الأربعاء، 15 يوليو 2009

نص كلمه

هذا بعض مما كتبه أحمد رجب

فى باب نص كلمه من 25 سنه فاتت

ويبدو ان البلد لا يمر عليها زمن ولا يحدث بها أى تغيرات

وما قيل من ربع قرن

ينطبق حرفياً عليها الأن

لسنا موهوبين فى التسويق او فى التجارة عموما , ولذلك نحن لا نخطط للأنتاج كما ينبغى . فأنت تجد مثلا سلعاً كثيرة مطلوبه للتصدير ولكن انتاجنا منها قليل جدا . بينما نرى وفرة عظيمه وهائله فى انتاج سلع أخرى غير قابله للتصدير مثل المواليد والقرارات الوزاريه
----------------------------------------------
نحن لا نريد ان نظلم التلفزيون فنكتفى بما يشكو منه الناس من ملل وكأبه . بل يجب ان نقول ما للتلفزيون وما عليه . وقد سمعت من مصدر ثقه ان خبيراً أجنبياً درس برامج التلفزيون عندنا وأنتهى الى انها برامج مثاليه تحمل كل المواصفات الناجحه للبرامج التى تبث للمتخلفين عقلياً
----------------------------------------------
قال الحكيم الاسبرطى : لو كان الوزير الاسبرطى لا يتكلم دائما الا حقاً . ولو كان الوزير الاسبراطى يعرف بعض ما يتكلم عنه لخلت أعمدة الصحف من الكلام
----------------------------------------------
من الواضح ان الكم الهائل من الاحاديث والمواعظ والفتاوى والندوات الدينيه التى تذاع عبر قنوات التلفزيون والاذاعه لا تترك صدى ملموسا فى سلوكياتنا رغم الاقبال الشديد عليها . مع ان الاستماع الى ربعها فقط يكفى ليجعل أخلاقنا عال العال . ما هو السبب ؟ هل تغيرت وظيفه الأذن عندنا فأصبحت الأذن تستخدم فى تعليق الحلقان عند النساء وتعليق النظارات عند الرجل ؟ هل هو تقصير من وزارة الصحه أنها لم تبدأ بعد الحمله القوميه لمكافحه طرش الأذن المصريه ؟؟
----------------------------------------------
الامل مهم جدا فنحن نستمع بالساعات الى علماء الدين عبر الاذاع والتلفزيون . وأملنا قوى فى أن تتغير سلوكياتنا يوماً ونعمل ولو بربع ما يقولون . ونحن نغنى 24 ساعه بحب مصر . وأملنا قوى فى أن نعمل لمصر 60 دقيقه بدلا من 27 . ونحن نؤدى الصلاة ونقتطع من وقت العمل أضعاف ما يستلزمه أداء فرض الله . وأملنا قوى فى أن يعوضنا الله عن وقت العمل الضائع . ونحن نعمل قليلا ونطلب من الله كثيراً . وأملنا قوى فى أن يستجيب الله لمطلبنا المتواضع وهو أن يكون واحد زائد واحد يساوى تسعين . وسبحان القادر على تغير علم الحساب
---------------------------------------------
مجانيه التعليم فى بلادنا تجربه فريدة لا وجود لها فى أى دوله رأسماليه أو أشتراكيه . وقد قام خبراء التعليم من مختلف دول العالم بدراسه مجانيه التعليم عندنا حتى يتجنبو تطبيقها فى بلادهم
---------------------------------------------
تطوير التعليم لن يتحقق إلا بوفرة فى المال تتصاعد مع تعدادنا المتزايد . والدوله مهما فعلت لن تستطيع الانفاق على التعليم كما ينبغى . وهذا ينعكس بوضوح على الخريجين . لكن من حسن الحظ أن الشباب فى بلدنا يتخرج من الجامعه صغير السن بحيث يستطيع أن يبدأ التعليم من جديد فى أى بلد أخر
---------------------------------------------
اذا كنا فى كل مناسبه نفرز هذا الكم الهائل من الأغانى الوطنيه . فمعنى ذلك أننا فى حاله حب محمومه لمصر يدفعنا الى هذا الهذيان . هنيئاً لنا بحب مصر . وهنيئا لمصر بهلوستنا
---------------------------------------------
القواطع الحديديه فى أسفلت 6 أكتوبر أصبحت تشكل مصدراً لهلاك السيارة وألام الراكب . فالقواطع الحديديه تهبد السيارة فوق الارض والسيارة تهبد الراكب فوق المقعد حتى أن البعض يرى أن أفضل مشروع أستثمارى مربح هو فتح ورشه سيارات عند طرف الكوبرى وعيادة عند الطرف الأخر لعلاج البواسير
---------------------------------------------
لا يكفى لكى نحقق نهضه أن نقلع عن هلوسه بحبك يا مصر فى الصبح وفى العصر . بل ينبغى أيضاً أن نكف عن التفاخر بأننا أحفاد أعظم عائلات التاريخ : الفراعنه . فلسنا كأحفاد للفراعنه إلا مجرد أولاد ذوات لا نريد ان نعمل أو ننتج ونحيا على أمجاد الأسرة القديمه . وعيب جدا أن يكون موتانا أكثر نفعا من الاحياء . فأن رمسيس يطوف أمريكا وأوروبا يجلب لنا الدولارات . ومتحف الاسرة فى ميدان التحرير مورد أخر والأقصر مورد ثالث . وطلوع القرافه على خوفو وخفرع ومنقرع مورد رابع . بينما نحن أولاد الذوات نأكل بالدين ونشرب بالدين وحتى المجارى بالدين . ولاد ذوات فسدانين
----------------------------------------------
المصل المضاد لداء الكلب لا يتوافر إلا فى مستشفى الكلب . ومستشفى الكلب يحدد مواعيدة للمصابين بعضه الكلب حتى الساعه الواحدة ظهراً فقط . واذا لم يكن هناك أجراء رسمى سريع لتصحيح هذا الوضع المدهش فإننا نتوجه الى كلاب السكك _ وكلنا ثقه فى وعيها _ بأن تمتنع عن عض الناس بعد الواحدة ظهراً .
---------------------------------------------
اذا كانت الحكومه تريد حقأ رفع المعاناة عنا . فلماذا _ بحق السماء _ تذيع علينا جلسات مجلس الشعب ؟
---------------------------------------------
القاعدة أننا نصرف على الحكومه والحكومه تصرف علينا . وهناك تعاون أكيد فى أن يدعم كل منا الأخر .فالحكومه مثلا تدعم الرغيف الذى ينبغى أن نشتريه بضعف ثمنه . ونحن ندعم الحكومه فنتحمل فرق ركوبها المرسيدس بدلا عما ينبغى أن يركبوة وهو الموتوسيكل
.

