ظواهر ومستجدات

أيه اللى حصل فى مصر

أيه اللى بيحصل لشعب مصر

أحنا مكناش كدة

جمل معادة مكررة ممله بسمعها كل يوم فى القنوات الفضائيه

وبتتعاد قبل كل فقرة بتتكلم عن حادثه او جريمه

وكأن مصر طول عمرها ذات سكان من الملائكه الأطهار

وسكنوها دلوقتى الشياطين

مجرد جريمه قتل أو حدثه صدم وهروب او أغتصاب او تحرش

وتلاقى القنوات فرشت الملايه

وعقدت اللقائات والندوات لمناقشه واقع الشارع المصرى

والتغيرات والمتناقضات فى المجتمع

وكأن فعلا الحوادث دى عمرها ما حصلت فى مصر

مع ان أى واحد متابع للجرايد وصفحات الحوادث من زمان

هيلاقى ان دة شئ فعلا عادى ومتكرر الحدوث بطريقه طبيعيه

فى مجتمع ذو تعداد ضخم من البشر

ويظهر ان المشكله فعلا هى القنوات الكتير اللى فتحت دى

وعشان يبقى ليها زبون زى أى محل كشرى

وتعمل سبق وأنفراد تقوم كل واحدة تنافس اختها فى حجم التهويل

والتضخيم ... وأحيانا الفبركه

ونسمع جمل شديدة الغرابه من نوعيه تغيرات جذريه فى واقع الحال

وجرائم جديدة على الشارع المصرى

هو فيه جرائم جديدة وجرائم موديل السنه اللى فاتت ؟

الجرائم هى الجرائم والمعدل هو نفس المعدل

فى دوله يزيد تعداد سكانها عن 80 مليون روح

الناس هما هما والشوارع هى هى

والمشاكل نفسها والحوادث نفسها

الشئ السخيف بقى موضوع التحرش

وقبل أى حاجه ... انا واحدة ست

والله العظيم ست

وبمشى فى شوارع البلد دى وبركب مواصلاتها

وبتعاكس والله زى أى واحدة وأكيد برضه حاول حد يتحرش بيا

زى أى ناس فى كل الدنيا

لكن اللى بيحصل ويتقال دة فى برضه القنوات والجرايد وحاليا النت

تحس منه ان الشوارع أصبحت أدغال

وان الشباب أصبحت وحوش بشريه بتطارد فرائس

وان اللى هتخرج من باب بيتها هيتم ألتهامها فى عرض الطريق

وان فيه مناطق مخصوص للتحرش ومش ناقص غير يكون ليها مواصلات كمان

ومنادى على عربيه يقول واحد ذئب بشرى

لكن الحقيقه مش كدة

صحيح فيه رخامه وقله ذوق وقله أدب وتحرش بس مش ظاهرة يعنى

ولا تنظيم عصابى ... ولا خطط منظمه للنيل من البنات يعنى

ويجيبو تقارير من الشوارع البنت واقفه تقول

أنا بقيت اخاف اخرج من البيت واللى تقول باخد اخويا يوصلنى

او بابا بيجيبنى ويودينى

الله !!! امال احنا لسه بنخرج أزاى ؟

وبنقضى مصالحنا وبنسافر ازاى

وكل الرجاله والشباب المحترمين دول من أنهى بلد ؟

مستوردين يعنى ؟ ....

