الاثنين، 4 مايو 2009

مكافحه الأرهاب


حمله طبيه وعسكريه تمت اليوم على سطوح بيتنا


مكونه من أطباء بيطريين وعساكر أمن مركزى


شعبه مكافحه كتاكيت


قامت بمحاصرة عشه الفراخ بتاعه امى


والقبض على كل فرخه وديك


وكتكوت ودكر بط


يقومون بالأخلال بالأمن العام


وزعزعه أستقرار مصر والسلم الأهلى بها


أو يهددون الأمن القومى عن طريق نشر الأوبه


من فوق سطح بيتنا لسطوح الجيران


وبعد التحقيق معاهم فرخه فرخه ووزة وزة

وعنزة حامل كانت مندسه فى الوسط


ثبت خلوهم من الأمراض المعديه والفيروسات الوبائيه الوافدة


وقام البيه الظابط صاحب الحمله بتحرير محضر يؤكد خلو بيتنا


من أى طائر مطلوب القبض عليه

وتم رفعهم من قوائم منع السفر وترقب الوصول


وأثبت أن فراخنا أو فراخ امى يعنى مطابقه لكل المواصفات القياسيه


وهذة شهادة منهم بذلك


بس الحاجه الغريبه بقى هى طريقتهم العنيفه فى الطرق على ابواب البيوت


أو حتى أقتحامها وكأن الفراخ عامله مؤتمر للمافيا جوة

وعاوزين يقبضو عليها متلبسه


والأغرب هو رفض الأهالى فتح باب بيتهم وأنكارهم انهم عندهم طيور


وكأنهم مجموعه من الخواجات ميعرفوش الحاجات دى


مع أننا صعايدة وفلاحين


اما الشئ اللى مقدرتش أفهمه فعلا


ليه الامن كان مسلح بالعصى المكهربه


وهل دى كانت لينا أو للفراخ اللعينه التابعه للتنظيمات الأرهابيه المسلحه ؟

.

هناك 31 تعليقًا:

سلوى يقول...

هههههههههههههه

الفراخ بتاعتكم طلعت في حالها ومش تبع أي تنظيم :))

العصيان المكهربه دي أكيد مش للناس خالص
بلاش سوء ظن :))
دي للتجمعات الطيوريه الإرهابيه

د. ياسر عمر عبد الفتاح يقول...

طيب الحمد له إنكم لحقتوا تخبوا فروج الظاهري , وديك بن لادن

القاعدة كانت هتفقد أحد أهم (أجنحتها) المسلحة بالصعيد.

طبنينا علي صحة القادة والزعماء .

وحي القلم يقول...

السلام عليكم
حلو الاسلوب ساخر وجميل
بس انت متأكده ان الفراخ مش تبع اسامة بن لادن ولا مصعب الزرقاوي ولا إخوان
عموما احنا بنسعى لاستقرار الامن الثومي
تقبلي مروي

صفــــاء يقول...

سلوى
*****
لا الحمد لله الفراخ بتاعتنا طلعت فى السليم
وامى هتصدر قريب بيان يؤكد ان فراخها غير مسؤله عن أى تفجير

صفــــاء يقول...

د. ياسر عبد الفتاح
******************
القادة بألف خير
والبيض مستقر
والكتاكيت فى أمن
والدكتور الظواهرى هيجيى يطعمهم بنفسه
وكله الأ الاجنحه المسلحه
لكن ولا ريشه منهم أعلنت مسؤليتها عن أى هجوم وبائى والحمد لله

صفــــاء يقول...

مصعب صلاح
*********
كما سبق وأعلنت
أمى بصدد الأعداد لمؤتمر صحفى تعلن فيه خلو السطح من أسلحه الدمار الشامل
او أى أسلحه جرثوميه او بيولوجيا
وأن الفراخ بتاعتنا أعلنت توبتها أمام البيه ضابط الحمله

مصطفى ريان يقول...

اكيد جالهم اخبارية ان فراخكو شغالة مع بن لادن
هههههههه
تحياتى لك

Kiara يقول...

ليه الامن كان مسلح بالعصى المكهربه


وهل دى كانت لينا أو للفراخ اللعينه التابعه للتنظيمات الأرهابيه المسلحه ؟

.
**********

هههههههههههه هو في الغالب ل.....

للفراخ تبحا :)

ادم المصرى يقول...

انا بحمد ربنا انهم مش مسكو اى فراخ تبع حزب نصر الله على صطح بكو اصلهم مسكو شويه فراخ على ديوك فى رفح الغريبه واتحكم عليهم بل دبح او الاكل

صفــــاء يقول...

مصطفى ريان
***********
أبدا والله يا اخويا فراخنا ولا تعرف المدعو بن لادن ولا ليها دخل بيه
بس هى بعيد عنك وعن السامعين كانت متهمه أنها بتنشر الأرهاب عن طريق الخطر البيلوجى المتمثل فى أنفلونزا الطيوووور

صفــــاء يقول...

