الجمعة، 24 أبريل 2009

ظواهر ومستجدات


أيه اللى حصل فى مصر

أيه اللى بيحصل لشعب مصر

أحنا مكناش كدة

جمل معادة مكررة ممله بسمعها كل يوم فى القنوات الفضائيه

وبتتعاد قبل كل فقرة بتتكلم عن حادثه او جريمه

وكأن مصر طول عمرها ذات سكان من الملائكه الأطهار

وسكنوها دلوقتى الشياطين

مجرد جريمه قتل أو حدثه صدم وهروب او أغتصاب او تحرش

وتلاقى القنوات فرشت الملايه

وعقدت اللقائات والندوات لمناقشه واقع الشارع المصرى

والتغيرات والمتناقضات فى المجتمع

وكأن فعلا الحوادث دى عمرها ما حصلت فى مصر

مع ان أى واحد متابع للجرايد وصفحات الحوادث من زمان


هيلاقى ان دة شئ فعلا عادى ومتكرر الحدوث بطريقه طبيعيه

فى مجتمع ذو تعداد ضخم من البشر

ويظهر ان المشكله فعلا هى القنوات الكتير اللى فتحت دى

وعشان يبقى ليها زبون زى أى محل كشرى

وتعمل سبق وأنفراد تقوم كل واحدة تنافس اختها فى حجم التهويل

والتضخيم ... وأحيانا الفبركه

ونسمع جمل شديدة الغرابه من نوعيه تغيرات جذريه فى واقع الحال

وجرائم جديدة على الشارع المصرى

هو فيه جرائم جديدة وجرائم موديل السنه اللى فاتت ؟

الجرائم هى الجرائم والمعدل هو نفس المعدل

فى دوله يزيد تعداد سكانها عن 80 مليون روح


الناس هما هما والشوارع هى هى

والمشاكل نفسها والحوادث نفسها

الشئ السخيف بقى موضوع التحرش

وقبل أى حاجه ... انا واحدة ست

والله العظيم ست

وبمشى فى شوارع البلد دى وبركب مواصلاتها

وبتعاكس والله زى أى واحدة وأكيد برضه حاول حد يتحرش بيا

زى أى ناس فى كل الدنيا

لكن اللى بيحصل ويتقال دة فى برضه القنوات والجرايد وحاليا النت

تحس منه ان الشوارع أصبحت أدغال

وان الشباب أصبحت وحوش بشريه بتطارد فرائس

وان اللى هتخرج من باب بيتها هيتم ألتهامها فى عرض الطريق

وان فيه مناطق مخصوص للتحرش ومش ناقص غير يكون ليها مواصلات كمان


ومنادى على عربيه يقول واحد ذئب بشرى

لكن الحقيقه مش كدة

صحيح فيه رخامه وقله ذوق وقله أدب وتحرش بس مش ظاهرة يعنى

ولا تنظيم عصابى ... ولا خطط منظمه للنيل من البنات يعنى

ويجيبو تقارير من الشوارع البنت واقفه تقول

أنا بقيت اخاف اخرج من البيت واللى تقول باخد اخويا يوصلنى

او بابا بيجيبنى ويودينى

الله !!! امال احنا لسه بنخرج أزاى ؟

وبنقضى مصالحنا وبنسافر ازاى

وكل الرجاله والشباب المحترمين دول من أنهى بلد ؟

مستوردين يعنى ؟ ....

