الخميس، 25 فبراير 2010

سلوكيات مشرّفه

المكان : القومسيون الطبى
حيث يجرى الكشف على سائقى السيارات الأجرة لمنحهم رخصه مهنيه
الشخص : فنى تحاليل
يقوم بالفحص لتحديد نسبه السكر إن وجد وأكتشاف أى تواجد لمواد مخدرة

الثمن : 2 جنيه تدفعهم له ويخرج لك شهادة بخلو عينه البول من السكر
2 جنيه وتستخرج شهادة أنك سليم معافى صحيا ... ومن غير فحص
2 جنيه يمد أيدة الموظف وياخدهم من كل سائق
مقابل منحه صك السلامه الصحيه
2 جنيه تمن أرواح ناس هتركب معاه أو تركب فى عربيه يرميها النصيب تحت عجلاته إن جات له غيبوبه سكر ... أو سايق وهو مسطول
2 جنيه من 150 سائق يتم عرضهم يومياً على كشف القومسيون
2 جنيه والموظف فنى التحاليل يمتلك علامه صلاة وذقن طويله
لم يمنعه أتباع سنته وأداء فروضه من أنه يمد أيدة لــ 2 جنيه
ويا بلاش

هناك 20 تعليقًا:

خواطر شابة يقول...

تعرفي ان مشكلتنا الكبرى اننا بنبعد الدين عن تعاملاتنا وعندنا انفصام شخصية رهيب يعني تلاقي الواحد مننا ياخذ رشوة بس ميفتهوش فرض او تلاقي اللي بيشرب خمر انما لحد رمضان وخط احمر وقس على هذا اشياء كثيرة انا مؤخرا ومن تجارب مررت بها لم تعد اللحية وزبيبة الصلاة مقياسا للتقوى عندي .
انا عندما قرأت العنوان ظننت اني فعلا سأطلع على سلوك مشرف وحتى مع وجود الصورة وفي بداية القراءة اعتقدت انه لشخص يرفض الرشوة لاكتشف انه غارق فيها لاذنيه عافانا الله

ENG./ELSAYED,PMP يقول...

صفاء
كنت عايز اطلع شهادة ...!
وفاة لهذه الامة

صفــــاء يقول...

خواطر شابه
***********
صدقينى لم أهتم لا لـ ذقنه او علامه الصلاة أو تدينه الشكلى
ما صدمنى ... اللى خلى المايه تقف فى زورى اصلا
أنه بـ 2 جنيه بس ... يدى شهادة لتحليل مش هياخد منه 2 دقيقه
دقيقتين اتنين بس ويبقى عمل اللى عليه ورضى ربنا ورضى ضميرة وحافظ على أرواح ناس
علامات تدينه دى كانت أخر حاجه لاحظتها ... بعد ضياع ضميرة
بــ 2 جنيه

صفــــاء يقول...

ياباشمهندس
***********
دة تعليقى على البوست بتاعك
واللى ماقدرتش اقوله امبارح

غير معرف يقول...

على فكره السواقين بيبقوا عاملين حسابهم ومبطلين المخدرات من فتره معينه علشان موش تان بالتحليل

بس الاتنين جنيه دي اتاوه لان ممكن يضره الفني حتى لو موش بيشرب او موش عنده سكر

ابتزاز يعني

شيء مؤسف ... ورقابه غائبه

تحياتي

بحر الالوان يقول...

كل سنة وحضرتك طيبة والامة الاسلامية بخير .

ونسال الله ان يرزقنا خلق النبي الكريم عليه افضل الصلوات والسلام .

sal يقول...

كل عام وانتم بخير
كثير من الخطايا يتم تبريرها
ويتم تقبل ذلك حتى من اهل اللحى

ويارب ما يطلعش علينا حد يكلمنا
على فقه الرشوة

لك تقديرى

r يقول...

كل سنه وانتى طيبه الاول
وبعدين يا صفاء لو غليت وبقت 50 مثلا هتلاقى شكاوى كتيره من الظلمه اللى مش مراعيين ظروف السواقين الشرفاء
الحل يا صفاء بصرف النظر عن التمن ان يكون فى زمه فعليه فى الكشف الفعلى مش التزوير زى ما كل حاجه بالتزوير

صفــــاء يقول...

فتاة من الصعيد
*****************
طيب لو كان السواقين عاملين حسابهم ومبطلين مخدرات
مش بيكونو عاملين حسابهم ومبطلين سكر
على اساس ان الأختبار أساساً هو لنسبه السكر فى الدم

وسواء الـ 2 جنيه رشوة .. أو أتاوة
فهى على كل حال ... موظف حكومه مد أيدة وأخد 2 جنيه وطلع شهادة مضروبه أكيد هيروح بسببها أرواح ناس
كل سنه وانت بخير يا قمر

صفــــاء يقول...

