السبت، 27 مارس 2010

الليله الكبيرة

حاجات قليله خالص اللى بتخليني اقعد قدام التليفزيون
كاس العالم ودورة الألعاب الأوليمبيه , عبد الحليم حافظ ومسرحيتي سيدتى الجميله وحواء الساعه 12 ... ومؤتمر القمه العربيه
والأخيرة دى بالذات بفضى لها يوم من أوله عشان اتفرج على وصول السادة الملوك والأمراء والرؤساء وأصحاب السمو والفخامه والمعالى
ولحد ما يهزئو بعض أو ربنا يكرمنى والاقى حاجه اتفرج عليها وهما بيضربو بعض بطقاطيق السجاير وقزايز الميه
ودائما وأبدا وأحب الفقرات ليا فيها ... فقرة القذافى
فــ طبعا السنه دى الأهتمام مضاعف والمتعه أكبر بوجودة رئيس للجمه (على رأيي رئيس اليمن) صاحب كلمات الجمه والديمجراطيه والسجافه


أحلى فقرة كانت السنه دى هى الملاهى , وهى ركوب اصحاب الفخامه والمعالى للسيارات الكهربائيه قبل بدء جلسه الأفتتاح , وطبعا لأنهم ناس أكل عليهم الدهر وشرب وتجشأ كمان
فــ مافيهومش حيل يمشو الخطوتين من باب المكان لحد قاعه المؤتمرات
فـ كانو راكنين لهم على جنب كام توك توك بس مركات فخمه يعنى
وانت داخل من باب قصر المؤتمرات على أيدك الشمال تلاقى الموقف بتاعهم والسواق بيقول واحد قاعه مؤتمرات واحد قاعه مؤتمرات ... نفر جلسه قمه
وعليه يشحنو السادة الملوك الكُهنه (بضم الكاف) ويلفو بيهم شويه يفرجوهم على الطرقات والعيال المصورين بيج
رو وراهم والفقرة دى كان ممكن تكمل وتبقى أحلى لو كان نصب لهم كام مرجيحه وشويه زحاليق ومدفع
وكان السادة اصحاب الجلاله والفخامه أثبتو قوتهم لشعوبهم وشجاعتهم وجرائتهم فى زق التارة واضرب ميه بمبه
زى الموالد كدة .. ويبقى اللقب الرسمى لـ رئيس الدورة 22 لأجتماع القمه
هو السيد رئيس مراجيح مولد النبى


تانى فقرة : هى فقرة الألقاء الكوميدى
********
وهى الفقرة اللى بيجرب فيها السادة الأميين الملوك والسادة الجهله رؤساء الدول مهاراتهم فى تمزيق وتشويه اللغه العربيه وكب مايه نار عليها

وإبهار المتفرجين بمهاراتهم الشديدة فى عدم القدرة على تكوين جمله كامله من 4 كلمات دون تقطيع وفصل وتهته وتفتفه وحزق وتراجع من أول السطر عشان يفتكر الجمله من الأول بعد ما ضاع مضمونها وفقدت معناها نتيجه عدم القدرة على القراءه الرشيدة للسادة ملوك وأمراء ورؤساء الدول الــــعــــربــــيـــــه
.
الفقرة التالته هى مسرحيه الأطفال
********
وهى الفقرة اللى فيها الرؤساء والملوك يزعلو من بعض ويخاصمو بعض ويحلفو ما يقعدو مع بعض فى قمه تانى خااالث ويقوم واحد فيهم يجري يقوم واحد رئيس او ملك تانى برضه يجرى وراه يشدة من ديل عبايته الملوكيه ويحلف عليه براس الجمل بتاعه لـ هو قاعد

هذا ولازالت فقرات حفلنا الساهر مستمرة

كما وأقترح ان تقام القمه القادمه فى درب شكمبه ويكون رئيس القمه هو
حضرة الأراجوز

هناك 23 تعليقًا:

سلوى يقول...

دي عمله تعمليها
قواك العقليه يا صفاء
في ناس عايزينك يا بنتي
بتتفرجي على ايه بس
جومي جومي شوفيلك حاجه تانيه الله يهديكي

صفــــاء يقول...

بس يا سلوى يا اوختشى دى فرجه من السنه للسنه بستناها حاجه كدة زى طلوع القرافه
وربنا ما بضحك على حاجه قد ما بضحك عليها

البنفسج الحزين يقول...