ومحدش يقولى اصل انتو صعيد لكن القاهرة الوضع متخلف والتحرش على ودنه

هنا وهناك وكل مكان فى البلد فيه الوحش والوحش جدا كمان

لكن فعلا وبمليون دليل أحنا شعب كويس ومحترم

وبيحترم نفسه ... ولسه فيه شباب بتقف وتقعد أى ست او راجل كبير مكانهم

ولسه فيه رجاله بتغض بصرها وهى بتتكلم مع ست

ولسه فيه الراجل اللى بيوسع الطريق لما يلاقى بنت او ست عشان يعديها

ولسه لما حد بيقل أدبه عليا واتخانق معاه الاقى ناس بتدافع عنى

أو حتى بتبقى هتمسكه تضربه

ولسه برضه شعب مصر فيه العادة المهببه فى أنه يرفض انه يقول

مش عارف ... ولو سئلت أى حد عن عنوان ياخدك ويلففك الدنيا ويتوهك

لكنه ميقولش مش عارف

هل فيه حوادث وعنف وقسوة ووحشيه حتى فى بعض الحالات ؟

طبعا فيه ....... أكيد فيه

مفيش أى تجمع بشرى خالى من كل الاعراض دى

لكن المصيبه أننا نتسبب فى حاله ذعر لنفسنا

ونقنع حالنا ان كل شئ حوالينا بينهار

والأخلاق ضاعت والشباب فجرت والبنات أنحرفت

والبلد ماعددتش هى البلد

والدين فقد

واوعى يا بنتى تخرجى لوحدك أحسن الديب ياكلك

ولا كأنها ذات الرداء الاحمر

وارجع واقول انى ايوة بتعرض للمضايقه أوقات

لكن مش دايما

بقابل ناس أقل ما يقال عنهم أنهم أوباش ... لكن مش كل الناس

أيوة فيه حوادث شديدة البشاعه ربنا يحفظ الجميع منها

لكن مش طبائع شعب بحاله ولا احنا بقينا حيوانات

الكل معرض لمخاطر أيوة

لكن ميوصلش الكلام للدرجه اللى نحس منها

كأن الذئاب بتجوب شوارع البلد بحثاً عن الفرائس

كلنا بنات وبنخرج من بيوتنا وبنتعلم وبنشتغل وبنسافر

وبنتعرض للمضايقات

لكن ما يحدث ليس بظاهرة

وأهل مصر لم يهبطو الى درجه حيوانات مفترسه

عاشت لتحكى

تزامناً مع مقررات وزارة الصحه

وقنوات التلفزيون بألغاء الفسيخ هذا العام

أقتداء بكل عام ..

والموشح بتاع الفسيخ بيجيب تسمم

وحقنه التسمم بتاع الفسيخ بعد ما كانو بيقولو الف جنيه

امبارح قالو 20 الف جنيه ...

مع أن ادويه الأيدز والألتهاب الكبدى الوبائى أرخص من كدة

وأستضافه السيد وكيل وزراة الصحه عشان كل سنه

يقول لنا أنهم أعلنو حاله الطوارئ

فى كل مستشفيات الدوله أستعداداً لحرب الفسيخ البيولوجيه النوويه العظمى

وبالعند فيه وفى التلفزيون وضرباً بالقرارات عرض الحائط

كلت فسيخ

مش رنجه لالالا فســــــــيخ

وبالتحديد ملوحه

حته بقى وصايه جيالى مخصوص وبالزيت والليمون وراس بصل

و4 أرغفه من أبو شلن

وراهم قزازة بيريل متلجه بقى لزوم الأكله الأنتحاريه دى

ورغم سوء المعامله اللى تعرضت ليها فى البيت

ورفض الكل أنى أقعد معاهم على التربيزة

أو حتى أشرب من كوبايه المايه بتاعتهم

ثم طردى فوق السطح عشان زفرت البيت كله بريحه الملوحه

أنتهاء ً بصابونه جديدة مخصووووص ليا

فالحمد لله برضه أكلتها ولسه على قيد الحياة

وفى أنتظار أى أعراض جانبيه من حساسيه وخلافه

نتيجه كميه الأملاح دى كلها

وكل سنه والكل طيبين بمناسبه عيد الفسيخ القومى

السيد المحافظ يا ... يعيش

.

بوافر العرفان والأمتنان نتوجه نحن أهالى محافظه المنيا

بأسمى أيات الشكر والتقدير للسيد محافظ المنيا

الهمام الذى قضى على مشكله البطاله فى المحافظه

وذلك بتوفير 23 ألف فرصه عمل لشباب المحافظه

من خريجى الجامعات وحمله المؤهلات فوق العليا

فقد قام سيادته بتشغيل كل هذة الأعداد بالفعل

وله الحق كامل غير منقوص أن يعلن لكل القيادات السياسيه والحاكمه

هذا الأمتياز وتلك العبقريه القياديه

وله أيضاً أن ينشر فى العيد القومى للمحافظه

هذا الأنجاز على صفحتين كاملتين بجريدة الجمهوريه

والقصه بالتفصيل هى أن مديريه التربيه والتعليم طلبت توفير حوالى

200 مدرس بالحصه لسد العجز بمدراس المنطقه

فقام سيادته مشكورا بأصدار تعليماته بأن يفتح الباب على مصراعيه

لقبول كل من يتقدم لشغل تلك الوظائف تقدم 23 الف خريج

وهو رقم أكبر من أحتياجات مدريه التعليم ب 10 ألف ضعف

وبالتالى أصبح لدى التربيه والتعليم بالمحافظه عدد خرافى من العاطلين المطلوب منها القبول بهم

