الاثنين، 6 أبريل 2009

السيد المحافظ يا ... يعيش

.
بوافر العرفان والأمتنان نتوجه نحن أهالى محافظه المنيا

بأسمى أيات الشكر والتقدير للسيد محافظ المنيا

الهمام الذى قضى على مشكله البطاله فى المحافظه

وذلك بتوفير 23 ألف فرصه عمل لشباب المحافظه

من خريجى الجامعات وحمله المؤهلات فوق العليا

فقد قام سيادته بتشغيل كل هذة الأعداد بالفعل

وله الحق كامل غير منقوص أن يعلن لكل القيادات السياسيه والحاكمه

هذا الأمتياز وتلك العبقريه القياديه

وله أيضاً أن ينشر فى العيد القومى للمحافظه

هذا الأنجاز على صفحتين كاملتين بجريدة الجمهوريه

والقصه بالتفصيل هى أن مديريه التربيه والتعليم طلبت توفير حوالى

200 مدرس بالحصه لسد العجز بمدراس المنطقه

فقام سيادته مشكورا بأصدار تعليماته بأن يفتح الباب على مصراعيه

لقبول كل من يتقدم لشغل تلك الوظائف تقدم 23 الف خريج

وهو رقم أكبر من أحتياجات مدريه التعليم ب 10 ألف ضعف

وبالتالى أصبح لدى التربيه والتعليم بالمحافظه عدد خرافى من العاطلين المطلوب منها القبول بهم

فقامت بتوزيع الحصص المطلوب لها 200 معلم مؤقت على ما يزيد على 20 الف شاب وفتاة

ليكون نصيب الفرد منهم حصه او حصتان وشديد الحظ ينال 4 حصص شهريا

أجر الحصه الواحدة 75 قرش أرتفعت الى 85 ويقال 90 قرش والله أعلم

ليستيقظ الشاب والفتاة مبكرا ويتوجهوا ألى مكان عملهم

ليقوموا بأعطاء 3 او 4 حصص شهريا مقابل أجر 2 جنيه

يتوجه الى كشوف المرتبات ويمضى بأستلام أجر عمله الشهرى 2 جنيه

أما أصحاب الحظ الوافر والمستقبل الباهر فهم أولائك الذين يعطون اكثر من حصتين

فهم ينالون أجر يزيد عن 4 و 5 جنيه واحيانا 6 جنيه أجر شهريا

أما ما الذى يدفع شباب وشابات خريجى الجامعات للقبول بهذا العرض الخرافى

فهو أيهام سيادته ومديريه التربيه والتعليم لهم

بأن من يعمل طيله هذا العام تحت هذة الظروف

فسوف يحصل على تعاقد مميز براتب شهرى 350 جنيه العام القادم

وعلى ذلك فهم يقبلون بهذا الوضع المهين المزرى

مع كامل العلم والمعرفه بأنه من المستحيل تعين كل تلك الأعداد على الأطلاق

فما الذى سوف تفعله مدريه التعليم بكل تلك الأعداد ألا معقوله

ومن أين أصلا يمكنها توفير تلك المرتبات لهم

كلام غير واقعى أو عقلانى على أطلاقه

ألا أنه يتيح للسيد المحافظ الظهور على شاشه أى قناة تلفزيونيه

أو من خلال أى حوار صحفى ليقول أنه تمكن هذا العام من تشغيل 23 ألف شاب وفتاة

وتلك أضافه رائعه لسيرته المهنيه

وتأكيد عملى على قدراته القياديه ومجهوداته الجبارة على مستوى المحافظه

ومن هنا كان توجهى لسيادته بكامل التهنئه والتقدير لعبقريه سيادته

وشديد الأسى والأسف لما أل أليه حال كل شاب وفتاة

ذاكر وتعلم وتخرج ليعمل ويقبض شهريا 2 جنيه فضيه

بتوجيهات من السيد محافظ المنيا







هناك 45 تعليقًا:

مصعب صلاح يقول...

الله عليك يا سعادة الوزير المحافظ
اهم دول المحافظين ولا بلاش
ربنا يخلي الاهرام الحياة عندها لونها بمبي
--------
مش عارف ليه يا استاذه صفاء في نبرة يأس في كلامك عن الاضراب
الحقيقة الاضراب وسيلة ونجحت وهي بتيجي واحدة واحدة
وبعدين ربنا قال " لا تيأسوا من روح الله " والرسول انزعج لما حس بنبرة يأس عند سيدنا حباب بن الارت لما قاله " الا تستنصر لنا " ماذا قال الرسول " والله ليسيرن الراكب من صنعاء الي حضرموت لا يخاف الا الله أو الذئب على غنمه ولكنكم تستعجلون "
مشكلنا في الاستعجال
تقبلي تحياتي

Sherif يقول...