أولا دمك زي العسل أنا موت من الضحك علي الوصف الشافي والمفصل للمسرحيه الهزليه والموسم ده بقت (الكوميديه )بمناسبه انها في ليبيا...
ثانيا بقا انتي اللي غلطانه
هي دي برضه يا بنتي
أشكال الواحد يتفرج عليها ولا حاجه الواحد يضيع فيها وقته الطخين قصدي الثمين...أنا رأيي يعملوا الشعار السنه دي أغنيه هنروح المولد بتاعه المناضل الكبير سعد الصغير...

Che يقول...

هو الناس كلها مصممه تبات فى امن الدوله ولا ايه
بالنسبه للتكاتك فده عشان الساده روساء و ملوك الدول ميتعبوش و يوفرو التعب ده للخناق جوه المؤتمر
و طبعا بما ان القذافى موجود فدايما بيخلو الجلسات مغلقه عشان الراجل ده زيه زى واحد حبيب مصر كلها دلوقتى عنده ملفات لكل الناس و لسانه قبيح
و بعدين لو دول هيبقو الليله الكبيره بيقى لازم نقسمهم و نوزع عليهم الادوار عشان محدش يتلخبط فيهم

صفــــاء يقول...

البنفسج الحزين
****************
أولا يا جومر تشكرى دة من ذوقك وعثلك بس
القمه العربيه هى دائما نكته الموسم وكل موسم بفضل مادتها المتجددة من الفكاهه والضحك

وصدقينى بضيع وقتى الطخين عليهم لأنى بحب موووت اتفرج عليهم وبستناهم عشان اشوف السنه دى مين هيشتم مين

--------------------

Che
****
الرفيق المناضل
لحد أمن الدوله وهييييه كل من عليها فان
مجهود ايه بس اللى يوفروة للخناق هما فيهم حيل اصلا يتنفسو ؟
دة الحاجه الوحيدة اللى مخلياهم مستمرين فى الحركه هو القصور الذاتى
قصورنا احنا فى محاولاتنا زحزحتهم من على نفسنا شويه
شيلو من فوقى لأمووووته

قديسك مولاتى يقول...

ههههههههه.. يابنتى اتهدى شويه لسان ده ولا مبرد حدادى !! شوفى انا مااسمحش انك تغلطى فى الليله الكبيره .. قصدى مؤتمر الرمه العربى . دول برضوا مهما كان فى سن جدى جد اللى خلفونا ومصرين انهم يؤدوا دورهم لحد ما ملك الموت يفتكرهم وراسهم والف سيف ماحد يتعب نفسه وياخد الحكم منهم .. عشان وجع الدماغ !! شوفتى قد ايه انتى ظالمه الناس دول يامفتريه. وبخصوص اللغه اللى بيتكلموها ده تمويه ياعبيطه عشان الحسد اصلهم ياحرام مابيسلموش من كلام الناس ،يشوفوهم بيتكلموا كويس يقولوا: شوفوا الراجل رجل فى الدنيا ورجل فى الاخره ومابيتهدش .. يرضيكى كده؟ يعنى افرض حد منهم انطس عين نجيب منين واحد تانى نضمن انه هايعمر الف ولا الفين سنه فى الحكم!! وبخصوص التوك توك اللى مش عاجبك دى خدمه عاملينها الحكام عشان مشروع شباب الخرجين ، يعنى الشاب منهم يلقطلوا كام دولار يعشى بيهم العيال !! انتى بالذمه بتقبضى مرتبك بالدولار .. ده بما اننا بنتكلم عن مؤتمر عربى اصيل !! ياصفاء يابنتى الناس دول هما الخير والبركه وعلى راى المثل ( ابويا يبقى شوية عضم فى شيكاره وكفايه منه الاشاره) .. انتوا دايما كده جيل مندفع ومتهور .. انا مش عارف بتجيبوا الكلام الغريب ده منين ؟!! شويه واحد يقولى ديمقراطيه وواحد تانى يقولى عروبه .. هو فى احلى من كده عروبه .. ده كفايه انهم فاكرين إن فى مؤتمر قمه عربى لازم يحضروه .. دول لحد مابيوصلوا قاعة الإنسجامات.. قصدى المؤتمرات وهما فاكرين انهم رايحيين يحضروا مهرجان الاوسكار . !!

بحر الالوان يقول...

أنعي لكم، يا أصدقائي، اللغة القديمه

والكتب القديمه

أنعي لكم..

كلامنا المثقوب، كالأحذية القديمه..