فقامت بتوزيع الحصص المطلوب لها 200 معلم مؤقت على ما يزيد على 20 الف شاب وفتاة

ليكون نصيب الفرد منهم حصه او حصتان وشديد الحظ ينال 4 حصص شهريا

أجر الحصه الواحدة 75 قرش أرتفعت الى 85 ويقال 90 قرش والله أعلم

ليستيقظ الشاب والفتاة مبكرا ويتوجهوا ألى مكان عملهم

ليقوموا بأعطاء 3 او 4 حصص شهريا مقابل أجر 2 جنيه

يتوجه الى كشوف المرتبات ويمضى بأستلام أجر عمله الشهرى 2 جنيه

أما أصحاب الحظ الوافر والمستقبل الباهر فهم أولائك الذين يعطون اكثر من حصتين

فهم ينالون أجر يزيد عن 4 و 5 جنيه واحيانا 6 جنيه أجر شهريا

أما ما الذى يدفع شباب وشابات خريجى الجامعات للقبول بهذا العرض الخرافى

فهو أيهام سيادته ومديريه التربيه والتعليم لهم

بأن من يعمل طيله هذا العام تحت هذة الظروف

فسوف يحصل على تعاقد مميز براتب شهرى 350 جنيه العام القادم

وعلى ذلك فهم يقبلون بهذا الوضع المهين المزرى

مع كامل العلم والمعرفه بأنه من المستحيل تعين كل تلك الأعداد على الأطلاق

فما الذى سوف تفعله مدريه التعليم بكل تلك الأعداد ألا معقوله

ومن أين أصلا يمكنها توفير تلك المرتبات لهم

كلام غير واقعى أو عقلانى على أطلاقه

ألا أنه يتيح للسيد المحافظ الظهور على شاشه أى قناة تلفزيونيه

أو من خلال أى حوار صحفى ليقول أنه تمكن هذا العام من تشغيل 23 ألف شاب وفتاة

وتلك أضافه رائعه لسيرته المهنيه

وتأكيد عملى على قدراته القياديه ومجهوداته الجبارة على مستوى المحافظه

ومن هنا كان توجهى لسيادته بكامل التهنئه والتقدير لعبقريه سيادته

وشديد الأسى والأسف لما أل أليه حال كل شاب وفتاة

ذاكر وتعلم وتخرج ليعمل ويقبض شهريا 2 جنيه فضيه

بتوجيهات من السيد محافظ المنيا

لأجل أمى

أجلس أمام شاشه الكمبيوتر أقلب فى بعض المواقع

اتابع احداث ما وأحاول تحميل برنامج جديد على الجهاز

تمر أمى بجانبى ... بتعملى ايه ؟

زى العادة يا ماما

علمينى

لأضحك بصوت عال جدا أعلمك ايه ؟

علمينى على الكمبيوتر دة وأزاى أشغل نت

لتزداد أصوات ضحكاتى أرتفاعا عاوزة تقعدى على النت يا امه ؟

لا مش أقعد نت يعنى بس افهم فيه شويه وأتعلم

لأجيبها بغباء منقطع النظيرمش هتفهمى فيه يا ماما

دى شغلانه معقدة ودماغك مش هتستوعبها

تبتسم أبتسامه فى غايه الطيبه وتقولى طيب ... وترحل

وأفكر انا فى ما قلته لها ...لقد قولت لأمى الأن

أن عقلها لن يستوعب شئ كعمل الكمبيوتر وتشغيل الانترنت

فــ لما لم تقل هى لى زمان أنى صغيرة وعقلى لن يستوعب التعليم

لم كانت تقضى الساعات فى محاوله تعليمى شئ

ثم فى شراء الجرائد والمجلات والقصص المصورة لى أثناء عودتها من عملها

ذلك العمل الذى كانت تقضى فيه الساعات ثم تعود بما تبقى كى تكمله بالمنزل