كيارا
******
هلا بقمر المدونات
وحياتك يا أوختشى زى ما بقولك كدة
عصى مكهربه
بس الحمد لله طلعت فراخنا برائه ولم يضطرو للتعامل معها او معنا بالكهربا

صفــــاء يقول...

أدم المصرى
**********
يا جماعه للمرة المليون
فراخنا لا دخل لها بالمد الشيعى
ولا بالطائفيه المذهبيه
كما وأن أمى هتصدر بيان لاحق تنفى فيه علاقه الكتاكيت بتاعتها بالنظام الأيرانى أو تصدير الثورة

Kiara يقول...

انتي اللي قمر المدونات

كويس ان افراخ براءه

والا كان زماناها اتشوووووت وقالت كوكوكوكووووووووووووووووووو

mostafa rayan يقول...
أزال المؤلف هذا التعليق.
mostafa rayan يقول...

خطر بيلوجي !
ايه دةانت بتجيبى الكلام دة منين ؟!
انت تبع اي خلية ؟واي فصيل سياسي ؟
واي توجه ايدلوجى ؟
اعترفى يا صفاء الانكار مش هينفعك

إيناس حليم يقول...

هههههههههه
جامدة :)
طاب الاستاذ شعبولا ومدام انتصار مجوش؟
كانو عملو احلى شغل والله :)
عموما الحمد لله ان الفراخ طلعت براءة يا صافي.. بس أنا مش صعبان عليا غير الفرخة الحامل دي اكيد باضت من الخضة
ههههههههه

تحياتي يا جميلة

غير معرف يقول...

الف مبروك ان كل شئ كان صحيحا معافى حتى الزغاليل

وأن الأمن العام هو فى الواقع الفزع العام ومنه العصى الكهربية وخلافه

تحياتى للجمهور كله .. فرخة فرخة وديك ديك ووزة وزة الى ان تواتينى الفرصة لاصافحهم يدا بيد فى الحملة الانتخابية القادمة ان شاء الله

عمدة كفر البلوجرز

assafo anaroze يقول...

صفاء
يسعد مساك
هههههههههههه
دول عملوا كده مع الفراخ امال حيعملوا ايه مع البشر
حملهم للعصي و الهروات بيدل على ان الامن عموما في بلداننا له ثقافة امنية محضة و يؤكد دائما ان المقاربة الامنية و العسكرية هي الحل الناجع في كل الامور حتى و ان كان مع الفراخ
مودتي

mohamed ghalia يقول...

ايون ده نوع من مكافحة الإرهاب ههههههههههههههههههههه

فارس عبدالفتاح يقول...

اههههههاهههههههههههههاا

طبعا الطرق العنيف والعصيان المكهربة دي كلها من ثقافة ( الصدمة والرعب ) التى تنتهجها امريكا ضد العرب او ضد المسلمين او كل من يعارضها من دول العالم الثالث التى تعتنق الاستقلالية والتصدي للسياسة الاميركية

فانتهجها النظام المصري في جهاز الداخلية وامن الدولة والمؤسسات الامنية جمعاً داخل مصر

طبعا كان لكم ولينا ولكل الشعب مش للفراخ بس


اما عن الناس الذين ينكرون ويعتقدون انهم خوجات فهذا ما يعاني منه الشعب المصري الازدواجية والتخبط وهذا مرض نفسي عام لدى الشعب المصري

يحاول كل فرد في الشعب المصري ان يقنعك انه من طبقة اجتماعية خاصة تختلف عن الاخرين

وهذا نوع من الامراض النفسية التى اصابت المجتمع المصري

كان الزعيم عبدالناصر الله يرحمه يحاول ان يقضي على الطبقات في مصر وينهض بالمجتمع ككل لكن مع الاسف لم يكتمل المشروع


وكان المجتمع المصري في الخمسينات والستينات يفتخر افراد المجتمع المصري بانهم مواطنين وليس مواطنين فقط بل انه مواطنين من فئة العمال او من فئة الفلاحين او اي فئة من فئات قوى الشعب العاملة وكان شرف له ويفتخر بهذا

الان يريد الفرد المصري ان يثبت انه منحدر من احد الطبقات الارستقراطية ولكن جار عليه الزمن


اهههههههههااههههههههههااهه

اسلوب حقير وقذر وانا اسف على استخدام هذه العبارات

لكن فعلا هذا ما يعانية الشعب المصري الا المخلصين من ابنائه

لماذا لا يقول الانسان انا انحدر من ابناء هذا الوطن الذين يدفعون الثمن في الحرب وفي السلام لهذا الوطن ولا يحاول ان يستعرض اصوله الطبقية هذا عوده الى قرون سابقة متخلفة وليس شيء ايجابي او شيء مفخرة للفرد المصري ان يكون في هذه الازدواجية


اسف على الاطالة

doctor mohamad يقول...

