الثلاثاء، 13 أبريل 2010

.
وصلنى على الميل الخاص رساله ظريفه جدا من جوجل جروب بيقول انه وصله الإيميل الخاص بيا فى طلب الأشتراك فى مجموعه جنسيه أو كما قال (أكبر جروب جنسى فى الوطن العربى )
(استلمنا طلبا لانضمام هذا البريد الإلكتروني إلى المجموعة حمل اقوي افلام .... والنقط بقى انتم وخيالكم
الحمدلله بقى عندنا حاجه كبيرة بتضم العرب أهو ... ما علينا

المهم ... وقبل منه وصلنى ميل تانى بيقول انى برضه طلبت الأشتراك فى موقع زواج , أو برضه "أكبر موقع زواج فى العالم الأسلامى" .... طبعا قال يعنى اللى بيعمل كدة بالميل بتاعى قصاد انه يحرجنى بقى وينكد عليا ويجيب لى أكتئاب وهدور الف حوالين نفسى وازاى دة يحصل وأسمى يجيي فى شئ زى كدة ,
بس المشكله إن الإيميل بتاعى خاص فعلا
يعنى مش مشتركه فى منتديات او جروبات أو اى مجموعات بريديه ولا يعرفه على الأطلاق غير الأشخاص المتواجدين عليه , وبما أنهم كلهم من أقرب الأصدقاء
وبما إن اللى كانو موجودين عليه كــ مجرد معارف وتم حذفهم هما برضه مدونين ... ولا يزيد عددهم عن 4 أفراد ... أعتقد كدة إن دائرة البحث ضااااقت قوى
ولو إنى مش ببحث أصلاً وحقيقي مش مهم عندى التصرفات دى وبالفعل لا تمثل أى شئ
لأنها حقيقاً تصرفات هبله قوى

وبما إنى متزوجه من 11 سنه فـ أكيد مش هتجيني صدمه عصبيه من كلمه جنسى
وبما إن كان ليا زوج مدمن مواقع إباحيه فــ بالتأكييييد مش مجموعه جوجل جروب هى اللى هتمثل مأساة ولا هتجيب لى كوابيس فى الليل
يعنى من الآخر كدة ... اللى عايز يعمل حركه وسخه يعملها بمعلمه
من فضلكم بلاش هبل وعبط ولعب عيال
أرجووووكم خلقى ضيق ومرارتى أضيق .... اللى عايز يضايقنى رجاء حااااار يعمل شئ يضايق فعلا
مش موقع زواج او مجموعه جنسيه هى اللى هتجيب لى إنهيار عصبى ولا تعقدنى ولا تضايقنى ولا حتى تستحق إن اتعب نفسى واقعد اكتب الكلمتين دول
ويا أصحاب الحركه العبيطه من فضلكم
إما تعرفو تضايقو صح ... أو تروحو تشتغلو فى حضانه أطفال

هناك 18 تعليقًا:

ميرا ( وومن ) يقول...

هههههههههههههههههههههههه

والله ضحكتيني يا بنت يا وحشة انتي مواقع قليلة الأدب

وكمان مواقع زواج طب يعني عاوزة ايه عاوزة تنحرفي ولا تتسري

يا ام الفراغ يا ربي ربنا يشفي هاقول ايه

سلوى يقول...

ضحكتينى يا صفاء
انا طبعا ع الميل بتاعك :)

فكرتينى بحلقات المصارعه او افلام الاكشن
لما يجى اتنين يضربوا فى بعض
فواحد يضرب يقوم التانى يستفزة ويقوله
ده آخرك ... دى آخر قوتك .. مفيش اقوى من كده

انت بقى عايزة اللي عمل كده يعمل ايه تانى؟

مش كفايه انه شخص من الجبن انه يعمل شئ زى ده وهو متخفي
طيب ما يظهر ويواجه

عموما ربنا يحفظك من شياطين الانس والجن

غير معرف يقول...

اللي يعيش بقا يا صفاء

الواحد موش عارف ليه الناس بقيت وحشه كده .... وبتأذي لمجرد الأذى :(

تحياتي

sal يقول...

والنبى ترجعى تشغلى دماغك
فى تدوينات مفيدة ...وكبرى
وسيبك وارمى ورا ظهرك
.....
من فترة التعليقات راحت
واقمنا العزاء
ان شاء الله دا اخر الاساءات

حفظك الله من كل مكروه

Kiara يقول...

