الأحد، 14 فبراير 2010

نضافه

بدء مشروع الصرف الصحى حدانا من ربع قرن
كسرو الشوارع وفتحوها بالطول وبالعرض , بيوت قديمه اتهدت ووقعت بسبب عمق الحفر والتأثير على الأساسات وارتفاع مستوى المياة
لكن منظر ومعاناه المجارى الضاربه والشوارع الغرقانه خلتنا نستحمل , كنا طمعانين أن المشروع لما يخلص هنرتاح من كل دة
ومن السنه اللى فاتت بس فعلا انتهى المشروع وبدء عمله والناس ركبت التوصيلات وقولنا هى دى النضافه فعلا وإلا فلا وبعد أقل من نصف سنه

صحينا الصبح ... لقينا الصرف الصحى ضرب
بدءت العلب الرئيسيه فى الشوارع تضرب واحدة ورا التانيه وشارع ورا شارع
مستوى المياة ارتفع لدرجه انها ردت جوة البيوت نفسها من جوة
محطات السحب والتصريف نفسها بعد كدة توقفت
الناس الوحيدة اللى نجت من المصيبه المقرفه دى ... كانت الناس اللى ماوصلتش ولا اشتركت فى الصرف من أصله ...... واحنا منهم D:
كله صرخ كله اشتكى .... البلد كلها مافيهاش غير مهندس واحد وأربع عمال مختصين فى الموضوع دة
جه الدور على شارعنا وصلو وبدؤ الشغل
يفاجئو إن علب او حلل الصرف الرئيسيه فى كل شارع مسدودة تماماً بالأتى
خرق قديمه _ فوط صحيه _ حفاضات أطفال _ أكياس نايلون _ وأكياس زباله صغيرة قشر لب وفول وخلافه
والأخيرة دى بالتحديد المهندس كان هيتجنن ويعرف ازاى وصلت لعلب صرف مغلقه
أى نعم الحكومه كانت ولازالت بتعايرنا بالبنيه التحتيه وخصوصاااا الصرف الصحى
لكن احنا ... كــ شعب ... كــ ناس
مالنا ؟ ... أيه مشكلتنا ؟
ننضف بيوتنا ونرمى الزباله فى الشارع , نمسح شققنا ونكب المايه من البلكونه ... وعلى دماغ الناس عادى يعنى مش بتفرق
يعنى هل تخيلو ان الصرف الصحى دة مشروع شيطانى عجيب فيه مفرمه مثلا هتفرم كل زبالتهم وتريحهم من انهم يتعبو ويحطوها فى اكياس وييجو على نفسهم ويطلعوها قصاد الباب أو يدوسو ويضغطو على نفسهم اكتر وينزلو بيها الشارع أو يتعبو قوى ويرهقو نفسهم جدا ويحطوها فى أو على الأقل جنب صناديق الزباله ؟
أو يدفعو لعامل النظافه 3 جنيه فى الشهر قيمه الأشتراك والراجل يوميا والله بيجيي يشيلها
نقول أن النظافه من الإيمان وتظهر دراسه تقول إن 70% من الشعب مش بيغسل أيدة بعد الحمام
ولا قبل ما يعملو الأكل
نتوضى ونصلى 5 مرات لكن نبصق على الأرصفه
احنا شعب شكاى وبكاى
لا فعلا احنا ناس بنحب نشتكى ونبكى ونولول ... ودة بالنسبه لنا أسهل من اننا نحاول نغير
كل الدوله بتشتكى ان الزباله او "القمامه" دفنت الشوارع
كام فرد بقى حاول هو ينضف او كام شارع لم الزباله وحطها على عربيه أجروها بـ 5 جنيه وراحو رموها فى المقل
ب العمومى مثلا
حتى اللى بيكنس قصاد بيته بيلم الكناسه ويحطها جنب بيت جارة .... ههههههههه أو فى نص الشارع اللى قدامه ... قال يعنى نص الشارع التانى مش تبعه ومش هيجي منه ذباب وصراصير , يمكن المسافه تبقى بعيدة عليها او يجوز مش معاها تأشيرة توصلها للنصف الأخر من الشارع
وعلى أضعف الإيمان ... يحرقها
دة على أساس ان حرق الزباله نضافه

هناك 24 تعليقًا:

أحــوال الهـوي يقول...

كنت في زيارة لليمن في صنعاء تحديدا

بلد قديمة و منازل متهالكه و كهربا بتقطع و ناس بتخزن قات في توهان و كل شئ فقير جدا
بس اللي لفت نظري ان الشوارع نضيفه

ايه المشكلة عارفه ايه
ان كل و احد بيرمي المسئوليه علي غيرة بالظبط اللي برمي الزباله قدام جارة بيصدر المشكله لجارة ال يعني خلص منها مع انه اجلها شويه

المشكله فينا و سد المجاري اخطائنا و جهلنا اننا نرمي الزباله في المجاري برضه بنصدر المشكلة الي وقت اخر الي ان تتفاقم

تحياتي

Unknown يقول...

