الثلاثاء، 10 نوفمبر 2009

دليل السائح المتسول

أعفن انواع السياح هما اللى بييجو عندنا

خمس أثار الدنيا وفنادق ثابته وعايمه وطايرة

وقرى سياحيه وشواطئ ومتاحف

ومقابر مالها اول من أخر

ومعارض أثار متجوله فى كل الدنيا

لا وفوق البيعه وزير سياحه

ومع ذلك أعفن انواع السياح هما اللى بينزلو مصر

فرنسا واسبانيا وايطاليا عدد السواح اللى بيدخلوهم
.
مساوى واحيانا أكتر من عدد سكانهم وناس دفيعه يعنى وبتصرف

احنا ماوصلو حتى لــ 2 مليون سائح عمى
.
والموسم السياحى وألحق يا جدع الموسم بدأ
.
ان كانو عرب فــ بيتساخفو ويقلو أدبهم ويحقرو المصريين

وان كانو اجانب فــبيكونو من أقل الطبقات

اللى هما بيختاور شركات سياحه كحيانه وأماكن على قدهم

يعنى زى ما أحنا المصريين الغلابه كدة نروح نصيف فى اسكندريه وجمصه

بيرمو علينا أغلب وأفقر سكان أوروبا وأسيا وأفريقيا

واللى بيفضلو بعد كدة كمااان عشان الاسيوين يشتغلو باعه متجولين

فى شوارع مصر الغنيه والافارقه خدامات ومربيات

عند شعب مصر اللى مش عارف ينضف بيته ولا يربى اولادة

فى المترو اتنين سواح ما اعرف اتحدفو علينا من أنهى داهيه

الست بتسئل فى محطه الجيزة ممكن توصل الاهرام ازاى

والوقت قد أيه ... قولنا حوالى كدة 20 دقيقه

راحت الست الجعانه قالت by walk ؟

وواك ايه يا ست السايحه .. بالتاكسى

اخرجى من محطه المترو خدى تاكسى او حتى سيرفيس

راحت كررت السؤال وهو انها لو هتمشى لحد الاهرام الوقت قد ايه

عاوزة تمشى من الجيزة لحد ما تطلع هضبه الهرم

وأوعى حد يقولى لا دول بيحبو المشى والمشى رياضه

شواطئ سيناء محرم دخولها على المصريين لأنها مردومه سياح اسرائيليين

ودول بقى اعفن وأوسخ وأنتن نوع سياح فى الكون كله

فنادق مش بيسكونو ... بينصبو خيم

أكل مش بيشترو ... جايبين معاهم معلبات وطفاح من بيوتهم

مايه حتى ما يشترو بيجيبو قزايزهم معاهم

والله العظيم حتى المواصلات ما بيركبوها بيعدو الحدود مشى لحد أيلات

يبقى حد لوجه الله الكريم يفهمنى

أيه الفايدة اللى بترجع علينا من تواجد العالم المعفن دول عندنا

ومعاملتنا معامله حقيرة عشانهم

وتفتشينا واهانتنا لا و يخلو الكلاب تشمشم فينا احسن نكون داخلين نسرق والا نفجر جنابهم

وفوق دة كله كماااان سفاراتهم تحذرهم من السفر الى مصر

خوفا من التحرش وان معدلات التحرش فى مصر هى الاعلى فى العالم
.

لمجرد ان اللى اتحرش هو بياع فى محل والا واحد بتاع جمال
.
وهى نفسها اصلا تلاقيها متسواش كلب ياكلها

على أيه دة كله ؟

سياح مش نوعيه ممتازة يعنى بالعكس ومصاريفهم بتكون فى الحد الادنى

ولا ينطمع فيهم ولو نفضتهم مش هينزلو غير شيكات سياحيه بأقل القليل
.

والغنى فيهم مش بيجى هنا

دة احنا اللى نخاف من العالم الجعان دة










هناك 18 تعليقًا:

حلم بيعافر يقول...

ورغم كده من اولوليات حكومتنا الاهتمام بالسياحة

لما بنقابل سياح ع الطريق بنقف احنا وهما بيعدوا وان شااللله نقف اليوم كله عشان اتوبيسين سياحة

بنقف وبنستى غصب عنا وبنروح الشغل متاخرين وطبعا تنزل فوقنا الجزاءات زى المطرة عشان خاطر السياح

لاء وايه بنفرشلهم الارض عساكر

صفــــاء يقول...

حلم بيعافر
***********
يا حلاوة ... هى حكومتنا لها أولويات ؟
أهو دة اللى خبر بجد
من ناحيه العطله وقفله الطريق عشان اتوبيس سياح من بوركينا فاسو ميسووش جوز جنيهات فمتقوليييش
والارض بتتفرش عساكر لأن دول أرخص حاجه فمصر

شرفتنى جدا

د. ياسر عمر عبد الفتاح يقول...

ههههههههههههههههه
ده إنتي شايلة في قلبك كثير أوي

فعلاً أغلب السياح اللي بيجوا مصر ,, من ركش العالم

لو معاهم فلوس هيجوا يعملوا بس هنا
لما نص الشعب نفسه يهج

صفــــاء يقول...