خالص التهانى والمباركات لكل شاب وفتاة ممن اسعدهم الحظ بتلك الفرصة

والى المزيد من الابتكار والابداع واقتحام المجهول من اجل رفعة وتقدم ابناؤنا ..

لاتغضبى سيدتى .. فأول الغيث قطرة .. ويبدو أن آخره كذلك أيضا ..

doctor mohamad يقول...

رائع .. هذا المحافظ الذى ورد ف موضوعك واحد مما نقعت عليه العبقرية فأهدته لمثل هذا الحل .. دا حتى أسرى غزوة بدر الكفرة كانو بيعلمو 10 عشان يفدو نفسهم .. هل يكفى تدريس حصتين لأسرى مصر عشان يقدرو يعيشو يا مسلمين؟؟!!

مصطفي ريان يقول...

طبعا انتي عارفة اني في الحالةدي لواتكلمت هقولكلام مش حلو فلذلك
مش هقول اكتر من كلمة ونص ( لا تعليق )
مبروك جواز اختك ويارب تفرحو باولادها ويكون ذرية صالحة
تحياتي ليكي

فارس عبدالفتاح يقول...

انا في اول الموضوع كنت فاكر انه كلام جد كنت هاقول ايه الاعجاز ده

life يقول...

هههههههههههه
طيب والله عبقرى
قدر يقنع العدد ده من الشباب المتخرج الواعى الفاهم
وتقوليلى شهادات عليا ايه كانو بيعلموهم يبقو متأخرين عقلياً
وبعدين يا حبيبتى أنتى زعلانة ليه أصلا دى خطة عشان يوفرو على الأهالى وعلى الجيل الجديد تعالى افهمك يابطة
الاهالى لما هيلاقو أنهم دفعو دم قلبهم مصاريف دراسية وكليات وألخ.... وفى الأخر أولادهم ياخدو مرتب اتنين جنيه
هيفكرو بقى ان مفيش داعى للتعليم أو يكتفو بتعليم أولادهم تعليم متوسط وبعدها يشغلوهم اعمال حرة
يعنى بتوع الجرجير على الناصية هيكترو
واصحاب العربيات الكارو هيبقو على قف مين يشيل
وتبقى فى ايادى عاملة كتير تشتغل فى المصانع
وفوق ده كله بيوفر على الأهالى مصاريف
مش بقولك محافظكم ده ذكى

حسن حنفى يقول...

هههههههههه

فعلا هم يضحك وهم يبكي

حسبي الله ونعم الوكيل

إيناس حليم يقول...

معقولة اللي بتقوليه ده؟؟
أنا بجد مذهولة
أنا مش عارفة حال البلد دي هيفضل كدة لحد امتى
بقت مدعاة للسخرية بشكل كبير جدا

ربنا يستر على الأيام الجايه

دمتي واقعية

اللؤلؤة يقول...

صفاء
السلام عليكم
أنها بلد الشعارات البراقة والحياة بقى لونها بمبى
لذلك فقدنا الثقة فيهم وفى تصريحاتهم البراقة
بلد ماشية بدون تخطيط واللى يحب النبى يزق
دمت بكل الخير

براغل يقول...

بسم الله الرحمن الرحيم
في البدايه احيكي علي شجاعتك المطلقه في الكلام بهذا الموضوع الخطير
بس انا شايف ان مفيش حاجه ممكن تخلينا نقبل الوضع ده ونقول علي امل الحصول علي غقد السنه اللي جايه وانا شايف انك قبل ما توجهي شكرك للسيد المحافظ لازم انا وانت نوجه شكرنا للشباب اللي رخص نفسه وحدد سعره اتنين جنيه

assafo anaroze يقول...

صفاء
ههههههه
مقال ساخر
الله لو 23000 خريج خرجوا عن بكرة ابيهم للاحتجاج و النضال من اجل حقهم في الشغل كيف سيكون حال ذاك المحافظ الذي يتبجح بتشغيله لذاك العدد ب 2 جنيه ؟؟؟؟؟؟
لكن للاسف ضاع الشباب و قوة و مناعة الشباب
اتمنى انكم تحاولون تنظيم هذا الكم الهائل من الشباب في تنظيم للمطالبة بحقهم في الشغل اكيد لو كانت حركتهم قوية سيستطعون فرض مطالبهم
مودتي

أحمد حشمت يقول...