هناك 32 تعليقًا:

سلوى يقول...

طيب وانت متوقعه ايه اللي هيتغير

إذا كان الحاكم نفسه
هو هو من زماااااااااااان

يبقى إيه هيتغير

----------------------------------------------
نحن لا نريد ان نظلم التلفزيون فنكتفى بما يشكو منه الناس من ملل وكأبه . بل يجب ان نقول ما للتلفزيون وما عليه . وقد سمعت من مصدر ثقه ان خبيراً أجنبياً درس برامج التلفزيون عندنا وأنتهى الى انها برامج مثاليه تحمل كل المواصفات الناجحه للبرامج التى تبث للمتخلفين عقلياً
---
هههههههههههههه
احمد رجب ده حكايه

أحــوال الهـوي يقول...

يا سلام الاخت سلوي سبقتني بالاجابه

و لان النص كلمه من 25 سنه و انت شكلك كنت في اللفه تسمحي لي اقولك من شاهد علي العصر ان الصحفين بيكتبوا في حياتهم 50 مقال فقط و لتكرار الاخداث يعيدوا صياغتها مرة اخري
و اتحدي لو قرات جريده منذ عشرين سنه بدون ان تعرفي التاريخ سوف تدهشين من تشابه الاحداث و لن تجدي اختلاف الا في الاحداث الفارقه او بعض اسماء المسؤلين

تحياتي

assafo anaroze يقول...

مساء الخير صفاء
الواقع دلوقتي زي الواقع في 25 سنة او اكثر ليه بقا لان نفس السياسات بتتنهج نفس القيادات و نفس الطبقة الحاكمة الفاسدة التي مازالت تتحكم في دواليب الامور
يمكن يكون هناك تغيير لكن اظن الى الاسوء
مودتي

mohamed ghalia يقول...