‏> ابتسالة عريضة<‏ .. جميل ، جميل أسلوبك الساخر .. كوميديا بدون إسفاف .. و لها معنى و فكرتها واضحة .. بجد جميلة .. أما العصيان المكهربة .. يستخدمونها عادة لمنع العصيان المدنى بكافة أنواعه .. خصوصا الداجن منه. >إبتسامة أعرض من سابقتها<

حسن حنفى يقول...

افرض يعني الفراخ حاولت المقاومه

او الهروب او حاولت انها تضر الظباط

لازم يأمنوا نفسهم ضد اي فرخه متشرده

:d

صفــــاء يقول...

كيارا
******
ربنا يخليكى يا جميله
فعلا كويس جدا ان فراخنا طلعت من القضيه دى بشرفها ولم تتهم بالخيانه العظمى ونقل الأمراض الى شعب مصر الأبى
لكن لو كانت اتشوت برضه وكلناها كانت هتقدم للوطن خدمه أكبر
بدل عشوة الجبنه والفووول

صفــــاء يقول...

مصطفى ريان
***********
لالالا مش قصدى خطر بيولوجى من بتوع أسلحه الدمار الشامل والكلام دة
قصدى يعنى ان فراخنا طلعت بريئه من الحرب الجرثوميه بتاعه الانفلونزا
فيه ايه يا مصطفى انت مش لاقى مصيبه تلبسهالى بتفصلى واحدة والا ايه ؟

صفــــاء يقول...

إيناس حليم
***********
هلا بالغاليه
لا يافندم شعبولا بيه مجاش لكن عندنا عبد الباسط حمودة
شكرا لأمنياتك الطيبه لفراخ امى
واللى كانت حامل مش فرخه يا قلبى
دى معزة ... وكانت مندسه بين الفراخ بطريق الغلط
بس برضه هى كمان طلعت برائه من أنفلونزا المعيز

صفــــاء يقول...

شريف بيه
*********
أهىىى العمدة كلاته هينى
يا دى الهنا يا اولاد
وهو احنا فى ديك الساعه لما جنابك تشرفنا يا عمدة ؟
والكفر كلاته بخير وبيبوس أيديك هو ومعيزة وبطه
وبيقولك لا تخشى على أمن الوطن منهم فهم مواشى على درجه مواطن ولهم وعى يمنعهم من ان يكونو أداة فى يد قوى أجنبيه معاديه سواء فيروسيا او جرثوميا
والزغاليل مش تبع الحمله يا ريس
وكل حمله وانت بألف خير

صفــــاء يقول...

اسافو
*****
ويسعد مساك ايضا
وهو يعنى فراخنا غير فراخكو ؟
عاوز تقولى ان الفراخ فى المغرب بيعاملو معامله أدميه احسن من معاملتنا هنا فى مصر لفراخنا ؟
يا عزيزى فى الوطن العربى كلنا دواجن
لكن فراخ فراخ بس نعيش ولا نعدم سلقاً فى الحلل

صفــــاء يقول...

محمد غاليا
**********
هلا محمد
مكافحه أرهاب ... مكافحه بيض
كله محصل بعضه

صفــــاء يقول...

فارس عبد الفتاح
****************
بيان من حركه فوق السطوح التحرريه
القيادة العامه بقيادة أمى
تؤكد الحركه تضامنها الكلى والفعلى مع أمن الوطن
وترفض رفضاً باتا أى أخلال بأمنه وأمانه
وتأبى ان تكون شريك فى أى مخطط تنظمه أى قوى معاديه لأستغلال أى من فراخها او البط بتاعها
لأصابه مواطنى مصر بالضرر
والأصرار التام على رفعته ومكانته ومسيرتة النهضويه
وأننا مع كل أجراء متبع من قبل أجهزة الدوله المعنيه تراة ضرورياً للقضاء على الميكروب اللعين
ورفض كل طيور العشه للمد الأيرانى الثورى أو التطرف الشيعى
وتؤيد وتبارك الخطوات المتبعه للقضاء على كل ما يهدد أمن مصر الصحى
والله الموفق
أنتهى البيان

بس جمال عبد الناصر ماله ومال فراخ أمى يا بيه ؟
أؤكد لك أنها ملهاش أى دخل بحادث المنشيه ولا كانت ضلع فى أى حركات أنقلابيه او مخططات أرهابيه
ولا دخل لها على الاطلاق بنكسه يونيو
أو حتى خصخصه مصانع الغزل والنسيج
وبيع أرض مفاعل الضبعه

صفــــاء يقول...

دكتور محمد
**********
ألف شكر لذوقك وتعليقك الراقى دة
كتير عليا دة يا دكتور
وان شاء الله مكافئه ليك على الكلمتين الحلوين دول
ليك جوز فراخ بدارة و20 بيضه من أنتاج السطح

صفــــاء يقول...

حسن حنفى
*********
لالالا يا أستاذ حسن
لا أسمح بأى تشويه لسمعه فراخنا او نعتها بالتشرد
فشررر
دى ليها أوضه خمس نجوم فوق السطح وأسلوبها شيك اوى يعنى استحاله تهاجم أى حد حتى لو كان ظابط داخليه