العيب مش في المحافظ
العيب في الشباب اللي مبقاش
عندهم من الشباب
غير
حَب الشباب

mohamed ghalia يقول...

ياعينى على المدرسين
ايه التحكمات الغريبة دى
!!!!!!!!!!!!!!!

حارة سد يقول...

الأمر أصبح ملتبسا ..مُزج بين الصالح والطالح

الرشوى والفساد والمحسوبية والسلطة كلها مفردات ومرادفات للقذارة

لا عجب مما يقولون ولا استغراب مما يفعلون

الحارة سد

فارس عبدالفتاح يقول...

الفاضلة / صفاء

اتفق معك في كل ما قلتيه جمله وافصيلا ولكن هناك توضيح وليس اختلاف

فهناك فرق كبير بين الاشتراكية التى كان ينادي بها عبدالناصر وبين الاشتراكية الشيوعية التى كان يطبقها الاتحاد السوفيتي

هذه نقطه موضوع بحث لديكم

اشتراكية عبدالناصر ليست اشتراكية شيوعية لكن عبدالناصر عرف الاشتراكية التى كان ينشدها وهي اشتراك الشعب او الجماهير في العمل ولا فرق بين صاحب عمل وبين عامل وان جميع موارد الدول ومقدراتها يحاول ان يوظفوها او يوظفها النظام الحاكم في ادارتها وتوفير فرص العمل للشعب وتامين حاجاته

فالاشتراكية الناصرية غير الاشتراكية الشيوعية اللينينية الماركسية

تكافئ الفرص والعدالة الاجتماعية والحرية السياسية

هم من اسس القومية العربية

اللؤلؤة يقول...

الأخت صفاء
السلام عليكم
الحكومة عايزة تأكل الناس شعارات
وتشربهم شعارات يقوم الراجل الصبح يسبح شاعر من كتر أكل الشعارات
دمت بكل الخير

أنا حر يقول...

والله فكرة عبقرية بس هو في حاجة اهم من القضاء على مشكلة البطالة لسا ما اتكلمش فيها
ان بعد السنة الشباب ده مش هيتعين ولا حاجة وبالتالي هينتحروا كلهم وبكده يبقى اتخلص من البطالة والشباب
هو ده الفكر الجديد انهم يكفرونا
حسبي الله ونعم الوكيل
تحياتي

فتافيت يقول...

يا خبر اسود
يا خبر مهمبب
يا خبر طييييييييييييين

ده بجد ده يا نهاااااار كحلي
2 جنيه في الشهر يا مرك يا فتافيت يا سنة هباب مش معدية

ربنا ينتقم من المفتري

يعني اهلي يطلع يربنتين اهلهم علشان يربوني وفي الاخر اروح امضي اني قبضت اتنين جنيه

يارب انا مش هاتكلم بس انت عارف وحاسس .. حسبي الله ونعم الوكيل

روميو ( كله في الكلتش) يقول...

حسبى الله ونعم الوكيــــــــــــل

زى اخينا المحافظ بتاع قنا اللى خلاااها تخرب بعد ما مشى عادل لبيب

حسبى الله ونعم الوكيل فى الحكومة
وفى كل واحد مش بيراعى ربنا فينا


اخوك فالله روميو

انتظر زيارة حضرتك

eyad يقول...

سبحان الله

اذا فقد تم تحديد اسعار الشباب

وكلو بيرخص نفسو علي امل انو يحصل علي فرصة التعين

حسبي الله ونعم الوكيل في امة لم تجعل اعتبار لامال اجيال

دمتي بخير مع وافر الاحترام والتقدير
تقبلي مروري

صفــــــاء يقول...

مصعب صلاح
*********
الالوان بقت بمبى وأخضر ونبيتى وعلى كل لون يا مسؤلين الحكومه
وهو حد دافع حاجه من جيبه ؟
-----
مفيش أى نبرة يأس فى كلامى خالص
الاعتراف بالواقع مش يأس بالعكس دى واقعيه تخليك تشوف صح ولو لسه فيه أمل تصلح
من ناحيه الاستعجال فمفيش اطول من صبرنا يا مثقف

صفــــــاء يقول...

