الخميس، 21 يناير 2010

كوارث طبيعيه

أيها الأخوة الكرام
سافرت إلى قاهرة المعزّ
ومش زى الصعيدي اللى نزل مصر ... ماسافرتش عشان اشترى العتبه الخضرا طبعا
لأن دى اسماعيل يس سبقنى واشتراها من زمان ... وإن كنت حاطه عينى على شويه ميادين تانيه بس لقطه
نزلت زيارة وفسحه ولقاء بعض الأصدقاء والأهم طبعا عرض الكمبيوتر بتاعى على كبار أخصائيي علاج الأجهزة فى البلد
وصلت الجمعه عند اختى وحاسه طبعا ان تراب الأسفلت كله لزق فيا

شغلى لى يا اختى السخان عشان اخد دوش
الموتور باظ والمايه مش بتوصل غير بعد نص الليل

يعنى ايه ؟ أصلى انا والمايه الفجر حاضر لو عايزة اقابلها ؟
لالا مش للدرجه ... أدخلى نامى وعلى 7 الصبح كدة تقومى تاخدى الدوش
أمرنا لله
الصبح قبل ما أنزل ... عن اذنك هدخل بقى اخد الحمام
معلش يا صفاء بس المايه ضعفت والسخان مش هيسخنها
يعنى أيه ؟ مش ليا نصيب أقابل المايه النهاردة ؟
لا بس انزلى خلصى مشاويرك وأوعدك أما ترجعى تكون كل حاجه بقت تمام
أنزل ايه بس وانا حاسه انى متربه من مشوار امبارح
لالالا خالص انت بس بيتهيألك
نزلت وخلصت مشاويرى بل وأتغديت سمك فى مطعم الفاتورة بتاعته خلت السمك اتحجر فى معدتى قبل ما أحس أنه رجع على قيد الحياة تانى
وراجعه بقى على المغرب ولازم لازم أخد الدوش دة

والله المايه لسه مجاتش بس استنيها شويه على بعد العشا تكون رجعت
لييييه ؟ هى خرجت تتفسح والا حاجه ؟
أستنى لبعد العشا ان المايه تيجى ... أبدااا
أنتو يا بنتى لما تحبو تشربو أو لو أتجننتو وحبيتو تغسلو الهدوم بتعملو ايه
ترد بهدوء .. ولا حاجه بشغل الغساله 3 بعد نص الليل
طب مافيش شويه مايه مخزناهم نسخنهم على البوتاجاز
كل المايه اللى مخزناها غسلت بيها المواعين ومسحت بالباقى
انت هبله يا بت ؟ تحمى المواعين والبلاط وانا مش لاقيه ؟
ماهو انا كنت عامله حسابى على ما ترجعى تكون المايه طلعت
لا حول ولا قوة إلا بالله
وبائت كل محاولات أنتظار المياة بالفشل , لحد تانى يوم الأحد وجنابها لسه ماجاتش
واضطريت أنزل وأقضى شويه مشاوير وبعد المغرب قابلت أصدقائى ميرا ومصطفى ريان وقعدنا على قهوة فى وسط البلد وسلمت على مينا على السريع كدة لأنه كان مشغول ورجعت وكل اللى فى دماغى انى أفتح الدوش تنزل منه مايه سخنه
وتفتكرو لقيت ؟ أبدااااااااا لما كنت هتجنن ... معقول يعنى
طب انا بقى لازم اخد الحمام دة ولو حكم الأمر أخد مايه من التلاجه واسخنها على البوتاجاز وهى بقى تسهر جنب الحنفيه طول الليل لحد ما المايه ترجع من سهرتها
أصل هقولك ... الأنبوبه فضيت ... بس اوعدك الصبح هنغيرها وكمان تكون المايه جات
وقعتكو سودة معايا ... يا بنتى تعبانه ومرهقه ومش هقدر اسهر طول الليل مستنيه المايه المنحرفه بتاعتكم دى اللى مش بتدخل البيوت غير وش الصبح
والنتيجه انى نمت على كنبه الأنتريه مكانى وانا قاعدة مستنيه جنابها زى أى عيله يتيمه مستنيه بابا نويل
واصحى الصبح ...
معلش هى جات بس انت ملحقتهاش