ومفردات العهر، والهجاء، والشتيمه

أنعي لكم.. أنعي لكم

نهاية الفكر الذي قاد إلى الهزيمه


نزار قباني

صفــــاء يقول...

قديسك مولاتى
************
والله على عيني وانا بشبه مؤتمر الرمه بالليله الكبيرة
لأنى بحب قووووى الليله الكبيرة
دى ذكريات الطفوله والحب الأول يا مجدى

وبعدين كام دولار ايه اللى هياخدوهم الشوباب من العالم الجثث دول
كانو ادوهم من خير بلادهم اللى امالين يلغو فيه ويجيبو بيه عربيات كهربا ولعب اطفال

سبنا الحكمه والأصاله والعراقه ليك يا جدو مجدى
وحياتك انت ما بيخطو مؤتمر قمه واحد الا لما يبقو ضامنين ان رئيس الدوله المضيفه عامل برنامج ترفيهي وضاحك عليهم ومفهمهم انه هيوديهم شارع الهرم او مونو

------------------

بحر الألوان
************
وجوهكم أقنعة بالغة المرونة
طلاؤها حصافة، وقعرها رعونة
صفق إبليس لها مندهشا، وباعكم فنونه
".وقال : " إني راحل، ما عاد لي دور هنا، دوري أنا أنتم ستلعبونه
ودارت الأدوار فوق أوجه قاسية
تعدلها من تحتكم ليونة
فكلما نام العدو بينكم رحتم تقرعونه
لكنكم تجرون ألف قرعة لمن ينام دونه
وغاية الخشونة
أن تندبوا : قم يا صلاح الدين ، قم حتى اشتكى مرقده من حوله العفونة
كم مرة في العام توقظونه
كم مرة على جدار الجبن تجلدونه
أيطلب الأحياء من أمواتهم معونة
دعوا صلاح الدين في ترابه واحترموا سكونه
لأنه لو قام حقا بينكم فسوف تقتلونه
احمدمطر

حلم بيعافر يقول...

التعليق بتاعى راح فيييييييييييييييين؟

أحــوال الهـوي يقول...

الخيبه الكبيرة يا عمي و العالم كتيره
ماليين المجاري يابا و الريف و المداين

للاسف كل اللي قلتيه صح من تهتهه و كهولة و قله قيمة
بس نسيتي الاطفال المعجزة رئساء الدول الناشئين تحت خمس سنوات اللي بقالهم في الحكم وقت قليل

و امراء الحضانات اللي كل واحد حاكم دولة في حجم المنيا و بيتكلم عن النهضة و التقدم
و اللي بيحكم بلد مغيبة بالقات و كل مدينه بها حكومتها الخاصة و بيتكلم عن الدميجراطية
و الا رئيس دولة قناة فضائية هي اللي عملتها

ربنا يكرمك خلتيني اتقيأ شجوني

تحياتي

صفــــاء يقول...

حلم بيعافر
************
أسفه يا صديقي .. ماوصلنيش منك تعليق غير دة

-------------------

أحوال الهوى
************
دورى الحكام الأطفال يبدأ من عبد الله أبو الأردن وبشار ومحمد السادس والواد الأقرع ابن القذافى
أما أمارات الحضانات
ماسمحش لك تشبه علب السمن اللى بيحكموها بمحافظه المنيا
دى محافظه كبيرة تعمل 6 او 7 امارات مما يعدون هع هع هع

انا مأكلتش ملبن بس الصراحه كلت على قفايا ... ينفع ؟

sal يقول...

لابد أن نقرأ، أو نسمع، هذه الجمل:

لمواجهة التحديات التي تواجه الأمة العربية.... ولاتخاذ القرارات المناسبة التي تتماشى مع ما يتطلع إليه المواطن العربي.... تكون على مستوى التطورات الاقليمية والدولية... الضغط على إسرائيل لتنفيذ قرارات الشرعية الدولية.... مناشدة المجتمع الدولي التدخل لإنقاذ الفلسطينيين... المطالبة بالإنسحاب الفوري من الأراضي العربية المحتلة... المطالبة بتنفيذ قرارات الأمم المتحدة المتعلقة.... إدانة إسرائيل على ما تقوم به من هجمات واعتداءات....