ومحدش يقولى اصل انتو صعيد لكن القاهرة الوضع متخلف والتحرش على ودنه

هنا وهناك وكل مكان فى البلد فيه الوحش والوحش جدا كمان


لكن فعلا وبمليون دليل أحنا شعب كويس ومحترم

وبيحترم نفسه ... ولسه فيه شباب بتقف وتقعد أى ست او راجل كبير مكانهم

ولسه فيه رجاله بتغض بصرها وهى بتتكلم مع ست

ولسه فيه الراجل اللى بيوسع الطريق لما يلاقى بنت او ست عشان يعديها

ولسه لما حد بيقل أدبه عليا واتخانق معاه الاقى ناس بتدافع عنى

أو حتى بتبقى هتمسكه تضربه

ولسه برضه شعب مصر فيه العادة المهببه فى أنه يرفض انه يقول

مش عارف ... ولو سئلت أى حد عن عنوان ياخدك ويلففك الدنيا ويتوهك

لكنه ميقولش مش عارف

هل فيه حوادث وعنف وقسوة ووحشيه حتى فى بعض الحالات ؟

طبعا فيه ....... أكيد فيه

مفيش أى تجمع بشرى خالى من كل الاعراض دى


لكن المصيبه أننا نتسبب فى حاله ذعر لنفسنا

ونقنع حالنا ان كل شئ حوالينا بينهار

والأخلاق ضاعت والشباب فجرت والبنات أنحرفت

والبلد ماعددتش هى البلد

والدين فقد

واوعى يا بنتى تخرجى لوحدك أحسن الديب ياكلك

ولا كأنها ذات الرداء الاحمر

وارجع واقول انى ايوة بتعرض للمضايقه أوقات

لكن مش دايما

بقابل ناس أقل ما يقال عنهم أنهم أوباش ... لكن مش كل الناس

أيوة فيه حوادث شديدة البشاعه ربنا يحفظ الجميع منها

لكن مش طبائع شعب بحاله ولا احنا بقينا حيوانات

الكل معرض لمخاطر أيوة

لكن ميوصلش الكلام للدرجه اللى نحس منها

كأن الذئاب بتجوب شوارع البلد بحثاً عن الفرائس

كلنا بنات وبنخرج من بيوتنا وبنتعلم وبنشتغل وبنسافر

وبنتعرض للمضايقات


لكن ما يحدث ليس بظاهرة

وأهل مصر لم يهبطو الى درجه حيوانات مفترسه









هناك 30 تعليقًا:

سلوى يقول...

معاكي
بس برضه ما ننكرش إن الوضوع ده زاد

لأن الحال غير الحال
الشباب لا عارف يتجوز
ولا شايف في أمل

بصى شوفي ده كده :))

http://sharm2t.blogspot.com/2009/04/blog-post_17.html

د. ياسر عمر عبد الفتاح يقول...

هقولك الكلمة اللي إنتي قلتي بلاش نقولها
إحنا في الصعيد الوضع أحسن كثير من القاهرة
أيوه الشعب المصري لسه بخيره ولسه الجدعنة والمروءة موجودين
لكن ده ميفتيش إن قلة الأدب ادت بمنحني خطير جداً.
وبرضه الإعلام بيحب يهول كل حاجة
أصله لو معملش كده مش هيلاقي حاجة يتكلم عنها .. شغلتهم بقي

حسن حنفى يقول...

هو زي مانتي قلتي القنوات عاوزه تاكل عيش وعمالين يضخموا من كل حاجه وعاملين من الحبه قبه

أينَ ؟ يقول...
أزال المؤلف هذا التعليق.
أينَ ؟ يقول...

الجماعة بيعملوا شغلهم صح ...
لازم يصحوا من النوم ..
ويروحوا الشغل ..
ويكتبوا حاجة ..

.

.
وفى نفس الوقت لازم يبعدواعن ...
الخطوط الحمراء ..
والناس االتقاااااال ...

.
.

و كمان فى نفس الوقت ...
لازم يبهدلوا حد ..

خفيف ما هو تقيل ...
وصغير ما هو كبيييير ..
وما عندة خطوط حمرااااء ...

.
.
يبقى مفيش الا ...
الناس الغلاااابة ...
اللى مالهم ظهر يسندهم...
الناس البسطاء...
العااااااديين ..

.
.

غصب عنهم ...
أكل عيش ...

.
.
.
ولسان حالهم يقول ..

أخطاء الكبار والآغنياء هفوات صغيرة فى حق المجتمع ..
أما اخطاء الصغار والفقراء فهى جراااائم يعاقب عليها القانون .

.
.

!!!!

إيناس حليم يقول...

