الاثنين، 28 ديسمبر، 2009

رجاله بلدنا ... برضه


سؤال شديد الألحاح
هو ليه المصرى بقى عبيط وبرياله
المصرى بتاع احنا اللى زرعنا البطيخ عـ الأسفلت وخرمنا التعريفه ورشينا الهوا دوكو وعبينا الشمس فـ قزايز
أذ فجأة كدة قلب عبيط وكل هلف فيهم يجيى قصاد اى فستان حرمه ويريل ويبحتر مئات ملايين الدولارات ؟
وكل دكر فيهم عندة شركات ومصانع وألاف العمال يستعبد اللى خلفوهم ويقصص من حقوقهم وإشى تأمينات و
إشى ضمان اجتماعى وإشى خدمات صحيه ويبقى هاين عليه يقطع أجورهم خالص بحجه سداد ديون مصر وبمنتهى الأريحيه كدة يتلم له على مرة لبنانيه او سعوديه متفرقش حاجه والله عن المصريه او أى عالمه فـ فرح ويبك لها كااام ميه مليون
مرة بحجه انها تحت رعايته معرفش يعنى ايه تحت رعايته تقولش كفاله يتيم يا خى
ومرة قال أميرة سعوديه
(بقى نسوان السعوديه فقرو وخلص بترول رجالتهم وجايين يشمشمو فى المصرى ؟)
واللى تبقى فى بلدهم جربوعه ومطروده تيجى هنا تاخد لها كاام دور فى فندق على النيل وتعمل أميرة على باقى المصريين وتطلق كلابها علينا وقال أيه أسرة مالكه
مالكه منين وهما مش لاقيين يأكلو نسوانهم ومسرحينهم على المصريين
لا وبيعايرونا اننا شغالين فـ بلادهم وانهم بيأكلونا ... دة الكام ملطوش اللى بيجو من برة بنخسر قدهم ألف مرة بالشكل دة من رجال أعمالنا الأفاضل عاشقى الحريم اللونه اللى بتفرش تحت النسوان مليارات الناس اللى طفحت الكوته عشان تلمهم بالمليم
وفى الأول وفى الأخر هى أيه ؟ مرة ... حرمه زيها زى اى واحدة فى الشارع
ايه اللى يزيد عشان الملايين دى تندلق تحت كعب جزمهم ؟

ومبقاش فاضل غير نغير الأعلان ويبقى المصرى هيفضل أهبل البنوك قدامه يهبش منها ويدى للنسوان اللى وراة

هناك 29 تعليقًا:

خواطر شابة يقول...

انه الثالوث المهلك عزيزتي المال والسلطة والجنس هو المؤدي لكل هذه المهالك

norahaty يقول...

حبيبتى بيزنس والله
(هن) مجرد ســتارة
لأشياء كتيرة لا نعلمها!

صفــــــاء يقول...

خواطر شابه
***********
طيب وهو الثالوث دة ماينفعش مصرى ؟
وحياة النبى لو اللى سرقته مصريه ماكنت زعلت اهو كان زيتنا فى دقيقنا برضه

0---------------

norahaty
*********
أرجع واقول هن هن دول لازم يبقو من الخارج ؟ ههههههه طب خليك فى البلدى .. شجع بلدك وخد المصرى

خواطر شابة يقول...

يعني انت مش ضد الخطأ كخطأ لكن فقط ضد انه اختار غير المصرية الشر لا يتجزأ عزيزتي والخطأ خطأ في كل الاحوال

norahaty يقول...

مش واخدة بالك أنت !
لمّا (هن) يبقى من الخارج
حيجيبوا البيزنس من
الخارج والداخل كمان
بيعرفوا لغات :)

norahaty يقول...

وبعدين أنت ناسية
عقدة الخواجة بتاعة
رجالتنا ولو (هن)
من كفر طهرمس:)حتى!

صفــــــاء يقول...

