السبت، 8 أغسطس، 2009

قطط


تربيه القطط عندى مزاج

كل أنواع القطط

بلدى مهجن رومى سيامى

أى حاجه بأربع رجلين وديل وبتنونو

بس مشكلتى معاها حاجتين

أولها ... أن القطط عنيدة جدااا

وتانيها انها بتنقى أنضف مكان فى البيت وتولد فيه


أخر قطه ربيتها كانت سيامى لونها بيجمع بين البيج ودرجات البنى

عنيها بنفسجى جميييله

تيجى فى الصيف كدة وانا اماله انضف وامسح البلاط عشان الحر

وهى بمنتهى الألاطه تمشى على طراطيف أيديها فى المايه

وتنط فوق الكنبه او الكرسى تستنى لحد ما أخلص

وتروح جنابها وبعد ما أنشف خااالص

تنزل تنام على البلاط وهو لسه ساقع من المسيح

تنام ساعه اتنين ... تفضل تتقلب وتتمطع

وتقوم وبمنتهى الكبرياء تدخل ورايا المطبخ تنونو

سيادتها جاعت ... معاد أكلها جه

صاحبه السعادة مش عاوزة تاكل من الأكل اللى فى الطبق من الصبح

ولا حتى تشرب من طبق المايه لأنه مركون من بدرى ومايته بقت فاترة

كمان عايزة تستحمى عشان تطلع فوق السطح تلحق فى الشمس تنشف نفسها

طيب يا توتى انا بطبخ دلوقت ... هخلص وبعدين أحميكى

دة انا بقولها

أبويا برة بتكلمى مين يا صفاء

دى القطه يا بابا

ربنا يعوض عليا عوض الصابرين فى البت الكبيرة


مسافرين المصيف ومش هقدر اخدها معايا ... ولا أقدر أسيبها هنا

والنبى يا عمو خد بالك من قطتى وانا مسافرة

اكلها فى الفريز كل يوم تطلع لها كيس

ووالنبى تغسل الطبق بتاعها وتغير لها المايه كل يوم

متسيبهاش تطلع فى الشارع أحسن متعرفش ترجع

هى مين يا بنت اخويا اللى اكلها فى الفريز

القطه يا عمى

أة يا بنتى وماله
وطبعاً كان لازم تعمل بأصلها معاة وتخرج برة ومتعرفش ترجع
وعمى الراجل أمام المسجد يخرج يدور على القطه بتاعتى
فى الشوارع وينادى عليها بالأسم
اللى حضرتها مش هتعرف ترجع لوحدها


