سلوكيات مشرّفه

المكان : القومسيون الطبى
حيث يجرى الكشف على سائقى السيارات الأجرة لمنحهم رخصه مهنيه
الشخص : فنى تحاليل
يقوم بالفحص لتحديد نسبه السكر إن وجد وأكتشاف أى تواجد لمواد مخدرة
الثمن : 2 جنيه تدفعهم له ويخرج لك شهادة بخلو عينه البول من السكر
2 جنيه وتستخرج شهادة أنك سليم معافى صحيا ... ومن غير فحص
2 جنيه يمد أيدة الموظف وياخدهم من كل سائق

مقابل منحه صك السلامه الصحيه
2 جنيه تمن أرواح ناس هتركب معاه أو تركب فى عربيه يرميها النصيب تحت عجلاته إن جات له غيبوبه سكر ... أو سايق وهو مسطول
2 جنيه من 150 سائق يتم عرضهم يومياً على كشف القومسيون
2 جنيه والموظف فنى التحاليل يمتلك علامه صلاة وذقن طويله
لم يمنعه أتباع سنته وأداء فروضه من أنه يمد أيدة لــ 2 جنيه
ويا بلاش

أكتشاف مذهل

الناس العلماء الله يسترهم ويعمر بيتهم حلو اللغز اللى ماكانش بينيمني لا ليل ولا نهار وريحو عقلى اللى كان قرب يشت من كتر التفكير فى يا ترى يا هل ترى توت عنخ أمون مات ازاى مات ازاى مات ازاى
حئيئي حئيئي كنت هتجنن أخر حاجه واعرف يا ترى هو مات فى رحله سفارى والا وهو بيعمل دايفنج
ولأن الفاضى يعمل قاضي واللى معاه مال يحنى ديل جحشه
فالأخوة الأفاضل العلماء قضو عمرهم فى البحث والتحرى عشان يكتشفو فى الآخر ان الأخ الفاضل برضه جلاله ملك مصر المعظم توت عنخ أمون مات بالملاريا ... واحد الله يرحمه من أكتر من 3000 سنه ولسه العالم شايل همه مات ازاى ... طبعا عشان هو سايب وراه شئ وشويات وكان غنى زيهم وورثو منه كام زلعه دهب
والملك رمسيس الله يرحمه هو راخر مات لأن كان طالع له دمال تحت ضرسه دة كمان اكتشفناه بعد رحله بحث وتحرى طوووويله
لكن لما بنى أدم ... بشر فى وسطنا دلوقت فى عصرنا المنيل دة يندبحو وهما نايمين ... لما 11 كائن بشرى يندبحو ويتمثل بجثثهم مش مهم يعرفو ماتو ازاى
ولحد دلوقت مجزرة بنى مزار محدش حلها .... أصلهم كانو صعايدة فقرا ولاد كلب يولعو
ولحد دلوقت بنقفل علينا الأبواب بسلاسل حديد وأقفال عشان منندبحش واحنا نايمين
وعشان هشام طلعت مصطفى هو هشام طلعت مصطفى فدة عشان خاطر عيونه يتغير القانون والا حتى تتلغى عقوبه الأعدام من القانون كله ويتحاكم بقانون جديد ونفصل له على مقاسه
ماهو توت عنخ مصطفى او هشام طلعت امون عالم أغنيا زى بعض وملوك
لو ماتو نفضل نحلل ماتو ازاى ولو قتلو ماعلش نظبط لهم قانون
ويطلع لنا زاهى حواس كولومبس يقول لنا كيف مات الفتى الذهبى ... او الملك الذهبى
طب يا عم الحاج الناس الطيني اللى زينا لما يموتو أو بمعنى أصح لما ينقتلو مدبوحين وغرقانين ومحروقين مش مهم حد يعرف ماتو ازاى او ليه ؟

وعليه قررت الأتى

********************
لما أموت هبقى أسيب للدوله سلسلتين وغويشه وحلق أو هحطهم فى زلعه واعمل لهم خريطه وأبعتها المتحف البريطانى