شريف باشا
*********
الله يبارك فى حضرتك يا عمدة
أمال انت كنت فاكر أيه
البلد صاحيه والشغل فيها على الأرصفه بس النفس
والشباب الجاحد اللى رافض الفرص الذهبيه
ومن واقع الحال كدة يبقى مفيش غيث الأيام دى وهنكتفى بأنها بتندى على دماغنا

صفــــــاء يقول...

دكتور محمد
*********
وانت هتساوى بين كفار غزوة بدر وعبدة الكرسى بتوع أيامنا دى ؟
على الاقل الكفار كانو عارفين انهم مشركين
لكن المسؤلين عندنا قمه الدين عندهم انهم يطلعو دينا أحنا

صفــــــاء يقول...

مصطفى ريان
**********
فى الحاله دى أوعى تقول الكلمه اللى انا عارفه انك هتقولها يا درش
بلااااش

الله يبارك فيك وعقبال ما أفرح فى جوازك كدة يا مبدع

صفــــــاء يقول...

فارس عبد الفتاح
****************
وهو فيه بعد كدة اعجاز ؟
دى قمه الاعجاز الأرضى انه يحقق دة
وقمه الاعجاز الغبائى ان أحنا نمشى وراة

صفــــــاء يقول...

life
****
طيب يا بطه وانا كنت هجيب الفكر الواعى الجديد اللى عندك دة منين عشان اوصل للحل المعجزة اللى انت ذكرتيه دة
انت باين عليكى من كوادر جيل المستقبل
وهيمسكوكى أمانه ناصبه الجرجير فى الحزب
وهتبشبشب معاكى خالص وتبقى ورور
لكن أمانه عليكى يا مرمر تسيبى حكايه تعهدات عربيات الكارو دى ليا
ليا فيها سبوبه حلوة أوى هبقى أفوتلك منها قرشين

صفــــــاء يقول...

حسن حنفى
*********
لا هم ولا حاجه يا راجل
فين روح الفكاهه عندك

صفــــــاء يقول...

ايناس حليم
**********
ولا تنذهلى ولا حاجه
امال لو شوفتى بنت جامعيه متعلمه
محترمه واقفه قدام الكشف وبتمضى على كشف الرواتب وتمد أيدها تاخد 1 جنيه
بتاخد جنيه مصرى واحد فقط لا غير عن أدائها حصه واحدة فى الشهر كـ عمل لها
وأنا لله وان أليه راجعون

صفــــــاء يقول...

اللؤلؤة
*******
بمبى والا فستقى
شعارات براقه فين دى ؟
بتبرق فى أنهى أتجاه
يمكن بتبرق فى وشنا عشان كدة مش شايفين حاجه ؟

صفــــــاء يقول...

براغل
*****
أولا ولا شجاعه مطلقه ولا حاجه دى قصه واقعيه من واقع أحوال مدريه تربيه وتعليم محافظه المنيا مع تحيات السيد المحافظ
وانا روحت أزور المدونه بتاعه حضرتك بس لقيتها لسه تحت الانشاء
أتمنى فى الزيارة الجايه ألقى التشطيبات النهائيه تمت

صفــــــاء يقول...

اسافو
******
ياصديقى بجاحه أو تبجح
المهم انه عمله وأحنا نفذناة
وراح عدد ضخم من الشباب والشابات أشتغلو طيله عام دراسى كامل عشان يقبضو جوز جنيهات أخر الشهر
لكن وقفات وأحتجاجات والكلام دة
الشر برا وبعيد متفولش فى وشنا
احنا مش بتوع الكلام بتاع المطالبه بالحقوق والحاجات دى

صفــــــاء يقول...

احمد حشمت
*********
فى الحاله دى ننصح الشباب انهم يستخدمو كريم فير اند لافلى
اهو من ناحيه يزيل حب الشباب ومن الناحيه التانيه يفتح لون بشرتهم

صفــــــاء يقول...

محمد غاليه
*********
دول مش مدرسين اوى يعنى
تقدر تقول عليهم صبي مدرس

صفــــــاء يقول...

حارة سد
********
عارف بقى لو مزجت كل اللى انت قولت عليه تحت
وحطيت فوقه كريم شانتيه

هتبقى تورته بس مدودة

صفــــــاء يقول...

