالا يا قلبى شدى حيلك
مشوار المليار بيبدأ باختلاس صغير ونصب على القد
بس انت أبدأى أوى خطوة

صفــــاء يقول...

فتاة من الصعيد
***************
هى دى الروح
هو دة التفكير السليم
هما دول الشباب اللى هيبنو ويسرقو بكرة
انا كدة أموت وانا عارفه ومتأكدة انى سايبه البلد فى أيد خفيفه
تسرق الكحل من العين
وتنهب البنك فـ ثانيه
أختى الصعيدية
انت أمل مصر
انت بكرة
أكاد أبكى من التأثر ان مصر بقى فيها شباب بالعقليات الرائعه دى
شكرا على النصيحه بس انا لازلت عند رأى ان الجيبه تقصر 30 سم بس انا بنت ناس
تمن الأستشارة تاخديها أن شاء الله على رقم حسابك فى أى بنك تختاريه برة بعد ما نهرب سوا

سلوى يقول...

تردد وانهزاميه
عاااااا


و ماتقوليش طفيلي .. دا أنا هسرق الحرميه نفسهم
وهلعب بأعصابهم


وهبلغ عنكم برضه :))

صفــــاء يقول...

سلوى
*****

بلغى يا ماما براحتك

وان كانو قبضو على الذين من قبلنا

أبقى قابلينى لو قبضو علينا
.

سلوى يقول...

إنها الحرب إذا

فاليكن

شوفي يا صفاء
نص اللي هتاخديه ومن سكات

ولقد أزعر من فنزر :)

Amgad يقول...

ياااااااااااااه
ده الانحراف طلع حلو اوي يا ابلتي
بس ليا طلب عندك ونبي
لما ربنا يفتح عليكي كده وتنحرفي صح
ابقي شوفيلي معاكي شغلانة صبي منحرفة
او اي حاجه من هذا القبيل انتي عارفة الرجاله صعب ينحرفوا
ولو فكروا مش هيوصلوا بسهولة
بدعيلك من كل قلبي

ادم المصرى يقول...

وعباد الله الذين يمشون على الارض هونا واذا خاطبهم الجاهلون قالو سلام صدق الله العظيم

هههههههههههههههههههههههههههه

انحراف ايه بس طب انا ممكن اقصر البنطلون بس بنيه انو هيكون سنه عن النبى صلى الله عليه وسلم

r يقول...

هههههه
ايه يا بنتى دا كله
انحراف حته واحده
تعرفى انه سهل وسهل جدا كمان
للاسف دلوقتى ساعات بيبان انه تفتيح مخ
وناس مش معقده

تعرفى فعلا دلوقتى الواحد بقى شاكك فى اى
حد بقى رجل اعمال وعنه ولو حتى مليون واحد انه اصله حرامى
واى واحده ملونه كدا بتظهر فى التليفزيون خصوصا الاعلانات والاغانى
ان اصلها بلاستيك
ربنا يعافينا
وارجعى يا بنتى السكه دى خطر عليكى

واحد من الناس يقول...

وافضيحتاه...
بنت الصعيد عايزه تقصر الجيب وتعلى الكعب... وشوية الوان فى الوش كمان؟؟

فين البندجه؟؟ .. لازم اطخّك طخيخ..

على طول كده بعتى مبادئك ونيمتى ضميرك..

ابقى قابلينى ان فلحتى مش اى حد يعرف ينحرف.. مش احنا يا ماما..

الكلام ده له ناسه..

تحياتى،،،

هانى زينهم يقول...

مش هاكدب عليكى فكرة الانحراف راودتنى كتير بعد الاحداث الاخيرة وبعد ابو هشيمة وهشام طلعت والليلة دى بس رجعت قلت وبعدين كل اللى هينوبنا غضب ربنا علينا وكدة كدة الدنيا متفاتة ومش مستاهلة نقف بين ايدين ربنا ونسأل على اموال حرام كمان اذا كان الحلال مش نافع يبقى الحرام هينفع ؟

صفــــاء يقول...

سلوى
*****
يالا من هنا عشان مش طالبه مبتزين
مطلوب رسامى خطط سرقه وبسوالحرب فى السيكشن اللى جنبنا

صفــــاء يقول...

أمجد
****
بص يا أمجد
مكدبش عليك
الحاله متدهورة جدا للرجاله دلوقتى
وخصوصا يا بابا بعد ما بقيتو بتنخلعو
كمان طريق الانحراف مش سهل فعلا ليكم حاليا
يعنى أخركم فيه انكم تضربو بانجو أو تغتصبو بنت
ولو وصلتو للجنه السياسات بيضحو بيكم زى الخرفان عند أول مزنق
بس صبى منحرفه دى هتبقى خطوة فاعله ليك فعلا وعلامه مضيئه فى طريقك للترقى
تبقى أن شاء الله من أعلام الفكر والأنحراف

صفــــاء يقول...

ادم المصرى
**********
زى ما انت قولت كدة ممكن الشئ الواحد يؤدى الى نتايج مختلفه
يعنى انت تقصر البنطلون تبقى سنه
لو بنت قصرت الجيبه اوى تبقى سنيه شخلع وتشخلع أجدع نظام عربى وتهد أقتصاد دول وتعدم رجاله
هييييييه .... زمن

صفــــاء يقول...

بسنت
*****
أرجعى السكه دى خطر عليكى
هو دة الكلام اللى مرجعنا لورا
فين روح المبادرة يا قلبى والأقدام
وبعدين أيه يا بنتى الطيبه دى
ملييووون جنيه
وربنا المليون جنيه ما تجيب أى حاجه دلوقتى
لا بيت ولا عربيه لامبورجينى
ولا حتى تكاليف أسبوع فى ميلانو
أتشجعو بقى وبصو لبكرة

صفــــاء يقول...

