الأحد، 3 يناير 2010

عدد تذكارى ... وباقه ورد

عامين مرا على بدء التدوين
فى يناير يكون قد مر عامان على انشاء مدونتىّ الأثنتين
لكن مقتطفات بدأت ادون بها فى يناير أما الأخرى فبدأت فى مارس
لا أذكر تاريخ البدأ بدقه نظراً لحذفهما من قبل
لكنه كان شهر يناير

ولهما الفضل فى تعرفى على أرق وأرقى الناس
على أصدقاء كانو بمثابه أخوات وأخوة
ولهم الفضل فى تعلم الكثير وتحمل مواقف ما كانت لتمر بسهوله لولاهم

مروة : أول صديقاتى .. بل أول شقيقاتى من المدوٍنات
بساطتها وشدة تلقائيتها وعفويتها تخفيان روحاً شديدة الحساسيه لماحه بدرجه لا تصدق فى ما خص كل أنواع المشاعر الأنسانيه

سلوى : تمثل مع مروة الثنائى الأقرب إلى قلبى والشقيقه الأخرى لى
روح نقيه حتى تظنها لا تنتمى الى عالمنا هذا من شدة تفائلها وثقتها البالغه بالله حتى فى مواقف تصعب على الكثيرين وتزعزع ثقتهم , أجد سلوى مؤمنه وصابرة ومحتسبه ... لم أرها مرة واحدة غاضبه او كارها لأى شخص مهما كانت درجه إيذائه لها

مصطفى ريان : صاحب أول تعليق , أول أخ حصلت عليه هنا
قلب شديد الطيبه وبرائه تكاد تكون حكر على الأطفال بكل نقائهم وشفافيتهم وأخى الصغير

أمجد : إنعكاس عقلى وتفكيرى وأرائى فى المرأة ... هو أمجد
أخف روح ودم وأكثر من قابلت مرونه وأنفتاح فى التفكير وتقبل للأخر ومرحاً وسعادة حتى فى أحلك المواقف وسخريه وثقافه وحين الحاجه أجد عندة العون والمساندة , هو ومصطفى دائمى السؤال عنى ولا تفوتهم اى مناسبه حتى يكونا السباقين بالأتصال والتهنئه ... وهو أصغر أخواتى

نورالدين : الصديق دائم النقار وكأننا مولودين فوق راس بعض
هجومى صدامى يرهقنى بالجدال , والوحيد القادر على أخراجى عن اعصابى ويضعنى فى مواجهات انا فى غنى عنها ... لكن خلف كل هذا قلب طيب ومشاعر رقيقه مرهفه تجعله من الأصدقاء القريبين مهما هاجمنا بعضنا او أشتدت خلافاتنا ... مجرد بضع كلمات وعتاب بسيط و تعود صداقتنا لسابق عهدها

شريف : دة باشا ... باشا بكل ما تحمله الكلمه من معنى
رقه ورقى ... شياكه وأناقه بالغتين فى التعامل حتى تظنه أحد البشوات رغم شدة شدة بساطته وتواضعه وخجله البالغ وأدبه الجم ... يكفى أنه حين تعرض للسرقه نعت سارقه ( السيد لص )
ورغم تفاوت الأعمار والمقامات والقيمه إلا أنى افخر بأن أدعى أنه صديقى ولشدة بساطته يقبل
عقليه مرنه متحضرة راقيه وقلب واسع رحب مفتوح على مصراعيه لكل من يدق بابه , يعشق التعرف على الناس ومنحهم بعض من روحه ويستحق عن جدارة لقب عمدة المدونين
ويعتبر أقرب الأشخاص لى على الأطلاق

هؤلاء هم حصاد 2008

فى 2009 كان لى شرف التعرف على أخرين وشرف صداقتهم أيضاً

د / عصام : احوال الهوى هو خير وصف له .
إنسان محترم جدا رقيق مساند ذو أحساس قوى جدا وخفه ظل غير طبيعيه
شديد الحساسيه فلا تعرف أهى ميزة أم عيب لكنه شهم وابن بلد وصاحب صاحبه رغم مكانته
ولا يتأخر فى السؤال رغم مشاغله ولا أنسى له هو وشريف وسلوى مساندتى والوقوف بجانبى حين خضعت والدتى لأحدى العمليات الجراحيه واتصالهم الدائم للسؤال والأطمئنان عليها وعيادتها

داليا : قوس قزح , مجموعه من المشاعر الرقيقه العطوف وقلب يسعى دائما لفعل أقصى طاعته فى طريق الخير وسيدة فاضله سعدت برؤيتها والجلوس معاها لبعض الوقت