اولا ازيك يا صافي :)
بصي هو كل اللي قلتيه طبعا كلام جميل وحقيقي.. مش كل البلد بقت حيوانات مفترسة.. والحياة فعلا لسه طبيعية والبنات ماشيين طبيعي في الشارع..
وموضوع الكلام الزايد عن التحرش ده انا في نظري انه موضة زي اي موضة بتيجي على مصر تاخد وقتها وبعدين يزهقو ويتنقلو لموضة تانية..

بس برده صدقيني الوضع في الصعيد غير بحري خالص وخصوصا القاهرة..

عموما يا جميلة متشغليش بالك
كله بيطلع في الغسيل :)

دمتي بخير

assafo anaroze يقول...

صفاء
انا متفق معاك بالفعل هناك جميع الظواهر اللي انت تحدتث عنها و في ناس في مرتبة الحيوان لكن كمان في شباب و ناس محترمين و عندهم ضمير
الاعلام و خصوصا الاعلام الرسمي بيحاول يضخم الامور علشان يكون نقاش الشارع الظواهر دي و بس و ينسى الشعب يلتفت للمطالبة بحقوقه
و هناك اعلام مأجور و خاص يحاول يوصل لاعلى نسب مشاهدة من اجل تضخيم ارباحه لذلك يسعى الى مثل هذه المواضيع من اجل اثارة المشاهد
مودتي

mohamed ghalia يقول...

إذ ضاع الإيمان فلا أمان ولا حياة لمن لم يحيى دينا
دى كلمات محمد إقبال
كان عنده حق فعلا

بسنت يقول...

ايوا يا صفاء الناس الكويسه موجوده الحمد لله بس الوحش اكتر بكتير
يا صفاء الناس او الشباب مش المشكله فى التحرش بس لا المشكله وصلت لسوء الاخلاق حتى فى الشغل يعنى كل واحد عايز يكسب اللى يقدر عليه من شغله حكومه بقى خاص المهم هتدينى كام وهاخد قد ايه
انا من الصعيد زيك وبقوللك الناس الوحشه فى كل مكان والكويس موجود بس قليل جدا جدا ولا تخدعك المظاهر ان حد عايز يساعدك والكلام دا
انا ما عشت الزمن الجميل والخير اللى بيقولوا عليه الجيل القديم بس كفايه ان الكويس كان مظهر وجوهر
انا ان كان عن نفسى فعلا لما بتأخر لازم والدى او اخويا يوصلونى بالرغم ان الحوادث هنا قليله جدا
بس انا مقتنعه تماما ان كل شئ موجود فى الصعيد بس فى الخفاء ومش معلن زى ما بيحصل فى القاهره
بس يمكن الاعلام بيزود ويسوء الاخلاق اكتر ما هى سيئه
وعلى العموم ربنا يهدى الجميع
لان الواحد نفسه فعلا تكون مصر آمنه
فى الشارع زى البيت

مصعب صلاح يقول...

طبعا مصر اتغيرت تمام
بس ياريت تتغير أكتر
بس في شواهد اننا ممكن نبقى أفضل
ولا ننسي أن الفجر يصطلع بعد أن يشتد ظلمة الليل
نقبلي مروري

soly88 يقول...

الوضع فى مصر حقيقة سيىء
بل سيىء جدا اخلاقيا واقتصاديا
والسبب ان البيت لم يعد له دور تربوى والمدارس اصبحت اوكار لأى شيىء
وصلت ان طالب يقتل زميل له فى الحرم الجامعى واستاذ يراود طالبه عن نفسها
وزراء وكبار مسؤليين ومنهم المحافظ الذى كان يشغل منصب النائب العام السابق يتهمون فى قضايا رشاوى وفساد
ضباط شرطه متهمون بالنصب والاحتيال وكذلك قضاه
تلك هى الصوره مخففه جدا فلماذا لا نعترف بها لنبدأ العلاج

فتافيت يقول...

وحشاني جدا جيت امسي عليكي

انا معاكي اه فيه معاكسة واه فيه تحرش

بس مش بالشكل اللي الناس بقت فكراه ده

وان كل يوم فيه 3 او 4 مليون حالة تحرش

ولو ده فعلا موجود الحكومة هي اللي تسأل عن كده

ليه الشباب اتصعر؟؟
ليه مافيش شقق
ليه مافيش وظايف
ليه مافيش فلوس
ليه البنات بتعمل البدع في نفسها
ليه العنوسة بقت بالزوفة

ليه ليه ليه ليه ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

واحد من الناس يقول...