نضافه

بدء مشروع الصرف الصحى حدانا من ربع قرن
كسرو الشوارع وفتحوها بالطول وبالعرض , بيوت قديمه اتهدت ووقعت بسبب عمق الحفر والتأثير على الأساسات وارتفاع مستوى المياة
لكن منظر ومعاناه المجارى الضاربه والشوارع الغرقانه خلتنا نستحمل , كنا طمعانين أن المشروع لما يخلص هنرتاح من كل دة
ومن السنه اللى فاتت بس فعلا انتهى المشروع وبدء عمله والناس ركبت التوصيلات وقولنا هى دى النضافه فعلا وإلا فلا وبعد أقل من نصف سنه
صحينا الصبح ... لقينا الصرف الصحى ضرب
بدءت العلب الرئيسيه فى الشوارع تضرب واحدة ورا التانيه وشارع ورا شارع
مستوى المياة ارتفع لدرجه انها ردت جوة البيوت نفسها من جوة
محطات السحب والتصريف نفسها بعد كدة توقفت
الناس الوحيدة اللى نجت من المصيبه المقرفه دى ... كانت الناس اللى ماوصلتش ولا اشتركت فى الصرف من أصله ...... واحنا منهم D:
كله صرخ كله اشتكى .... البلد كلها مافيهاش غير مهندس واحد وأربع عمال مختصين فى الموضوع دة
جه الدور على شارعنا وصلو وبدؤ الشغل
يفاجئو إن علب او حلل الصرف الرئيسيه فى كل شارع مسدودة تماماً بالأتى
خرق قديمه _ فوط صحيه _ حفاضات أطفال _ أكياس نايلون _ وأكياس زباله صغيرة قشر لب وفول وخلافه
والأخيرة دى بالتحديد المهندس كان هيتجنن ويعرف ازاى وصلت لعلب صرف مغلقه
أى نعم الحكومه كانت ولازالت بتعايرنا بالبنيه التحتيه وخصوصاااا الصرف الصحى
لكن احنا ... كــ شعب ... كــ ناس
مالنا ؟ ... أيه مشكلتنا ؟
ننضف بيوتنا ونرمى الزباله فى الشارع , نمسح شققنا ونكب المايه من البلكونه ... وعلى دماغ الناس عادى يعنى مش بتفرق
يعنى هل تخيلو ان الصرف الصحى دة مشروع شيطانى عجيب فيه مفرمه مثلا هتفرم كل زبالتهم وتريحهم من انهم يتعبو ويحطوها فى اكياس وييجو على نفسهم ويطلعوها قصاد الباب أو يدوسو ويضغطو على نفسهم اكتر وينزلو بيها الشارع أو يتعبو قوى ويرهقو نفسهم جدا ويحطوها فى أو على الأقل جنب صناديق الزباله ؟
أو يدفعو لعامل النظافه 3 جنيه فى الشهر قيمه الأشتراك والراجل يوميا والله بيجيي يشيلها
نقول أن النظافه من الإيمان وتظهر دراسه تقول إن 70% من الشعب مش بيغسل أيدة بعد الحمام
ولا قبل ما يعملو الأكل
نتوضى ونصلى 5 مرات لكن نبصق على الأرصفه
احنا شعب شكاى وبكاى
لا فعلا احنا ناس بنحب نشتكى ونبكى ونولول ... ودة بالنسبه لنا أسهل من اننا نحاول نغير
كل الدوله بتشتكى ان الزباله او "القمامه" دفنت الشوارع
كام فرد بقى حاول هو ينضف او كام شارع لم الزباله وحطها على عربيه أجروها بـ 5 جنيه وراحو رموها فى المقلب العمومى مثلا
حتى اللى بيكنس قصاد بيته بيلم الكناسه ويحطها جنب بيت جارة .... ههههههههه أو فى نص الشارع اللى قدامه ... قال يعنى نص الشارع التانى مش تبعه ومش هيجي منه ذباب وصراصير , يمكن المسافه تبقى بعيدة عليها او يجوز مش معاها تأشيرة توصلها للنصف الأخر من الشارع
وعلى أضعف الإيمان ... يحرقها
دة على أساس ان حرق الزباله نضافه