وتسهر لساعات طويله للغايه لأكماله

وتقف كى تعد لنا الغذاء وتطعمنا ... وتنظفنا , تعتنى بنا بشدة

ثم تصرخ حين عودتنا من اللعب لتعيد الكرّة من البدايه

لم تتذمر او تشخط فى وانا أجلس بجانبها وهى تشاهد المسلسل الاجنبى

على القناة الثانيه كل مساء حين أصّر على ان تفهمنى ما يقولون

وأن تقرأ لى بعض الجمل المترجمه فيما بعد حين كنت اعجز عن قرائتها

أو الالحاح عليها كى تفهمنى موقف ما لم أتفهم معناة

أذكرها حين كنت أعود من المدرسه ومن المعهد بعدها وانا غاضبه أو حانقه

تجلس بجانبى لتعرف ما بى

مفيش يا ماما

مالك طيب

يوووووة مليش عاوزة منى ايه .... سيبينى فــ حالى طيب دلوقتى

وحين أقول لها دى حاجه انت مش هتفهميها أو مش هتعرفيها

وكأن امى هى فقط أمى لا تعرف شئ غير انها امى التى لا تعرف شئ

أوقات كنت أخرج لبعض مشاوير فــ أمر عليها فى عملها

لــ أفاجأ بأمى وهى تعمل

ليست هى أطلاقاً تلك المرأة التى ترعانا وتقوم بتربيتنا

رئيسه قسم الاحوال الشخصيه والنيابه الحسبيه بوزراة العدل

والتى تقوم بتوزيع التركات والمواريث حين يكون الاطفال قصّر

وتعين عليهم اوصياء من زويهم

وقد تصل تلك التركات فى بعض الاحوال الى ملايين

لكن أمى وهى المرأة التى تعمل وتربى مع أبى 4 من الابناء

لم تمد يدها يوماً الى قرش ... لم تقبل يوما هديه

من أى مما تقوم على خدمتهم بالعمل ... غنيا كان أو فقير

لم تقبل حتى هديه فى وقت كانت الاحوال غير الاحوال والظروف غير الظروف

لم تدخل علينا البيت تحمل شئ لم تدفع ثمنه

علمتنا أننا أفضل من أخرين حولنا ... فهم توافر لهم الكثير و تمتعو به

لكنا أتيحت لنا الفرصه كى نكون أفضل ونحن رفضنا ان نمد يدنا

أبتسم حين أرى أمى تدير كل هذا العمل ....

وانا أقول لها فى البيت مش هتعرفى او دى حاجه متفهميش فيها

أمى التى علمتنا أن لا نطلب شئ ولا ننظر الى شئ لا نمتلكه

والتى جهدت فى عملها وجهدت فى تربيتنا

والتى وقفت الى جوار أبى ... فما من شئ قام به ألا يدها بيده

والى الان حين اقول لها وقد قاربت على الخروج الى المعاش

مش كفايه بقى يا ماما شغل لحد كدة ... انت عملتى اللى عليكى

صحتك مبقتش تستحمل كل دة ...

واحنا الحمد لله وكل واحد فينا يقدر يتحمل مسؤليته

لتقول لى مبتسمه لسه فاضل شويه فى الشغل وشويه فى الصحه

وعشان لو أى حد منكم احتاج حاجه وجه طلبها منى مقولش مفيش

انا امكم وهفضل دايما عاوزة أديكو عاوزة دايما اقول خدو

والله يا امى وبالرغم من أى شئ

فـــ أنت قدمت لنا شئ أكبر مما قدمه أى شخص رأته عينى

وحتى الان أشعر انى أوفر حظا وأكثر سعاده ألاف ألاف المرات

لأن أمامى الفرصه أن أقبل يدك واقول لك

كل سنه وانت طيبه يا امى

.

