الثلاثاء، 15 ديسمبر 2009

دستـــــــــــور


انت معمول لك عمل
مكتوب على جلد سمكه وكل ما السمكه تتحرك فى المايه
العمل يغلى فــ دماغك

طب والسمكه دى نيليه والا بحريه ؟
اصل احنا محافظه على النيل فأعتقد انها أكيد سمكه بلطى نيلى
مش معقول تكون بورى أو قشر بياض

العمل اللى معمول لك واحدة بتكرهك رشته على باب بيتكم
يخليه يشوفك قرد

(انا قرد يا ولاد الكلاب ؟ حاااضر)

شكلك متغير خالص وعنيكى زايغه
ومبدوله كأنك مش انت
لا يا خالتى والله انا
لا مش انت ... شوفى حد يقرا لك قرآن
طب مينفعش أقرئة انا لنفسى ؟ واهو برضه اكسب ثواب فيا
لا ... لازم حد يكون فاهم وطيب وربنا بيقبل منه
يعنى انا غبيه وشريرة وربنا مش طايقنى مثلاً ؟
اهو الجدال اللى انت فيه دة بسبب العمل السفلى
الله يا خالتى ... وليه ميكونش علوى
تبص لأمى وتقولها
شوفى شيخ يقرا لبنتك ويشوف ايه نوع العمل اللى معمول لها

بنتك حلوة وأكيد حد من اللى اللهم ما احفظنا غاويها
ومش هيسيب حد يقرب لها

ليه يا طنط ؟ هى عدمت العفاريت الحريمى ومفضلش غيرى ؟
ممكن يكون بيحبك ... او حد مسلطه عليكى يئذيكى
انت مش بتشوفى قطط سودة باصه عليكى والا كلب او اى حاجه
او تكون بتراقبك
وليه يا طنط كل دة ... ما يطلع هو نفسه واهو بالمرة نتبادل الافكار اوحتى يسلينى او نحكى شويه
اللهم ما احفظنا ... انت اتجننتى ؟ ايه اللى انت بتقوليه دة .
وبرضه تبص لأمى :
سامعه كلامها ؟
مفيش حد عاقل يقول كدة روحى وديها لحد بيفهم يفك لها العمل والا يعرف مين عايز يئذيها

بعض من كلام الاهل والجيران وابص انا بقى الاقى كل شويه حد متطوع
(خال_ خاله_ عم_ جارة)
داخل عليا بواحد بيقولى انه الشيخ مين وانه وانه وانه
طيب اتكلو على الله بدل ما افتح دماغ حد يبقى دة برهان دامغ على أصابتى
بالعين او العمل أو الأسياد وان سكت مش هيبطلو الشغلانه دى

وماله ... اهو برضه حاجه اتفرج عليها بدل الملل

هاااا يا مولانا اتفضل
لا انا بعالج بالقرآن
اة برضه وماله
انت لما بتسمعى القرآن بتتوترى والا اعصابك بتتعب ؟
لا
لا ازاى .. اكيد بيحصل لك أعراض
لا يعنى لا ... مش بيحصلى حاجه
طيب لما بتيجى تصلى مفيش حاجه بتمنعك او بتدوخى ؟
اة بدوخ
طيب يبقى فيه اعراض اهو
لا دى مش اعراض ... دة هبوط
ضغطى واطى ولما بسجد بيجينى شويه دوار ... عااااادى