جميلة المقتطفات دى
البلد غرقت

ادم المصرى يقول...

والله انا الى شيفو ان الموضوع بقه مومل جدا وقديم وجدا ولزم الاسلوب يتغير بقه ويحولو يكون مميزين

الاداره المفرود تتغير

ادم المصرى يقول...

اتفكر ان الاجيال الجديده هيه الحل

على باب الله يقول...

انا متشكر جداً جداً ، لأني بحب أمبولات أحمد رجب اللي دايماً بتكون في العضل دي

فعلاً هي صالحة للإستخدام لحد دلوقتي .. شكلنا مش بنتقدم يا أفندم

حاول تفتكرنى يقول...

عبقرية أحمد رجب أنه يختصر مقال فى سطر ، وهو ككاتب ساخر يكشف السلبيات التي يراها ونشعر نحن بها

ولو تكرر كلامه بعد 25 سنة فهذا يعني شىء واحد أن السلبيات مازالت موجودة أو ان الناس لم تتعلم

وبالطبع بعد ربع قرن ربما أن نصف المستهدفين لم يعدوا يقرأوا ، أو أن نصفهم بدأ تعلم القراءة حديثا

عندما اقرأ كتابة (نص كلمة ) وهي تجميع لما كتب فى عاموده اليومي أجد بحر من الفانتازيا الساخرة فى كوب واحد ولا تجد من يستمع لها


موضوع واختيار موفق

تحياتي

إيناس حليم يقول...

ههههههههههههه
حلو اوي البوست ده يا صفاء
عجبتني اوي بتاعت مجانية التعليم دي :)

أحمد رجب ده عبقري بجد

وحشتني مدونتك يا صفاء
اعذريني على الغيبة دي الشغل مطلع عيني :)

تحياتي

صفــــاء يقول...

سلوى
*****
مش متوقعه حاجه والله
ولا منتظرة
انا بس ألقى نظرة على واقع بقى يصلح لكل زمن فى البلد

صفــــاء يقول...

أحوال الهوى
***********
من 25 سنه مكنتش فى اللفه
وبعدين هو انا حطونى فى اللفه وانت حطوك على عرش مصر ؟
ما كلنا اتلفينا
وطبعا معاك حق فى موضوع المقالات دى
لأن اللى اتكتب من ربع قرن لو شيلت التاريخ من عليه يبقى اخر خبر النهاردة

promise is promise يقول...

جارتى وصديقتى العزيزه

تصدقى فعلا ان الزمن بيتحرك فى البلاد الا عندنا
بالنسبه لحكايه التسوق فاحنا فعلا فاشلين بالتلاته فى الموضوع ده تلاقى فى الشارع اعلان عن فيلم جديد مثلا وليكن اعلان فيلم احمد حلمى هتلاقى الشارع بطوله وعرضه مافهوش غير نفس الاعلان وشارع تانى مافهوش اى حاجه ده على اعتبار ان الناس مش بتمشى غير فى الشارع ده .
اما بالنسبه للتلفزيون فده كلمه تطور مش فى قاموسه خالص من يومين الدش كان بايظ عندنا فقلنا لازم نسمع خطبه الجمعه فشغلنا التلفزيون تصورى انهم لسه بيجيبوا عالم الحيوان وفيلم الساعه 2 ولا مقدمين النشره الاخباريه هماهما من يوم ما عنيا فتحت على الدنيا دى .
المفروض ان الكلام ده من 25 سنه فاتوا طيب نعمل ايه دلوقتى الا على اعتقادى ماكنيش فى صحوه دينيه زى دلوقتى طيب ما بالك دلوقتى والقنوات الدينيه اكتر من الهم على القلب واكتر قنوات نسبه مشاهده برضه ومع ذلك معدل الجرائم والسلوكيات الغير محموده افتكر انها اكتر من 25سنه فاتوا .
هههههههههههههههه المصرى دايما عنده كل عقده وليها سبع تلاف حل تواكل فظيع .
افتكر بعد وصول نتيجه الدبلومات السنه دى الى 48 % ووصول نتيجه المرحله الاولى من الثانويه العامه الى اسواء نتيجه منذ تطبيق نظام السنتين افتكر ان احنا هنلغى التعليم اساسا او هنلغى الوزير .
سمعينى احلى سلام لى ماشربتيش من نيلها طب جربت تغنلها !!!