ولكن ......حقيقة الامر


في قـِــمَّة ٍ للعـُـهْر يأتي القــوم ُ ثانـية ً
كـَنافِـخ ِ الكِـيْر ِ غير َ الحـَـرْق ِ ما غـَنِمـا
فـَـتافِه ٌ ســـوف يُـزْجـِـينا نصـائــِحـَه
وجـاهِل ٌ – بامـتياز ٍ – ينــشر ُ الحِـكـَــما
وتاجــر ٌ ســـيُغـطـّي قــُــبح َ سـَــوأتِـه ِ
بخـُـطبة ٍ تــُــشـعل ُ النـيران َ والحـِــمَمَـا
أمـَّـا العميــل ُ فحـَدِّث ْ عــنه ُ لا حـَــرَج ٌ
فـسوف َ يـُصبح ُ نِـسرا ً يـَـذرَع ُ القـِـمـَمَا
لـــو الرجــولة ُ للأقـــوال ِ مـَرْجــِـعُـها
كان الأتـان ُ لأ ُسـْــد ِ الغاب ِ قــد حـَكـَما
سـَـتـَضـْرُطون َ بـــيانا ً فــــيه ذِلـَّـتــُـكـُم
ينـْعـى المروءة َ والأخــلاق َ والــشَّـمَـمَا
هــذا البيان ُ بـِبوْلـي ســـوف أنـقــَعـُـه ُ
لأنـــــه لا يســـاوي الحـِبـْر َ والـقـَـــلما

حلمى البعيد يقول...

صفصف إزيك ياجميل

حلوه الليله الكبيره أنا كنت بتفرج عليها

هههأ سعيده دى البدله جديده

لالالا أنا مخرفتش ولا حاجه البدله دى تبع الليله

تسلمى يا صفاء

صفــــاء يقول...

sal
******
أسمع نفس الكلمات ... تقرأ من نفس الورقه منذ ما يزيد عن 20 عاماً
أعتقد انهم لم يغيروها او يكتبو غيرها منذ القمه الطارئه وقت احتل العراق الكويت
واسمح لى ان أستعير باقى قصيدة الدكتور احمد المقدسى (أنا أيضا من متابعى عرب تايمزههههه وإن كان أسامه فوزى يتمتع بسلاطه لسان فااائقه )

يا أمة ً تحتسي الأوهـام َ صـاغِـرة ً مـِـن ْ مـُجرم ٍ أصـبح الجـَلاد والحـَكـَما
مـِن َ المحيط ِ إلى رُكـْن ِ الخليج أرى نـَيْرون َ عـاد َ وفي أعماقـِنا جـَـثـَمَا
والقدس ٌ صارت لدى العربان ِ جارية ً يُقايـضون َ بـها التيـجان َ والعـَـلـَما

ومـَــــن ْ يبيع ُ فلســطينا ً ومـَــسجدها
مـِـن َ المـُحال ِ يـَصون ُ البيت َ والحـَــرَما

يا شـَعـْب َ يَعـرُب هذا اليوم َ فـُرْصتـُكم
تحـــرَّكوا وامـلؤوا أفواهـَـهـَم جـِـــزَمَا

-----------------

حلمى البعيد
*************
قمرى الجميل جدا المنور

دى أروع ماقدم الفن المصرى وأقواة واجمله
الليله الكبيرة
انت مش بتخرف يا جميل هى فعلا البدله جديدة وعشان كدة كله خايف عليها
وخايف يعمل حاجه

منورانى حبيبي

r يقول...

هههههه
هى مسرحيه صحيح
بس معقوله بردوا تشبيها بالمسرحيه الجميله فعلا
الليله الكبيره
ايش جاب لجاب يا صفاء
انا ما بحبهومش من الاساس
ومقاطعه التلفزيون الا القناه التانيه الارضى بتعرض مسلسلات وافلام جميله فعلا

وهما كهنه ولازم يتكهنوا فعلا
لاننا خلاص مش قادرين
طفح الكيل وغرقنا كمان

وبالنسبه لفقره القذافى دى يمكن الوحيده اللى ممكن اتفرج عليها
كفاصل كوميدى

فتــافيت (رحاب الخضري) يقول...

هههههههههههههههههههههه
جميلة اوي الفقرة الاولى والتالتة

الفقرة التالتة ديه بستناها من القمة للقمة بصراحة
حاجة كده تهلك من الضحك.. لا واللي مسخرة بجد المرة ديه
لما القذافي حب يستخف دمه على حمد .. ههههههههههههههههههه وقاله بس انت كنت مالي الكرسي اوي
عثل عثثثثثثثل :))

حلو البوست يا قمر

خواطر شابة يقول...