للسف كلامك مضبوط
واشهر مثال لكده
تنفيض السجاد من
البلكونات وبالمضرب
ولما تقولى حاجة يقولولك
يااااااسلام هى الشوية بتوعى
هم اللى حيزودوا؟!

خواطر شابة يقول...

عك حق في كل اللي قلتيه المشكلة هي في انعدام الوعي وقلة التربية برنامج خواطر شاب في رمضان عقد المقارنة بيننا كشعوب عربية جمعاء وبين اليابان في هذه المسألة فكانت المقارنة مخجلة وفي غير صالحنا تماما نحن من نردد طوال اليوم ان النظافة من الايمان

Unknown يقول...

عارفة ياصفـاء دا
جزء من تدوينة عندى
حادثة مجهولة
نُشرت فى جرنال الاهرام من مدة
طويلة عن غرق 3عمال صـــرف
صحى اثناء عملهم وأن واحد
منهم له 3اطفال أصغــرهم
عنده سنة وشهرين ومــن
يومها حاولت قدر الامكان
الاحــــتراس فيما القيه فى
البلاعة وخاصة تفل الشاى
واستغربت من الكمــية
الهائلة اللى بصفـيها
كل يوم وأخرجها مع
(القمــامة)

ENG./ELSAYED,PMP يقول...

اول ما سكنت ف العمارة اللى انا فيها حاليا ... كانت العمارة كلها جديدة وتقع على مفترق طرق ... ناصية

فالعمارا الاخرى عملوا الناصية دى ... مقلب زبالة

انا فى الدور الاخير

اللى ف الارضى بقى ... عايز اقولك انه كاد يجيله ... اهيار عصبى

لدرجة انه وقف فى الشباك ... زى مار منيب لما كانت بتقول لعادل خيرى ... انتى بتشتغلى ايه

ده على اساس انه خلاص ... ناموس وبلاوى وروايح ( بتهل الروايح منه )

ينصح ف ده ... ويكلم ده ... الخ

لحد ما ف مره

واحد بيرمى الزبالة

جارى : ينفع كده

الواحد : وانت مالك

جارى : الناموس والريحة هتموتنا

الواحد : اعمل سلك ع الشباك وبعدين الناموس بيطلع لفوق

جارى : يا عم الحج ... مش عارف ايه

الواحد: يا عم خليك ف كوزك لما نعوزك


ف الاخر خالص

لأن انا متابع الحوار من موقعى ف الدور الاخير

انتهى ان الراجل الواحد ده رمى الزبالة ( نظراً لان صوته كان يدل ع انه اكثر بلطجة )

وجارى ساب العمارة كلها وعزل

الله يمسيه بالخير بقى

karim يقول...

انا نفسى افهم لية انتى مستغربة واللة دة عادى جدا هى دى بلدنا ياجماعة واللة مش جديد علينا, تحياتى

صفــــاء يقول...

أحوال الهوى
*************
صدقنى والله لقيت دراسه بتقول ان شعب مصر من أقل الشعوب نظافه ... والدراسه مصريه كمان أحسن نتهم حد بالتأمر علينا والأفتراء
ومش بعيد نقول أنهم هما اللى جابو الزباله دى وكبوها عندنا
بنأجل المشكله .. طب لحد أمتى
ولو بنرمى المسؤليه على اللى جنبنا .. أمتى هنشيلها احنا
فعلا احنا اللى رمينا الزباله واحنا اللى سدينا المجارى واحنا اللى ضيعنا الأرض الزراعيه
يبقى مانشتكيش لو الحكومه ضيعت الباقى

صفــــاء يقول...

دكتور نورا
***********
هما شويه الزباله دول اللى هيزودو ؟
هى شويه المايه دى اللى هتغرق الشارع ؟
هما شويه الكراكيب دول اللى هتزنق الدنيا ؟
عارفه يا دكتور
شكل العمال وهما بينضفو ويسلكو وساختنا أقسم بالله يصعبو علي الكافر
ولما شتمو الناس واتهموهم بالقذارة كان عندهم حق
المهندس بقي يقول لهم ما ترمو البطاطين بتاعتكم احسن فى علب الصرف
وفى النهايه وبعد عمل استمر 5 ساعات لما حابو يعنى يجمعو مبلغ من بعض للعمال دول ماحدش رضى يدفع 5 جنيه بس مع أن أبسط جزاء لهم أنهم كانو سابوهم يقعدو يشمو ويغرقو فى جزاء عملهم

صفــــاء يقول...