افتكر ان ما فيش حد بيصرف علينا احنا اللى بنصرف على نفسنا وعلى الحكومه فلتحيا الحكومه ولتحيا جيوب الشعب

اسفه جدا على الاطاله
دمتى بكل خير

على الهامش :
امبارح ركبت قطر مش بيعدى على بلدنا فنزلت المنيا وكملت موصلات افتكرتك كنت هتدور على بيتك انزل اتغداء
ههههههههه
بس قولت اروح بيتى احسن ده عقبال ما ادور عليكى يكون اسبوع عدا

تقبلى مرورى والسلام ختام

صفــــاء يقول...

اسافو
******
روح يا شيخ الله يطمنك
يعنى التغير الوحيد اللى هيحصل هيرجع لورا
طمنتنى
وبعدين الحال يتغير ازاى وكلنا بنرتكب نفس الاخطاء وبنصرف نفس التصرفات الغبيه
هى تقريبا وصلت لحد هنا واتجمدت

صفــــاء يقول...

محمد غاليه
**********
والنبى انت رايق
بتقول البلد غرقت ولا كأنها أتبلت بشويه مايه

صفــــاء يقول...

ادم المصرى
*********
هو الموضوع ممل من زمان
وتقريبا كدة لا بقى فيه فايدة فى اجيال ماضيه ولا اجيال جايه

صفــــاء يقول...

على باب الله
************
كلمات احمد رجب هى السبب الوحيد لشرائى الاخبار لعقد كامل
توقفت عن النظر الى الجريدة يوم أنكمش المكان المحدد له وتوقف لفترات طويله عن الكتابه
ولا يا افندم احنا مش بنتقدم .. احنا محلك واقف

صفــــاء يقول...

حاول تفتكرنى
************
لا السلبيات راحت ولا أحنا اتعلمنا

كتاب نص كلمه عندى وتقريبا من أول طبعاته اللى طبعت فى 91 او 92

كل مرة بقرأه بنفس الاعجاب وبضحك على نفس الفقرات وبتحسر على نفس السلبيات
وأيه الفرق بين اللى لم يقرأ وبين اللى قرأ ومقدرش يعمل حاجه ؟

صفــــاء يقول...

إيناس حليم
***********
صديقتى الجميله والغاليه
انت ولا تعتذرى ولا تتأسفى دة انا كفايه عليا صداقه شخصيه رائعه ورقيقه ومبدعه زيك كدة
وبجد مدونتى بتتشرف بوجودك فيها وبمعرفتك يا قمر
واحمد رجب بيخلينى ماشيه بنظام هم يضحك وهم يبكى

صفــــاء يقول...

الوعد الحق
***********
احلى صديقه وأغلى جارة
تحسى فى بلدنا ان الدنيا واقفه زى فيلم قديم
وحكايه الاعلان دى فشل فشل فشل
طب عارفه تمشى فى الشوارع تحسى السما هتمطر اعلانات وكلها شبه بعض وخاليه من الجمال
التلفزيون بقى متقوليليش
امى بتستنى عالم الحيوان اصلا على القناة الاولى قبل الصلاة
وبقالها على الحكايه دى 30 سنه
من يوم ما اخترعو التلفزيون باين
المذيعين .. أسكتىىىىىىى خلينى ساكته عشان الموضوع دة بالذااات عاملى ارتكاريا
هما هماهم يا اختى ولا كأن البلد فضيت من الخريجين والمواهب الجديدة لا وأيه واللبس يغم النفس والشكل المكرمش يقطع القلب
القنوات الدينيه بقى بقت هييصه ولا حد بيطبق ولا حياة لمن تنادى
التعليم .... مش بعترف بيه فى البلد دى اصلا
الاغانى الوطنيه بقى ولا مشربتش من نيلها ولا مستحمتش فى ترعتها بلاش هم

مفيش اطاله مدونتنا واحنا حريين فيها
وبعدين يا غاليه لما تبقى فى المنيا متفكريش انت تجيى على طول
بس انا مش من المنيا نفسها انا من بنى مزار
بصى أبقى ابعتى على الميل وانا اديك العنوان ورقم التليفون
وربنا معاكى ويوفقك فى التدريب ويقويكى يا قلبى وبلاش تسيبى حكايه الحاله النفسيه دى تأثر عليكى
يالا يا قمر قلبناها مسطبه اهو

مصطفى ريان يقول...