الحل

انا لو كنت رئيساً عربيا
لحللت المشكلة…
و أرحت الشعب مما أثقله…
أنا لو كنت رئيساً
لدعوت الرؤساء…
و لألقيت خطاباً موجزاً
عما يعاني شعبنا منه
و عن سر العناء…
و لقاطعت جميع الأسئلة…
و قرأت البسملة…
و عليهم و على نفسي قذفت القنبلة…

أحمد مطر

هناك كاريكاتير رأيته في جريدة محلية فيه مجموعة من الناس متحلقين حول التلفاز وقهقهاتها تملأ المكان شخص مار سألهم ماذا تشاهدون مدرسة المشاغبين أم الزعيم أجابوه بصوت واحد نشاهد القمة العربية

استراحة محمد يقول...

كل مرة وكل سنة ولحد اخر شهقة ليا فى الدنيا يظهر ، وانا بشوف القمة دى ما بقولش غير كلمة واحدة
اين انت يا محمد يا على
يعملنا مذبحة القمة وينوبه ثواب

صفــــاء يقول...

بسنت
******
والله فى أشد حالات الأعتذار انى أستعرت أسم شئ بحبه قووووى كدة عشان شئ تافه قوووى كدة بس لقيت ان فيه فقرات كتير تشبه للسيرك فى المسخرة العربيه المستمرة دى والقافيه حكمت بقى
القناة التانيه أتطورت كتيييير وبقت متميزة فعلا

القذافى هو نكته الموسم وكل موسم إلى أن يشاء الله وينتقل للرفيق الأعلى عشان يضحك الملايكه عليه

--------------------

فتافيت
********
هلا هلا يا قمر
منور وربنا .. هو انا فى ديك الساعه لما الاقى تعليق منك
لو كنت اعرف كنت فرشت المدونه سكر

اة الفقرة دى لما استظرفو على بعض وقالو بس انت اقدر منى على ملء الفراغ
لو كان صوتى ممكن يوصل كنت صرخت فى التليفزيون ان هما الأتنين مايملوش فراغ عنزة

أسعدنى جدا ان البوست عجبك يا جميل

--------------------

خواطر شابه
************
كل الأحترام والتقدير لأحمد مطر وأشعارة البديعه

طيب والله ما بهزر يا خواطر يا اوختشى لما بقول ان أكتر شئ بيضحكنى على كل التليفزيون هى مؤتمرات القمه ووالله بضحك بمليون جنيه وكفايه مسخرة شكلهم وهما بيقرأو خطابتهم من الورقه
وحتى مش عارفين يقروها
منور يا قمر

------------------

أستراحه محمد
**************
دول مش عايزين محمد على ومذبحه القلعه
دول عايزين واحد صرماتى يدوب نعل الجزمه على دماغهم

منور يا بو حميد

إيناس حليم يقول...

هههههههههههههههههههههه
بجد نفسك الساخر مش ممكن
بصراحة انا مبحبش اتفرج على الحاجات دي علشان عامة مبحبش المسرحيات
بس مدام بضحك اوي كدة زي ما انتي كاتبة هبقى احاول اشوفها :))

تحياتي يا جميلة

Hesham يقول...

انا راى ان احلى مافى التليفزيون انك تقفليه وتسمعى اذاعة الموسيقى مثلا

همس الاحباب يقول...

هههههههههههه
يا خسارة فاتنى حمص وحلاوة وفقرة الاراجوز
كنت منفى فى الصعيد ومقاطع الوسائل التكنولوجية وخاصة المفسديون
يلا خيرها فى غيرها والبركة فيكى تكملنا باقى فقرات السيرك العربى
بس وحياة راس جاموستنا ما تنسى حاجة
تحياتى

صفــــاء يقول...

إيناس حليم
***********
ربنا يكرمك يا باشمهندسه
الحاجات دى نصيحه أخويه صعيديه أتفرجى عليها قوى جدا لأنها أجمل من كل المسرحيات الهبله اللى بيعرضوها علينا على الأقل هنا حاجه تستحق الضحك والمسخرة

منورانى جدا يا قمرة

----------------

Hesham
********
وانا أرى أنى أسمع عبد الحليم وفايزة احمد أحسن من الأتنين

----------------

همس الأحباب
************
ماعلش يا خالد خيرها فى غيرها والقمم كتير وربنا يزيد ويبارك فى القمم وفى الأرجوزات اللى بيرأسوها
وحمدالله على سلامتك برجوعك من الصاعيد يا خال