بالليل متنمش فى أى مكان

القطط متحبش الأهمال ولا ترميها فى أى حته
.
ولا تنشغل عنها بحاجه

لازم تنام مكان ما بنام انا

مزاجها كدة


فى الشتا كان اجمل وقت تستخبى جنبى فيه

تقر طول الليل

أحلى صوت ممكن يتسمع فى البرد
تقعد جنب رجلى تغسل وشها وأيديها
واوقات صوابع رجلى


طبعاً قطه بالمواصفات دى كانت كمان ليها شخصيه

اة والله شخصيه

جالها أكتئاب

رفضت تاكل أو تشرب ومعرفتش اعمل لها أيه

الطبيعى كان أنى اخدها أوديها للدكتور البيطرى

هنا فى الصعيد

الدكتور دخلت بيها عليه قالى مالها دى

قولت له عيانه ... مش راضيه تاكل

الراجل بص فى الأرض شويه كدة وقالى

بصى يا مدام

لو عندك معزة عيانه ممكن اعالجها

فرخه بتعطس .. او حتى جاموسه بتولد

لكن القطط

مخدنهاش فى الكليه
.
ورغم كل التناكه والقنعرة اللى كانت فيها
لكن سبحان الله بيحط فى قلب الحيوان تجاة صاحبه محبه من نوع غريب
مكان ما أمشى تمشى ومكان ما أقعد تقعد
ولو غايبه أو مسافرة تقعد برضه فى نفس المكان بتاعى
ولاء غير طبيعى ومحبه غير عاديه تربط بين الحيوان ومن يرعاة
بعدها حتى مقدرتش أربى قطه غيرها ..
كنت بربط فى رقبتها جرس بفيونكه
هههههه وكان بابا كل ما يشوفها ماشيه بترن
.
يقول مش فاقع مرارتى ولا غايظنى فى البيت غير القطه دى
.
وسبحان الله ... المشاعر متبادله
كانت تشوفه داخل تمشى من المكان خالص
.
الفطرة والغريزة عند الحيوان بتكون أقوى من الأنسان جدا
فى القطط وفى الكلاب وهما أقرب المخلوقات الى بنى ادم والى معاشرتهم
حين تربيهم أو تعطف عليهم
مشاعر صريحه قويه
لا ينافق أو يرائى
محبه خالصه صافيه
.
وبالتأكيد لا يؤذى صاحبه مهما كان السبب


هناك 25 تعليقًا:

أحــوال الهـوي يقول...

نيوو ماوو وواو

سلوى يقول...

اول مرة اعرف الحكايه دي
:)

بس انا عارفه ان قلبك طيب
فطبيعي يكون عندك رفق بالحيوان

فتاه من الصعيد يقول...

عارفه انا عمري ما حبيت ربي الحيوانات ...... علشان شايفه ان التعامل معاهم صعب ...... وانا احب اللي يكلمني واكلمه ....... حتى العيال الصغيره موش بحبهم غير لما يكبروا ويتكلموا

كمان عندي حساسيه من فروه او شعر اي حيوان

لكن بحس انهم انقياء جدا ....... وبكره جدا اللي يقول ان تربيتهم رفاهيه ..... او العطف عليهم ملوش لازمه

دي روح ولازم نعطف عليها

ربنا يرقق قلبك كمان وكمان

صفــــــاء يقول...

أحوال الهوى
************
هههههه بلاش انت طيب يا دكتور

صفــــــاء يقول...

سلوى
*****
ربنا يخليكى ليا يا سلوى

ويخلى لي قلبك الطيب

صفــــــاء يقول...

فتاة من الصعيد
****************
انا بقى بفضل الحيوانات على البشر بعض الأوقات
والأطفال احبهم طول ما هما صغيرين أول ما ينطقو يسمعوكى صدى ودانك
تربيه حيوان او العطف عليه مش رفاهيه ولا حاجه
دى فعلا روح محتاجه رعايه وفى نفس الوقت قادرة على منحك المحبه والمودة
كمان فروها أوقات بيجيب حساسيه صعبه
عافاك الله منها
ربنا يخليك يا قمر
كل سنه وانت طيبه

حسن حنفى يقول...

فعلا والله الحيوان اكثر اخلاصا

بس برضه بتكون محتاجه اكبر رعايه واكبر حنان زي ماحضرتك قلتي يمكن علشان كده بتكون مخلصه جدا

Hesham يقول...

بصى ياصفاء بمناسبة القطط ححكيلك حكاية حصلت لى من حوالى 15 سنه كان عندى جارة لنا بتعشق القطط لدرجة الجنون لدرجة سنة 82 راحت اشترت قطة من مرفت امين الممثلة بمبلغ 500 جنيه وافتكر كمان لما الرئيس السادات رحمة الله منع اكل اللحمة لمده شهر كانت هى بتنزل للجزار تجيب لحمة للقطة ايام اللحمة ماكانت ب2 جنيه للكيلو - ايام بقى -
المهم مرة القطة بتاعتها مشيت على سور البلكونه اللى بيفصل بين شقتينا وجت عندنا فهى قعدت تدور على قطتها يجى ساعه وبعدين جاءت ورنت الجرس ففتحت الباب وكان الساعه ساعتها 3 بعد نصف الليل وطبعا صحتنى من النوم وسألتنى على القطه فقلت لها معلش يافلانه اصلنا افتكرناها ارنب ودبحناها وكلناها على الملوخيه الغريبه انها اتصدمت واغمى عليها امام باب المنزل وكانت حكايه ووالدتها جت جرى واخوها وقصه طبعا عملت مشكله فى العمارة من ساعتها وانا مبستظرفش القطط عموما ربنا يخلى

صفــــــاء يقول...