تخاريف أنفلونزا

وسط أرتفاع درجه الحرارة والدخول لمرحله الهلوسه
والبدء فى رؤيه أوهام بصريه وسمعيه وحاجات سودة منقطه أصفر طايرة جنب عينى

ودماغى قربت تسيح ودخولها نقطه الأنصهار الحرجه العليا
.

بين النوم واليقظه , رأيت فيما يشبه الأحلام ... أنبوبه بوتاجاز جايه تتهادى عليا من بعيد
وأننا ولعنا البوتاجاز ورجعنا تانى نشغل السخان

.

حاولنا نرجع للأصاله ونشغل الوابور ... ملقناش جاز

فيه خطه لمنع الجاز تمهيداً لأرتفاع سعرة ... لتر الجاز بقى بـ 2 جنيه ومخلوط مايه

نولع الوابور يهب فــ وشك

.
حتى علبه الكبريت الباكستانى اللى بنستوردة ونحطه فى علب كارتون من أنتاج شركه النيل لأعواد الثقاب
كل اما أولع عود يفرقع ويطير ... حتى عود الكبريت مش عايش عيشه أهله ومتوهم أنه قنابل عنقوديه

هو الأكل اللى بيطبخوة فى قناة فتافيت دة بياكلوة ؟
فيه ناس فيها قلب تاكل الأكل دة ... دة على أساس ان الناس لسه فيها صحه ومعدتها بتقدر تهضم ؟

مع أن انا اللى عيانه بس امى راحت عملت كوبايه ليمون سخن وسقتها لأختى ... ولما البت فضلت تصرخ انها مافيهاش حاجه ومش هى اللى عيانه ولاعايزة تشرب ليمون ... أتهمتها أنها مش عايزة تسمع كلام امها اللى عارفه مصلحتها أكتر منها
وكانت داخله على عقوق الوالدين لولا أن البت خدتها من قصيرها وشربت الليمون

إلــى معرض الكتاب شدينا الرحال

شدينا الرحال إلى رحلتى السنويه الأكثر أهميه
معرض الكتاب
يوم الجمعه المرور كان ابن حلال وصلنا بسرعه انا واختى وهناك قابلنا ميرا ومصطفى ريان لفينا تقريبا المعرض كله ... بحثاً عن صالات فيها حفلات توقيع لناس أصحابهم هتتعمل تانى يوم السبت ... وشويه صالات تانيه وشوفنا اسعار كتب ترعب يعنى

والبت ميرا الله يكرم اصلها يعنى عملت أعلى واجب ومايه وعصير وحاجات حلوة وشيكولاتات بت عسل قوى يعنى
روحنا سور الازبكيه لقينا هيصه بقى وكتب الكتاب بجنيه ... أشترينا حمل كتب زى شروة البطاطا كدة ... الظريف جدا أنها كتب احسن مليون مرة من الجديدة وبتاعه دور النشر
وطبعات كويسه جدا وبحاله ممتازة وأدب عالمى مترجم وروايات رائعه وكتاب بنسمع أسمائهم فى البرامج الثقافيه بس
فى حين ان دور النشر كلها تقريبا كتبها عن الطهى ونصائح ليله الخرجه وانت والأبراج وكتب دينيه من جنسيات مختلفه ... المحترمه والموثوق بها فيهم قليل جدا
ودور النشر ذات الكتب القيمه .. تعدى من قصادها وتجرى لأن اسعارها بتلسع من بعيييد
خرجنا بعدها لوسط البلد وانتقاما من ميرا لأنها لففتنى المعرض كلها نزلتها رمسيس ومشيتها لحد ميدان التحرير ... قال بفسحها
تانى يوم السبت وهو كان اليوم المشهود بقى لأنه كان حفلات توقيع كتب مصطفى ريان صديقى واخويا والمبدع الشاب وحفلات توقيع تانيه لأحمد الصباغ وسحر غريب
اول ما دخلنا كان فيه شريف باشا عمدة كفر البلوجرز كلاته وكل سنه وهو طيب بمناسبه عيده الستين وعقبال كل عيد وهو بكل خير وصحه ومنور الدنيا بوجودة
قابلنا أسماء رمضان الصحفيه الرااائعه واللى اول مرة اشوفها وفعلا كان أكتر شئ فرحت بيه وسعدت له جدااا لأنها أنسانه قمه فى الذوق والرقه والرقى
شوفت واحدة مفروسه رغم أنى اول مرة اتعرف عليها , سلمت على أحمد سو , وداليا قوس قزح , حضرنا عند الصباغ وسحر وبعدها روحنا لمصطفى واتصورنا كمان معاه
(الصورة ومش عايزة تريقه ... راعو يعنى انها واحدة مسافرة وبتلف فى المعرض بقى لها يومين ... هتبقى ايه غير كدة)