واحد من الناس
***************
هو دة الكلام اللى يموت الهمم ويطفئ العزيمه
ليه يعنى يا بيه
هما اللى بينحرفو احسن مننا فأيه ؟
هما فيهم عقل واحنا فينا مفتقه ؟
وبعدين كل المنحرفين الكبار كانو زيينا كدة زمان قبل ما يكافحو ويتعلمو ويقتلو ويسرقو
بلاش بس والنبى تربطونا فى الارض كدة وسبيونا نتعلم حاجه تنفعنا

صفــــاء يقول...

هانى زينهم
*********
فكرت كتييير فى كلامك دة
بس رجعت لمذهب تحيه كاريوكا وفيفى عبدة وسهير رمزى وشمس البارودى لقيت انهم بعد ما قلعو عمر بحاله لبسو تانى بعد كدة وبقو شيوخ أسلام ونصيحه وهدايه
وبعدين رجعت برضه لسيدنا فضيله الشيخ اللى قال ان سوزان تميم شهيدة لأنها قتلت غيله وغدراً
لكن ماجبش خاااالص سيرة انها كانت على ذمه 3 رجاله مرة واحدة
وعليه فى الزمن اللى حتى الدين بقى على الهوا
كل واحد يشوف هواة جاى من أى ناحيه ويفصله على مقاسه

فارس عبدالفتاح يقول...

ربنا يوفقك

غير معرف يقول...

يا سلام .. ماكانش حد غلب ..

مش مع الدنيا .. لأ مع ضميره .. انا مش هاقدر اصدق ان فيه حرامى بينام مرتاح البال مهما زينت له شياطينه ان كل الناس كده والحالة تمام .. ده انت فى الجنة ونعيمها

أكبر اللصوص ومليارديراتهم بالمناسبة ومشاهيرهم هم من الرجال .. وليسوا من النساء .. مع كل المواهب التى يحظى بها البنات ..الا انه ليس كل الرجال انتهازيين أو يعرفون من اين تؤكل الكتف .. وفى الاغلب يتمتنعون حتى لو كانوا يعرفون من أين تؤكل .. لدينا بقية ضمير وان اختفى معظمه او تبلد

فكرة حلوة طبعا وجميلة وكمان سهلة .. لكن .. هل انت متأكدة انها ستحقق لك السعادة؟ مهما صيفت فى الكوت دازور وارتديت الفرساتشى واكلت فى ماكسيم ؟

احنا مصريين فى النهاية .. وبصلة المحب خروف .. واى حد بيحاول يبقى خواجة .. صدقينى عمره ماهايبقى خواجة

فين آل فايد وبيعملوا فيهم ايه فى انجلترا .. ومادولوش حتى الجنسية .. وهل تعتقدى ان ممدوح اسماعيل ومن مثله سعيد وهو لايستطيع ان يطأ أرض وطنه ومعه كنوز الدنيا

عزيزتى .. البحث عن السعادة يلزمه وسائل أخرى .. مش هو ده المطلوب فى النهاية؟

آسف للإطالة .. نع خالص اعتذارى للإنحراف

اقصوصه يقول...

عن نفسي ما عندي افكار

ولو عندي كنت طبقتها بنفسي

ما كنت بعطيها لحد :)

المهم اني حبيت اقزلك

لو حصل نصيب وانحرفتي

لا تنسين تاخذين معاكي

اختك اقصوصه الفقيره لله

ومعا للانحراف!!!

لوووووووووووووول

صفــــاء يقول...

فارس عبد الفتاح
****************
دعواتك

صفــــاء يقول...

شريف
*****
كدة يا ابآ العمدة لازم تكسر مجاديفى وتقصقص اجنحتى
مفيش ستات أقتحمو مجال السرقه قبل كدة أيه يمنع أنى أكون البادئه
أكون من الرواد فى هذا المجال
وأبقى كدة زى ملك حفنى ناصف وهدى شعراوى والناس اللى فرشو الطريق للستات عشان يخطو خطوة جديدة
وبعدين يا عمدة مين جاب سيرة السعادة
او قال انى بدور عليها
لا خااالص
دة انا بضحى وبقتحم طريق مجهول عشان أساهم فى نهضه الستات ومساهمتهم فى سرقه البلد
ومش عازة أبقى من الخواجات
انا مصريه وأفتخر ومش ممكن أروح اسرق الغرب قبل ما أسرق بلدى أولاً

صفــــاء يقول...

اقصوصه
********
بدايه أنت عندك أمكانيات كويسه جدا
لأنه قولتى انك لو عندك أفكار هتحتفظى بيها لنفسك مش هتديها لحد ودى قمه الأنانيه بسم الله ما شاء الله
يعنى موهوبه بالفطرة وممكن بشويه تدريب وتشجيع تبقى أنانيه وغير مباليه وفى المرحله القادمه ممكن تبقى شريرة ودى مرحله هتسهل عليكى حاجات كتير خالص فى أنك تنحرفى بالتدريبات والعرق والجهد
بس بالاصرار والعزيمه توقعى النجاح

hasona يقول...
أزال المؤلف هذا التعليق.
حسن حنفى يقول...

هههههههههه


لو كده الواحد يروح ينحرف من بكره علي كده ولا ااجلها لبعد الامتحانات وبعدين انحرف بقي

:d

وحي القلم يقول...

السلام عليكم
حلو الانحراف ده ؟ مع انه مش هاينفع معايا دا هيخليني زي الزفت
تقبلي مروري