معلش مش تزعلي ياقمرر

في ناس بتحب تضايق غيرها ربنا يبعدنا عنهم

دمتي رقيقه ياكناريتي

هي وظروفها يقول...

ازيك يا صفاء

ههههههههههههههه

يا ست الكل ولا تحطي الكلام ده في دماغك

اكيد الارسال تم عشوائي عن طريق المواقع نفسها لكل اميلات الوطن العربي او اقصد عن طريق اختيار عينه من البريد الالتكتروني

وكونها وصلتك مش دليل اطلاقا ان حد معين بيعمل فيكي مقلب

لا ابدا دي ناس بتفهم كويس واللي بيعمل الحركات دي اغلبهم هاكر اسرائليين من الموساد او من غيره وقصدهمتدمير عقول بلدنا

وارجوكي تحسني الظن باخوانا ومتكبريش الموضوع وتخليه يشغل بالك

صحيح ممكن تبعتيلي لينك الموقع الزباله ده؟؟؟؟
هههههههههههههههههههه

صفــــاء يقول...

ميرا
******
هو تقريبا هتستر على ما انحرف فى الخباثه
أو هنحرف على ما تفرج

----------------

سلوى
*******
لا والله يا اوختشى مش كدة خالص
كل ماهنالك بس انى فعلا خلقى ضيق
وعايزة لما حد يهبب حاجه من فضلهم يعنى يهببوها صح
مش هنعلمهم كل حاجه حتى الغلط

صفــــاء يقول...

فتاة من الصعيد
****************
يووووة دة انا شوفت كتير وشوفت الهند والسند وبلاد تركب الأفيال
ومش مهم الناس تبقى وحشه
المهم لما يعملو غلط يعملو بضمير ... والا هو الضمير انعدم حتى فى الأذى ؟

------------------

sal
****
والنبى مافيه احلى من قاعدة المساطب وقالو وقولنا ورغى الحريم
وشويه كمان وهنفتح فرع الهبل على البلوج اسبوت

بس خلاص مش هننزل كلامك الأرض ... انت تؤمر يا باشا

صفــــاء يقول...

كيارا
******
والنبى ما زعلانا يا كوكى
انا بس صعبان عليا ان الناس بقت هبله
مش عارفه حتى تعمل شريرة

--------------

هى وظروفها
***********
وليد باشا ... منور
هههههههه دة على اساس انى صفاء الهجان والا مراة خال اشرف مروان ؟

بس يا عزيزى الميلات العشوائيه بتبقى دعائيه ومش تأكيد اشتراك وأرقام تفعيل دخول
وخصوصا ان الميل خاص وعندى من سنتين وماوردش عليه القرف دة غير بعد معرفه ناس طلعو اى كلام

كمان مش بعتبرة مقلب قوى يعنى ولا حتى حصّل تصرف حقير
دة من هبله ماحصّلش حاجه خالص
ووولا شاغل بالى غير بس الضمير ... اعملو الغلط بضمير يا ناااس
وحتى هو مش موقع عشان ابعت لك اللينك
هههههههههه أبعت لك التفعيل وتدخل انت بدالى ؟

د/ رامي شهاب الدين يقول...

فى الواقع .. أحيانا نفس الرسائل دى بتيجى لى ع الميل الخاص برضو ، لكنى مش بتضايق ولا بحطها فى دماغى اصلا لأنى عارف إن عملية الإرسال دى بتكون عشوائية وغير مقصودة

حتى لو كانت مقصودة .. فأفضل حل هو التجاهل ، لأنك برد فعلك وعملك لبوست على الكلام ده بتدفعى صاحب الفعل المتخلف ده إنه يتمادى أكتر وأكتر

لكن بتجاهلك ليه ، بعد فترة مش هيلاقى أى جدوى من إللى بيعمله وبالتالى هيقف عن أفعاله الغبية زيه دى

دمتى بكل ود .. تحياتى

دمتى بكل ود .. تحياتى

Che يقول...

والله انا كنت هعلق بس لقيتك بتقولى بتجيلك على الجوجل فاستغربت .. اصلى انا اللى اعرفه بتجيلى على الياهو ، بس ده فى الغالب بيكون سبام مبعوت كده و خلاص ، بس الجوجل مجربتوش
بس عادى ... ارمى الايميل و كبرى دماغك و اللى يعيش ياما هيشرب زبادى خلاط

إيناس حليم يقول...