انا حر
*******
أشك يا ابو حميد فى مسئله الأنتحار دى
حكم الناس بقت ذاكرتها تعبانه شويه
وعلى ما تيجى السنه الجايه هيكون المحافظ دة او اللى بعد منه طلع بأفتكاسه جديدة يشغل بيها الناس وكل سنه وانت طيب

صفــــــاء يقول...

فتافيت
******
أيو والنبى يا اختى ورحمه الميتين والصاحيين ان فيه كمان بنات محترمات متعلمات بتمضى أخر الشهر وتمد أيدها تاخد جنيه واحد
قسماً بالله دة شافو أبويا فى الأدارة التعليميه رؤى العين
اما من ناحيه ان احنا وقعتنا سودة
فدة أكييييد
بس متقاطعيش

صفــــــاء يقول...

روميو
******
قد عرفنا انك صعيدى شقيق
وطبعا عرفنا اللى عمله عادل لبيب فى قنا
واللى جرى ليها بعد منه
وبعدين يراعو ربنا فينا ليه
أذا كنا احنا أصلا مش بنراعى ربنا فى حاجه راح ربنا سلط علينا من لا يخافه ولا يرحمنا

صفــــــاء يقول...

eyad
*****
والله يا افندم هذا ما حصل واللى مش مصدق يسئل أى مدرس فى منطقه المنيا التعليميه
وانت كمان هتشوف عجب اكتر من كدة
وهتشوف شباب كمان مقبضوش حتى الشهر اللى هما اشتغلوة بل جمعو كل الشهور على بعض عشان يقبضوهم اخر السنه 36 جنيه متجمع مستحقاتهم الماليه لعمل سنه دراسيه كامله

بسنت يقول...

ههههههه
لا يا صفاء وكمان جاله شكر من رؤساءه اللى مش عارفه هما اصحابه القدام لما كان مساعد وزير الداخليه الهمام
ولا رئيس الوزراء
قال ايه علشان الوحيد اللى قدر يعمل فائض للتنميه فى المحافظه
زى صندوق التحسين فى الهيئات الحكوميه

هقول ايه بس يا صفاء
محافظ محافظتنا ما ورد على حد

وتعيش الحكومه طبعا

فارس عبدالفتاح يقول...

قبل كل شيء وبعد أي شيء

أنا فعلا معجب بردودك التي يشف منها انك على اطلاع معقول قلما وجد ،،

لكن مع الأسف قراءتك من اتجاه واحد مضاد لهذه الأفكار سواء كنت أنا معتقد فيها أو لا اعتقد بها

أقول انك تقرئين في اتجاه واحد وتقرئين لمن ينتقدون هذه الفكر وهو الفكر الاشتراكي سواء اقتصاديا أو عقائديا



الفاضلة / صفاء

الاشتراكية والشيوعية هي تطور الديالتيك في الفكر الماركسي

طبعاً موضوع طويل فعلاً ولكن ليس جدلي لأنه معروف لمن اطلع عله ولكن اختصره في بعض الجمل

يعتقد كارل ماركس وانجلز واضعي الفكر الماركسي أن المادية التاريخية من جدلية الديالتيك .

وقد ثبت فشلهم فكريا ً ، وقام بالرد على هذه النظرية الكثير ولقد قرأت فيها بما يكفي .

المهم أن الاشتراكية هي نتاج المادية التاريخية وهي صراع الطبقات من أجل خلق مجتمع لا يحتكر احد فيه شيء وتطورت هذه النظرية على يد لنيين لتصير إلى آخرها في الشيوعية .

وتبنى هذه النظرية على جدلية الديالتيك الذي بناها كارل ماركس وأنجلز على فلسفة الفيلسوف الألماني الأصل هيجل في تصارع الضاد داخل المادة لتخلق شيء جديد يتصارع مع نفسه ليخلق شيء أخر مختلف ومتطور عن ما قبله وهكذا دوليك ( النفي ونفي النفي والأطروحة ... وهكذا )


وقد اخذ هيجل هذه النظرية الفلسفية عن فيلسوف يوناني اسمه هرقليط ثم قام بتحديثها وتطوريها ثم اعتمد عليها كارل ماركس وأنجلز في فكرهم الاشتراكي

وقد انتهوا أن هذه النظرية التي تقول بتطور المادة داخل نفسها بسبب صراع داخلها بفعل ذاتي ليس لإنسان تدخل فيها

فان الطبقات الاجتماعية تتصارع بنفس هذه الطريقة والأفكار الاجتماعية كذلك .