حسن حنفى
**********
فعلا بتكون محتاجه لرعايه كبيرة جدا
ويوميه
بس على قد ما بتعتنى بيها على قد ما بتحبك وتكون مخلصه لك

حمد الله على سلامتك يا ابو حنفى

صفــــــاء يقول...

هشام
******
هههههه الحكايه بتاعتك دى توقف قلب أى حد بيحب القطط
لو قولتها ليا كانت هتبقى وقعه ملهاش ملامح

بس عموماً القطط كائنات رقيقه جدا ورائعه للغايه وتخليك تعشقها بجمال تصرفتها
يعنى بالبلدى تحببك فيها جدا
وحتى لو مستظرفتهاش
برضه تبقى مش بتئذيها

promise is promise يقول...

على فكره مش اى حد عنده الصبر على تربيه القطط لانها محتاجه صبر فعلا وفعلا معظم القطط عندها عزه نفس قوى ونضيفه فى حالها

فكرتينى بواحده كانت برضه رايحه تصيف وجابتلنا القطط بتاعتها لحد ما ترجع وكانت جايبه ليهم شامبو ونوع اكل موعين وحاجات كده

بينى وبينك مش عندى صبر للقطط بس عندى صبر للكتاكيت
هههههههههههههههههههه

وحشنى العصفور امتى هيطلع من اسره ويفرجنا على الجديد

أحــوال الهـوي يقول...

انا كنت من هواة تربيه الحيوانات و كان عندنا قطة سيامي و خلفت لنا عدد و صل في بعض الاحيان الي 13 قطه

و من حبنا فيهم كنا بنديهم للعارفينه بس و عارفين اخلاقه

و العصافير و جميع انواع الطيور

و زياده كنت مربي تعبان و انا في ثانوي و اطردت من البيت بسببه


ايييييييه ايام

بي من طباع القطط الغدر و الخيانه و الحمد لله لم اكتسب منهم هذه الصفه


تحياتي

حاول تفتكرنى يقول...

هناك دائما ارتباطا فريدا بيننا وبين الاشياء
صراحة استمتعت بكل كلمة عفوية فى مقالك تؤيد اقتناعي بحب الاشياء التي نرتبط بها ولو كانت قطط !!!

وربما كنت سأتهم الاخرين بالمبالغة قبل اسبوع من اليوم

فعلى مدار الاسبوع الماضي وزميلة لنا فى العمل من جنسية شامية وهي فى حالة بكاء مستمر ووجها دائما أحمر ومنديلها لا يفارق يدها وانفها بسبب فرمان اصدرته والدتها بطرد القط الشيرازي المدلل من المنزل ، ولاني غير مقدر شعورها بالمرة فالاسبوع الماضي وكذلك اليوم الاحد هناك فعليين فقط منا ، هي تبكي وانا اضحك ، لكن بالفعل مقدر الان ما تعانيه
القط المذكور ضيفا عزيزا فى المكتب من اسبوع حتى إشعار آخر

تحياتي

حاول تفتكرنى يقول...

سيت اقول
القط ده عنده باسبور ، بيسافر ويرجع به مثلي تماما

صفــــــاء يقول...

الوعد الحق
***********
الكتاكيت
فكرتينى مرة روحت اشتريت 9 كتاكيت لسه طالعين مالبيضه ب 10 جنيه وحطيتهم فى المنور وبقيت أبيتهم فى كارتونه
واخدت تريقه من البيت بمليون جنيه والكل قال خليها تلعب بيهم شويه وبعدين يموتو لكن ربك خلاف الظنون طلع فيهم ديك و8 فرخات وفضلو ياكلو منهم بيض لحد ما دبحوهم واكلوهم ذات رمضان

بتوحشينى جدااااا

صفــــــاء يقول...