تااااااااج

سلوى صاحبتى ... حبيبتى

عاوزة تورطنى فى تاج

وبصراحه دى مش اول ورطه حد يحب يحطنى فيها

أتعملت فيا كتير قبل كدة بس كل مرة كنت بهرب

المرة دى سلوى مصممه تزنقنى

وتقولى قال ايه تاج الطفوله

طفوله ايه يا سلوى اللى انت عاوزانى اتكلم فيها دى

دة على اساس ان اللى انا كنت فيه دة كان طفوله ؟

مصّرة يعنى ؟ طفولتى !!! هيييييه دنيا

ألا هى الطفوله دى طيب من كام لكام يعنى ؟

ما علينا كنت طفله جميله والله وامورة وكانت امى بتبذل محاولات جبارة

عشان تخلينى بنوته وفيونكات والحاجات دى

لكنى كنت أرفض بأباء أنى أعمل فيونكات وأقعد فى البيت ألعب بعروسه

وعليه فمقر أقامتى الرسمى كان الشارع وحتى بعد منتصف الليل بساعات

يعنى اطلع بيتنا على 3 الفجر كدة اغطى امى وابويا اللى نامو مكانهم

وهما مستانينى أرجع ..... أأجر عجله وأفك واللى يلاقينى بقى

اة ... وانا صغيرة وقبل ما نكتشف التحرش والحاجات دى كانت امى تقولى

أوعى تخلى حد يقربلك أو يلمسك او حتى يطبطب عليكى خاااالص

مهما كان الحد دة وعليه فأى شخص كان يحاول يتقرب للطفله الحلوة

ذات خصلات الشعر المتهدله حول وجهها اللى بتلعب فى الشارع دى

ولو بحسن نيه من باب حب الطفوله كان بيستمع لوصله من

الصريخ والردح والشرشحه ويتفضح فضيحه أكبر من فضيحه أيران كونترا

وجرسه تفوق جرسه شاوشيسكو أثناء سحله فى ميادين رومانيا

ويبقى مادة أعلاميه نادرة لسكان الشارع لمتابعه احداثها بشغف
كنت الطفله الوحيدة اللى بتتفرج على نشرات الاخبار فى سن 5 سنين

وبتتابع الجرايد بانتظام فى 6 و عليه كنت طفله شبه مصابه بالأكتئاب ولها فكر وأيدولوجيا .

يعنى كنت بكرهه التعليم جدااا وشايفه انه نظام فاشل فى مصر

وعليه مش بحب اذاكر و أرفض انى اخد مناهج غبيه وبكدة فشلت فى التعليم

كنت بكرهة جدا كمان ان حد يعاملنى المعامله الهبله اللى بيعاملو بيها الاطفال

من نوعيه يا أمورة وشطورة وانت كتكوته والحاجات المتخلفه دى ...

يعنى مش من حق حد انه يعامل الطفل على انه حيوان مدلل او كائن متخلف

لمجرد انه صغيرواللى كان بيحاول يعمل الحاجات دى معايا

ويحط ايدة على وشى وخدى والكلام دة كنت بعضه

وطبعا غنى عن القول انى كنت عيله فى قمه الشقاوة

وأطلع فوق الشجر وأجر شكل بلد وأخانق طوب الأرض

وخدت علق بكل ما يخطر فى بال من أول شبشب امى والحزام بتاع ابويا

لحد شماعه الهدوم ومضرب السجاد وحتى عصايه الغليه

وبرضه كنت مدللة للغايه وحتى الان فأنا دلوعه أبوها

بأختصار طفله متشردة عصبيه مكتئبه شقيه فلسفيه

وعلى الله تكونى أستريحتى يا سلوى وعجبتك الفضايح دى

أما بقى نهدى التاج دة لمين ... فأنا ميهونش عليا الاحراج دة أعمله فى حد
ولا الفضايح دى ... مش هعمل اهداء واللى نفسه يحرج نفسه يتفضله

.

وبقيت مشهورة

واللا وبقيتى مشهورة يا صفاء

.

وأسمك وأسم بلدك نزلو فى الجرانين

.

طبعا أسم بلدنا دايماااا بينزل فى مختلف الجرايد

.

بس اول مرة ينزل فى صفحه غير الحوادث والوفيات

.

والصبح بقى بقول لأبويا هاتلى جريدة العالم اليوم

.

عشان نازل لى فيها لقاء

.

قالى خير !!! أخترعتى حاجه وانت نايمه ؟

.

.

.

.

.

.

.

.

.

.

.

.

.

.

.

.

.

.

.

.

.

مش مقدرين حجم الاهميه اللى بقيت فيها دلوقتى

.

وأن جرايد ومجلات وقنوات فضائيه وقنوات مائيه بتسعى حاليا لأجراء لقائات معايا

الشكر كل الشكر طبعا للصحفيه الجميله مسؤله صفحه المدونات فى الجريدة

.

أسماء رمضان لحوارها الجميل والرقيق زيها

.

وشكرا لمصطفى ريان على مسعاة فى الحوار دة

.

وشكرا للباشمهندس شريف على تعبه وتحويله المقال على الاسكانر وأرساله ليا

.

لأنى بحثت عن الجريدة دى حتى أحولت قدماى وقدم أهلى ولم نجدها

.

وأشكر الشعوب الكادحه التى تعبت من أجل تحقيق الحلم

.

لالا السطر الاخير دة مش ليكو دة للخطاب التاريخى بتاعى بعد الاستقلال

.

ومش عارفه بقى بصراحه بعد النهاردة هقدر اتكلم معاكو كدة عادى

.

والا لازم أخد وضع يتناسب مع مكانتى الاجتماعيه الجديدة

.

