الثلاثاء، 2 فبراير 2010

مصلحه


خرجت لشويه مشاوير خلصت بدرى قولت اعدى على ماما فى الشغل ولو خلصت نروح سوا
دخلت لقيتها لسه بتقفل المكتب
...
ايه يا حاجه مروحه ؟
لا هروح اخلص ورق من المبنى التانى ... استنى هنا وانا 10 دقايق وراجعه ... مش هتأخر
اقعدى على مكتبى واقرا جرنال او مجله لحد ما اجى

قعدت وشديت الكرسى فى الشمس ومستمتعه بالجريدة وجانى فنجان قهوة كمان وإذ فجأة
سلام عليكم
وعليكم السلام
لو سمحتى يا مدام مطلوب أمضائك والختم على الطلب دة
طيب استنى 10 دقايق برة حضرتك
الراجل راح لف حوالين المكتب وجاى بيميل
أصل هقولك
طيب ارجع مكانك وانا هفهم اللى انت عايز تقوله
لا هوريكي الطلب بس
طب ارجع مكانك مناخيرك قربت تدخل جوة ودنى ... فيه ايه يا عم الحاج شويه وهتطلع على كتافى
الراجل رجع مكانه وهو امال يبرطم
عايز الحق الخزنه قبل ما تقفل
طيب اتفضل اقعد بس برضه 10 دقايق
ليه يعنى هو انت بتعملى ايه ... مانت بتقرى الجرايد ... مش هو دة الشغل اللى بتقبضى عليه مرتب
لا يا سيدى دة مش مكتبى ... الموظفه اللى هنا راحت المبنى التانى وجايه حالا .. من فضلك اقعد استناها
ولما هو مش مكتبك قاعدة عليه ليه
(وقعتك سودة )
معلش غلطه .. دقايق بس
ما تمضى انت وخلاص
يا سيدى انا لو مضيت على ورقك هيعملوة قرطاس ويلبسوة لك فى دماغك لأن ببساطه أمضتى ملهاش قيمه
وقف دقيقتين وبص فــ ساعته وصوته على
خلصونى الخزنه هتقفل ولو مادفعتش هتحبس .... عايزة فلوس ؟ قولى
تاخدى فلوس وتخلصى ورقى
حلو حلو حلو قعدت على مكتب حكومه 5 دقايق ولبست قضيه رشوة أو بمعنى أصح لبستها لأمى
لا مش باخد فلوس ... استهدى بالله واصبر
خلاص اى حد يمضى ويختم مش الختم قصادك اهو ... خلااااص أختمى
آآآآة بقى هى حكايه ختم
بصراحه عايزة اسكته ومش عايزة اى موظف يجيي على صوته لأن موظفين الحكومه تخصص خوازيق وخوابير واخاف اى حد يجيي يقاول الراجل ويلطع الختم اللى فـ عهدة أمى وتبقى الوليه دخلت السجن على حسى فى قضيه رشوه او اختلاس
لا والله ونعم العيال ... افرحى بخلفتك يا امه
طيب هات الطلب (امسكه وامال ابص فيه قال بفهم ) بس افهم ايه دى أمضائات بالأزرق والأحمر وأختام بالأسود والكحلى وقسايم دفع فوشيا ولبنى وصفرا
دى ولا زينه رمضان
بتعملى اييييه
الله مش براجع على الورق ؟ وبعدين انت مستعجل ليه لسه فاضل ساعه على المواعيد
الراجل دخل على نبرة استعطاف ويا مدام لسه فيه اجرائات تانيه والنبى من فضلك امضى
وبعدين ما يروح يشوف البلد اللى خلت الورقه لازم لها أمضائات 120 موظف على الأقل ولـ30 لطعه ختم لما الطلب بقى عامل زى الوان الطيف وأقرب شبهاً بحلاوة المولد
يا سيدى انت عايز امضه مدير عام ... ما تبص كويس دة شكل مدير والا نيله
وبعدين بصراحه انا مش موظفه هنا اصلا

امال قاعده هنا ليه
(عايزة اخلص منه)
دة مكتب ماما وهى جايه
ماما ؟ ليييه هى بقت حضانه وبيجيبو عيالهم معاهم
(الله يحرقك يا شيخ ) أسيب له المكتب واجرى دة والا ايه
يعنى يامى ماكنتيش قادرة تقفلى وتقولى لى غورى يا بت روحى وكنتى قفلتى مكتبك وريحيتنى من المصيبه دة
انتو شويه موظفين كذا وكذا وكيت وانا هروح اشتكيكي وهبعت فيكي شكاوى لقناة المحور
(ليه قناة المحور ... ما تخليها الجزيرة احسن .. هو انا قصفت بيتكم بالصواريخ يا حاج ؟)
انا هبلغ عنك للوزير الحمار اللى انت تبعه