د.ياسر عبد الفتاح
******************
هلا بجارى العزيز
مسئولين كدابين زفه والجنازة حارة والسايح شحات
طبعا انا وانت من النص اللى قاعد على قلبها
نورتنى يا دكتور

أحــوال الهـوي يقول...

رغم اننا نمتلك اكبر تنوع سياحي في العالم و لكننا نفتقر الي الكيفيه اجذب اعداد اكبر من السياح و اوافقك الراي بكل سطورك
و اضيف ان السياحه الداخليه تجلب المكسب الحقيقي و لكننا نحصل علي اسوا الخدمات
سعر الليله للجروب السياحي الاجنبي فول بورد 37 دولار و للمصريين 500 جنيه ؟؟

فما هو السبيل
نمتلك كل انواع السياحه العالميه و تونس مثلا تجتذب 5 ملايين سائح و نحن في احسن الحالات 2-3 مليون
عدد سكان فرنسا 70 مليون تستقبل 75 مليون سائح سنويا
فما هي الاسباب ؟؟

غير معرف يقول...

ايييييييييييييييون صح

انا فاكراهم السياح الشحاتين دول لما كانوا بييجوا عندنا

ماما كانت بتقوللي دول الفقرا بتوع اوروبا :D

احييكي ع البوست ده .... فعلا يا نشتغل سياحه صح .... يا يغوروا من وشنا

تحياتي

رحــــيـل يقول...

هههههههه
يعنى هى جت ع السياحه يا صفاء
ما كل حاجه فى البلد ماشيه بالمقلوب
بس تصدقى ما كنتش اعرف ان موضوع السياحه مضروب قوى كده

صفــــاء يقول...

فتاة من الصعيد
***************
فعلا فقرا اوروبا واحنا نعملهم هنا صفوة البشر .. تصدقى بالله جيت ادخل المتحف المصرى طلبو البطاقه واول ما لقو محافظه المنيا كانو قربو يعلنو حاله الطورائ على البوابه ومع ان كل اللى جوة معّرة السياح يعنى بس قله العقل والهبل بعيد عنك

صفــــاء يقول...

رحيل
*****
موضوع السياحه زيه بالظبط زى المعونه الامريكيه .. ملاليم وكلام فاضى بس احنا اللى اتعودنا على المذله لحثاله الغرب

سلوى يقول...

إيه ده
هو الكلام ده صحيح ؟؟؟

صفــــاء يقول...

سلوى
*****
اة يا قطه ... تخيلى ؟

على باب الله يقول...

انا كنت نازل في أوتيل في الغردقة و في المطعم حبيت أقوم أروح للبوفيه لقيت الويتر بيقول لي ما تسيبش حاجاتك على الترابيزة لحسن النهاردة المطعم مليان سياح روسيين

صفــــاء يقول...

على باب الله
**********
أهو السياح الروس دول بقى بواقى فقرا وغلابه غلابه السياح ونص اللى بيجيو فى افواجهم اما بيفضلو فى البلد يشتغلو دعارة او راقصات او مجرد ترانزيت للخليج لنفس المهمه الجليله

إيناس حليم يقول...

ههههههههههههههههههههه
والله يا بنتي انتي سكر
مالك بس شايلة منهم ومن البلد ليه كدة؟ :)
بصي يا صافي انتي عندك حق في نقطة ان شرطة السياحة بتزلنا تفتيش وقرف في اي مكان ندخله خوفا على السياح، بس بغض النظر السياح دول معفنين او لا فيه ناس فعلا بتتحرش بيهم يعني مش افترا في كل الحالات..
ساعات يا صفاء احنا اللي بنسيئ لأنفسنا وساعات البلد هي اللي بتسيء لنا.. مفيش تعميم

mohamed ghalia يقول...

هههههههههههههه
دا انتى شايلة منهم اوى ياصفاء
ههههههههههههههه

صفــــاء يقول...

احوال الهوى
************
الاسباب اننا رخيمن ومستسهلين وواخدين الدنيا فهلوله ومتخيلين ان اللى عندنا مش عند غيرنا
يمكن دة حقيقى وهو ان كميه الاثار الموجودة عندنا وتنوعها الكبييير جدا مش موجود فى اى مكان تانى فى العالم بس فى المقابل فيه اهمال وتدمير لها وعدم معرفه على الاطلاق بقيمتها وعدم تسويق جيد لها تقريبا سايبنها هى تسوق نفسها زى البت البايرة اللى بتدلل على حالها
وفى المقابل السياحه مش بتدى عائد مجزى ولاحتى الأعداد المقبوله يبقى على الاقل نعامل بعض كويس دة احنا 84 مليون لو كل واحد صرف جنيه هنجيب قد السياحه الخارجيه مليون مرة

صفــــاء يقول...

إيناس حليم
************
أجدع أسكندرانيه أديبه انا اعرفها
عارفه .. التحرش موجود بس مهياش سياسه دوله يعنى ولا احنا بنجرى ورا السياح نشدهم من هدومهم مثلا بيكون من حد جاهل او متخلف او بتاع مراكب والا جمال او بياع فى محل
والله نستاهل نحترم بعض اكتر من كدة والبلد دى تستحق الافضل والافضل بس للأسف فعلا اوقات بنسيئ لها

صفــــاء يقول...

محمد غاليه
***********
ولا شايله منهم ولا حاجه ... خلاص عشان خاطرك
نورتنى يا محمد