الجمعة، 14 مايو 2010

العبور على طلمبه

قطعت المايه ... يومين
خير يا عالم .... الماسورة الأم ضربت وبنصلح فيها وماعلش استحملو شويه
(أولا طبعاً يخرب بيت ماعلش وبيت استحملو)
ثانيا ممكن حد يفهمنى ازاى ناس تقدر تستحمل من غير مايه يومين ؟
الموضوع طول وكان واضح انه فيه مشاكل أكبر وشكله مش هيخلص قريب
الحل كان عبقري بصراحه ... ولأننا منطقه زراعيه

كان الحل الفورى شغلو الطلمبه
طلمبه المايه الحمرا الجميله اللى شغاله سحب من المياة الجوفيه
اختراع رائع كدة وله أيد أنسيابيه ومحتاجه شويه مجهود عضلى عشان تبدأ فى ضخ المياة
مايه لها طعم خفيف كدة بس أهى مايه بدل ما الحنفيات نشف دمها

وبما إنه تم التوقيع على اتفاقيه دول المنبع , وهيبنو سدود ويقطعو عننا كلنا المايه
يبقى نفهم من كدة ان شعب مصر كله المفروض بقى يدق طلمبه قصاد بيته وعمارته وفيلته ؟

طب الأخوة الفقراء إلى الله اللى عندهم حمامات سباحه .. يتصرفو ازاى ؟
يعملو ايه يعني ... يلبسو المايوهات بتاعتهم بأى مناسبه ؟
كمان محاولاتهم انهم يملو البيسين من الطلمبه , شئ مضنى للغايه
يسقو ملاعب الجولف ازاى ؟؟
ولما النيل ينشف ياترى ممكن ياخدو الأرض مكانه ويقسموها مبانى ؟

حاجه كمان ... بما أننا أفسدنا الأرض والبر والبحر والجو ... والصرف الغير صحى سمم الأرض وأتسرب للمياة الجوفيه يبقى مهما دقو الطلمبه على أى عمق هتجيب مايه وسخه

بس من ناحيه تانيه هنرجع نحيي صناعات قديمه اندثرت
زى صناعه البوابير والطشت وكوز المايه
عشان الواحد ياخد حمام ينسى بقى حكايه الدوش دى
هيبقى شئ له طقوس خاصه رائعه

وتعمر الوابور وتحط فوقه بستله المايه وبعدين تبرديها أختى المشاهدة فى الطشت وتستعملى الكوز للشطف جيدا
.
ووقت الغسيل هيبقى مهرجان واحتفالات وممكن يبقى شئ جماعى يشارك فيه بعض الأقارب والجيران ودة هيقوى الروابط الأجتماعيه
تجارة الجرادل وجراكن المايه هتبقى سوق سودا

كمان الطلمبه هتدخل فى الرموز الأنتخابيه لما لها من أهميه عند المصريين
وهنكتشف ان المصرى القديم حفر الطلمبه على جدران المعابد تقديرا لأهميتها فى حياة المواطن وتقديساً لمكانتها بل وعبدها فى بعض الأحيان ... وأن الدكتور زاهى حواس عثر على تماثيل من الحجر الجيري لطلمبات مايه بأحجام مختلفه فى مقابر بالبر الغربى وطلمبه من البرونز بجانب مقابر العمال بناة الأهرام

وفى أول انتخابات رئاسيه جايه هيوعدنا الرئيس بأنه لن يتوانى عن توفير الطلمبات الأقتصاديه لمحدودى الدخل وأنه هيكون هناك طلمبه مياة لكل 5000 مواطن
ولن يسمح بأن يتم الجور على المياة الجوفيه للفقراء ولا هيخلى الأغنياء يعملو بيبي فيها
وإنه بالأنتهاء من مشكله توفير كوبين ماء فى اليوم لكل مواطن مصرى لن نتوانى عن العبور إلى المستقبل بعد ما وفرنا جميع الرفاهيات والكماليات لكل فرد فى شعب مصر المريض

هناك 23 تعليقًا:

سلوى يقول...