خواطر شابه
***********
يا اختى لا رجال الأعمال بتوعنا هيبطلو هبل ولا هيبطلو جرى ورا النسوان
ويظهر ان القدام مغلطوش لما قالك الراجل لما تكتر فلوسه عينه تزوغ
وبما أنهم كل اما بيغنو بيتهبلو اكتر ويبعزقو فى الفلوس ويبحتروها ... يبقى لازم يعنى تروح لسوزان تميم وخلود العنزى ؟
الخطأ فى التصرف لا يمنع السخريه

------------------

دكتور نور
***********
تصدقى اة فعلا
لما سى يحيى اتلم على خلود العنزى وبيتها فى بيته او فيلته او قصرة الله اعلم بقى بيسكنو فين
كان على اساس انها من العيله المالكه وهتجيب له من قصور اهلها وتكب
ولما هشام اتلم على سوزان كان عشان الجمال اللبنانى بيجيب دولارات اكتر وشغله عالى اوى

وومن يقول...

طمعانجني بناله بيت فلسنجي سكنلوه فيه

-------------------

رجاله هابلة وبريالة وبتصتنصح وفاكرين انهم هايجيبوا الديب من ديله

الطمع في الجاه والنفوذ هو اللي بيوقعهم في شر أعمالهم

كتهم القرف فضحونا

صفــــــاء يقول...

وومن
******
متعرفيش طمع .. هبل .. عبط

سوزان تاخد من هشام معرفش قد ايه وهيفاء تاخد من احمد ايه وخلود تاخد من يحيى كام وحتى الوليه الحيزبون مراة الامير السعودى دى هند الفاسى سرقت حتى الجواهرجيه وقاعدة فى الفنادق سفلقه
دة العالم بقى زبااااله

البنفسج الحزين يقول...

يا ناس يا شر كفايه قر:
متبصليش بعين رضيه بص للي اندفع فيا
هو فيه ايه هو راجل الأعمال في البلددي ميعرفش ياخد راحته في بعزقه فلوسه
وايه يعني لما واحده سعوديه تنصب عليه في 60 70 مليون جنيه خربت الدنيا...
امبارح يحيي الكومي كان في اتصال تليفوني مع عمرو أديب وقاله قول للناس يبطلوا حسد وقر أنا عيان ومراتي وولادي عيانين وزعلانين...

صفــــــاء يقول...

البنفسج الحزين
****************
اة ايه يعنى 60 , 70 مليون وأيه يعنى لما سوزان تسرق هشام فى معرفش ربع مليار دولار والا مصرى
وفيها ايييه يا عالم يا حقوديه ..هى كانت فلوس ابونا ؟
كنا تعبنا فيها ؟ كنا اتحرمنا من العلاج بيها ؟
كنا اتعذبنا فى اللف على شغله محترمه لشاب يبدأ بيها حياته ويستر عرض بنت مسلمه بيها ؟
أيييييه يعنى .. يا عالم يا فقرا يا حسوديين
الف الف الف سلامه على الباشا الكبير والهانم والبهوات الصغيرين ونتمنى لهم رحله سعيدة فى فرنسا يريحو بيها اعصابهم ويضيعو كمان كام مليون

بحر الالوان يقول...

ليست كل النساء سواء ..... فهنالك دائما واحدة بالف إمرأة فبالرجوع الي التاريخ نلاحظ ان
1- مارلين مونرو تلك الدمية المبهرةكان من قائمة عشاقها .... وهي التي ماتت منتحرة كما يشاع
- جون كيندي ... رئيس دولة
- ارثر ميلر.... مفكر عظيم والذي دهش الكثيرون لزوجه منها
وعشرات مثلهم من اهل الفكر والمال والسلطة

2- مي زيادة .... والتي ماتت في احدي المصحات العقلية وكانت تهوي الشاعر جبران خليل جبران
- لطفي السيد
- عباس العقاد
- مصطفي صادق الرافعي
-طه حسين
وغيرهم العشرات من اعلام الفكر في عصرها

3- سوزان تميم التي ماتت مقتوله... وكان لها من الازواج والعشاق من كل لون وصنف

4- كليوباترا وهذا الصراع الامبراطوري الذي يدور من حولها ..... حتي ماتت منتحرة في النهاية ايضا

5- مأساة طروادة والتي تسببت فيها هيلين ... ومات من اجلها الاف من خيرة الفرسان في حرب ضروس

والمجال ان كان يتسع لضربت لك مئات الامثلة .