خالد : همس الأحباب , لم نرى بعض سوى لوقت قليل فى أحدى لقائات المدونين إلا أننى شعرت أننا أبناء عم وهو من الأشخاص شديدى البساطه والتلقائيه

حاول تفتكرنى : رغم أنى لا أعرف حتى أسمه لكنى شديدة السعادة بصداقته والتعرف عليه فهو عقليه متميزة ونفس شفافه

سمكه واحدة : سمسمه الرائعه خفيفه الدم المتصالحه مع النفس ورغم كل سخريتها وتهريجها شديدة الاحترام والأخلاق

ميرا : امرءاة بعقل رجل
لكنى أراها فتاة بعقل واعى متفتح وأفق رحب ونفس طيبه , قلبها لا يحمل ضغينه بل أظن أنها لا تعرفها أصلا تتمتع ببساطه و تلقائيه غير مفتعله وأشعر بالسعادة لصداقتها والتعرف عليها رغم انها تمت فى ظروف صعبه بعض الشئ ... ومعها عبير إنجل : مفاعل صغير للمشاكل والمصائب المصغرة كارثه جميله تمشى على قدمين ... لكن قلبها أبيض

كل أصدقائى شديدى الجمال والرقه الذين شرفونى بتعليقاتهم وصداقتهم

الثنائى المنياوى بسنت وفتاة من الصعيد : اصحاب عقل منظم وثقافه واسلوب يميزهم ورقه بالغه ويحملان هموم وطنهم الصغير والكبير
عم صلاح" فشكول" و صديقى المغربىين المختفيين اسافو ونبراس العتمه , استاذ هشام , بحر الألوان , اللؤلؤة , وليد "عارفه مش عارف ليه" وحسن ارابيسك , هانى زينهم , الراقى والمحترم دكتور محمد
الفتاتين الرقيقتين والرائعتين "زهور الأمل والوعد الحق " إيناس حليم وصدور كتابها وإن شاء الله يلاقى كل نجاح ... دكتور نورا , ليساندرا , مدينه من النساء , أحلام اليقظه ,
المهندس راجى , حنا السكران , صبرنى يا رب , حلم بيعافر , خواطر شابه , البنفسج الحزين , فتافيت , سقراط , مايكل , إياد وشاعرنا القوى احمد الصعيدى , جارى من بنى سويف دكتور ياسر عبدالفتاح , المتفائل دمث الأخلاق محمد غاليه والرقيقه كيارا, مرهف الحس ادم المصرى الشابين المهذبين حسن حنفى ومصعب صلاح , حياة بلا عنوان وشاعر الزمن الرائع بيرم المصرى , الجنرال ماكس و سحساوى والمختفى من شهور مجدى عبدو بصراحه ناس كتير جدا جدا بحترمهم بشدة وبحبهم اوى شرفونى وأسعدونى
مش عارفه افتكر مين والا مين لكنهم بالتأكيد أكثر وأسفه لكل من سقط من ذاكرتى سهواً لكنه يحظى بنفس المحبه والأحترام
طولت انا عارفه بس دة عدد تذكارى يا جماعه حاجه مش بتتكرر غير كل سنتين مرة
لأنى بصراحه مفييش خلق اكتب الكلمتين دول تانى كل سنه
كل سنه وانتم طيبين
كل سنه وانتم أصدقاء

هناك 25 تعليقًا:

فتــافيت (رحاب الخضري) يقول...

يا ستي يارب عقبال 100 سنة معانا هنا
وصدقيني المكسب لينا احنا يا قمر :)

فتــافيت (رحاب الخضري) يقول...

وكمان تعليق.. بمناسبة السنة التانية.. يعني كل سنة تعليق.. كده عدل :)

غير معرف يقول...

اميرة الصعيد

هكذا انت .. تمكنت برقتك وروعة تعبيرك ان تجمعى حولك قلوب المحبين .. احيانا يردون عندك .. واحيانا يردون لديهم .. الا انهم جميعا جمعهم بستان من العواطف والاحاسيس والمشاعر التى يندر الوجود ان يجمع مثلهم ..

كل سنة وانت تدورين بمشعل العواطف فتوقظى النائم منها من أحلى حلم ..

قيل عصفور فى الاسر .. فاذا بنا جميعا فى الاسر .. اكنه أعذب أسر .. لانريد منه فكاكا

كل سنة وانت أجمل وأرق وأعذب .. وأحن

Hesham يقول...

عقبال يارب ان تكون اصداراتك فى كتاب يقرأه الجميع كل سنه وانتى طيبه ومدونه ممتازة

حلم بيعافر يقول...