وتطلع اغاني عن الطلمبات

والفيديو كليب يصور الطلمبات
تخيلي كده وهيفاء بتشغلها

واللي ينتخب نفسه يدي اللي هينتخبه ايد الطلمبه وهو داخل ينتخب ويديله بقيتها وهو طاله

ومامتكم سوزان تعمل حمله توعيه لاستخدام الطلمبات

افتحي الحنفيه يا صفاء الميه جت
الحلم خلص :)

صفــــاء يقول...

لا يا حبيبتي لو هيفاء هى اللى هتغنى يبقى مش هتشغل الطلمبه ... دى هتركب عليها وتنام جنبها وتتحك فيها ...

اتكلى على الله يا سلوى هيفاء ايه انا ناقصه فاقعه مرارة ... دة حدث وطنى

هنجيب الست شيرين تغنى له
ماشربتش من طلمبتها ... طب مالعبتش فى ترعتها

sal يقول...

صفاء

ههههه
والله فعلا شر البلية ما يضحك
بوست اكثر من رائع
وفعلا التفكيير فى الطلمبة حاجة ضرورية
ولازم ندور على حلول
قريت البوست مع واحد صاحبى غاوى كورة
قاللى نعمل طلمبات صغيرة حوالين الملعب
وكل شوية وقت مستقطع عشان اللعيبه تشرب

......
موضوع غاية فى الخطورة وهو دا الامن القومى مش ....

تحياتى وتقديرى

د. ياسر عمر عبد الفتاح يقول...

مالها الطلمبة ,, ؟؟
خلينا ساكتين علشان ممكن تطلعلنا طولة كده في المقدر من دول أولة امبارح
تقولنا المية الجوفية كانت معدية من قدام بيتنا ,, ومينفعش ندق طلمبات كمان

خاصة بعد ما حوض النيل ما اتكسر ,, وفشلوا في تجبيسه

أنا - الريس يقول...

الله يكون في عونكم ..
الطريف ان الواحد مش بيقدر يقيم الحاجة قبل ما يدبس فيها ..

احنا بنشرب ميه من جراكن بتتباع مفلترة عشان الصرف الصحي اللي في بلدنا بيغذي المية النضيفة واهو كلها فيتامينات

انا ناوي بما اني الريس المستقبلي اسكت علي مهزلة دول المنبع بما ان احنا المصب ..

صفــــاء يقول...

sal
****
وكل ما زاد الشر كتر الضحك من باب الصدمه المفرطه

ومش هقولك وهل يتخيل شخص ونحن فى القرن الحادى والعشرين ان هناك من لا يزال يشرب من الطلمبه ... لأنى ماعنديش مانع اشرب منها ... وفى حالات طارئه أو ظروف مؤقته ... لكن فكر فى حجم الكارثه اصلا
بالنسبه لصاحبك قولو صفاء بتقولك قكرة ميني طلمبه دى حلوة قوى الحق احتفظ بحق الملكيه الفكريه ويسجل برائه أختراع قبل ما يسرقها منه احمد عز والا ابو العينين والا طلعت مصطفى بصفه أحتكاريه

صفــــاء يقول...

د.ياسر عبد الفتاح
*******************
الطلمبه احسن ناس يا دكتور ... وقعدت اشرب واطبخ منها 3 سنين قبل ما المايه توصل يعنى العلاقات بيني وبينها أكتر من ممتازة وبقى عندى خبرة مش بطاله فى تشغيلها رغم الجهد

الحوض مانكسرش ... دة أنشرخ بس لكن بعتنا نجيب كيلو جبس وكيلو أسمنت وهنليس بيهم الكوع

صفــــاء يقول...

السيد الرئيس
**************
هع هع هع يعنى بيت الريس مشحط ؟
طمنتنا يا جنابو
لما ريسنا مش لاقي مايه فى الحنفيه وبيشتريه بالجركن
امال يبقى باقى الشعب هيعمل ايه يالهويييييي

وطبعا حلك الدبلوماسى راااائع وهو ان السكوت من ذهب .. لحد ما يجينا خرس

خواطر شابة يقول...