طب لما تيجى سلميلى عليها
لا يا اختى حلال عليكى القعدة فى شارع الصومال دة ( السودان سابقا) وانا هروح عند خالى فى الهرم
(قال يعنى الوضع هناك أحسن )
بس هقول له أيه ؟ ... ازيك يا خالى , أزيك يا مراة خالى , الحمام فاضى ؟ عندكو مايه ؟
وعلى أيه كل الغلب دة ... بنااااقص
دة انا أروح بيتنا ويلعن أبو اللى يطلع من بيتهم

صحيح ... من خرج من دارة أتقل مقدارة

وأركب العربيه وإذ فجأه الأقى المايه .... بس مش فى الحنفيه ولا الدوش لااااااا دى السما بذات نفسها فتحت المخرات على دماغى طول 200 كيلو أخدتهم فى 6 ساعات لأن الطريق غرقان والعربيات بتتزحلق
دخلت بيتنا على قبل العشا ووالمصحف قاعدة فى العربيه بحلم ببخار المياه المتصاعد من المياة المتساقطه من الدش على دماغى
وأول ما عملته أنى جريت على الحمام ... والأقى أيييييه ؟
صــــــــــح ... المايه مقطوعه
يا عااالم ... يا هووو .... مصر كلها غرقانه والناس بتموت من الميه وانا بقالى 3 أيام بدور عليها ومش عارفه أقابلها زيها زى الوزرا وكبار المسؤلين
وانا مصممه لازم اخد الحمام دة ودونه الموت .... وفجأه أضائت الفكرة فى عقلى زى أرشميدس بتاع قوانين الطفو

ابن المحظوظه اللى كان فى بيتهم مايه وعارف يستحمى
هولع الـــوابــــور ... قولتها ولا كأنى جهاد ماسكه العلم وبصرخ وا آسلاماه

تطلع لى اختى التانيه (على فكرة قربت اكره العيال اخواتى دول)
الجاز خلص , أنت مستعجله ليه ؟ .... أستنى شويه دلوقت المايه تيجي
أيه الهدوء والبرود اللى الناس دى فيه ؟
على الساعه 8 كانت اعصابى فلتت وصوتى على ... ودخلو عليا لقونى ماسكه الدوش من زمارة رقبته وبعصر فيها يمكن تنزل مايه
بس الحمد لله ربنا كبير وكرمه واسع ... حضرت المياة وشوفتها بعينى ... آة والله
واشتغل السخان بل وغسلنا كمااان بعد كدة
واعدى قصاد التلفزيون الاقى خبر الأمطار والسيول والمحافظات اللى غرقت وكل اللى جه فى بالى وقتها ... أنى عرفت المايه كانت غايبه ومشغوله عنى ليه

هناك 29 تعليقًا:

بحر الالوان يقول...

هههههههههه.....حلو الكلام لدرجة اني تخيلت اني ممكن الاقيكي بتكتبي البوست اللي الجاي من منابع النيل بحثا عن المياه .

بس مالها بقي المايه الساقعة .... لازم سخنة ياعني ...اهي دي ميزة جديدة تتفوق بيها المرأة الروسية علي المراة المصرية .

بس متفق معاكي ان غياب المياه كارثة بكل المقاييس .... وحضورها المبالغ فيه ايضا كارثة مماثلة ....وسبحان من له الدوام

تحياتي

r يقول...

هههههه
تبتبقى خطيره يا صفاء لما بتكتبى ساخر
المهم استحميتى على خير الحمد لله

وسوء التافهم راح لحاله
ونزلتى القاهره العزيزه ومطرت كمان
بس مطرت هنا كمان وانا صراحه بتفرج على سيول سينا وبسمع ان المطر غزير فى اسوان قلت نفسى فى مطر والحمد له امبارح اخيرا مطرابس مطر جميل

يا ريت تحاولى تنزليها على المعرض واشوفك هناك

ميرا ( وومن ) يقول...