خواطر شابه
************
أنعدام وعى + قله تربيه + قله إيمان
لأن من أبسط قواعد الإيمان أماطه الأذى عن الطريق
لكن احنا كل واحد يرمى أذاة على غيرة ويتخيل انه بكدة خلص من المشكله

صفــــاء يقول...

باشمهندس السيد
****************
فيه قطعه أرض فاضيه فى وسط المبانى جنبنا هنا
لها صاحب طبعا ... الجيران حولوها بالجهود الذاتيه إلى مقلب قمامه
الراجل سكت اول الأمر وجاب على حسابه عربيه شالت الزباله وطلب من الجيران بالأدب انهم يحترمو ملكه ومش يرمو زبالتهم فيه
طبعا بعد ما الكل أنكر انه هو اللى بيرمي وعدو الراجل انهم هيبطلو
وبقو يتسحبو فى الليل ويرمو برضه الزباله عندة
الراجل ضرب سور على أرضه
بقو يرمو الزباله من فوق السور
اعصابه فلتت بجد المرة دى وشتمهم
بجحو فيه وقالو له لو مش عاجبه يبقى حل من أتنين ... أما يتفلق .. أو ياخد أرضه من هنا لو مش عاجبه
وفى وسط الخناقه سرقو ماركه العربيه وهى راكنه
بعدها بقى اتسلو على الراجل وكل مرة ياخدو حاجه ... لما الراجل بطل يجيي خالص بدل ما يروح بعد كدة راكب فردة كاوتش

صفــــاء يقول...

كريم
******
يعنى حضرتك شايف ان مدام دة طبعنا ومش جديد علينا اننا ممكن نطور من نفسنا ونبقى نشرب زبالتنا كوكتيل ؟

sal يقول...

الحمد لله انكوا مش مشتركين فى الصرف
""
وتانيا دا موضوع كبير قوى متعلق
بسلوكيات المجتمع اللى بتحكم فيها قيم
غابت واصبحت على اللسان فقط
ويتحقق فينا قول الحق
"
كَبُرَ مَقْتاً عِندَ اللَّهِ أَن تَقُولُوا مَا لَا تَفْعَلُونَ

احييك

mostafa rayan يقول...

موضوعك ده جاي على الجرح انا بعانى منه بردو لأنى اسكن في شارع عمومي امام شريط المترو ولا يوجد مساكن امامي بعد ان اولت الحكومه شركه اوربا 2000 النظافه حطت صندوق زباله قدمنا وتحول بالطبع إلى مقلب زباله فبهوات الشركه لا يقمون بعملهم كما ينبغى وتلاقي حمار ماشي بعربيه حديثه بدل ما يوقف وينزل يرمي الزباله في الصندوق يرميها على الرصيف وهو ماشي شيلنا الصندوق وخفيناه نهائي وفضلنا ننضف ونحرق في الزباله وبعدين سورنا الرصيف وحطينا شجر فبردو الناس بدأت تحط شنط الزباله جنب الشجر ولازم تتخانقي مع الشخص اللي بيرميها ده ولو ماشفتهوش بنضطر نحرقها علشان ماتتجمعش وتبقي مقلب تانى . قلت مره لاحد اقاربي اننا كشعب قذر بطبعه فغضب وقال مانت من الشعب ده لكن من الواضح جدا ان كلامي صح وفعلا احنا مش بنهتم بالنضافه خالص رغم انها من الايمان ويقولك المصريين متدينين بطبعهم وهذا كذب فالدين العمل وهناك هوة كبيرة عندنا بين الشعائر وبين تتطبيقها وهذا ينطبق على مناحي الحياه جميعها وليس النظافه فقط
وربنا يهدي بقي
تحياتى لك يا صديقتى العزيزة دوما

mostafa rayan يقول...

صحيح .. انا كنت جاي وفاكر هلاقي موضوع عن الفالانتين لاقيت عن النظافه
بس بردو هقولك احلى هابى فالانتين داي عليكي يا جميله
ربنا يسعد ايامك ويملأها حب وسعاده وهنا فانت تستحقِ الكثير والكثير

غير معرف يقول...

الشعوب بيتقاس تحضرها بالنظافه

يعني تلاقي الشعب المتحضر نضيف ... والعكس بالعكس

تحياتي

r يقول...

