.
أيها الاخوة المواطنون
.
أخدتهااااااااا
فاكرين ال icdl
فاكرين المنحه المباركه وبقاياها؟
ودى مش هيفتكرها
الا من سار معى على الدرب من سنه بحالها
من اول يناير 2008 واحنا الان داخلين على 2009
لدورة مش بتاخد اكتر من شهريييين
ولمن لا يعرفها الدوله مشكورة قررت أنها تتعطف وتتكرم
وتديننا منحه عاملاها اليونسكو للحصول على
الرخصه الدوليه لقيادة الحاسب ألالى
لدول العالم التالت اللى لسه يا دوب بياخدو الدورات دى
وبعد شحططه وغلب ووجع قلب وطلوع روح
وحظ عاثر معاند أنتهيت من الامتحانات . ونسيت الموضوع خالص
ويئست منه وخصوصا انه مرت أشهر وتغيرت فصول
وناس عاشت وناس ماتت . هيييييه دنيااا
ألا اننى فوجئت ويا لفرحتى بمكالمه تليفونيه بتقولى انه أخرة صبرى خير
وربنا عوض عليّا . وشهادتى وصلت . تقريبا هى كانت جايه ماشيه
ماشيه بقى والا راكبه على قفا الحكومه مش مهم
المهم انى أخدتهاااا . وابويا وامى فرحو بيها اوى بقى
وكدة بنتهم بقت فالحه فى حاجه بدل الفشل اللى هى مشهورة بيه
يعيني الراجل مش مصدق ان اسمى مكتوب فى شهادة بالانجليزى
فرحان بيها اوى . ورايح يبروزها
ايه دخلكو بكل الموضوع دة؟
ولا حاجه . انا بس حبيت أفرح أصحابى اللى كانو معايا فى هذة الرحله المباركه من البدايه
واعلن من موقعى هذا ان البلد دى مفيش فيها فايدة
.
هناك 22 تعليقًا:
مبروووووووووووووووك
عقبالي يا رب
باقيلي امتحانين
ادعيلي:(
دى سرقة
سعد زغلول هو الى قال مفيش فايدة
الرجل دة كان سابق عصره
.
أقصوصه
الله يبارك فيكى وعقبالك يا اختى
وحياتك انت ما أخدتها غير بعد ما يئست منها وشربت الامرين فى امتحانتها
ادعيلك دعوة وليه فى ساعه مغربيه انك تنجحى يا اقصوصه وتاخدى الشهادة العجيبه دى
.
.
قلوب بتغنى
بلا نيله وهو يعنى عمل ايه دة حتى من
خيبته بعد ما قالها قال غطينى وصوتى
يا صافيه
.
مش معقول ياصفااء اخيراً اخدتيها
كويس ياحبيبتى انهم ما استنوش لما تاخدى لقب المرحومة وبعدها يدوكى الشهادة
والله الحكومة فيها الخير
عقبال الشهادة الابتدائية ياقمرى عشان تبقى فرحتى بيكى كبيرة
.
life
طبعا ... ليكى حق تتريقتى براحتك
ما حمار اللى يمشى ورا الحكومه خطوة واحدة
وبعدين شهادة أبتدائيه ايه اللى اخدها يا جاهله انتى
دة انا معايا شهادة تطعيم ضد الحاسبه الالمانى
.
طبعا يا صفاء انا احد شهود العيان على هذه المنحة المباركية وعلى رحلتك الطويلة في الحصول عليها
ماحنا اولاد طريق تدويني واحد .. اه يا اختي بدأناه سوا ويا عالم هترسي على ايه
وانا من موقعي هذا ولكل ما تقدم احبك اقولك وبكل فرح وسرور وافتخار
وفشخرة - بيكي طبعا - مليون مبروك يا جميل
مفيش فايدة في الحكومة
ولا في المواطنين
ولا في البلد
اللي شالتنا سنين
وهيه كل يوم تدعي علينا
لأننا تعبناها وحملناها أكتر من طاقتها
على رأي الحزب الحاكم
(( احنا بقينا حمل كبير على مصر ))
....................