يا خير كل المعاناه دي علشان دش والله مقدرة شعورك


وكتر خيرك انك كنتي قاعدة معانا وبتفكري في المية السخنة

انا لو مكانك كنت اتجنن بجد

نورتي القاهرة ولو اننا كنا عاوزينك تقعدي معانا شوية كمان

مصطفى ريان يقول...

بس وسع يا بنى انت وهو انا اول تعليق هنا عند صديقتى الجميله والعزيزه جدا صفاء
والله انا اللي كنت فرحان قوى بلقائي معاكي في وسط البلد وطبعا مش محتاج اقول زي كل مره انك حد جميل قوي وانافرحان قوي انى اتعرفت عليه
بخصوص حوار المياه دي فده العادي في قاهرتنا العزيزة .. المهم طمنيني عملتى ايه مع الجهاز
كل التحيه والموده لك يا صديقتى العزيزة

غير معرف يقول...

هههههههههههههههههههه

حمد الله ع السلامه

موش ليكي .... للميه :)

تحياتي

sal يقول...

كما سبقنى تعليق سابق
انت هايلة فعلا عندما تكتبين
بهذا الاسلوب الساخر ...
احييك ،،،
دى ممكن تكون زى السيرة الهلالية
بس بادوات واحداث معاصرة...
وممكن تكون زى رواية الطيب صالح
" موسم الهجرة الى الشمال"
بجد اتمنى عليك دوام الكتابة بمثل
هذا الاسلوب فربما نعثر على موهبة
لا تعرف نفسها
اتمنى لك كل توفيق
وحمدا لله على سلامتك وسلامة الميه
ههههه
تحياتى

خواطر شابة يقول...

هههه أضحك الله سنك
الماء نعمة كبيرة نحس بقيمتها عندما نفقدها الحروب القادمة ستكون عليها للاسف
تنقصنا التوعية للحفاظ على هذه الطاقة من الهدر
بالنسبة للامطار هنا في المغرب يدعي الناس عند سقوط الامضار دعوة جميلة وهي الله يجيبها أي الامطار على قد النفع . كفانا الله واياك شر السيول والفيضانات
تحياتي لك

صفــــاء يقول...

بحر الالوان
***********
هو فعلا ماكنش فاضل غير انى اعمل زورق من اعواد البردى واروح ادور على المايه فى منابع النيل الأزرق وتلاقينى بقى فى لقاء عمل مع صامويل وايت بيكر وباقى المستكشفين الكبار وكل دة لييييه ؟
عشان أخد دوش سخن
وعلى فكرة لو كنت شوفت حالتى العصبيه وقتها مكنتش فكرت ابدا تعمل نقاش اختلاف الحضارات بتاع النسوان الروس دة

صفــــاء يقول...

دكتور/ بسنت
*************
والله يا دكتور هو مش مقصود الكتابه بسخريه لكن بتعرض لمواقف غريبه جدا
ولما بنفعل بخرف خالص ومتشوفنيش وقتها ... نص كلامى بيبقى تريقه وتنكيت والنص التانى انفعال ونرفزة
واللى بيكون موجود مش بيعرف يزعل منى او يضحك على كلامى
ان شاء الله لو ربنا أراد أنزل على المعرض ولازم طبعا وقتها اشوفك .. احنا جيران وضمن اتحاد الصعايدة

صفــــاء يقول...

وومن
*****
أسكتى يا ميرا تخيلى لما تبقى قاعدة وبتحلمى بالمايه السخنه
3 ايام وانا أبحث عن المايه لما كنت بكلم نفسى
شكرا ليكى يا قمر على الأستضافه والقعدة الرائعه
سعيدة جدا بصداقتك وبالتعرف على حد مميز زيك

صفــــاء يقول...