عايزة اقوله ان الوزارة اللى انا تبعها هى الوزارة الوحيدة فى مصر اللى ملهاش وزير بس مش وقت استظراف دلوقت ومناقشه القضايا السياسيه والوضع العام فى مصر
المهم انى خلصت منه حتى لو كان رايح يشتكى
شويه وامى دخلت ....
منورة المكتب يا قطه
بأبتسامه صفراااا
تعيشى يا ماما .. طب انا همشى دلوقت أصلى افتكرت حاجه اجيبها
ألا قوليلي يا ماما ... هو انت فاضل لك قد أيه على المعاش

هناك 34 تعليقًا:

سلوى يقول...

ايه وداكي اصلا

هي حضانه يا بنتي
نيا هاهاها

هو الراجل معذور يا صفاء

اي ورق بيحتاج 1000 توقيع والف ختم
وطلوع ونزول
وكذا مشوار

يعني هو معذور

ثم مش انت قعدتي ع المكتب وعملتي فيها مدير .. اشربي بقى

وكمان عايزة تطلعي امك معاش مبكر

ونعم الاولاد والله

بس هو مناخيره كانت طويله لدرجه انها هتخش في ودنك
نياهاهاها

تستاااااااااااهلي

صفــــاء يقول...

الله ... كنت رايحه اتفسح عند امى شويه
مكاتب الحكومه ملك للجميع
والله يا سولى كان غرضى برئ
قولت بدل مااروح وحدى وتروح وحدها اعدى عليها ونروح سوا
ماعرفش انى هلبسها مصيبه وتحقيق

مش معاش مبكر يا اختى بس بما انه هيشتكى امى اللى هى الموظفه اللى مش رضيت تمضى فــ هيحولو امى للتحقيق وفى الحاله دى الأفضل تطلع معاش بدل ما زيارتين كمان منى ويعتقلوها

ENG./ELSAYED,PMP يقول...

مبتعرفيش تستهبللى يا صفاء

هنعمل أيه بقى ... يا جودعان الحياة دى مش عايزة البراءة دى ... وانا مستنية ماما ... وتدخلى نفسك ف حوارات

دى حلها

والنبى يا خويا انا مستنية زيك المدام راحت تمضى ورق من المبنى التانى وانا عايزة اخلص انا كمان

طيب وايه اللى مقعدك على مكتبها

والنبى يا خويا معرف انه مكتبها

اهو الكرسى اللى لقيته قعدت عليه

وبعدين هيه قليتلى خللى بالك م المطرح يا حبيتى على ما اجى

تمشى مش كده

سيد

صفــــاء يقول...

يوة ... يعنى انا غلطانه ؟

والنبى يا بيه ما جه فى بالى
وماعرفش انه هيطلع مجنون ويقف يهتف زى اللى طالع ورا سعد باشا

انا لو كنت اعرف انها هتوصل لشكاوى وتحقيقات كنت فزيت قومت ووقفت جنبه على الباب اصلا

وعموما يا ياشمهندس امى لسه مارجعتش لحد دلوقت ... تفتكر انا وديتها فى داهيه ؟
مظلووووومه يا ناااس ... والنبى مظلومه

ENG./ELSAYED,PMP يقول...

الحاجة هترجع تقولك
موتشاكرين ...
هتيلنا قناة المحور لما نشوف التحقيق وصل لحد فين

karim يقول...

تحياتى سيدتى, بجد استمتعت بقصتك الجميلة جدااا بس الحقيقة انتى غلطانة كنتى قبضتى وختمتى و خلاص و مش فى حاجة هاتحصل كنتى استفدتى و رجعتليك بحاجة حلوة البييت,هههههههههه, الا سؤال لو تسمحى شغلك اية اللى مالوش وزير دة دووول على قفا من يشيل, تحياتى

sal يقول...

ما هو المحترم لازم يدوخ السبع دوخات
عشان يقضى مصلحته
امال يعنى يخلص علطول ويفوقلنا
ويقول على سيادة الوزير حمار
هههههه
ربنا يصلح الحال

صفــــاء يقول...

باشمهندس سيد
*************
لا رجعت فعلا دلوقت
وبتسلم عليا قوى وبتقولى متورنيش وشك فى الشغل تانى

صفــــاء يقول...