كل هذا يثبت شيئا واحدا....... ان الرجال لا يتصفوا بالبله ... بقدر ما هنالك نساء ليسوا ككل النساء ولا حتي البشر ..... لديهم قدرة فائقة علي صناعة الكوارث .... لدرجة قد تطالهم شخصيا بالجنون او الانتحار ....... فلا ترمي الرجل المصري بما هو ليس حكرا عليه

فكلنا ذات الرجل ...... ولكن ليس كل النساء سواء

تحياتي لك

mohamed ghalia يقول...

ربنا يهدى الرجالة شكلها لسعت

Sherif يقول...

لابد ان فى النساء شيئا غريبا يجعل الرجال يدفعون مايملكون من اجل عيونهم

لاتجهدى نفسك كثيرا فى فهم السبب .. ربما كان احلى مافيهن انه .. لاسبب

karim يقول...

هذة هى طبيعة البشر سيدتى مع الاسف ولكنها تختلف درجاتها حسب الدين والمعتقدات و المبادىء و كلما كبر المال قلت تلك الامور المعادلة معروفة, تحياتى

فتاه من الصعيد يقول...

هههههههههه

انتي طيب زعلانه على الرجاله دي ولا العمال

اصلي زعلانه على البنات دول

موش يمكن الرجاله هما اللي ضحكوا عليهم وقلبوهم

ويا مأمنه للرجال يا اوختشي :D

احيانا يوجد المال كنقمه

تحياتي

أحــوال الهـوي يقول...

يا دي الكسوف
مش عارفين نرد علي الحريم قصرتوا رقبتنا

شوفي ياست الكل
اللي جاء من حرام بيروح تاني في نفس المكان

لانه جه بالساهل و المسألة لا هي انوثه و لا دلال و هي زياده حته ياكلوها الساعه سته

الواطي لما يسرق قرسين بيروح يبعزقهم في كباريه

و المليونير اللي لهف ملايين يروح يجيب ملابس مستورده و ياكل كفيار و يسحب مزة مستورده علشان الصيت و الا الغني

اظن الرسالة و صلت

تحياتي

صفــــــاء يقول...

بحر الالوان
***********
أولاً طبعا كنت احب اعرف أسمك بما اننا بقينا اصدقاء ومعتادى التعليق عند بعض عشان نقدر نتناقش او عشان انا يا سيدى بحب لما اكلم حد يكون بأسمه (رخامه بقى)
ثانياً : سيادة الأديب الفنان انت طبعا عارف بحكم موهبتك الأدبيه أن الناس لا تستنسخ ولا يطلق علي جنس كامل منهم مسمى واحد ... البشر مش نباتات
أنا حين تحدثت لم أقل شعب مصر ,,, لأن زى ما سيادتك عارفه شعب مصر محلتوش حاجه يضيعها ويادوووب يقدر يكفى بيته وعياله
كلامى كان على شريحه متميزة بقت اخبارها بتنتقل بأنتظام من صفحات المال والأعمال و السياسه الى صفحات الحوادث .. وهما برضه من رجاله البلد دى ... بس للأسف لما ربنا اداهم اتهبلو تقريبا أو وثقو من نفسهم زيادة عن اللأزم وان محدش هيقدر عليهم فبعزقو فلوس البلد على النسوان كــ بيزنس وتجارات لا يعلم بها إلا الله وانواع من التهرب الضريبى