ثم يحصل التطور المنشود الذي يصل إلى قمة النضوج والبلوغ في طور الاشتراكية

فأتى لنيين ليعدل على هذه النظرية ويقول أن المادة موجودة بمعزل عن فكر الإنسان سواء عقلها أو لم يعقلها فهي موجودة وان المادة هي أصل الأشياء وان الفكر البشري هو نتاج المادة وان العقل هو نوع راقي من المادة

وان الشيوعية هي طور جديد يلي الاشتراكية وأخير ليدخل المجتمع البشرية في عهد تطور جديد هو الرفاه والسعادة للبشرية جمعاً

وان عبد الناصر رفض الشيوعية ليس من منطق العقيدة أو الدين فقط ...إنما أيضاً رفضها كمبدأ سياسي لأنه يفرض على الشعوب كلها أن تتخلى عن سيادتها وفكرها الخاص بها لتسبح في فلك النظرية الشيوعية وهذا ما كان عبد الناصر يرفضه سياسياً مع الرأسمالية الغربية فكيف له أن يقبل هذا مع الشيوعية الماركسية لأنه كان يؤمن بحق الشعوب في تحديد مصيرها بحرية دون أي ضغوط أو تأثير .

أما من الناحية الدينية فقد كتب الكثير في رد فكر الديالتيك والمادية التاريخية من منطلق إسلامي

ولقد كتب الأستاذ الدكتور / محمد سعيد رمضان البوطي " وهو أستاذ في العلوم الإسلامية كتاب اسمه " نقض أوهام ( الديالتيك ) وهو ارقي وإبلاغ واصح ما كتب في هذا الموضوع

ولكن ما جعلن اقرأ هذه الكتاب وأمن بصحته أن الأستاذ الدكتور / محمد سعيد رمضان البوطي وهو سوري الجنسية وعلم من أعلام الأمة العربية والإسلامية وعالم في العلوم الشرعية .

انه رد على هذه النظرية .. الفكر بالفكر .. وبالحجة بالحجة .. والمنطق بالمنطق ... دون الدخول في الدين ولم يدخل الدين الإسلامي في نقض هذه النظرية بل حاججها بالعقل والمنطق الذي يعتمد عليه الغرب دون الدخول في نظرة الدين لهذه النظرية.. مما أضفى عليها من العقلانية والمنطق ما لا يوصف في شرح ونقض هذه النظرية من أساسها إلى قمتها بالفكر المضاد والعقل والدليل دون إدخال الدين في كل شاردة وواردة ... وهذا ما يفتقده مفكرينا ومثقفينا الآن إلا القليل.. وهناك صعوبة كبيرة في فهم هذه النظرية وفلسفتها إذا لم يكن القارئ غير ملم ببعض جوانبها الفلسفية ،، حتى كتاب الأستاذ الدكتور / البوطي ، فيه من الصعوبات الكثير في شرحها



تقبلي خالص التحية والاحترام

فارس عبدالفتاح يقول...

عفواً مع الاحترام

يرجى الاطلاع على الفرق بين البرجوازية الصغيرة والملكية العامة .

http://ar.wikipedia.org/wiki/%D8%B4%D9%8A%D9%88%D8%B9%D9%8A%D8%A9

علي جاد يقول...

أهلا انتى كنتى فين والله نورتى
أنا أشكر الصدفة الجميلة اللى وقعتنى فى مدونتك أنا يا ستى باختصار شبهك خالص فى الكلام عن حال البلد واللى بيحصل فيها .. لو عايزة تعفينى أكتر خدى لفة فى مدونتى وانت تعرفى .. أنا فى انتظار رأيك ضرورى
لو سمحتى بسرعة

امـنــيــتــي يقول...

ربنا يتمملك علي خير
اتمني لك زياره مدونه
وشكرا لك

شجر الليمون يقول...

السلام عليكم ورحمة الله
خليكي يا صديقتي في يومياتك اللي بتكتبيها وسيبك من الهم المجد المزعوم لذلك الوطن

تحياتي وشكري الخاص لقلمك

dina يقول...

احم احم....دا مش محافظنا بس...شكله سلو البلد يا بنتى ولا ايه....شوفى و الله و ما ليكى عليا يمين انا مش مستوعبة ان ممكن يكون دا حصل فعلا
نقول ايه
حسبى الله و نعم الوكييييييييييييييييييل