ايه اللوك الجديد الجامد ده

كل سنة وانت طيبة وانت لسه صغيرة اهوه

يدوبك سنتين

البنفسج الحزين يقول...

عقبال ماتحتفلي بمئويه المدونه بتاعتك كده ربنا يوفقك دايما...
تحياتي

ميرا ( وومن ) يقول...

عقبال مليون سنه

كل سنة والمدونة طيب وبخير وصاحبتها أرق وأجمل

( وش مكزوف ) إيه الكلام الحلو ده كل ده انا ده انا مشرئبة قوي علي فكرة

ومش هاقدر ارد علي كلامك الجميل ده بس انتي عارفة اللي في القلب

غير معرف يقول...

كل عام ومدونتك بالف خير .... ودمتي مبدعه كالعاده

شكرا لكلماتك الرقيقه عني :)

تحياتي

Aиgel يقول...

مساء الخير ..

كل سنة ومدوناتك بخير وتنوريهم دايماً
وتنورينا كمان في مدوناتنا
يا صافي ويا عسل يا صافي (:


وشكراً على كل كلمة قولتيها على أصحابك وأصدقائك يا طيوبة (:


Angel love

خواطر شابة يقول...

كل سنة وانت طيبة وعقبال عيدها العشرين
بس مفيناش من الكلام ده "دة عدد تذكارى يا جماعه حاجه مش بتتكرر غير كل سنتين مرة" انا مشفتش في حياتي عيد ميلاد يتعمل كل سنتين
كنت افتتحيها في 29 فبراير عشان تحتفلي كل اربع سنين
شكرا لك لانني كنت من قائمة أصدقائك وانا سعيدة بهذا
تحياتي لك

sal يقول...

ربنا يديك الصحة
وتكتبى كلمتين زيهم واكثر
وكل سنه وانت بخير

إيناس حليم يقول...

:))))
ايه ده!! بجد انا فرحانة اوي اوي انك افتكرتيني، بجد أثرتي فيا اوي يا صفاء.. مش عارفة اقول ايه بجد شكرا على طيبتك ورقتك وأمنياتك الجميلة اوي زيك..
كل سنة وانتي ومدونتك بألف خير يارب وان شاء الله السنة الجيا تبقى أجمل أبهى قدام عنيكي وتحققي فيها كل اللي تتمنيه يارب..
وعلى فكرة انا كنت بستمتع بمدونتك دايما على مدار العام..
ربنا يوفقك يا صافي :)

صفــــاء يقول...

شريف
*****
العمدة الباشا بتاعنا
كتير كتير كتير عليا يا ريس دة بس المتوقع من ذوقك ورقتك ويا رب يخليك لنا ويديم علينا محبتك دى ولا نحرم من جمال ورقه تعليقاتك وتشجيعك الدائم اللى كان سبب فى كتير من المرات للأستمرار

صفــــاء يقول...

فتافيت
********
الله يبارك فيكى وانت طيبه يا قمر ربنا يخليكى
المكسب ليا بكل الناس العسل دى

-------------------

هشام
******
ربنا يخليك شكرا
دة بس من ذوقك وكرم اخلاقك

صفــــاء يقول...

حلم بيعافر
************
شكرا على المجامله يا رب يكون عجبك بجد
وانت طيب ... طبعااا صغيرة

---------------------

البنفسج الحزين
***************
وانتو معايا يا رب وتكونو كلكم بكل خير وسعادة وحبايبى كدة

صفــــاء يقول...

وومن
******
انت كل دة واكتر منه كمان وكل واحد عارف نفسه يا قمر
انت قطه جميله يا ميرا وقلبك كله خير وبساطه وتتحبى

----------------------

فتاة من الصعيد
***************
والله انت تستحقى اكتر من كدة بكتير بس عشان العدد التذكارى بقى ومحتاجه اشكر كل اللى شرفنى بصداقته ومحبته واهتمامه
كل سنه وانت بكل خير

صفــــاء يقول...