ابتسامه العالم الخبير ببواطن الأمور فى مواجه طفله غريرة تعجز عن رؤيه المخفى
طيب اقعدى جنبى هنا
آن آن آآآآ مش بحب اقعد جنب حد انا
حاضر يا مولانا
يحط ايدة على راسى والتانيه على جبينى ويفضل يقرا ويتمتم
ربع ساعه
...
حاسه بحاجه ؟
(بتلامه) : حاجه ايه ؟
دوخه خنقه حاسه انك حرانه أو بتعرقى
(وانا بطرقع اللبانه ) لا
يحط ايدة تانى و يبدأ فى القرايه
المرة دى ايدة على رقبتى من ورا ووشى قلقت قوى انا كدة
يسئل
انت بتخافى فى الضلمه او بتحسى ان حاجه هتطلع لك ؟
(دة أيه بيت الرعب دة ) لا مبخفش
ابتسامه خطيرة بقى المرة دى
ازاى ... عادى ان حد يخاف من الضلمه او يتخض لو النور قطع عليه
طيب يا مولانا هو ايه اللى المفروض يبقى عادى يعنى ولا يدل على انى ملبوسه ؟
انى اخاف والا مخفش

يا بنتى دى حاجات مينفعش فيها هزار وقرائن للناس
لسه هيحط ايدة تانى ويبدأ قرايه وانا بجد بقى اتوترت
دى مش حكايه عفاريت بقى .. هو المفروض اسيبه لحد ما يوصل لفين بالظبط ؟
وان اعترضت يبقى آآآة دة فيه حاجه فعلا وهى مش طايقه تسمع القرآن
اقوم اقف :
يا سيدنا لا بكره سماع القرآن ولا بخاف من العتمه ولا انى اقعد لوحدى
ولا بشوف حاجات ولا بسمع حد بيكلمنى

طيب فى النهايه يا عم التشخيص أيه
دى مش خالصه ... واللى عليها شداد قوى

(يعنى دة مش واحد بقى دى بقت فرقه صاعقه جيالى من معسكر تحت الأرض)

واكتر من شيخ وأكتر من تشخيص من أول الأعمال والأسحار لحد الأسياد والقرناء

والحـــــــــــــــــــــــــــل

واحدة تطوعت وقالت هو الزار ... مفيش غير الزار

هناك 19 تعليقًا:

Hesham يقول...

والله ياصفاء الموضوع دا يحمل وجهتى نظر فهناك من يؤيد ان الأعمال موجوده بالفعل ويتسندون فى ذلك الى القران الكريم الذى ورد فيه ذلك وهناك من ينفى هذا وستندون ايضا الى القرآن الكريم لان الله سبحانه وتعالى هو المسير للدنيا ومافيها وماعليها

بحر الالوان يقول...

اولا : بما ان السحر مذكور في القران فهو موجود يقينا وحقا مثل الحسد ايضا ...... ولا وجود الشئ لا يعني بالضرورة قدرته علي التاثير سواء بالنفع او الضرر .... اي انني اؤمن بوجوده ولكن لي الحق انا اشك في قدرته علي التاثير

ثانيا : عملا بقوله سبحانه وتعالي ( قل لن يصيبنا الا ما كتب الله لنا ) فذلك يدل بشكل قاطع انه لا قدرة لسحر او لساحر الا بامر الله فهو النافع الضار عز وجل .... لهذا فاللجوء الي الله بالشكر والحمد في السراء وبالصبر في الضراء هو خير الامور

ثالثا : السحر في حد ذاته هو مفهوم غيبي يستعصي علي الانسان ضبطه وتقنينه بل وحتي ادراكه ..... لهذا فهو يختلط احيانا كثيره بكل ماهو مبهم او غامض ..... فيتداخل معه ملامح الموروث الشعبي والاساطير القديمة وصفات العلل الخافية ..... ولكن تلك الموروثات والاساطير نشأت في ازمنه كان الانسان فيها يجهل اكثر مما يعلم , ولكن لايجوز في عصرنا الحالي ان نلجأ لمفاهيم الماضي لتفسير ظواهر الحاضر

رابعا : الانسان كائن منطقي ويعيش علي التبرير .... لهذا فهو دائما ما يستند الي منطق وحجة لتبرير الاشياء حتي ولو كان المنطق وهما والحجة زيفا ..... ولكن من قال ان الحقيقة تنتصر علي الوهم دائما .... فارادة الوهم احيانا كثيرة تكون اقوي من جلاء الحقيقة .