:) ازيك يا صافي
يابنتي متضايقيش خالص
على فكرةالاميلات دي بتبعتها المواقع بتاعتها لاي حد كوسيلة للاعلان عنها مش شرط انه مقلب من حد وكدة
كبري دماغك يا اختشي وقوليلي صنية الكوسة بالبشاميل بتتعمل ازاي؟ :)

صفــــاء يقول...

د/ رامى شهاب الدين
********************
فى الواقع نوعيات رسايل دعائيه بتجيني كتير على الميل وترويجيه وخلافه لكن فى الفترة الأخيرة دى بقت توصلنى شويه حاجات كدة مش ولابد نتيجه واقعه معينه فــ سببها طبعا معروف وهو شخصيات جبانه متخيله انها كدة قال يعنى بتضايق او بتواجه مع انى على استعداد تام لكل انواع المواجهه والله بس بشجاعه او حتى بشد الشعر والعض
بس يكون فى احترام ومواجهه
عمووووما اهى فضفضه او بعبعه او ثرثة فارغه الواحد بيدردش
منورنى والله يا دكتور

------------------

che
****
برنس .... نهارك ابيض
ادينا طنشنا
مش مشكله قوى يعنى قد ماهى ازمه غياب الضمير فى فعل الشر ناقص هههههههه هو زبادى الخلاط دة عبارة عن ايه ؟

----------------

إيناس حليم
************
هندسه الجميله ... هى للاسف المرة دى مقلب
بس مقلب عبيط شويه
مااا علينا
الكوسه بشاميل ... شوفى يا أوختشى
والا اقولك هروح أكتب الطريقه وابعتهالك
بدل ما الرجاله الشريرين يقولو علينا قلبناها لك يا سيدتى

أحــوال الهـوي يقول...

طيب ده ظريف خالص امال لو شفتي الرسايل اللي بتيجي لي علي اميلي طبعا لوجود مقص الرقابه مش هااقول اللي فيها خللي خيالك يقولك بس العجيب انها بتوصل لي من اصدقاء و لما اتحري الموضوع الاقي ان كل العناوين اللي عندي مسروقه و بيتعت بيها للناس و ما احكيش لكي عن موقف محرج لما رساله اتبعت من ايميلي مضمونها شبيه باللي قلتيه
و اتبعتت لاصحابي و اللي انقذني انهم عارفيني كويس و اني مش ممكن اكون انا اللي باعتها

ما تبصيش للرسايل دي من الممكن تكون رميه بغير رامي

تحياتي

خواطر شابة يقول...

عزيزتي لاتهتمي للامر احذفي ما وصلك دون ان يؤثر الامر عليك ولاتضيعي وقتك ولا اعصابك في البحث عمن فعل الاهمال وعدم اعارة الامر أهمية هو العلاج صدقيني

مصطفى ريان يقول...

عارفة الموضوع دة قمة التناقض اللي جوةالبشر.. يعنى منين هو مقضيها اكبر مواقع جنسية على النت ومنين موقع زواج اسلامي
بس بجد الناس دي عبيطة وتافهة قوى
ربنا يشفيهم ويحفظنا منهم
___________________
صفاء بالنسبة لموضوع الكوسة بالبشاميل ده ممكن تقولي لنا طريقة الكوبيبة الشامى والبسبوسةالشامي بردو.. وتقلبيها لك يا مصطفى
هههههههه
تحياتى لك يا جميل دايما

r يقول...

امسحيهم يا صفاء وكبرى خالص
وروقى كدا محدش واخد منها حاجه
وانا مع التعليق انك بتدى فعلا اهتمام
لشئ لا يستحق منك اى اهتمام ولا ثانيه حتى
وربنا يشفى ان شاء الله
مرضى النفوس

دمتى بكل الخير

فتــافيت (رحاب الخضري) يقول...

هههههههههههههههههههههههههه
واخرتها مواقع اباحية ههههههههههههههههههههههههههههههههه
معلش يا صفاء.. الناس بقت معتوهه والله
ولاتزعلي نفسك خالص

قوليلي هم مين
وانا ابعتلهم عنوان حضانة عايزة عمال مراحيض :)))