شر البلية ما يضحك هزيزتي المستقبل مخيف صراحة وتخيلك الدرامي يظهر الامر بسوداوية لكنها في ظل المعطيات الحالية غير بعيدة ان لم يتم البحث عن حلول
دمت بود عزيزتي

حلم بيعافر يقول...

هو انت ايه حكاية الميه معاكى؟

استراحة محمد يقول...

هههههههههههههههههههههههههههههههه
انا ما ضحكتش من زمان كده ، البوست ضحكنى وبعدين ردك على تعليق سلوى كمل عليا
وطالما هيفا فى الموضوع حاسس بالحسرة انى ما كنتش طلمبة
تحياتى دائما

صفــــاء يقول...

خواطر شابه
************
ولا سوداويه ولا حاجه ... طب أصبرى لما تشوفى هيحصل ايه بينا وبين دول المنبع ... إما هتبقى حرب مياة أو هتبقى جفاف لأننا فقدنا تواصلنا مع الدول دى من زمااان

صفــــاء يقول...

حلم بيعافر
************
بحبها ... وعندى عقدة منها

صفــــاء يقول...

استراحه محمد
**************
ربنا يبسطك على طول يابو حميد ... بس لو اعرف بتختفى فين كل دة ... يابنى ماتغبش كدة دة انت من أول الناس اللى عرفتهم على المدونات
مش بعيد ربنا يكرمك ويختاروك موديل زى تامر هجرس كدة وتتصور جنب الفنانه العظيمه .. بدل الطلمبه

مص يقول...

موضوع في الجول بجد احييكي عليه
اللي حصل ده مسخرة والبهوات بتوعنا بس عمالين يصرخو في وشنا لا دة اتفاق غير قانونى طب عملتو ايه علشان توقفوه ولا حد يرد عليك
مستغربين ليه ان الاغراب بيسرقو النيل ماحنا اصحاب الارض سرقناه من قبلهم وردمناه علشان نبنى عليه قصور وفيلل للبهوات الكبار
ربنا يعدي الازمة دي على خير لان بجد ماينفعش نسكت السكوت معناه مش بس الموت لينا لاء الموت كمان للبهوات الكبار
تحياتى ليكي يا جميلة

مصطفى ريان يقول...

صفاء انا صاحب التعليق السابق بس الجهاز ارسل التعليق قبل ان اكتب اسمي

خواطر شابة يقول...

الرجاء الاطلاع على اخر تدوينة عندي

صفــــاء يقول...

المصيبه السودة ان مافيش ردود قويه ومنطقيه تقنع حتى الواد مازن ابن اخويا

يعنى ايه الرد وايه الحل وايه العمل ؟ ... انا سمعت واحد بيهددهم بالمصالح الأقتصاديه المشتركه ... مصالح ايه ؟ اذا كان الدوله ملهاش مصالح مشتركه معانا احنا الشعب بتاعها هيبقى لها مع دول افريقيا ؟

غير معرف يقول...

فينك يا استاذه بقا

كده تقلقيني عليكي :)

وحشاني مووووووووووووووووت

مستنيه تطمنيني

سلام

البنفسج الحزين يقول...

انتي مختفيه ليه بقالك كتير يا صفاء
يا رب تكوني بخير

بحر الالوان يقول...

السلام عليكم

ايه الاخبار ؟ .... انا سمعت انك مختفيه قولت اجي اطمن ... يارب تكوني بخير وكل شئ تمام... وكل سنة وانت طيبة بمناسبة رمضان ( مقدما ) .

تحياتي

غير معرف يقول...

صفاء انتي فين؟؟؟
بقالك كتير مختفية وانا مش واخدة على كده عندك
يارب تكوني بخير يا قمر.. ويسمعنا عنك سمع خير ان شاء الله
وكل سنة وانتي طيبة.. رمضان كريم

فتــــافيـــت

doctor mohamad يقول...

‏_إبتسامة عريضة من أثر ما قرأ_ أعجبنى جدا نقطة "تقوية الروابط الإجتماعية" .. تخيلى إن أنا كنت مستعظم مشكلة المياة و دول حوض النيل.