تمام مضبوط معاكى حق كل مجتمع زى ما فيه الكويس فيه برده الوحش.

بس احنا اتخصصنا فى تهويل الوحش حتى اعتقدنا انه لا وجود للكويس.

واول مره الاقى بنت مش عايشه فى دور المغلوبه على امرها، كل البنات بتهول الموضوع ويحسسوكى انهم لو نزلوا الشارع هيتخطفوا؟؟ وان مافيش شاب ماشى فى شارع الا بيعاكسهم..

يمكن نسبة الانحطاط الأخلاقى فى مصر زادت شويه بس برده الخير أكتر و هيفضل فى مصر ان شاء الله ليوم الدين.

تحياتى،،،

صفــــــاء يقول...

سلوى
*****
وانا منكرتش ان الموضوع زاد شويه وان له طبعاً أسباب
لكن وحتى بوجود الأسباب دى أنا لا ألتمس العذر لفاعليها وشايفه انهم يستحقو كل أحتقار ومحاسبه
لكن برضه بقول ان الحال مش نيله خالص كدة زى ما بيصور البعض

صفــــــاء يقول...

د.ياسر عبد الفتاح
******************
والله يا دكتور عارفه ان هنا شويه كويس
مقولتش لا
بس كمان محدش يصور الأمر على أنه انهيار أخلاقى واجتماعى فى مصر
وفعلا بتضايقنى نظرة الاعلام التهويليه جدا

صفــــــاء يقول...

حسن حنفى
*********
وهو دة اللى يضايق
ان عشان القنوات دى تشتغل تشوه سمعه بلد بحاله

صفــــــاء يقول...

أين ؟
*****
وعشان هما يصحو ويشربو قهوتهم ويروحو أشغالهم
ميلاقوش غير ناس طافحه الغلب وطلعه تجرى على أكل عيشها وصغيرها قبل كبيرها
بيدور على حياته وازاى يكفى نفسه
ومش عشان ناس قليله أدب نشوة صورة شعب بحاله
ومش احنا البلد الوحيد فى الكون اللى بتحصل فيه حوادث ومصائب

صفــــــاء يقول...

إيناس حليم
**********
ازيك يا جميله
كلامك معقول جدا وواقعى
بس يا قمر حتى هنا فى ناس وحشه ووحشه جدا كمان فوق ما تتخيلى
يمكن طبيعتنا وطبيعه مجتمعنا تمنع نوعيه جرائم بشعه فى موضوع التحرش والأغتصاب مثلا
لكنها تسمح بنوعيات تانيه من الجرائم أصعب بمراحل
بس مقولتليش
انتو بتغسلو بأيه

صفــــــاء يقول...

اسافو
******
برضه وجهه نظر معقوله وتستحق الأهتمام وخصوصاً انها بتحمل فكرة لها وجاهتها برضه
وتستحق المتابعه والتأمل فيها

صفــــــاء يقول...

محمد غاليا
**********
هناك ضعف فى الدين فعلا
لكن ليس أنهيار دينى وأخلاقى كامل
ولازال فى الارض خير ودين
وكتاباتك خير دليل

صفــــــاء يقول...

بسنت
*****
طبعا الوحش موجود
وكتيييييييير اوى كمان
أكتر مما نتخيل
بس مبقتش عادة وطبع شعب بحاله
ولسه والله فيه الكويس
اة فى الشغل فيه المغتلس والحرامى والمستغل
بس ليه فيه اللى بيخاف من ربنا ولسه فيه اللى بيراعى ضميرة
ولسه فيه اللى بيخاف يدخل فى جوف أولادة لقمه حرام
وعادى جدا انك لما تأخرى فى شغلك أو مشوار انت رايحاه والدك او أخوكى يوصلك
لكن العيب اننا نحط نفسنا ونقنع حالنا بحاله من الذعر الوهمى ان اللى هتخرج فى الشارع هياكلها الديابه
الوحش موجود
لكن الحمد لله لسه فيه اللى بيخاف الله

صفــــــاء يقول...