وكذلك النساء ... مفيش ست تشبه ست ولا طبع يطابق طبع كما فى الرجال

وبعدين النماذج اللى ذاكرها دى لشاعرات وملكات وعاهرات .. حاجه يعنى لا تعمم على كل الصنف , زى ما انا بالظبط ماعممتش على كل كل الرجاله ... وبعدين ايه حكايتك يا أديب .. عايز تطلعنى عدوة للرجال والا ايه ؟
هههههههه
لا يا سيدى لستو كلكم ذات الرجل ولا كلنا نفس النساء

---------------------

محمد غاليه
************
اة يا محمد ويا مأمنه للرجال يا مأمنه للميه فى الغربال يا اخويا

صفــــــاء يقول...

شريف باشا
**********
حين ينطق العمدة ... بيجيب مالأخر

بس هو زى ما تقول سعادتك نداء للرجاله ... بلاش تبصو برة لو ناويين تضيعو كل الملايين دى
بصو جوة شويه .. خلى فيه عداله فى توزيع الثروات
وقال يا بايس أهل برة وداير تتشكربهم ... روح بوس اهل بيتك تكسب أجرهم

----------------------

كريم
*****
ممكن تكون طبيعه البشر لكنها طبيعه ليست سويه
لذا وجب تغييرها
حين يزيد المال او النعم يجب ان يزداد النسان إيماناً وشكراً
لكن يبدو ان طبيعه قارون هى الغالبه

صفــــــاء يقول...

فتاة من الصعيد
****************
لا زعلانه على الرجاله ولا العمال ولا البنات
زعلانه على الفلوووس
وبعدين ليك حق يا اوختشى تزعلى على البنات
سوزان تميم الفقرانه الغلبانه العدمانه اللى أهلها مقطعين بعض على تركتها اللى قربت على المليار من فلوسنا اللى خدتها من العبيط
والا البت التانيه اللى انضحك عليها يا حبه قلبى خلود العنزى اللى الراجل الشرير ادها 5 فيلات وشنطه مجوهرات ومهر 4 مليون
يابت وهو حد خاب خيبتنا ... قطيعه

---------------------

أحوال الهوى
*************
ماهو انا برضه بقول
لزومه ايه النسوان المستوردة ؟
فأوضحت لى ما خفى
وهى أن استعمال الخارج أنضف من جديد الداخل
وزمار الحى لا يطرب
بس فى الحاله دى تبقى رقاصه الحى مبتهزش كفايه
والله ما فاقع مرارتى غير الارقام اللى بتذكر
وقال 5 فيلات و50 مليون
يعنى ايه خمسين مليون ؟
دول يجيبو كام تذكرة مترو ؟ وكم غساله نص أوتوماتيك
وكام تلاجه 10 قدم ؟
وكام شغلانه لكام ألف شاب يتجوزو بيهم ؟
اللى المحروق دة اتجوز بيهم لواحدة وكمان 9 ايام بس
الا يبقى كدة اليوم واقع بكام ؟

فتاه من الصعيد يقول...

ههههههههههههه

لا بعد الشر عليا من الخيبه :))

والله موتيني من الضحك وانا بجد مكتئبه اليومين دول

عموما يا صفاء المال نقمه يا بنتي زي ماقلتلك

ويا بخت من بات مظلوم

والمهم تنامي اخر الليل وبالك مرتاح

اكمل بقيه الامثله اللي بيروجها الكومي واخواته علشان القر ولا كفايه :)

تحياتي

بحر الالوان يقول...

اولا : انا اسمي معتز ( اظن ما فيش ارخم من كده) ...... لكن اسم الشهرة مصطفي محمود
ثانيا : انا كنت برد علي تعميمك علي ان الستات كلهم زي بعض لما قولتي

وفى الأول وفى الأخر هى أيه ؟ مرة ... حرمه زيها زى اى واحدة فى الشارع
ايه اللى يزيد عشان الملايين دى تندلق تحت كعب جزمهم ؟

ثالثا : النماذج اللي ذكرتهم دول جبارين ....... بس ما يمنعش ان في نماذج مصغرة منهم في الواقع المحيط ..... كل واحد وظروفه بقي

رابعا : اظن ان احلي حاجة ان البشر سواء كان رجال او نساء ...... لا توجد قاعدة واحدة تحكمهم ....... والا تحولت الدنيا يا اما لجنه او لنار

تحياتي

الحــ ــزين يقول...