اخيرا وعلي وزن المثل الشعبي طالما الطماع موجود فان النصاب بخير ..... كذلك فطالما ان الوهم موجود فالدجالون ايضا في خير كثير

وشكرا

صفــــاء يقول...

Heshan
*******
الموضوع دة يحمل وجهتى نظر
واحدة ملك والتانيه كتابه :)))
الأعمال المذكورة فى القرآن عن أهل بابل وهاروت و ماروت
" يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ"
مش كل الأعمال ولا كل الأسحار ولا الدنيا سايبه كدة لشويه أونطجيه

نورتنى والله

-----------------
بحرالإلوان
***********
طبعا تعليق حضرتك وافى جدا
لكن زى ما ذكرت من شويه ذكر السحر فى القرآن توقف على فترة معينه لكائنات ذات قدرة معينه
ولا تأثير أطلاقاً لها الأ بأمر الله ولا إيمان بها إلا لكافر
""وَاتَّبَعُوا مَا تَتْلُوا الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولا إِنَّمَا نَحْنُ فِتْنَةٌ فَلا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُمْ بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلا يَنفَعُهُمْ وَلَقَدْ عَلِمُوا لَمَنِ اشْتَرَاهُ مَا لَهُ فِي الآخِرَةِ مِنْ خَلاقٍ وَلَبِئْسَ مَا شَرَوْا بِهِ أَنفُسَهُمْ لَوْ كَانُوا يَعْلَمُون"
إيمانا احنا بقى بالخرافات والخزعبلات ورغبتنا فى ألقاء اللوم أو الخطأ على الجن والعفاريت او حتى على بشر أخرين واتهامهم بالغيرة والحقد والحسد ولحد اللجوء للسحر هو بيكون الحل الأسهل والأقل أحتياجاً للتفكير او التدبر
وبيكون الأسهل منها " سحر عمل أسياد أرواح .... ألخ
رأى حضرتك له كل الاحترام والتقدير ... شرفتنى بالزيارة وأتمنى تكرارها

عمرو جويلى يقول...

السلام عليكم
السحر موجود فى القرآن
وهذه حقيقة لا شك فيها
ولكن فى عالمنا الآن يوجد
الكثير من الدجالين
المشعوذين الذين يحاولون
أن يوهموا الناس بأشياء
غير منطقية
خالص تقديرى

بحر الالوان يقول...

واضح ان الامر التبس علي قليلا .... هل النقاش حول وجود السحر ولا عن مدي تعاطينا كافراد او جماعات مع فكرة السحر او الميتافزيقا عموما ..... لانه وجوده زي ما الكل اجمع ووفقا للقران الحكيم موجود ... اما فكرة تعاطينا مع الوهم او الميتافزيقا عموما فالموضوع ده ليس حكرا علينا كعرب او مصريين بل له مؤيديه ودجاليه في الخارج برضه .... منظرين ودكاترة وفلاسفة كمان .... ومابين الابراج وعلوم التخاطر والتناسخ والتارو ...... الخ في دجالين كتير سواء بيرتدوا عباءة الدين او عباءة العلم .... بس الاكيد ان الانسان عنده ولع بمحاولة اكتشاف المستقبل .... وعنده رغبة انه يكون مستقبل افضل رغم تفاهه الوسائل المتاحة او عدم معقوليتها ..... عنده فضول دائم علي تاكيد ماهو معلوم وتبرير ما هو مجهول ايا كانت الوسيلة خرافة , علم , دين , سياسة ...... الخ , والجميع يسعي لذلك بس كلا حسب وسائله وكلا حسب ثقافته وكلا حسب احتياجه للتاكيد او التبرير .