كريم
******
للأسف الشديد مليش فى سكه الرشوة
بس لو هو كان قال هديه كان بقى موضوع تانى
وبعدين امضى واختم على ايه دى أوذونات دفع وورق رايح خزنه أختم انا على حاجه اقل وابقى ضربت الفرق فى جيبي ؟
واجابه على سؤالك
أكبر تعداد من شعب مصر بيعمل فى وزارة بلا وزير ... العواطليه

صفــــاء يقول...

sal
****
هو قال على سياده الوزير الحمار اللى مشغل واحدة زيي مش فاهمه شغلها
بس والنبى ما شغلى
وبعدين دة كل الأختام والأمضائات دى عشان يذوقو له الورق بس
هو اللى معندوش عقليه فنيه

هي وظروفها يقول...

هههههههههههههههه

خلفتك جميله يا صاصا اديكي هتكوني سبب

مباشر في شهره والدتك
هي دي البنات ولا بلاش

الراجل ده تلاقيه حصل وقابل نوعيه من الموظفين اللي بيوقفو المراكب السايره

فافتكرك منهم

هو معذور اقلبي الموقف وخليكي مكانه

هتتصلي بمحمود سعد

وبعدين انا اعرف جار ليه بسبب غلطه موظف وتنفيضه الراجل اتحبس شهر ولولا الستر والمعارضه اللي عملها كان زمانه نزيل سجن الأستئناف
....
هي دي حكومتنا الذكيه العبقريه اللولبيه الجهنميه

صفــــاء يقول...

هى وظروفها
************
والله حقيقي عارفه ومقدرة كل ظروفه
وفاهمه انه يا يلحق يا مايلحقش ودى غرامات واحكام وخلافه
بس هو اعصابه فلتت على الأخر وانا مفيش فأيدى حاجه اعملها له
طلبت منه بس يستنى شويه هو تخيل انى قاصدة اعطله وعنهااااا
وراح قدم شكوى فى الموظفه
نيهههااا اللى هى امى
وهى الصراحه فرحت بيا قوى قوى قوى
وقالت لى من هنا لحد المعاش ماتورنيش خلقتك

خواطر شابة يقول...

ههه ضحكتيني بس الراجل كده كنت انت بالنسبة له القشة التي قصمت ظهر البعير الراجل تلاقيه يا حبة عيني لافف كعب داير على كل مكاتب المصلحة وكل موظف يلطعه ساعة على ما يحط الختم الشريف فلما وصل عندك كان خلاص على اخره فمعذور واحمدي ربك انه حيشتكيك بس لقناة المحور ده حتى معتز طيب وابن حلال أحسن ما كان يشتكيك لاسمه ايه اللي بيعمل برنامج الحقيقة يادي الزهايمر تاني نسبت اسمه

صفــــاء يقول...

وحياتك وللمدير العام ورئيس الهيئه وللوزير الحمار اللى انا تبعه
(هو قالى كدة)
وبعدين هو يعنى من حظى يجينى بعد ما لف ودار وشاط
هو قليل البخت يلاقى الختم فى المكتب والا ايه
بس بجد والله ربنا يكون فى العون ويرحم كل انسان له مصلحه فى هيئه حكوميه

اقصوصه يقول...

loooooooooooool

انا لو مكانك تبقى هاي الزياره

الاخيره لي لهالمكان :)

صفــــاء يقول...

صدقينى يا اختى دة رأي امى برضه
وخصوصا انها فرحت جدا بزياتى دى ومن شدة فرحتها طلبت ماكررهاش

البنفسج الحزين يقول...

ههههههه
يعني يعملوها الصغار ويقعوا فيها الكبار ...أنا رأيي من رأي والدتك طبعا انك متكرريش الزيارة تاني لحسن المرة دي رسيت ع المحور المرة الجايه بعد الشر هنشوفها في خلف الاسوار....

صفــــاء يقول...

فيه ايييه ... حرام يا ناس يا شريرة
هو انا كنت قاصدة يعنى

خلااااص مش هنروح تانى

مصطفى ريان يقول...

معلش يا صفاء بس انت عارفه المواطن بيكون ملهوف قد ايه علشان يخلص مصلحته
هو تلاقيه كان طالع عينه بين اكتر من مكتب ومش فاضله غير الامضاء بتاع والدتك
ربنا يكرمك ويكرمها يا صديقتى العزيزة

حاول تفتكرنى يقول...

صراحة الراجل معذور

فالموظف والمواطن فى نفس الدائرة الروتينية المغلقة

احييك على السرد والتشويق

تحياتي

mohamed ghalia يقول...

هههههههههههههههه
دى غلطتك يابنتى تقعدى على مكتب حكومى ليه جبتيه لنفسك ههههه

غير معرف يقول...

ههههههههه

كنتي اشتغلتيه وخدتي الفلوس :)

وحشاني

مووووواااااااااااه

تحياتي

Unknown يقول...