والله الراجل ده بيكتب صح الصح
- زيي بالظبط .. واظن ماحدش عنده اعتراض -
تحياتى ليكي يا صديقتى الغاليه

وحي القلم يقول...

السلام عليكم

مصر اليوم هي مصر الامس هي مصر غدا

لأنها















مصر مبارك

تقبلي مروري

حاول تفتكرنى يقول...

الفرق طبعا المعرفة
ربما تسنح الفرصة ذات يوم للفعل

تحياتي

صفــــاء يقول...

مصطفى ريان
***********
هو بيكتب صح .. بس ناس كتير هى اللى مش بتقرا صح
هههههه وانت كمان بتكتب صح وبتعبر صح
ومحدش يقدر يعترض
تحياتى لك ايضا يا صديقى الأقرب

صفــــاء يقول...

مصعب صلاح
*********
طب مدام الحال مش هيتغير ومصر مبارك هتفضل
يبقى مبروك عليه البلد واحنا لينا رب

صفــــاء يقول...

حاول تفتكرنى
************
ربما تصنع المعرفه فرقاً
والفعل نحن فى أنتظارة

أسماء علي يقول...

فعلا مفيش أي فرق
يعني الجديد أنه لا جديد

يااااااه البلد دي ثابتة بطريقة مثيرة للعجب
ممكن تكون بتتدهور و بس

غير معرف يقول...

سيدتى

فاتك شيئان فى منتهى الاهمية هما من اختراع وابتكار أبناء أرضنا العظيمة

التحنيط .. وهذا من آلاف السنين ..
والمخلل .. وهو الذى يعيش بيننا الى الآن ولايستقيم طعم أى أكل بدونه ..

هل ترين فيما ذكرت انت شيئا بعيدا عن هذه المعالجة التى تهدف الى الحفظ لاطول فترة ممكنة ؟

Unknown يقول...

السلام عليكم
وبدأت حملة ( مين هيفطر أكتر )
هل ستشاركنا وتأخذ الأجر معنا
هيا اذن لنشمر السواعد ولنعلى الهمم
ولنخلص لله النوايا
الم تسمع قول النبى صلى الله علية وسلم ... عن زيد بن خالد الجهني قال : قال صلى الله عليه وسلم : " مَن فطَّر صائماً كان له مثل أجره غير أنه لا ينقص من أجر الصائم شيء "
أدخل على هذا الرابط وشاركنا
http://3amood.blogspot.com/

صفــــاء يقول...

أسماء على
*********
الفرق انهم شالو ألدو حطو شاهين
والثبات أسمه عقبال أملتك أستقراااار
لحد ما غرزنا فى الارض من كتر الاستقرار
بجد شرفتنى الزيارة

صفــــاء يقول...

شريف
******
وفاتك شئ أهم من أبتكار أهل البلد دى
وهى السخريه المبطنه التى تحمل معنى قوى جدااا
فى كبسوله صغيرة جدا يصح معها أننا نسميها أبرة
التحنيط طبعاً حضرتك عارف انه مكنش لعموم الشعب
كان للحكام والكهنه وأبناء الطبقه الراقيه القادرين على الدفع والحصول على الخلود
المخلل دة مع الملح اللى بيسفه باقى الشعب الغلابه
يعنى ناس تاكل الخوخ وناس ترضى بشرابه
المعنى وصل يا عمدة

micheal يقول...

ههههههههههههه..يا نهار أسود..بقي الكلام ده فات عليه ربع قرن..ده احنا قاعدين في متحف كبير كل شيء فيه فاضل مكانه
عجبتني أوي بتاع الوزير الاسبرطي والمواعظ والفتاوي وفرق ركوب المرسيدس
:)
تحياتي

صفــــاء يقول...

مايكل
*******
وما الدنيا الا متحف كبير
اة والله ربع قرن
تخيل ؟
ولو رجعنا لقبل كدة كمان هتلاقى نفس الكلام
وبعد ربع زيه هتلاقيه هو هو
سيبك انت مفيش احسن من الجهل بالقرأة