بس يالا بقى عشان تعرفو مدى تواضع العظماء وحسن تعاملهم مع عامه البشر

.

هكون قدوة يا جماعه وهعاملكم حلو وأمرى لله

.

والله الموفق

.

دوله الصعيد المجاورة

أكتشفت أننا وحقيقا لا ننتمى لدوله واحدة وهذا ما تأكدت منه بالفعل
فنحن هنا كـ مواطنين نحمل الجنسيه الصعيديه
وعليه فنحن لسنا من التابعيه المصريه ولكنا جيران لهذة الدوله الشقيقه
قوانينها لا تطبق علينا و لا نتمتع بمميزات المواطنه بها
كما ان الخدمات المشتركه والتى تعبر الحدود بين الجارتين رديئه للغايه
ونهايه فنحن لا نستخدم عمله واحدة

وبما أن مقومات الدوله هى علم وعمله وحدود
.
وبما أننا لا نعترف بالعملات الصادرة من الدوله
وهى الفضيه من فئه جنيه وخمسون قرش
ولا العملات الورقيه ذات الفئات الصغيرة
ولا نتعامل بها أطلاقا فى حين انه يتم التعامل بها فى مصر

وبتعريف الحدود المصريه
***********************

والممتدة من الغردقه وشرم الشيخ شرقا وحتى مارينا وسيدى عبد الرحمن غربا
ومن الاسكندريه بلازا وبرج العرب شمالا
وحتى اخر خط المترو بضواحى الجيزة جنوبا
فنحن خارج حدود نطاق تلك الدوله الجارة والتى حتى لا تراعى معنا حقوق الجيرة

فالمواصلات شبه مقطوعه بين الدولتين لو أردت أستخدم وسيله مواصلات أمنه
كالقطارات مثلا فحين تذهب لمحطه مصر وتطلب قطع تذكرة ذهابا أياب
كأى سائح محترم فأن الموظف المختص سيخبرك بأنه يستطيع ان يقطع لك التذكرة ذهابا فقط
لا أيابا وكأنها رحله بلا عودة ... فأذا أردت الرجوع يمكنك قطع التذكرة من الجهه الاخرى من الحدود
أو يمكنك اللجوء الى الهجرة غير الشرعيه
و عبور الحدود عبر وسائل غير مأمونه فى السفر
كالأتوبيسات الغارقه أو الميكروباصات ذات السرعه الجنونيه

وعليه فمن الممكن أن نطالب مثلا بأنشاء سفارة بين الدولتين
لرعايا مصالح مواطنيها أقتداء بكل دول العالم
وكذلك أنشاء فرع لشركه مصر للطيران دولى الصعيد
فقد نتمكن وقتها من قطع تذاكر سفره ما ذهابا أيابا

بالنسبه للقوانين
******************

فأن كل جمهوريه مصر العربيه تطبق الاجازة يومى الاسبوع الجمعه والسبت
فى حين أنها لا تطبق فى أى من محافظات الصعيد سوى أجازة الجمعه فقط
بل وبعض المحافظات طبقت فى بعض مدرياتها الخميس كأجازة ايضا
فى حين ان مدريه الازهر تطبق الجمعه والسبت

باقى القوانين مثل القبض على مرتكب جريمه مثلا
لا يطبق على الاطلاق ... فنحن نتعامل بقانون
لو قفشوك ... وعليه فلا مرتكب جريمه قتل او مجزرة ما يقبض عليه
بل يتم ألاستسهال والقبض على أول مجنون ماشى فى الشارع

وألاسلحه غير المرخصه يتم مصادرتها فقط بالطلب
حين يجد الضابط المسؤل انه مطالب بتسليم عدد معين من القضايا

ولازلنا حتى الان نتعامل بأنبوبه البوتجاز المحرمه دوليا
والتى يصل سعرها شتاء الى ما يفوق 25 جنيه وأذا وجدت

فنحن نطالب مساواتنا بجيران مصر من الحدود الشماليه أسرائيل
عملا بمبدأ حسن الجوار وأسوة بمعامله الجيران الشماليين
والتى تدعم لهم الحكومه الغاز
فلا نطالب لا سمح الله أدخال الغاز الطبيعى الى محافظاتنا ومدننا او مراكزنا
فقد نطلب الحد الأدنى من المساواة وهو توفير الغاز

مفضلش غير العلم
**********************

وهذا والحق يقال لا يحترم فى أى من الدولتين الجارتين

مصر والصعيد