مصطفى ريان
************
مش اول تعليق يا مصطفى
اضطريت اعمل اشراف على التعليقات عشان واحد حقير سخيف بيضايقنى بتعليقاته رغم انى طلبت منه كتير جدا يحرمنى من تواجدة او تعليقاته الكريهه
طبعا يا درش مش هقول انا كمان للمرة الالف مدى محبتى لك وسعادتى بوجود إنسان رائع وهادى ورقيق ومحترم زيك فى حياتى
وانتو بقى متعودين على المايه المتدلعه دى ... احنا لا .
الجهاز الحمد لله طلع كويس ومش محتاج اى تصليح .. طلعت حاجه بسيطه يعنى
شكرا على السؤال وعلى الاستضافه واللقاء الرائع والقعدة الممتعه

صفــــاء يقول...

فتاة من الصعيد
****************
حتى انت ؟ دة انا كنت فاكرة انت اكتر واحدة هتتفهم موقفى نظراً لأنك من سكان المنيا وعارفه اننا معندناش مشاكل انقطاع المياة ووصولها للاماكن المرتفعه زى القاهره
عموما ولا يهمنننني خلاص يا هانم .. استحمينا والحمد لله

صفــــاء يقول...

sal
****
والنعمه يا بيه ما قصدى
الكتابه الساخرة تهمه تتم بدون قصد منى تماماً
قصتى انا بقى هتبقى السيرة الحموميه ... نسبه لبنى حمام
اللى كانو وقت ما يحبو ياخدو دوش يفتحو الحنفيه تنزل مايه
وفى حالتى دى هتبقى موسم الهجرة الى الجنوب بحثاً عن منابع مواسير المايه عشان اسئلها انا عملت فيها أيييييه عشان تعاملنى المعامله السيئه دى

صفــــاء يقول...

خواطر شابه
***********
يا ستى أضحك الله سنك وقلبك كمان
طبعا المياة من اكبر نعم الله وضروريات الحياة
لكن أى حروب قادمه للمياة لااااازم تعمل حسابى فى حمومتين فى الجمعه على الاقل طيب حتى الواحد يغسل شعرة ... مش كدة يعنى
مش يقطعو المايه عنى 3 أيام لما خلونى قاعدة قصاد التلفزيون بحقد على ضحايا السيول عشان على الأقل ماتو مستحميين

مصطفى ريان يقول...

معلش بقي يا صفاء انا كنت فاكر ان انا اول تعليق لكن مش مشكله اول من رابع خصوصا انى بعد تعليق ميرا والبنت يعنى مننا وعلينا بس والنبي يا صفاء يا اختى بلاش تفضلى ترفعي فيها كده علشان ماتشوفش نفسها علينا ونعرف نتعامل معاها بعد كده
اما بخصوص الشخص الحقير اللي بيسفل عليكي هنا فمعلش ياما في النت بلاوي وبنشوفها بس طبعا ده وامثاله مجرد حشره حقيرة ندوس عليها برجلنا ولايهمك منه ابدا
بخصوص الكتاب فطبعا انا هنتظر رأيك عنه بكل شغف وبدون مجامله
لك كل التحيه والمحبه يا صديقتى الجميله

غير معرف يقول...

نعيييييييييييييييما

هذا اول شئ .. وهو خبر اهم بكثير من النجاح فى الثانوية العامة وربما الترقية فى العمل

خمس تيام كتير برضو .. لكنه تدريب على الزهد والتقشف تماما كما نفعل فى الحج والعمرة عند الاحرام .. بس حتى فى الاحرام بناخد دوش .. غير أن ذلك بلا ثواب .. لكن الصبر .. أيوه الصبر .. هو بالتأكيد فى ميزان حسناتك

حمدلله عالسلامة

حلم بيعافر يقول...

مؤاااااااااامرة

الميه كانت قاطعة عندى النهاردة انا كمان

هههه الصبر حلو برضه

أحــوال الهـوي يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
انت مش ممكنه يا صفاء
ضحكتيني مع اني ماسك في دور اكتئاب بقالي شهر

من المغامرة المبلوله دي بقيت ارش معطر جو حواليه

حمام العافيه استني لما اغني ليك ياخارجه من باب الحمام
تحياتي

doctor mohamad يقول...