عموما في مجموعه كتب ممكن تفيدك اذا حبيتي زي كتابات كولن ولسون :
الحاسة السادسة - راسبوتين وسقوط القياصرة - الانسان وقواه الخفية
او انيس منصور :
ارواح واشباح(كتاب رائع ) - لعنة الفراعنة

او كتاب الانسان الحائر بين العلم والخرافة لدكتور عبد المحسن صالح

ملحوظة : اللي فهمته ان حضرتك من الصعيد والمواضيع دي زي ما قريت في مذكرات الابنودي (ايامي الحلوة) شبه مقدسة في جنوب مصر.... حضرتك مستغربة ليه بقي ؟

علي اية حال اعتذر عن الاطالة والازعاج

صفــــاء يقول...

اللؤلؤة
*********
وعليكم السلام
بصفتك من الاشخاص القارئين الجادين جدا
فأكيد حضرتك عارف ان السحر المذكور فى القرآن له ظروف ومواقف شديدة الخصوصيه والتميز
كــ سحر بابل وسحر سيدنا موسى
أما غير ذلك فهو غير موجود ولا يوجد أدنى دليل عليه
والدجل والنصب والاونطه هتلاقيها بالهبل

شرفتنى جدا

----------------------

بحر الألوان
***********
لا يوجد لبس فى الموضوع
الموضوع ببساطه ان السحر المذكور فى القرآن ذو مواصفات ومقاييس شديدة الخصوصيه
زى مثلاً سحر سيدنا موسى والملاحظ ان أعظم السحرة اللى كانو قدامه كما ذكر القرآن كانت كل مهارتهم هى فى الاحتيال والإيهام وليس عن مقدرة حقيقيه
لذلك فحين تيقنو من سحر موسى خروا ساجدين لله
أذا السحر كــ قوة فى القرآن مردود عليه
أما القدرات الخارقه أو ما أصطلح عليه بعلم الميتافيزيقيا فليس له دخل على الأطلاق لا بالسحر المذكور فى القرآن أو ما يعنى به أذى الناس كالضرر والتفريق بين المرء وزوجه
لكنها علوم غير مألوفه او متداوله او متعارف عليها بين عموم الناس
ولم أخص بالذكر نحن كأقوام مؤمنه به دونا عن سوانا بالعكس فبالمقارنه للغرب نحن أقل أعتناقا للبخت والحظ وفتح الاوراق التاروت وكل الخزعبلات دى
شكرا على مجموعه الكتابات اللى حضرتك عرضتها وقرأت منها بالفعل البعض

رداً على الملحوظه : انا من محافظه المنيا ومع كامل احترامى للأبنودى فمذكراته تخص فترة حياته فى الصعيد ودة كان زمن انقرض بكل ما يحتويه ونحن ليس لدينا مواضيع مقدسه او شبه مقدسه حالياً إلا رغيف العيش :)))
وكل ما بعدة رفاهيه حتى الأعمال والعفاريت
ثانياً بقى انا مش مستغربه أو لم أبدى أندهاشى ... انا بس بدون موقف ما ورد فعلى الشخصى عليه بلا أى اندهاش او استغراب لأن دى شبه ثقافه مجتمع وأنكاراها صعب لكنها كما سبق لا تصل لمرحله القداسه
ثالثاً ودة الأهم زورت مدونه حضرتك واعجبت بشدة بالقصه اللى حضرتك كاتبها رغم طولها لكنها لم تفقد ترابطها او تماسكها ولا خطها وسياقها الدرامى الجميل وفكرتها ذات العرض المتميز لكن لم اجد باب التعليقات
شرفتنى جدا بالزيارة والتعقيب والأسف عن الأطاله غير مقبول لأنه لا توجد اى اطاله أو أزعاج لكنه نقاش هادئ وجميل
تحياتى واحترامى لك

المجاهد الصغير يقول...

السلام عليكم
بالطبع السحر موجود
ولكن نتعامل معه بشكل خاطئ
الواقى اذكار الصباح والمساء تقى الانسان من الشرور وتحفظه
لا داعى للافاظ الخارجه تقبلى نصيحتى
شرفنى زياره مدونتك
دمتى فى رعايه الله

بحر الالوان يقول...