دى أول مرة
وحبيت اقول بس كل سنة وانتى طيبة
دومتى بكل خير وحب

صفــــــاء يقول...

فتاة من الصعيد
*****************
الف بعد الشر عنك يا قمر
اضحك يا قمر وانبسط .. محدش واخد منها اى حاجه
وطبعا طبعا المال نقمه ... لكن الفقر !! يا عينى على نعمه الفقر

روحى يا شيخه .. اللهى ما يدومها علينا نعمه

وبلاش والنبى المسكنات بتاعه طوبى للفقراء دى ربنا يكرمك كفايه امثله خلااااص

نورتى يا عروس الصعيد

-------------------

بحر الالوان
***********
تصدق ... حسيت فعلا انه انت
اللى كنت بتعلق قبل كدة بغير معرف وتمضى مصطفى محمود .. أسلوبك بيميزك فعلا

ومعتز أسم جميل جدا لكن معتز الدمرداش هو اللى رخم على حق الله

--------------------

الحزين
********
وان شاء الله متكونش اخر مرة

كل سنه وانت طيب

بحر الالوان يقول...

هو انت ما كنتيش عارفه اني هذا المجهول سابقا؟ دا انا عملت مدونة مخصوص عشان الناس ترحمني من هذا اللقب وما يستتبعه من شك...... عموما عندي دي .... وما شاء الله علي احساسك .

اما الاخ معتز الدمرداش فانا مستحمله بس عشان ماما كريمة .... بس مش هو السبب في اسم مصطفي محمود ..... بالعكس انا بحب اسمي جدا .... بس الشهرة دي لها قصة طويلة مع المدونين .

عموما سعيد بتواصلنا لاول مرة في 2010 ..... ويارب يكون تواصل مثمر

حاول تفتكرنى يقول...

المضمون جيد جدا ، والشكل ليس اسلوبك ، اتحفظ على بعض المفردات فاللغة العربية غنية جدا

احييك

ENG./ELSAYED,PMP يقول...

سيبك انتى ... م الموضوع كله على بعضه ... انتى دمك خفيف ... وربنا ان شاء الله يكرمك اكبر كرم ... وتحضرى عيد ميلاد واحدة صاحبتك من اثرياء القوم ... ويكون ليها اخ ... كان شغال فى احدى دول الخليج ... ويكون له واحد صاحبه ... او خليها الراجل المليونير او الملياردير اللى هوه شغال عنده معزوم فى عيد الميلاد ده ... بيد أن أثناء ما بيطفوا الشمع وقعت عنيه ف عنيكى فى نظرة لولبية قدرية مبتحصلش الا كل 76 سنه زى مذنب هالى ... ويك أن ... انتى فى الحالة دى ربنا هيبقى كرمك اكبر كرم ... اصل الحاجات دى تساهيل ... اه وربنا ... يعنى ... قوليلى ايه مثلا اللى بيعجب دودة المش فى بلاص المش ... وايه اللى خللى مجنون ليلى ... مهبوش للدرجة دى ... اهى ارزاق وتساهيل ... وربك بيرزق العبيط علشان المدردح يتهبل ويتجنن ويدون ويرد على مدونات ... وهكذا دواليك بين الفنية والفنية ... ويك ان ... فى الحالة دى وطبعا كل اللى فات ده كان مقدمة واستهلال لابد منه ... ان شاء الله هتبقى من اثرياء القوم .... الاتى محدش بيقدر يبق معاهم ... وتبتدى مدونة حاقدة اللى هيه صاحبتك اخت الولد اللى شغال عند الراجل الثرى انف الذكر فى بداية ما تم سرده تكتب الحكاية على انترنت ودواليك .... وانا بقى اللى هبقى هارش ... ليه ... لانى انا اللى متابع الموضوع من 76 سنه ... اسف على الرد المقتضب بس زى ما انتى شايفة الحياة صعبة ... وعلى راى احد اصدقائى الصيع ... الحياة كفاح ونكاح ...والى اللقاء بعد 76 سنه

صفــــــاء يقول...