أحوال الهوى
***********
يعنى مش فاضل عندك حاجه منهم ليا ؟
يالا مش مشكله

بس القطط مش غدارة ولا خاينه
هى بس مزاجيه وعصبيه وبتهوى الذهاب والعودة
الله ... مش قطه بقى !!

معاك ليا فى تربيه كل أنواع الحيوانات والطيور لكن لحد التعابين
كل واحد فى سكه

صفــــــاء يقول...

حاول تفتكرنى
************
والله العظيم لو كنتم فى مكان قريب كنت جيت اخدت القط دة
ولو انت حتى قريب مننا كنت طلبت منك تجيبه معاك وانت راجع وأخدة منك
تخيل وصل تعلق الانسان بشئ او بنوع من المخلوقات لأى درجه ؟
ممكن انت متكنش متخيل درجه تعلقها بيه أو محبتها ليه .. بس أسفه فى اللفظ يعنى بيكون الحيوان الأليف بمثابه طفل صغير لصاحبه
يعنى زميلتك دى ربنا يصبرها فعلا
ودة مش رفاهيه أو هيافه يعنى
بالعكس
حتى المحبه له ومنه بتكون غير عاديه

بس هى حكايه الباسبور دى هى اللى غاظتنى منه شويه

د. ياسر عمر عبد الفتاح يقول...

طيب ربنا يكرمك فيها
أنا مبحبش القطط أساساً
بكرهها جداً

مصعب صلاح يقول...

السلام عليكم
زاد محبي القطط واحد
أنا مش بحبها لانها رمز الغدر

micheal يقول...

اخلع لكي القبعة وأحييكي..بتبسط اوي لما بلاقي حد مغرم بالقطط زي حالاتي مع الإختلاف أني عمري ما ربيت قطة(لظروف كتير) بس مازال نفسي في يوم أجيب فيه قطة
تحياتي

doctor mohamad يقول...

صفاء: ‎ ‎الصراحة رغم لطافة القطط إلا أنى أكره فيها القلاطة _ و النونوة كل شوية _ عندنا قطة هنا مشغول الأن بكيفية التخلص منها _ دعواتك .. لا أنا يا هى ف البلد دى .

إيناس حليم يقول...

هههههههههه
حاسه بيكي والله يا صافي.. مع اني مبحبش الحيوانات او بمعنى اصح بخاف منهم مش عارفة ليه :$
بس شكل كدة قطتك دمها خفيف :)
بس عامة القطط مش مخلصة اوي كدة بالعكس ده فعلا بتاكل وتنكر دي مثل صحيح جدا.. اول القطة ما تكبر شوية تبقى عايزة تنزل الشارع تدور على شريك حياتها واول ما تلاقيه مترجعش ولا تعبرنا :(

عموما انا بحس القطط عاملة زي الاطفال وحركاتها بتدينا السعادة اللي بيدهلنا الطفل من تصرفاته التلقائية المضحكة..

صحيح هي قطتك اسمها ايه؟ :)

مدونة الكومي يقول...

أنا أيضا عشت في بيت يعشق القطط حتى النخاع، وربينا العديد من القطط السيامي..
كان عندنا قطة عاشت خمس سنين هي والراجل بتاعها. لكن خرجوا من البيت واتسرقوا للأسف. ولا يمكن وصف حالة الحزن والذعر بسبب هذا وقتها.

القطط حيوانات تعرف من يحبها وتنتمي له وتحبه بشدة، قطتنا كانت لا تلد إلا بوجود والدتي إلى جوارها.
سافرت خارج مصر فترة ورجعت لأجدها تذكرني وتعرفني جيدا...

هذه التدوينة رجعت الذكريات القططية :)

ادم المصرى يقول...

كل عام وانتى بخير يا صفاء

mostafa rayan يقول...

كل سنه وانت طيبه وبخير وينعاد عليكى بالخير
بالنسبه لموضوع البوست احب اقولك ان ابوكى ده راجل محترم انا لو مكانه وى كنت بيتاها يوم واحد اصلا فى البيت ولا سمحت بدخولها اصلا
احنا صحيح صحاب وحبايب واخوات لكن فى دي نختلف 807697 درجه
تحياتى لك يا قمري