مصعب صلاح
*********
كل شئ بيتغير لكن مش دايما للأسوء
ولو ان الدنيا كانت كلها ظلم وكفر وقسوة وأفتراء لأفناها الله وأراح خلقه منها

صفــــــاء يقول...

soly88
*******
دائما وأبداً هناك الطالب الذى قتل صديقه والأستاذ الذى يراود طالبه على نفسها وهذا ليس بمستجد يستحق كل التهليل والتهويل
فكون أن حوادث ومصائب وظلم بين يقع على شخص ورغم كل الألم والأذى الذى يحيق بمن وقع عليه وعلى من حوله
لكنها ليست دليل على أننا أصبحنا شعب من المغتصبين والمتحرشين والقتله
نعم هناك السئ ونعم يوجد ما يستوجب العلاج الناجع والسريع
لكننا لم نهبط بعد الى مرتبه حيوانات

صفــــــاء يقول...

فتافيت
*******
طبعا انت يا جميل تشرف فى كل وقت
وسؤالك عنى شئ يفرحنى جداااااا
ومعاكى طبعا ان مشاكل البلد يسئل عنها من يديرها ويمتلك مفاتيحها
ويدعى القدرة على حكمها أفضل من غيرة
لكن والله لسه الحمد لله فيه فى البلد خير
حرام نهول الامر لدرجه ان نخلى فيه سمعه عامه لشعب انه من المتحرشين والمغتصبين
وان اللى هتخرج فى الشارع او تيجى مصر هياكلوها فى الشارع
حكايه العنوسه مش صحيح خااااالص
العرسان على قفا من يشيل بس النفس يا اختى
والدليل عريس نوفمبر وديسمبر ومارس

صفــــــاء يقول...

واحد من الناس
**************
لأنى ولا ضحيه ولا مغلوب على أمرها
ولا عاجزة ولا بقتنع بأن كل شئ أنهار والاخلاق ضاعت والدين انتهى وكل الكلام دة
وأرفض أصلا أنى اعيش دور المغلوب على أمرها واللى لو خرجت فى الشارع هتتاكل
فيه فعلا أشياء كتير وحشه جدااا وربنا يحفظ الجميع منها
ويصبر ويعين من تعرضت لها وينتقم لها ويحفظ لها حقها
لكن مش لدرجه الذعر والهلع اللى ممكن نسببه لنفسنا
حمد الله على سلامتك كمان مرة

ادم المصرى يقول...

اختى العزيزه اهنيكى كتير على موضوعك المميز جدا

انا ليا اصدقاء كتير فى جريده المصرى اليوم

كلمتهم كتير عن سر مصداقيه الجريده قالى احنا جريده مستقله ملهاش فى الاحزاب او المجلس او جمعات او كده

فكرا موضوع من اجل مصر نظيفه

الموضوع ده حقق نجاح باهر بجد عيب الشعب مش فى الزحام او البطاله او عدم مقدور الشباب على الجواز او ان البنت تعيش بحريتها فى نفسها وتلبس الى هيه عيذاه وكمان عيذا محدش يكلمها وهيه فى الشارع اوكى لكن مش عيب اننا نشوف اخطاء ومنعلنش عنها

او نكبرها ذى برنامج الطبعه الاوله الى بيفضح الى متفضحش

ومحمود سعد وكدا

الفضائيات بتحاول انها تساعد وتحظر الناس من الى بيدور فى الدنيا او الجرائم الى بتحصل بلدنا بقت فى حاله ملل او شلل فى كل شيئ حكومه غير قادره على التحكم فى شعبها لئنها فقدت الصقه عن الشعب والهيبه زمان كانت هيبه الحكومه كبيره جدا ولكن الان تضهورت والصرقه كانت زمان فى الخفاء والان فى العلن الاختصاب كان فى الظلام والان فى النور بين الاشجار والتحرش بقه اعين الناس والحشيش كان فى البلكونات والحوارى والان بقه فى القهاوى