إنجل
******
كل مسائاتك ورد يا قطه
انت اللى عسل يا كارثتى الجميله اللى مينزعلش منها ابدا

كل سنه وانت طيبه وكل سنه وانت حلوة وجميله ومش مصييييبه

--------------------

خواطر شابه
************
وانت طيبه ربنا يخليكى
أكيد انت من الأصدقاء اللى علقو عندى وسعدت بمعرفتهم وكل حد شرفنى ومنحنى دقيقه من وقته يستحق كل أحترام وتقدير
بس حكايه 29 فبراير دى لو كنت افتكرتها وقتها كنت عملتها
الف شكر على تهنئتك الجميله

صفــــاء يقول...

sal
*****
ربنا يكرمك ويخليك
كلك ذوق ... كل سنه وانت طيب وبكل خير

------------------------

إيناس حليم
************
وهو انت عندك شك انى لازم أفتكرك ؟
انت أديبه جميله وقاصه وروائيه بارعه ومن الأصدقاء اللى بتشرف بيهم وبتعليقاتهم الرقيقه او حتى حضورهم من بعيد وبيكفينى انى قلت او كتبت فى مرة شئ عجب شخص لدرجه أنه يدينى من وقته دقايق
الف مبروك كتابك وان شاء الله بكل نجاح وتوفيق
كل سنه وانت طيبه

mostafa rayan يقول...

صفاء ازيك يا جميله
وكل سنة وانت طيبة وبخير ونفضل صحاب واخوات على طول
والله العظيم انا فرحان قوى بكلامك ده وانت اكيدعارفه مكانتك عندي يا رفيقه المشوار التدوينى وطبعاانا فاكر اول تعليق ليكي عندي على قصه الحل الامثل قلت البنت دي زي السكر وانا وهى لازم نبقى صحاب
ولو انا بجد طيب فانت حد صاحب صاحبه قوى وبنى ادم يعتمد عليه
وطبعا مش هنسى ابدا دفاعك المستميت عنى لمده شهرين بحالهم والمقال اللي كتبتيه عنى على الفيس وهنا فى المدونه
وتشجعيك ليا اثناء فترة نشر الكتاب ومش هنسى فرحتك لماشوفتى غلاف الكتاب ولا كلمتك ( اسمك منور على الغلاف يا مصطفى )وحاجات تانية كتير مش هيساع اقولها هنا
ربنا يديم ما بينا المحبه والموده على طول
- اما بخصوص (ميرا) فمين قالك انها امرأه بعقل رجل .. دي امرأه بعقل امرأه اسألينى انا دي بتشتغلنا بالعنوان الاعلامي ده يا بنتى
امااخوكى نور الدين فزي ماانت قلتى
شويه بيهاجم وبينفعل لكن هو حد طيب
وحساس قوى فى كتابته وبيعيش حاله الكتابة قوى
كل سنة انت طيبة يا صديقتى الجميلة ويارب سنة جديده وتحققي فيها كل احلامك

أحــوال الهـوي يقول...

مش ممكن و صفك ده

انا حبيت نفسي من رقتك و احسانك في و صفي

قلت انا ده ؟؟ اول مرة من نصف قرن احس اني ممكن اكون انسان كويس
لانك صديقة رائعه بعطفك و فضلك


ربنا يكرمك و يكتر اصدقائك و حبيبك

تحياتي

سلوى يقول...

بحبك

بدون أن أصفك
أو أبرر لما

أخوة .. صداقه ... أيا كان المسمي

فأنت عزيزه جدا لدي

بحر الالوان يقول...

انا اسمي مكتوب ....... طـــيب

عقبال 100 سنة انشاء الله..... بس العدد التذكاري رقم 100 ياريت يبقي معاه اي ساندوتش .... حاجة ساقعة .... اهو اي مصلحة والسلام

عموما .... ميرسي لذوقك

صفــــاء يقول...

مصطفى ريان
************
يابنى انت اخويا والله ... ولا تقل فى المكانه عن محمد أخويا
وطبعا مش هقدر ارد عليك بكل الكلام الحلو اللى انت قلته
لكن كل اللى اقدر اقوله ربنا يديم المعروف والأخوة والصداقه الجميله اللى بينا

--------------------

أحوال الهوى
************
انت يا صديقى العزيز والغالى كل هذا وأكثر منه مئات المرات
ويحق لك ان تحب نفسك فهى من أنقى وأطيب النفوس

ربنا يخليك ولا يحرمنا من مودتك وطيبه قلبك

صفــــاء يقول...

سلوى
******
صديقتى الغاليه الحبيبه صديقتى المقربه

أنت أعز من أن يوفى حقك وصف

------------------

بحر الألوان
************
طبعا أسمك مكتوب وان كان لم يأخذ حقه لأنك من الناس اللى سعيدة جدا بمعرفتهم
ان شااااء الله فى العيد المئوى هتلاقى كل اللى انت عايزة من ساقع وسخن وساندوتشات لحمه
بعد قرن بقى أن شاء الله

mohamed ghalia يقول...

فعلا هو بوست للذكرى
ميرسى أوى على كلماتك الرقيقة