قريب قوي هيتخلصوا مننا ويمونا في النيل
مبروك .. كنت اتمنى ان اقولها بنفسى
من نجاح الى نجاح ان شاء الله .. فليس هناك شئ لالزوم له .. الحمدلله انك اجتزتيها الى نهاية المشوار
وكلل الله عملك بالمجاح .. على فكرة .. الفرحة الحقيقية تقرائيها فى عيون الآخرين .. واعتقد انهم فى منتهى السعادة .. اذ ما معنى الفرحة بلا مهنئين
اولا مبروك
ثانيا الف مبروك
و ارجو تكوني هتستفيدي من الشهادة و الا هي كمان منحه
نبروزها و نص
شهادة السياقة الدوليه في الحاسب الالي
لصاحبتها صفاء .......
تحياتي
.
مصطفى
الله يبارك فيك يا درش وحياتك يا اخويا وما ليك عليا حلفان من ساعه ما خدتها وانا ماشيه اغنى بالانجليزى فى البيت ... ما انا بقيت دوليه خلاص
أى نعم اولاد طريق تدوينى واحد انت ومروة وانا بس انت المبدع بتاعنا يا درش وان شاء الله ترسى رسوة عسل ومفيش فيها عيش وحلاوة
.
.
احمد حشمت
لو رمونا فى النيل هنوسخه وهتضايق ريحته البهوات وهما سهرانين بالليل فى الكباريهات العائمه اللى عليه
انتو ايه؟ شعب مش بيفهم؟
روحو موتو بعيد او على جنب
روحو الصحرا موتو هناك واهى حلوة اوى وواسعه هتشيلكو
.
.
شريف باشا
اهلااااا أبويا العمدة
انت كمان حضرت معايا الملحمه العظيمه
دى وفاكرة انها كانت اول زيارة ليك عندى وقت شكوتى من أحدى هباتها
ومبروك كأنك قولتها وهديتها عندك
ويكفينى فرحتك بالانجاز الاسطورى دة
.
.
احوال الهوى
تعيش يا بيه وأن شاء الله أول ما أفتح القهوة الالكترونى بتاعتى هلطع الشهادة المعجزة فيها
طب تصدق باللى خلقك انا مقدمه على كورس جرافيك بقالى 10 شهور ولحد دلوقتى لسه المجموعه ما كملتش عشان الكورس يبدأ؟ وتقولى هتستفيدى؟ منين
واحنا مش قادرين نكمل جروب لكورس
صلى على اللى هيشفع فينا
ويمكن ابويا برخصه القيادة دى يشغلنى على عربيه نقل وهو أفيد واكسب
.
عايزه اقول
بلد شهادات صحيح
الف مبروك يا جميل اهو احنا بنحب ناخد شسهادات متعرفيش شكلنا بنجمعها عشان نكسب بيها باكو شبسي كرنشي في الاخر
تحياتي
سمكه
كل سنه وحضرتك طيبه
دعواتــــــــــك
ههههههههههههههههههه ياحيني
الف مبروك ياكناريتي بس بجد الله يكون في عونك
اولا مبروك الشهادة
بصراحة هى شهادة صورية
لى اصدقاء كتير حصلوا عليها
وبيقولوا ان ليس لها فائدة
والناس اتزلت الى ان حصلت عليها
مش عارف حتى العلم لازم نتزل عشانوا
سياسة دولة بقى
على العموم ربنا يوفقك
ويكرمك
ونسمع عنك خير ان شاء اللة
تحياتى
.
سمكه واحدة
أبدا والله يا اختى ان كان على كيس الشيبسى انا اشتريه وادفع الخمسين قرش ولا يهمنى
بس للأسف اختك محووجه للشهادة دى
كل سنه وانت طيبه يا سمسمه وان شاء الله السنه الجايه تبقى برضه سمكه بس كبيرة شويه
.
حسن حنفى
وانت طيب يا ابو على وطبعا ادعيلك
بس أدعيلك على مين ؟
.
.
مولان
شكرا ليك يا قمر وربك يجعلها اخر
الاحزان
.
.
احمد بدر الدين
هى والله شهادة كويسه وليها فايدة ومنفعه ويكفى الحاجات اللى بنتعلمها
بس موضوع تشوف وشى دة موضوع فيه شك من ساعه معرفتك وانت مفيش من وراك غير يا أما عاوزنى اروح اقتل حد يا اروح اجرب الاكل فى ابو زعبل
يعنى معرفتك كلها أذى يا دكتووووور
شرفتنى جدا بس من غير ما تبعتنى اغتال اى حد
.
إرسال تعليق