حد هيقولى مالك حاضنه قزازة المايه كدة ليه زى المحرومين هقول له دى عقدة من المايه يعرفها اللى سمع حكايتى معاها قبل كدة
بعدها لــ علاء الأسوانى وبلال فضل لأن شريف كان مهتم جدا يشترى كتبهم وعليها توقيعاتهم
بعدها كان الوقت بالليل ... وكنت سلمت النمر ورفعت الرايه البيضا من التعب والأرهاق وجمعت حصيله لا بأس بها من الكتب سلمت على الناس العسل اللى كانت موجودة ومشيت وانا فى أشد حالات السعادة البالغه البالغه يعنى
من الناس اللى زعلت بجد أنى ماشوفتهومش كانت دكتور بسنت واللى كنت بتمنى حقيقي أنى أشوفها وأقضى يوم معاها .
كتاب مصطفى ريان مذكرات رئيس سابق من الكتب اللى فعلا كويسه ومكتوبه بحرفيه وموهبه ظاهرة من مصطفى فى كثير من مواضيعه ... رأيي يا درش أنت عارفه الكتاب فعلا متميز وان شاء الله ينقلك نقله نوعيه ويكون بدايه لمجموعه من الكتب تعبر عن موهبه حلوة جدا جواك
وإن شاء الله المعرض القادم يكون لك برضه حفله توقيع وكتاب جديد وألف مبروك يا صديقى العزيز