مبدئيا انا كنت بهرج في حكاية الملحوظة دي ..... بس بلاش حكاية رغيف العيش دي لان في غيره حاجات تانية كتير ... اهل الجنوب اهل كرم ومبادئ واهل فكر كمان ويكفيني بس العقاد

ثانيا : واضح اني اتنشلت لاني سايب في المدونة 4 قصص , فامعرفش حضرتك تقصدي انهي واحدة فيهم.... بس معاكي حق هما طوال بجد ومتشكر جدا انك تعبتي نفسك في القراية وعلي رايك .... بس دا تقريباالحد المعقول للقصص في حالة الطبع ... لكن علي المدونات تعتبر طويلة فعلا

عموما انا حبيت اوضح مغزي الملحوظة بدل ما تتسبب في ازمة دبلوماسية بين الشمال والجنوب .

وشكرا

صفــــاء يقول...

المجاهد الصغير
***************
ابقى اتعبى نفسك واقرأى التعليقات والردود عليها فيما سبق
ولو مش عاجبك الألفاظ احرمينى من شرف زيارتك

------------------

بحر الألوان
************
لا ولا يهمك مفيش اى أسائه بين قطبى الأمه الشمال والجنوب

القصه الأخيرة عندك رغم غرابه التناول لكنها مبسطه وبتدور فى أطار هادى وخط متماسك جدا
بس نفهم من كدة ان لك كتاب او مجموعه قصصيه مطبوعه او تحت الطبع ؟
عموما فى كل الأحوال اتمنى لك كل خير

حلم بيعافر يقول...

الحاجات دى موجودة بالفعل وخدى كلامى كشاهد عيان على حاجات حصلت فعلا

غير معرف يقول...

طيب جربي الزار :))

الانسان مغرم بالغيبيات .... وعلم الجن مثير له فنسج حوله القصص والاساطير

انا افتكر اني سمعت من الشيخ الشعراوي زمان ان الجن لا يلبس الانسان لانهم مادتين مختلفين .... لكن ممكن يأذيه

بس الغريبه ان كتير من الناس بتقول انها ملبوسه وكان الجن سايب كل حياته ومركز معانا احنا

عموما برضو جربي الزار :D

تحياتي

حاول تفتكرنى يقول...

دائما أذن الضر في يد الله تعالي


موضوعك جذاب جدا قرأته للنهاية ، واعتب عليك خوضك للتجربة من البداية فهذا يعني اقتناعك

تحياتي

صفــــاء يقول...

حلم بيعافر
************
لا انا مش بنكرها
انا بقول لو طلعت حتى من تحت الارض مش هقتنع مثقال ذرة انها قادرة على الإيذاء

---------------------

فتاة من الصعيد
****************
اسكوووتى ماهو انا لسه مكملتش
دة الزار دة له حكايه لوحدة هبقى اقولها بعدين

هو دة ... غرام الانسان بالغيبيات
كمان الجن تقريبا معندهومش جهاز وظيفى ولا بييجى اول الشهر يقبض مرتب يعنى اكل ومرعى وقله صنعه ودة تقريبا اللى مخليه فاضى لنا

شرفتينى يا قمرة

----------------------

حاول تفتكرنى
**************
بل الخير دائما من عند الله ... ولا يضرنا إلا نتاج أعمالنا اما الباقى فهو ما قدر لنا

اشكرك جدا على الاعجاب وأعذرنى على خوض التجربه
لكن الظروف بتكون غريبه والعقليات والأفكار بتكون أغرب
كمان الملل ممكن يدفع الأنسان لأى شئ ... ورغم عدم أقتناعى للحظه واحدة حتى لو عفاريت الارض طلعت واتنططت قصادى
لكنه كان كسر للملل وأرضاء لأشخاص اكرة ان أغضبهم أو أحزنهم أو أتهمهم بالجهل

بحر الالوان يقول...