بحر الألوان
***********
كل سنه وانت طيب معتز وبكل صحه وسلامه

تقبل الله دعواتك

صفــــاء يقول...

sal
*****
كل سنه وانت طيب
زى ما قولت والله قبل كدة ... موضوع اللحيه دة كان آآآخر شئ يلفت الأنتباة بعد الكارثه اللى بيتسبب فيها البيه الموظف بمنتهى الأستهتار
ولو طلع فقه الرشوة يبقى مش فاضل غير فقه السرقه ونبقى وصلنا
تحياتى لك

صفــــاء يقول...

بسنت
******
كل سنه وانت بكل خير يا دكتور
ينعاد عليكي

هههههه تصدقى صح ... المفروض نقنن الرشوة ونخليها تناسب كل شرائح المجتمع
مراعاه لظروفه وضيق ذات اليد
ومن هنا أحب اشكر السيد موظف لتقديرة لحاله وظروف زمايله المواطنين وأكتفائه بــ 2 جنيه

استراحة محمد يقول...

الحاجات فى مصر بقت مركبة بشكل يحير العقول
يعنى فنى التحاليل ده بيلعب دور مهم فى المحافظة على ارواح الناس .. وفى نفس الوقت مرتبه ما يكفيش فار عايش لوحده
مين الجانى ومين المجنى عليه هو ده السؤال المركب

حلمى البعيد يقول...

السلام عليكم

لا يا بلاش 2 جنيه فرصه حلوه ومبلغ حلو علشان نبيع دينا ونرتشي

والله الدين بكنوز الدنيا

والرشوه دى قبل ما بتبعد المسافه بين المرتشي وبين ربنا

بتقلل قيمة الانسان

ياه لو الناس فكرت بعقل شويه

اكيد هنتغير

أحــوال الهـوي يقول...

حضرتك ما و ضحتيش البول من عند السواقين و الا من عند الموظف

لاننا لازم ما نتهمش حد الا لما نتأكد فيمكن البول من عنده
عينه في 150 طلب يعني كده الراجل هينشف

تحياتي

غير معرف يقول...

حين نحل مشكلة أن يعيش هذا الموظف بصورة كريمة .. يمكننا ساعتها أن نحاسبه

هذا هو الذى يحل مشاكل الشيزوفرينيا التى يعانى منها المصريون

فاذا كانت الضرورات تبيح المحظورات بصفة عامة فهل هناك ضرورة اقوى من رعاية اسرة ؟ مسكنا وملبسا وعلاجا وتعليما ولا اقول ترفيها فقد اختفى هذا اللفظ من حياتنا تماما ؟

صفــــاء يقول...

أستراحه محمد
**************
يكفى فار او مايكفيش صرصار
مش مشكلتى ولا مشكله الناس اللى هتموت بسببه
ومش كل بنى أدم ظروفه صعبه يضحى بأرواح ناس
وخصوصا لما يكون مسؤل عنها
والجانى بقى هو كل واحد ساكت على ضياع حقه وراضى بالغلب
منور يا محمد والله

صفــــاء يقول...

حلمى البعيد
*************
وعليكم السلام

ماهو الـ 2 جنيه دى بقى شوفى كااام واحد بيتعرض عليه يوميا
لا ماتخفيش مش بايع ضميرة بالرخيص
بيلم تمنه

هو زى مانت قولتى كدة ... الدين
سعيدة بزيارتك ليا هنا
وإن شالله دايما

صفــــاء يقول...

أحوال الهوى
************
هههههههههه ويكون فيه بول ليه اصلا
هو الراجل مش بيحلل ولا بياخد عينات
أخرة ادفع اتنين جنيه يديك شهادة صحيه انك فله

وكفى الله المؤمنين شر التحليل

صفــــاء يقول...

شريف باشا
***********
انا ماقولتش مايرتشيش لا سمح الله
الرشوة حق مكفول بالقانون لكل مواطن مصرى مش لاقى يأكل عياله
ولا بقول يبيع ضميرة بأغلى من كدة شويه
بالعكس الراجل عندة رحمه ومخلى التسعيرة فى أمكانيه كل مواطن
بس بقول على الأقل راعى ربنا وحلل القرشين وأعمل التحليل ولو طلعت واحد بس من كل اللى المتقدمين تعبان يبقى أنقذ أرواح بشر ويمكن يمكن ربنا يسامحه على مدة أيدة