أما أنتى ياصفـاء
ملكيش حق تقولى
للراجل دا مكتب ماما:)
الحكومة مافيهاش ماما ياصفصف:)

صفــــاء يقول...

مصطفى ريان
************
هههههه والله يا درش ماكنت عارفه اضحك والا يصعب عليا حال الراجل
عارفه ومقدرة ظروفه
وعارفه ان دة روتين ومفيش فأيدى حاجه
وعاجزة فعلا انى اخدمه بأى شئ
اليومين دول يومك بقى يا درش
ان شاء الله يكون يوم ناجح وموفق وتفرح بيه

صفــــاء يقول...

حاول تفتكرمى
**************
هو معذور عارفه والله
بس الروتين دة شئ عجيب جدا لدرجه ان احمد رجب كان صادق جدا لما قال عجائب كوكب الروتين الحكومى
أنك تخلى روح بنى أدم ومستقبله فى ايد أمضاء او ختم لشخص واحد لو غاب يوم او حتى راح يقضى حاجه فى نفس المصلحه يبقى الراجل دة ممكن يتحبس
رجوعك نورنا

صفــــاء يقول...

محمد غاليه
***********
وانا كنت اعرف منين انى هبقى مبخته أوى كدة واول ما اقعد هلبس مصيبه

صفــــاء يقول...

فتاة من الصعيد
*****************
ههههه الخوف يا مرمر كان من مسمى كلمه رشوة بس لكن لو هو كان قال دى هديه والنبى قبل الهديه او اكراميه مثلا كان بقى ماشى لكن رشوة لااااا كلا البطه
انت وحشانى اكتر بوسه وبوسه

صفــــاء يقول...

دكتور نورا
***********
امال كنت اقوله ايه بس وهو مصمم انى امضى واختم
لو كنت مضيت كانو عملو الطلب بتاعه مراكب وخلوة يلعب بيها
ولما مش مضيت راح يسترة اشتكى امى انها رفضت تمضى له
مش انا شاطرة بقى ؟
:))))

r يقول...

هههههه
أيه بس يا صفاء عمرك ما اشتغلتى اكيد فى ديوان الحكومه قبل كدا طبعا
دا يا بنتى المألوف فى الواردين عليكى
بس الصراحه بردوا الروتين الى فى غايه السخافه خلى الناس بتستسهل اى طريقه(مشروعه او غيرها) علشان مصلحتها تخلص
والا فوت علينا بكره

الجانبين خاطئين - لان فى فعلا موظفين فى الحكومه يرفعوا الضغط فى برودهم

الهم على اله يكون الموضوع عدى على خير للوالده
و ابعدى عن الحكومه يا بنتى وغنيلها

--------------------------
انا هرد عليكى على الفيس بوك
سلمتى دايما

صفــــاء يقول...

بسنت
*****
والله يا دكتور ماحصليش الشرف قبل كدة والحمد لله انه ماحصلش
دة الراجل كان قرب يطلع فوق كتافى وهو بيكلمنى
والروتين مؤلم والموظف ليس بأقل إيلاماً ... بقى قليل لما تلاقى موظف متعاطف مع المواطن او بيحاول يخفف عنه ويخلص له شغله بروح طيبه
يالا الحمد لله امى رجعت بسلامه الله

فى انتظار الرد يا قمر

وحي القلم يقول...

السلام عليكم
طبيعي جدا ان الراجل يتنرفز ما هو لو حضرتك حاولتي تخلصي ورقة من مصلحة حكومية احتمال يجيلك ارتكاريا ومش هتخبلصيها برضه
ودي غلطة مزدوجة في رايي
ودمتم ودامت مصر

MKSARAT - SAYED SAAD يقول...

بصرف النظر عن انه مستعجل وانه عايز يخلص مصلحتة هو راجل رزل
بس احسن علشان متقعديش مكان حجد تاني هههههههههه عجبتني

تحياتي

صفــــاء يقول...

مصعب صلاح
**********
ماهو انا عارفه انه طبيعي الراجل يتنرفز لأنه كان ممكن يتحبس
بس الحمد لله ربنا ستر
وبالنسبه لأى مواطن يرميه بخته المايل لأى مصلحه حكوميه
ربنا معااااك

صفــــاء يقول...

سيد سعد
*********
هو كان رزل فى حاجه واحدة وهى أنه مصمم يقف جنبى عند المكتب ويميل عليا ويكلمنى
مع انه والله لو وقف قصاد المكتب زى كل خلق الله واتكلم برضه هسمعه كويس
وخلاص يا بيه حرمت وأصلا أمى طردتنى
شرفتنى بشدة يا فنان