بس نفهم من كدة ان لك كتاب او مجموعه قصصيه مطبوعه او تحت الطبع ؟
----------------------------

مجموعة تحت الطبع مرة واحدة .... يسمع منك ربنا ... بس عموما انا كنت اقصد اني بكتب حاجة بيسمهوها الاخوة النقاد النوفيلا - الرواية القصيرة او القصة الطويلة - واكيد الشكل دا ما يتناسبش مع قراء المدونات اللي بيحبوا يقروا بسرعة ويعلقوا بسرعه مش عارف ليه ..... بس عموما انا ما بحسبهاش بالمتر ... اهم حاجة زي ما قلتي التناول والتماسك والفكرة علي بعضها .

عشان كده انا فتحت التعليقات بشكل استثنائي لاني ما بحبش اوضح انا اقصد ايه دا.... واحب ان كل واحد يقرا بمفهومه الخاص .... بس شايفك بتقولي غرابة في التناول .... وهاموت واعرف ايه اللي غريب بس ..... فياريت تشرفني برايك لو حبيتي .

ملحوظة علي الماشي بقي

انا هابقي امسح التعليق ده لاحقا ..... لاني خرجت تماما عن نطاق موضوعك .... ودا اكيد من الاثار السلبية للمعلقين امثالي

وكل سنه وانت طيبة بمناسبة العام الهجري الجديد

صفــــاء يقول...

بحر الألوان
************
لالالا بعد الشر عليك من الموت
هاجى فورا اقرأ على رواقه واشرح لك وجهه نظرى

فكرة ان المدونات محدش عايز يقرأ
لا فيه ... وكتير كمان
بس تايهه فى وسط زحمه المجاملات وجمع التعليقات عشان يكسرو الارقام القياسيه

موضوع حذفك للتعليق .... لآ

مدونتى هى صفحتى الشخصيه

يحق لى فيها مناقشه الأصدقاء فى الأراء ووجهات النظر وعن أى موضوع مادمنا لم يخطأ احدانا فى الأخر او يهينه أو يسخر من رأيه

شرفتنى

sal يقول...

تدوينة ممتازة والاكثر امتيازا هو ردودك على التعليقات
اول زيارة لى لهذه المدونة وكانت زيارة محببة للنفس وممتعة
اتمنى لك كل التوفيق

ENG./ELSAYED,PMP يقول...

دى مش خالصه ... واللى عليها شداد قوى

كده اتهرشت انا والاولاد ...روح يا شيخ ...الله يخرب بيتك ... كنا عايزين نشتغل ع البنية ... ده انا كنت لسه هقولها انا محمود ياسين ... والمرحوم محمود المليجى ... عامة يا صفاء يا بنتى ... طالما اتهرشنا كده ... احب اعرفك انى انا الواد الجن اللى مخللى حياتك اخر بتنجان ... ولو متعدلتيش هبعتلك ... جاميكا

صفــــاء يقول...

المهندس سيد
*************
يا معلم بس عيزاك تعرف انك لو المرحوم فريد شوقى وفريد الأطرش مع بعض بجوز عفاريت امريكانى بالمرة وياريت يكون المرحوم كلارك جيبل والمرحوم ريك هادسون وجيتو كلكو مع بعض وجبتو معاكو اتنين كيلو مرحوم كباب ......... دى السهرة هتبقى حلوة اوى عشان ليكو عندى شغلانه هتاكلو من وراها الشهد هسلطكو على حد اعزة قوى ... عفاريت ايه بس دة اعفرت بلد

ENG./ELSAYED,PMP يقول...

وعندك 2 كيلو كباب ... بسلاطتهم ... وبابا غنوجهم ... مع الواد جاميكا ... على صفاء ... والحساب واصل ... عربون عفرتة