تعرفى انا دايما بقول البلد دى - على مركزى- عمرها ما تنضف
اما بيتى ايضا فى الشارع الرئيسى المقابل بيحفروا علشان الصرف والتركيب من اول السنه الى فاتت وكل ما يردموا يرجعوا ويحفروا
يعنى الشارع الرئيسى متعطل حاجه حلوه اوى
وبالنسبه للنضافه لا انسى طبعا
يعنى شوفى اللى بيترمى على الطريق من العربيات ومن البلكونات حاجه تقرف الصراحه
بس هنعلم ايه يا بنتى هنعلم النضافه
متهيألى دا حاجه ذاتيه لا تتعلم

لازم يتحط قانون ومخالفات زى المرور كدا
يعنى مره قريت ان اللى بيرمى لبنان على الارض فى اليابان بيتحبس

طبعا دا كوكب اليابان زى ما قال احمد الشقيرى

فى سؤال جميل اوى فى كتاب رصف مصر للرائع عمر طاهر بيقولك مين اللى بيستحق اعلى مرتب فى نظرك؟
الاجابه كانت الزبالين لانهم بيعملوا فى بلد عايزه الكنس

دمتى بخير

صفــــاء يقول...

sal
*****
أول مرة نبقى سعداء أننا لم نشترك فى مشروع نضافه
لأن اللى حصل هو أى شئ إلا نضافه
سلوكيات زفت لمجتمع لسان وبس
ووساخه وقبح بقو منظر عادى جدا وسهل رؤيته والأعتياد عليه

منور

صفــــاء يقول...

مصطفى ريان
************
كل اللى بتقوله دة وأكتر عملناة
وماينفعش 3 يبقو نضاف وسط 300 وسخيين
صحيح الكلمه صعبه
لكن هاتى لى تفسير تانى لناس بترمى زبالتها على غيرها
وتنضف شققها وتوسخ قدامها والسلم والشارع
ممكن المكان يبقى نضيف ... لو اللى بينضف اكتر من اللى بيوسخ
لكن لما تكون جمعيه اصدقاء الزباله اكثر عدداً من اعدائها
يبقى انسى يا عمر
لا فالنتين ايه ... دى اعياد الناس المرفهه اللى كنست ورشت وزرعت وأخترعت وفضيت فبتخترع اعياد
خلينا احنا فى وكستنا

ومع ذلك ربنا يكرمك يا درش ويخليك ويسعد كل ايامك

صفــــاء يقول...

فتاة من الصعيد
****************
صحيح ... والمتحضر دة مش هو اللى 7000 سنه حضارة
ولا صاحب الريادة الأعلاميه فى المنتئه
ننضف نفسنا الأول بدون مساعدة شركات خواجات وبعدين نتكلم
شرفتى المكان يا قمرة

صفــــاء يقول...

بسنت
*****
سلوكيات ما انزل الله بها من سلطان
البلد كلها والله يا دكتور
وبعدين تيجي تقولى لحد النضافه ... تقولك دة انا واكله نفسى من النضافه وشقتى بتلمع وبيتي فله
ولما تقولى لها واللى بتخرجيه من بيتك
ماهو بترميه فى المنور وبير السلم وقصاد الشارع
تسمعى أقذر تبريرات على وجه الأرض
صرف صحى ... احنا اول ناس برضه على وجه الأرض خلينا الصرف الصحي يضرب زيه زى المجارى العاديه
لما فعلا بسئل ... هو أيه الفرق بينهم
ويبقى ايه شكلنا واحنا بنعمل مخالفات للناس عشان تلم زبالتها وتنضف مكانها
لنا الله
منور يا قمر

بحر الالوان يقول...

علي فكرة انتي حيرتيني معاكي...والتعليق بقي مهمة شاقة للغاية .

ادخل المدونة دي .... احس اني دخلت وزارة التنمية الادارية ..... مرة موظفين ومواطنين .... وبوتاجاز وميه مقطوعة .... ياعني حكم محلي علي الاخر .... واحس ان عايز اهتف واقول تحيا نقابة الشيالين .

ادخل المدونة التانية ....احس اني في دنيا تانية ..... حبه شيكسبير علي قيس وليلي .... احس اني عبد الحليم بيغني النجمة مالت علي القمر .

بصراحة انت كده دكتور جيكل ومستر هايد ... وهاتعمليلي انفصام في الشخصية .... لدرجة اني مش عارف اعلق لا هنا ولا هنا .

اعلق بقي :

اكيد النضافة من الايمان

سلااااااااااااااام

سلوى يقول...

الصرف الجديد اتسد !!
بس عادى يعنى يا صفاء
يظهر الناس مش واخده عليه :)

صفــــاء يقول...

بحر الألوان
************
ههههههههه مش للدرجه دى بقى
وعموما تعلق مكان ما تحب وبراحتك
او حتى لو مش لقيت حاجه تقولها اعمل زى ... بقول حضرت وقرأت
او يعنى مش لازم خالص ... ويكفيني تشريفك
وتحيا نقابه الشيالين الف مرة
ومعاها نقابه الزبالين وبتوع الخضار

بتنورنى دايما والله

صفــــاء يقول...

سلوى
******
اة مش واخدين عليه
المفروض الدوله توزع الصرف ومعاه كتالوج