صفاء: قالوا قديما "المايةمابتطلعش العالى" .. ف قصتك خفيفة الظل أدركنا بلا أدنى مجال لشك أن الماية "ف مصر العليا" و يبدو انها مابتنزلش ل"مصر التوحتى" ع وزن السفلى.. نعيما.

mohamed ghalia يقول...

اقول ايه بس
ربنا يعينكم بجد

ENG./ELSAYED,PMP يقول...

مرة المياة كانت قاطعة فى بورسعيد فى سابقة لم تحدث منذ العدوان الثلاثى على مصر ... الموضوع ده خد كتير ... حوالى اسبوع والناس بتملىء مايه م القهاوى اللى المياه فيها ضعيفة اساساً ... المهم ربنا كرمنا والمياه رجعت بورسعيد بعد صرا مرير مع العرق ... إذربمن ... روحت بقى علشان اعوض الايام اللى فاتت ... لأفاجاء بأن المياه موصلتش عندى ... أخماس فى أسداس ... لمدة يومين تانين معتقدا ان الموتور باظ ... وإذربمن وبالصدفة البحتة ... يتفتق فى ذهنى ... وبإفتراض بعض الفرضيات الغير تقليدية ... بأن فيه حد فى الشقة متخلف ( مفيش ف الشقة الا انا ومراتى ومنعم ) قافل المحبس اللى تحت الحوض على راى سمير غانم ... فقفزت مسرعاً نحو هذا المحبس ... وإذا بالمياه ضرب نار يا معلم ... ومن ساعتها وفى اى مشكلة بفكر بطرق غير تقليدية

صفــــاء يقول...

مصطفى ريان
************
يا سيييدى ... بجمله الناس الرخمه
مش مهم بقى
ميرا لازم نصيت لها عشان هى مننا وعلينا
لازم برضه نرفع روحها المعدنيه
إن شاء الله فعلا لك تعليق كامل على مجمل الكتاب وإن شاء الله مش هيتأخر
لك كل الود يا صديقى

صفــــاء يقول...

شريف
******
أنعم الله عليك يا عمدة
والله يا بيه أخد الحمام عندى أهم حتى من دخول مصر كاس العالم او حصولها على مقعد دائم فى مجلس الأمن
بس تأخيرة لا يدخل فى باب التقشف .. دة لا موأخذة يدخل فى باب القشف

لا حرمنا الله من زياراتك الجميله

صفــــاء يقول...

حلم بيعافر
***********
هى تقريبا المياة بتدلل وتتعزز علينا

صفــــاء يقول...

أحوال الهوى
*************
بعد الشر الف بعد الشر عنك من الأكتئاب وإن عيشت انت الدور
الدور كله يعزل
بس والله يا بيه موصلش الأمر إن الريحه تتطلع يعنى
هى حاله وسوسه شويه
والله يعافيك ياخويا

صفــــاء يقول...

دكتور محمد
************
welcome welcome
هل هلالك
فى بلدنا دى ... المايه تمشى على كيف كيفها
اشمعنى هى يعنى
وايه حكايه نعيما دى يا قوم ... هو انا حلقت والا ايه

صفــــاء يقول...

محمد غاليه
************
على ايه ؟

صفــــاء يقول...

باشمهندس أكتئاب الشهير بالسيد أبو العربى
************************
أسبوع ؟ الميه تقطع أسبوع ؟
دة انا مقعدش فى البلد
دة انت تلاقينى واخدة باسبورى وواقفه على باب سفارة اثيوبيا طالبه هجرة لمنابع النيل
بس حوكايه محبس الميه دى والإسقاط على قافل المحبس تقريبا كدة بيدل على أسباب أكتئابك الذى نتمنى ان يكون محدود وليس حاله متفشيه
وربنا يخلى لك الطرق غير التقليديه يا برنس

صفــــاء يقول...

باشمهندس احمد
***************
دة من ذوق حضرتك بس
سعيدة بأعجابك وبشكر حضرتك عليه

والزيارة فورا يافندم