حاول تفتكرنى
*************
أعرف بالتحديد كل لفظه تتحفظ عليها لكن صدقنى الوضع يغيظ ولا يستحق حتى استخدام الفاظ جيدة
ولا نوعيه الستات تستحق لفظه راقيه
معلش بقى متزعلش

----------------------

باشمهندس سيد
**************
ههههههههههههههههههههههه
يا باشا ماهو دة كان المخطط طول ال100 عام الماضيه
وهو انى أقابل الملياردير فى حفله او فرح لحد ما الشعر قرب يشيب وملقتش ملياردير او مليونير واحد يوحد ربنا
ناهيك عن اننا صعايدة ... يعنى الملياردير هو واحد فى كل 17 مليون فرد
او يبقى مفيش غير انى اخدة تاجر سلاح او مخدرات ودى زى ما سيادتك راسى جوازة متسرش
يعنى فرصى فى الحصول على فرصتى المليونيه هى بالظبط زى فرص ظهور المذنب هالى وفرصه سيادتك فى الزواج من هالى بيرى
سعيدة جدا جدا بالتعليق الرااائع دة
وأتمنى دوام التواجد
تحياتى لك

mostafa rayan يقول...

بصي يا صفاء انا هتكلم معاكي جد ومن رؤيه ذكوريه محضه بعيدا عن تعليقات الستات - ومنهم صحابى - اللي مليانه تريقه هنا
عارفه ليه الراجل بيروح لست لبنانيه اوسوريه او كده لأنها بتديله شيئ مش موجود عند ستات كتير مصريين للاسف الستات هناك بيتعاملو كستات ست بكل ماتحمله الكلمه رقه وانوثه ودلع وحب للراجل وتدليله واحتوائه . للاسف كتير من الستات عندنا فى مصر بقو عاملين زي الرجاله بالظبط فى اللبس والسلوك والكلام .. الستات عندنا صدقو حكايه الست زي الراجل والكلام اللي صدرته جمعيات حروق المراه دي لحد ماقلبو رجاله بجد يمكن مش ناقصهم غير الشنبات
ممكن تقوليلي ماهي الست بتخرج للشغل علشان تساعد جوزها وايد على ايد والحاجات دي معاكي لكن الراجل بيحتاج لما يروح اخر النهار تعبان طالع عينه يلاقي ست مستنياه مش يلاقى عبده صاحبه لكن للاسف ده مابيحصلش يروح يلاقيها قامطه الايشارب ومشمره رجل بنطلون البيجامه وعماله تصرخ وتزعق فيه وفي العيال .. وهيلاقى نفس الحال مع اصحابه وقرايبه فطبيعي يتخنق من كل الصنف المصري ويدور على صنف غيره
معاكي ان سوزان وغيرها مايستهلوش كل ده وان هشام وامثاله بيستهبلو
بس انت لو بصيتى لها من وجهة نظره هو هتلاقيها تستاهل .. زي الراجل لما يبص لست ويشوفهازي القمر وست تبصلها تلاقيها مليانه عيوب .وده هو سر استمرار الحياه يا صديقتى الجميله وإلا لو كل راجل بص لست بعين الست وشاف كل العيوب اللي فيها ماكانش اي ست اتجوزت ولاكانت الحياه مشيت واستمرت
انا طولت عليكي انا عارف بس الموضوع يستحق .كمان انا عارف ان هنا البيت بيتي فعلشان كده واخد راحتى ومش عامل تكليف
لك كل محبتى وودي يا صديقتى الجمليه