مصلحه

خرجت لشويه مشاوير خلصت بدرى قولت اعدى على ماما فى الشغل ولو خلصت نروح سوا
دخلت لقيتها لسه بتقفل المكتب ... ايه يا حاجه مروحه ؟
لا هروح اخلص ورق من المبنى التانى ... استنى هنا وانا 10 دقايق وراجعه ... مش هتأخر
اقعدى على مكتبى واقرا جرنال او مجله لحد ما اجى
قعدت وشديت الكرسى فى الشمس ومستمتعه بالجريدة وجانى فنجان قهوة كمان وإذ فجأة
سلام عليكم
وعليكم السلام
لو سمحتى يا مدام مطلوب أمضائك والختم على الطلب دة
طيب استنى 10 دقايق برة حضرتك
الراجل راح لف حوالين المكتب وجاى بيميل
أصل هقولك
طيب ارجع مكانك وانا هفهم اللى انت عايز تقوله
لا هوريكي الطلب بس
طب ارجع مكانك مناخيرك قربت تدخل جوة ودنى ... فيه ايه يا عم الحاج شويه وهتطلع على كتافى
الراجل رجع مكانه وهو امال يبرطم
عايز الحق الخزنه قبل ما تقفل
طيب اتفضل اقعد بس برضه 10 دقايق
ليه يعنى هو انت بتعملى ايه ... مانت بتقرى الجرايد ... مش هو دة الشغل اللى بتقبضى عليه مرتب
لا يا سيدى دة مش مكتبى ... الموظفه اللى هنا راحت المبنى التانى وجايه حالا .. من فضلك اقعد استناها
ولما هو مش مكتبك قاعدة عليه ليه
(وقعتك سودة ) معلش غلطه .. دقايق بس
ما تمضى انت وخلاص
يا سيدى انا لو مضيت على ورقك هيعملوة قرطاس ويلبسوة لك فى دماغك لأن ببساطه أمضتى ملهاش قيمه
وقف دقيقتين وبص فــ ساعته وصوته على
خلصونى الخزنه هتقفل ولو مادفعتش هتحبس .... عايزة فلوس ؟ قولى
تاخدى فلوس وتخلصى ورقى
حلو حلو حلو قعدت على مكتب حكومه 5 دقايق ولبست قضيه رشوة أو بمعنى أصح لبستها لأمى
لا مش باخد فلوس ... استهدى بالله واصبر
خلاص اى حد يمضى ويختم مش الختم قصادك اهو ... خلااااص أختمى
آآآآة بقى هى حكايه ختم
بصراحه عايزة اسكته ومش عايزة اى موظف يجيي على صوته لأن موظفين الحكومه تخصص خوازيق وخوابير واخاف اى حد يجيي يقاول الراجل ويلطع الختم اللى فـ عهدة أمى وتبقى الوليه دخلت السجن على حسى فى قضيه رشوه او اختلاس
لا والله ونعم العيال ... افرحى بخلفتك يا امه
طيب هات الطلب (امسكه وامال ابص فيه قال بفهم ) بس افهم ايه دى أمضائات بالأزرق والأحمر وأختام بالأسود والكحلى وقسايم دفع فوشيا ولبنى وصفرا
دى ولا زينه رمضان
بتعملى اييييه
الله مش براجع على الورق ؟ وبعدين انت مستعجل ليه لسه فاضل ساعه على المواعيد
الراجل دخل على نبرة استعطاف ويا مدام لسه فيه اجرائات تانيه والنبى من فضلك امضى

وبعدين ما يروح يشوف البلد اللى خلت الورقه لازم لها أمضائات 120 موظف على الأقل ولـ30 لطعه ختم لما الطلب بقى عامل زى الوان الطيف وأقرب شبهاً بحلاوة المولد
يا سيدى انت عايز امضه مدير عام ... ما تبص كويس دة شكل مدير والا نيله
وبعدين بصراحه انا مش موظفه هنا اصلا
امال قاعده هنا ليه
(عايزة اخلص منه) دة مكتب ماما وهى جايه
ماما ؟ ليييه هى بقت حضانه وبيجيبو عيالهم معاهم
(الله يحرقك يا شيخ ) أسيب له المكتب واجرى دة والا ايه
يعنى يامى ماكنتيش قادرة تقفلى وتقولى لى غورى يا بت روحى وكنتى قفلتى مكتبك وريحيتنى من المصيبه دة
انتو شويه موظفين كذا وكذا وكيت وانا هروح اشتكيكي وهبعت فيكي شكاوى لقناة المحور
(ليه قناة المحور ... ما تخليها الجزيرة احسن .. هو انا قصفت بيتكم بالصواريخ يا حاج ؟)
انا هبلغ عنك للوزير الحمار اللى انت تبعه
عايزة اقوله ان الوزارة اللى انا تبعها هى الوزارة الوحيدة فى مصر اللى ملهاش وزير بس مش وقت استظراف دلوقت ومناقشه القضايا السياسيه والوضع العام فى مصر
المهم انى خلصت منه حتى لو كان رايح يشتكى
شويه وامى دخلت .... منورة المكتب يا قطه
بأبتسامه صفراااا تعيشى يا ماما .. طب انا همشى دلوقت أصلى افتكرت حاجه اجيبها
ألا قوليلي يا ماما ... هو انت فاضل لك قد أيه على المعاش