لا يغير الله ما بقوم حتى يغيرو ما بأنفسهم
صدق الله العظيم المهم اننا نبعد عن كل هذه الاخطاء ونحاول تجنبها بس نفسى فى شيئ

دلوقتى البنات كلها عرفه ايه الى بيدور فى مصر او حال الشباب الشكاوى من البنات كترت او من مديقتها فى المعكسات والتحرش انا بجد مستغرب على البنات مع انى مقتنع انهم عندهم حق بس بردو الاحساس بل اخرين نعمه مش انى البس بدى او تيشرت ديق جدا مبين كل مفاتن المرأه وألبس بنطلون او جب ديق جدا وكمان متعاكس طب اذاى هتقولى طب ما المنقبات بتتعاكس ايوه كدا بقه نعرف ان الشباب عنهم مرض مدفون فيهم وهوا الكبت الى هما فيه يبقه احنا نحاول نكون عقلاء فى تصرفتنا وحكماء فى افعلنا

وسورى انى طولت

أحمد حشمت يقول...

المشكلة إن احنا بقينا تبع الموضه
الموضه في كل حاجة
يعني في ناس تقول
كلنا ضد التحرش
يبقى الكل ضد النحرش
مع إن الضرر موصلش للحد
اللي تخليه ظاهرة
ونعمل مظاهرة ضد الظاهرة دي
يقولوا اضراب
يبقى الكل يضرب
لدرجة ان الإضراب مبقاش يجيب همه مع الحكومة
ومن كتر الإضرابات في البلد
مبقاش فيه إضراب حقيقي لوجه الله
كله مصالح متخبيه ومحدش عارف النوايا
يقولوا مش علرف ايه
الكل يجري عشان مش عارف ايه وليه
وعشان يعرف
لخبطة من غير لزوم
وكل ده في صورة مش عادية
صورة زووووم

فارس عبدالفتاح يقول...

اتفق معك في شرحك للوضع المصري

لكن مشكلتنا هي العاطفة والمزاجية والتسطيح واللاوعي بما يتلقاه فكرنا ووجداننا بوعياً كاملاً

ولكنك على وعي بما تتحدثين فيه ولكن دون تحديد السبب او معرفتها

نحن نتأثر بالاعلام الموجهه بطريقة لا حدود لها انظري الى مشاهدي الكورة او مشاهدي هذه البرامج التي تتحدثين عنها

اذا حاولتي ان تناقش انسان مصري يعتقد في هذه الامور لن تجدي رد منطقي او عقلاني يستحق ان ينظر اليه باهمية


سوف تجدين اضمحلال وتسطيح الى ابعد مدى

إيناس حليم يقول...

ههههههههههه
لسه قارية ردك دلوقتي يا صافي :)

بنغسل بتايد
و مع تايد للغسيل مفيش مستحيل
ولا اييييه ;))

mostafa rayan يقول...

ايه دة ايناس حليم بتقولك يا صافى رغم ان الاسم دة حصري ليا انا وانا صاحب الاحتكار بتاعه
وبعدين ايه بعنى انا ست وبتعاكس عايزة
تعرفينا انك امورة وكدة ماشي ياستى
بس احنا عارفين يعنى من غير لفت نظر
- بصي يمكن الحاجات دى كترت دلوقتى لأن الناس كترت كمان الشباب دلوقتى بقى تعبان قوي يا صفاء لا شغل ولاجواز ولا فلوس
ومن جواه طاقة تهد الجبل يعنى الله يعينه بصراحة والكلام دة ينطبق على الرجالة والستات كمان لأنهم بردو جواهم رغبة وشهوة وميل للطرف الاخر بل هما العبأ عليهم اكتر الراجل ممكن يعاكس او يشوف فيلم جنسى اويقيم علاقة طيارى وهنلاقى له الف عذر لكن الست اللي جواها رغبة زي الراجل او قد تكون اكثر تعمل ايه الله يعينا كلنا بجد
وزي مانت قلت فيه الحلو والوحش
تحياتى لك دوما